Os medios de comunicación son moi importantes para a cohesión da sociedade e para que esta se manteña informada, por esta razón é fundamental que estas vías de comunicación sexan accesibles para todas as persoas, e para iso a tecnoloxía é clave.
Por esta razón, o Real Padroado sobre Discapacidade, a través do Centro Español de Subtitulado e a Audiodescripción (CESyA), organizarán esta semana a IX edición do Congreso Amadis sobre accesibilidade nos medios audiovisuais para persoas con discapacidade.
Nestas xornadas tamén participan a Universidade Carlos III e a Comisión Nacional dos Mercados e a Competencia (CNMC), e celébranse na sede da CNMC o luns 8 e o martes 9 de outubro.
Debido á súa importancia para lograr a accesibilidade dos medios audiovisuais, a tecnoloxía terá un papel moi relevante nestas xornadas. Non en balde, o CESyA é o responsable do desenvolvemento da tecnoloxía que permite a case perfecta sincronización dos subtítulos en emisións en directo, a audiodescrición de obras nos museos ou a accesibilidade de obras de teatro e do cinema.
O congreso desenvolverase en formatos de mesas redondas nas que se tratarán temas como as tecnoloxías de accesibilidade na televisión e outros ámbitos culturais.
Outro dos temas que se tratarán nestas xornadas será a formación en accesibilidade e a tecnoloxía que fai que os medios sexan accesibles para persoas con discapacidade sensorial.
Unha alianza entre o Teatro Nacional do Reino Unido e a firma Accenture, propiciou a creación dun servizo que podería mellorar a experiencia das persoas con discapacidade auditiva ao presenciar unha obra de teatro. Neste sentido, foi anunciado un dispositivo que ofrece unha maneira efectiva de mostrar subtítulos dos diálogos que se desenvolven no escenario para os membros da audiencia con esta condición.
Trátase dunhas lentes intelixentes que serán ofrecidas gratuitamente aos asistentes das producións de teatro War Horse ou Hadestown, e posteriormente despregaranse en todas as obras de teatro a estrearse en 2019.
Esta tecnoloxía xa foi probada durante un ano, e o Teatro Nacional ofreceu as súas primeiras presentacións coas 'lentes de subtítulos' durante as últimas semanas.
Desta forma, as persoas con discapacidade auditiva contarán cunha experiencia máis envolvente ao asistir ao teatro, xa que non deberán prestar tanta atención aos xestos e os movementos das beizos dos actores para determinar o que están a dicir.
Segundo o anuncio, basta con colocarse as lentes e mostraranse as palabras de cada diálogo. Isto ocorre grazas a que as lentes intelixentes contan con conectividade Wi-Fi, ademais dun software que está guiado polos cambios de iluminación e posición dos actores no escenario para garantir que os subtítulos aparezan no momento indicado.
O único aspecto desfavorable desta tecnoloxía é o seu custo de produción: US$ 1,000 por unidade. Isto evitou que o Teatro Nacional do Reino Unido poida desenvolver en maior medida este dispositivo. Por esta razón, apenas contan con 50 unidades, pero a organización confía en que proximamente establecerán novas alianzas a fin de levar estas lentes a máis persoas no teatro.
Pola súa banda, Jonathan Suffolk, director técnico da organización, asegurou a The New York Times que, ademais do seu uso para os subtítulos, as lentes poderían ser utilizadas para agregar efectos especiais con realidade aumentada, realizar traducións ou mesmo revisar a conta de Twitter en tempo real.
Ligazón á noticia na web: www.tekcrispy.com.
Estas oficinas créanse para desenvolver un ecosistema de apoio para as pemes no seu proceso de transformación dixital. As seleccionadas son principalmente asociacións ou colexios profesionais que prestan servizo dentro do ámbito de actividade ao que se van a dirixir, debendo enmarcar as actuacións de difusión nesta área.
As entidades colaboradoras abarcan sectores tan diversos como telecomunicacións, turismo, industria manufactureira, enerxía ou construción entre outros. Cada OTD recibirá unha axuda de entre 100.000 e 200.000 euros e cada organización terá que achegar, polo menos, o 20% do orzamento subvencionable. A convocatoría tiña un orzamento total de cinco millóns de euros confinanciados polo Fondo Europeo de Desenvolvemento Rexional (FEDER).
As 27 OTDs integraranse nas instalacións das entidades beneficiarias e os servizos que ofrecerán van desde a difusión, accións de sensibilización e dinamización nos procesos de transformación dixital ata outros de apoio como a atención e a resolución de consultas sobre as solucións e metodoloxías para mellorar a xestión no uso das TIC.
Andalucía contará con sete oficinas, a Comunidade Valenciana con tres, Canarias e Galicia terán dúas cada unha, e o resto repártense entre Aragón, Asturias, Cantabria, Castela e León, Castela-A Mancha, Cataluña, Estremadura, Baleares, A Rioxa, Madrid, Murcia, Navarra e o País Vasco, onde se situará unha OTD en cada comunidade.
Segundo Red.es, esta iniciativa permitirá ás empresas mellorar e optimizar os seus procesos e, con iso, a súa produtividade e competitividade. Ademais, contribuirá á prestación de servizos de difusión para o impulso do emprendemento dixital.
Este proxecto está coordinado por Red.es e executarase en paralelo ao Programa de Axudas 'Asesores Dixitais', dotado con outros cinco millóns de euros en axudas a través do mesmo tipo de Fondos Europeos co obxectivo de realizar Plans de Dixitalización que axuden ás pemes para incorporar as TIC nos seus procesos (xestión do negocio, relación con terceiros, comercio electrónico e dixitalización de servizos e solucións) e estímase que poida beneficiar a máis dun milleiro de empresas de todos os sectores produtivos.
O conselleiro de Economía, Emprego e Industria, Francisco Conde, asegurou o venres en Santiago de Compostela, durante a clausura dunha xornada sobre os hubs de innovación dixital organizadas pola Xunta, que serán un instrumento estratéxico capaz de impulsar os principais sectores económicos de Galicia.
O obxectivo da xornada era presentar o modelo de hubs que Galicia vai apoiar e dar a oportunidade de expoñer os seus proxectos a todos os axentes do sistema galego de innovación que presentaron as súas manifestacións de interese. Neste sentido, as oito propostas estaban enfocadas cara a Industria 4.0 e o sector bio, dous eidos nos que Galicia conta cun gran potencial e unha importante oportunidade para competir nos mercados globais.
Conde avanzou que nas próximas semanas se publicará a convocatoria para desenvolver os primeiros hubs co obxectivo de resolvela antes de que finalice o ano e explicou que se valorará especialmente a súa contribución ao avance da Estratexia de especialización intelixente de Galicia (RIS 3). Os proxectos seleccionados contarán cun recoñecemento da administración que lles permitirá acceder aos apoios rexionais que se poñan en marcha e a formación e acompañamento por unha consultora especializada.
O obxectivo deste novo instrumento é consolidar proxectos sostibles que sitúen Galicia no primeiro plano da innovación permitindo que as novas tecnoloxías innovadoras cheguen a todas as empresas e se sumen á 4ª revolución industrial. Neste sentido, incidiu en que en tan só dez anos, 3 de cada 5 pemes desaparecerán se non se incorporan ao proceso de dixitalización polo que é fundamental apostar pola innovación e a Fábrica Intelixente.
Así, lembrou a importancia de que Administración, coñecemento e industria traballen xuntos: “O hub será un instrumento clave para conseguir que o coñecemento dea resposta ás necesidades do tecido produtivo. Este marcará os retos e o sistema de innovación dará as respostas para incorporar as novas tecnoloxías nas estratexias das pemes”, afirmou.
Un total de 450 alumnos de 23 centros públicos de toda Galicia participarán durante este outono na segunda Semana STEM, un campamento de innovación educativa na que os rapaces de 5º e 6º de Primaria e de 1º e 2º de ESO ampliarán os seus coñecementos científico-tecnolóxicos a través de estadías en réxime de internado.
Esta iniciativa, enmarcada dentro da Estratexia galega para a educación dixital (Edudixital 2020), arrancou de xeito pioneiro por primeira vez o curso pasado (daquela con 300 alumnos e 15 centros) co obxectivo de fomentar o espírito científico e tecnolóxico entre o alumnado galego.
As estadías realízanse en períodos semanais dende domingo pola tarde ata o sábado seguinte; e a primeira delas arranca o próximo domingo día 14 con 50 rapaces de tres colexios.
Do total de centros seleccionados (que poden consultarse no portal educativo http://www.edu.xunta.gal/portal/node/25235), 11 corresponden á provincia da Coruña, 3 á de Lugo, 2 á de Ourense e 7 á de Pontevedra. No caso da Coruña trátase dos CEIP Plurilingüe San Marcos (Abegondo), CEIP de Prácticas López Ferreiro (Santiago), CPI Plurilingüe Virxe da Cela (Monfero), CPI San Sadurniño (San Sadurniño), CPI As Revoltas (Cabana de Bergantiños), IES Eduardo Pondal (Ponteceso), CPI de Atios (Valdoviño), IES Urbano Lugrís (Malpica), IES Campo de San Alberto (Noia), IES de Brión (Brión) e IES Plurilingüe A Cachada (Boiro).
Na provincia de Lugo foron seleccionados o CEIP Plurilingüe Santa Rita (Viveiro), o CEIP de Cervo (Cervo) e o CPI de Castroverde. En Ourense participará nestas estadías o alumnado do CEIP Ramón Otero Pedrayo (O Barco de Valdeorras) e o CEIP Plurilingüe Ben-Cho-Shey (Pereiro de Aguiar).
En Pontevedra resultaron seleccionados o CEIP A Carballeira (Pontevedra), CEIP Plurilingüe número 1 de Tui (Tui), CEP Carlos Casares (Salvaterra do Miño), CEIP Plurilingüe de Carballedo (Cerdedo-Cotobade), CEIP de Rubiáns (Vilagarcía de Arousa), CEIP da Sobrada (Tomiño) e o IES Laxeiro (Lalín).
A Semana STEM axudará a reforzar os coñecementos científico-tecnolóxicos no eido educativo, necesarios para dar resposta aos desafíos profesionais do futuro. Deste xeito, as estadías proporcionarán ao alumnado galego un escenario propicio para desenvolver capacidades, coñecementos e técnicas, a través dunha invitación ao descubrimento, que aumenten o seu interese por saber, cada vez máis, sobre diversos campos da ciencia e as súas posibilidades de aplicación na tecnoloxía.
As actividades non só serán académicas, senón tamén de carácter lúdico-recreativo, que servirán de reforzo ao programa ordinario do currículo do alumnado nas aulas. Os contidos dos cursos inclúen un programa de actividades académicas, de obradoiros, de tempo libre e deportivas. En calquera caso, a finalidade do programa é promover a convivencia entre o alumnado, o traballo en equipo, o aprender facendo mediante un enfoque “maker”, a creatividade e a motivación para mellorar a súas competencias STEM.
A Axencia para a Modernización Tecnolóxica de Galicia (Amtega) lanza o programa “Destino: Peme Dixital”, un itinerario formativo deseñado para que pemes, micropemes e autónomos coñezan as ferramentas e recursos para liderar a súa transformación dixital e mellorar a súa proxección de futuro. Un proxecto estratéxico que se presentará o mércores, 10 de outubro, nunha xornada informativa e de networking que terá lugar no Auditorio da Biblioteca da Cidade da Cultura de Santiago de Compostela.
O experto en innovación e transformación dixital, Juan Luís Polo, será o encargado de ofrecer o relatorio principal. Profesor do Instituto de Empresa Business School, socio fundador da axencia Good Rebels, Polo impartirá unha conferencia titulada “Achegándonos ao Universo dixital”. Unha mensaxe inspiradora centrada nas características da nova sociedade conectada, coas claves necesarias para entender como a transformación dixital impacta na xestión de equipos e organizacións.
Casos de éxito de empresas locais
Así mesmo, catro empresas galegas que actualmente xa están inmersas neste proceso de dixitalización, expoñerán as súas experiencias neste proceso. Casos de éxito reais e próximos como exemplo para outros empresarios e unha boa oportunidade para compartir inquietudes, dúbidas, problemas e expor solucións nunha contorna creativa e colaborativa con empresas similares entre si.
Ao longo da mañá informarase tamén aos asistentes das distintas accións que conforman o programa “Destino: PemeDixital”. Unhas novas e outras, como o Acelera-Tic na súa xa terceira edición, que volve, renovado, cun novo formato para adaptarse ás necesidades e inquietudes detectadas entre os profesionais galegos.
Aforamento limitado
O prazo de inscrición para a xornada formativa permanece aberto. Os interesados poden xestionar a súa solicitude a través da web do CDTIC https://cdtic.xunta.gal/es/pemedixital. A asistencia é gratuíta e o aforamento limitado. As solicitudes atenderanse por rigorosa orde de chegada
O vindeiro 10 de outubro terá lugar na Cidade da Cultura #IURISTICGAL18, a VIII Xornada de Informática Xudicial que organiza o Colexio Profesional de Enxeñaría Técnica en Informática en colaboración coa Axencia para a Modernización Tecnolóxica de Galicia, (Amtega).
Nesta VIII edición a xornada leva como título Privacidade, blockchain e ciberseguridade e os seus contidos, estruturados en catro relatorios e unha mesa redonda, están orientados a afondar na nova realidade tecnolóxica derivada do blockchain e nos conceptos de privacidade e ciberseguridade, analizando as súas implicacións xurídicas.
A sesión abordará, entre outros temas de actualidade, as consecuencias da irrupción das criptomoedas, con centos de moedas virtuais no mercado baseadas nesta tecnoloxía que mobilizan millóns de euros diariamente, no que representa unha das maiores revolucións tecnolóxicas recentes..
Para presentar unha visión integral do entorno, #IURISTICGAL18 reunirá un panel de expertos nas distintas materias. Santiago Márquez Solís, CTO en Clluc e autor do libro “Bitcoin: guía completa de la moneda del futuro”, ofrecerá o relatorio “Blockchain e a lei”. Luis de Salvador Carrasco, subdirector xeral adxunto da Inspección de Datos da AEPD, falará de “Privacidade e dereitos fundamentais na Sociedade da Información”. Silvia Barrera, inspectora da UIT da Policía Nacional, intervirá sobre “Investigación de ciberdelitos nun mundo dixital”, completándose o panel de relatores con Eloy Velasco, maxistrado da Audiencia Nacional, e a súa intervención “Efectividade na persecución dixital de delitos e a súa validez probatoria. ¿É suficiente? ¿Como podemos mellorar?”
A xornada rematará coa mesa redonda: “Quo vadis seguridade TIC-xurídica?”, moderada por Víctor Salgado, avogado TIC e director técnico de IURISTICGAL18. Finalmente, unha comida networking, á que asistirán os relatores e o público participante, poñerá fin á xornada.
Dotar de maior seguridade xurídica a realidade tecnolóxica
O obxectivo de #IURISTICGAL18 é contribuír a dotar de maior seguridade xurídica á nova realidade tecnolóxica e incrementar a efectividade e a eficiencia da administración xudicial e dos profesionais da xustiza, mediante o uso das ferramentas electrónicas e forenses avanzadas. Con esta perspectiva, a xornada está dirixida a xuíces, maxistrados, secretarios xudiciais, fiscais, avogados, peritos e xuristas en xeral.
Toda a información e formalización de inscricións en http://iuristicgal.cpetig.gal
A Xunta de Galicia dá un paso máis no seu compromiso co impulso á modernización e a innovación tecnolóxica do tecido empresarial galego, poñendo en marcha unha nova edición de Reacciona TIC dentro Programa Reacciona. A iniciativa, froito da colaboración entre a Axencia para a Modernización Tecnolóxica de Galicia (Amtega) e o IGAPE ofrecerá ás pemes galegas un catálogo unificado de servizos a prezos reducidos orientados a mellorar a súa competitividade a través do aspecto operativo, estratéxico ou de incorporación de tecnoloxía.
Esta nova edición do programa Reacciona, que conta cun orzamento conxunto de máis de 4,6 millóns de euros ata o ano 2020, introduce como principais novidades a incorporación de servizos vinculados a actividades de innovación e aos relacionados coas novas tendencias dixitais como as solucións baseadas nos contidos dixitais, a ciberseguridade ou as solucións en mobilidade.
Servizos de Dixitalización
Nesta edición o Reacciona TIC ofrece servizos orientados a promover a dixitalización empresarial, comezando pola análise do grao de modernización tecnolóxica e identificación de oportunidades de mellora, resultando na definición da estratexia dixital cara á incorporación de novas solucións dixitais e tendencias tecnolóxicas (cloud, Big Data, social media, etc.).
Ademais as pemes tamén terán acceso a servizos de soporte para a definición e implantación dunha estratexia corporativa para xestionar a ciberseguridade de maneira eficiente e a posta en marcha de medidas de protección; ou para implantar de solucións dixitais innovadoras en mobilidade capaces de agregar valor ás actividades operacionais e de xestión empresarial.
Doutra banda, converxendo cos obxectivos do DICO Mindset (Plan de acción para o impulso aos contidos dixitais en Galicia), ofertaranse servizos para a posta en marcha de proxectos ás novas tendencias tecnolóxicas ligadas ao sector dos contidos dixitais.
En concreto, prestarase un servizo de apoio á adopción de solucións innovadoras con base nos contidos dixitais (realidade virtual, realidade aumentadas, a gamificación ou os serious games) que permitan ás empresas transformar os modelos de xeración de produtos e/ou servizos, así como agregar valor aos procesos de deseño e/ou produción, aos produtos ou aos servizos resultantes. É un servizo para o deseño dunha estratexia de marketing de contidos orientada á mellora da relación empresa-consumidor con respostas personalizadas (vídeo-marketing, mail-marketing, infografías, realidade virtual, xogos dixitais, etc.).
Marco de referencia estratéxico
A Axenda Dixital de Galicia 2020, liderada pola Amtega, que establece como unha das súas liñas estratéxicas a ‘Aceleración da Economía Dixital’ co fin de promover o liderado de empresas que a través da incorporación das TIC, tanto nos procesos internos como de negocio, garantan a creación e absorción de talento e innovación para xerar novas oportunidades e promover así a atracción e o crecemento económico na Comunidade
Ademais esta actuación tamén se aliña coa Axenda da Competitividade Galicia – Industria 4.0, liderada pola Consellería de Economía, Emprego e Industria, que aspira a modernizar a industria galega a través da innovación, establecendo novas fórmulas de produción que melloren a súa competitividade impulsando a fabricación de produtos diferenciados e de calidade.
O presidente do Goberno galego, Alberto Núñez Feijóo, avanzou hoxe a posta en marcha da 1ª edición do Plan de Promoción do Talento Dixital de Galicia co obxectivo de reducir a fenda entre a dispoñibilidade de traballadores con competencias dixitais e a crecente demanda destes perfís no mercado laboral.
Segundo sinalou o presidente, o dito plan engloba 30 iniciativas con máis de 2.500 prazas en tres eixos de actuación: o impulso das vocacións STEM, a promoción da adaptación aos novos perfís dixitais e a formación de E-líders para a transformación dixital.
Con respecto ao primeiro eixo, Feijóo explicou que é necesario fomentar o atractivo vocacional das profesións científico-tecnolóxicas entre os máis mozos e mozas dado que, aínda que a metade do alumnado cursa no bacharelato a rama de ciencia e tecnoloxía, a meirande parte deles non se matricula posteriormente en carreiras STEM. Será a través do impulso de doce iniciativas, entre as que figura, por exemplo, a oportunidade de que os rapaces experimenten en primeira persoa a xornada laboral dun destes profesionais.
No caso do segundo eixo, DigiTalent, dixo, contemplará ata 9 actuacións diferentes para ofertar capacitación continua aos profesionais e adaptación ás demandas do mercado laboral. Levaranse a cabo, destacou, accións formativas e de asesoramento como o programa de becas Áncora, sesións divulgativas ou un Observatorio Tecnolóxico.
Finalmente, o terceiro eixo responderá a necesidade de facilitar aos perfís directivos a formación e sensibilización que precisan para liderar a transformación dixital das súas empresas a través da xeración de ideas innovadoras.
En definitiva, un plan para promover talentos dixitais en Galicia e para promover que a cidadanía conte coas capacidades necesarias para desenvolverse plenamente no ámbito dixital. Para tal fin, concluíu, contaremos con estas iniciativas e tamén co apoio dos axentes económicos, 12 empresas que xa se adheriron en 2013 ao Pacto Dixital da Xunta, engadiu.
SmartPEME, a rede de formación e asesoramento TIC impulsada pola Deputación de Pontevedra, vai ofrecer este mes de outubro media ducia de actividades de capacitación tecnolóxica para os profesionais, os traballadores, as PEME e os emprendedores de Lalín. Os seis obradoiros sobre as máis diversas temáticas TIC celebraranse no Viveiro de Empresas do Polígono Lalín 2000. Como lembraremos, SmartPEME oferta ás persoas emprendedoras e empresas da provincia (a través das súas oficinas de Porriño, Cambados, Pontevedra, Lalín, Ponteareas, Vigo, A Estrada e Barro) servizos de información, análise, asesoramento, capacitación, demostración e acompañamento no ámbito das TIC.
O martes 9 de outubro ás 18 h, impartirase Mellora a túa páxina web e posiciónaa en buscadores. O xoves, 11 de outubro ás 17 h, terá lugar Plan de marketing online para empresas turísticas. O martes 16 ás 19 h, celebrarase o curso Vende os teus produtos en Facebook e Instagram. Seguindo cos cursos do mes de outubro, o martes 23, tamén as 19 h, terá lugar Como utilizar Instagram para promover a túa empresa. O xoves desa mesma semana será a quenda de Fotografía os teus produtos ou servizos para as redes socias, ás 17 h. E, por último, o mércores 31 de outubro ás 19 h, esta vez no viveiro de empresas da Estrada, celebrarase o curso Comercializa os teus servizos a través das redes sociais.
A oficina SmartPEME de Lalín, no Viveiro de Empresas situado no Polígono Lalín 2000, atópase na parcela E deste espazo e as inscricións pódense facer no número de teléfono 886 20 20 20, o correo electrónico info.smartpeme@depo.es ou a páxina web www.smartpeme.depo.es.
O programa da Deputación de Pontevedra desenvolve este ano novas carteiras de servizos co obxectivo de “continuar axudando ás empresas da provincia a ser máis competitivas na contorna económica actual”. O programa abre tres novas grandes liñas: o Centro Provincial de Economía Dixital (CPED), no viveiro de empresas de Barro, SmartPEME Impulsa e TurisTIC.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...