A crecente relevancia das tecnoloxías nos procedementos de contratación e administración pública será analizada no 7º Congreso Nacional CENTAC de Tecnoloxías da Accesibilidade, que se celebrará en Zaragoza os días 14 e 15 de novembro.
O programa do congreso inclúe dúas mesas de debate dedicadas especificamente á reinvención da administración pública grazas á tecnoloxía e á inclusión de criterios de accesibilidade e usabilidade nos procedementos de contratación pública.
“Desde o pago de multas e tributos á procura de emprego público, cada vez máis procedementos administrativos realízanse de forma telemática”, explica Juan Carlos Ramiro, director de CENTAC. “A Administración Pública estase reinventando desde o físico para converterse nunha contorna dixital que debe ter en conta as necesidades de todos os cidadáns”, engade Ramiro.
Para debater sobre esta evolución, a mesa redonda contará coa participación de Mercedes Jaraba, subdirectora xeral de Coordinación e Ordenación do Ministerio de Sanidade, Servizos Sociais e Igualdade; Luís Petrikorena, director de Goberno Aberto no Goberno Vasco, e Xullo Perales Díaz, conselleiro técnico no Ministerio da Presidencia. A mesa será moderada por Jesús Hernández Galán, director de Accesibilidade Universal e Innovación da Fundación ONCE.
Tamén terá lugar unha mesa de debate que tratará de detallar os criterios de accesibilidade e usabilidade que deben contemplar con carácter obrigatorio as convocatorias públicas de contratación de bens, produtos e servizos tecnolóxicos grazas á Directiva Europea de Contratación Pública.
Participarán Francisco Javier Blanco, xerente do Foro Socialmente Responsable; Miguel Ángel Bernal, director xeral de Contratación, Patrimonio e Organización do Departamento de Facenda e Administración Pública do Gobierno de Aragón; e Elena Muñoz Salinero, xefa de área de Sistemas Telemáticos da Dirección de Tecnoloxías da Información e Comunicacións da Secretaría Xeral de Coordinación de Unidades TIC, Ministerio de Facenda e Administracións Públicas. Moderará a mesa Federico Traspaderne, director de Unidade de Negocio de Administración Pública e Industria de Norma 4.
Están a adaptarse as empresas e o comercio electrónico ao novo consumidor? As súas estratexias e plataformas de venda dixitais contemplan o uso por todos os cidadáns, incluídos os que teñen capacidades distintas? A estas preguntas tratarán de responder os participantes na mesa redonda dedicada ao e-commerce, que se celebrará baixo a moderación de Jorge Pérez, director de Economía Dixital de Red.es.
Nela participarán Lourdes González, responsable de Desenvolvemento de Negocio e Coñecemento de ILUNION Tecnoloxía e Accesibilidade; Conrado Chavanel, presidente da Asociación de Tendas Virtuais de Aragón; Iván Laporta, CEO de TrackGlobe, Grupo Barrabés; e Fernando Aparicio, CEO de Amvos Consulting.
“A irrupción do comercio electrónico permitiu a moitas persoas acceder a produtos e servizos afastados da súa contorna física máis inmediata e revolucionou os nosos hábitos de consumo”, opina o director de CENTAC. “Por iso é importante saber se as persoas con capacidades diferentes tamén poden beneficiarse desta revolución”, conclúe Juan Carlos Ramiro.
7º Congreso Nacional CENTAC
Esta edición virará ao redor da “Transformación Dixital Accesible”, entendéndoa como unha transformación da sociedade, como un cambio do noso modo de vida, dun novo sistema de traballo e produción, da nosa forma de acceso e utilización de servizos públicos e privados. É a transformación da educación, a sanidade, a cultura ou a comunicación.
O presidente da Xunta en funcións, Alberto Núñez Feijóo, avanzou hoxe que o Goberno galego vai implantar nos hospitais Álvaro Cunqueiro de Vigo e no Lucus Augusti de Lugo un sistema de localización e guiado de pacientes mediante unha aplicación móbil, que estará dispoñible para dispositivos que empreguen Android ou iOS de Apple.
Como subliñou o titular do Goberno galego en funcións, esta aplicación incorpora as seguintes funcións: organiza a ruta do usuario sanitario ata o centro unha vez que pide unha cita médica; guía ao usuario ata a sala de espera correspondente e asígnalle a quenda de consulta, de modo que aforra o paso polo mostrador no hospital; proporciona información sobre servizos como cafetería ou quioscos dentro e fóra do hospital; permite compartir cos contactos do móbil que tamén usan a aplicación a posición dentro do hospital.
O presidente da Xunta en funcións explicou que o sistema empregado para darlle soporte incorpora varias innovacións tecnolóxicas, como un sistema de localización de alta precisión e tamén un sistema de cartografía de edificios cos mapas internos dos hospitais, ao que se poden incorporar todos os edificios do Sergas. Neste senso, precisou que se comezará polos centros hospitalarios de Vigo e Lugo e o servizo incorporarase proximamente tamén ao de Verín, ao edificio administrativo de San Lázaro e a 20 centros de saúde.
Para o desenvolvemento desta aplicación e de todos os sistemas necesarios para o seu funcionamento investíronse uns 315.000 euros. Nesta liña, calcúlase que en cada hospital extra no que se poña en marcha haberá que investir entre 10.000 e 25.000 euros en función do tamaño dos centros e, no que atinxe aos centros de saúde, estímase un custo base de 200 euros tamén ampliable segundo o tamaño.
Feijóo indicou que actualmente esta aplicación estana probando grupos de usuarios para validar o seu correcto funcionamento e está previsto que a finais de novembro se faga accesible a toda a cidadanía para empregar xa nos centros Lucus Augusti e no Álvaro Cunqueiro.
Como incidiu o xefe do Executivo galego en funcións, unha das maiores oportunidades das que dispoñemos a día de hoxe para mellorar a sanidade pública son as tecnoloxías da información e a comunicación. Por iso, é unha liña que a Xunta está a explorar a través de programas que contan con financiamento europeo como o Innova Saúde e o Hospital 2050. Así, no vindeiro período dos fondos Feder, investiranse 25 millóns que se destinarán exclusivamente a aplicacións informáticas sanitarias.
A Deputación de Lugo está mergullada no impulso a AlimentaTIC, o obradoiro provincial incluído dentro da programación de actividades gratuítas para maiores do InLugo (Fundación TIC, Deputación) que fomenta a alimentación saudábel a través das novas tecnoloxías da información. Onte mesmo o vicepresidente da entidade provincial, Santos Ramos, mantivo un encontro cos participantes do obradoiro no Corgo. Ademais, deu a coñecer que con motivo da celebración o 16 de outubro do Día Mundial da Alimentación, o InLugo organizará até finais de ano 15 talleres distribuídos en todas as comarcas da provincia, así como dúas conferencias maxistrais sobre a importancia de mellorar as prácticas alimentarias a través das TIC (Tecnoloxías da Información e a Comunicación).
Os obradoiros máis inmediatos celébranse este 27 de outubro (de 16.00 a 19.00 horas en Guitiriz), o 28 de outubro (pola tarde no salón de actos da Casa da Cultura en Pontenova) e o 31 de outubro (pola tarde no salón de actos da casa da Cultura de Trabada). Santos Ramos salientou na súa visita ao Corgo que “todos sabemos que unha boa alimentación é recomendábel en calquera etapa da vida, pero faise especialmente necesaria cando imos sumando anos”. Segundo fixo saber, o obxectivo de AlimentaTIC é, precisamente, “ensinar aos nosos maiores a coidar da súa saúde cunha dieta aconsellábel empregando as novas tecnoloxías”. Ademais de participar nestes obradoiros, nos que haberá postos con alimentos saudábeis para os asistentes, os maiores que acoden a AlimentaTIC teñen a súa disposición unha guía de alimentación en formato dixital co deseño, por exemplo, dun menú semanal axeitado ou con consellos para comer ben a prezos económicos.
Fundación ONCE presenta o vindeiro xoves, 27 de outubro, ás 12.00 horas, na Praza de María Pita da Coruña, unha casa intelixente, sustentable e accesible, para demostrar á sociedade que a accesibilidade é positiva para todos e que, ademais, non está rifada co bo gusto.
A vivenda, de máis de 100 metros cadrados, poderá visitarse na Coruña desde o xoves 27 de outubro ata o 30 do mesmo mes, en horario de 10.30 a 20.30 horas.
Na súa presentación o xoves participarán Heriberto García, director xeral do Instituto Galego de Vivenda e Solo da Xunta de Galicia; Coro Piñeiro Vázquez, directora xeral de Maiores e Persoas con Discapacidades da Xunta de Galicia; Carlos Fernández Lamigueiro, presidente do Consello Territorial de ONCE en Galicia; Manuel Martínez Pan, delegado territorial de ONCE en Galicia, e María Josefa Álvarez, directora adxunta de Accesibilidade Universal de Fundación ONCE.
Tras deixar A Coruña o domingo 30 de outubro, a estancia, que pasou xa por Madrid, Pamplona, Logroño, Bilbao, Santander e Xixón, e que se aloxa nun tráiler, visitará outras oito localidades españolas ao longo deste outono.
Entre os avances que poden gozar os usuarios que se acheguen a vela figuran alfombras con detección de presenza; balizas Beepcons, desenvolvidas por ILUNION, que están especialmente deseñadas para facilitar ás persoas con discapacidade visual a identificación e localización dos obxectos próximos; a nova Smart TV de Samsung, que recibiu o premio CES 2016 Best of Innovation na categoría de tecnoloxía accesible; un secador corporal; un armario de almacenaxe motorizada; unha cociña con encimera regulable, ou unha mira dixital.
A vivenda está pensada para que a visiten profesionais do sector da edificación, escolas de deseño industrial, empresas relacionadas coa construción, o urbanismo, a accesibilidade e a domótica, administracións públicas, asociacións de persoas con discapacidade e sociedade en xeral.
A casa, que conta con máis dun centenar de solucións tecnolóxicas, é unha iniciativa da Fundación ONCE posta en marcha no marco dun convenio subscrito co Real Padroado sobre Discapacidade para mostrar aos seus visitantes as posibilidades de construción e dotación de mobiliario nunha vivenda intelixente, accesible e sustentable, á vez que ofrecer solucións técnicas e tecnolóxicas a problemas de accesibilidade.
Dotada de salón, cociña/comedor, dormitorio, baño e hall de entrada, a estancia concibiuse baixo os criterios de confort, adaptación ás necesidades dos seus habitantes, facilidade de uso, seguridade, sustentabilidade e estética.
WhatsCine, unha app que permite a persoas con discapacidades auditivas e visuais ir ao cinema e ver a televisión en igualdade de condicións que o resto de usuarios, gañou o concurso Apps para todos impulsado por Cocemfe Barcelona e o Observatorio da Discapacidade Física (ODF) no marco de Smart City Hack (SCH16) para promover a accesibilidade no sector móbil.
O xurado considerou que WhatsCine merecía o premio de Best ‘App' outorgado pola Deputación de Barcelona e dotado con 3.000 euros. Maite Fandos, deputada de Benestar Social desta institución, foi a encargada de entregalo. Ademais, WhatsCine pasará á final de SCH que se celebrará en novembro na Smart City Expo, en Barcelona.
WhatsCine, unha app gratuíta desenvolvida para Android e iOS funciona da seguinte maneira: a app permite ao usuario acceder desde o seu terminal aos contidos accesibles para as películas: audiodescrición, subtítulo adaptado e linguaxe de signos, sincronizándose de maneira precisa coa emisión en pantalla grazas á tecnoloxía desenvolvida expresamente.
O segundo premio foi para Wheris, a quen o xurado recoñeceu como a mellor aplicación de nova creación concedéndolle o premio ‘Best New App' outorgado polo Concello de Sant Cugat do Vallès e dotado con 1.500 euros. Esta app terá a posibilidade de ser unha dos finalistas da Gran Final de SCH16.
Joana Barbany Freixa, tenente de alcalde de Innovación, Comunicación, Promoción Económica e Goberno Aberto do Concello de Sant Cugat, foi a encargada de entregar este premio dotado con 1.500 euros e outorgado por este concello.
Wheris é un sistema de recoñecemento de textos baseados na lectura de códigos invisibles impresos directamente sobre calquera soporte. O usuario non ten que apuntar o seu dispositivo cara a un punto concreto senón que éste recoñece todo o elemento impreso e recibe no seu terminal os textos ordenados e locutados. Desta maneira, calquera impreso pode ser ofrecido a persoas con discapacidade visual ou con necesidade de acceder a contido en lectura fácil.
A última premiada da velada foi LactApp, unha aplicación móbil capaz de detectar e ofrecer solucións personalizadas ás dificultades que poidan xurdir durante a lactación e que está desenvolvida para Android, iOS e HTML5. LactApp preséntase como un asistente persoal que axuda ás nais que queren dar o peito, axudándolles desde o embarazo ata que deciden deixar a lactación.
LactApp levou o premio do público ao ser a app máis votada en Twitter. Este premio, que a recoñece como ‘a Most Popular App', estivo outorgado por COCEMFE Barcelona con 500 euros e o encargado de dalo foi Daniel-Aníbal García Diego, Secretario de Organización de COCEMFE.
Ademais da entrega de premios, os asistentes tamén gozaron do keynote sobre accesibilidade móbil impartido por Ferrán Gállego, CTO en Code Factory.
Cidades humanas e accesibles
O obxectivo de Apps para todos foi que o desenvolvemento tecnolóxico das smart cities estea acompañado dun compoñente humano grazas ao cal, todas as persoas accedan á tecnoloxía, sexan cales sexan as súas circunstancias ou idade.
Apps para todos comezou o 18 de xuño cun ideathon para empezar a desenvolver as primeiras aplicacións accesibles e universais. Desde entón e ata onte, o proxecto pasou por diferentes etapas de desenvolvemento das apps e incorporación doutras novas. A chamada á participación pechouse en setembro con 50 apps presentadas ao concurso e 38 aceptadas das que quedaron as 10 que competiron onte na final.
Os requisitos demandados aos participantes que mellor cumpriron as finalistas foron: ser accesibles para todas as persoas, achegar unha proposta de valor para persoas con discapacidade, favorecer a inclusión de persoas con discapacidade auditiva, física, visual e motórica e finalmente encadrar nun destes temas: Turismo & Cultura, Mobilidade Urbana, Saúde & Benestar e Cidade Colaborativa.
Apps para todos conta coa colabración da Deputación de Barcelona , o Concello de Barcelona, a través do IMD, o Concello de Sant Cugat e a área Metropolitana de Barcelona; co apoio de OCU e con BLE , SlashMobility , Servimedia e PCatalà como media partners.
Máis información sobre WhatsCine na Web Oficial de APP CIRCUS.
Esta semana, até o remate da mesma, estase a desenvolver en Pontevedra a cuarta edición do Congreso Internacional de Videoxogos e Educación, CIVE. Máis polo miúdo, desenvólvese na Facultade de Ciencias Sociais e da Comunicación (o CIVE propiamente dito) e máis na Casa da Luz (onde se celebra a Game Jam da man da UVigo e o CPEIG: unha cita colectiva de gammers traballando na creación dun videoxogo de índole socio-divulgativa para móbiles e tabletas). O CIVE foi inaugurado este mércores pola profesora Beatriz Legerén.
Segundo fixo saber Legerén, o obxectivo é “afondar no potencial educativo dos videoxogos”. Na inauguración tamén participou o deseñador de lecer dixital Michael Santorum, que lembrou “que todo videoxogo é de por si educativo, porque ten unhas regras que tes que aprender para poder xogar”. Este (o potencial para o ensino) é tamén o eixe temático da Game Jam, que ten o punto de mira na educación Primaria.
A Game Jam, que conta coa colaboración do Concello de Pontevedra, está dirixida a programadores, deseñadores, ilustradores e xente interesada no mundo dos videoxogos, que deberán permanecer día e noite na Casa da Luz co obxectivo de presentar o venres as súas propostas. Os traballos optarán a un premio cedido polo Colexio Profesional de Enxeñaría en Informática de Galicia (CPEIG) e á posibilidade de desenvolver unha campaña de crowdfunding para obter os fondos precisos para desenvolver o seu xogo, coa colaboración da empresa Gato Salvaje Estudio.
Trátase dun congreso promovido pola asociación de investigadores Alfas, a facultade e a Vicerreitoria do Campus de Pontevedra, dentro do proxecto CREA 2i. O evento artéllase en varias xornadas, cada unha delas adicada a diferentes fases do proceso de creación dunha aventura gráfica ou achega dixital de lecer. Así, tras centrarse na creación da historia, na narrativa, na xornada inaugural, o xoves centrarase nas regras e mecánicas, mentres que o venres o debate centrarase no seu aspecto gráfico e as súas ligazóns coa arte e o deseño.
Entre as actividades máis salientables da primeira xornada figurou sen dúbida unha mesa sobre xénero e videoxogos na que o investigador da U-Tad Enrique Morales deu conta da investigación que realizou sobre a percepción dos “valores de igualdade” entre os xogadores e xogadoras habituais, aqueles que adican máis de cinco horas á semana aos videoxogos. “O que fixen foi preguntarlles directamente como vían eses valores” nunha industria na que “a grande maioría dos personaxes dos xogos máis populares son masculinos”. Esta investigación permitiulle constatar que, por riba do xénero, existía unha “variable moi clara na percepción deses valores”, a idade. Así, se ben os adultos e adultas recoñecían que estes produtos “non reflicten ben estes valores”, esta cuestión non era observada entre os xogadores e xogadoras menores, que o vían “como algo natural”. Nese punto, puxo de relevo que unha das preguntas abertas que deixa o seu traballo é se a educación fará posible que “segundo van madurando” si perciban “que eses valores non están reflectidos nos videoxogos”, algo que debera ser ao mesmo tempo o punto de partida para cambios nunha industria na que, no caso de España, lembrou, só o 17% dos traballadores son mulleres.
Amais das mesas de debate que se suceden ao longo dos tres días, o CIVE complétase coa presentación de preto de 60 comunicacións, boa parte delas procedentes de Arxentina, Brasil, Uruguai ou México e defendidas de forma virtual nun congreso que está a ser retransmitido a través de UVigo-TV. A inauguración do congreso viuse precedida por un obradoiro práctico sobre as posibilidades educativas dos videoxogos, impartido este martes polo vicepresidente de Ars Games, José Manuel Salado.
A Axencia para a Modernización Tecnolóxica de Galicia (Amtega) pon a disposición de toda a cidadanía unha serie de 20 novos cursos de formación a distancia de diferentes temáticas relacionadas coas TIC a través da plataforma de teleformación EMA da Rede CeMIT.
O único requisito para acceder a esta formación online é ser usuario da rede CeMIT (https://cemit.xunta.gal/ema). Os cursos, de entre 4 e 10 horas de duración cada un deles, pódense realizar en calquera momento e lugar, sen estar pendente de convocatorias nin inscricións.
Unha vez completado todo o material que conforman os cursos, activaráselle ao alumno a opción do exame, proba que terá que realizar, obrigatoriamente e de forma presencial, nun aula CeMIT. Unha vez superada a mesma e realizada a enquisa obrigatoria, poderá descargar un diploma de realización asinado dixitalmente, cuxa veracidade se poderá comprobar na sede electrónica da Xunta de Galicia.
Os usuarios coñecerán antes do inicio de calquera acción formativa cales son as localidades onde poderán realizar as probas presenciais, e serán as propias aulas CeMIT de cada concello as que reservarán o espazo e programarán os días previstos para a avaliación.
Temáticas dos cursos
Os materiais formativos que compoñen estes cursos foron elaborados seguindo a Guía de boas prácticas para a publicación de obras documentais da Xunta de Galicia. A listaxe dos cursos dispoñibles é a seguinte:
A Rede CeMIT
A rede CeMIT conta cun total de 98 aulas, presentes en 92 concellos. Desde a súa posta en marcha pola Amtega, fai cinco anos, a Rede leva impartidas máis de 204.000 horas de formación gratuíta, principalmente en alfabetización e capacitación dixital a preto de 58.000 usuarios rexistrados.
A rede ofrece tamén formación especializada por colectivos grazas á súa colaboración co Centro Demostrador TIC, o Centro de Novas Tecnoloxías de Galicia e a Escola Galega de Administración Pública, retransmitindo xornadas e actividades a través da súa rede de videoconferencias.
A listaxe completa e a localización das aulas CeMIT poden ser consultados en: http://cemit.xunta.es/centros.
O conselleiro de Política Social en funcións, José Manuel Rey Varela, presentou hoxe na escola infantil de Ames-Bertamiráns a aplicación TokApp, un sistema de mensaxería que permitirá aos centros comunicarse de xeito máis doado e rápido coas familias dos nenos e nenas que acoden ás escolas infantís da rede Galiña Azul, nas que se inscriben as escolas infantís dependentes do Consorcio Galego de Servizos de Igualdade e Benestar e aquelas dependentes da Axencia Galega de Servizos Sociais. Alí, a empresa creadora da aplicación, TokApp School, realizou unha demostración técnica do funcionamento da mesma.
Esta innovación consta de dúas partes diferenciadas: a aplicación web, dende a que os profesores/as e o persoal do centro crean e envían as mensaxes; e a aplicación móbil, de descarga gratuíta en smartphones e outros dispositivos electrónicos nas que as familias poderán recibir estas mensaxes.
O sistema presenta múltiples vantaxes entre as que destacan a atención personalizada , o aforro de tempo e a facilidade de uso da aplicación. Ademais, permite rexistrarse de balde, sen amosar o número de teléfono e as notificacións envíanse a un ou varios destinatarios respectando sempre a privacidade dos datos persoais. TokApp tamén ofrece a opción de que a comunicación sexa bidireccional, de xeito que se o centro ou os profesores o requiren, os pais e nais poderán contestar á mensaxe enviada por parte do persoal do centro ao que asisten os seus fillos.
Para o seu correcto e eficiente funcionamento, a empresa propietaria da aplicación está a realizar cursos de formación a cada unha das direccións das escolas infantís. A día de hoxe, 15 escolas do Consorcio Galego de Servizos de Igualdade e Benestar e 44 escolas da Axencia Galega de Servizos Sociais xa foron obxecto desta formación e en vindeiras datas a aplicación estará operativa en todas e cada unha das escolas infantís da Consellería de Política Social. Nun principio os administradores da aplicación serán ás direccións dos centros.
O conselleiro en funcións amosou a súa satisfacción pola posta en marcha desta aplicación, e destacou que “o avance das novas tecnoloxías nos últimos anos é unha evidencia á que non queremos dar as costas”. Por elo a Consellería de Política Social pón a disposición das escolas e das familias esta aplicación que “redundará no benestar e aforro de tempo dos pais e nais, pero sobre todo, no benestar e no coñecemento da evolución dos nenos e nenas nas escolas”, afirmou.
Os próximas días 27 e 28 de outubro celébrase o VIII Congreso de accesibilidade a medios audiovisuais para persoas con discapacidade, AMADIS 2016 para dar a coñecer os traballos de investigación, desenvolvemento e innovación en materia de accesibilidade audiovisual organizado pola Universidade Carlos III, o Real Padroado sobre Discapacidade a través do Centro Español do Subtitulado e a Audiodescripción (CESyA) e o Museo do Exército.
Este congreso é o principal encontro nacional para os profesionais dos medios audiovisuais que queren ofrecer contidos accesibles para as persoas con discapacidade e terá lugar no Museo do Exército situado no Alcázar de Toledo (Rúa da Paz, nº1). Ademais, o Comité Español de Representantes de Persoas con Discapacidade (CERMI) fará entrega dun dos seus premios na categoría de Accesibilidade Universal-Fundación Vodafone que este ano recaeu no CESyA.
Na xornada inaugural do xoves ás 09:15 horas contará coa presenza de Aurelia Sánchez Navarro, conselleira de Benestar Social do Goberno de Castela-A Mancha, o xeneral Director do Museo do Exército, Juan Bosco Valentín-Gamazo, Mercedes Jaraba Sánchez, directora do Real Padroado sobre Discapacidade (por suplencia), María José Montes Sancho, vicerreitora adxunta de Orientación da Universidade Carlos III de Madrid, e Luís Cayo Pérez Bueno, presidente do CERMI.
O congreso dá voz a expertos do ámbito académico e empresarial, a representantes de destacadas institucións públicas como a CNMC (Comisión Nacional dos Mercados e a Competencia) e a asociacións de persoas con discapacidade como CERMI, Fundación ONCE, FIAPAS, CNSE ou AICE. Produtores, realizadores, enxeñeiros, creadores, responsables políticos, emprendedores, cooperantes daranse cita para compartir os últimos avances en tecnoloxía, produción, distribución e control de calidade do subtitulado e a audiodescrición. Presentaranse ademais os avances e novos proxectos desenvolvidos polo CESyA e o Museo do Exército ofrecerá unha visita guiada para todos os asistentes.
O programa de obradoiros de alfabetización dixital para maiores de 55 anos, que realizan conxuntamente a Fundación Vodafone e a Fundación Pere Tarrés, foi un dos proxectos finalistas na última edición dos Telecentre Europe Awards que entregaron en Bruxelas o pasado 7 de outubro de 2016, na categoría de Premio á mellor colaboración entre entidades.
Os Telecentre Europe Awards son uns premios que outorga Telecentre Europa AISBL en recoñecemento aos éxitos individuais e organizacións de toda Europa que permitan ás persoas para poder familiarizarse coa tecnoloxía. Estes premios queren recoñecer a innovación, a dedicación e o papel inspirador que exercen moitas organizacións e persoas individuais como inspiradoras para outros colectivos.
Grazas ao programa de alfabetización dixital para maiores de 55 anos, durante este ano máis de 5.000 persoas formáronse no uso das tabletas e teléfonos intelixentes, axudando a reducir a fenda dixital neste grupo de poboación. O programa desenvólvese a través de diferentes obradoiros segundo niveis dos usuarios e lévanse a cabo en espazos como bibliotecas, centros cívicos, casais para maiores ou universidades de Cataluña e Baleares.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...