Poden as matemáticas, o cálculo avanzado, resolver os grandes retos científicos e empresariais do noso tempo? Sen dúbida poden, e o mellor de todo é que teñen un gran escenario onde demostralo, as redes, amais dunha materia prima inmellorable da que botar man: o que se coñece como datos a gran escala (Big Data). Para lucir posibilidades do cómputo e capacidade de resolución no ámbito da Industria 4.0, o Instituto Tecnolóxico de Matemática Industrial (ITMATI), en colaboración coa Rede Española Matemática-Industria (Math-in), organiza a 139ª European Study Group with Industry (139 ESGI).
Nesta xuntanza retarase a empresas de sectores punteiros como o petroquímico, o forestal, o enerxético e o siderúrxico a que formulen problemas industriais que un equipo de científicos e tecnólogos resolverá en cinco días. O encontro arrinca o luns 9 na Facultade de matemáticas e durará ata o día 13.
Entre as empresas que participan este ano figuran as coñecidas Repsol e ArcelorMittal e firmas de tamaño medio de sectores emerxentes como EcoMT e Biomasa Forestal. “Todas reciben asesoramento matemático para resolver necesidades estratéxicas”, explica a directora de ITMATI, Peregrina Quintela. Logo do traballo realizado ao longo das xornadas de ESGI as solucións atopadas serán a semente de proxectos de transferencia tecnolóxica.
Segundo informa a USC, os equipos de investigadores que se enfrontarán aos cinco retos estarán compostos sobre todo por estudantes de formación superior relacionados coas matemáticas, baixo a coordinación dun investigador senior.
Os ESGI, para quen non o saiba, son eventos itinerantes que se celebran de cinco a sete veces ao ano en distintas cidades europeas (entre as que se inclúen Oporto, Varsovia, Sofía, Utrecht, Manchester e Dublín) cunha duración dunha semana. En España xa tiveron lugar en Sevilla, Barcelona e Santiago de Compostela, que agora recibe o evento por cuarta vez.
Un dos piares temáticos desta edición compostelá será sen dúbida a Industria 4.0 e as súas diferentes modalidades e vertentes, unhas variantes que nos mergullan nunha transformación que o ITMATI di que non teñen precedentes. De cousas concretas como combinar a dixitalización de todos os procesos das empresas co uso de algoritmos avanzados para permitirlles identificar tendencias e comportamentos; tomar decisións máis sólidas; optimizar procesos; mellorar a calidade dos seus produtos; ou reducir custos, etc, falarase (e moito) no marco da semana ESGI de Santiago.
Entre as empresas que van estar presentes na actividade atópase a devandita Repsol, que certifica así a súa aposta polo papel das matemáticas como instrumento para desvelar o que permanece invisible. Desafíos que teñen o seus precedentes no descifrado das mensaxes que na Segunda Guerra Mundial enviaba internamente a armada alemá, mensaxes cifradas en orixe coa máquina Enigma e que cando se convertían en intelixibles, grazas á simulación numérica, xa era tarde de máis (xa mudaran as pautas levadas a cabo polo inimigo). Acelerar este tipo de procesos é o que expón Repsol nun dos retos que propón no 139 ESGI.
A Deputación de Pontevedra vai poñer en marcha unha aceleradora de empresas ao abeiro do proxecto TurisTIC, o programa da entidade provincial para dixitalizar o sector turístico (enmarcado no Plan Estratéxico de Turismo Rías Baixas e na rede de asesoramento SmartPEME para firmas, profesionais e autónomos de todas as comarcas). A palestra empresarial foi dada a coñecer por Carmela Silva, presidenta da Deputación, quen a presentou como “unha iniciativa pioneira para a adaptación do tecido turístico provincial ás novas tecnoloxías da comunicación”. A aceleradora, dixo, estará a disposición de cinco empresas e activarase de “xeito inmediato”
A presidenta da Deputación incidiu en que este proxecto vai dirixido “a persoas emprendedoras, empresarias e empresarios, persoas autónomas e profesionais e PEME da nosa provincia con interese en dar un forte impulso ao seu negocio turístico”. O obxectivo é “promover a innovación e o asentamento do talento e da creatividade na nosa provincia”, subliñou.
A aceleradora vai dispor dun programa de seguimento de cada un dos cinco proxectos; un asesor persoal do sector turístico que fará a monitoraxe e a dinamización; e formación en grupo especializada.
Todas as actuacións do Programa desenvolveranse despois entre o 16 de xullo e o 19 de outubro. Para Silva o eido turístico da provincia é “dos máis importantes e destacou que hai máis de 10.000 empresas dedicadas a esta actividade, o que representa o 34% do sector en Galicia”. E engadiu: “Pódese dicir que practicamente o 13% das empresas da provincia pertencen ao sector turístico con menos de dez traballadores e traballadoras con pouca aposta polas novas tecnoloxías”. Isto precisamente, esta falta de dixitalización (que frea a competitividade, a produtividade e a eficiencia das empresas), é o que se quere emendar co programa TurisTIC.
Polo xeral, os primeiros anos dunha startup son moi complicados, pero se encima o proxecto ten un compoñente social o seu futuro é, en moitos casos, aínda máis difícil. Por esta razón, a clave da supervivencia pode pasar por contar con aliados como a fundación Ship2B, que busca apoiar e impulsar a estas novas compañías tecnolóxicas.
A fundación xa colabora con importantes startups sociais que aplican a tecnoloxía para axudar a persoas con discapacidade e persoas maiores, como Blind Explorer, Rois Medical, Qrem ou Able.
Agora, a entidade está a buscar novas compañías sociais que impulsar e nas que investir, para o que abriu unha convocatoria que encara xa a súa recta final. As startups que estean interesadas poden presentar as súas candidaturas ata o 15 de xullo.
Os proxectos que resulten seleccionados terán acceso a asesoramento de profesionais expertos no sector, alianzas con grandes empresas e entidades, e a probabilidade de recibir un investimento inicial de ata 40.000 euros e optar a un total de 400.000 euros en roldas posteriores.
Ademais da convocatoria para startups sociais, denominada Tech4Social, a fundación tamén impulsa proxectos a través de Tech4Climate, centrados no medio ambiente, e Tech4Healthy, dirixidos a compañías de saúde.
Este tipo de axudas poden ser fundamentais para lograr o éxito de proxectos sociais nos que a tecnoloxía se pon ao servizo das necesidades de persoas con discapacidade e persoas maiores.
Os Premios da AEF recoñecen ás fundacións españolas que mellor representan os valores do sector no cumprimento dos fins de interese xeral. As outras tres fundacións recoñecidas foron: a Fundación Magdalena Moriche na categoría de "Iniciativa Filantrópica", a Fundación Biodiversidade do Ministerio da Transición Ecolóxica na categoría de "Colaboración" e a Fundación Adsis, na categoría de "Innovación Social".
O xurado foi o encargado de analizar e deliberar sobre as propostas recibidas. Formárono Antonio Garrigues, presidente da Fundación Garrigues, Avogados e Asesores Tributarios; Ana María Llopis, fundadora e conselleira delegada de Global ideas4all SL.; Rafael Matesanz, fundador da Organización Nacional de Transplantes e Premio Príncipe de Asturias; Teresa Perales, nadadora paralímpica; Araceli Pereda, presidenta da Asociación Hispania Nostra; Bieito Rubido, director do diario ABC; e Eva Saiz, subdirectora do diario El País.
Con relación á orixe dos Premios, o presidente da AEF, Javier Nadal, afirmou: "En 2016 puxemos en marcha os Premios AEF co fin de impulsar valores que marcasen o desenvolvemento da actividade das fundacións e, desta maneira, propiciar a eficacia no cumprimento dos fins de interese xeral, así como aumentar o seu impacto na vida dos cidadáns". A este respecto, continúa Nadal: "Sentímonos moi orgullosos dos premiados, pero tamén de todas as fundacións que presentaron proxectos de altísima calidade e ás que convidamos a seguir participando en próximas edicións".
A entrega dos premios realizarase no marco de Demos 2018: Foro de Fundacións e Sociedade Civil, un encontro que celebra a súa segunda edición o 26 de novembro nas sedes de MediaLab-Prado e Caixaforum Madrid. Os galardóns consistirán nun diploma e un símbolo artístico.
A Fundación Telefónica puxo en marcha en 2017 a estratexia global de Transformación Dixital co obxectivo de combinar intelixentemente a tecnoloxía dispoñible coa súa experiencia en acción social. Deste xeito, é posible conseguir un maior impacto social nos proxectos, ademais dunha maior eficiencia operativa e un incremento do beneficio e a capacidade de acción. Esta área estratéxica transversal envolve a toda a institución cun dobre alcance: un interno, en canto a transformación dos perfís, os procesos, as ferramentas de traballo que se utilizan, os sistemas e o ADN como organización; e, doutra banda, mirando cara a fóra, a través dos proxectos que achega á sociedade. Á súa vez, está estratexia está a aplicarse a todos os proxectos nas catro liñas de intervención onde actúa a Fundación Telefónica: educativos, de empregabilidade, de voluntariado corporativo e de arte e cultura dixital.
Grazas á Transformación Dixital, Fundación Telefónica está a evolucionar como organización cara a unha organización áxil, que realiza proxectos innovadores con persoas innovadoras, onde a tecnoloxía mellora a capacidade de achegar valor social, que toma decisións baseadas en datos e que aproveita as ferramentas tecnolóxicas para maximizar a eficiencia de procesos. O seu plan estratéxico baséase en tres alicerces principais: unha unidade de tecnoloxía e sistemas; unha unidade de innovación e dixitalización; e unha última de big data e analítica avanzada aplicada a todos os programas. Con estes tres alicerces e un forte compoñente de dixitalización, tanto de proxectos como de procesos e as persoas, conseguiuse este triplo impacto de máis eficiencia, máis impacto social e mellor posicionamento.
As actuacións en macha do Plan de Banda Larga da Xunta e do Estado garanten que máis de 330.000 galegos de 258 concellos, que carecen de acceso a redes ultrarrápidas, teñan cobertura de 100Mbps de velocidade no 2020. En total os plans autonómicos e estatais supoñen un investimento público de 35,2 millóns de euros para incentivar a extensión de fibra óptica en núcleos dun total de 258 concellos galegos que non dispoñen desta tecnoloxía nin previsión de contar con ela.
Ambas medias garanten que en 2020 o 96% dos concellos galegos teñan núcleos con acceso a redes de máis de 30 Mbps, fronte ao 71% de hoxe en día. Esta porcentaxe incrementarase coas novas convocatorias do Estado, a última foi publicada en abril por un importe de 18,5 millóns de euros, e prevese que se resolva este ano.
Así o sinalou onte a directora da Amtega, Mar Pereira, durante a súa comparecencia na Comisión 3ª do Parlamento galego.
A directora da Amtega lembrou o esforzo da Administración autonómica nos últimos oito anos para mellorar o acceso a internet en Galicia. En 2010 a prioridade era que toda Galicia tivese acceso a internet. Naquel momento só un 71% dos galegos dispoñía de cobertura. Conscientes desta situación e da gran importancia que as redes móbiles teñen nunha comunidade tan dispersa como Galicia, púxose en marcha Plan de Banda Larga de Galicia cun investimento público-privado de 230 millóns de euros, 75 dos cales os achegou a Administración autonómica.
Un dos obxectivos dese plan foi dotar de cobertura de 3 G a máis de 11.000 núcleos, que xunto cos despregamentos de tecnoloxías ASDL e Wimax conseguiron que a día de hoxe máis do 98% da poboación teña acceso a internet básico.
A extensión de redes 3 G do Plan foi a medida que máis contribuíu a incrementar a cobertura en Galicia. Esta tecnoloxía ofrece unhas velocidades de acceso á rede desde polo menos 2 Mbps ata os 21 Mbps e proporciona cobertura de telefonía móbil.
Ademais, o Plan esixe aos operadores que recibiron subvencións públicas para despregar infraestruturas, a prestación deste servizo durante 10 anos, garantindo a súa continuidade alí onde a demanda sexa baixa, e co compromiso de evolucionar a tecnoloxía
Respecto da fibra, o Plan foi pioneiro en Europa en impulsar desde a Administración pública a extensión de redes NGA`s. Concretamente esta medida do Plan posibilitou o acceso a redes de máis de 100 Mbps a case 200 núcleos de máis de 500 habitantes, fóra de ámbito urbano.
Esta última actuación contribuíu a que a día de hoxe o 63% dos galegos teña acceso a redes de 30 Mbps en diante a través de redes fixas. Agora o reto é incrementar esta porcentaxe, un obxectivo marcado por Europa.
Para conseguilo a Xunta puxo en marcha un novo Plan de Banda Larga horizonte 2020. As primeiras medidas do Plan dirixíronse a mellorar a conectividade no tecido empresarial coa extensión de fibra en polígonos e unha liña de axudas a empresas illadas. Este ano púxose en marcha outra medida para chegar a núcleos de poboación que xunto coas actuacións do Estado permitirán incrementar ata o 74% a porcentaxe de galegos con acceso a redes de máis de 30 Mbps. Unha porcentaxe que se incrementará con outras convocatorias estatais.
Por outra banda, o Estado ten pendente aprobar unha Orde ministerial polo que vai establecer obrigacións complementarias de cobertura de 30 Mbps aos operadores beneficiarios do primeiro dividendo dixital (Banda 800 Mhz). Isto vai obrigar a que os 3 operadores de LTE-800 (4 G móbil) conxuntamente dean cobertura de 30 Mbps ao 85% dos habitantes residentes en núcleos de menos de 5.000 habitantes de Galicia, antes do 1 de xaneiro de 2020.
Desde Galicia instouse a través dunha PNL, asinada por unanimidade no Parlamento galego, a que obrigasen aos operadores beneficiarios do primeiro dividendo dixital (Banda 800 Mhz) a cubrir o 90% dos habitantes residentes en núcleos de menos de 5.000 habitantes de Galicia (non só a nivel Estatal) e finalmente o Estado na proposta de orde puxo a obrigación de cubrir o 85% nas CCAA.
A Fundación TIC da Deputación de Lugo segue a poñer ao alcance da mocidade os seus recursos e experiencia en contidos dixitais. Diso precisamente trata o obradoiro de novas tecnoloxías que, ao abeiro do Campus de Verán Xuvenciencia Lugo 2018, desenvolveuse na cidade da Muralla. Para dar conta do curso e xuntarse cos participantes (130 alumnas e alumnos da ESO e Bacharelato), a actividade formativa recibiu onte a visita da deputada de Promoción Económica e Social, Sonsoles López Izquierdo, acompañada pola coordinadora do sexto Campus de Verán Xuvenciencia Lugo, Mercedes Novo Rodríguez. O obradoiro sobre contidos audiovisuais Como elaborar vídeos para Youtubecelebrouse nas instalacións da Escola de Imaxe e Son da Fundación TIC.
López Izquierdo salientou que “a Deputación de Lugo colabora coa Universidade de Santiago co plan de choque que facilita o financiamento deste Campus de Verán, ademais da colaboración da Fundación TIC, que gravará todo o evento e as distintas actividades dun programa moi diverso que hai para este ano”. Segundo fixo saber, “esta é unha oportunidade única para que o alumnado coñeza en vivo e en directo, con prácticas e obradoiros todo o relacionado coas titulacións científico-técnicas ou científicio-sociais do Campus Terra de Lugo”.
Un equipo de profesionais e bolseiros da TIC ofrecerá tamén apoio técnico e asesoramento ao alumnado para realizar os vídeos de presentación dos seus proxectos finais. A achega da Fundación TIC complementarase con reportaxes e un vídeo coa recompilación dos momentos máis salientables de Xuvenciencia, que se proxectará o día da clausura.
O presidente da Xunta, Alberto Núñez Feijóo, destacou a apertura hoxe mesmo do prazo para participar no programa das unidades formativas en empresas, “o programa de formación co que financiamos a formación á carta nos centros de traballo, é dicir, a formación para traballadores en activo ou desempregados adaptada ás necesidades de cada empresa”.
Durante o acto de entrega do XI Premio Liderado Empresarial da Confederación de Empresarios da Coruña, Feijóo aseverou que con estas unidades a Xunta e as empresas están a impulsar un modelo de colaboración público-privada para identificar conxuntamente cal é o emprego que vén, para que a industria galega dispoña de man de obra cualificada sen que se produza unha fenda xeracional pola irrupción das novas tecnoloxías.
Así mesmo, referiuse á innovación, á formación e á internacionalización como a fórmula da competitividade para adaptarse á Industria 4.0. E animou aos emprendedores a dar o salto dixital, diversificar as súas liñas de negocio e apostar pola innovación para estar presentes nun mercado cada vez máis global e en continua evolución.
Baixo este obxectivo, lembrou o compromiso do Goberno galego co impulso dun modelo económico que pase pola eliminación das trabas innecesarias aos emprendedores.
Nesta liña, salientou que Galicia segue reducindo o paro, a un ritmo do 10,33% entre xuño de 2017 e xuño de 2018, o maior descenso desde 1999; segue creando emprego, con máis de 26.600 afiliados á Seguridade Social por riba do ano pasado; e segue ampliando o mellor ciclo exportador da súa historia. E a economía galega segue medrando no seu conxunto e, por décimo trimestre consecutivo, faino a unha taxa igual ou superior ao 3% (no primeiro trimestre deste ano, un 3,1%).
Así mesmo, nos primeiros cinco meses do ano, a Comunidade galega é a autonomía onde máis medra a produción industrial: un 10,4 %, catro veces máis ca a media española. E o sector servizos consolídase como un dos motores da nosa economía.
Con respecto ao premio, Feijóo afirmou que demostra que a Marca Galicia destaca en sectores moi diversos como proba o galardoado José González Fuentes, cuxa traxectoria profesional á fronte do Grupo Luckia, ten demostrado esa capacidade para anticiparse ao cambio e interpretalo como unha oportunidade.
“O premiado pertence a ese grupo de persoas que fan que as cousas pasen: porque non está falto de iniciativa. Iniciativa para fundar o Grupo Luckia, que neste momento está entre as compañías líderes no sector do xogo en España; e para expandir este grupo, que dá emprego a máis de 2.500 persoas, ata América Latina, Portugal, Croacia ou Malta”, dixo.
SmartPEME, a rede de formación e asesoramento TIC impulsada pola Deputación de Pontevedra, vai ofrecer este mes de xullo (nas súas diferentes sedes) un completo feixe actividades de capacitación tecnolóxica para os profesionais, os traballadores, as PEME e os emprendedores locais. Trátase de 44 novas accións formativas sobre as máis variadas temáticas TIC. Os obradoiros celebraranse nas sedes de SmartPEME en Cambados (Centro Exposalnés), nos viveiros de empresas de Barro, Lalín e A Estrada e nas oficinas de Vigo, Ponteareas, Pontevedra e O Porriño. Por outra banda, o programa desenvolve este ano novas carteiras de servizos co obxectivo de “continuar axudando ás empresas a ser máis competitivas na contorna económica actual”.
As oficinas de SmartPEME da Deputación de Pontevedra en Vigo, Ponteareas e O Porriño acollerán durante o mes de xullo un total de 18 accións formativas (seis en cada unha delas) para “a adaptación das empresas e proxectos emprendedores da provincia ao novo escenario dixital no que desenvolver as súas actividades e aproveitar as ferramentas existentes co obxectivo de aumentar a súa competitividade”.
Na oficina de Vigo esta semana comezou o curso Aprende e usa a tipografía axeitada para comunicartee o Woocommerce: A solución que buscabas para vender por Internet. O curso Facebook Ads chegará o xoves 12. O seguinte martes 17 de xullo impartirase Imos chamar á porta da túa clientela: Posicionamento SEO. O xoves 19 de xullo será a quenda de Recursos e ferramentas TIC para o teu negocio, ás 19 h. Para rematar, o luns 23 de xullo á mesma hora, terá lugar o curso Como ser eficiente na organización do teu tempo: trello e toggl".
A oficina de Ponteareas acollerá os obradoiros: Como mellorar a reputación online do teu establecemento turístico, este xoves 5 ás 19:00 horas. A seguinte será Bota as túas propias fotografías para o comercio electrónico, o martes 10 á mesma hora. A ela seguiralle Todo o que necesitas saber sobre Google Apps for Business, o martes 17 ás 18:00 horas. Esa mesma semana, o xoves 19, ás 19:00 horas, impartirase o curso Como facer unha exitosa campaña de publicidade no Google?. A formación Crea unha páxina profesional con WordPress chegará o luns 23 de xullo, nesta ocasión ás 18:00 horas. Xa por último, o martes 31 de xullo, ás 19:00 horas, Google Analitycs: iniciación á analítica será a acción que impartirá o persoal do programa.
A oficina do Porriño acolle desde esta semana o curso Woocommerce: A solución que buscabas para vender por Internet" e o de Crea unha páxina profesional con Wordpress chegará o martes da semana seguinte, 10 de xullo. A acción Ferramentas de google para a promoción de negocios locais terá lugar o xoves 12 de xullo, ás 19:00 horas. O martes 17, á mesma hora, será a quenda de Como mellorar a reputación online do teu establecemento turístico. O xoves desa mesma semana, tamén ás 19:00 horas, impartirase o curso Crea un Plan de social media para a túa empresa turística". E, por último, o martes 31 de xullo á mesma hora terá lugar Aprende a xestionar o teu negocio con follas de cálculo.
Polo que se refire á oficina de SmartPEME na cidade de Pontevedra, situada no Edificio Administrativo da Deputación de Pontevedra (Gran Vía de Montero Ríos, s/n), acolle durante o mes de xullo un total de seis accións formativas para a adaptación das empresas e proxectos emprendedores da provincia ao novo escenario dixital. As quendas son as seguintes: Ferramentas de Google para a promoción de negocios locais que comezou o pasado luns e nesta mesma semana, o xoves 5 ás 18:00 horas, será a quenda de Aprende e usa a tipografía axeitada para comunicarte. O seguinte curso, Plataformas de comercialización para vivendas e apartamentos turísticos, impartirase o martes 10 de xullo ás 19:00 horas. A seguinte semana haberá dúas accións, a primeira o martes 17 ás 18:00 horas baixo o nome Crea unha páxina profesional con WordPress e, a seguinte, Optimiza a visibilidade da túa web con Google Search Console o xoves 19 de xullo ás 19:00 horas. Por último, o luns 23 xullo será a quenda deImos chamar á porta da túa clientela: Posicionamento SEO, ás 19:00 horas.
O Viveiro de Empresas do Polígono Lalín 2000 acollerá, durante este mes de xullo sete novos obradoiros ao abeiro da rede TIC impulsada pola Deputación de Pontevedra. A primeira cita do mes comezou este luns co curso A túa páxina web en menos de 90 minutos. Tras este primeiro obradoiro, o xoves 5 de xullo, ás 19:00 horas, impartirase Aprende a xestionar o teu negocio con follas de cálculo. O martes, 10 de xullo, ás 18:00 horas terá lugar Todo o que necesitas saber sobre Google Apps for Business. O xoves desa mesma semana, ás 19:00 horas, celebrarase o curso Xestión da túa empresa: Facturación e ferramentas integradas. Seguindo cos cursos do mes de xullo, o mércores 18 ás 19:00 horas terá lugar, esta vez no viveiro de empresas de A Estrada, Google Analytics: Iniciación á analítica Web. O luns da seguinte semana, 23 de xullo, ás 19:00 horas, celebrarase o cursoComercializa os teus servizos a través das redes sociais e, por último, o xoves desa mesma semana á mesma hora impartirase o obradoiro Facebook Marketing.
Pola súa banda, o Centro ExpoSalnés de Cambados acollerá durante todo o mes de xullo sete novos obradoiros ao abeiro de SmartPEME. As quendas para o mes de xullo son as seguintes: Crea unha páxina profesional con Wordpress. O martes, 10 de xullo, ás 19:00 horas, Aprende a xestionar o teu negocio con follas de cálculo. O xoves desa mesma semana, 12 de xullo, á mesma hora, levarase a cabo Plataformas online para crear o teu e-commerce. O martes 17 de xullo, tamén ás 19:00 horas, será a quenda de Xestión da túa empresa: Facturación e ferramentas integradas. O xoves desa mesma semana, á mesma hora, chega Guía de boas prácticas para redes sociais. A quenda do obradoiro Como mellorar a reputación online do teu establecemento turístico chega o xoves 26 de xullo, tamén ás 19:00 horas. Por último, Como facer unha exitosa campaña de publicidade no Google? chegará o martes 31 de xullo, á hora habitual, as 19:00 horas.
Polo que atinxe ao viveiro de empresas de Barro, situado no polígono, acolle durante este mes de xullo un total de seis accións formativas para a adaptación das empresas e proxectos emprendedores da provincia ao novo escenario dixital. A primeira cita do mes tivo celebrouse o pasado martes coa acción Linkedin: a túa rede de networking. Hoxe, 5 de xullo, ás 18:00 horas impártese O que necesitas saber sobre virtualización. O martes da semana que vén, 10 de xullo, ás 18:00 horas terá lugar Que é o IoT (Internet das Cousas). O xoves desa mesma semana, ás 19:00 horas, levarase a cabo Ciberseguridade, protexe a túa privacidade en liña. O obradoiro Introdución aos sistemas embebidos terá lugar o martes 17 de xullo ás 19:00 horas. Por último, Introdución á Realidade Aumentada impartirase o luns 23 de xullo ás 19:00.
Todas aquelas persoas interesadas en acudir a estes obradoiros, destinados a persoas emprendedoras, autónomas e autónomos e ás PEME da provincia é de inscrición cen por cen de balde, poden apuntarse chamando ao teléfono 886 202 020, escribindo un correo electrónico a info.smartpeme@depo.es ou a través da páxina web www.smartpeme.depo.es.
Novidades deste ano ao abeiro de SmartPEME
A Deputación de Pontevedra lembra que o proxecto SmartPEME comezou en 2018 afrontando unha nova etapa na súa andaina, un novo treito no que o programa verá aumentados os servizos a fornecer, abrindo tres novas grandes liñas como son o Centro Provincial de Economía Dixital (CPED), que estará situado no viveiro de empresas de Barro, SmartPEME Impulsa e TurisTIC, que se irán facendo dispoñibles para as persoas autónomas e empresas a partir dos vindeiros meses.
A través do Centro Provincial de Economía Dixital vaise mostrar ás empresas as ferramentas, aplicacións e solucións innovadoras máis relevantes que a economía dixital ofrece. Para iso, o CPED apoiarase nas instalacións do FabLab que a Deputación de Pontevedra ten instalado no viveiro de Barro.
Doutra banda, SmartPEME Impulsa abrirá novas vías de asesoramento en materia de innovación, competitividade e internacionalización, “unindo deste xeito os obxectivos das empresas coas máis novas tecnoloxías, procesos e servizos”, explica a Deputación, engadindo que TurisTIC, como indica o seu nome, presentarase como “un punto de apoio tecnolóxico para o o sector turístico”. Trátase dun servizo enmarcado no Plan Estratéxico de Turismo Rías Baixas e que pretende potenciar o sector a través de axudas ás empresas para adaptarse á contorna dixital.
A XVII edición de Mundos Digitales arrincou esta mañá coa conferencia A tecnoloxía que se utiliza nas películas de animación, ofrecida por Rajesh Sharma, director de tecnoloxía de Walt Disney Animation Studios e coa visita da conselleira de Medio Ambiente e Ordenación Territorial, Beatriz Mato, que percorreu as instalacións de PALEXCO acompañada do director de Mundos Digitales, Manuel Meijide.
No relatorio de apertura, Rajesh Sharma explicou de primeira man todos os procesos necesarios para crear unha película de animación, destacando que tras un bo traballo agóchase a implicación dunha gran cantidade de departamentos e tecnoloxías. «O software que empregamos chega a ser tan específico que mesmo utilizamos un programa concreto para realizar a vexetación e outro para recrear o mar», indicou Rajesh.
O responsable de Disney destacou que o avance das novas tecnoloxías permitiu que o número de horas empregadas en crear a animación reducíronse notablemente en os dous anos que pasaron desde Moana (2016) ata a súa vindeira estrea Ralph rompe Internet. Sharma tamén falou de a relación entre Pixar e Disney. «Trátase de dous estudos cun background moi diferente, pero os métodos de ilustración tradicional empregados por Disney e as últimas técnicas de renderización de Pixar compleméntanse e compartimos tecnoloxía», dixo, Sharma, que pechou a súa conferencia convidando aos asistentes a que envíen o seu portfolio aos estudios Disney, sempre dispostos a contratar talento para cubrir postos en varios departamentos.
Esta primeira xornada tamén contou con Craig Caldwell, profesor de Science Technology and Research da Universidade de Utah e con experiencia como especialista de tecnoloxía en películas como Mulan, Tarzán ou Chicken Little. O seu relatorio xirou ao redor da procura dos elementos necesarios para construír unha historia que enganche á audiencia e como as técnicas de animación pódense empregar para acadar tal meta e sinalou as diferenzas que xorden entre distintos tipos de contidos dixitais: «Nas películas de animación, a historia é o primeiro, mentres que nos vieojuegos o máis importante é o flow, a xogabilidade e a historia pasa a un segundo plano.
Por último, na realidade virtual o importante é a experiencia, e podemos chegar a expornos se é necesaria unha historia», sinalou. Ademais, explicou que un bo animador para cinema non é o que emprega as mellores técnicas senón o que é quen de dar vida aos personaxes e a historia dunha maneira coherente: «O propósito de crear calquera historia é conectar coa audiencia», indicou Caldwell.
Así mesmo presentouse a película 2001 destellos de oscuridad da man do seu director, Pedro González Bermúdez e do cofundador de Illusorium Studios, Raúl Rocha. O filme recrea a entrevista de Kubrick para Playboy en 1968, unha das poucas que concedeu o director a raíz da estrea de 2001: Unha Odisea do Espazo. Daquela entrevista non quedou material filmado, pero esta produción reconstrúe aquel encontro a través de diferentes técnicas de animación. Tampouco sobreviviu a gravación de audio e a voz que pronuncia as respostas de Kubrick é a do actor Keir Dullea, o mítico doutor Bowman de 2001.
Pedro González sinalou a importancia de coidar até o máis mínimo detalle neste sector: «O público e os medios sempre van xulgarte por o teu peor traballo». Dos detalles tamén falou Raúl Rocha, que subliñou a importancia da iluminación no proceso de produción desta curta, onde tras renderizar cada escena engadían novos detalles de luz. Ambos subliñaron que a animación no xénero documental non é moi común, pero que ofrece grandes recursos narrativos para chegar ao espectador e debullou as técnicas e o material empregado: impresión 3D, slow motion, animación 2D e arquivos da NASA.
Na sesión de tarde ofreceuse a conferencia de Sebastian Sylwan, pertencente a Felix & Paul Studios, a empresa líder na industria do lecer inmersivo de alta calidade e creador de innovadoras experiencias cinematográficas orixinais e colaboracións con franquías existentes (Jurassic World, Cirque du Soleil, Fox Searchlight’s Wild) e personalidades e líderes de renome mundial (Barack e Michelle Obama, LeBron James, Bill Clinton).
Pola súa banda, os membros de Entropy Studio amosaron ao público as potencialidades que ofrecen as aplicacións en tempo real á realidade virtual.
Pechou a primeira xornada a conferencia de Carlos Baena, premio especial desta XVII edición de Mundos Digitales. Baena, responsable de a animación de películas xa clásicas como Buscando a Nemo, Los Increibles, Cars, Ratatouille, WALL-E e Toy Story 3, abordará algúns dos profundos cambios que se están producindo na industria, como a posibilidade de colaboración en liña entre creadores de todo o mundo.
Así mesmo, comezou a Feira de Emprego, a segunda máis importante de Europa do sector, na que este ano aumentaron o número de compañías na procura de talento para as súas producións. Os asistentes a Mundos Digitales tamén puideron participar en varios obradoiros e workflows e en o concurso Quen sabe máis de MD?, patrocinado por CICE.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...