Este venres 1 de xuño temos unha cita cas/os profesionais da nosa terra que contribúen co seu labor e compromiso á plena inclusión de Galicia na nova era da comunicación dixital, con todo o que iso implica (cousas como a Industria 4.0, as redes do futuro, as Cidades Intelixentes, a Internet das Cousas, a intelixencia artificial, os novos xeitos de accedermos aos contidos, etc). Estamos a falar da Noite Galega das Telecomunicacións e da Sociedade da Información, que se celebra esta sexta feira a partir das 20.00 horas no Hotel Pazo Los Escudos de Vigo.
A gala, que contará con preto de 300 asistentes, vén da man do Colexio Oficial e a Asociación de Enxeñeiros de Telecomunicación de Galicia (COETG-AETG), que dirixe Julio Sánchez Agrelo. Precisamente, Sánchez Agrelo será o encargado da inauguración do evento cun discurso de benvida no que falará do conseguido pola nosa terra en materia tecnolóxica e dos retos que nos depara o futuro inmediato. A continuación, serán as quendas de Joaquín Lameiro, Enxeñeiro do Ano 2018, Ignacio López-Chaves, delegado da Xunta en Vigo, e Abel Caballero, alcalde de Vigo.
O fito principal do acto estará marcado pola entrega dos Premios Galicia das Telecomunicacións 2018. En total, vanse entregar cinco galardóns. O primeiro deles distingue o Mellor Proxecto TIC con Beneficios Sociais, galardón que este ano recae no proxecto Litter Drone, seguimento e control do lixo mariño empregando drons e análises de imaxe dirixido por Fernando Martín, profesor na Escola de Enxeñaría de Telecomunicación da Universidade de Vigo. O Premio Gradiant á Mellor Tese de Doutoramento Aplicada ao Sector TIC recae en David Vázquez polo seu traballo Detection of image resampling and video encoding footprints for forensic applications. Doutra banda, o Premio Acuntia á empresa galega que aposta polo desenvolvemento de infraestruturas intelixentes de telecomunicacións distingue o labor de ABANCA.
Enxeñeiro do Ano e Socio de Honra
O Premio Enxeñeiro do Ano 2018 recae en Joaquín Lameiro pola súa exemplar traxectoria profesional e o seu fondo compromiso co desenvolvemento do sector das telecomunicacións na nosa terra. Finalmente, o Premio Socio de Honra distingue a Luciano Vidán, presidente do Colexio Oficial de Médicos da Coruña, polo pulo outorgado á entidade que dirixe en relación ao desenvolvemento de novas tecnoloxías que permiten mellorar e optimizar o traballo no eido sanitario.
O Edificio de Novas Tecnoloxías de Lugo vai acoller até o mes de outubro un obradoiro de balde sobre ciberseguridade para unha vintena de mozas e mozos. O curso formativo, que xa deu comezo, centrará o seu programa en capacitar aos asistentes nun tema candente, de gran proxección e moi interesante para empresas, administracións e usuarios de a pé: a protección das redes, dos sistemas e da información que acubillan. Serán cinco meses de clases presenciais. O obxectivo, en palabras do Concello, é “introducir as persoas participantes nas competencias do mundo da ciberseguridade, unha das especializacións técnicas máis demandadas entre as empresas”.
O curso sobre ciberseguridade, posto en marcha por Concello e Fundación Telefónica, iniciouse esta mesma semana na sala de usos múltiples do Edificio de Novas Tecnoloxías.Este obradoiro presencial desenvólvese até o mes de outubro en horario de 09:00 horas a 15.00 horas e grazas á actividade formativa, os mozos e mozas participantes adquiren coñecementos e habilidades sobre redes e sistemas, ataques a infraestruturas e hackingético.
Segundo engade o Goberno local que preside Lara Méndez, “trátase dun itinerario formativo nexo de unión entre a demanda real das empresas e o sistema educativo que inclúe a aprendizaxe de conceptos básicos sobre ciberseguridade, a programación dunha forma segura, técnicas de protección e ataques para infraestruturas e contramedidas, entre outras cuestións”. Co fin de completar a aprendizaxe presencial todas as persoas participantes teñen acceso a un entorno de formación online na que se inclúen diferentes recursos como complemento do visto na aula.
O Concello tamén lembra que aínda fican vacantes dispoñibles, polo que as rapazas e rapaces que queiran participar aínda poden facelo formalizando a súa inscrición en fundaciontelefonica.com.
A directora da Axencia para a Modernización Tecnolóxica de Galicia, Mar Pereira, destacou hoxe a importancia de “fixar talento” en Galicia en torno á ciberseguridade e da colaboración entre sector público, privado, universidades e centros tecnolóxicos para reforzar un tecido local con capacidades neste ámbito. A responsable autonómica inaugurou esta mañá a III edición da Xornada de Ciberseguridade en Galicia, organizada polo Colexio Profesional de Enxeñaría en Informática de Galicia (CPEIG).
Expertos de primeiro nivel debaten esta mañá en Santiago sobre os retos da seguridade e a privacidade na Rede tras a recente entrada en vigor, o pasado 25 de maio, do novo Regulamento Europeo de Protección de Datos. A directora da Amtega sinalou que este novo regulamento establece una normativa común e incidiu na necesidade de facilitarlle as empresas e administracións máis pequenas a adaptación ao mesmo e que a seguridade non se converta nunha barreira para que as pemes poidan incorporarse á economía dixital e as entidades locais á transformación dixital.
En canto á adaptación da Administración autonómica ao novo RXPD, lembrou que é imprescindible a cooperación de diferentes perfiles xa que a ciberseguridade conxuga aspectos tecnolóxicos pero tamén xurídicos e a súa xestión require de colaboración e da suma de esforzos e que se identifique como prioritaria ao máis alto nivel.
Pereira destacou que a Xunta vén de adaptar a súa Política de Seguridade ao novo regulamento e que xa ten á disposición da cidadanía a figura dos delegados de protección de datos. En paralelo estanse a abordar outros cambios como a análise de riscos.
Finalmente, a directora da Axencia pública destacou a recente integración de Galicia na plataforma nacional de ciberseguridade CSIRT.es, que implica a consolidación do Centro de resposta ante incidentes de seguridade da Xunta e a validación dos seus procedementos en materia de seguridade. Este avance permitirá mellorar nas capacidades de coordinación con outras organizacións similares a nivel nacional co obxectivo final de acadar unha mellor protección do datos que xestiona a Amtega.
Este recoñecemento é froito do labor conxunto dos profesionais TIC da Administración e a colaboración coas empresas do sector TIC, na maioría galegas.
A plataforma CSIRT.es está integrada polo Centro Criptolóxico Nacional (dependente do CNI), o CERT de seguridade e Industria (dependente do INCIBE), o Centro Nacional de Protección de Infraestruturas e Ciberseguridade, Mando Conjunto de Ciberdefensa, a Policía Nacional, organismos estatais relevantes, corporacións privadas, empresas tecnolóxicas de seguridade e as Comunidades Autónomas máis avanzadas na materia: Cataluña, Valencia, Andalucía e agora Galicia.
Onte proseguiron no Fórum Carballo as sesións da terceira entrega das Xornadas Empresariais de Bergantiños, organizadas pola consultora Eurogabinete coa colaboración do Concello de Carballo, o ICEX e a Asociación Castaño y Nogal. A xeira deste 30 de maio, desenvolvida baixo o epígrafe Adaptarse para competir con éxito cando todo cambia, foi a derradeira desta terceira edición e xirou en parte arredor das cousas que poden facer as novas tecnoloxías e os procesos de dixitalización para sermos mellores e máis competitivos. Asemade, púxose no foco no importante factor de empregabilidade que achegan as TIC. Segundo se fixo saber, no mercado español hai 350.000 postos de traballo que están sen cubrir aínda “por falta de formación dixital”.
A tarde comezou cun relatorio a cargo de Sergio Prieto López, director territorial de Comercio do Galicia (ICEX), quen, baixo o título Internacionalización da empresa española no mercado global. Experiencias e recomendacións, debullou a misión, visión e valores do ICEX, facendo fincapé no seu equipo humano (máis de 600 profesionais traballando moi preto das empresas con presenza nos 5 continentes a través dunha ampla rede de oficinas económicas e comerciais) e nunha das súas principais razóns de ser: cooperar coas cámaras de comercio e organizacións empresariais e ofrecer solucións para a consolidación ou implantación das empresas no estranxeiro. Tamén explicou como elaborar unha estratexia alén da nosa terra e como se pode empezar a exportar, para o que o ICEX proporciona ferramentas de axuda en liña e de promoción.
A segunda parte foi abordada desde Santiago de Chile por Rafael Coloma Ojeda, conselleiro económico comercial xefe da Embaixada de España do devandito país, quen falou dos requisitos e recomendacións para realizarmos operacións comerciais con Chile, recordando que “a globalización non debe facernos esquecer que cada mercado ten as súas características locais ás que debemos adaptarnos”.
A substitución xeracional na empresa familiar foi un dos temas sobre o que versou o relatorio do notario coruñés Isidoro Antonio Calvo Vidal, doutor en Dereito e membro do Grupo de Expertos do Consello da Unión Europea para a interconexión dos rexistros testamentarios, que fixo fincapé, non só na necesidade “de facermos testamento dos nosos bens”, senón tamén na conveniencia de planificar axeitadamente a sucesión xeracional na empresa, explicando as diferentes vantaxes fiscais que supón delimitar o patrimonio persoal e societario.
A continuación foi a quenda do vogal asesor da Oficina Económica de Presidencia do Goberno, Antonio Martínez-Ligero Sánchez, quen indicou que “a política de estabilidade orzamentaria e de reformas, sumada ao esforzo de empresarios e traballadores, deu á situación un xiro de 180 graos”. Agora, dixo, “a nosa economía reorientouse aos mercados internacionais e non precisa endebedarse para medrar”, engadindo “que a transformación dixital é unha auténtica revolución tecnolóxica que nos obriga a manobrar decontado para poder aproveitar as oportunidades que ofrece”.
O acto de clausura correu a cargo de Antonio Alvarez González, avogado consultor de PEME e director das Xornadas Empresariais, quen lembrou o importante que é innovar e asumir procesos de dixitalización para competir no mercado actual. En termos máis concretos, recordou que un terzo das empresas que se constitúen non chegan ao quinto ano de vida, e só o 10% sobreviven aos 10 anos. Asemade, informou que en España hai 350.000 postos de traballo que están sen cubrir por falta de formación dixital.
Para rematar, Evencio Rodríguez Ferrero, alcalde de Carballo, clausurou cunha breve intervención as terceiras xornadas, agradecendo a Eurogabinete o seu esforzo na preparación e participación nestes encontros e destacando “a categoría técnica dos relatores”, emprazando a todos os asistentes a unha cuarta entrega do evento, novamente na vila bergantiñá.
A semana pasada, o 24, celebrouse na Cidade da Cultura a edición 16 dun dos nosos eventos máis referenciais en materia de novas tecnoloxías para as empresas, o evento GaliciaTIC baixo o epígrafe Tecnoloxías, capacidades e infraestruturas para a transformación dixital. O foro, que xuntou máis de 200 profesionais, veu da da man da asociación Ineo e de Inetec, e contou coa colaboración do Colexio Oficial de Enxeñeiros de Telecomunicación de Galicia (COETG), que organizou unha competición de enxeñaría.
Nela, varios equipos tiveron que resolver un proxecto de aplicación dos conceptos de Smart Cities (Cidades Intelixentes) a un entorno rural, concretamente ao concello de Chantada. O xurado constituído en representación do COETG por Ricardo Fernández, César Mariñas, Víctor Pita e Javier Fernández Fraga, valorou moi positivamente o traballo realizado polos equipos participantes e determinou outorgar o premio ex aequo aos grupos correspondentes ás entidades Gradiant e R. Os gañadores foron Alberto Marín, Pablo Rodríguez e Sara Cela por parte do centro tecnolóxico galego e David Centeno, Martín Álvarez e Fernando Gallego por parte da operadora galega de telecomunicacións. O premio consistirá na asistencia á Noite Galega das Telecomunicacións que se celebra este 1 de xuño.
A Fundación TIC da Deputación de Lugo segue adiante co seu labor tecnolóxico-formativo para os maiores da provincia. Segundo vén de informar a fundación, estes días está a impartir en Ribeira de Piquín un dos doce cursos que integran o seu programa de alfabetización tecnolóxica para o rural deste segundo trimestre de 2018. O vicepresidente provincial, Argelio Fernández Queipo, acompañado polo alcalde, Roberto Fernández Rico, mantivo hoxe un encontro cos 15 participantes na actividade. Nela, por certo, os participantes teñen a oportunidade de iniciárense no mundo de Internet.
Fernández Queipo salientou “o éxito que están a ter estes cursos formativos, tal e como constatamos nos tres que xa levamos impartidos en Navia de Suarna, Foz e Xermade”. Segundo fixo saber, o alto nivel de participación bota por terra a falsa crenza do desinterese das persoas de idade polos recursos dixitais e, de feito, “demostra o interese que hai por parte dos maiores sobre a utilidade das novas tecnoloxías como ferramenta para mellorar a súa calidade de vida”. Fernández Queipo tamén anunciou que a vindeira semana o eixe de actividades da Fundación TIC desprazarase até Baleira. O cursos na provincia son sobre o uso do móbil e Internet, as materias máis demandadas polos usuarios do InLugo da TIC.
Amais de todo o devandito, Argelio Fernández engadiu que “dende o Goberno da Deputación traballamos polo noso rural e promovemos iniciativas que melloran a calidade de vida dos nosos veciños co obxectivo, entre outros, de facer fronte ao despoboamento”. Na súa opinión, as novas tecnoloxías representan “un papel moi importante, polo que seguiremos promovendo o seu uso entre os nosos maiores para facilitar o seu día a día e o contacto cos seus familiares e amigos”. Neste senso, avanzou que “a nosa intención é achegar estes cursos a toda a provincia en vindeiras edicións”.
Máis de mil prazas
Este segundo trimestre de 2018, a Fundación TIC ofrece 1.085 prazas nos 81 cursos que imparte, tanto na sede da entidade como na provincia. A cifra, segundo destaca a Deputación, supón un incremento do 60% con respecto á tempada anterior. A entidade que preside Darío Campos tamén está a facer un especial esforzo para dar resposta á alta demanda que suscitan este tipo de actividades formativas TIC. “Isto reflíctese no rápido que se cobren as prazas dispoñibles unha vez que se abren os prazos”, explica a Deputación.
A esclerose múltiple é unha enfermidade que afecta a vida das persoas que a sofren de moitas maneiras, algunhas delas pasan desapercibidas ou son descoñecidas para a maior parte da sociedade.
Para concienciar sobre estes efectos "invisibles" na vida das persoas con esclerose múltiple, unha compañía canadense desenvolveu un programa de realidade virtual que trata de educar á sociedade sobre o impacto que esta enfermidade ten na vida das persoas que a padecen.
O obxectivo desta compañía, denominada EMD Serono e que é filial da alemá Merck KGaA, é facilitar unha mellor comprensión desta enfermidade dexenerativa rompendo as barreiras de aspectos que non son visibles pero que afectan en grande medida a vida dos pacientes.
Trátase dunha experiencia de realidade virtual duns 10 minutos que explora o cerebro dunha persoa con esclerose múltiple e que simula cinco dos síntomas máis frecuentes que afectan á vista e ao oído, máis aló dos efectos sobre a mobilidade.
Con esta interesante iniciativa sumámonos á celebración este mércores do Día Mundial da Esclerose Múltiple.
As empresas galegas de 10 ou máis empregados superan a medida estatal no uso de software libre, ascendendo do noveno posto no ranking de Comunidades Autónomas ao quinto lugar. Cabe salientar que o crecemento deste indicador prodúcese tanto nas empresas galegas con 10 ou máis empregados, cun aumento de 1,4 puntos, como nas microempresas, que rexistraron un incremento de 4,6 puntos no último ano.
Non obstante, o grao de implantación e uso do software libre é diferente en función do tamaño da empresa. Así preto de 9 de cada 10 empresas galegas con 10 ou máis empregados usan software libre (88,2%) mentres que a porcentaxe de uso nas microempresas sitúase no 54,4%. No relativo ao sector TIC, practicamente 9 de cada 10 empresas informáticas empregan software libre nalgún dos seus equipos (88,6%), experimentando un aumento de 1,4 puntos respecto ao ano anterior.
Son datos recollidos nos dous estudos sobre o uso de software libre nas empresas e nas empresas informáticas de Galicia no ano 2017, publicados hoxe polo Observatorio da Sociedade da Información e a Modernización de Galicia (OSIMGA), adscrito á Axencia para a Modernización Tecnolóxica de Galicia (Amtega). Estes estudos responden tamén aos compromisos asumidos no marco das actuacións de impulso do software libre que se establecen no Plan de Acción Software Libre 2017.
Tipoloxía das aplicacións con licenzas libres empregadas
As aplicacións libres con maior implantación nas empresas galegas seguen a ser os navegadores de Internet e as aplicacións ofimáticas, cun 85,4% e 61,1% respectivamente no caso das empresas de 10 ou máis empregados e un 48,6% e 40,5% respectivamente no caso das microempresas.
No caso das empresas informáticas, os aplicativos máis utilizados son as suites ofimáticas (59,4%), os navegadores de Internet (59,4%), e os sistemas de xestión de contidos web (43,2%). Hay que salientar que en determinadas aplicacións, como a “Xestión de contidos web” ou as “Aplicacións de deseño gráfico” hai máis empresas que usan Software Libre que privativo. No primeiro caso é 11,3 puntos porcentuais superior e no segundo caso hai 6,4 puntos de diferencia.
As empresas informáticas galegas como provedoras de solucións TIC
Un 52,7% das empresas informáticas galegas que se dedican á venda de produtos de software, ofrecen solucións de software libre aos seus clientes. As solucións nas que o software libre ten maior penetración son os sistemas de e-learning, servidores web, sistemas de xestión de contidos de portais e páxinas web, os sistemas de desenvolvemento e as solucións de e-commerce, sendo en todos os casos a porcentaxe de empresas que ofrecen solucións libres superior á que ofrecen solucións privativas.
Motivos para non usar software libre
Os principais motivos argumentados polas empresas que non usan aínda software libre varía en función do sector e do tamaño. No caso das microempresas, o principal factor aducido é o descoñecemento de solucións ou a falta de referencias sobre os produtos de Software Libre e no caso das empresas de máis de 10 empregados, o motivo máis citado é o temor aos problemas que pode ocasionar a migración a sistemas ou aplicacións libres.
Pola súa banda, as empresas informáticas argumentan como motivo principal para non empregar software libre a percepción da “Incompatibilidade cos sistemas ou interlocutores actuais”, en opinión do 34,3% das empresas enquisadas, seguido do “descoñecemento de solucións ou a falta de referencias sobre os produtos de software libre” argumentado polo 21,7% das empresas informáticas galegas.
Medidas para promover o uso do software libre
Desde o ano 2010 a Xunta, a través da Amtega, vén desenvolvendo, en colaboración cos principais axentes do sector un Plan anual para o impulso e difusión do software libre na Administración, nas empresas e na cidadanía. Ás actuacións deste Plan súmanse as que se desenvolven desde o Centro Demostrador TIC, o CNTG e a Oficina de Software Libre. A información sobre as necesidades do sector empresarial servirá para incidir nestas liñas nas actuacións a desenvolver durante o ano 2018.
Ligazóns
ILUNION Tecnoloxía e Accesibilidade levará á VII Bienal de Arte Contemporánea da Fundación ONCE, que se inaugura en Madrid o vindeiro martes 5 de xuño, Amuse, unha innovadora aplicación, baseada na tecnoloxía das balizas intelixentes "beepcons" e que converte museos e exposicións nunha contorna máis inclusiva, interactiva e lúdico para visitantes con e sen discapacidade.
Dentro da VII Bienal de Arte Contemporánea da Fundación ONCE e a través de Amuse, o usuario poderá elixir dúas modalidades de visita: Guiada ou libre. En cada unha delas, o usuario accederá á información sobre as obras expostas dentro de cada un dos espazos que compoñen esta mostra, así como a vídeos e audios explicativos. Así mesmo, Amuse incorpora recoñecemento automático de imaxes para poder acceder á información de calquera obra con só enfocala co dispositivo móbil. Ademais, inclúe o modo xogo, co cal o visitante poderá aprender aínda máis e dunha maneira diferente e divertida acerca desta mostra, creada para recoñecer e difundir a obra de artistas con algún tipo de discapacidade ou daqueles que atopan na discapacidade a súa inspiración.
Vídeos accesibles
Para as persoas con discapacidade, Amuse inclúe información sobre o tipo de accesibilidade da Bienal de Arte Contemporánea da Fundación ONCE, que este ano terá lugar no espazo CentroCentro e que permanecerá aberta ao público do 5 de xuño ao 16 de setembro. Tamén inclúe vídeos explicativos en lingua de signos e audiodescritos.
Amuse xa está instalado en Tabacalera-Promoción da arte, espazo dependente do Ministerio de Educación, Cultura e Deporte, no que se desenvolve un programa permanente de exposicións temporais e de actividades ao redor da fotografía, a arte contemporánea e as artes visuais,
Actualmente, esta "app" atópase dispoñible para móbiles compatibles con bluetooth de baixa enerxía ("Bluetooth Low Energy") para os sistemas operativos iOS e Android. Tamén conta cunha ferramenta en liña, que permite que o cliente actualice a través de internet os contidos e os xogos cantas veces estime oportuno e dunha forma rápida, sinxela e sen custo adicional. Robot
Por outra banda, esta empresa de ILUNION, referente na formación sobre accesibilidade e na avaliación de contornas físicas e tecnolóxicas, tamén levará a esta edición da Bienal de Arte Contemporánea un robot, co que os visitantes poderán interactuar.
Deste xeito, os visitantes poderán falar con este robot para coñecer o calendario de exposicións, as condicións de accesibilidade do emprazamento e información sobre as temáticas das obras expostas, entre outras. Se, ademais, desexan máis información, o androide tamén lles indicará como descargar a "app" Amuse.
A Bienal de Arte Contemporánea é un ambicioso proxecto cuxa misión é conseguir os dúas obxectivos claves da Fundación ONCE: Accesibilidade e inclusión. Trátase de apostar por unha cultura accesible para todos traballando desde distintos ámbitos de actuación: Por unha banda, o da accesibilidade universal e, por outro, o feito de poder gozar da cultura en igualdade de condicións.
As entidades que conforman a comunidade Conectados pola Accesibilidade, Plena Inclusión, Down España, a Orde Hospitalaria de San Juan de Dios, FEDACE, Confederación ASPACE, Hospital Vall D-Hebron e a Fundación Vodafone España, celebrarán o III Encontro baixo o marco da "Transformación Dixital Accesible". Tamén participarán outras organizacións e entidades convidadas que contribuirán nas distintas sesións planificadas.
Durante 2017 desenvolvéronse 22 Proxectos de Transformación Dixital, e no Encontro presentaranse os 8 mellores. Dentro destes proxectos, ao final da xornada elixirase o Mellor Proxecto de Transformación Dixital 2017 por votación dun xurado e do público.
Ademais, presentarase a nova Convocatoria Pública de Proxectos de Transformación Dixital para o ano 2018, explicando os obxectivos, bases e formulario a completar. Por último, ademais realizaranse distintas demostracións coas novidades da comunidade, así como empresas que expoñerán as súas tecnoloxías.
Neste mesmo día ás 12:30h, terá lugar un encontro en Twitter utilizando #conecta2Xaccesibilidad - co obxectivo de compartir experiencias dentro e fóra da xornada, e así dar a coñecer a importancia da tecnoloxía no ámbito da discapacidade.
Se queres asistir ao Encontro da Comunidade "Conectados pola accesibilidade", podes rexistrarche aquí
Axenda 5 de xuño:
Lugar do encontro: Vodafone Praza. Avenida de América 115 (Madrid)
10:00 - 10:45 Rexistro, café de benvida e dinámica de networking
10.45 - 11:15 Benvida e Presentación
Proxectos de Transformación Dixital (PTD)
Durante 2017 desenvolvéronse 22 PTD e elixíronse oito como finalistas. Dos oito elixirase o mellor por votación dun xurado e do público.
11.15 - 12:15 PTD 2017 - -Elevator Pitch- do 1 ao 4
Presentacións de catro dos PTD finalistas
12:15 - 12:30 Descanso
12:30 - 12:45 PTD 2018 - Convocatoria pública
Presentación dos obxectivos, bases, formulario
12.45 - 13:45 PTD 2017 - -Elevator Pitch- do 5 ao 8
Presentacións de catro dos PTD finalistas
13:45 - 15:30 Comida e demostracións
Visita das distintas demostracións coas novidades da comunidade e os nosos novos colaboradores e deliberación do Xurado para a elección do Mellor Proxecto de Transformación Dixital 2017
15:30 - 16:00 Entrega de premios e Clausura
Preside Borja Fanjul, Director Xeral de Políticas de Apoio á Discapacidade. Acompáñanlle na mesa: representante do CERMI e Santiago Moreno, Director Xeral da Fundación Vodafone España.
Entregaranse os premios correspondentes ao sorteo -Pasaporte de Explorador Dixital- e ao mellor Proxecto de Transformación Dixital 2017 (elixido polo Xurado e polo público).
16:00 Fin do Encontro
Máis información sobre a Comunidade: www.conectadosporlaaccesibilidad.com ou en Twitter: #conecta2Xaccesibilidad.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...