AMETIC, a patronal do sector tecnolóxico e dixital español, xa elixiu aos 20 finalistas dos 83 proxectos presentados na primeira edición dos "Dixital Skills Awards Spain 2018".
Estes premios, creados no marco da "Dixital Skills and Jobs Coalition" da Comisión Europea, pretenden recoñecer e premiar os proxectos que impulsan as habilidades e transformación dixital.
Os finalistas por categorías son: Accenture, CISCO, The Key Talent e Capaball (Competencias dixitais para o mercado laboral); Samsung, ICEMD, K2 UNIVERSITY (Salesforce Training coa Fundación Universidade Carlos III), e Oracle Academy (Competencias dixitais en educación); ASTI Steam, Oracle4Girls, Girls in Tech e Inspira Steam (Competencias dixitais para mulleres e nenas); a Fundación ONCE, Samsung, Talento 4.0 Asti e a Consellería de Emprego (Máis e mellores profesionais TIC formados); e Google, UDIMA, Universidade Politécnica de Madrid e INCIBE (Competencias dixitais para todos).
O xurado tivo en conta unha serie de variables como: impacto (capacidade de solucionar unha carencia importante); escalabilidade (capacidade de ampliarse a unha maior diversidade de opcións, funcionalidades, materias); replicabilidade (capacidade de aplicarse a outros sectores, contornas, nichos"); orixinalidade (capacidade de creación e desenvolvemento); e claridade de presentación.
En concreto, os galardóns van dirixidos a centros educativos, universitarios, medios de comunicación, compañías e institucións públicas e privadas, que realicen proxectos formativos relacionados co desenvolvemento do talento dixital e a formación en competencias tecnolóxicas.
En total haberá cinco galardóns e poderá haber ata tres mencións de honra por cada categoría, que se entregarán no Foro Alianza polo Desenvolvemento do Talento Dixital, que terá lugar o 20 de xuño no NH Collection Eurobuilding de Madrid.
I Foro Alianza polo Talento Dixital en España
Trátase do primeiro encontro profesional sobre transformación dixital e talento que se organiza en España, que terá unha duración dunha xornada completa (de 09.00 a 18.00 horas), onde haberá sesións inspiradoras, de traballo, mesas de debate, etc.
O foro contará coa presenza de altos cargos dos Ministerios competentes e dos líderes empresariais das principais compañías e organizacións da economía dixital en España: Microsoft, Samsung, Google, Amazon, Accenture, Mobile World Capital, ou Eulen, entre outras. Ademais, haberá unha sesión inspiradora impartida por Richard Gerver, gurú de innovación educativa, de referencia internacional, que percorre o mundo impartindo conferencias para impulsar o cambio no ámbito da educación, na organización de empresas e na propia sociedade actual. Autor do superventas
Crear hoxe a escola do mañá.
Gerver defende a necesidade de educar a cidadáns non xa do século XXI, senón do século XXII, preparados para innovar, construír o seu propio futuro e dispostos a aprender sempre. Foi asesor de política educativa do Goberno británico de Tony Blair e Premio Nacional de Ensino no Reino Unido. En 2015 foi elixido o autor best-selling e business speaker do ano. O obxectivo da xornada é impulsar o desenvolvemento das competencias dixitais que demanda a industria, o ámbito educativo e a sociedade en xeral; e poñer en común as ferramentas, canles e recursos que se requiren para cubrir estas necesidades
O Foro Alianza polo Desenvolvemento do Talento Digital busca continuidade no tempo e ser o punto de encontro e referencia no que directivos de empresas e organizacións reúnanse ao redor desta temática clave.
Un exemplo moi claro é o da VII Bienal de Arte Contemporánea que a Fundación ONCE celebra ata o próximo 16 de setembro e na que a tecnoloxía ofrecida por Ilunion Tecnoloxía e Accesibilidade facilita ás persoas con discapacidade moverse polas exposicións e gozar das obras presentes na mostra.
Para iso, Ilunion instalou o seu sistema Amuse baseado nas balizas intelixentes "beepcons" que permite aos asistentes con discapacidade moverse pola exposición e coñecer a información das obras.
Para iso preparáronse dúas modalidades de visita, unha guiada e outra libre, nas que o usuario pode acceder a través da aplicación Amuse a información sobre as obras expostas, ademais de vídeos e audios, e tamén se pode guiar polo percorrido grazas ao sistema de balizas.
Ademais, Ilunion levou á Bienal de Arte Contemporánea un robot co que os visitantes poden interactuar e que informará sobre o calendario de exposicións, a accesibilidade do emprazamento ou información sobre a temática das obras expostas.
A VII Bienal de Arte Contemporánea da Fundación ONCE ofrece obras tanto de artistas con discapacidade como sen ela, pero nos que a discapacidade serviu como unha fonte de inspiración.
O Centro de Emprendemento da Cidade da Cultura de Galicia acolleu onte a clausura e entrega de diplomas do programa Constrúe o teu futuro: Videoxogos e Emprendemento, organizado pola Cámara de Comercio de Santiago, a Cidade da Cultura e a Fundación INCYDE a través do financiamento do Fondo Social Europeo. O acto estivo presidido polo secretario xeral técnico da Consellería de Cultura e Educación, Jesús Oitavén; o secretario xeral da Cámara, Fernando Barros; e o director de Proxectos da Fundación INCYDE, Juan Vila-Coro. No curso participaron 17 mozas e mozos, que tiveron a oportunidade de incrementar a súa capacitación profesional e darlle azos ao seu espírito creativo dixital.
O principal obxecto do programa, que se celebrou do 16 de abril ao 25 de maio, foi “facilitar a incorporación ao mercado laboral a menores de 30 anos, non ocupados e non integrados nos sistemas de educación ou formación, a través de accións de fomento, formación e apoio ao emprendemento”. Os 17 alumnos e alumnas participantes iniciáronse no desenvolvemento de videoxogos e ampliaron e consolidaron os seus coñecementos no campo da creatividade dixital. Fernando Barros explicou que o sector dos videoxogos é “o de maior potencial de crecemento e innovación da industria dos contidos dixitais en España”, ao que engadiu que “o desenvolvemento de videoxogos é un eido profesional prometedor que demanda perfís con formación especializada”.
1A formación incluíu as principais disciplinas vinculadas á creatividade, innovación e tendencias dentro do mundo do videoxogo (produción de imaxe en 3D, desenvolvemento visual, efectos visuais ou simulación), modelos de negocio, dirección de proxectos, roles de equipo técnico e tecnoloxía, mercadotecnia en liña (Google Analytics, visualización en buscadores, ...), área xurídico-fiscal, finanzas e área de dirección de proxecto final. Ademais da entrega de diplomas, o alumno Juan Manuel Otero presentou o seu proxecto Chirimolla Games.
A Escola Superior de Enxeñaría Informática do Campus de Ourense acolle o vindeiro 28 de xuño unha xornada que bota luz sobre as vantaxes e oportunidades que se abren coa nova revolución tecnolóxica, poñendo o foco nas vantaxes, posibilidades e desafíos da revolución aplicada ás empresas. A primeira edición da Xornada Digital Business quere responder á seguinte pregunta: Como podo aproveitar as moitas oportunidades que xera o cambio de modelo económico?
O encontro, a disposición do alumnado da dita escola e doutras facultades das tres universidades galegas, tamén quere fornecer claves e recursos a empresarios, emprendedores e a público en xeral interesado en coñecer de primeira man a opinión dos expertos acerca das potencialidades da economía dixital e como afectará ás nosas empresas (que terán que renovarse dixitalmente, si ou si, se queren sobrevivir) ou ás entidades públicas. Segundo explica a organización da xornada, poñéndonos en situación, “nestes últimos anos estamos a vivir un cambio de modelo económico sen precedentes, do ladrillo e a especulación pasamos ao coñecemento e ao emprendemento dixital, e nesta xornada queremos dar un pouco de luz sobre termos ás veces tan utilizados como non comprendidos”.
Para as persoas interesadas, dicirlles que dende a web da xornada,www.dbusiness.es, atoparán información detallada do evento, o cal está formado por unha xornada matutina con diferentes relatorios e unha mesa redonda e pola tarde, haberá dúas clinics para aqueles que buscan mellorar o seu coñecemento nunha das dúas temáticas a tratar: visualización en servizos web e buscadores (posicionamento ou SEO) e optimización de WordPress. O equipo de relatores está formada por Fernando Muñoz, especialista en SEO e director executivo (CEO) de Señor Muñoz, Luz Castro, doutora en Informática e co-fundadora de Imaxin Software, Álvaro Fontela, experto en optimización de WordPress e director executivo de Raiola Networks, Daniel Seijo, co-fundador de Diario Motor e responsable de Menéame, Laura Vázquez, directora de Servizos ao Cliente en Roi Scroll, e César González, experto en transformación dixital e director executivo de Contact Comunicación.
A xornada vén da man da Universidade de Vigo (Campus de Ourense), a Escola Superior de Enxeñaría Informática e máis a empresa Contact Comunicación.
A Cámara de Comercio de Santiago de Compostela organizará o 19 de xuño unha xornada sobre as vantaxes, oportunidades e desafíos da dixitalización nas empresas, dirixida a empresarios, directivos, emprendedores, asesores de empresa, consultores ou, en palabras da entidade cameral, “calquera persoa interesada en coñecer o concepto de transformación tecnolóxica e a xestión do cambio no modelo de negocio”. Celebrarase de 19:00 a 21:00 horas no salón de actos da Cámara. A xornada, que será impartida polo consultor de estratexia dixital Raúl Rebollo, ten o obxectivo de achegar unha guía de conceptos, criterios e tendencias para afrontar o dito desafío das empresas asumindo metodoloxías innovadoras.
Amais, botarase luz sobre as novas oportunidades impulsadas polo proceso de dixitalización para “explorar novas formas de medre do negocio actual”. Ao fío do devandito, Rebollo ensinará aos asistentes como pode impactar a transformación dixital na empresa, a través dunha metodoloxía baseada en valorar retos e iniciativas aos que se teñen que enfrontar co obxecto de seguir sendo competitivos e aumentar, pero nunca perder, a carteira de clientes. Asemade, explicará aos participantes como funcionan os negocios en liña e as distintas dimensións da transformación dixital, desde a relación co cliente ata os modelos de negocio. “O avance da tecnoloxía propicia a redución de custes e mellores na produtividade das persoas e departamentos”, sinala. Ademais, o experto realizará unha consultoría rápida para comprobar a transformación dixital dunha asociación que ofrece servizos aos seus clientes, aplicando neste caso os conceptos á propia Cámara de Comercio.
Este 12 de xuño entregáronse no Centro Comercial As Termas de Lugo a segunda edición dos premios do Proxecto Wonderful, destinados a recoñecer o espírito innovador das empresas locais e convocados polo dito centro comercial e máis o Concello de Lugo. Os galardóns foron dar aos proxectos Data Monitoring na categoría de Smart Cities e a oSIGris na categoría de Ideas Innovadoras. Na cita participaron o xerente e As Termas, Esteban Patiño e a concelleira de Economía de Lugo, Ana Prieto.
Wonderful desenvolveuse simultaneamente nas provincias de Madrid, Toledo, Albacete, Alacante, Barcelona, León, Lugo, Pontevedra, Biscaia e Valencia. Contaba con dúas categorías nas que participaron 16 proxectos innovadores da provincia de Lugo. Como dixemos, o gañador da modalidade de Cidades Intelixentes foi a empresa Data Monitoring (CCDatos), coa súa innovación DataWater, que permite realizar unha xestión máis eficaz da auga controlando desde un dispositivo móbil todo o proceso (nivel de líquido, nivel de cloro, estado das bombas, corrente eléctrica, etc) con dispositivos de baixo custo e de baixo consumo, alimentados por placas solares.
Respecto de oSIGris, é unha empresa innovadora de agricultura de precisión que, mediante sistemas de información xeográfica (SIX), ofrece un control e xestión agrícola innovador. En detalle, a tecnoloxía de oSIGris é quen de mapear terreos e explotacións con gran precisión, abrindo a porta á xestión dos datos por cepas (no canto de por parcelas). Ademais deste mapeado inicial, oSIGris fornece de diferentes mapas de calor para plasmar dunha maneira moito máis visual a información obtida, así como as ferramentas de xestión.
En virtude do impulso que lles vai achegar Wonderful, ambos os proxectos conseguen un conxunto de premios enfocados a apoialos con acceso ao financiamento ou investimento privado grazas ao programa BStartup de Banco Sabadell ou ao vehículo de investimento en novas firmas innovadoras de Indra. Tamén terán acceso ao Global Entrepreneur Program de IBM valorado en 12.000 dólares, e ao Wonderful LAB, que achegan diversas solucións e apoio técnico para o desenvolvemento axeitado dos proxectos gañadores. Ademais, na categoría de Ideas Innovadoras, Wonderful premia cun Curso de Emprendemento da MIT, impartido a Universidade Francisco de Vitoria, unha tableta e outros premios adicionais de apoio.
O conselleiro de Economía, Emprego e Industria, Francisco Conde, salientou hoxe, durante a súa participación na xornada Industria 4.0: tendencias en comunicación e márketing, celebrada na sede de Trison, en Sada (A Coruña), que a tecnoloxía dixital é a ferramenta que determina a competitividade das empresas e que o márketing é a canle para conectar co cliente.
Durante a súa intervención, o conselleiro destacou que as novas tecnoloxías e a Industria 4.0 están transformando todo o noso contorno, cambiando o modo de producir, consumir e vender, facendo da innovación e a creatividade elementos fundamentais no ámbito empresarial. Neste modelo, o cliente sitúase no centro do sistema, por iso, Conde se referiu á importancia de apostar por unha imaxe de marca.
Neste sentido, sinalou que o márketing, especialmente no sector minorista, ofrece a posibilidade de chegar aos clientes tamén a través da tecnoloxía, dixitalizando os seus espazos, como no caso de Trison que, grazas ao seu uso do márketing dinámico e olfativo, é a quinta compañía mais importante do seu segmento a nivel internacional logrando mellorar a experiencia de compra dos clientes.
Conde salientou o papel do sector TIC na Comunidade, en pleno crecemento grazas ás 3410 empresas que o conforman e que dan emprego a case 22.000 profesionais, a cifra máis alta nos últimos 5 anos.
O conselleiro incidiu no reto que as empresas teñen que afrontar no eido da Industria 4.0, para integrar tecnoloxías dixitais como a impresión 3D, a intelixencia artificial, o big data ou a automatización de procesos para gañar en competitividade e agradeceu a organización desta xornada na que se analizou a repercusión deste novo paradigma nas estratexias de comunicación das empresas.
O viveiro de empresas de Ribeira acolleu onte o remate da actividade formativa Constrúe o teu futuro: Animación 2D e 3D e emprendemento. Na cita, na que tamén se entregaron os diplomas aos vinte participantes no programa, participaron o tenente de alcalde de Ribeira, Emilio Pérez, o secretario xeral da Cámara, Fernando Barros; e o director de Proxectos da Fundación INCYDE Mariano Alcantarilla. A iniciativa foi organizada pola Cámara de Comercio de Santiago, o Concello de Ribeira e a Fundación INCYDE a través do Fondo Social Europeo. No curso capacitouse laboralmente á mocidade asistente para concorrer nun sector en proxección: o sector dos videoxogos e do lecer dixital.
Segundo lembraron as entidades organizadoras, o principal obxecto do programa foi “facilitar a incorporación ao mercado laboral a menores de 30 anos, non ocupados e non integrados nos sistemas de educación ou formación, a través de accións de fomento, formación e apoio ao emprendemento”. Os 20 alumnos e alumnas participantes (14 homes e 6 mulleres) adquiriron novos coñecementos sobre a animación 2D e 3D que, en palabras da organización, “axudarán a incrementar a súa calidade profesional e mellorar a súa empregabilidade”, á vez que descubriron as opcións que ofrece o autoemprego para o seu futuro laboral. Fernando Barros sinalou que “os avances tecnolóxicos son o factor de influencia con maior impacto actualmente no mercado laboral”, e puntualizou que “o carácter emprendedor resulta esencial para catalizar a innovación nas empresas”. Ademais, lembrou que o sector dos videoxogos é “o de maior potencial de crecemento e innovación da industria dos contidos dixitais en España”, e o seu desenvolvemento é un “eido profesional prometedor que demanda perfís con formación especializada”.
O programa, que se celebrou do 23 de abril ao 1 de xuño nas aulas formativas da incubadora ribeirense, abrangueu as principais disciplinas vinculadas á creatividade dentro do mundo da animación. Segundo engadiu Barros sobre a importancia dunha actividade como Constrúe o teu futuro, “a industria necesita profesionais cualificados nas áreas de 3D, ou sexa, nos eidos da produción, a arte, o deseño visual e de personaxes, as contornas e os props, o desenvolvemento visual, o modelado, a construción de contornas no motor, o rigging, o shading e as texturas, os efectos visuais ou a simulación, entre outras disciplinas relacionadas con competencias técnicas e artísticas”. Ademais da entrega de diplomas, a alumna Caryola Lugo presentou o seu proxecto sobre un lavado de coches.
A Fundación TIC da Deputación de Lugo está a impartir esta semana na Fonsagrada unha das actividades formativas do seu programa formativo tecnolóxico para este segundo semestre de 2018, un programa centrado en achegar as moitas vantaxes das novas tecnoloxías aos maiores da provincial, poñendo o foco no rural. O alcalde de Fonsagrada e vicepresidente da Deputación, Argelio Fernández Queipo, mantivo este 12 de xuño unha xuntanza cos 20 participantes do obradoiro, centrado no manexo e máis no emprego do teléfono móbil. Trátase do terceiro curso que ofrece a TIC neste concello.
Fernández Queipo salientou “o éxito que están a ter estes cursos formativos, tal e como constatamos nos que xa levamos impartidos en Navia de Suarna, Foz e Xermade e Ribeira de Piquín”. Tamén manifestou o seu interese por conseguir que a Fundación TIC recunque con máis obradoiros en Fonsagrada, para dar resposta á importante demanda existente”. Segundo fixo saber, “isto demostra o interese que hai por parte dos maiores sobre a utilidade das novas tecnoloxías como ferramenta para mellorar a súa calidade de vida”. O vicepresidente dixo que “desde o Goberno da Deputación traballamos polo noso rural e promovemos iniciativas que melloran a calidade de vida dos nosos veciños co obxectivo, entre outros, de facer fronte ao despoboamento. Neste punto, as novas tecnoloxías representan un papel moi importante, polo que seguiremos promovendo o seu uso entre os nosos maiores para facilitar o seu día a día e o contacto cos seus familiares e amigos”.
Máis de mil prazas
As vindeiras citas dos cursos da Fundación TIC de novas tecnoloxías impartiranse nas localidades de Monforte de Lemos, Alfoz e Ribadeo. Este segundo trimestre de 2018, a entidade da Deputación fornece 1.085 prazas nos 81 cursos que imparte, tanto na sede da entidade como na provincia. Segundo explica o Goberno provincial, esta cifra supón un incremento do 60% con respecto á tempada anterior. O obxectivo, engade, é “dar resposta á alta demanda que hai destas actividades, tal e como queda reflectido cada vez que se abre a inscrición e quedan cubertas todas as prazas ás poucas horas”.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...