Durante a xornada Hacker ético, que se desenvolveu onte pola mañá no Centro de Novas Tecnoloxías de Galicia (CNTG), déronse a coñecer os perigos e ferramentas para poder minimizar o dano que poden ocasionar os atacantes non autorizados en sistemas informáticos. Contou coa participación do director xeral de Orientación e Promoción Laboral, Alfonso Marnotes, quen puxo en valor a formación de calidade como a que se imparte no CNTG a través de 46 cursos no primeiro semestre deste ano para cualificar a preto dun milleiro de alumnos e alumnas.
Ademais, o centro leva a cabo 19 xornadas divulgativas, como a de onte de hacking ético. Son seminarios sobre os novos desenvolvementos no mundo das TIC nos que se prevé a asistencia de 500 persoas. En palabras de Marnotes, este seminario reflicte o compromiso da Xunta de dar resposta ás demandas reais de cada sector de actividade, destacando que a ciberseguridade vai ser un dos retos do futuro da sociedade. A xornada contou coa asistencia de Kenneth Peiruza, consultor e formador con 20 anos de experiencia profesional no mundo do hacking ético da administración e a seguridade en sistemas Linux.
A programación deste ano do CNTG céntrase na ciberseguridade. Nas accións formativas que se impartiron sobre esta materia participaron preto de 420 alumnos e alumnas.
A Cámara de Comercio de Santiago de Compostela clausurou hoxe o seu programa de formación avanzada sobre os obxectos conectados e as súas posibilidades á hora de lanzar novos proxectos de mercado ou ampliar e mellorar proxectos xa existentes. Falamos do programa Constrúe o teu Futuro. Internet das Cousas (IoT) e Emprendemento”, do que tamén se entregaron os diplomas ás/aos participantes. A cita foi no viveiro de empresas que a Cámara ten no Polígono de Costa Vella. A formación, organizada con co-financiamento do Concello de Santiago e da Fundación INCYDE (a través do Fondo Social Europeo) foi clausurada pola concelleira de Desenvolvemento Económico de Santiago, Marta Lois; o secretario xeral da Cámara, Fernando Barros; e o director de Proxectos da Fundación INCYDE, Carlos Silván.
A formación, que se celebrou do 16 de abril ao 25 de maio na incubadora de Costa Vella, destinouse a mozos e mozas menores de 30 anos sen estudos en curso nin ocupación laboral na actualidade, inscritos no Sistema Nacional de Garantía Xuvenil, ben sexan emprendedores ou profesionais que desexan iniciarse no desenvolvemento da IoT (Internet of Things), así como os interesados en ampliar e consolidar os seus coñecementos no eido da creatividade dixital.
O programa, no que participaron 19 alumnos e alumnas (10 mulleres e 9 homes), ten por obxecto “mostrar os distintos modelos de negocio baseados e realizados baixo este paradigma, con especial atención aos sectores máis puxantes e considerar as novas solucións que comercializan as novas firmas innovadoras nos ámbitos nacional e internacional”.
Fernado Barros sinalou que na formación explicáronse as tecnoloxías vinculadas á Internet das Cousas e que tipo de requisitos son básicos para construír un modelo de negocio analizando e realizando un estudo de mercado. Tamén deu a coñecer as ferramentas necesarias e distinguiu casos de éxitos das empresas que xa triunfaron no eido IoT. Desenvolvéronse conceptos de información a gran escala, uso de aplicacións móbiles e conceptos de ciberseguridade e benchmarking. Ademais da entrega de diplomas, o alumno Óscar Bonome presentou o seu proxecto Bono Magic 3D.
Falar de coworking é falar de novos xeitos de facer empresa. De aí a un protagonismo especial das novas tecnoloxías e da presenza feminina non hai máis ca un paso. Un exemplo disto é a nova edición (a segunda) do coworking de Barro, que comeza a funcionar este 14 de xuño froito da colaboración entre a Deputación de Pontevedra e a Escola de Organización Industrial (EOI). Este novo espazo de traballo colaborativo contará coa participación de 20 proxectos emprendedores, unha parte dos cales son iniciativas relacionadas coas novas ferramentas dixitais.
A sede de operacións será o viveiro de empresas de Barro, durante un período de cinco meses. Será de balde e, ademais, abrirá vieiros de acceso a importantes vantaxes formativas. Por exemplo, acceso ao FabLab (Laboratorio de Fabricación Dixital) situado no mesmo espazo. Por certo que boa parte das iniciativas acubilladas están lideradas por mulleres, 13 das 20. Segundo afirmou na presentación do coworking Carmela Silva, presidenta da Deputación, este feito responde a que “as mulleres, nesta provincia, están a converterse en protagonistas do desenvolvemento económico”.
En total, os proxectos que comezan a desenvolverse en Barro centraranse en eidos como a psicoloxía, a publicidade online, a radio, o ensino, a internacionalización, a arqueoloxía, a nutrición e a saúde, o turismo, a avogacía, a selección de persoal, as tecnoloxías ou a fotografía.
Amais do espazo de balde durante case medio ano, a Deputación de Pontevedra ofrece a estas novas emprendedoras e emprendedores acompañamento individualizado e accións formativas especializadas para “garantir o éxito dos seus proxectos”. Máis polo miúdo, a cada proxecto destinarase 40 horas de asesoramento persoal nas que se traballarán “conceptos esenciais para o desenvolvemento da súa idea empresarial”. Ademais, desenvolveranse 60 horas de formación específica a través de obradoiros e sesións formativas grupais para potenciar as competencias en emprendemento e xestión de proxectos (temas como as competencias emprendedoras, a creatividade e innovación aplicada ao mundo empresarial, a metodoloxía Lean StartUp adaptada ao modelo de negocio, como poñer en marcha un plan de mercadotecnia dixital, como atopar e consolidar a viabilidade económica, etc).
Ademais, como dixemos, as persoas participantes terán acceso de balde ao novo FabLab (Laboratorio de Fabricación Dixital), que está situado no mesmo viveiro de Barro, e onde se dispón de equipamento de fabricación dixital (impresoras 3D, escáneres 3D, kits de Arduino, unha fresadora de madeira, soldadores de electrónica, material electrónico diverso, etc.). Nestes laboratorios, segundo informou a Deputación, desenvolveranse “unha completa programación de obradoiros específicos de Arduino e fabricación dixital para promover o coñecemento e uso desta tecnoloxía”. Deste xeito, engadiu a entidade provincial, “calquera emprendedor ou emprendedora que o precise poderá experimentar e prototipar o seu deseño nestas innovadoras instalacións”. Amais, e tamén no marco do FabLab, celebrarase unha jam (ensaio-improvisación colectiva) para a creación de solucións de forma conxunta a un reto que se lles proporá ás persoas que asistan.
Para rematar organizarase unha xornada de demostración (Demo Day) durante o cal se presentarán os proxectos participantes na segunda edición do coworking, a súa evolución e as posibilidades de colaboración cos mesmos.
Para quen non o saiba, aínda a estas alturas, este venres 15 de xuño celébrase en Santiago, no Hotel Monumento San Francisco (a partir das 20.00 horas) o gran acontecemento de confraternidade anual das enxeñeiras e dos enxeñeiros en Informática da nosa terra. Estamos a falar da Noite da Enxeñaría en Informática de Galicia, organizada polo CPEIG, á que está previsto que acuda preto de 400 convidadas e convidados, entre representantes do empresariado, das administracións, do ámbito universitario e profesionais. A cita servirá ademais para recoñecer con diversos galardóns o traballo ben feito dos nosos profesionais en materia dixital.
Segundo lembra o colexio, “A Noite é xa unha gala consolidada onde o CPEIG pretende mostrar á sociedade o traballo desenvolvido por enxeñeiros en Informática ao abeiro da Sociedade da Información e as iniciativas relacionadas co ámbito das TIC”.
Novamente podemos consultar todo o relativo ao festexo na web específica anoite.gal.
O mestre de cerimonias será o actor e humorista Carlos Latre, e a previsión é de que a gala comece arredor das 20.00 horas, co cóctel de benvida. De seguido, arredor das 21.00 horas, procederase a entregar os premios que cada ano convoca o CPEIG e que, como dixemos, diríxense a mostrar os esforzos das nosas entidades, asociacións, profesionais e empresas no camiño de impulsar recursos e servizos tecnolóxicos de especial valor para o noso desenvolvemento social e económico (facendo fincapé, tamén, nas iniciativas, nos proxectos e nos persoeiros que máis e mellor tiveran impulsado e mellorado a profesión da Enxeñaría en Informática na nosa terra).
Estes son os galardóns que acompañan a celebración da Noite: Premio Proxecto Fin de Carreira/Master (José Joaquim de Moura Ramos), Premio e-Inclusión (proxecto Digitalizadas), Premio Iniciativa Emprendedora (aceleradora ViaGalicia), Premio Iniciativa Empresarial (ISMS Forum), Premio Ada Byron (Miriam Pena), Premio Iniciativa da Administración (Instituto Nacional de Ciberseguridade, INCIBE), Premio Traxectoria Profesional (Lucía Ardao), Premio 10 Aniversario da Noite (Telefónica, Plexus, HP, Bahía e Xunta de Galicia) e a distinción Colexiado de Honra (Juan Pablo Peñarrubia).
As novas tecnoloxías e os zombis serán dous dos eixes temáticos da nova edición de PonteVerán (formato PDF), o programa estival de actividades do Concello de Pontevedra, especialmente dirixido á xuventude. A iniciativa foi dada a coñecer a semana pasada polo concelleiro de Xuventude, Alberto Oubiña, quen salientou “a calidade, a cantidade a diversidade” da mesma. No que se refire a formatos, haberá accións de lecer alternativo e lúdico-formativas, con especial atención á igualdade, á actividade física e máis ao respecto polo medio ambiente e patrimonio. E, como diciamos ao comezo, haberá novas tecnoloxías e “xente resucitada”. O motivo? A celebración dunha cita terrorífica, Terra de zombies, o 31 de xullo, para mozas e mozos de entre 16 e 35 anos.
Trátase, máis polo miúdo, dun xogo de rol en vivo cuxo obxectivo non é outro que procurar “a diversión en grupo”. Nun primeiro intre, a actividade incluirá unha explicación do xogo (obxectivos, normas de respecto entre compañeiras e compañeiros para logo pasar á caracterización dos participantes e encetar a actividade si mesma).
Segundo explicou Alberto Oubiña acerca das temáticas a tratar, nesta edición, “atendendo a demanda que temos dende hai tempo” incorpóranse á oferta de PonteVerán varios obradoiros e cursos relacionados coas novas tecnoloxías (de informática, de programación, de navegación, de robótica, de holografía e realidade virtual, etc). Isto responde á necesidade de fornecer á mocidade de accións acordes cos seus intereses. Na súa opinión, “cómpre non esquecer que xa temos máis dunha xeración nativa dixital”.
A programación de PonteVerán vai dirixida a nenos/as e mozos/as de 8 a 35 anos. A maior parte das actividades son de balde, xa que “as cuestións económicas non deben ser razón para non participar”, sinala Oubiña. As solicitudes para participar nas actividades de PonteVerán poden facerse a partir do 11 de xuño en: apuntate.pontevedra.gal.
A educación en novas tecnoloxías, por moitos e variados motivos (por exemplo, as TIC abren unha manchea de posibilidades laborais, profesionais, comunicativas creativas e de emprendemento), estase a introducir no noso sistema educativo, aínda que se cadra non tan decontado como sería de desexar. O máis recente avance nesta dirección dunha docencia máis envorcada coas ferramentas dixitais presentouse hoxe oficialmente en Santiago, na Cidade da Cultura, onde o Goberno galego deu a coñecer que os nosos centros educativos de secundaria contarán o curso que vén cun Bacharelato de excelencia en Ciencias e Tecnoloxías, o STEMbach. Será, sinalou a Xunta, unha alternativa docente que abranguerá un proxecto final que o alumnado, individualmente ou en grupo, deberá explicar e defender ao remate do segundo ano.
Estes e outros datos foron achegados polo conselleiro de Cultura, Educación e Ordenación Universitaria, Román Rodríguez, quen debullou na presentación de hoxe un paquete de iniciativas STEM (Ciencia, Tecnoloxía, Enxeñaría e Matemáticas) para o próximo curso 2018/19, enmarcadas en Edudixital 2020, no que se integra precisamente o devandito bacharelato tecnolóxico-científico (que será a acción prioritaria). Segundo indicou o conselleiro, o STEMbach é unha opción formativa concibida para Humanidades ou para Ciencias e, ademais, será en si mesma unha ponte co ensino universitario e un adestramento de cara ao que lles agarda aos estudantes ao remate do bacharelato. De feito, o devandito proxecto a defender forma parte deste adestramento.
Este proxecto, semellante ao traballo de fin de grao, será co-dirixido por unha persoa docente pertencente a un departamento universitario ou a un centro de investigación de prestixio do Sistema Universitario de Galicia (SUG). O conselleiro tamén fixo saber que o alumnado cursará algunha materia extracurricular semanal relacionada co ámbito de materias STEM e “cunha orientación ao traballo na mellora das competencias comunicativas e dixitais”. Esta materia terá unha carga lectiva semanal de 2 ou 3 horas fóra do horario ordinario do alumnado. Así mesmo, os estudantes farán actividades complementarias de formación, organizadas polo centro en colaboración con universidades ou entidades ou organismos investigadores, ou persoas investigadoras de recoñecida competencia; como conferencias, obradoiros ou proxectos. O alumnado recibirá ao remate unha certificación acreditativa da dirección do centro de que realizou os estudos correspondentes a este programa.
Outra das novas accións STEM presentadas hoxe é a creación dos Espazos Maker, en palabras do conselleiro “lugares nos propios centros educativos que fomentan a creatividade do alumnado baixo a máxima de aprender facendo”. Estes espazos incluirán equipamento específico e unha achega económica e estarán destinados a alumando, profesorado e mesmo familias para que “poidan desenvolver proxectos mediante a experimentación”. Nesta primeira convocatoria búscase chegar a 10 centros educativos, aos que se fornecerá do equipamento necesario, así como dunha achega individual de 2.000 euros.
Ao devandito cómpre engadir a Semana STEM, que se vai celebrar entre finais de agosto e principios de setembro de 2018, e tamén o primeiro campamento científico-tecnolóxico en inglés: a STEMweek, na que poderán participar 200 alumnos de 3º e 4º de ESO. Estas 200 prazas súmanse ás 450 deste ano da Semana STEM. co cal un total de 650 rapaces e rapazas poderán mellorar os seus coñecementos científico-tecnolóxicos en campamentos fóra do horario lectivo.
O Centro de Innovación Social Dixital A Molinera de Ourense está a acoller estes días (e até o 18 de xuño) unha actividade formativa sobre metodoloxías da nova revolución industrial e tecnolóxica. Trátase do obradoiro Experto en prototipado con ferramentas 4.0: proxectos robóticos, electrónicos e microinformáticos, un curso de extensión universitaria organizado polo Campus de Ourense (co financiamento da Deputación) no que participan 35 persoas adquirindo os recursos precisos para desenvolver todo o proceso de elaboración dun prototipo, desde a súa programación e electrónica ata a súa impresión en 3D.
O curso está dirixido polo catedrático Florentino Fernández-Riverola e polo profesor José Ramón Méndez Reboredo, do Grupo de Investigación SING (Sistemas Informáticos de Nova Xeración) do Departamento de Informática da Universidade de Vigo. Cunha duración de 60 horas impartidas en horario de tarde na Molinera, a formación divídese en tres módulos, un primeiro de electrónica e programación, un segundo de corte con láser e un terceiro de impresión 3D.
Segundo detallan os directores do curso, “o crecente interese polo desenvolvemento de sistemas electrónicos e microinformáticos orientados ao control de calquera proceso ou sistema e nun escenario onde todo dispositivo tende a conectarse a Internet, o uso de sensores e actuadores en combinación con circuítos electrónicos e microinformáticos posibilita o control de calquera sistema”. Ao fío disto, os directores engaden que a materialización de placas de circuíto impreso que integren todos os compoñentes eléctrico/electrónicos, así como o coñecemento de principios básicos de electrónica, “resultan imprescindibles para abordar o deseño, aplicación e posta en marcha de calquera proxecto electrónico”.
Os obxectivos detallados do curso abranguen cuestións como capacitar ao alumnado para o desenvolvemento de circuítos electrónicos, para deseñar e fabricar prototipos electrónicos e programables funcionais e para comprender os fundamentos básicos do deseño de placas de circuíto impreso. Ao longo das sesións, as e os participantes, aprenderán ademais a manexar o instrumental necesario na construción de prototipos que manexan hardware electrónico e iniciaranse no mundo do hardware libre e os microcontroladores utilizando a plataforma Arduino e no manexo dunha ferramenta de deseño vectorial, entre outras temáticas.
A intención da charla é asesorar aos asistentes a elexir a operadora e o contrato máis adecuados, así como defender os seus dereitos ante posibles disconformidades co servizo.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...