As actuacións en macha do Plan de Banda Larga da Xunta e do Estado garanten que máis de 330.000 galegos de 258 concellos, que carecen de acceso a redes ultrarrápidas, teñan cobertura de 100Mbps de velocidade no 2020. O operador Telefónica, adxudicatario da última liña de axudas do Plan autonómico e doutras subvencións estatais, cubrirá preto do 80% dos habitantes previstos con ámbalas medidas. Así o explicaron esta mañá a directora da Axencia para a Modernización Tecnolóxica de Galicia (Amtega), Mar Pereira e directora de Telefónica en Galicia, Marta Menéndez.
Dos máis de 330.000 habitantes beneficiados por estas medidas un total de 74.400 viven en núcleos de menos de 300 habitantes e contarán con acceso á fibra óptica grazas a axuda de 14,2 millóns de euros que a Xunta concedeu a Telefónica no marco Plan de Banda Larga de Galicia 2020. Ademais, como adxudicatario doutras axudas estatais, Telefónica facilitará o acceso a redes ultrarrápidas a outros 184.000 galegos de núcleos de maior tamaño e os habitantes restantes cubriranse coas actuacións doutros operadores que accederon as subvencións do Estado.
Mais de 35 millóns de euros públicos
En total os plans autonómicos e estatais supoñen un investimento público de 35,2 millóns de euros para incentivar a extensión de fibra óptica en núcleos dun total de 258 concellos galegos que non dispoñen desta tecnoloxía nin previsión de contar con ela.
Ambas medias garanten que en 2020 o 74% dos galegos terán acceso a redes de máis de 30 Mbps, unha porcentaxe que se incrementará coas novas convocatorias do Estado. A última foi publicada en abril por un importe de 18,5 millóns de euros, e prevese que se resolva en outono.
Banda larga en polígonos
A extensión de fibra en núcleos de poboación é a terceira actuación do Plan de Banda Larga da Xunta 2020, que se suma á de polígonos e á de axudas á empresas illadas do rural.
Este ano completarse a conexión de 81 polígonos industriais de toda Galicia a redes de ata 350 Mbps, que sumados aos que xa contan con redes ultrarrápidas serán un total de 130 superficies empresariais, que representa o 93% da superficie empresarial ocupada.
Redes ultrarrápidas en empresas e centros educativos
Ademais, a finais de ano está previsto lanzar unha nova liña de axudas para facilitar a conexión a empresas de zonas illadas. Na convocatoria de 2017 beneficiáronse destas axudas máis de 30 empresas de zonas illadas das catro provincias, que puideron conectarse a internet de entre 50 e 350 Mbps con 400.000 euros tamén cofinanciados con FEADER.
No ámbito educativo, en colaboración co Estado, estase a desenvolverse a iniciativa “Escolas Conectadas” que está na recta final para dotar a máis de 800 centros educativos públicos con redes de máis de 100 Mbps. Unha vez finalizada esta actuación, nos próximos meses, o 100% dos centros públicos de primaria e secundaria de toda Galicia terán acceso a redes ultrarrápidas.
Future Cities persegue atopar tres proxectos de mozos emprendedores sociais que fomenten o desenvolvemento inclusivo e sustentable das cidades. Ata o 12 de xuño, a iniciativa ten aberta unha convocatoria para buscar tres proxectos liderados por mozos de entre 18 e 28 anos que estean a impactar directamente na transformación das cidades e na vida das comunidades.
Algúns dos retos para abordar son a redución do impacto ambiental negativo das cidades, promover unha edificación máis sustentable, e garantir o acceso universal á vivenda e servizos adecuados e accesibles, entre outros.
Así mesmo, valoraranse iniciativas que fagan uso da economía colaborativa, fomentar contornas urbanas máis inclusivos, proporcionar emprego de calidade ou proporcionar apoio aos países menos adiantados, para que poidan construír edificios sustentables e resilientes utilizando materiais locais.
Esta iniciativa foi posta en marcha por Ashoka, fundación sen ánimo de lucro centrada na innovación social, e Vía Célere, promotora inmobiliaria especializada no desenvolvemento, investimento e xestión de activos residenciais.
Ambas as entidades desenvolverán un programa de mentoría ao longo de tres meses cos proxectos gañadores. Desta maneira, traballarán con empregados de Vía Célere para levar a cabo as súas iniciativas e fortalecer a súa estratexia de sustentabilidade.
Así mesmo, o programa permitirá dar solución aos seus retos máis perentorios, e reforzar a súa capacidade de crear equipos, liderado e xeración de cambios a gran escala na súa contorna. Ademais do programa, outorgaranse tres bolsas de 1.000 euros a cada un dos proxectos seleccionados.
Para participar, os equipos deberán estar conformados por polo menos dúas persoas de entre 18 e 28 anos, que só poderán presentar unha única candidatura. Ademais, a súa iniciativa emprendedora deberá estar xa posta en marcha.
Nun paso máis en pos da integración, Microsoft confirmou o lanzamento do Xbox Adaptive Controller, un control pensado para os usuarios con discapacidade.
O mesmo pode ser apoiado nunha mesa, as pernas ou no piso, e cumpre as mesmas funcións que un joystick normal. Este dispositivo busca achegar os videoxogos aos mozos discapacitados de todo o mundo e promete ser un éxito de venda.
O control conta con dous botóns principais que se poden tocar cos cóbados, os pés ou as mans.
A diferenza dun convencional, onde se utilizan os dedos e é necesario exercer presión sobre os botóns para que funcione, este non require forza e con só rozar o botón a consola recibe os comandos enviados.
En canto ao tamaño, o novo control é moito máis grande que un joystick normal, para facilitar o seu uso e interpretación.
O Xbox Adaptive Controller foi creado por Microsoft en conxunto con organizacións como AbleGamers, Craig Hospital e a Cerebral Palsy Foundation.
Aínda que non está definida a data de lanzamento, varias organizacións xa puideron testear o dispositivo, o prezo de venda do control adaptado roldaría os US$ 100.
A tecnoloxía está cada vez máis preto e, a través deste tipo de lanzamentos, demostra, unha vez máis, o seu compromiso coa inclusión. Derrubando muros e abrindo camiños para que quen non teñen acceso poidan ter ao mundo a un click de distancia.
Ligazón á noticia na web de: culturageek.com.ar.
Unha das habilidades fundamentais do ser humano para poder moverse con facilidade é a chamada propriocepción, é dicir, a capacidade de saber en que lugar, que posición e que movemento realizan as extremidades sen necesidade de miralas.
Esa capacidade, que facilita a utilización tanto de pés e pernas como de mans e brazos xa que permite automatizar o movemento, pérdese para as persoas con discapacidade que teñen que utilizar unha prótese.
A ausencia de propriocepción é un dos maiores obstáculos aos que se enfrontan os usuarios de próteses no proceso de afacerse a utilizar as extremidades artificiais.
Para tratar de avanzar neste campo o Instituto de Tecnoloxía de Massachusetts (MIT) logrou desenvolver unha novo interface neuronal que permite conectar estas próteses ao sistema nervioso central, de maneira que os usuarios que perderon algunha das súas extremidades son capaces de sentir a posición, localización e movemento das próteses.
Trátase dun avance maiúsculo xa que facilita enormemente ás persoas con discapacidade a utilización destas próteses e permite normalizar o seu uso.
Para logralo, os investigadores do MIT desenvolveron un modelo de prótese que é capaz de recibir ordes de movemento do sistema nervioso central, pero á vez emite información proprioceptiva ao sistema nervioso.
Esta tecnoloxía, que soa a un desenvolvemento do futuro, é unha realidade despois dun profundo ensaio preclínico realizado no MIT, previo á súa utilización por primeira vez por unha persoa.
Agora esta tecnoloxía utilizouse por primeira vez nun ser humano que foi capaz de recibir esta información proprioceptiva e que esperemos que sexa o primeiro de moitos usuarios que se poden beneficiar deste desenvolvemento.
A transformación dixital é un proceso que non vén só. Vén, de feito, acompañado de múltiples e variadas oportunidades profesionais e empresariais. Para mostralas e tamén para meternos nas pel destes novos profesionais, a Escola Superior de Enxeñaría Informática do Campus de Ourense acollerá o vindeiro 28 de xuño a celebración da I Xornada Digital Business-Campus de Ourense (DIB´18). A cita, organizada pola escola e a empresa Contact Comunicacion, preséntase como “unha ocasión única para coñecer as claves do novo modelo económico e as oportunidades” que abre a transformación dixital da sociedade actual.
En termos máis concretos, o obxectivo é achegar ao tecido produtivo, aos emprendedores e ao alumnado dos últimos cursos das titulacións do Campus, a unha realidade que se impón e que esixe unha transformación como é o negocio dixital. “Os clientes xa non están diante do escaparate, están en calquera recanto do mundo e hai que saber chegar a eles”, apunta Francisco Javier Rodríguez, director da Escola Superior de Enxeñaría Informática, sobre o obxectivo de DIB´18, engadindo que a transformación dixital “é algo totalmente necesario para sobrevivir” e no caso da provincia un reto para algúns dos seus sectores máis destacados, como o agroalimentario ou o comercio.
A xornada, que terá continuidade, foi concibida para abranguer estudantes de diversas titulacións do Campus. Ademais, terá un carácter “moi práctico” e, polo tanto, mostrará conceptos para logo abrir xeiras de traballo con eles. Así se fixo saber na presentación de DIB´18, que tivo lugar este luns na sede da Confederación Empresarial de Ourense. Segundo explicou na rolda cos medios César González, de Contact Comunicacion, a xornada contará con dúas partes diferenciadas, unha máis xeral e outra máis aplicada, e coa participación de “persoas que teñen unha visión da realidade deste novo modelo de negocio”.
A sesión de mañá da I Xornada Digital Business-Campus de Ourense estará destinada a “ofrecer unha perspectiva xeral enfocada a coñecer o novo modelo de negocio dixital, abordándose cuestións como a diferenza entre dixitalización e transformación dixital, a visualización en buscadores e a visibilidade web ou a comunicación e mercadotecnia en ecosistemas sociais. Tamén haberá unha mesa redonda sobre modelos de negocios dixitais con representantes de Imaxin Software, Raiola Networks e Menéame. Xa pola tarde desenvolveranse dúas sesións de carácter práctico, cada unha delas composta por grupos limitados a 20 persoas, unha centrada na visualización en buscadores e impartida por Fernando Muñoz, de Señor Muñoz, e outro sobre optimización de funcionamento para WordPress, con Álvaro Fontela, cofundador de Raiola Networks. As entradas para a xornada, tanto para a súa sesión da mañá como para as da tarde, xa están á venda até o esgotamento de prazas.
SmartPEME, a rede de formación e asesoramento TIC impulsada pola Deputación de Pontevedra, vai ofrecer este mes de xuño (nas súas diferentes sedes) un completo feixe actividades de capacitación tecnolóxica para os profesionais, os traballadores, as PEME e os emprendedores locais. Segundo informa a entidade provincial, estamos a falar de medio cento de accións formativas sobre as máis variadas temáticas TIC. Os obradoiros celebraranse nas sedes de SmartPEME en Cambados (Centro Exposalnés), nos viveiros de empresas de Barro, Lalín e A Estrada e nas oficinas de Vigo, Ponteareas e O Porriño. Asemade, celebraranse na sede da Deputación en Pontevedra sete obradoiros formativos. Afondarase nas redes sociais e no seu uso empresarial, no novo regulamento da protección de datos, na seguridade informática, no deseño web ou no manexo de programas informáticos, entre outros temas.
Todas aquelas persoas interesadas en acudir a estes obradoiros, destinados a persoas emprendedoras, autónomas e autónomos e ás PEME da provincia é de inscrición cen por cen de balde, poden apuntarse chamando ao teléfono 886 202 020, escribindo un correo electrónico a info.smartpeme@depo.es ou a través da páxina web www.smartpeme.depo.es.
Comezando polos sete cursos da sede da Deputación na cidade do Lérez, as quendas comezan este 5 de xuño co obradoiro Xestiona o teu negocio dende o móbil, ás 19:00 horas (todas as accións de xuño en Pontevedra terán lugar nese mesmo horario). Nesa mesma semana, o día 7, será a quenda de Márketing de contidos: Como xerar unha estratexia efectiva. A seguinte semana haberá dúas accións, a primeira o martes 12 baixo o nome Parte Práctica da Lei de Protección de Datos 2018, RGPD Europeo(que será retransmitida en directo para todas as persoas interesadas que non poidan asistir) e, a seguinte, CRM, o cliente como centro da estratexia de negocio. Módulo I o día 14 de xuño. O seguinte curso, Edición de fotografía para plataformas e-commerce, impartirase o martes 19. Esa mesma semana, o día 21, será a quenda de Pagos co móbil, últimas tendencias. Por último, o martes 26 será a quenda de Crea presentacións profesionais con Prezi.
Polo que se refire á sede de Lalín, dará acollido outras sete accións formativas ao longo deste mes. A primeira cita celébrase este 5 de xuño ás 19 h co curso Crea o teu Propio Logotipo con Canva. Eset xoves de xuño ás 17 h impartirase A túa Información Sempre a Man: Almacenamento na Nube. O martes 12 de xuño ás 19 h desenvólvese Parte Práctica da Lei de Protección de Datos 2018, RGDP Europeo (retransmisión en vivo). O xoves desa mesma semana, á mesma hora, celebrarase o curso Utiliza Instagram para Promover e Vender os teus Produtos. Seguindo cos cursos do mes de xuño, o luns 18 ás 19 h celebrarase Rendabiliza o teu Perfil Profesional en Facebook e o 20 de xuño celebrarase, nesta ocasión no viveiro de empresas da Estrada, o curso Woocommerce II-A Solución para Vender por Internet. Por último, o martes 26 de xuño impartirase o obradoiro Ferramentas de Google para a Promoción de Negocios Locais.
Polo que atinxe á sede de SmartPEME en Barro, celebrará outros sete obradoiros. As quendas comezan este 5 de xuño coa acción Parte práctica da Lei de Protección de Datos 2018, RGPD Europeo (con retransmisión en directo do obradoiro). O día 14 desenvolveranse as dúas partes do obradoiroA mellor imaxe para inmobiliarias, unha estratexia de éxito, impartíndose o módulo I ás 18:30 horas e o módulo II ás 20:00 horas. O martes da seguinte semana tamén se impartirán as dúas partes do curso En que teño que fixarme para facer un modelo 3D?, ás 18:30 celebrarase o primeiro módulo e ás 20:00 o segundo. Por último, Iniciación ao escaneado 3D – Modulo I e Iniciación ao escaneado 3D – Módulo II impartiranse o martes 26 de xuño ás 18:30 horas e 20:00 horas, respectivamente.
Polo que se refire á área de Vigo, serán 20 cursos TIC. As quendas para a oficina de Vigo comezan este 5 de xuño ás 19:00 horas con Emprego de vídeos nas redes sociais: Youtube, Periscope…. A seguinte acción será Edición de fotografía para plataformas e-commerce, o xoves ás 19 h. O curso Parte Práctica da Lei de Protección de Datos 2018, RGPD Europeo (retransmisión en vivo do obradoiro) chegará a Vigo o martes 12 tamén ás 19:00 horas. O xoves desa mesma semana á mesma hora impartirase Como presentar a túa idea de forma efectiva en tan só 5 minutos. O 19 de xuño será a quenda de Promove o teu perfil en Facebook con aplicacións externas, ás 19 h. A acción Plataformas online para crear o teu e-commerce chegará o 21, pero nesta quenda ás 17:00 horas. Para rematar, o 26 ás 19:00 terá lugar o curso Pasarelas de pago para o comercio electrónico. Ademais, o 28 de xuño, enmarcadas no Día do asesorado SmartPEME, terán lugar as seguintes accións: Plataformas de comercialización para vivendas e apartamentos turísticos. Que é e para que serve Arduino ás 10:00 horas,E-commerce. O teu propio canle de venda en liña. A innovación como ferramenta para PEME ás 12:00 horas, Fotografía para e-commerce. Márketing de contidos ás 16:00 horas e, por último, Técnicas de promoción en liña para empresas turísticas. Ferramentas de prototipado rápido ás 17:00 horas.
A oficina de Ponteareas, pola súa banda, dará acollida ás seguintes actividades: Seguridade informática: conceptos básicos, hoxe ás 19:00 horas, Imos chamar á porta da túa clientela: Posicionamento SEO, o día 7 á mesma hora, Parte Práctica da Lei de Protección de Datos 2018, RGPD Europeo (retransmisión en vivo do obradoiro), o día 12, e Fotografía os teus produtos ou servizos para as redes sociais, o día 14 no horario habitual. Pola súa banda, a formación Crea un plan de social media para a túa empresa turística chegará o 19 de xuño, nesta ocasión ás 17:00 horas. A quenda do curso Pasarelas de pago para o comercio electrónico será o día 21 ás 19:00 horas. Xa por último, o 26 de xuño á mesma hora, Rentabiliza o teu perfil profesional en Facebook será a acción que impartirá o persoal do programa.
O programa de xuño da oficina do Porriño, pola súa parte, comeza hoxe ás 19:00 horas co curso Google Analytics: Iniciación á analítica Web. Prosegue con Parte Práctica da Lei de Protección de Datos 2018, RGPD Europeo (retransmisión en vivo do obradoiro), que chegará o 12 de xuño á mesma hora. A acción Como ser eficiente na organización do teu tempo: trello e toggl terá lugar o 14 de xuño, na hora habitual. O 19 será a quenda de Imos chamar á porta da túa clientela: Posicionamento SEO. O xoves desa mesma semana, tamén ás 19:00 horas, impartirase o curso Facebook Ads e, finalmente, Fotografía gastronómica co teu móbil o 26 de xuño á mesma hora.
Por último, o Centro Exposalnés de Cambados dará acubillo a sete accións formativas. Estas comezan hoxe co curso (ás 19 horas) Unifica a Xestión das túas Redes con Hootsuite. O día 7 de xuño, tamén ás 19 horas, chega Como Ser Eficiente na Organización do teu Tempo: Trello e Toggl. O día 12, á mesma hora, realizarase a acción Parte Práctica da Lei de Protección de Datos 2018, RGPD Europeo, a cal contará cunha retransmisión en vivo. O xoves desa mesma semana, o día 14 á mesma hora, será a quenda de Marketing de Contidos: Como Xerar unha Estratexia Efectiva. O 19 de xuño ás 19 horas chega Google Calendar, Moito Máis que unha Axenda. O xoves desa mesma semana, á mesma hora, é a quenda de Crea o teu Propio Logotipo con Canva. Por último, Desenvolve a túa Propia Estratexia de Email Marketing chegará o martes 26 de xuño ás 19 horas.
Novidades deste ano ao abeiro de SmartPEME
A Deputación de Pontevedra lembra que o proxecto SmartPEME comezou en 2018 afrontando unha nova etapa na súa andaina, un novo treito no que o programa verá aumentados os servizos a fornecer, abrindo tres novas grandes liñas como son o Centro Provincial de Economía Dixital (CPED), que estará situado no viveiro de empresas de Barro, SmartPEME Impulsa e TurisTIC, que se irán facendo dispoñibles para as persoas autónomas e empresas a partir dos vindeiros meses.
A través do Centro Provincial de Economía Dixital vaise mostrar ás empresas as ferramentas, aplicacións e solucións innovadoras máis relevantes que a economía dixital ofrece. Para iso, o CPED apoiarase nas instalacións do FabLab que a Deputación de Pontevedra ten instalado no viveiro de Barro.
Doutra banda, SmartPEME Impulsa abrirá novas vías de asesoramento en materia de innovación, competitividade e internacionalización, “unindo deste xeito os obxectivos das empresas coas máis novas tecnoloxías, procesos e servizos”, explica a Deputación, engadindo que TurisTIC, como indica o seu nome, presentarase como “un punto de apoio tecnolóxico para o o sector turístico”. Trátase dun servizo enmarcado no Plan Estratéxico de Turismo Rías Baixas e que pretende potenciar o sector a través de axudas ás empresas para adaptarse á contorna dixital.
Datos sobre o Proxecto SmartPEME
SmartPEME é un novo modelo de servizo orientado á mellora competitiva das PEME e á procura dunha melloría nas vendas e na eficacia e eficiencia das tarefas, que abre novos eidos de actuación e acada novos grupos de interese coma os emprendedores, as asociacións empresariais e os axentes de dinamización en concellos.
O devandito obxectivo, nas oficinas do Porriño, Cambados, Pontevedra, Lalín, Ponteareas, Vigo, A Estrada e (agora tamén) Barro, abrangue seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networkingtrimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.
É moi importante que grandes compañías aposten pola inclusión social a través da tecnoloxía, pero tamén o é que o fagan individuos, emprendedores e pequenas empresas que, aínda que poidan ter un alcance máis limitado, teñen unha maior capacidade de influír nas súas comunidades.
Así, Microsoft e a Fundación Esplai quixeron recoñecer un destes exemplos nos que se aposta por mellorar a inclusión de persoas en situacións de dificultade, como as persoas con discapacidade ou maiores.
En concreto, estas dúas entidades entregaron o galardón ao "Traballo pola E-inclusion" ao profesor de instituto Eduardo San Rufo, de Calahorra (A Rioxa), en recoñecemento á súa dedicación para a posta en marcha de iniciativas de inclusión social a través da capacitación dixital.
Eduardo San Rufo desenvolve as súas iniciativas de inclusión social a través da Asociación Indismatic, da que é promotor.
Este premio é froito da relación que desde hai case 20 anos manteñen Fundación Esplai e Microsoft unindo tecnoloxía e voluntariado para reducir a exclusión social.
O Colexio de Enxeñaría en Informática de Galicia (CPEIG) falla os premios da “X Noite da Enxeñaría en Informática de Galicia”. Son nove distincións anuais que corresponden a diversas categorías onde os colexiados e colexiadas recoñecen as iniciativas ou persoas destacadas no ámbito da enxeñaría en informática.
O Colexio profesional premiou na categoría e-Inclusión ao proxecto Digitalizadas (https://www.digitalizadas.org/) polos valores que fomenta ao desenvolver competencias tecnolóxicas que permiten a mulleres, especialmente da contorna rural, aumentar a súa influencia persoal e profesional en Internet. Os obxectivos son reducir a brecha de xénero, promover a inserción social e laboral das mulleres, protexer os seus dereitos e seguridade no eido dixital, e xerar unha rede de dixitalizadoras, é dicir, unha comunidade de mulleres con maior interese no uso da tecnoloxía para fomentar o emprendemento e o autoemprego, que aportan experiencias e referentes empresariais locais femininos. O programa foi posto en marcha pola Fundación Cibervoluntarios, Fundación Mujeres e Google.org, coa colaboración do Ministerio de Sanidad, Servicios Sociales e Igualdad.
Na categoría de iniciativa Emprendedora a distinción recaeu na aceleradora Vía Galicia, por dar soporte e asistencia na súa fase inicial a emprendedores e empresas, aportando capital semente, formación, infraestruturas e asesoramento intensivo. Vía Galicia é un ecosistema para emprendedores, situado en Nigrán e promovido pola Zona Franca de Vigo e a Xunta de Galicia. Esta aceleradora cre nas persoas e nas ideas e axuda a facer realidade un proxecto baixo un modelo de negocio rendible e sostible. Busca emprendedores con proxectos innovadores, acelerables, investibles e relevantes. Ata a data, Vía Galicia avaliou máis de 1.000 ideas de negocio, conta con 68 empresas aceleradas e 157 proxectos impulsados, cunha xeración de 338 postos de traballo.
No premio iniciativa Empresarial, o CPEIG recoñeceu o labor de ISMS Forum por incentivar o fomento da seguridade da información a través da promoción do desenvolvemento, coñecemento e cultura da Seguridade da Información en España e actuar en beneficio de toda a comunidade implicada no sector. A Asociación Española para el Fomento de la Seguridad de la Información (ISMS Forum Spain) é unha organización sen ánimo de lucro fundada en 2007 e creada cunha vocación plural e aberta, que se configura como un foro especializado de debate para empresas, organizacións públicas e privadas, investigadores e profesionais onde colaborar, compartir experiencias e coñecer os últimos avances e desenvolvementos en materia de seguridade da información. ISMS Forum Spain ten xa a máis de 160 empresas asociadas e máis de 900 profesionais asociados polo que é a maior rede activa de organizacións e expertos comprometidos coa seguridade da información en España.
Miriam Pena, unha das maiores autoridades mundiais en Erlang
O premio Ada Byron, dirixido a mulleres enxeñeiras en informática, recaeu este ano en Miriam Pena. O CPEIG valorou a súa meteórica progresión profesional, seleccionada pola plataforma Women 2.0 como unha das doce enxeñeiras máis importantes en Silicon Valle en 2018. A enxeñeira, natural de Bueu, traballa actualmente na compañía de software publicitario AdRoll en San Francisco (EEUU), onde desempeña a función de staff engineer -–enxeñeira de plantilla–, un dos postos máis relevantes dentro dunha compañía tecnolóxica onde se encarga de deseñar e implementar partes críticas da infraestrutura de ofertas en tempo real. AdRoll desenvolve solucións que conseguen que as persoas volvan a unha páxina de Internet publicando anuncios personalizados nos dispositivos, a web e as redes sociais. Titulada por la Facultade de Informática de la Universidade da Coruña, Miriam Pena conta con máis de 10 anos de experiencia en sistemas escalables, de alto rendemento e concorrencia (execución de múltiples tarefas interactivas). Antes de traballar en AdRoll prestou consultoría especializada en Erlang –unha linguaxe de programación deseñado por Ericsson– en Suecia, España, Exipto e Estados Unidos para proxectos que van desde automóbiles ata redes sociais e telecomunicacións, polo que esta enxeñeira é considerada unha das maiores autoridades mundiais en Erlang.
O CPEIG quere, mediante a concesión do Ada Byron, visibilizar a participación feminina en todos os niveis da tecnoloxía: como usuarias, como emprendedoras, como xeradoras de innovación, investigadoras e líderes “dun sector que ten a responsabilidade e o compromiso de ir á cabeza na saída da actual crise económica”. Segundo o Colexio, as mulleres teñen que ocupar un lugar central na Sociedade da Información e do Coñecemento, posto que “só así se poderá garantir unha tecnoloxía e unha sociedade verdadeiramente igualitarias”. O premio Ada Byron recibe o nome da escritora e matemática británica (1815-1852) que describiu a máquina analítica de Charles Babbage e está considerada como a primeira programadora. Deduciu e preveu a capacidade dos ordenadores para ir máis alá dos simples cálculos numéricos.
Na categoría de iniciativa da Administración, o Colexio distinguiu ao Instituto Nacional de Ciberseguridad (INCIBE), unha entidade de referencia para o desenvolvemento da ciberseguridade e da confianza dixital dos cidadáns, con especial interese nos menores, e tamén nas empresas, sobre todo en sectores estratéxicos. Esta sociedade estatal, dependente do Ministerio de Energía, Turismo y Agenda Digital a través da Secretaría de Estado de Sociedad de la Información y la Agenda Digital, desenvolve ademais unha parte importante do seu traballo en colaboración coas Fuerzas y Cuerpos de Seguridad del Estado.
O CPEIG distingue a misión de INCIBE, destinada a reforzar a ciberseguridade, a confianza e a protección da información e a privacidade nos servizos da sociedade da información, aportando valor a cidadáns, empresas, Administracións, rede académica e de investigación española, sector das tecnoloxías da información e as comunicacións e sectores estratéxicos en xeral.
No premio Traxectoria Profesional, o colectivo recoñece o percorrido profesional de Lucía Ardao. Licenciada en Informática e Máster en Telemática pola Universidade da Coruña, programa de Alta Dirección AMP da IE Business School e programa Executiva da Xunta de Galicia son algúns dos méritos académicos de Ardao.
Desde o inicio da súa carreira profesional en 1996, a súa traxectoria está vinculada a empresas do sector das Tecnoloxías da Información e as Telecomunicacións, desde spin-offs a empresas de software e consultoras, ocupando distintos postos de dirección rexional e corporativa de unidades de negocio e operacións en empresas como Denodo Technologies, Softgal ou Tecnocom. Actualmente é responsable do Negocio de TI de Indra en Galicia.
Indra é líder mundial no desenvolvemento de solucións tecnolóxicas integrais en campos como defensa e seguridade, transporte e tráfico, enerxía e industria, telecomunicacións e media, servizos financeiros, procesos electorais, e Administracións Públicas e sanidade e de transformación dixital a través de Minsait. No exercicio 2017, Indra tivo uns ingresos de 3.011 millóns de euros, 40.000 empregados, presenza local en 46 países e operacións comerciais en máis de 140 países.
En relación ao premio Colexiado de Honra, o CPEIG decidiu conceder esta distinción especial ao presidente do Consejo General de Colegios Profesionales de Ingeniería en Informática (CCII), Juan Pablo Peñarrubia. Anteriormente presidente do colexio valenciano, compaxina o seu labor colexial coa xefatura do departamento de Innovación na Deputación de Valencia. O Colexio galego ofrécese esta gran distinción por se un “traballador infatigable en busca da regulación da enxeñaría en informática e a defensa da profesión en todo o seu alcance”.
Nesta décima edición de A Noite, o CPEIG creou unha nova categoría, o premio 10º Aniversario de A Noite, distinción de agradecemento a empresas pola súa constancia no apoio ao longo destes dez anos de A Noite: Telefónica, Plexus, HP, Bahía e Xunta de Galicia.
Finalmente, o CPEIG convocou o Premio Proxecto Fin de Carreira e Máster en Enxeñaría Informática. O galardón, que ten unha dotación económica de 1.000 euros para o traballo gañador –mentres que o resto de distincións recibirán unha estatuíña–, quere ser un estímulo para os estudantes e recentemente titulados en Enxeñaría en Informática ou Máster en Enxeñaría Informática. O premio recaeu en José Joaquim de Moura Ramos polo seu proxecto “Reconstrución 3D da árbore arterio-venosa da retina a partir de imaxes OCT” como traballo fin de máster na Universidade da Coruña. Ademais, os tres finalistas beneficiaranse dun ano de colexiación gratuíta. Mediante a organización deste premio, o ente colexial busca achegarse ao colectivo estudantil e defender as vantaxes da colexiación, ademais de estimular o traballo dos estudantes.
X Noite e cea de gala no Hotel Monumento San Francisco
O CPEIG celebrará o acto de entrega destes galardóns o vindeiro 15 de xuño na “X Noite da Enxeñaría en Informática de Galicia”, nunha cea de gala no Hotel Monumento San Francisco de Santiago de Compostela a partir das 20:00 horas.
Está previsto que preto de 400 convidados asistan ao evento TIC referente de Galicia, entre representantes do empresariado, da Administración Pública, do ámbito universitario e profesionais. A Noite é xa unha gala consolidada onde o CPEIG pretende mostrar á sociedade o traballo desenvolto por enxeñeiros en informática dentro da sociedade da información e as iniciativas relacionadas co ámbito das TIC.
O CPEIG constituíuse en decembro de 2007 como corporación de dereito público e de carácter profesional con personalidade xurídica propia que se rexe pola normativa vixente na materia e polos seus estatutos. Cunha estrutura interna democrática e independente das administracións públicas, o Colexio agrupa obrigatoriamente a todas as persoas que, tendo o título oficial de Enxeñaría en Informática ou Licenciatura en Informática, desenvolven actividades propias da profesión en Galicia. Na actualidade, o CPEIG suma máis de 350 colexiados e colexiadas.
Máis información en http://www.anoite.gal/
O conselleiro de Política Social, José Manuel Rey Varela, avogou por “afondar na coordinación socio-sanitaria, na unión de esforzos de profesionais e administracións e por aproveitar as novas tecnoloxías para continuar mellorando a atención ás persoas maiores, as cales constitúen un eixe prioritario para a Xunta de Galicia”. Así o dixo no marco da inauguración do XXX Congreso Internacional de Xeriatría e Xerontoloxía que nas xornadas do 1 e o 2 de xuño reuniu na sede da Afundación en Vigo a uns 150 profesionais e expertos na temática do envellecemento e a atención integral aos maiores.
Na súa intervención, Rey Varela recoñeceu o labor dos profesionais relacionados coa atención, tanto médica como social, das persoas de idade avanzada, posto que “son unha peza fundamental para garantir o benestar dos nosos maiores cos que traballan cada día”. Nesta liña, apuntou que a Xunta comparte con estes profesionais os obxectivos de previr situacións de dependencia e promover o envellecemento activo e saudable.
Ao respecto, destacou que o Goberno galego está traballando de maneira transversal na promoción do envellecemento activo a través dunha estratexia que responde a catro eixos fundamentais: o emprego; a participación na sociedade; a vida independente, activa e segura; e a non discriminación e a igualdade de oportunidades. Así mesmo, referiuse á consolidación do sistema autonómico de atención á dependencia coa posta en marcha de novos servizos e programas e coa ampliación do número de beneficiarios no mesmo.
De feito, na actualidade son máis de 56.000 as persoas con dependencia recoñecida que reciben algunha prestación, o que sitúa a Galicia cunha ratio de cobertura do 82,2% -sete puntos por riba da media nacional-.
Por último, o titular de Política Social reiterou o firme compromiso da Xunta en continuar avanzando na mellora da calidade de vida dos maiores, en especial daqueles que viven sos ou que teñen a súa autonomía persoal limitada, fixándose como meta a de chegar aos 60.000 dependentes atendidos ao remate da presente lexislatura.
Mundos Dixitais é un Congreso Internacional de Animación, VFX, e Novos Media no que se dan cita algúns dos mellores profesionais da industria dos contidos dixitais, artistas, estudantes e persoas interesadas no mundo dos gráficos por computador para descubrir, debater e facer networking.
Mundos Dixitais celébrase na Coruña (España). Cada ano o seu ambicioso programa reúne a destacados profesionais de cada sector que comparten os seus proxectos e experiencias profesionais a través de conferencias.
A través das súas actividades, Mundos Dixitais promove as sinerxias entre os diferentes actores da industria, apoia a creatividade e o debate, fomenta a creación de emprego e convértese no punto de encontro do talento, os proxectos creativos e innovadores e os contidos dixitais.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...