Pormi ten como obxectivo facilitar o coñecemento e detección da violencia de xénero sufrida por mulleres, especialmente por aquelas con discapacidade. Ademais ofrécese información sobre os dereitos que lles asisten, ofrecendo os distintos itinerarios dispoñibles, tales como acceso directo aos recursos telefónicos e servizos específicos para estas situacións, canles de denuncia, asistencia pedagóxica, asesoramento legal e resto de información que poida ser de utilidade para identificar situacións de violencia que poida sufrir a usuaria da aplicación.
Tamén pode ser usada por quen, sen ser vítima directa da violencia, coñeza algún caso e queira informarse ou denunciar este tipo de situacións. A aplicación inclúe testemuños de casos de mulleres con discapacidade que estiveron inmersas en situacións de violencia de xénero.
Pormi contou co asesoramento técnico da Delegación do Goberno para a Violencia de Xénero, Ministerio de Sanidade, Servizos Sociais e Igualdade, Policía Nacional, Cruz Vermella e das entidades membros do CERMI.
Microsoft uniuse un ano máis á Hora do Código, unha iniciativa promovida por Code.org, que se celebra en todo o mundo coincidindo coa Semana Educativa das Ciencias da Computación -do 5 ao 11 de decembro próximo- e que busca difundir entre os nenos e nenas coñecementos básicos de programación e informática.
Este ano, Microsoft promoverá máis dun milleiro de obradoiros gratuítos de formación en programación para nenos en máis de 60 países, que se impartirán nas tendas da compañía (Microsoft Stores), as súas oficinas e centros de innovación repartidos por todo o mundo, así como nas sedes de distintas Ong coas que Microsoft mantén acordos de colaboración. Nestes eventos, os nenos poderán comprobar que programar é algo divertido e moi útil para o seu futuro laboral. Todo iso será posible grazas á implicación dos empregados de Microsoft, á súa comunidade de socios no sector educativo e tecnolóxico (incluíndo empresas privadas, centros escolares e Ong) e ás comunidades de estudantes Microsoft Student Partners, e profesionais MVPs, que compartirán a súa paixón e coñecemento en computación e programación cos nenos e nenas.
En España, Microsoft impulsará durante a Semana Educativa das Ciencias da Computación, a celebración de máis de corenta obradoiros en centros educativos de toda España, co obxectivo de animar a dous mil nenos e nenas a iniciarse na programación.
A Comisión Europea calcula que no ano 2020 existirán ao redor de 900.000 postos vacantes no ámbito da tecnoloxía en Europa que necesitarán ser cubertos; unha realidade laboral que demanda a introdución nos plans de estudos actuais do ensino da programación. A consultora McKinsey publicou o pasado ano un estudo que evidenciaba que máis dun terzo das empresas non é capaz de atopar traballadores coas habilidades tecnolóxicas apropiadas.
“A educación ten que evolucionar de acordo aos requirimentos da sociedade e debe transformarse e adaptarse a contornas cada vez máis dixitalizados. Os nosos escolares desempeñarán traballos que nin sequera se inventaron. Por iso, é imprescindible unha formación de calidade para os nenos en materia de programación e informática desde a educación primaria. Desta forma, estarémoslos a preparar para responder adecuadamente aos requirimentos laborais que implica a economía dixital”, comenta Pilar López, presidenta de Microsoft Ibérica.
O pistoletazo de saída a todas estas actividades deuno o evento que se celebrou en Madrid, no Global Sports Innovation Center, centro de innovación no deporte impulsado por Microsoft e pioneiro en Europa. Esta xornada foi o punto de arranque dos máis de mil obradoiros de programación que Microsoft impulsará en todo o mundo con motivo da iniciativa mundial “A Hora do Código”
Nenos e nenas de entre 11 e 14 anos deron os seus primeiros pasos no mundo da programación a través dun completo tutorial: Minecraft Hour of Code Designer que está dispoñible en preto de cincuenta idiomas, incluíndo español, catalán, eúscaro e galego. Esta divertida experiencia foi creada especialmente para a Hora do Código polos deseñadores do videoxogo Minecraft de Mojang e Microsoft, en colaboración con Code.org.
Os tutoriais sobre Minecraft que levaron a cabo o ano pasado durante as actividades da Hora do Código, bateron récords ao alcanzar máis de 30 millóns de estudantes en todo o mundo. Este ano, o obxectivo de Microsoft é mellorar estes resultados e achegar a tecnoloxía e a programación ao maior número de nenos posible en todo o mundo.
A Fundación Real Madrid tamén se apunta á Hora do Código
O primeiro evento da Hora do Código en España contou coa participación de 150 nenos pertencentes a diferentes centros educativos de España (SEK International Schools), Portugal (Agrupamento de Escolas de Freixo) e Colombia (ESD da Fundación Real Madrid no Departamento do Val do Cauca) que se conectaron para compartir esta sesión especial de formación impartida por profesores de Fundación Crear e voluntarios de Microsoft Ibérica.
Ademais, a xornada contou coa participación especial da Fundación Real Madrid, coa que Microsoft mantén un acordo de colaboración para fomentar o achegamento de nenos e mozos á tecnoloxía e o acceso a formación sobre computación e programación.
Os xogadores do Real Madrid, Sergio Ramos, Isco e Marcelo puideron compartir cos nenos e nenas participantes esta xornada especial, e conectáronse a través de Skype cos alumnos de Freixo, en Portugal, que tamén participaban nesta Hora do Código conxunta.
"As Ciencias da Computación son fundamentais para a educación: preparan aos estudantes para todas as carreiras e dálles unha mellor comprensión do mundo no século vinte e un. Encántame ver a Fundación Real de Madrid apoiando a hora do código. Este equipo ten un lugar especial no meu corazón porque pasei un ano vivindo en Madrid, e ao apoiar a educación hoxe mostraron o seu verdadeiro corazón tamén. ¡Ala Madrid!" asegura Ali Partovi, cofundador, Code.org
Lenovo anuncia un acordo de colaboración con Save the Children, a organización independente líder na defensa dos dereitos da infancia en todo o mundo, que traballa en máis de 120 países salvando vidas, proporcionando seguridade e protección aos nenos. Este acordo, que se puxo en marcha o 25 de novembro, ten como obxectivo proporcionar axuda a nenos con poucos recursos e/ou risco de exclusión social. A compañía puxo en marcha esta iniciativa de Responsabilidade Social Corporativa xunto con United Way para achegar o seu grao de area e crear un mundo mellor.
No marco desta acción, Lenovo asistirá a un dos centros de apoio extraescolar que Save the Children ten en Madrid, no barrio de Vallecas, onde axudan a nenos con problemas de pobreza ou risco de exclusión social. Ademais, como parte da campaña, Lenovo doará 56 dispositivos para centros en Madrid, Barcelona, Sevilla, Vitoria e Melilla e, nesta primeira acción, Lenovo dará unha sesión formativa sobre computadores e ciberseguridade aos nenos de entre 12 e 18 anos para que coñezan, entre outros aspectos, como deben usar a súa información persoal na rede.
Aproveitando esta primeira convocatoria, e coa intención de que non se converta nunha mera doazón de dispositivos, Lenovo creou un grupo de voluntarios para participar tanto nesta como en futuras actividades con Save the Children. A acción foi acollida con éxito pola gran maioría dos traballadores de Lenovo, que irán participando consecutivamente en cada unha das sesións de axuda que se van a realizar nos próximos meses polas diferentes provincias de España.
Alberto Ruano, Director Xeral de Lenovo en Iberia, afirma que “se trata dunha iniciativa marabillosa, que poñemos en marcha con moito entusiasmo, por ter a oportunidade como empresa especializada en innovación de achegar a tecnoloxía aos sectores menos favorecidos. Para nós é importante crecer como empresa, pero moito máis é facelo como persoas, comprometidas coa sociedade e cos problemas que nos rodean, por iso non podemos deixar de buscar a forma de axudar e contribuír a conseguir un mundo mellor”.
Só faltan uns días para que #GivingTuesday, a campaña global da solidariedade, teña lugar. O vindeiro martes, 29 de novembro celébrase en 71 países a alternativa solidaria ao #BlackFriday, e en España suma xa máis de 300 proxectos que se uniron na plataforma www.givingtuesday.es.
O apoio de 19 ONG e fundacións, ademais do de tres empresas que se uniron como promotoras posibilitou que entidades sociais de todo o territorio nacional teñan cabida para reclamar un espazo para a solidariedade ante a onda de consumismo que se esperta coas campañas comerciais que teñen lugar antes do período do Nadal.
Eixos como a saúde, a tecnoloxía, a discapacidade ou a cooperación internacional son catro dos grandes destacados no conxunto de proxectos solidarios que as entidades puxeron a disposición da poboación para fomentar a concienciación e a colaboración con problemas como a loita contra o cancro, o acceso a unha vivenda digna ou a loita contra o cambio climático. Así, #GivingTuesday quere fomentar a cooperación como un valor engadido para impulsar unha cultura solidaria en España tendo en conta a participación do tecido social e empresarial.
#GivingTuesday tamén se celebrará noutros países como Reino Unido ou Estados Unidos, onde conta co apoio explícito de entidades como a Fundación Bill & Melinda Gates, Facebook ou Paypal, entre outras. Este ano, #GivingTuesday, sumou a participación de Eslovenia e Croacia, co que xa son 71 países os que decidiron intervir nesta alternativa solidaria que se iniciou en Estados Unidos fai catro anos e que recadou en 2015 máis de 113 millóns de dólares.
A Deputación da Coruña é unha das entidades galegas que máis está a traballar arestora na loita contra a violencia de xénero ao abeiro das novas tecnoloxías. Froito deste compromiso, que entronca directamente coa celebración do Día Internacional contra a Violencia de Xénero, é a iniciativa Suprime o control, posta en marcha pola Área de Benestar Social, Educación e Políticas de Igualdade de Xénero. Este mes de novembro Suprime o Control estase a desenvolver nos centros de ensino dos concellos de Trazo, Touro, Malpica, Cerceda, Ponteceso, Boimorto, Dodro, Tordoia, Arzúa, O Pino e Mesía.
A iniciativa vai chegar ao longo deste primeiro curso académico a 14 centros educativos e terá continuidade nos cursos 2017-2018 e 2018-2019. Despois de se impartir en Frades, Cabana de Bergantiños e Vedra, chegou este mes de novembro (con motivo do dito Día Internacional) a un importante repunte de actividade que incluíu a visita aos centros de ensino de once concellos.
Segundo lembrou esta semana Ánxela Franco (responsable da dita Área de Benestar Social e Educación), o programa ofrece ferramentas “coas que traballar para a construción da igualdade con especial atención á violencia machista na adolescencia e a súa reprodución na actualidade por medio das aplicacións móbiles ou as redes sociais”. Para máis información pódese consultar a súa web, suprimeocontrol.com.
Co obxectivo de promover as vantaxes que ofrecen os teléfonos intelixentes ou “Smartphones” para as persoas maiores, a Fundación Vodafone España lanzou a cuarta edición da Guía: "Como utilizar os novos teléfonos móbiles? Manual de uso fácil para maiores".
Como se sabe, o uso que fan os maiores dos mesmos é bastante básico de maneira que aproveitan moi poucos dos servizos que ofrecen os devanditos dispositivos, especialmente en aspectos relacionados coa saúde, participación social e seguridade.
O fin do manual é facilitar o uso pleno destes dispositivos aos nosos maiores, en tanto que son instrumentos facilitadores dun envellecemento activo, máis satisfactorio e participativo, que axudan a reducir a súa soidade e incrementan os seus sentimentos de seguridade. E todo iso dunha maneira fácil e atractiva.
A guía, moi sistemática, está estruturada en breves capítulos onde se mostra como acender o Smartphone, a utilizar as iconas de pantalla, chamar, recibir chamadas, gardar números na axenda de contactos, escribir mensaxes, facer fotos e vídeos, conectarse e acceder a internet, descargar e instalar aplicacións desde google play e termina mostrando un elenco de aplicacións recomendadas que poden usar segundo os seus gustos e preferencias.
Con esta nova edición da guía, a cuarta, e desde que se publicou a primeira no ano 2013, alcanzáronse xa as 300.000 copias, distribuídas por todo o territorio do estado e en todas as súas linguas oficiais. Os PDF accesibles das mesmas pódense descargar desde a web da Fundación Vodafone España.
Na actualidade todas as empresas teñen claro que o bo deseño capacita e que o mal deseño discapacita, "co cal é unha oportunidade de negocio para todas as compañías".
O encontro, celebrado na sede da Fundación ONCE, foi inaugurado polo presidente de eVIA, Jesús Hernández, e o director de Innovación, Emprendemento e Internacionalización de Ametic, Juan Gascón, e contou coa participación de María Ángeles Ferre, xefa da Subdivisión de Programas Temáticos Científico-Técnicos da Axencia Estatal de Investigación.
No acto de inauguración, Juan Gascón sinalou que un dos obxectivos para o próximo ano será seguir potenciando as redes sociais e a tecnoloxía. "A sociedade é dixital e o cidadán é dixital, polo que é imprescindible que as tecnoloxías sexan accesibles: esa segue sendo nosa misión", aseverou. Así mesmo, defendeu un modelo "aberto ao exterior" e que favoreza "a chegada ao mercado de solucións para todos".
A xornada, dirixida a responsables de centros de investigación, empresas, investidores, administracións e usuarios, abordou en diferentes sesións formativas as oportunidades no ámbito da Compra Pública Innovadora que se poñerán en marcha no ámbito das TIC aplicadas á Saúde, a Accesibilidade e a Vida Activa e Independente.
En canto ao plan de traballo para 2017, puxéronse sobre a mesa as novidades nos bloques relacionados co ámbito eVIA dentro do Programa Horizonte 2020, fundamentalmente no Reto 1, referido á Saúde, Cambio Demográfico e Benestar, e o Reto 6, sobre Sociedades inclusivas, innovadoras e reflexivas.
A piques de cumprir 10 anos, Hernández lembrou como a plataforma naceu para cohesionar a institucións como as administracións públicas, as empresas, as universidades e entidades como a Fundación ONCE, para traballar conxuntamente en proxectos de mellora da calidade de vida das persoas, moi especialmente das persoas con discapacidade e persoas maiores.
Hoxe, aseverou, é unha plataforma aberta, que traballa de forma transversal e que está a mellorar a accesibilidade de solucións tecnolóxicas. Con máis de 400 membros, engadiu, é unha das plataformas tecnolóxicas máis potentes que hai en España, "e iso é froito do esforzo e do firme apoio que a Fundación ONCE está a prestar á plataforma a través de Ametic, que é a patronal das empresas do sector TIC".
A empresa galega Primux Tech, emprazada na Tecnópole de Ourense e centrada no deseño e desenvolvemento de trebellos electrónicos, vén de lanzar unha aplicación móbil de balde que é quen de crear unha interface nos smartphones que os fai (de maneira automática) accesibles para as persoas con problemas de visión. Segundo salienta Primux Tech, trátase da primeira ferramenta destas características que aparece no mercado. Podemos descargala xa plataforma Google Play para sistemas con Android.
O seu deseño é obra do departamento de I+D+i da compañía, instalado no Parque Tecnolóxico de Galicia-Tecnópole (Ourense), grazas á iniciativa e á colaboración dun usuario con dificultades de visión. “A aplicación”, sinalan fontes da compañía e da Tecnópole, “non só adapta a contorna gráfica dos teléfonos intelixentes e engade novas funcionalidades orientadas a este público, senón que conta cun asistente de voz que lle facilita toda a información ao usuario”. Polo tanto, a idea era facer doado e real o que para algunhas persoas con certas características de visión, en relación aos novos terminais, era case imposible.
Segundo explica Daniel Rodríguez, director executivo da firma galega, cousas como “saber canta batería ten o móbil, que hora é ou se hai conexión Wi-Fi e mesmo facer unha chamada pódese converter nun auténtico pesadelo para as persoas con dificultades de visión, pero con Primux Blind, só desprazando o dedo pola pantalla, salta un asistente de voz que facilita todas estas tarefas”. A creación de accesos directos é outra das características da aplicación, “coa posibilidade de crear listas cos contactos máis habituais ou coas apps que máis se usan”. Por outra banda, os textos aparecen nun tamaño moito maior e os usuarios poden elixir o contraste de pantalla que se adapta mellor ás súas capacidades. A intención última dos responsables desta aplicación é evitar o desembolso que supón adquirir un terminal específico.
Segundo explica Primux, o desenvolvemento da aplicación é “froito dun proceso de innovación aberta”, un proceso que “naceu da demanda que un usuario con problemas de visión lle trasladou á empresa e que logo colaborou estreitamente co equipo de I+D de Primux axudándolle a enfocar adecuadamente as prestacións da nova app”. A empresa salienta que apenas é posible hoxe en día, a nivel europeo, atopar algunha outra ferramenta que xurdise directamente desta marcada vontade social, incluíndo un achegamento tan próximo á realidade do colectivo ao que vai destinada, “e moito menos de balde”.
A intención da compañía con Primux Blind foi aumentar a oferta de aplicacións móbiles gratuítas orientadas a facilitar a accesibilidade e a seguridade no emprego de smartphones “por parte de públicos especialmente vulnerables”. A firma ourensá lembra tamén que a finais de 2014 lanzaba Help Launcher, deseñada para facilitar o uso dos teléfonos intelixentes aos maiores, e no verán de 2015 Help Launcher Kids, unha ferramenta de control parental para garantir a seguridade dos máis pequenos á hora de utilizar os seus móbiles.
A iniciativa ‘Vodafone Connecting for Good Galicia', promovida por a Fundación Vodafone España, ten como finalidade apoiar a emprendedores e PEMES de recente creación, cuxos proxectos de negocio contribúan á innovación social a través do impulso e uso das tecnoloxías da información e comunicación en Galicia.
Os seis emprendedores seleccionados nesta primeira convocatoria na que colaboran Vodafone e a Xunta de Galicia, comezaron onte a formación na que se imparten sesións sobre modelo e plan de negocio, e terá unha duración de polo menos seis meses.
Onte tamén comezou a fase de mentorización, que se basea na asesoría experta en temas de comunicación, vendas, negocio, e accesibilidade, cun plan personalizado para cada proxecto.
A responsable de Desenvolvemento de Negocio e Coñecemento de ILUNION Tecnoloxía e Accesibilidade, Lourdes González Perea, explicará o día 29 de novembro, ás 18.00 horas, como crear unha web ou un blogue para que sexan accesibles ás persoas con discapacidade.
Farao na xornada ‘Accesibilidade á información dixital: Web, redes sociais e aplicacións móbiles', organizada pola Asociación Española de Responsables de Comunidades Online e Profesionais de Social Media (AERCO-PSM), con motivo do Día Internacional das Persoas con Discapacidade, que se celebra o 3 de decembro.
Os asistentes a esta cita, que terá lugar en Madrid Internacional Lab, situado no número 41 da rúa Bailén, coñecerán como navega unha persoa con discapacidade pola web e as redes sociais. Así mesmo, descubrirán como os dispositivos móbiles potencian o acceso das persoas con discapacidade a plataformas como Twitter ou WhatsApp.
Ademais de responsable de Desenvolvemento de Negocio e Coñecemento en ILUNION Tecnoloxía e Accesibilidade, Lourdes González Perea é codirectora do Máster en Tecnoloxías Accesibles da Universidade Internacional da Rioxa (UNIR) e experta en Tecnoloxías Accesibles e I+D+i.
O compromiso social de AERCO-PSM
AERCO-PSM aglutina aos profesionais de Social Media, especializados en sensibilizar e formar a empresas e organizacións sobre as vantaxes e beneficios que achega ás marcas a súa correcta presenza en medios sociais.
Dentro do seu obxectivo de concienciar aos distintos profesionais das bondades do uso dos medios sociais nas súas áreas de actuación, especialmente en Márketing, Comunicación, Atención ao Cliente, RRHH e/ou Responsabilidade Social Corporativa, sempre ten presente o seu compromiso social e a súa responsabilidade como asociación líder en márketing dixital.
Especialistas
Os profesionais de ILUNION Tecnoloxía e Accesibilidade están especializados na avaliación da accesibilidade de infraestruturas de Tecnoloxías da Información e da Comunicación (TIC), arquitectónicas, urbanísticas, do transporte e do turismo.
Así mesmo, desenvolve actividades de I+D+i, non só no campo tecnolóxico senón tamén no da investigación social. Desde 2003 certifica a accesibilidade en diversas tecnoloxías (web, aplicacións móbiles, etc.).
ILUNION Tecnoloxía e Accesibilidade traballa para que a sociedade sexa cada vez máis inclusiva e achega o seu coñecemento e experiencia para que as institucións e empresas poidan ofrecer a súa información e servizos de forma adecuada a todo o mundo.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...