O Centro de Educación Especial Juan María, de Nigrán, recibiu os días pasados un importante recoñecemento estatal polo seu traballo a prol da integración educativa, social e laboral pola vía das novas tecnoloxías da información. Para felicitar ao centro, o conselleiro de Cultura e Educación, Román Rodríguez, visitou as súas instalacións este martes 25 de outubro. Durante a súa estadía, Rodríguez salientou “o seu espírito emprendedor e innovador”. Como lembraremos, o centro foi distinguido hai uns días co Premio SIMO Educación ao Mellor Proxecto TIC en educación inclusiva, igualdade e diversidade.
A orixe e o motivo deste premio están no proxecto Os videoxogos no camiño cara a inclusión, unha iniciativa impulsada para dar resposta á necesidade de aumentar o acceso ás novas tecnoloxías a persoas con diversidades funcionais e cognitivas.
Na súa visita, Román Rodríguez sinalou este centro como “un exemplo de esforzo, superación e unión de forzas cara obxectivos comúns que o son de todo o sistema educativo galego: tolerancia, respecto, inclusión e valoración da diversidade”. Durante a súa estadía o conselleiro estivo acompañado polo coordinador do mesmo, Alberto González da Rosa, e pola súa directora, Soledad Pazo. Así mesmo participaron na visita a secretaria territorial da Xunta en Pontevedra, Yolanda Lesmes; e o xefe territorial da Consellería na provincia, César Pérez Ares. Volvendo ao recoñecemento de SIMO Educación (cuarta edición), entregouse este venres 21 de outubro no marco do evento do mesmo nome, celebrado no recinto IFEMA de Madrid entre unha manchea de representantes do ámbito das novas tecnoloxías e a educación. O proxecto Os videoxogos no camiño á inclusión recibiu o apoio da Obra Social La Caixa para a habilitación e posta en marcha dunha sala multimedia que contase con todo tipo de equipamentos informáticos accesibes: pantallas, videoconsolas, computadores, un equipo de son, tabletas e mesmo unhas lentes de realidade virtual. Este recanto foi concibido para desenvolver unha formación plena a través das TIC para colectivos con todo tipo de diversidades.
Segundo a directiva europea sobre accesibilidade web, que podería entrar en vigor a partir do próximo mes de novembro, os portais públicos non só deberán ser accesibles senón que, ademais, deberán remitir documentos que verifiquen dita accesibilidade.
A este respecto, Elena Muñoz, xefa da área de Sistemas Telemáticos do Ministerio de Facenda e Administracións Públicas, afirmou que "esta directiva europea vai afectar en España a 139 organismos públicos, máis de 8.000 concellos e a 17 comunidades autónomas. De momento, creamos un observatorio de portais públicos para mellorar a accesibilidade destas páxinas. Preto do 50% dos portais revisados non cumpren con esta normativa europea. Os peores son os concellos de mediano tamaño e os mellores as administracións públicas de gran capacidade e isto significa que aínda nos queda traballo para mellorar".
Durante a inauguración da xornada, Luís Cayo Pérez Bueno, presidente do Comité Español de Representantes de Persoas con Discapacidade (Cermi), subliñou que "a accesibilidade universal segue sendo unha cuestión pendente. Dise que temos demasiadas normas, pero aínda faltan leis para facer da accesibilidade universal unha realidade e o problema é que a propia Unión Europea non termina de crerse isto da accesibilidade porque é moi lenta no establecemento das normativas. Por iso, o movemento asociativo segue sendo fundamental".
Nos mesmos termos expresouse Loic Martínez, doutor en Informática e profesor da Universidade Politécnica de Madrid, quen destacou que "no campo da accesibilidade, as TIC son fundamentais pero a norma UNE 301.549 de 'Requisitos de accesibilidade de produtos e servizos TIC aplicables á contratación pública en Europa' debía entrar en vigor o pasado mes de abril".
Facer posible a accesibilidade universal é un requisito esencial, xa que, segundo engadiu o moderador da xornada, Gabriel López, regulatory affairs lead en Microsoft, "80 millóns de europeos teñen algún tipo de discapacidade, dos que o 47% están desempregados. Unhas cifras que aumentarán co envellecemento da poboación, polo que hai que facer realidade esta accesibilidade universal".
Por iso, co fin de mellorar a calidade de vida das persoas con discapacidade creouse o Centro Nacional de Tecnoloxías da Accesibilidade (Centac), cuxo director de Accesibilidade, Juan Carlos Ramiro, explicou que un dos obxectivos deste organismo é achegar as TIC a este colectivo e, para iso, "este centro é unha ferramenta en si mesma, xa que é un xerador de coñecemento entre as administracións, as empresas e os usuarios".
A este respecto, Jesús Hernández, director Accesibilidade Universal e Innovación de Fundación ONCE, destacou a falta de formación en materia de accesibilidade e considerou que debería ser unha materia na universidade, polo que desde este organismo desenvólvense varios cursos e ofrécense ferramentas para satisfacer esta necesidade.
A este respecto, Jorge Botella, conselleiro da área de Dereito Público de Cuatrecasas, afirmou que a mellora da accesibilidade "é un tema apaixonante", aínda que advertiu de que "desde o punto de vista xurídico é un pouco complexo, porque temos, como é habitual, unha certa dispersión normativa". Ao seu xuízo, este aspecto súmase ao atraso na transposición da Directiva Europea de Accesibilidade, algo que como lembrou, debería facerse en abril. Iso si, puntualizou que hai moitas situacións específicas nas que a normativa comunitaria pode aplicarse para que se vaian xerando efectos positivos na práctica.
Manuel Arenilla, director do Instituto Nacional de Administración Pública, foi o encargado de clausurar o acto e subliñou que "non podemos permitirnos arrinconar a aqueles cidadáns con discapacidade porque vivimos nunha sociedade democrática, polo que as administracións públicas teñen un importante papel á hora de facer realidade a inclusión social".
Os lectores con cegueira ou discapacidade visual grave dispoñen na actualidade de 50.651 obras adaptadas para poder descargarse a través da Biblioteca Dixital ONCE (BDO), das cales 22.124 están en formato TLO (para reprodutor braille) e 28.527 en Daisy (para reprodutor de son).
En consonancia coa era dixital, os hábitos de lectura das persoas cegas ou con discapacidade visual grave fóronse adaptando, de tal modo que hoxe en día a maioría delas acceden aos libros a través da tecnoloxía (PC, reprodutores de audio e braille, teléfono móbil, tablets...).
Desta maneira, o número de usuarios rexistrados á BDO ascende a preto de 9.000 persoas, entre as que se produce un gran volume de accesos e descargas. No último ano executáronse máis de 176.000 descargas.
Ademais dos métodos tradicionais de reprodución de libros, as persoas con cegueira teñen á súa disposición a aplicación GOLD (Xestor ONCE de Libros Dixitais), desenvolvida polo Centro de Investigación, Desenvolvemento e Aplicación Tiflotécnica (CIDAT) para dispositivos móbiles, que permite a descarga e reprodución de libros dixitais en formato Daisy (audio dixital accesible) da Biblioteca Dixital do ONCE (BDO).
Á marxe da Biblioteca Dixital, onde se xera o maior volume de movementos, a ONCE, a través do seu Servizo Bibliográfico, tamén dispón dunha oferta de préstamo directo de títulos en formato braille e en Daisy, previamente gravados en disco.
Fomento da lectura
A ONCE sempre prestou un especial interese ao acceso das persoas cegas e con discapacidade visual á cultura e a comunicación a través da lectura, como vía necesaria na súa plena integración.
Para dar resposta a esta necesidade, a Organización conta cun servizo especializado que se encarga de adaptar en braille, en relevo e en audio dixital accesible (Daisy), obras literarias, textos educativos e para o emprego, material gráfico, sinalética, etc., priorizando sempre a adaptación con finalidade educativa e laboral, o interese da obra e a demanda dos seus afiliados. O centro responsable da súa coordinación é o Servizo Bibliográfico da ONCE (SBO), que conta con dúas sedes, unha en Madrid e outra en Barcelona, entre as que se recibe máis do 60% de solicitudes de adaptación bibliográfica.
O Congreso Mundial Smart City Expo (SCEWC) é o cume internacional de discusión sobre a ligazón entre a realidade urbana e a revolución tecnolóxica. Desde a súa primeira edición en 2011, tivo éxito para devir un acontecemento global referencial para apoiar o desenvolvemento das nosas cidades. Este punto de encontro profesional, institucional e social é unha plataforma principal de ideas, networking, experiencias e de tratos de negocio internacionais que reúne o nivel máis alto das partes interesadas, no contexto do desenvolvemento urbano.
Achegar o cinema e a televisión ás persoas con discapacidade audiovisual é o obxectivo de WhatsCine, un novo proxecto que busca financiamento a través da Bolsa Social, a primeira plataforma de equity crowdfunding autorizada pola CNMV, que pon en contacto a investidores e empresas con valores.
WhatsCine é unha empresa social, creada en 2013, por emprendedores madrileños, en colaboración coa Universidade Carlos III de Madrid. Trátase dun software que inclúe un triplo sistema de accesibilidade: de audiodescrición (indicado para a discapacidade visual), lingua de signos e subtítulos adaptados para a discapacidade auditiva.
Grazas a esta tecnoloxía, este colectivo, que engloba en España a máis de dous millóns de persoas, pode gozar do dereito de accesibilidade ao lecer e a cultura compartida en igualdade, con total autonomía, sen sobrecustos para o usuario e sen interferir no resto de espectadores, como ocorre con outros sistemas tradicionais de accesibilidade. WhatsCine funciona a través da pantalla dun dispositivo móbil -para acceder aos subtítulos e lingua de signos- e con auriculares para escoitar a audiodescripción.
A iniciativa xa está dispoñible en 500 salas de cinema españolas, ademais dos fogares que dispoñen de Movistar+, a través da app Movistar+ 5S, sen custo adicional para o usuario. Un servizo que aglutina o 75% do mercado das televisións de pago no noso país.
O proxecto foi recoñecido en 2015 co Premio Raíña Letizia de Tecnoloxía da Accesibilidade e en xuño deste ano co Premio Innovación e Creación Antonio Magariños. O último recoñecemento que acaba de recibir, o Premio de App para Todos na categoría Mellor App, un galardón que os levará como finalistas, o próximo mes de novembro, á Smart City Expo World Congress. A través da Bolsa Social, busca unha ampliación de capital de entre 250.000 - 300.000 euros para replicar o seu proxecto a nivel internacional, concretamente en Latinoamérica e EE.UU., onde viven máis de 60 millóns de persoas con discapacidade audiovisual.
A campaña de investimento comezou o pasado luns 17 de outubro e estará dispoñible ata o próximo 17 de decembro. En tan só catro días, xa conseguiu máis da metade do seu obxectivo mínimo de investimento, concretamente máis de 150.000 euros. Creas Fondo Social SL é o investidor de referencia desta campaña, na que xa investiu un total de 100.000 euros. A empresa foi presentada por José Ramón Riera Gómez, presidente e conselleiro delegado de WhastCine, como nova oportunidade de investimento ante os máis de 60 investidores que participaron no encontro ‘Tecnoloxías con impacto positivo', organizado pola Bolsa Social o 19 de outubro, en Madrid. Durante o acto, José Moncada, fundador e director xeral da plataforma, compartiu cos asistentes a súa visión sobre o investimento con impacto social, ao destacar “como cada vez máis xente decide investir de acordo cos seus valores e busca proxectos con rendibilidade económica pero que, tamén, melloren a calidade de vida ou solucionen un problema social ou ambiental.
Unha tendencia prometedora posto que, segundo o Global Impact Investing Network xa hai 77.000 millóns de dólares investidos neste tipo de activos, cun crecemento anual do 16%”. No encontro analizouse, ademais, como a partir da tecnoloxía se pode multiplicar o impacto social para mellorar así a nosa contorna, desde o fenómeno actual da hiperconectividade e a economía colaborativa. No coloquio participou Adrián García Nevado, director da Zona Centro en Telefónica España, quen apuntou que “actualmente estamos nun momento de formación e consolidación do emprendemento social en España e para logralo as empresas privadas temos un importante papel, non só desde o departamento de RSC senón de todo o negocio”.
García Nevado sinalou, ademais, que “a revolución dixital é a maior da historia ata o momento. O xurdimento de moitos fenómenos disruptivos ao mesmo tempo levaranos, nos próximos anos, a un novo mundo e a un ser humano moi diferentes ao actual”. Coas súas palabras coincidiu Vincent Rosso, business angel e cofundador de BlaBlaCar en España, quen ademais sinalou que “cada vez somos máis os emprendedores aos que nos importa xerar un impacto social, porque somos conscientes de que vivimos nun planeta finito. Desde a educación hai que transmitir ás novas xeracións unha maior concienciación dos aspectos sociais, valores que tamén teñen que incorporar os emprendedores”. Durante o encontro tamén realizou o seu pitch de presentación a próxima empresa que abrirá a súa campaña de investimento a través da Bolsa Social: Myplayz.
De orixe sevillana, trátase da primeira plataforma de consumo colaborativo para organizar actividades culturais en espazos privados de cidadáns particulares.
¿Como funciona a Bolsa Social?
Ademais de contar cun bo modelo de negocio e potencial de crecemento, os proxectos publicados na plataforma deben producir un impacto positivo constatable na sociedade e o medio ambiente. Antes da súa publicación, as empresas son analizadas polo equipo da Bolsa Social en colaboración con Analistas Financeiros Internacionais (AFI). O investimento realízase mediante a fórmula de equity crowdfunding a golpe de clic, dunha maneira áxil e sinxela.
Os investidores depositan o seu diñeiro nunha conta especial en Triodos Bank. Se se alcanza o obxectivo de financiamento, a Bolsa Social formaliza a ampliación de capital en nome de todos os investidores. Se non se logra, devólvense as achegas sen custo para os investidores, que contan previamente con toda a información sobre os proxectos, así como os riscos e limitacións que implica a participación nas accións destas empresas. En caso de éxito das campañas, a Bolsa Social esixe ás empresas reportes periódicos dos resultados económicos e do impacto social ou ambiental xerado. Entre os casos de éxito atópase Utopicus, a lanzadeira de iniciativas innovadoras e colaborativas que busca transformar a sociedade, que conseguiu unha ampliación de capital de 248.500 euros, ou Nostoc Biotech, que pechou unha campaña de investimento de 249.700 euros coa súa iniciativa de bioagricultura baseada en solucións naturais de fertilización e protección de cultivos a partir de microorganismos vivos.
A Consellería de Cultura, Educación e Ordenación Universitaria lidera o proxecto educativo europeo KA204 “GAMESP – Physical and virtual Games for Education and social Insertion of intellectually handicapped People”, no marco da presente convocatoria Erasmus+ 2016; unha iniciativa que ten como obxectivo contribuír a mellorar a atención á diversidade a través da inserción social de alumnos e alumnas adultas con discapacidade intelectual por medio do uso das ferramentas TIC e de robótica á medida. A primeira reunión transnacional do proxecto celebrouse esta semana no Museo Pedagóxico de Galicia (MUPEGA) en Santiago de Compostela, e nela reuníronse os sete socios participantes, procedentes de cinco países diferentes.
Ao abeiro desta iniciativa desenvolverase unha plataforma en liña e unha comunidade virtual na que as persoas adultas con discapacidade e educadores poidan xogar (realizando unidades de ensino) con ferramentas virtuais, así como interactuar con robots reais que teñan na casa ou no seu centro. Ademais, o proxecto quere involucrar os pais e nais nas actividades de ensino / aprendizaxe.
A partir da plataforma, será posible controlar e programar un obxecto físico ou un robot virtual, robot que tamén se desenvolverá a través deste proxecto. En ambos os escenarios, o robot pode seguir as instrucións que os usuarios lle indiquen.
A plataforma tamén incluirá 10 unidades de ensino baseadas en xogos existentes e en xogos novos, que poden ser creados a partir de adaptación para alumnado adulto con discapacidade. Os xogos buscan traballar diferentes áreas, tales como a orientación, secuenciación, etc.
Este proxecto, financiado pola Unión Europea, dá resposta e complementa os plans e protocolos de atención a diversidade elaborados pola Consellería de Cultura, Educación e Ordenación Universitaria.
Con motivo de festexar o Ano Castelao e co obxectivo de achegar ao senlleiro artista de Rianxo cara o público máis novo nace a aplicación educativa As viaxes de Castelao. Unha proposta da Deputación de Pontevedra, creada pola empresa pontevedresa CreappContos, que era presentada esta semana como unha ferramenta didáctica e cunha linguaxe actual para amosar lles aos máis pequenos quen era Castelao.
Así, na presentación desta app estiveron o responsable de CreappContos, Toño Escudero, o ilustrador, Víctor Rivas, e o deputado de Cultura e Lingua, Xosé Leal. Asemade, tamén acudiron á estrea: docentes, responsables de espazos culturais dos concellos, profesionais que realizan obradoiros... Arredor de 35 persoas de centros educativos de Pontevedra, Poio, A Estrada, Marín, ou Ribadumia; persoal técnico dos concellos, concelleiros e concelleiras, e representantes de empresas de dinamización e animación cultural infantil, como Polo correo do vento e a editora OQO.
En que consiste a aplicación? Os usuarios poderán crear escenas, construír historias e resolver quebracabezas sobre as principais etapas da vida de Castelao. Con esta aplicación poderase crear e compartir dende calquera lugar do mundo contidos (quebracabezas, contos, audio-contos e postais) xerados a través da propia app, que logo se poderán imprimir. Trátase dunha aplicación para tabletas, estará dispoñible en IOS (Apple) a nivel global e pode descargarse de balde dende a páxina do ente provincial baixo o título As viaxes de Castelao.
A Axencia para a Modernización Tecnolóxica de Galicia (Amtega) e a Oficina de Software libre do CIXUG fallaron o venres o Premio ao Mellor Proxecto Universitario con Licenza Libre que vai xa pola súa IX edición.
O primeiro premio recaeu en José Ángel Piñeiro Souto, da USC, co proxecto Caléndula consistente nunha ferramenta para a xestión persoal da medicación e a mellora da adherencia, integrada na operativa das oficinas de farmacia a través da Folla de Medicación Activa e do Plan de Dispensación. Este recoñecemento ten unha dotación económica de 1.500 euros achegada polo CIXUG ao abeiro do Convenio de colaboración asinado coa AMTEGA.
Ademais, concedeuse tamén un segundo premio a Oscar Blanco Nóvoa, da UDC, co proxecto Sistema domótico para xestión enerxética que permite aforrar custes a través dun algoritmo de planificación que fai uso dos datos de custe horario da enerxía publicados por REE, cunha dotación económica de 750€ achegados pola Asociación GPUL, colaboradora da iniciativa ao abeiro do convenio de colaboración asinado coa AMTEGA
A participación este ano foi novamente dun excelente nivel, recibíndose un total de 13 candidaturas*, que foron avaliadas centrándose principalmente na valoración do correcto licenciamento dos proxectos así como o uso de metodoloxía de traballo propia dos desenvolvementos en aberto, para escoller os 4 finalistas que defenderon o venres ante o xurado os seus méritos para seren merecedores deste premio. Tras a oportuna deliberación o xurado procedeu a dar a coñecer o seu fallo.
Os outros dous finalistas do premio, a quen o xurado felicitou polo seu traballo foron:
O xurado estivo composto por Daniel Iglesia Iglesias en representación da Universidade da Coruña; José Varela Pet en representación da Universidade de Santiago de Compostela; Alma Gomez Rodriguez en representación da Universidade de Vigo; José María Casanova en representación da Asociación de Programadores e Usuarios de Linux, GPUL; Breogán Cinza Cabarcos en representación da Amtega e Mar Castro Pereiro en representación da Oficina de Software Libre da Amtega.
A Amtega convoca este importante premio dentro das liñas de actuación para mellorar e potenciar os mecanismos de formación e difusión do Software Libre na cidadanía galega recollidas no Plan de Acción en Materia de Software Libre 2016.
Con esta iniciativa a Xunta desexa continuar premiando o labor que están a realizar os universitarios galegos á vez que se pon en valor o traballo que realizan durante o seu Proxecto Fin de Carreira e todo elo promovendo o emprego e difusión do Software Libre como ferramenta de achegamento ao mundo laboral.
A colaboración do CIXUG e do GPUL neste premio forma parte das actividades que ambos realizan ao abeiro dos respectivos convenios de colaboración asinados coa Amtega para a realización de actividades de promoción do Software Libre en Galicia no marco do Plan de Acción en Software Libre 2016.
OSHWDem é un evento con filosofía BarCamp sobre electrónica e Open Source Hardware.
As BarCamp son eventos abertos e participativos, nos que o contido é provisto polos participantes, aínda que parte deste contido será proporcionado polos organizadores.
Por quinto ano consecutivo a asociación BricoLabs organiza o vindeiro 5 de novembro a OSHWDem, nome co que este grupo de makers denomina a Feira de Tecnoloxía Aberta que vén celebrando cada ano no museo Domus da Coruña, onde poderanse ver numeroso proxectos de hardware libre, ou sexa con planos, compoñentes, instrucións de montaxe e, ata en ocasións a axuda personalizada, dispoñibles para o público xeral de xeito aberto. Cun pouco de paciencia, tempo e dedicación, quen queira poderá replicar, ou adaptar ao seu gusto, os proxectos expostos.
Este é o propósito fundamental de BricoLabs e aquilo que vén defendendo dende o ano 2011, «a difusión da tecnoloxía e o coñecemento libre», en palabras da propia asociación que xunta semanalmente a todos aqueles que queren colaborar no deseño, construción e probas de todo tipo de trebellos, propostos polos propios membros ao xeito doutros HackerSpaces e FabLabs do mundo. A asociación tamén organiza obradoiros, visitas a centros de ensino, charlas divulgativas, acode a encontros, eventos, conferencias para amosar as súas creacións; e na feira deste ano abrirase a makers de todo o país para expor os seus proxectos: impresión 3D, sistemas robóticos, drons,.... que poderanse ver na Domus o 5 de novembro de 10:00 a 19:00 horas. Pero a OSHWDem non é so a exposición de proxectos, tamén poderemos gozar de varias modadlidades de competicións de robots, dende as máis clásicas e sinxelas carreiras de segueliñasata as probas de maior complexidade como o sumo robótico ou a resolución de labirintos. A novidade deste ano é Hebocon, unha competición de robots na que o único que conta son as gañas de participar. Deseñada especialmente para facela accesible a todos os públicos, mesmo a aqueles que non teñen coñecementos técnicos ou experiencia previa, Hebocon está pensada para que ninguén quede fóra.
O evento non remata o sábado. Este ano a meirande parte dos obradoiros terán lugar nas semanas posteriores á feira. O propósito da organización é que os asistentes teñan as ideas máis claras sobre as posibilidades de experimentación que ofrecen os diferentes obradoiros logo de ter visitado a exposición. Como ven sendo habitual, os obradoiros abranguen materias moi variadas; música electrónica, impresión 3D, robótica, creación de circuítos electrónicos e programación son só algúns dos exemplos dos obradoiros deste ano. Con máis de 30 proxectos libres confirmados para a exposición, os organizadores prevén acadar as mesmas cifras de asistencia que na anterior edición, cando máis de 1.200 persoas pasaron polo museo Domus durante a xornada.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...