"O noso obxectivo é potenciar a contratación pública socialmente responsable na maior cantidade de áreas posibles". Así se explica desde o Ministerio de Defensa a súa decidida aposta por impulsar a adquisición de produtos e servizos TIC accesibles no marco do Plan Integral de Apoio á Discapacidade nas Forzas Armadas, que acaba de cumprir o seu primeiro aniversario.
Segundo asegurou o subdirector de Custos de Recursos Humáns do Ministerio de Defensa, Enrique Cortés, en declaracións a Servimedia, para iso Defensa está a tentar "facer compatible a mellor xestión desde o punto de vista económico e técnico coa introdución de cláusulas sociais nos contratos".
O resultado deste novo enfoque na contratación conseguiu, en palabras do alto funcionario do departamento, "que o Ministerio dese un forte impulso nos últimos anos á adquisición de proxectos e servizos TIC accesibles", un fenómeno que se produciu nun contexto dunha maior preocupación xeral polos temas de accesibilidade.
Nestas datas cúmprese o primeiro aniversario da aprobación do primeiro Plan Integral de Apoio á Discapacidade nas Forzas Armadas, que ata agora tivo como principal fito a apertura da Oficina de Atención á Discapacidade das Forzas Armadas.
"Estamos contentos cos resultados obtidos ata a data", subliñou o subdirector de Custos de Recursos Humáns do Ministerio de Defensa. "O Plan Integral leva a unificación de todas as políticas relativas á discapacidade no noso ámbito de actuación e, ademais, ofreceu unha referencia clara a todo o persoal militar con discapacidade", engadiu.
A día de hoxe, o Ministerio de Defensa é un dos órganos da estrutura do Estado mellor adaptado aos parámetros establecidos polo novo Estándar Europeo de Accesibilidade (EN 301 549), que o Goberno debe transpor nos próximos meses -o prazo para facelo venceu o pasado 16 de abril- e que, entre outras cuestións, obriga a que todos os portais web das administracións públicas sexan accesibles.
Algo que non será un problema para o Ministerio de Defensa, cuxa web xa ten unha cualificación AA (unha especie de notable alto) en materia de accesibilidade para persoas con discapacidade e utiliza ferramentas de seguimento que teñen en conta a experiencia de usuario para garantir que, en efecto, todos os contidos sexan accesibles.
A asociación Ponte nas ondas! está a impulsar nos centros escolares a formación avanzada en radio dixital, amais dun portal que sexa o alicerce divulgativo dos centros con vertente comunicativa a través destas canles. A iniciativa Escolas nas Ondas ten ademais o obxectivo de ligar as nosas radios dixitais escolares coa comunidade galego-portuguesa internacional, o que se coñece como lusofonía. Segundo puidemos saber, a intención é abranguer 34 centros de ámbalas beiras da raia. As rapazas e rapaces terán oportunidade de iniciarse no xornalismo radiofónico e nas ferramentas tecnolóxicas que o fan posible na actualidade.
Máis en detalle, haberá obradoiros de formación arredor de podcasts e de metodoloxías para difundir estes arquivos nas redes. Tamén se impartirán contidos sobre (por exemplo) as utilidades da nube, o potencial das redes sociais para distribuír e espallar contidos ou como subir á Rede un podcast ou un audioblog. En total, serán 34 accións formativas.
O portal será dado a coñecer no mes de febreiro, coincidindo co Día Mundial da Radio. A asociación Ponte nas ondas!, en colaboración coa Consellería de Cultura e Educación, será a encargada de desenvolver estes obradoiros. Máis en detalle, a comezos de 2017 arrincará o segundo curso de formación para profesorado sobre a creación de podcasts e a posta en marcha de radios dixitais. Este curso será impartido por un profesional da radio a través de Internet.
Os obxectivos que se perseguen, sinalan dende Ponte nas ondas!, son fundamentalmente “o fomento de radios dixitais realizadas polo alumnado e a integración en plataformas sociais de comunicación para a difusión dos contidos”.
A empresa galega Televés, centrada en achegar servizos de telecomunicacións, vén de participar no proxecto Smart Assist, unha solución para emprestar apoio a persoas con discapacidade, maiores que precisan coidados ou persoas con necesidades especiais, sen esquecerse dos seus coidadores. Cómpre dicir que nesta aposta tamén están implicadas outras tres entidades relacionadas coa asistencia socio-sanitaria: Fundación Tecsos, Fundación Vodafone España e Universitat Politècnica de València.
Indo ao proxecto, Smart Assist parte de tecnoloxías como a Internet das Cousas (IoT) e a análise de datos masivos (Big Data Analytics) para desenvolver solucións intelixentes que permiten personalizar a atención creando unha contorna que integra teleasistencia móbil e domiciliaria, favorecendo ao máximo a seguridade e accesibilidade, á vez que respecta e promove a autonomía e intimidade das persoas. Nesta iniciativa tamén se conta coa axuda de desenvolvementos como CareLife, a solución de teleasistencia ubicua desenvolvida por Televés, Cruz Vermella Española, Fundación Vodafone e Fundación Tecsos.
Cómpre salientar deste proxecto a integración da solución coas plataformas de IoT máis senlleiras, como FIWARE, SOFIA2 ou UniversAAL, de maneira que se estenda o alcance e a interoperabilidade dos servizos achegados. Smart Assist conta cun orzamento de case un millón de euros e un prazo de execución que vai dende setembro de 2016 a decembro de 2018.
A Deputación de Lugo vén de facer reconto da cifra de asistentes ás actividades desenvolvidas ao longo deste cuarto trimestre ao abeiro da iniciativa InLugo. Segundo fai saber a entidade provincial, máis de 400 maiores de toda a provincia participaron nas distintas accións encamiñadas a introducir ás persoas da idade nas moitas utilidades e funcionalidades (e recursos saudables) das tecnoloxías da información. Estas novas cifras de seguimento de InLugo, programa xestionado pola Fundación TIC da Deputación, foron dadas a coñecer polo vicepresidente da Deputación, Álvaro Santos, que visitou os días pasados un dos cursos gratuítos que se imparten na sede da Fundación, en concreto, o titulado: Escribe no ordenador empregando un editor de texto. Como o seu nome indica, trátase dun obradoiro para introducir aos participantes (neste caso un total de 15) no manexo do teclado do computador e os aspectos máis básicos dos procesadores de texto.
“Con este curso de balde”, sinala a Deputación, “xa son 19 os cursos impartidos na sede de InLugo, dos 29 programados para os tres últimos meses do ano, nos que houbo máis de 200 participantes”. A entidade provincial tamén salientou que as prazas para os outros 10 “xa están cubertas desde o mesmo día que se abriu o prazo de inscrición”. De feito, “para as 354 prazas previstas houbo 575 inscricións en tan só seis horas”, engadiu.
AlimentaTIC
AlimentaTIC, o programa de obradoiros da Deputación que bota man das novas tecnoloxías para favorecer e impulsar hábitos alimenticios saudables entre os maiores da provincia, tivo no mes de outubro un amplo seguimento. De feito, no mes de outubro participaron arredor de 200 persoas nos cursos que houbo en Láncara, O Corgo, Guitiriz, A Pontenova e Trabada e na conferencia do especialista en nutrición, Manuel Antonio Botana. Lembrar que o luns 7 de novembro AlimentaTIC chegou a Burela, achegando un obradoiro sobre novas ferramentas dixitais e nutrición que contou coa presenza da deputada de Economía, Mayra García, e o alcalde da localidade mariñá, Alfredo Llano. Neste mes de novembro o programa de alimentación saudable tamén chegará a Paradela, Pol e Ourol.
Recordos a través do móbil
Por outra banda, a Deputación de Lugo tamén recordou na visita ao curso sobre procesadores de texto que no último trimestre de 2016 a Fundación TIC desprazarase por toda a provincia para impartir 15 obradoiros sobre o uso do móbil coa finalidade de gravar recordos dos lucenses participantes que formarán parte do arquivo Memoria Dixital Lugo. “Trátase”, sinalou a entidade provincial, “dun programa pioneiro na nosa provincia, especialmente dirixido aos maiores, pero aberto a todos os lucenses interesados en contar os seus testemuños”. Memoria Dixital Lugo(www.memoriadixitallugo.es) inclúe vídeos, audios, fotografías antigas e diversos documentos “que axudarán a coñecer mellor a historia recente da nosa provincia, especialmente a da primeira metade do século XX”. Todas estas actuacións desenvólvense no marco do programa de Promoción da Autonomía Persoal dos Maiores da Provincia, que xestiona a Fundación TIC a través dunha encomenda da Deputación.
Aínda que de nacemento recente, o robot educativo mBot de Makeblock xa se fixo un oco nun mercado au auxe, como é o da tecnoloxía educativa. As súas virtudes: fácil, sinxelo, versátil e, sobre todo, económico.
Hoxe analizamos o mBot de Makeblock, e falamos da súa montaxe, dos primeiros pasos e das posibilidades que ofrece como ferramenta educativa para o aprendizaxe da programación a través da robótica. Que pode ofrecernos un robot de menos de 90 euros? Imos a velo a continuación.
A gama de robots mBot de Makeblock son unha serie de xoguetes, con todas as da lei. Ou alomenos así se presenta: creado por makeblock tras unha exitosa campaña en Kickstarter en 2012, a compañía continuou deseñando, desenvolvendo e poñendo á venda diferentes modelos de robots.
De todos eles, mBot é o máis sinxelo e o mellor posicionado para a educación, sendo ademais o máis parecido a unha especie de vehículo simple. Sinxelo: rodas, motores e un pequeno mecanismo de xiro, aderezado con uns cuantos sensores (distancia, luz, son) para ampliar a súas posibilidades.
Seguir lendo na fonte da noticia
Existen estereotipos de xénero á hora de elixir unha carreira universitaria? Por desgraza si, así o demostran as matrículas universitarias, que reflicten que aínda hai profesións masculinizadas e viceversa. Para falar sobre este tema, reuníanse onte na Escola de Enxeñaría de Telecomunicación de Vigo varias expertas e expertos nunha xornada titulada A muller tecnóloga na Universidade, unha iniciativa organizada polo grupo de investigación AF4 da Escola de Enxeñaría Forestal. Entre os asistentes estaba Fátima Otero, investigadora deste grupo e impulsora da xornada que xorde parella ao desenvolvemento dun proxecto piloto sobre o emprendemento da muller tecnóloga no rural.
A finalidade deste encontro era fomentar a visibilidade do papel e do traballo da muller con formación tecnolóxica e científica no eido académico, investigador e empresarial. As participantes deste encontro coincidiron en salientar a necesidade de crear referentes femininos nestes eidos para promover as vocacións entre as estudantes de ensino secundario. Para facérmonos unha idea da magnitude do problema: a porcentaxe de alumnas na Universidade de Vigo é do 51%, no eido tecnolóxico redúcese ao 23% e na Enxeñaría Informática limítase ao 17%.Unha das relatoras da xornada, Milagros Sáinz (directora do Grupo de Investigación Xénero e TIC da Universitat Oberta de Catalunya) indicaba que a presenza de mulleres nos ámbitos tecnolóxicos é baixa, particularmente na Informática (14%). Tamén son eidos con moi pouca presenza feminina as Telecomunicacións, a Enxeñaría Electrónica ou a Enxeñaría de Minas; mentres a Enxeñaría forestal está arredor do 32% ou a Enxeñaría Química que está case equiparada. O apartado das ciencias ten a menor presenza de mulleres e as matemáticas e a física están fortemente masculinizadas. Pola contra, bioloxía ou medicina son xa titulacións feminizadas (máis do 70%).
Outro aspecto que inflúe neste senso é a falta de referentes femininos entre o profesorado de secundaria, xa que os docentes das materias relacionadas coa tecnoloxía son maioritariamente homes (95%). O mesmo acontece na educación formal, con pouca presenza feminina salientada nos libros de texto, o que se traduce na invisibilización de mulleres e das súas contribucións aos ámbitos tecnolóxicos. A xornada da EE de Telecomunicación completouse cun relatorio de Carmen Iglesias Escudero (directora xeral do Centro Tecnolóxico EnergyLab) e coa presentación de casos profesionais e académicos por mulleres tecnólogas na que participaron Beatriz Novoa (científica do Instituto de Investigacións Mariñas), Coral del Río (catedrática do Departamento de Economía Aplicada) e Ana Mª Ulla (profesora da Área de Astronomía e Astrofísica), ambas da Universidade de Vigo.
Ao longo do presente ano o Espacio Working_ no primeiro andar do Centro Comercial Espacio Coruña acolleu varias edicións dos relatorios #charlasdigitalesEC impartidos polo xornalista e blogueiro Manolo Rodríguez, cos que pretende atender a unha clara demanda de formación sobre o aproveitamento persoal e profesional das redes sociais, e que o vindeiro sábado ás 11:30 horas celebrarán a súa derradeira edición co tema Tendencias tecnolóxicas: o futuro é agora.
O encontro de acceso libre estará composto por unha intervención de 45 minutos seguida dunha quenda de preguntas de 15 minutos, e abordará o futuro das redes sociais, repasará o presente e o futuro dos dispositivos móbiles e incluso achegarase a tecnoloxías que tanta visibilidade teñen ultimamente como os wearables, o Big Data e a Internet das Cousas.
O Clúster TIC Galicia vén de convocar novamente os seus galardóns, uns recoñecementos destinados a visualizar, impulsar e distinguir o labor de “todos os axentes comprometidos co desenvolvemento do tecido produtivo baseado na Sociedade da Información”. En palabras dos responsables da plataforma, os Premios Clúster TIC Galicia “poñen de relevo ante a sociedade o traballo das empresas, profesionais ou entidades que deseñan, programan, desenvolven, implantan ou usan produtos ou servizos galegos que teñen na innovación e no uso das novas tecnoloxías a súa razón de ser”. As distincións artéllanse nas seguintes categorías: Innovación, Internacionalización, Liderado TIC, Start-ups e Software Libre. Ás devanditas úneselles unha modalidade nova: a de Márketing Dixital.
O requisito fundamental para aspirar a estes premios é que a candidatura veña da man dunha empresa que realice proxectos no eido das novas Tecnoloxías da Información e as Comunicacións (TIC), “ben sexa como provedora ou como entidade usuaria de produtos e servizos TIC galegos”. O Clúster, para elixir as entidades finalmente premiadas, dará forma a un comité avaliador experto. Os nomes das gañadoras daranse a coñecer na gala de entrega de premios, logo da votación do xurado e de que se publique unha listaxe con tres finalistas por categoría. Por seren galardóns de honra que distinguen a calidade, os premios non comportan dotación económica, pero tanto os gañadores como os finalistas recibirán trofeos representativos e exclusivos. Os interesados en presentar unha candidatura deberán facelo de maneira exclusiva a través da web www.clustertic.gal, cubrindo o formulario en liña e axuntando a documentación que consideren oportuna. O prazo remata o vindeiro domingo 20 de novembro ás 23.59 horas.
Anterior edición
As entidades Avansig (Innovación), Quobis (Internacionalización), Altia (Liderado TIC), Brookesia Design and Technologies (Start-ups) e Igalia (Software Libre) foron as gañadoras dos Premios Clúster TIC Galicia 2015. Os representantes das cinco devanditas empresas recolleron os seus galardóns nunha gala que se desenvolveu o 29 de outubro de 2015 no marco do evento LibreCon, na Cidade da Cultura de Galicia, en Santiago de Compostela. Segundo lembra o Clúster, as iniciativas distinguidas abranguían iniciativas de internacionalización e desenvolvementos tecnolóxicos nos eidos dos drons, as aplicacións móbiles para vehículos, os trebellos multifunción e as plataformas para set-top-boxes de operadoras. Dun total de 34 candidaturas presentadas, o comité avaliador experto seleccionou 15 finalistas, tres por cada unha das categorías desa primeira edición: Innovación, Internacionalización, Liderado TIC, Start-up e Software Libre.
A iniciativa de crowdworking que Telefónica impulsa na nosa terra, o centro de emprendementoGalicia Open Future, segue a ser fonte de achegas innovadoras e revolucionarias, de gran potencial para loitar contra problemas sociais, atrancos comunicativos ou doenzas concretas. Un exemplo disto é o proxecto iQ-Brain, un software de axuda ao diagnóstico médico, encamiñado á detección temperá de doenzas neurodexenerativas: demencia, alzhéimer ou párkinson. O dito software levouse a cabo na empresa da Coruña Qubiotech, creada como unha spin-off dun grupo de investigadores do Servizo de Medicamento Nuclear e Imaxe Molecular do CHUS, apoiado pola Fundación Ramón Domínguez.
Volvendo a iQ-Brain, cómpre dicir que foi deseñado para complementar a análise visual de imaxes e contribuír á realización de diagnósticos máis exactos. Automatiza a cuantificación de imaxes PET (Tomografía por Emisión de Positróns, en inglés Positron Emission Tomography) e a fusión de PET con RM (Resonancia Magnética), “facendo máis doado o labor do médico nuclear”.
En canto ao seu manexo, os seus creadores fan fincapé “na súa sinxeleza”. De feito, explican, ao ser unha plataforma web, o médico só ten que subir a imaxe PET/RM (coma un Dropbox), a ferramenta analízaa e localiza as diferenzas entre o doente a valorar e unha base de datos de pacientes sans, e en arredor de 6 minutos, emite un informe cos resultados, no que se amosa información visual e cuantitativa. Unha das súas vantaxes é que iQ-Brain só emite a información que o médico precisa, podendo así encaixar o seu uso cotián, amais de dispor dunha validación clínica exhaustiva. Arestora, IQ-Brain estase a empregar no Complexo Universitario de Santiago de Compostela. Con máis de 400 pacientes analizados, os resultados indican unha mellora no diagnóstico no 20% dos casos.
De cara a súa expansión, dicir que nunhas semanas o software IQ-Brain será probado noutros hospitais españois para melloralo e adaptarse á normativa europea, pensando xa en comezar a súa andaina comercial por España e nun futuro dar o pulo internacional.
Pertencente á Canle Fundación ONCE en UNED Aberta, colabora o Ministerio de Sanidade, Servizos Sociais e Igualdade.
Este curso, de carácter introdutorio, permite comprender e aplicar os principios do Deseño para Todos e os Produtos de Apoio nas Tecnoloxías da Información e as Comunicacións (TIC), tomando como basee fundamentos da Interacción Persoa-Computador. Os contidos do curso son accesibles con nivel AA segundo as WCAG 2.0 de WAI.
Dirixido a calquera persoa interesada en coñecer que son o Deseño para Todos e os Produtos de Apoio, e a súa relación coas Tecnoloxías da Información e as Comunicacións (TIC), tales como traballadores sociais, profesores de estudantes con discapacidade, asistentes persoais, profesionais da comunicación, enxeñeiros, programadores, etc.
O curso iníciase en novembro e dura 4 semanas, non se requiren coñecementos previos, e cada estudante ten a posiblilidade de obter o recoñecemento ou a acreditación polos méritos conseguidos.
Obxectivos
Adquisición de competencias e habilidades para que no exercicio diario da profesión se teñan en conta os principios da Accesibilidade Universal e os Produtos de Apoio.
Temario
1.- Sociedade da Información, para todos?
2.- Accesibilidade e usabilidade TIC
3.- Interface de usuario
4.- Retos e estratexias para mellorar a accesibilidade das TIC: Deseño para Todos
5.- Produtos de Apoio, valor de negocio da accesibilidade, leis e normativa
6.- Interfaces de usuario, Deseño para Todos e produtos de apoio
7.- Exemplos de Produtos de Apoio TIC
Máis información do curso e acceso á súa inscrición e ligazón ao vídeo de presentación da canle.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...