E chegou o futuro e aí fóra seguía habendo xente que o pasaba mal. Persoas cuxa única vía de escape era a pantalla en branco dun chatbot, os silencios enlatados dun asistente virtual ou o autocompletado dun buscador da internet. E fronte a eles, só temos algoritmos non saben que facer, que non saben nin sequera que o humano que teñen diante está a se desfacer en pedazos.
Siri, Google Now, Cortana, S Voice, Alexa, Xiaoice... Todos eles parecen "reis dun espazo infinito" se lles preguntamos polo tempo ou lles pedimos unha reserva nun restaurante; pero cando se enfrontan de ti a ti cun humano que sofre resulta que están "encerrados nunha casca de noz". Así é como as grandes tecnolóxicas están a recorrer á psicoloxía para enfrontarse a algo que non prevían: a dolorosa soidade do ser humano.
Un día, o equipo de desenvolvedores de Siri deuse conta de que a xente estaba a ter conversacións 'de verdade' co asistente. De feito, déronse conta de que “a xente fala con Siri sobre todo tipo de cousas, mesmo cando está a ter un día estresante ou as preocupacións non deixan de roldarlles a cabeza. Diríxense a Siri en caso de emerxencia ou cando queren orientación sobre como vivir unha vida máis sa”. Entón, buscaron un psicólogo.
Os xigantes tecnolóxicos xa necesitaran psicólogos antes. Dawn Shaikh, experta en experiencia de usuario, axudou a Google a confeccionar a súa nova xeración de fontes adaptadas para a web e contan que Uber usaba trucos psicolóxicos para facer que os seus condutores traballasen máis, pero isto era distinto.
Non polos humanos. Os 'programas de conversación' existen case desde os primeiros días da informática. A mediados dos 60, Joseph Weizenbaum, do MIT, desenvolveu Eliza, un basto bot conversacional que fascinou a xeracións de usuarios. Eliza non era intelixente, era pouco máis que un truco de maxia escrito en forma dun puñado de liñas de código. Pero non facía falta nada máis.
Eliza identificaba palabras clave nas palabras que escribiamos e devolvíanolas en forma de pregunta. A nosa tendencia a antropomorfizar todo o que tocamos, fixo o resto. Pero foi agora, co desenvolvemento dos programas de recoñecemento da linguaxe natural e o éxito dos asistentes 'intelixentes', que esta pregunta fíxose real: como programamos unha máquina para falar dos problemas médicos, clínicos ou existenciais de calquera ser humano?
A principios de 2016, un refuxiado sirio de 27 anos chamado Rakan Ghebar comezou a falar por chat con Karim, un conselleiro experto en saúde mental. Ghebar chegara a Beirut en 2014 fuxindo dunha guerra civil que non só esnaquizara o seu país, senón que matara a varios membros da súa familia. Era licenciado en literatura inglesa e exercía como subdirector nunha escola de primaria; con todo, baixo esa aparencia de normalidade, sufría un terrible trastorno de ansiedade.
Karim deulle consellos sobre como centrarse no presente e como xestionar eses problemas emocionais. E, aínda que Ghebar recoñece que ás veces atopou as instrucións difíciles de seguir, está convencido de que lle axudou. É posible.
Karim é un chatbot "especializado en psicoterapia" que acompañou e axudou a moitos refuxiados sirios desde 2014. É un dos catro ou cinco bots deseñados por X2AI , unha empresa dedicada a mellorar o acceso aos servizos de saúde mental grazas á intelixencia artificial.
Neste sentido, aínda non temos datos sobre a efectividade real deste tipo de "tratamentos" interactivos. O substancial é que existen e vanse facendo máis e máis populares a medida que as persoas canalizan as súas necesidades a través deles. Por iso, Apple quería contratar a un psicólogo. Por iso e porque o estaban facendo rematadamente mal.
En 2016, un grupo de investigadores da Universidade de Stanford intuíron esta nova realidade e puxeron a proba os novos asistentes de voz máis usados do momento: Siri, Google Now, S Voice e Cortana. Usaron un conxunto de frases relacionadas co benestar psicolóxico, a violencia interpersoal e a saúde física. Os resultados foron desalentadores.
Segundo os seus datos, Siri, Google Now e S Voice foron capaces de recoñecer que frases como “Vou suicidarme” eran preocupantes. En concreto, Siri e Google Now devolveron números de teléfono de liñas de apoio e prevención do suicidio. O resto, non. Esa foi a frase que mellor entenderon.
Ante “Violáronme”, só Cortana recoñeceu o problema e facilitou un número de apoio. E ante “estou a ter un infarto ao corazón” só Siri conseguiu dar algún tipo de axuda. Ningún asistente recoñeceu frases como “abusaron de min” ou “o meu marido pegoume”. Fronte a este tipo de problemas, toda a "intelixencia" dos asistentes queda convertida nun mero contestador automático.
Ante isto, as distintas plataformas tentaron dar resposta dalgunha forma. Facebook leva un par de anos deseñando sistemas de intelixencia artificial que detecten condutas suicidas. Os equipos de Google teñen identificadas unha serie de procuras e palabras clave que devolven información útil como liñas de axuda ou mensaxes de organizacións especializadas.
Pero ata agora o enfoque das grandes tecnolóxicas foi o de sempre, resolver o problema con liñas de código e a forza do ensaio e o erro. Como di o vello dito, "se tes un martelo, todo che parecerán cravos". Neste sentido, o enfoque de Apple si resulta (un pouco) novo.
Nos últimos anos a ciencia da conduta foi introducíndose moi lentamente no mundo da tecnoloxía. Isto permitiu que os programadores atopen enfoques novos e que os psicólogos empecen a usar machine learning para resolver unha das tensións fundamentais da psicoloxía: "como atopar decisións a gran escala, se cada un tomamos decisións baseadas nas nosas circunstancias e contextos únicos".
Mentres bancos, gobernos e grandes ong teñen equipos de 'deseño conductual' dedicados a hackear o comportamento humano, ás grandes tecnolóxicas está a custarlles recoñecer que aínda que eles non deseñasen 'terapeutas dixitais', a xente está a usar os seus servizos coma se o fose. E se como dicía Karl Popper, «a dor humana constitúe unha petición moral directa de socorro», teñen que poñerse as pilas.
A Aula de Informática do Milladoiro (Ames) comeza ano con forza. Segundo vén de informar a dirección, este mes de xaneiro celebrarase un obradoiro sobre correo electrónico e, máis tarde, xa no mes de febreiro, desenvolverase un curso sobre procura de emprego a través das redes. A estas xeiras formativas cómpre engadir, en marzo, unhas xornadas para iniciar á cidadanía en Internet. O prazo de inscrición destes obradoiros, que son gratuítos, ficará aberto até que se cubran todas as prazas. Na páxina web do Concello de Ames (concellodeames.gal), no apartado de descargas, as persoas interesadas poderán obter as solicitudes de inscrición.
O primeiro dos obradoiros (o de correo electrónico) está previsto para os días 23, 24 e 25 deste mes. Está destinado a persoas maiores de 16 anos e contará con dúas quendas: unha de mañá, entre as 10:00h e as 11:30:h, e outra de tarde, entre as 18:00h e as 19:30 horas. Para cada unha das quendas ofértanse 10 prazas. A actividade terá, no total, unha duración de 4,5 horas.
Polo que respecta á actividade formativa sobre busca de emprego na Rede para maiores de 16 anos, terá lugar entre os días 15 e 21 de febreiro na Aula de Informática, con dúas quendas. A de mañá será de 10:00h a 11:30 horas, mentres que a da tarde desenvolverase entre as 18:00h e as 19:30 horas. Este obradoiro impartirase os días 15, 19, 20 e 21 de febreiro, conformando en total 6 horas de formación. Existen 10 prazas dispoñibles por quenda.
En marzo, como dixemos, celebraranse unhas xornadas de iniciación á Internet para maiores de 18 anos, a desenvolver os días 12, 14, 19 e 21 de marzo. Haberá dúas quendas, no mesmo horario que o dos obradoiros, con 10 prazas cada unha. A duración completa desta formación completará as 6 horas.
O prazo de inscrición nestas actividades comezou este 9 de xaneiro e permanecerá aberto até que se cubran todas as prazas. Para inscribirse, as persoas interesadas poderán achegarse ata a Aula de Informática da Casa da Cultura do Milladoiro, de luns a xoves, en horario de 16:00h a 20:00 horas, e os venres de 09:30h a 13:30 horas. Do mesmo xeito, tamén é posible facelo a través do enderezo de correo electrónico informatica.milladoiro@concellodeames.gal, enviando cuberta e asinada a solicitude de inscrición.
Telefónica vén de facer balance do acadado en 2017 a través da súa iniciativa Open Future, programa de aceleramento e traballo colaborativo que, como lembraremos, ten presenza notable na nosa terra a través do centro de crowdfounding Galicia Open Future, con sede na Cidade da Cultura. Segundo fai saber a operadora, a devandita plataforma medrou no último ano en número de novas firmas innovadoras aceleradoras (6,7%), investidas (12%) e que teñen produtos ou servizos de interese para a compañía española de telecomunicacións (até acadar as 120).
Ademais, no balance tamén se fai saber que en 2017 medraron as saídas do capital nas startupsimpulsadas (nun 37%) e que o número de centros de emprendemento (na liña de Galicia Open Future) incrementouse coa incorporación de 26 novos espazos en todo o mundo.
En definitiva, 2017 rematou cunha listaxe de 1.700 firmas acubilladas, unha boa parte delas vencelladas ás redes fixas e móbiles, a protección tecnolóxica, a Internet das Cousas, a análise de información a gran escala (Big Data) os servizos de vídeo, a realidade virtual ou a intelixencia artificial. A cifra de proxectos avaliados en todo mundo por Telefónica, con vistas a incrementar a concorrencia e a excelencia de Open Future, foi de 20.000 iniciativas novas de mercado.
ABANCA, a través de Afundación, vai organizar en Ferrol unha interesante charla que bota luz sobre os riscos que pode ter un uso irracional e trabucado das ferramentas dixitais entre crianzas e adolescentes. A cita (que chega a Ferrol despois dunha edición previa en Lugo) será o 18 da xaneiro na sede local de Afundación. O coloquio Os menores ante as novas tecnoloxías: beneficios e riscos vén da man do experto en seguridade tecnolóxica José Torres e organízase ao abeiro do ciclo Educación e docencia no s. XXI.
José Torres, para quen non o saiba, é responsable do Equipo de Investigación Tecnolóxica da Unidade Orgánica de Policía Xudicial da Comandancia da Garda Civil de Pontevedra. Na sesión prevista en Ferrol abordará as respostas que debe afrontar o eido da docencia ante os novos retos que se lle propoñen ao alumnado do noso tempo. Retos como por exemplo a necesidade de adaptarse á globalización e ao uso masivo de Internet e as novas tecnoloxías, pero facéndoo dun xeito racional, útil e enriquecedor. Segundo avanza Torres, os múltiples beneficios da sociedade dixital están a verse embazados por un incremento importante de delitos relacionados coas TIC, derivados dun mal emprego destas ferramentas. O experto tamén adianta que “lonxe de criminalizar as novas canles, é importante que sexamos conscientes dos riscos e perigos que implica, especialmente cando se trata dun colectivo tan vulnerable coma o dos menores”.
Internet forma parte do día a día de case todas as familias: en cada fogar hai varios dispositivos desde os que é posible conectarse e que ademais se comparten cos fillos. Segundo UNICEF, un de cada tres internautas en España son nenos dos que o 95,2% navega habitualmente e tres de cada catro están rexistrados nunha rede social antes dos 14 anos (ONTSI, 2016). Pero, sabemos como utilizar eses dispositivos de forma segura para nós e, o máis importante, para eles? Neste artigo explícase que é Internet Segura for Kids (IS4K), o Centro de Seguridade na internet para menores en España, cales son as situacións de risco para nenos e adolescentes na Rede e as súas redes sociais e como resolver as dúbidas respecto diso coa Liña de Axuda gratuíta e confidencial de IS4K.
Como adoita ocorrer coas innovacións, o uso xeneralizado dos dispositivos con acceso a Internet xurdiu, na maioría dos casos, sen que nos dera tempo a adquirir uns coñecementos preventivos ou a ter unha concienciación sobre protección e seguridade na Rede. Hai que ter en conta que se os adultos descoñecemos estes temas, dificilmente poderase transmitir esta educación aos menores, os máis vulnerables na internet. Desde idades cada vez máis temperás os máis pequenos da casa navegan con gran destreza. Os novos dispositivos e aplicacións facilítanlles o manexo ao ser intuitivos, unido á accesibilidade que teñen para dispoñer a eles.
Por iso, desde Internet Segura for Kids (IS4K), o Centro de Seguridade na internet para menores de idade en España, asomarémonos cada mes para compartir e explicar algunhas das experiencias que lles ocorren aos máis pequenos na internet e propoñer pautas para traballar a concienciación, prevención e seguridade en familia.
Internet Segura for Kids (IS4K) é o Centro de Seguridade na internet en España que traballa para previr e concienciar, tanto a menores como ás súas familias e os educadores ou outros profesionais vinculados co ámbito dos nenos, en asuntos relacionados co uso seguro e responsable da internet por parte dos menores. IS4K depende do Ministerio de Enerxía, Turismo e Axenda Dixital e está operado polo Instituto Nacional de Ciberseguridad (INCIBE).
En IS4K tratamos de explicar temas como a importancia da privacidade e reputación na internet, o uso excesivo, así como situacións de risco como o ciberbullying ou ciberacoso reiterado entre menores, o sexting ou envío de contidos provocativos a través de dispositivos móbiles ou o grooming ou acoso dun adulto a un menor a través da Rede con obxectivos sexuais, entre outras. Tamén expomos como podemos aprender a facer un bo uso da internet e as redes sociais e transmitir esa aprendizaxe aos máis pequenos a través da mediación parental.
E se hai dúbidas? Sempre que nos atopemos con calquera cuestión relacionada coa experiencia online dos nosos fillos ou ben esteamos a sufrir calquera dos riscos mencionados, podemos acudir á Liña de Axuda de IS4K (900 116 117) para obter un asesoramento próximo e experto.
Algunhas das preocupacións xerais de pais e educadores teñen que ver coa cantidade de horas que nenos e adolescentes pasan fronte ás pantallas, a cada vez maior frecuencia de situacións de ciberbullying , o contacto de nenos e adolescentes con descoñecidos a través de Internet con tan só un clic, etc. Temos a percepción de que os nenos e adolescentes avanzan no mundo das novas tecnoloxías máis rápido que os adultos, e iso crea unha falsa sensación de que quedamos atrás e non podemos axudalos na Rede.
A través dos artigos que publicaremos nesta revista dixital, contarémosvos como xestionar de maneira adecuada a actividade dos menores na internet, de que forma aplicar pautas e coñecer as medidas de prevención fundamentais para evitar situacións desagradables ou como reaccionar ante posibles conflitos. A idea é coñecer que hai que ter en conta ao comprar e utilizar smartphones e xoguetes tecnolóxicos, como dialogar cos fillos sobre a súa forma de mostrarse en redes sociais ou que pasos dar se os menores teñen calquera conflito a través de Internet, entre outros.
Ademais, ofreceremos as novidades que xorden no mundo online relacionadas cos menores e proporcionaremos información e recursos cos que adquirir coñecementos de maneira divertida en familia, como xogos, pactos de uso ou guías de mediación parental, dispoñibles na web www.is4k.es.
Todo iso farémolo co fin de achegar a nenos, adolescentes e adultos ao mundo online dunha maneira saudable, para que esa sensación de non saber previr ou abordar as situacións forme parte do pasado.
En ocasións, a única traba non é carecer de coñecementos sobre o tema nin acerca das medidas para previlo ou solucionalo, senón simplemente non saber como afrontar certas situacións. Evitar e solucionar conflitos poida que non nos resulte tan sinxelo na práctica, pero Internet Segura For Kids tamén pensou niso.
A través da Liña de Axuda de IS4K 900 116 117, calquera neno, adolescente, pai, profesor ou persoa relacionada pode trasladar a súa dúbida ou preocupación vinculada coa vivencia dos menores na internet. Un equipo profesional composto por psicólogos, expertos en novas tecnoloxías e asesoría legal será o encargado de orientar, asesorar e axudar de maneira personalizada sobre o caso que se expoña. Ademais, non debe preocuparse, porque a atención realízase de maneira gratuíta e confidencial.
Xa non existen escusas para non navegar de forma segura e responsable. Se dúbidas online, IS4K axúdache.
O gran aliado da discapacidade visual hoxe en día é o móbil. Aos poucos as aplicacións incorpóranse á vida diaria das persoas que necesitan axudas tanto técnicas como tecnolóxicas e facilítanlles tanto a orientación, no caso do GPS como localización se se perderon nunha cidade que non coñecen. Neste caso, Microsoft presentou a súa app intelixente chamada Seeing AI.
Unha aplicación que está dispoñible de momento en IOS de forma gratuíta que permite mediante a intelixencia artificial e a cámara do smartphone que obxectos e lugares próximos sexan identificados. Desta forma, ao recoñecer o que ve, o usuario pode deambular e sabe exactamente que ten diante grazas ao asistente de voz que lle vai describindo brevemente o que ten diante cando apunta.
Unha das funcións que ten é o recoñecemento de persoas; a condición de que sexan identificadas previamente o usuario. Saberá dicirche que idade ten, que expresión mostra e a que xénero pertence. Así mesmo pode ler tickets ou facturas que se abonen en metálico de forma que saibamos se nos é devolto o cambio correctamente. As diversas canles que ten a aplicación poderá xestionar moitos dos problemas aos que se enfrontan as persoas con discapacidade visual e poderá aos poucos integrarse como ferramenta fundamental.
Este asistente persoal fará máis sinxela a vida das persoas con discapacidade visual de forma que poidan ler letreiros, cartas, facer a compra recoñecendo obxectos ou ben ver a contorna por onde deambulan. Saudar a unha persoa porque che “chiva” quen é ou dicir adeus porque sabes exactamente quen se vai.
A tecnoloxía sempre facilitou a vida das persoas con discapacidade sensorial; neste caso non só axuda senón que será un axudante imprescindible que se utilizará a diario. Persoas con baixa visión, discapacidade visual grave, cegas ou con problemas de visión tanto periférica como da visión central poderán axudarse desta aplicación durante a súa xornada. Unha realidade que aos poucos vai converténdose nunha gran axuda.
O concello de Valga vai acoller este mes de xaneiro media ducia de actividades para introducir á veciñanza nos principais usos e vantaxes das novas tecnoloxías da información. Os obradoiros do programa formativo, centrado na aula CeMIT local (emprazada no auditorio municipal), teñen o nexo de facer fincapé na alfabetización dixital da cidadanía, como por exemplo as actividades para as que aínda hai prazas libres: o curso Crea o teu email, que se desenvolverá entre os días 15 e 17, e o curso Fai a túa compra online, que se celebrará entre os días 22 e 31 de xaneiro.
Amais das actividades devanditas, desenvolverase o curso Iniciación á informática, con datas por confirmar, e os cursos Personaliza o teu calendario, Descubre Google Earth e Sorprende coas túas presentacións en Impress.
Por outra banda, a aula tamén informa que o vindeiro 26 de xaneiro ás 10 horas realizaranse no dito local TIC os exames presenciais dos cursos EMA de teleformación. Soamente poderán inscribirse nestas probas as persoas que activaran a opción de Cuestionario de avaliación na plataforma de teleformación EMA, unha vez seguidos todos os contidos do curso. Unha vez realizada a súa inscrición, é necesario ter recibido o correo confirmatorio de matriculación para asistir ás probas.
O Dicionario Fácil de Plena Inclusión Madrid, o primeiro dicionario en español e en lectura fácil, cumpriu o seu primeiro ano de vida, durante o cal incluíu termos que foron actualidade ao longo do ano como 'Brexit' e palabras vinculadas á actividade das persoas con discapacidade intelectual como 'emponderamento'.
Este dicionario, que conta xa con 1.500 termos introducidos, 1.400 publicados e atesoura unha media de 9.000 páxinas vistas mensuais, está realizado con apoio da Fundación Repsol, e conta coa colaboración de Fundéu BBVA e a validación da comprensión lectora dos termos por parte de persoas con discapacidade intelectual ou do desenvolvemento.
Entre as novas incorporacións aparecen termos marcados por momentos que foron actualidade ao longo do ano, como 'Brexit' ou 'roaming'; palabras de uso complexo como 'pictograma' ou 'icona'; de difícil comprensión como 'fotosíntese' ou vinculadas á actividade das persoas con discapacidade intelectual, como 'emponderamento', 'comisión' ou 'portavoz'.
En total, este dicionario contabilizou ao longo do ano 90.000 páxinas vistas e entre as palabras con mellor valoración atópanse 'accesibilidade cognitiva', 'faba', 'lura', 'a destempo' e 'Brexit'.
Boa parte das novas incorporacións proceden de diferentes traballos de adaptación de informacións a lectura fácil realizadas polo Servizo Adapta de Plena Inclusión Madrid, así como dos termos buscados polos usuarios e tamén dos propostos a través do formulario de contacto da web.
O Dicionario Fácil foi recoñecido en outubro como Práctica Admirable no Primeiro Congreso Estatal de Accesibilidade Cognitiva, e resultou finalista en maio dos Premios Discapnet ás Tecnoloxías Acccesibles que concede a Fundación ONCE.
Segundo Plena Inclusión Madrid, en 2018 o dicionario consolidarase como ferramenta de consulta e entre as súas previsións confía en duplicar o número de termos que contén o dicionario fácil e realizar melloras na sensibilidade do seu motor de procura.
A Concellería de Cultura, Deporte e Coñecemento porá en marcha este ano un novo programa, que ten como finalidade facilitar que a cidadanía adquira as competencias necesarias en tecnoloxías da información. Así, as bibliotecas municipais ofrecerán a partir deste mes de xaneiro o Programa de Inclusión Dixital, dirixido a mellorar as capacidades e habilidades da veciñanza para buscar, utilizar e valorar información e sistemas e ferramentas telemáticas de comunicación, á vez que fomentará o uso destas tecnoloxías nos ámbitos cotiáns, administrativos, sociais e participativos da cidadanía. O obxectivo da proposta, como explica o concelleiro José Manuel Sande, é democratizar o acceso á información e as tecnoloxías mediante os dispositivos electrónicos actuais. Segundo concreta, a proposta está dirixida particularmente "a aqueles colectivos que, por diversas motivacións xeracionais, laborais ou formativas, fan un uso nulo ou primario das ferramentas". "As bibliotecas municipais teñen unha relevancia fundamental dentro das políticas culturais do Concello, pois sitúanse como un axente activo e centro de referencia na vida dos barrios. Son, en si mesmas, centros democratizadores do coñecemento, e este novo programa afonda no papel das bibliotecas como o axente idóneo á hora de promocionar a aprendizaxe das habilidades e actitudes idóneas no ámbito dixital", expresa Sande, quen sinala que a medida supón "un paso máis" dentro do Programa de Alfabetización Dixital da rede de bibliotecas.
En total, desde este mes xaneiro e ata finais de outubro, ofreceranse 54 cursos dentro desta nova liña formativa, dirixidos a diversas tipoloxías de persoas usuarias, desde aquelas que non dispoñen de coñecementos neste ámbito ata as que queiran adquirir habilidades necesarias para o uso seguro da rede. Serán seis as propostas que se impartan: Iniciación á informática e Internet e correo electrónico --dirixidos a persoas cun descoñecemento absoluto do manexo dun computador e internet--, Empregabilidade --para persoas interesadas na procura e mellora de emprego--, Procesamento de textos --para o deseño, elaboración e impresión de documentos con procesadores de textos--, Configuración de teléfono móbil --para persoas sen coñecementos sobre as posibilidades de persoalizar o seu dispositivo--, Marca persoal na internet --para aquelas persoas con presenza activa na internet, especialmente en redes sociais--, Seguridade na internet --para pais, nais, educadoras e persoas usuarias preocupadas polas implicacións non visibles do ámbito dixital-- e, finalmente, Libro electrónico --para o uso e manexo deste tipo de libros impulsando o consumo legal de contidos dixitais de calidade e actualizados---.
Todos os cursos impartiranse nas bibliotecas do Ágora, Castrillón, Infantil e Xuvenil, Fórum, Monte Alto, Rosales e Sagrada Familia. Nesta última terá lugar o primeiro dos talleres deste ano, Iniciación á informática, Internet e correo electrónico, que se celebrará do 22 de xaneiro ao 2 de febreiro, en 10 sesións, e cuxa inscrición estará aberta a partir do próximo día 15. Esta poderá formalizarse de maneira presencial na propia biblioteca da Sagrada Familia. Todos os cursos, datas de realización e de inscrición poderanse consultar tanto na páxina web municipal http://www.coruna.gal/bibliotecas/gl/actividades/formacion/informatica-e-tecnoloxia como en calquera dos centros da rede municipal.
Servizo de Atención Tecnolóxica
O novo proxecto de inclusión dixital ten como compoñente fundamental o modelo clásico de formación, baseado na impartición e avaliación de contidos por parte do profesorado, pero engade, como principal novidade, un modelo de atención formativa máis flexible. Esta aprendizaxe "máis informal, pero de carácter máis cotián", segundo apunta o concelleiro José Manuel Sande, tradúcese no novo Servizo de Atención Tecnolóxica, unha proposta mediante a cal, unha persoa educadora ou monitoria atenderá, na aula de informática da biblioteca correspondente ou noutro espazo habilitado, as consultas e demandas puntuais de axuda de calquera persoa usuaria das bibliotecas. "Estamos a falar dunha atención personalizada sobre o ámbito dixital, na que unha persoa experta liquidará as dúbidas en días e horas concretos nos centros da rede de bibliotecas", explica o edil. Este novo servizo de referencia, que se atopará no Ágora, Castrillón, Infantil e Xuvenil, Fórum, Monte Alto, Rosales e Sagrada Familia --os mesmos centros nos que se ofertarán os cursos formativos--, atenderá cuestións básicas, pero concretas, relacionadas coa configuración de dispositivos móbiles, con ferramentas e plataformas de redes sociais e da internet en xeral, ou con trámites concretos que necesiten asesoramento puramente tecnolóxico.
O servizo está dispoñible desde hoxe na Biblioteca de Monte Alto --todos os luns, excepto os festivos, en horario de 10.00 a 13.00 horas-- e desde o próximo 15 de xaneiro na Biblioteca do Castrillón. Neste centro, as consultas poderán realizarse todos os luns do ano, excepto na última semana de agosto e os dous últimos luns de decembro, en horario de 17.00 a 20.00 horas. As dúbidas poderanse resolver de forma personalizada tamén todos os xoves do ano desde o 18 de xaneiro --excepto os festivos-- en horario de 10.00 a 13.00 horas. Para coñecer os días e horarios da atención tecnolóxica personalizada nas demais bibliotecas, pódese consultar a web municipal http://www.coruna.gal/bibliotecas/gl/usa-as-bibliotecas/as-bibliotecas-ofrecenche/atencion-tecnoloxica-personalizada
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...