O Porto de Vigo sitúase na vangarda no desenvolvemento de solucións innovadoras baseadas en tecnoloxía 5G aplicadas a instalacións portuarias ao acoller dous casos de uso do proxecto liderado por Orange. Un relativo a vixilancia mariña con naves non tripuladas empregando 5G, e outro para o control automatizado de acceso ás lonxas a través do recoñecemento facial, segundo manifestou hoxe nesta cidade a directora da Axencia para a Modernización Tecnolóxica de Galicia (Amtega), Mar Pereira.
O Salón de Sesións da Autoridade Portuaria de Vigo acolleu un acto de demostración da solución para o control automatizado de acceso ás lonxas, un dos 30 que se están a realizar en Galicia, dos que 12 son en Vigo. Esta cidade reafírmase deste xeito na cabeza da adopción do 5G en España. O sistema foi desenvolvido por Orange, que liderou este piloto xunto con Ericsson e Inetum, e forma parte do proxecto liderado pola operadora que inclúe 13 casos de uso, cun investimento global de 9 millóns de euros, financiado por Red.es, e no que colaboran 20 empresas e entidades públicas e privadas.
Na presentación participaron, ademais da directora da Amtega, o presidente da Autoridade Portuaria de Vigo, Xesús Vázquez Almuiña; a delegada da Xunta en Vigo, Marta Fernández-Tapias; o director de Servizos Públicos Dixitais de Red.es, Francisco Javier García Viaira e representantes das empresa Orange e Inetum.
Galicia é unha das dúas comunidades españolas que acolle dous proxectos financiados por Red.es para o desenvolvemento de casos de uso baseados en tecnoloxía 5G. As adxudicatarias destes proxectos foron Telefónica e Orange. A aprobación por parte da Xunta do Plan Galicia 5G no ano 2018 e a posta en marcha dun espazo a través da colaboración entre as administracións e as operadores de telecomunicacións que se plasma no Nodo 5G de Galicia, sentou as bases para a formación de alianzas e a identificación de casos de uso nos diferentes sectores e coa colaboración de entidades y empresas
Galicia acolle na actualidade 13 casos de uso liderados por Orange e outros 12 por Telefónica. Ademais destes dous proxectos financiados por Red.es, na nosa comunidade lévanse a cabo outros 5 pilotos nos que tamén participa Vodafone.
As primeiras probas de uso en Galicia remóntanse ao período 2018-2019. O adianto no impulso desta tecnoloxía fixo que Galicia fora o primeiro lugar do mundo no que se probou o roaming con 5G (entre España e Portugal); e que Vigo e A Coruña foran das primeiras cidades de Europa en dispoñer desta tecnoloxía.
Un total de 16 casos de uso lévanse a cabo na provincia de Pontevedra, 6 na Coruña, 5 en Lugo e tres en Ourense.
O Porto de Vigo é unha das entidades participantes no proxecto, como demandante de solucións innovadoras que dean resposta a diferentes retos vencellados á transformación dixital das instalacións portuarias. O piloto presentado hoxe permite que a persoa encargada do control dos espazos nos que se realizan as poxas de peixe poida identificar posibles intrusos. Para elo emprégase o recoñecemento facial e utilízanse algoritmos de intelixencia artificial en base aos protocolos definidos de acceso seguro a los recintos portuarios
O Porto de Vigo acolle tamén outro dos casos de uso de Orange para a utilización dun sistema baseado en 5G empregando naves non tripuladas para a vixilancia marítima nas augas dependentes da Autoridade Portuaria.
O presidente da Autoridade Portuaria de Vigo, Xesús Vázquez Almuiña destacou a importancia de aplicar esta tecnoloxía no Porto de Vigo, xa que "é o futuro" e "forma parte da nosa estratexia de crecemento azul cara aos vindeiros anos", o que traerá "grandes beneficios" para todos os usuarios.
A directora da Amtega, Mar Pereira, lembrou a importancia de situar a Galicia no desenvolvemento de produtos baseado nas tecnoloxías de futuro, impulsando o crecemento do ecosistema dixital e a súa especialización tecnolóxica tal como se recolle na Estratexia Galicia Dixital
Por outra banda, sinalou que a tecnoloxía 5G será relevante no desenvolvemento de proxectos dixitais sectoriais pero tamén será imprescindible para que nunha poboación tan dispersa como a de Galicia se poida cumprir o obxectivo de despregamento universal de banda larga ultra rápida fixado pola UE para 2025.
Neste sentido, a Xunta xa trasladou ao Goberno de España as prioridades de Galicia para o despregamento da banda larga ultra rápida. Tamén advertiu na necesidade de dar prioridade á cobertura 5G en infraestruturas estratéxicas para o territorio como son os portos, os polos industriais e de coñecemento, así como as principais vías de comunicación.
A operadora de telecomunicacións R e Cruz Vermella Galicia chegan este venres 17 a Cedeira ao abeiro da súa xira Enredando tour R, destinada a achegar contidos didácticos que favorezan a inclusión dixital das persoas maiores. A unidade móbil, cuxa xira conta coa colaboración da Consellería de Política Social, estará na praza Roxa de Cedeira e logo seguirá o seu percorrido por unha ducia de localidades das catro provincias.
Durante un mes, o programa percorrerá localidades galegas cunha aula móbil para romper a fenda dixital e ofrecer contidos formativos tecnolóxicos específicos. O propósito é “enredar” persoas maiores no universo das novas tecnoloxías dun xeito lúdico, ofrecéndolles a degustación dun “menú tecnolóxico” á súa medida. A acción de cada recalada da xira consiste nunha aula móbil con contidos formativos vencellados ás novas tecnoloxías. A aula é “unha furgoneta superequipada” que transporta os smartphones, portátiles, tabletas, altofalantes intelixentes... e todo tipo de accesorios para facilitar ese achegamento á realidade da tecnoloxía máis doméstica e presente en multitude de áreas da nosa vida cotiá”, explicou R na presentación.
Este é o calendario previsto:
Para participar nas actividades de Enredando Tour R as persoas interesadas poden chamar ao teléfono gratuíto 900 825 030 ou escribir un correo electrónico a galicia@cruzroja.es.
Indra e a Fundación Universia anunciaron este martes o lanzamento da 'VI Edición da Convocatoria de axudas a proxectos de investigación en Tecnoloxías Accesibles', cuxo obxectivo é impulsar o desenvolvemento de novas tecnoloxías para a inclusión de persoas con discapacidade.
Segundo indicou a compañía tecnolóxica, a convocatoria vai dirixida a grupos de investigación e centros e escolas de negocio adscritos a universidades españolas, que poderán recibir estas axudas para proxectos de investigación aplicada á creación de novas tecnoloxías accesibles.
Indra destacou que 'o fin desta iniciativa é crear unha sociedade máis inclusiva a través da tecnoloxía e, ademais, nesta edición, debido ao impacto da pandemia, quere prestar especial atención a proxectos que contribúan á saúde mental'.
Na nova convocatoria de axudas lanzada en colaboración coa Fundación Universia -que conta co respaldo do Banco Santander- poderán participar, como en edicións anteriores, grupos de investigación, centros e escolas de negocio adscritas a universidades públicas ou privadas españolas do sistema universitario español, presentando as súas candidaturas por vía telemática do 14 de setembro ata as 14.00 horas do 13 de outubro no portal de tecnoloxías accesibles de Indra.
Os proxectos deben estar dirixidos ao desenvolvemento de software, dispositivos, instrumentos ou equipos que poidan ser utilizados por persoas con discapacidade, co fin de facilitar a súa actividade e participación na sociedade, favorecer o seu acceso ao emprego ou apoiar as súas funcións ou estruturas físicas ou mentais.
Así mesmo, é 'requisito indispensable' que contemplen a colaboración con entidades especializadas no campo da discapacidade e, que o produto ou servizo proposto sexa gratuíto ou teña un custo reducido para os usuarios finais. Ademais, a solución debe ser 'open source', é dicir, utilizar un código de programación aberto, de forma que facilite a súa modificación e adaptación posterior.
As tres mellores propostas de innovación tecnolóxica, pertencentes a diferentes universidades, recibirán financiamento para desenvolver os seus proxectos, que deberán ter unha duración máxima de 12 meses.
Voluntarios expertos de Indra levarán a cabo unha primeira selección de proxectos finalistas, entre os que un xurado, formado por profesionais recoñecidos que traballan en ámbitos relacionados co mundo da discapacidade, elixirán as propostas gañadoras. Os criterios principais de avaliación dos proxectos son a súa adecuación técnica, responsabilidade e sustentabilidade económica; a aliñación estratéxica cos obxectivos da convocatoria e os de Indra; a innovación, excelencia tecnolóxica e eficiencia da solución proposta; e, por último, o impacto real, alcance e sustentabilidade.
O vindeiro 25 de setembro, ao abeiro do ciclo de obradoiros maker Amigus Labs, a Asociación Amigus vai organizar un taller de iniciación á placa libre Arduino para adultos. Será novamente nas Pontes, sede do colectivo, no seu Amigus Labs do número 14 da praza do Hospital. A actividade conta co patrocinio da Xunta de Galicia.
Segundo explican dende a asociación, Arduino é unha plataforma de electrónica aberta para a creación de prototipos baseada en software e hardware libres fáciles de usar. “Neste obradoiro”, engaden, “mostraremos as posibilidades que nos ofrece esta tecnoloxía desde a programación, conceptos necesarios de electricidade e electrónica e dos diferentes dispositivos electrónicos que podemos incorporar aos nosos proxectos”. O obradoiro está enfocado a persoas adultas que queiran introducirse ás novas tecnoloxías. Para participar nel (unha actividade de balde), é necesario que nos rexistremos a través da web de Amigus. O inicio do obradoiro será as 10:30 horas ata as 13:00. Para calquera consulta podemos escribir un correo á conta amigus@amigus.org.
O Concello de Lousame retoma a celebración de cursos gratuítos para que os maiores do municipio aprendan a sacar todo o partido posible aos seus teléfonos e dispositivos móbiles. Os obradoiros terán lugar na Casa da Cultura cunha duración dunha hora semanal.
A concelleira de Servizos Sociais, Silvia Agrafojo, explica que “despois da paréntese propia desta pandemia, queremos retomar uns cursos cos que buscamos proporcionarlles ás persoas maiores de Lousame os coñecementos suficientes para un eficaz uso dos seus dispositivos móbiles: que saiban conectarse a unha rede Wi-Fi, que aprendan a facer e enviar fotos, que saiban usar o WhatsApp ou consultar as redes sociais ou o seu correo no móbil e tamén descargar aplicacións prácticas como para pedir cita médica, ler a prensa ou escoitar a radio no móbil…”.
Estes cursos están abertos á participación de toda a veciñanza de Lousame e serán totalmente de balde, previa inscrición nos Servizos Sociais do Concello (981 820 494) ou por WhatsApp no 689 126 385. Deste xeito, o Concello de Lousame dá continuidade aos cursos realizados en 2019. Unha iniciativa na que conta coa colaboración da Consellería de Política Social.
O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (Amtega) inauguraron hoxe a décimo primeira edición do “Curso Superior de Administración Electrónica 2021”. O acto celebrouse no salón de actos da Escola Galega de Administración Pública (EGAP) de Santiago de Compostela, presidido pola directora da Amtega, Mar Pereira; a directora da EGAP, Sonia Rodríguez-Campos; e o presidente do CPEIG, Fernando Suárez.
A Lei 39/2015 do Procedemento Administrativo Común das Administracións Públicas sinala que unha Administración sen papel, baseada nun funcionamento integramente electrónico, non só serve aos principios de eficacia e eficiencia, ao aforrar custos a cidadáns e empresas, senón que tamén reforza as garantías e ofrece transparencia. No momento actual, marcado pala pandemia da covid-19, Fernando Suárez sinalou que a informática permitiu soster a educación, a economía, as relacións persoais, e por suposto o funcionamento da Administración Pública, “unha importante lección coa que se demostra que a dixitalización permítenos achegar as organizacións públicas ao cidadán”.
Para reforzar esta idea, o presidente do CPEIG analizou os obxectivos da Axenda España Dixital 2025, centrada no impulso da transformación dixital que axudará ao desenvolvemento do Estado, co despregamento do 5G, o reforzo da ciberseguridade, a dixitalización das administracións públicas e das empresas, o desenvolvemento da economía do dato, a Intelixencia Artificial e os dereitos dixitais da cidadanía, entre outros. “Esta axenda marca que en 2025, o 50% dos servizos públicos estarán dispoñibles en app móbil e simplificarase a relación da cidadanía e empresas coas administracións” –asegurou–. Tamén España Dixital 2025 tentará pechar as fendas dixitais (socioeconómicas, de xénero, xeracionais, territoriais ou ambientais), que Suárez manifestou que se acentuaron aínda máis durante a pandemia. “Preténdese conseguir que en 2025 o 80% das persoas teñan competencias dixitais básicas, a metade delas mulleres” –indicou–.
Para alcanzar estes propósitos, Fernando Suárez apuntou que as organizacións públicas deben “cambiar, moverse e actuar”, tendo como centro da transformación ao cidadán e os servizos que se lle ofrecen.
Pola súa parte, a directora da Amtega destacou a importancia de avanzar na capacitación dixital do persoal empregado público para adaptarse ao novos escenarios e ao novo modelo de Administración Dixital. Neste sentido, salientou que en 2020 realizáronse máis de un millón de presentacións electrónicas a través da sede, o que supuxo un incremento de máis do 63% con respecto ao ano anterior.
Mar Pereira lembrou que o 1 de xaneiro de 2022 entrará en vigor o novo Decreto de Competencias Dixitais de Galicia que permitirá desenvolver o Plan de Capacitación Dixital do persoal empregado público. Este Plan definirá as competencias dixitais mínimas para poder acceder a un posto na administración.
Os coñecementos e habilidades serán avaliados co Certificado Galego de Competencias Dixitais, que poderán obter todas as persoas de Galicia maiores de 16 anos. As certificacións avaliarán 21 competencias englobadas en 5 áreas de dominio: información e datos; comunicación e colaboración; creación de contido dixital; seguridade e privacidade e solución dos problemas.
O director da División de Planificación y Coordinación de Ciberseguridad do Ministerio de Política Territorial y Función Pública, Miguel Ángel Amutio, explicou que a dixitalización é “una oportunidad de transformación que va más allá de lo estrictamente tecnológico y es ineludible”. Destaca que constitúe un elemento absolutamente clave para o proceso de reconstrución económica e a plena integración na economía dixital.
Amutio sinala que a administración dixital facilita escenarios de servizos con maior orientación ao usuario, máis fáciles de usar, máis accesibles, abertos, inclusivos, participativos e baseados nos datos, á vez que debe atender aos riscos de ciberseguridade pola acentuada dependencia da tecnoloxía.
Na súa presentación, “Presente e futuro da administración electrónica”, tratou as claves da transformación dixital en xeral, e da administración dixital en particular, e como debe enfrontarse tendo presente elementos fundamentais e aspectos transversais e cales son todos eles. Tamén falou de cara onde vai a Unión Europea nesta materia, cales son as áreas nas que pon o foco, así como a situación de España en materia de administración dixital segundo a perspectiva dos pilares fundamentais que permiten comprender o progreso alcanzado e por que é un referente no exterior, a axenda para impulsar esta transformación a través esencialmente do Plan de Digitalización de las Administraciones Públicas 2021 – 2025 e o seu contexto como motor da evolución tecnolóxica do país, e, finalmente que retos e conclusións se poden prever.
Esta actividade ten como finalidade afondar, desde unha perspectiva técnico- xurídica e cunha importante parte práctica, na concepción da administración electrónica, incidindo na relevancia que ten a súa implantación nas distintas Administracións galegas. A dirección académica está a cargo do presidente do CPEIG, Fernando Suárez. Así, os contidos do programa analizarán desde distintos enfoques a administración dixital para que o alumnado adquira ou perfeccione os seus coñecementos teóricos e prácticos en informática e en dereito.
Este curso superior, que servirá para dar formación a 50 empregados públicos, desenvolverase do 14 de setembro ao 26 de outubro. Cun total de 114 horas lectivas, impartirase na modalidade semipresencial, con 30 horas de prácticas presenciais en Santiago de Compostela os días 14, 21 e 28 de setembro e 5, 19 e 26 de outubro, en horario de 11:00 a 14:00 e de 16:00 a 19:00 horas, e 84 horas de teleformación.
A aprobación do Marco Galego de Competencias Dixitais, que entrará en vigor o vindeiro 1 de xaneiro de 2022, converte a Galicia na primeira comunidade autónoma en adaptar ao seu territorio o marco europeo na súa versión máis recente e actualizada, segundo destacou esta mañá a directora da Axencia para a Modernización Tecnolóxica de Galicia, Mar Pereira.
Mar Pereira participou esta mañá na Escola Galega de Administración Pública (EGAP) na inauguración da décimo primeira edición do Curso Superior de Administración Electrónica 2021, organizado pola Amtega e o Colexio Profesional de Enxeñeiros Informáticos de Galicia (CPEIG). O acto inaugural contou tamén coas intervencións do presidente do CPEIG, Fernando Suárez, e da directora da EGAP, Sonia Rodríguez-Campos.
A directora da Amtega destacou o esforzo realizado pola Xunta para a adaptación da administración dixital á nova situación provocada pola pandemia, que provocou un notable incremento das tramitacións realizadas a través da sede electrónica.
Neste sentido, lembrou que en 2020 aumentaron en máis dun 63% as presentacións electrónicas a través da sede, que superaron o millón e corresponderon a 1.200 procedementos distintos. A administración electrónica foi usada por 316.000 persoas distintas (físicas e xurídicas). Máis do 78% das entradas no Sistema Único de Rexistro foron electrónicas.
No 2020, a Xunta promoveu 172 accións formativas en materia de capacitación dixital do persoal empregado público en diversos eidos, accións que supuxeron un total de 4.055 horas de formación.
Para atender esta demanda da cidadanía e adaptarse aos novos modelos de posto de traballo dixital, Mar Pereira destacou a necesidade de reforzar a formación das persoas empregadas públicas en competencias dixitais.
O novo Marco Galego inclúe un Plan de Capacitación Dixital do Persoal Empregado Público de Galicia que definirá as competencias dixitais mínimas para poder acceder a un posto na administración.
Estes coñecementos e habilidades serán avaliados co Certificado Galego de Competencias Dixitais, que poderán obter todas as persoas de Galicia maiores de 16 anos.
As certificacións avaliarán 21 competencias englobadas en 5 áreas de dominio: información e datos; comunicación e colaboración; creación de contido dixital; seguridade e privacidade e solución dos problemas.
O Certificado Galego de Competencias Dixitais terá unha vixencia máxima de cinco anos, salvo no caso en que se modifique o Marco Galego de Competencias Dixital, no que poderá perder a súa vixencia anticipadamente. Nesa situación, as persoas con certificación terán un prazo de doce meses para renovala.
Nesta mesma liña tamén se pronunciou a directora da EGAP, Sonia Rodríguez-Campos, que destacou o papel do organismo na capacitación do persoal empregado público en materia de administración dixital mediante a formación continua e os cursos superiores. Ademais, tamén resaltou o traballo levado a cabo dende 2019 na promoción do uso dos servizos electrónicos entre a cidadanía a través da iniciativa Universo EGAP Innova, en especial coas xornadas de formación práctica dixital (e-martes) polas que pasaron xa máis de 700 alumnos.
Pola súa banda, o presidente do CPEIG, Fernando Suárez, destacou que a pandemia supuxo “unha importante lección coa que se demostra que a dixitalización permítenos achegar as organizacións públicas ao cidadán”.
No Curso Superior de Administración Electrónica 2021 participan 70 persoas empregadas públicas que asistirán a un total de 114 horas lectivas. O curso desenvolverase ata o 26 de outubro e inclúe 30 horas de prácticas presenciais. Fernando Suárez, que é tamén o director académico do curso, explicou que esta actividade ten como finalidade afondar na concepción da administración electrónica dende diferentes enfoque e cunha compoñente práctica.
A lección inaugural do curso foi impartida polo director da División de Planificación y Coordinación de Ciberseguridad do Ministerio de Política Territorial y Función Pública, Miguel Ángel Amutio.
O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (AMTEGA) inauguran este martes 14 de setembro o Curso Superior de Administración Electrónica, impulsado por ámbalas entidades. Contarase coa presenza de Fernando Suárez, presidente do CPEIG, Mar Pereira, directora de AMTEGA, e Sonia Rodríguez-Campos, directora da Escola Galega da Administración Pública (EGAP). Tamén participará na primeira xornada de actividades Miguel Ángel Amutio, director da División de Planificación e Coordinación de Ciberseguridade do Ministerio de Política Territorial e Función Pública, quen ofrecerá un relatorio maxistral, baixo o epígrafe Presente e futuro da Administración Electrónica. A cita será no salón de actos da EGAP, en Santiago, a partir das 11.00 horas.
Segundo informan o CPEIG e AMTEGA, esta actividade formativa ten como finalidade afondar, desde unha perspectiva técnico-xurídica e cunha importante parte práctica, na concepción da eAdministración, incidindo na relevancia que ten a súa implantación nos distintos órganos da nosa terra. A dirección académica está a cargo do presidente do CPEIG, Fernando Suárez. Así, os contidos do programa analizarán a dita cuestión desde distintos enfoques “para que o alumnado adquira ou perfeccione os seus coñecementos teóricos e prácticos en informática e en dereito”.
Este curso superior, que servirá para dar formación a 50 empregados públicos, desenvolverase do 14 de setembro ao 26 de outubro. Cun total de 114 horas lectivas, impartirase na modalidade semipresencial, con 30 horas de prácticas presenciais en Santiago de Compostela os días 14, 21 e 28 de setembro e 5, 19 e 26 de outubro, en horario de 11:00 a 14:00 e de 16:00 a 19:00 horas, e 84 horas de teleformación.
O Colexio Profesional de Enxeñaría Técnica en Informática de Galicia (CPETIG) vai comezar o outono con formación, divulgación e sensibilización. Farao cun completo programa de actividades dirixidas aos profesionais, á comunidade educativa e á sociedade en xeral. Para o desenvolvemento deste completo programa de actuacións conta co apoio da Axencia para a Modernización Tecnolóxica de Galicia (AMTEGA) no marco das accións definidas na Estratexia Galicia Dixital 2030. Porase o foco, entre outras cuestións relevantes, en loitar contra a fenda dixital de xénero en calquera das súas manifestacións.
A primeira das actividades programadas é un ciclo de xornadas técnicas sobre a salvagarda da información, dirixida a axentes da Rede de Centros para a Modernización e Inclusión Tecnolóxica (Rede CeMIT) da Xunta de Galicia. Comezaron esta semana en streaming desde o GaiásTech e continuarán este 14 de setembro, con relatores expertos como Paco Marcilla.
Tamén está prevista, nun ámbito máis profesional, unha nova edición dos Seminarios sobre Informática Xudicial, Ciberseguridade e Protección de Datos – Iuristicgal. Novamente o obxectivo será o de informar aos profesionais do dereito sobre os aspectos máis relevantes da administración electrónica xudicial.
O CPETIG impulsa tamén unha nova edición do Scratch Day, unha iniciativa que ten por obxectivo achegar nocións de programación informática a escolares de entre 7 e 15 anos e fomentar as vocacións científico-tecnolóxicas entre os mozos e mozas. Esta actividade terá, en palabras do CPETIG, “un enfoque totalmente práctico”, seguindo o ronsel de éxito de participación das edicións dos anteriores anos, complementándoa (desta volta) cun obradoiro dirixido ao profesorado.
O Scratch Day, explican dende o colexio, “pretende divulgar os valores da programación informática desde idades temperás, de xeito que os escolares acceden a esta contorna técnica de forma lúdica e divertida, tendo en conta como valor engadido que a través da programación se incentivan a creatividade e o emprendemento e se melloran a motivación, a autonomía e a capacidade de resolución de problemas”. No marco da programación do CPETIG presentarase tamén un documental sobre a presenza das mulleres no eido das enxeñarías informáticas que ten por obxectivo poñer en valor e incentivar a súa participación no sector. O documental está centrado na necesidade que teñen as carreiras tecnolóxicas e en especial a informática da presenza feminina como aporte de valor, dándolle visibilidade ás mulleres que foron esenciais no desenvolvemento desta disciplina e a tantas outras que hoxe en día traballan no sector, buscando desde as súas experiencias rachar con ideas preconcibidas que afastan ás mulleres, desde idades moi temperás, da opción de escoller estudos vencellados á informática.
A Xunta de Galicia vén de lanzar o Plan Dixital de Centro, a primeira acción enmarcada na recen aprobada Estratexia Educación Dixital 2030, cunha dotación inicial de 120M€ para os primeiros tres anos de aplicación, e que é a folla de ruta do Goberno galego para acadar a plena transformación tecnolóxica das aulas galegas nesta década.
O conselleiro de Cultura, Educación e Universidade, Román Rodríguez, salientou que a Estratexia Educación Dixital 2030 supón “un salto cualitativo” para acadar o reto do coñecemento, da innovación e da transformación tecnolóxica das aulas, xa que introduce “un cambio pedagóxico” con propostas específicas para avanzar na especialización da educación e na personalización da aprendizaxe.
Pola sua banda, a directora da Axencia para a Modernización Tecnolóxica de Galicia (Amtega), Mar Pereira, destacou que uns 55.000 alumnos de Galicia utilizan xa o libro dixital, con máis do 40% dos centros incluídos no programa EdixgaL. Os datos sitúan a Galicia na vangarda da dixitalización da educación. Todos os centros da Comunidade autónoma contan con aulas virtuais e están integrados na rede de videoconferencias docentes, con máis de 21.000 persoas usuarias de media e picos de ata 100.000 persoas usuarias nun día.
A estratexia contempla un conxunto de accións coordinadas e planificadas dirixidas ao conxunto dos membros da comunidade educativa que fan fincapé, sobre todo, na incorporación de estratexias docentes e novas técnicas pedagóxicas enfocadas á transformación dixital.
O conselleiro lembrou que algunhas desas accións, como o Plan de Nova Arquitectura Pedagóxica, o desenvolvemento de accións STEM ou a introdución da Intelixencia Artificial xa están en marcha, mentres que agora se da un paso máis co Plan Dixital de Centro e a Rede Galega de Educación Dixital.
Un dos instrumentos da Estratexia é o Plan Dixital de Centro presentado hoxe, e que está enfocado á mellora da competencia dixital da comunidade educativa no seu conxunto co fin de sacarlle o máximo rendemento ao uso das tecnoloxías dixitais aplicadas ao proceso de ensino-aprendizaxe na aula, e de conseguir que as escolas sexan organizacións educativas dixitalmente competentes.
A posta en marcha deste plan implica a mobilización de 19,2M€ por parte da Xunta, que tamén leva aparellado a creación da Rede Galega de Educación Dixital, o que supón -tal e como anunciou o conselleiro Román Rodríguez- a contratación de 80 docentes especialistas no ámbito dixital que acompañarán aos centros educativos no proceso de deseño, elaboración e implementación do seu Plan Dixital, que deberá estar totalmente operativo o vindeiro curso 2022-23.
Precisamente hoxe a Consellería publica no seu Portal Educativo a convocatoria para seleccionar os 78 centros que participarán nesta Rede e que exercerán de mentores para o conxunto dos centros sostidos con fondos públicos de Galicia.
É dicir, Román Rodríguez recalcou que os centros “non van estar sós neste proceso”, xa que contarán cun “acompañamento profesional e específico en todo momento” a través de 78 docentes “cunha dedicación completa e exclusiva a esta función”, a razón de un para cada un dos centros baixo a coordinación de dúas persoas da Consellería de Educación.
Á súa vez, estes 78 docentes estarán organizados en 26 equipos de atención dixital aos centros estruturados en 14 ámbitos xeográficos a razón de cinco na provincia da Coruña, dous na de Lugo, dous na de Ourense e outros cinco na de Pontevedra.
No que atinxe ao Plan Dixital de Centro, tal e como establece a resolución, que pode consultarse no Portal Educativo, no presente curso os centros deberán comezar coas primeiras fases de elaboración do seu propio Plan Dixital, cunha análise da situación real e de diagnose de debilidades, ameazas e fortalezas para a súa aprobación definitiva polos respectivos consellos escolares de cada centro a finais de curso e que o documento estea totalmente pechado para a súa aplicación efectiva no vindeiro curso 2022-23.
A directora da Amtega lembrou que este curso está prevista a extensión a todos os centros educativos de Galicia a capacidade de rede de 1 Gbps. Nos últimos cinco anos multiplicáronse por cinco os centros que dispoñen xa deste servizo de moi alta velocidade.
A transformación dixital da educación galega implica uns investimentos de máis de 40 millóns de euros en equipamentos para o profesorado e os ciclos formativos.
Mar Pereira referiuse ao Eixo 2 da Estratexia Galicia Dixital 2030 que inclúe dous programas para o desenvolvemento das competencias dixitais e o impulso da educación dixital. Neste sentido, o último Consello da Xunta aprobou a Estratexia de Educación Dixital 2030 e o Decreto que desenvolve o marco galego de competencias dixitais.
Neste sentido, a directora da Amtega destacou o impulso que se está a dar ao avance da dixitalización da sociedade en xeral e da educación en particular que “verase reforzado cos fondos europeos e permitirá atender no marco dunha política dixital global para todo o sistema educativo galego as singularidade de cada centro, identificadas en base ao seu modelo educativo”.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...