VermisLab, o proxecto educativo galego impulsado por Vermis Project (estudo galego de deseño e desenvolvemento) destinado a equiparar as posibilidades educativas e laborais da mocidade da nosa terra con respecto á dos países máis avanzados en divulgación e capacitación STEM, vai organizar este mes un campamento espacial para nenas e nenos de máis de seis anos. A iniciativa Colonizando Marte, que se vai celebrar na sede de VermisLab en Compostela entre o 26 e o 28 de marzo, segue en boa medida o ronsel de éxito de Gastrociencia, o campamento do ano pasado, unha experiencia que converteu Santiago (durante cinco días) en obradoiro gastronómico e laboratorio.
Para a cita deste ano contarase coa participación de Scott Kelly, o astronauta estadounidense que máis tempo pasou no espazo, que achegará aos alumnos a súa experiencia a través dun vídeo feito ex profeso. Amais, haberá moitas outras actividades innovadoras, como por exemplo a simulación dun lanzamento espacial en vivo.
Un dos obxectivos básicos é “converter ás nenas e nenos en auténticos astronautas”. Para isto, terán que conseguir viaxar a Marte e desenvolver as condicións necesarias para poder facer vida neste planeta. Por temáticas, as accións propostas tocan un amplo abano de cuestións de gran actualidade e interese, como por exemplo bioloxía, bioenxeñaría, física, electrónica ou robótica. Como dixemos, os astronautas disporán dun transbordador espacial real a través do cal simularán o lanzamento dunha nave espacial con rumbo a Marte, o obxectivo será chegar sans e salvos ó planeta vermello.
VermisLab, explorando novas posibilidades
VermisLab é un proxecto de innovación educativa (cuxa sede sitúase na rúa do Tambre, número 61, en Santiago de Compostela) que explora novas posibilidades no eido da formación, co obxectivo de “potenciar a creatividade e estimular a curiosidade do alumnado polas novas tecnoloxías, o deseño ou a ciencia”. Este proxecto está formado por máis de vinte profesionais galegos de diferentes ámbitos, como a enxeñaría, a física, o deseño, a arquitectura, a comunicación ou a psicoloxía, os cales colaboran para desenvolver novas propostas formativas á vangarda da educación.
A Concellería de Patrimonio Histórico de Pontevedra vén de facer un repaso polos froitos acadados e por acadar do programa A Memoria das Mulleres, que entra no seu quinto ano e que conta co pulo, precisamente, do tipo departamento do Concello. Foi precisamente Luís Bará, o responsable da Concellería, quen deu a coñecer a pasada semana os obxectivos do programa para este ano. Fíxoo ademais na compaña de tres colaboradoras, Carmela Sánchez Arís, Montse Fajardo e María Abelleira. Bará lembrou os obxectivos básicos da iniciativa (investigación de fontes documentais e orais, divulgación off-line e dixital e visualización dos coñecementos acadados) e fixo saber que un dos grandes retos previstos para este ano é crear unha páxina web, que será presentada ao remate do ano.
O espazo en liña, sinalou, “será o grande escaparate do feito ao longo destes anos”. Ou sexa, que a web servirá entre outras cousas para mostrar a coñecemento público toda a información xerada polo programa A Memoria das Mulleres, en forma de biografía, artigos, fotos, vídeos… Outra das previsións é potenciar a presenza feminina nos espazos cidadáns mediante unha publicación do Roteiro en feminino de Pontevedra, a través da sinalítica urbana e co incremento de nomes de muller en prazas rúas e espazos públicos. Por outra banda elaboraranse homenaxes concretas, como unha lembranza a María Vitoria Moreno (homenaxeada este ano no Día das Letras Galegas) na súa faceta como mestra, como escritora, tradutora e, tamén, “como muller comprometida social e politicamente”.
A encargada do desenvolvemento da web será a investigadora María Abelleira, que porá o foco en visualizar o traballo realizado ao abeiro do programa e facelo botando man de múltiples formatos e fontes de información. A idea é que a páxina estea rematada a finais de 2018.
Javier Pereira, investigador do Centro de Investigación TIC da Universidade de A Coruña, é un dos artífices do proxecto Geria-TIC, que xa está en marcha en diferentes centros DomusVi da provincia de A Coruña. O obxectivo é desenvolver un modelo de medicamento participativo con persoas maiores mediante o uso de dispositivos wearables: pulseiras de medición de actividade e acelerómetros. O propio Pereira cóntanos deseguido en que consiste o proxecto e cal é o seu alcance para unha Comunidade coma a nosa, cunha das poboacións máis envellecidas de Europa.
-Que é Geria-TIC e cales son os seus obxectivos?
-Geria-TIC é un proxecto de desenvolvemento tecnolóxico e industrial que fomenta o empoderamento da cidadanía facéndoa co-partícipe e co-responsable da xeración e acceso dos seus datos de saúde. Promove un modelo onde as persoas podemos achegar datos que poden ser útiles e que se poidan usar por parte do sistema sanitario para elaborar plans máis personalizados de tratamento e mellora de calidade de vida mediante un envellecemento san e activo.
Aprovéitanse as posibilidades da tecnoloxía actual de rexistro de datos fisiolóxicos a través de trebellos que podemos levar postos (wearables) como son os reloxos intelixentes; pulseiras que miden os pasos, sono, ritmo cardíaco; básculas ou termómetros, etc., para crear perfís de saúde que poden ser mellorados mediante diferentes actuacións.
-Como nace esta iniciativa?
-A iniciativa xorde do interese de tres empresas que uniron esforzos para mellorar servizos que estaban a prestar. Por unha banda, a empresa Aldaba Servicios Profesionales, que leva xa anos desenvolvendo solucións que permiten que a cidadanía poida rexistrar datos de saúde a través da súa plataforma ClepIO. Nesta plataforma, a Clínica Cobián, especializada en servizos sanitarios, principalmente en xinecoloxía e obstetricia, estaba interesada en propor solucións innovadoras para mellorar o problema de incontinencia urinaria que sofren un elevado número de mulleres a medida que avanzan en idade.
Por outra banda, DomusVi, fornecedora de servizos a persoas maiores, tamén coincidiu en detectar este problema entre os seus usuarios, así como outros dous problemas como son as caídas e a mala calidade do sono que sofren as persoas maiores. Entre estes socios e coa colaboración do grupo de investigación da Universidade da Coruña RNASA-IMEDIR, a través do Centro de Investigación en Tecnoloxías da Información e as Comunicacións (CITIC) e o Instituto de Investigación Biomédica de A Coruña (INIBIC) definiuse o proxecto Geria-TIC, que foi presentado á convocatoria Conecta-PEME 2016 da Axencia Galega de Innovación (GAIN) da Xunta de Galicia e apoiado cunha importante axuda económica cofinanciada con fondos FEDER da UE (IN852A 2016/10).
-De que forma colabora o CITIC?
-O CITIC, en colaboración co INIBIC, está a colaborar coa investigación, encargándose de definir os protocolos de investigación, a recollida de datos das probas piloto e a análise da información. Desde o grupo do CITIC estableceuse o protocolo e os requisitos sobre a recollida de datos e definíronse os contidos de interese para a avaliación do impacto da participación de usuarios no proxecto mediante o estudo da calidade de vida
-Cal é o teu papel no proxecto?
-Son o investigador responsable do equipo de traballo do CITIC, que xunto con profesor Alejandro Pazos a través do INIBIC, coordinamos co resto dos socios empresariais o desenvolvemento da iniciativa.
-En que centros está xa en marcha?
-O proxecto estase a executar mediante estudos piloto en tres centros de DomusVi: A Coruña (Oleiros), La Ciudad (A Coruña) e Carballo. Nestes centros, os profesionais de DomusVi e de Clínica Cobián xunto con persoal do noso grupo, están a desenvolver as probas piloto das intervencións e medicións de datos que son recollidas mediante o sistema ClepIO. Estes datos son consultados polos propios participantes e familiares que se autoricen.
-Como funciona a plataforma ClepIO?
-ClepIO é unha plataforma que permite o rexistro (automático ou manual) de datos persoais de saúde. Trátase dun PHR (rexistro persoal de saúde) con servizos avanzados como neste caso, onde quedan rexistrados datos de saúde pero tamén datos de tests moi personalizados para as persoas maiores como son a súa apreciación de estado de saúde, temores a caídas, aspectos de alimentación, etc. Dende Aldaba e ClepIO pódense consultar en detalle todos os seus servizos.
-Como beneficiará aos usuarios dos centros e ás súas familias?
-Os beneficios dos usuarios é inmediato, xa que están integrados nunha intervención que mellora os aspectos que se traballan: caídas, insomnio e incontinencia. Por outra banda, tamén se ven partícipes do traballo e resultados, xa que poden consultar en todo momento os datos dos que se fai seguimento. Os familiares poden ver o traballo feito polas persoas maiores, comprobar a súa actividade física, a calidade e cantidade de sono de cada día, etc., a través da app ClepIO instalada nos seus teléfonos móbiles.
Todo os detalles do proxecto estamos a publicalos en www.geriatic.udc.es.
A través destes galardóns, a Universidade Europea premia a dez novos de entre 18 e 29 anos que estean a desenvolver un proxecto social ou ambiental en España, que leve un mínimo de seis meses en marcha e que persiga o progreso a través da innovación social. Todos aqueles emprendedores sociais que queiran optar aos galardóns, poden facelo desde hoxe ata o 21 de maio a través da web do programa.
De todas as candidaturas que se presenten, dez novos serán escollidos por un xurado experto e recibirán 2.000 euros por proxecto, un programa específico de formación, visibilidade para a súa iniciativa e o apoio dunha gran rede internacional. Ademais da achega económica, os Premios JES contribúen especificamente no desenvolvemento competencial dos gañadores, a través de formación orientada á xestión dos seus proxectos, e permiten aos gañadores entrar a formar parte da Comunidade JES, principal valor diferencial do programa da Universidade Europea.
Dez anos como referentes no ecosistema do emprendimiento social
Para Andrés Pina, director dos Premios JES, "é unha satisfacción celebrar os dez anos desta iniciativa, que é un fiel reflexo da nosa misión como Universidade na procura por contribuír ao progreso a través do empoderamiento de mozos que se perfilan como axentes do cambio". Para o director destes galardóns, "o espírito deste programa que naceu en 2008 é e seguirá sendo dotar aos mozos de ferramentas que lles permitan facer brillar as súas ideas".
Ao longo de todas as súas edicións, a Universidade Europea recoñeceu o valor innovador, social e empresarial dos proxectos galardoados e promoveu a creación dunha comunidade nacional e internacional de emprendedores sociais que comparten ideas e atopan sinerxias para multiplicar o impacto social das súas iniciativas.
Tanto as administracións públicas como as empresas privadas e as ONG xa publicaron varios retos a través desta Social Challenges Innovation Platform que fomenta a participación de innovadores sociais, novas empresas (startups) e pemes para identificar, financiar, desenvolver conxuntamente e probar solucións concretas ás súas necesidades.
As solucións seleccionadas por cada reto recibirán un apoio de 30.000 euros e a posibilidade de traballar durante 6 meses da man da organización que propuxo o reto para adaptar e prototipar a solución proposta.
Ata o momento hai 27 desafíos e 81 solucións prácticas por un valor total de 2.430.000 euros. Deles, tres son españois. Dous son Madrid: un da man do Concello de Madrid relativo a cubertas sustentables fórmulas para a súa comercialización a comunidades de veciños; e outro co Instituto da Administración Pública (INAP) que busca mellorar a diversidade entre os candidatos para formar parte da administración pública. O terceiro é de Málaga, do banco de alimentos Bancosol, que pide axuda para introducir aos inmigrantes no mercado laboral andaluz, preparalos e permitir que se volvan parte da comunidade.
A data límite para propoñer novos retos é o 15 de abril. Posteriormente a esta data publicarase unha nova rolda de retos que tamén estarán dispoñibles tres meses para presentar propostas de solucións.
A Unión Europea refírese á innovación social como un movemento en constante crecemento de iniciativas de base, recoñecido polos responsables das políticas en diferentes niveis en Europa como unha forma importante de abordar os desafíos sociais e ambientais cada vez máis complexos que enfrontan as sociedades. "Con todo, o potencial da innovación social para transformar a forma en que respondemos os desafíos de Europa aínda permanece en gran medida sen explotar", explican na web da plataforma.
Tamén lembra que as sociedades de toda Europa enfrontáronse a graves desafíos na última década, desde unha crise financeira que xerou inestabilidade económica e volatilidade política ata un ritmo cada vez maior de cambio tecnolóxico que ameaza con perturbar a orde social. A introdución da tecnoloxía dixital coa súa profundización das desigualdades existentes é un bo exemplo da devandita interrupción. "Enfrontar tales desafíos esixe novas ideas, novos enfoques e novas perspectivas. Isto levou á integración da innovación social como unha metodoloxía de resolución de problemas na última década", sinala.
A Xunta e a Federación de asociacións de persoas xordas de Galicia (FAXPG) veñen de asinar un convenio de colaboración para fomentar a accesibilidade das persoas xordas ás actividades institucionais que se celebren este ano.
No convenio establécese a colaboración de ambas entidades. A FAXPG comprométese a facilitar os medios necesarios -intérpretes, fundamentalmente- para garantir o acceso á información facilitada nos actos institucionais da Xunta ao colectivo incluído no ámbito de aplicación da federación.
Ademais, a Federación publicitará estes eventos a través da súa páxina web e ofrecerá accións formativas de linguaxe de signos española ao persoal da consellería.
A Vicepresidencia colabora desde hai anos coa Federación de Asociacións de Persoas Xordas de Galicia. En 2016, aprobou o o Decreto que regula a atención á cidadanía no sector público autonómico de Galicia, co obxecto de garantir unha mellor e maior atención cidadá, en especial ás persoas con discapacidade.
Para favorecer a accesibilidade das persoas con discapacidade visual, incorporou a posibilidade de presentar suxestións e queixas a través do teléfono 012, e no que respecta ás persoas xordas, co novo decreto garantiuse a permanencia do servizo de videointerpretación en lingua de signos para facilitar a intercomunicación coa administración galega e a realización dos trámites necesarios.
A Fundación Vodafone España convoca a 'XII Edición dos seus Premios Vodafone á Innovación' co obxectivo de promover e desenvolver proxectos de innovación en TIC accesibles para mellorar a calidade de vida de grupos vulnerables.
A finalidade desta convocatoria é apoiar a aparición de servizos innovadores, especialmente dirixidos ao beneficio dos devanditos grupos, que poidan ter unha ampla repercusión polo seu interese, novidade e potencialidade na promoción da transformación dixital.
A Fundación Vodafone España convoca a 'XII Edición dos seus Premios Vodafone á Innovación' co obxectivo de promover e desenvolver proxectos de innovación en TIC accesibles para mellorar a calidade de vida de grupos vulnerables.
A finalidade desta convocatoria é apoiar a aparición de servizos innovadores, especialmente dirixidos ao beneficio dos devanditos grupos, que poidan ter unha ampla repercusión polo seu interese, novidade e potencialidade na promoción da transformación dixital.
Os premios están dotados con 15.000€ cada un e unha escultura conmemorativa; e as dúas primeiras categorías, ademais, con presenza no Mobile Wold Congress 2019 e participación nos obradoiros de formación do CDTI.
A estes premios poden presentarse proxectos desenvolvidos en España durante 2017 e ata a data da convocatoria. O prazo para a presentación de proxectos estará aberto ata o 13 de maio de 2018.
As Bases desta edición, o formulario para presentar candidaturas e as instrucións para facelo están dispoñibles en www.fundacionvodafone.es/premios/premios-innovacion .
Un xurado formado por personalidades da Administración, a investigación e a empresa valorará o carácter innovador da solución, o público obxectivo que se podería ver beneficiado pola solución, a súa viabilidade e a súa accesibilidade. O fallo do xurado notificarase antes do 30 de xuño de 2018.
As mulleres galegas entre os 16 e os 54 anos superan aos homes no uso de Internet e a partir dos 55 anos evidénciase a fenda dixital de xénero. Esta é unha das principais conclusións do estudo monográfico “A Sociedade da Información dende una perspectiva de xénero”, elaborado polo Observatorio da Sociedade da Información en Galicia (Osimga), adscrito á Axencia para a Modernización Tecnolóxica de Galicia (Amtega).
O informe constata que en Galicia, a fenda dixital de xénero no uso de Internet continúa a reducirse de forma lenta pero constante, experimentando unha diminución de 0,8 puntos no último ano. Pola contra, a nivel estatal increméntase 0,7 puntos porcentuais respecto ao ano anterior.
Posición no contexto europeo e estatal e evolución
O 75,5% dos homes e o 72,5% das mulleres galegas utilizaron Internet nos últimos tres meses. Mentres que en Galicia, o uso de Internet nos últimos tres meses é 3 puntos porcentuais maior entre os homes que entre as mulleres, no conxunto do Estado a diferenza é de 3,9 puntos.
Con respecto á media europea, a fenda dixital de xénero no uso de Internet en Galicia está 1 punto por debaixo da media da Unión Europea (4 puntos) e ao mesmo nivel de países como Alemaña ou Bélxica. Cabe salientar que a fenda de xénero en Galicia é inferior á que se rexistra en Croacia (8 puntos), Austria (7 puntos) e Italia (6 puntos). No extremo oposto, os países con menor fenda de xénero respecto á media europea como Dinamarca, Finlandia e Irlanda (-2 puntos, con vantaxe das mulleres) e Lituania (-1 punto).
Factores influentes na fenda de xénero
A fenda de xénero no uso de Internet presenta unha tendencia marcada pola idade, sinalando unha ruptura dixital arredor dos 55 anos. Así, entre os máis novos as mulleres superan ou igualan aos homes no uso de Internet, mentres que a partir dos 55 anos as distancias aumentan sensiblemente en detrimento do uso feminino da Rede ata chegar aos 9,4 puntos porcentuais entre os maiores de 65 anos.
Atendendo ao nivel formativo, a fenda dixital de xénero afecta con máis intensidade ás persoas con menor nivel de estudos, para igualarse a partir da formación secundaria. Estudantes e ocupadas son os grupos laborais que rexistran unha menor fenda dixital de xénero, achegándose á universalidade entre as primeiras e cun alto grado uso entre as segundas. Pola contra, as mulleres dedicadas ás tarefas do fogar, con algunha discapacidade ou xubiladas son as máis afectadas polas diferenzas de sexo á hora do acceso á Rede.
Respecto á influencia do hábitat na fenda dixital segundo o sexo, a fenda de xénero é máis acusada nas vilas galegas de máis de 20.000 habitantes, onde supera os 4 puntos porcentuais. Pola contra, os concellos de menos de 5.000 habitantes amosan menor diferenza.
As mulleres empregan máis a administración electrónica
O estudo analiza tamén a interacción coas Administracións Públicas a través de Internet, observándose como as internautas galegas relaciónanse a través da Rede, en maior medida, coas Administracións Públicas que os homes.
O uso do comercio electrónico en termos globais é 2 puntos superior entre os homes que entre as mulleres galegas, aínda que sensiblemente inferior á fenda que se rexistra no conxunto do Estado (6,1 puntos porcentuais). Novamente as diferencias entre idades son notorias. Mentres que entre as mulleres de 25 a 34 anos o uso de comercio electrónico é dun 52,5%, superando en 4,4 puntos aos homes (48,1%), as diferenzas vanse acortando ou invertendo a medida que aumenta a idade.
Plan de Inclusión Dixital de Galicia
A mellora das infraestruturas de telecomunicación e as iniciativas para dinamizar o uso das TIC a través do Plan de Inclusión Dixital teñen contribuído en boa medida ao incremento no uso das TIC en Galicia. A rede de aulas públicas CeMIT conta con máis de 74.000 usuarios dos que o 58% son mulleres.
A formación pública en colaboración con outros axentes públicos e privados está a contribuír a achegar as TIC ao tramo de poboación galega con máis dificultades no acceso ás TIC: os maiores.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...