• Fabiola García manifestou que este evento “é un punto de referencia para a mocidade de dentro e fóra de Galicia”, e destacou que “é un marco axeitado para achegarse ás novas tecnoloxías e potenciar a formación neste eido”
• Pola súa banda, a directora da Amtega, Mar Pereira, destacou a importancia de fomentar o atractivo das vocacións STEM entre os máis novos e lembra posta en marcha do Plan DigiTalent en colaboración co sector TIC

A conselleira de Política Social, Fabiola García Martínez, visitou esta mañá a décimo oitava edición de Xuventude Galicia Net (XGN) R Encounter, que desde hoxe e ata o vindeiro domingo se celebra na Feira Internacional de Galicia. A directora xeral de Xuventude, Participación e Voluntariado, Cecilia Vázquez Suárez, e a directora da Axencia para a Modernización Tecnolóxica de Galicia (Amtega), María del Mar Pereira Álvarez, acompañaron á conselleira no percorrido polas instalacións.

Fabiola García manifestou que XGN R Encounter se ten convertido “nun punto de referencia para a mocidade de dentro e de fóra de Galicia”, ao tempo que apuntou que “é un marco axeitado para achegarse ás novas tecnoloxías e potenciar a formación neste eido desde a base da interacción e o intercambio de experiencias”. Máis de 800 persoas están inscritas neste encontro informático que está considerado como o segundo máis importante de España e que presenta unha variada oferta de actividades lúdicas e formativas: xogos, conferencias, obradoiros e experiencias de realidade virtual, entre outras.

Así mesmo, a conselleira destacou que o certame ten un espazo sobre robótica dirixido aos nenos e nenas para iniciarse na montaxe e manexo destes enxeños electrónicos e levará a cabo charlas dirixidas a educadores, pais e avós que non naceron na era dixital pero que conviven coas actuais xeracións de nativos tecnolóxicos. Ambas propostas enmárcanse no programa Digitalent da Amtega. “Avanzamos cara unha sociedade cada vez con maior presenza das tecnoloxías, polo que debemos educarmos e formarmos para vivir nela”, apuntou.

Ademais, a titular de Política Social fixo fincapé en que XGN R Encounter “fomenta valores positivos para a xuventude, como son a participación, a formación, a innovación e o espírito emprendedor”, concluíndo que durante esta fin de semana “Galicia é o epicentro das novas tecnoloxías e da informática con este encontro que conxuga innovación, formación e lecer”.

Pola súa banda, Mar Pereira, sinalou que desde a Amtega en colaboración con R achegan a XGN R Encounter dúas iniciativas do Plan DigiTalent para impulsar as vocacións tecnolóxicas entre os máis novos CreaR e NativosR, para achegar dunha forma lúdica a tecnoloxía aos máis novos e tamén aos maiores, pais e nais.

Pereira fixo fincapé en que é importante desbotar o mito de que os nativos dixitais teñen competencias en tecnoloxía so por ter nacido no actual contexto dixital e mostrarlles tamén as múltiples aplicacións profesionais que ofrece o ámbito tecnolóxico. Neste sentido lembrou que en Galicia só o 9,3% dos matriculados no sistema universitario cursa carreiras do ámbito STEM. Unhas cifras que contrastan coa alta empregabilidade do sector tecnolóxico galego con preto de 17.000 en 2017.

Desde hoxe e ata o vindeiro domingo a previsión é que máis de 1500 persoas acudan ao recinto feiral de Silleda para desfrutar dalgunha das múltiples actividades programadas nesta nova edición do XGN R Encounter, con máis dunha ducia de torneos de videoxogos, nove competicións de arte dixital, robótica, realidade virtual ou drones, entre outras alternativas de ocio e formativas.

O certame conta cunha zona denominada Intranet, orientada aos máis de 800 inscritos, onde desfrutan dun posto con dereito a acampar no interior do pavillón e tamén a participar en numerosas actividades e torneos exclusivos. Tamén hai unha zona coñecida como Extranet, cun completo programa ao que poden acceder gratuitamente tanto os inscritos como os visitantes que se acheguen a Silleda.

• O Centro de Innovación e Servizos de Galicia acolleu hoxe a presentación das iniciativas desenvoltas na última convocatoria da aceleradora, na que colaboran o Igape a Consellería de Economía, Emprego e Industria e a Escola de Organización Industrial (EOI)
• O delegado territorial da Xunta na Coruña, Ovidio Rodeiro, destacou a relevancia para o desenvolvemento territorial deste espazo coworking, no que se levan acelerados 62 proxectos
• Os novos empresarios, que contaron con asesoramento especializado e titoría personalizada, poden seguir apoiándose nos servizos e liñas de axuda ao emprendemento que a Xunta ten activados

As instalacións do Centro de Innovación e Servizos de Galicia (CIS) en Ferrol acolleu hoxe a presentación dos proxectos acelerados na terceira edición do coworking impulsado pola Consellería de Economía, Emprego e Industria, a través do Igape, e a Escola de Organización Industrial (EOI), na que se achegou formación e asesoramento para o desenvolvemento dun total de 21 iniciativas.

Os 25 emprendedores que desenvolveron os proxectos empresariais neste espazo coworking, no que recibiron asesoramento á medida sobre a posta en marcha das súas iniciativas, optaron por diferentes ámbitos de actividade, como os servizos técnicos apoiados nas TIC, os relacionados coa valorización de recursos do territorio, como o turismo ou os produtos agroalimentarios, a industria da saúde, o sector da moda e o asesoramento xurídico e empresarial, entre outros.

O delegado territorial da Xunta destacou que “nas tres convocatorias da aceleradora de Ferrolterra participaron un total de 66 emprendedores con 62 proxectos. Na actual edición, case a metade dos participantes xa iniciou a súa actividade como empresa, e o resto comezarana no último trimestre deste ano ou están en fase de validación das iniciativas”. Neste sentido, engadiu que o obxectivo destes espazos de emprendemento é “axudar a madurar e a pulir as ideas de negocio e procuramos darlles as claves para saír ao mercado con recursos e motivación”.

Esta aceleradora, na que nas dúas edicións anteriores se apoiaron 41 iniciativas emprendedoras, forma parte da rede de espazos creada pola Conselleira de Economía, Emprego e Industria, a través do Igape e en colaboración coa Escola de Organización Industrial (EOI). Cofinanciada polo Fondo Social Europeo (FSE), a rede ten como obxectivo favorecer o desenvolvemento de proxectos empresariais e a creación de emprego sobre o territorio.

Nestes días finalizaron tamén as accións de formación e asesoramento das últimas edicións dos espazos coworking de Celanova-Terras da Limia, Ribeira Sacra, Costa da Morte, Mariña lucense e Ferrolterra, nas que, en conxunto, se apoiaron 130 novos proxectos de emprendemento. Desde o comezo da súa actividade e ata finais de 2018, estas iniciativas terán impulsado un total de 440 proxectos de 540 emprendedores.

Os novos empresarios poderán seguir contando cos servizos e os instrumentos de apoio que ofrece a Consellería de Economía, Emprego e Industria para facilitar a posta en marcha e a consolidación temperá das novas empresas. Deste xeito, poderán continuar accedendo ao asesoramento especializado ou titoría que precisen, así como a préstamos directos como os activados no novo programa de instrumentos financeiros innovadores (IFIs) para financiar os seus investimentos.