O Colexio Profesional de Enxeñaría en Informática de Galicia (CPEIG) e a AMTEGA organizan o vindeiro venres un espazo de networking e debate chamado tres14.pm que celebrarase de xeito presencial, para un grupo máximo quince profesionais do sector das TIC ou outras persoas interesadas na materia, no Centro GaiásTech situado na Cidade da Cultura en Santiago (Monte Gaiás, s/n. Edificio CEM) ás 15:00 horas. Ademais, poderase seguir en streaming onde os participantes interactuarán co relator a través do chat.

Este programa difundirase desde o centro GaiasTech, recentemente inaugurado, e que se configura como o elemento central e coordinador do ecosistema dixital de Galicia e da súa relación co resto da economía galega na procura dunha competitividade duradeira e xerando espazos de integración e inclusión dixital e de desenvolvemento persoal do noso talento dixital. O programa conta con espazos de networking, de debate, opinión e coñecemento, invitando a expertos en distintas materias para que realicen unha exposición seguindo un programa específico no que reflectirán, en catorce minutos, tres principios sobre dita temática de cara a establecer un coloquio posterior cos participantes. O relator desta xornada será Manuel Meijide, director da compañía ILUX Visual Technologies. Impartirá unha conferencia titulada O xemelgo dixital como impulsor da transformación dixital na industria. Meijide explica que un Xemelgo Dixital (Digital Twin) é unha representación dixital dun contorno ou proceso físico, réplicas virtuais que se empregan para simular a realidade e o seu comportamento en determinadas circunstancias. Sinala tamén que, máis alá dun mero modelo tridimensional, o xemelgo dixital combina unha representación co Big Data, Cloud Computing, IoT, Machine Learning ou Intelixencia Artificial para conseguir unha copia completa e en tempo real dun determinado contorno ou proceso físico cunhas características e estado concretos.

A través desta copia virtual, Meijide sinala que é posible unha análise exhaustiva da información, así como experimentar sen correr riscos, algo moi beneficioso por exemplo en procesos de fabricación. Ademais, dado que o xemelgo dixital simula o comportamento do seu homólogo físico, este último pódese monitorizar, analizar, automatizar e mesmo predicir o seu comportamento, en definitiva, mellorar. Asegura que «os xemelgos manexan, monitorizan e tratan información masiva e integran multitude de sistemas, conectando diferentes tipos de datos para crear unha única visualización para xestionar todo o proxecto representado». Meijide destaca que os xemelgos dixitais son de aplicación en multitude de sectores e todo tipo de empresas. O seu ámbito de aplicación asóciase á transformación dixital da empresa, xa que con eles é posible realizar un control dos sistemas para reducir as incidencias, previr tempos de inactividade, planificar tarefas e diferentes escenarios e probalos mediante simulacións ou acelerar procesos, todo isto en tempo real. Este programa forma parte dunha ampla axenda que a AMTEGA está a promover desde o centro GaiásTech, onde a tecnoloxía convertese no vector do cambio das nosas organizacións que poden dar respostas innovadoras e cun alto valor engadido ás demandas da nosa sociedade.

• A iniciativa pretende fomentar as vocacións TIC entre estudantes de secundaria e bacharelato, dar visibilidade ás persoas con diversidade funcional e facilitar o seu día a día mediante solucións innovadoras
• Será homenaxeado na “XIII Noite da Enxeñaría en Informática de Galicia” que se celebrará o 29 de outubro no Hotel Oca Puerta del Camino en Santiago

O Colexio Profesional de Enxeñaría en Informática de Galicia (CPEIG) outorga o Premio Innovación Tecnolóxica no Ensino da “XIII Noite da Enxeñaría en Informática de Galicia” ao Centro de Investigación TIC (CITIC) da Universidade da Coruña polo seu proxecto ‘Talentos Inclusivos’ destinado a fomentar as vocacións TIC entre a mocidade, á vez que da visibilidade ás persoas con diversidade funcional e contribúe a facilitar o seu día a día mediante solucións tecnolóxicas innovadoras. 

A gala máis importante da informática en Galicia celebrarase o vindeiro 29 de outubro no Hotel OCA Puerta del Camino de Santiago de Compostela, cun encontro presencial e virtual que reunirá ás empresas máis destacadas do sector TIC en Galicia. Os premios da Noite corresponden a dez categorías onde os colexiados e colexiadas recoñecen as iniciativas ou persoas destacadas no ámbito da enxeñaría en informática.

Co Premio Innovación Tecnolóxica no Ensino, a organización colexial pretende amosar a capacidade da enxeñaría en informática para mellorar a calidade de vida en distintos ámbitos e colectivos sociais, implicando á poboación más nova en iniciativas como a galardoada na presente edición. 

‘Talentos Inclusivos’ é un proxecto colaborativo posto en marcha polo CITIC xunto con ASPACE Coruña, co apoio do Consello Social da UDC, a Fundación Española para a Ciencia e a Tecnoloxía (FECYT) e a Consellería de Cultura, Educación e Universidade da Xunta de Galicia.

O obxectivo do proxecto é dobre: fomentar as vocacións TIC entre estudantes de secundaria e bacharelato e, á súa vez, dar visibilidade á diversidade funcional, facilitando ademais o día a día das persoas con parálise funcional. Para iso, creáronse grupos de traballo colaborativos formados por usuarios e usuarias de ASPACE Coruña e estudantes de secundaria e bacharelato de diferentes centros educativos da provincia da Coruña, apoiados polo seu profesorado da materia de tecnoloxía e por persoal investigador do CITIC. 

Así, os usuarios e usuarias de ASPACE Coruña propuxeron diferentes retos tecnolóxicos que foron resoltos polo alumnado dos centros educativos. Durante todo o curso académico, máis dun centenar de estudantes implicáronse na iniciativa para dar solución a problemas cos que adoitan atoparse as persoas con parálise cerebral.

Algúns dos desenvolvementos tecnolóxicos foron un robot e un dron controlados coa man ou a cabeza, un sistema anticolisión para cadeiras de rodas, xoguetes infantís adaptados e produtos de apoio con impresión 3D.

O investigador principal do proxecto e subdirector do CITIC, Javier Pereira, afirma que “o proxecto Talentos Inclusivos proporciona coñecemento científico en beneficio da sociedade, que é un dos obxectivos co que o CITIC foi creado”. Tamén destacou a “gran implicación dos estudantes no proxecto”, así como “a súa capacidade de empatizar coas persoas con parálise cerebral para tentar axudar e propoñer solucións”.

Ante o éxito da primeira edición, o proxecto ‘Talentos Inclusivos’ terá unha nova convocatoria no recentemente iniciado curso académico. 

Sobre o CITIC

O CITIC é un Centro de Investigación de Galicia que potencia o avance e a excelencia en I+D+i aplicado ás TIC. Impulsado pola Universidade da Coruña, no ano 2016 a Xunta de Galicia recoñece ao CITIC como Centro Singular de Investigación de Galicia 2016-2019 pola súa traxectoria científica. En 2019 renova esta acreditación e pasa a denominarse Centro de Investigación de Galicia. A actividade científica do CITIC estrutúrase en catro áreas de investigación principais: Intelixencia Artificial, Ciencia e Enxeñería de Datos, Computación de Altas Prestacións, e Servizos e Redes Intelixentes, ademais dunha área de investigación transversal a todas elas, a de Ciberseguridade. Un dos obxectivos do CITIC pasa por poñer ao alcance da sociedade os resultados das súas investigacións, polo que no centro promóvense accións de ciencia cidadá e actividades divulgativas que potencien as vocacións científicas e garantan a renovación do talento no ámbito das TIC.

Máis información sobre o proxecto.

En outubro vaise celebrar a nova edición dun dos grandes e máis veteranos encontros tecnolóxicos do ámbito galego e estatal: GaliciaTIC. Será os días 6 e 7 de outubro, novamente da man da asociación empresarial Ineo. A temática central será a seguinte: Galicia en clave dixital. Do mesmo xeito que o ano pasado, marcado tamén pola COVID, a organización combinará a posibilidade de asistencia virtual coa física, esta última durante a mañá do mércores día 6.

O programa incluirá, entre outras cousas, unha mesa Ineo virtual o xoves 7 de outubro ás 13:00h, onde os socios poderán explicar os seus produtos e servizos tecnolóxicos. Haberá relatorios, mesas de debate, conferencias, webinars, demostracións virtuais (showrooms) e un espazo para o networking.

As actividades darán comezo o día 6 de outubro cunha mesa inaugural onde se abordarán os principais desafíos do sector das novas tecnoloxías, “especialmente nun momento que non foi planificado e que obrigou ás compañías, organizacións e traballadores a abordar situacións novas no contexto dun futuro incerto”. A mesa será moderada por Miguel Merino (Universidade de Vigo) e contará coa presenza de Mar Pereira, directora de AMTEGA, Carlos Suárez Rey (EDISA), Fernando Vázquez (Imatia), Luis Álvarez Sestelo (presidente de Ineo) e Fernando Guldris (director do IGAPE).

O Concello de Sada presentou o seu programa formativo-tecnolóxico para estes meses de setembro e outubro, unha axenda de aprendizaxe dixital que inclúe media ducia de cursos abeirados á iniciativa A volta coas TIC. Desenvolverase na aula CeMIT de Sada, de xeito presencial.

Os cursos en cuestión son os que citamos a continuación:

• Curso de iniciación ao procesador de textos Writer.
  • Persoas destinatarias: Para público en xeral.
  • Obxectivos: aprender como crear documentos, similar ou Microsoft Word.
  • Data e horario: 15:30 – 17:30 de 22/09/2021 a 6/10/2021 (mércores e xoves).
• Curso avanzado ao procesador de textos LibreOffice Writer.
  • Persoas destinatarias: Para público en xeral.
  • Obxectivos: Aprender como sacar proveito das ferramentas que nos permitirán dar un toque especial aos nosos documentos ou ser moito máis produtivos.
  • Data e horario: 9:00 – 11:30 de 20/09/2021 a 11/10/2021 (luns, martes e venres).
• Curso de iniciación á folla de calculo Calc.
  • Persoas destinatarias: Para público en xeral.
  • Obxectivos: Aprender a crear follas de cálculo, similar a Microsoft Excel.
  • Data e horario: 18:00 – 20:00 de 22/09/2021 a 6/10/2021 (mércores e xoves).
• Curso avanzado á folla de calculo Calc.
  • Persoas destinatarias: Para público en xeral.
  • Obxectivos: aprenderemos como tirar o máximo proveito da ferramenta de ofimática Calc facendo uso das funcións intermedio e avanzada que LibreOffice Calc pon en xogo.
  • Data e horario: 09:00 – 11:30 de 15 /10/2021 a 8 /11/2021 (luns, martes e venres).
• Curso de Administración Electrónica: eAdministración.
  • Persoas destinatarias: Para público en xeral.
  • Obxectivos: Este curso presta especial atención ao certificado dixital, a sinatura electrónica e o DNI electrónico, especificando os seus usos, requisitos, etc. Abordaranse as posibilidades que ofrece a Administración Electrónica e o acceso práctico aos servizos públicos electrónicos: sedes electrónicas, canles de información, publicacións oficiais, etc.
  • Data e horario da primeira edición: 12:00 – 14:00 de 20/09/2021 a 28/09/2021 (luns, martes e venres). Data e horario da segunda edición: 12:00 – 14:00 de 15 /10/2021 a 25 /10/2021 (luns, martes e venres).
• Curso de Factura Electrónica: Factura-e e FACe.
  • Persoas destinatarias: Para público en xeral.
  • Obxectivos: Este curso presta especial atención ao proceso de elaboración e presentación da factura electrónica a través do programa Factura-e e no punto xeral de entrada de facturas electrónicas FACe.
  • Primeira edición: 12:00 – 14:00 de 1/10 /2021 a 11/10/2021 luns, martes e venres. Segunda edición: 12:00 – 14:00 de 26/10 /2021 a 8/11/2021 luns, martes e venres.