O proxecto OpenSpain, desenvolvido por un dos LABs da iniciativa Join de Telefónica, contou cun equipo de nove mozos profesionais de distintas nacionalidades, algúns deles refuxiados.
A web OpenSpain (www.openspain.es), a primeira ferramenta dixital de axuda aos refuxiados que chegan a España, xa está dispoñible en español, inglés e árabe. O proxecto, posto en marcha por Telefónica a través da iniciativa Join, informa a estas persoas dos pasos a seguir para acometer as primeiras xestións cando chegan ao noso país.
O proxecto é resultado do traballo realizado por un dos grupos de traballo -LABs- de Join, denominado tamén OpenSpain e integrado por nove estudantes e profesionais, de entre 23 e 29 anos, e de diferentes nacionalidades - española, siria, iraquí, iraniana, saharauí ou venezolana- que durante seis meses deseñaron e desenvolveron a web co apoio e asesoramento de tres mentores expertos nas instalacións do Madrid International LAB.
A web é a primeira destas características e está dirixida tanto a refuxiados como a ONGs. A iniciativa contou co apoio de Rede.es, o Ministerio de Emprego e Seguridade Social, ACCEM e Madrid International LAB.
OpenSpain inclúe información para facilitar unha primeira fase de acollida aos refuxiados que chegan a España en situacións desfavorecidas: aloxamento -programas de acollida e vivendas en réxime de aluguer-; documentación -trámites necesarios, dereitos, obrigacións, etc.-; traballo, educación, asistencia médica - diferentes tipos de centros sanitarios-, e transporte -opcións de transporte público en cidades como Madrid, Barcelona, Sevilla ou Valencia-.
OpenSpain LAB forma parte da iniciativa Join de Telefónica, desde a que os mozos con talento apoian a transformación dixital, impulsando as novas capacidades dixitais, a través de proxectos comprometidos coa sociedade e coa economía dixital. Neste LAB os mozos integrantes desenvolveron unha solución tecnolóxica que supón unha axuda real para os estranxeiros que chegan a España en situacións desfavorecidas. A iniciativa en si mesma é un exemplo de integración, xa que está formada por mozas con talento e comprometidos que proceden de diferentes países.
A Xunta de Galicia recibiu 37 solicitudes de voto accesible en Braille para persoas con discapacidade visual que queren participar nas eleccións ao Parlamento de Galicia do vindeiro 25 de setembro.
O procedemento de voto accesible está previsto para persoas con discapacidade visual que coñezan o sistema de lecto-escritura Braille e que teñan recoñecido un grao de minusvalía igual ou superior ao 33 por cento ou sexan afiliados á Organización Nacional de Cegos Españois (ONCE).
A utilización deste procedemento é voluntaria, polo que aquelas persoas que o desexen poderán seguir sendo asistidas por unha persoa da súa confianza, tal e como prevé a Lei orgánica do réxime electoral xeral.
Unha vez finalizado o prazo de solicitude deste tipo de voto, o 29 de agosto, o Goberno galego ten recibido 27 solicitudes remitidas pola ONCE e 10 a través do Teléfono do Elector. Por provincias, a que recibiu máis solicitudes foi A Coruña, con 17; seguida de Pontevedra, con 15; e Lugo e Ourense, con 3 e 2; respectivamente.
A Xunta comunicará por escrito aos solicitantes que o vindeiro 25 de setembro terán a caixa de voto accesible dispoñible na súa mesa electoral, e porase en contacto cos concellos nos que se atoparán as ditas mesas por si é necesario realizar algunha adaptación de accesibilidade no local electoral.
Procedemento
O procedemento de voto accesible para as persoas con discapacidade visual consiste na utilización de papeletas normalizadas, xunto cunha documentación específica en sistema Braille que se atopará baixo a custodia do presidente da mesa electoral na que lle corresponde exercer o dereito de voto.
As persoas que soliciten esta modalidade de voto atoparán nas mesas electorais a seguinte documentación: instrucións explicativas sobre a utilización da documentación, impresos en sistema Braille; sobre de votación normalizado; e sobre por cada unha das candidaturas coa indicación desta en tinta e en sistema Braille. Dentro dos sobres, o electorado atopará a papeleta de votación normalizada correspondente á candidatura indicada no exterior.
O día da votación, o/a presidente/a da mesa ou, no seu caso, algún dos vogais, fará entrega da documentación que integra o procedemento de voto accesible e indicará o espazo do colexio electoral habilitado para a súa manipulación.
Unha vez identificada a opción de voto e introducida a papeleta no sobre de votación, o/a elector/a dirixirase de novo á mesa electoral e fará entrega do seu voto ao/á presidente/a para a súa introdución na urna electoral.
Para obter máis información sobre o voto accesible, ademais do teléfono gratuíto de información ao elector (900 82 09 16), pódese consultar a páxina web das Eleccións galegas dentro do apartado “Métodos de votación”.
O Campo da Festa da Milagrosa en Carballo acolleu a celebración da 75ª edición da LaconNetwork, encontro que xuntou a ducias de profesionais e emprendedores do sector TIC galego, que desta volta aproveitaron a conxuntura para celebrar que a empresa anfitrioa, Abertal Network, cumpría 20 anos, aniversario digno de mencionar nun sector tan novo, e que xa conta con empresas cunha traxectoria tan longa e prolífica.
O encontro converteuse en toda unha romaría, comezando o evento cun acto inaugural a cargo de Manuel L. Pan, de Abertal, quen deu conta do aniversario da súa compañía e salientou o interese da organización de encontros deste tipo para facer networking entre os profesionais do sector, dando logo paso a Juan José Fernández García, presidente da asociación TADEGa, quen quixo aproveitar o encontro para anunciar aos presentes que entre os días 14 e 16 de outubro vai celebrarse no Centro Abanca Obra Social de Santiago de Compostela unha nova edición de Startup Weekend, que desta volta terá un obxectivo temático, destinándose a habitual creación de proxectos empresariais a través da colaboración dos asistentes repartidos en grupos ao desenvolvemento de proxectos educativos.
Temos así que o Startup Weekend Galicia EDU xuntará a profesorado, tecnoloxía e comunidade emprendedora para identificar oportunidades para os retos da educación.
Os equipos que se formen no encontro traballarán xuntos durante 54 horas para crear ferramentas de base tecnolóxica enfocadas a resolver un problema concreto na educación entre os estudantes de calquera nivel educativo. Poden participar nestas xornadas estudantes universitarios interesados no hacking, o deseño de interfaces de usuario ou que simplemente queiran mellorar a educación, profesores con ganas de compartir a súa visión e experiencia, membros da comunidade educativa, desenvolvedores informáticos, deseñadores, emprendedores... en definitiva, calquera persoa que queira colaborar nos obxectivos deste encontro.
GaliciaTIC, histórico evento galego sobre novas tecnoloxías da información, está a piques de chegar á súa 14 edición. A cita será o 22 de setembro na Cidade da Cultura de Santiago, baixo o lema Transformación dixital para unha competencia global. Entre as entidades colaboradoras deste ano atópase o Colexio Profesional de Enxeñaría en Informática de Galicia, o CPEIG, que vén de dar a coñecer o seu apoio na web de seu, engadindo que xa está aberto o prazo para realizarmos a inscrición no congreso (a través de Galiciatic.com ou descargando a aplicación específica para iOS e para Android) e que, en virtude da dita colaboración, os membros do colexio contarán cunha serie de vantaxes.
Segundo salienta a maiores o CPEIG, GaliciaTIC segue a ser un referente na “aposta polas tendencias máis actuais nas tecnoloxías do coñecemento, desde o punto de vista da oferta global e de man dos líderes tecnolóxicos globais”. Como lembraremos, o gran obxectivo desta edición 2016 é avaliar até que punto a revolución tecnolóxica que estamos a vivir pode mudar para sempre a sociedade e, por conseguinte, o tecido empresarial. GaliciaTIC 2016 centrarase neste proceso de cambio, co obxectivo de fomentar, en palabras dos organizadores, “a competitividade e innovación do sector TIC e a transformación de terceiros sectores, achegando a Galicia conferencias e charlas temáticas específicas das últimas tendencias tecnolóxicas mundiais”.Entre os patrocinadores confirmados do evento atópanse Banco Sabadell, Deloitte, Edisa, Emetel, Fujitsu, Imatia, Itelsis, Ayco, Qindel, Oracle e Televés. Haberá relatorios, mesas temáticas e actividades de achegamento ás últimas tendencias TIC mundiais, amais dunhas innovadoras xeiras de debate tecnolóxico con formato de ring de boxeo.
A inauguración do evento correrá a cargo (ás 9.30 horas do 22) de Mar Pereira, directora da Axencia para a Modernización Tecnolóxica de Galicia, AMTEGA. A maiores dos ditos apoios nas xornadas pasadas sumáronse os de GoEmprende (Rede Business Angels de Castela A Mancha) e MyAngelTIC (rede de investidores de proxectos innovadores e tecnolóxicos).
O Concello de Cambre vén de presentar o seu programa de actividades formativas e culturais para os vindeiros meses (de outubro a decembro). Son preto de 100 propostas para todas as idades e cubrindo un abano amplo de tipoloxías: culturais, educativas e de conciliación, sociais e xuvenís. O programa tamén empresta especial atención ás novas tecnoloxías da información. Están programados cursos de informática para escolares de Primaria e Educación Secundaria, cursos de informática para mocidade e adultos (a partir dos 16 anos) e cursos de informática para maiores de 55 anos.
A maiores, haberá un obradoiro sobre como facer compras seguras en Internet (ao abeiro do Programa Trans-fórmate) a desenvolver o sábado 19 de novembro. As devanditas actividades desenvolveranse en tres emprazamentos diferentes co obxectivo de abranguer a máxima cifra de participantes: a OMIX de Cambre, o CSC Graxal (O Temple) e a aula informática de A Barcala. O Concello tamén lembra a dispoñibilidade da súa Aula Aberta, de acceso libre e cos recursos precisos para que os veciños se familiaricen coas TIC. Amais destes convites formativos tecnolóxicos o programa inclúe (entre outras moitas cousas) un festival de monicreques, obradoiros de pintura, ciclismo, xadrez ou unha escola de nais e pais para axudar a educar aos seus fillos. “De gran importancia son as actividades educativas e de conciliación familiar que axudan aos pais a compaxinar o seu traballo cos seus deberes paterno filiais”, informa o Concello, que lembra que a partir do vindeiro martes 6 de setembro poderanse obter os folletos explicativos do programa no consistorio así como en diversos centros sociais. Ademais, os interesados no programa poden obter dende xa a devandita relación de accións previstas na web do Concello de Cambre, en formato PDF.
As Feiras Maker, fenómeno global que se estendeu por máis de 190 cidades do planeta, terán en España un dos seus epicentros na segunda metade de 2016, na que se celebrarán un total de catro Maker Faires. Madrid en setembro, Santiago de Compostela e León en outubro e Bilbao en novembro realizarán as súas respectivas versións do festival de tecnoloxías creativas máis grande do mundo, a Maker Faire, un tipo de evento que congrega a fanáticos de tecnoloxías como as impresoras 3D, os drons, a moda interactiva, a robótica e a programación creativa para compartir os seus proxectos e coñecemento co gran público.
Este tipo de eventos son o principal escaparate da cultura ou movemento Maker, considerado como unha importante ferramenta para incrementar a innovación de base tecnolóxica entre a xente moza, polo que é todo un luxo que en Galicia podamos contar con encontros deste tipo que dinamicen industria e sociedade, instando á exploración da senda aberta pola cultura Maker.Nas Maker Faires pódense ver desde robots humanoides de tamaño real ata vestidos que integran luces controlables desde o móbil, submarinos, drons, impresoras 3D e todo tipo de instalacións interactivas serán compartidos co gran público. Todos teñen en común a filosofía Do-It-Yourself, ou faino-ti-mesmo, así como o uso de novas tecnoloxías de creación e fabricación dixital de vangarda que anticipan algunhas tendencias tecnolóxicas, en ocasións con anos de antelación.
O movemento Maker é o nome que reúne baixo un mesmo paraugas a un crecente número de persoas de distintos perfís que están usando técnicas Do-It-Yourself e Do-It-Together para desenvolver tecnoloxías únicas e solucións innovadoras. Europa é o continente que ten un maior número de Makerspaces e Fablabs, ademais de dar a luz a proxectos como Arduino, Raspberry Pi ou RepRap, todas ferramentas de código aberto que democratizaron o acceso a tecnoloxías como a electrónica, a programación e a impresión 3D. Cada ano celébranse máis de 50 Maker Faires e Mini Maker Faires no continente. A versión realizada en Roma é a principal de Europa, con máis de 100.000 visitantes na súa terceira edición en 2015. A Compostela Mini Maker Faire foi a terceira, detrás de París.
A cultura Maker e a súa filosofía de compartir coñecemento está permitindo a creación de novos espazos de encontro e traballo (Hackerspaces, Fablabs, Makerspaces, Techshops) nos que se fabrican as últimas vangardas tecnolóxicas e que favorecen a transferencia de coñecemento desde a base da pirámide; novos traballos que non existían ata o de agora (tecnólogo creativo, deseñador de interacción, emprendedor dunha startup de hardware, fabricante ou distribuidor de impresoras 3D, experto educativo, piloto de drons e moitos máis); novas ferramentas educativas que funcionan con todos os públicos e que son accesibles a todos a través de Internet; e novos tipos de festivais-feiras que potencian o uso das tecnoloxías creativas como as Maker Faire. Todas as feiras manteñen aberto o seu chamamento a proxectos, animando a tecnólogos, deseñadores, artesáns, artistas, profesionais, afeccionados, colectivos, empresas e todo tipo de organizacións a presentar o seu proxecto e darse a coñecer ante as decenas de miles de persoas que acoden a este novo tipo de festivais que combinan diversión para todos os públicos coas novas tecnoloxías.Poden presentarse a unha Maker Faire os seguintes tipos de proxectos: - Robótica e programación creativa - Drons - Submarinos DIY - Proxectos con Arduino - Artesanía dixital - Proxectos astronomía ou exploración espacial en xeral - Arte New Mediax - Deseño, impresión 3D e Fabricación Digital - Uso creativo de máquinas de control numérico (fresado, láser, plasma..etc.)- Crafting - E-Textís, wearables, moda e tecnoloxía. - Green Tech, tecnoloxía ao servizo da transición ecolóxica. - Radiocontrol - Tecnoloxía Vintage (videoxogos, ordenadores míticos, sibaritas do chip) - Electrónica - Vehículos eléctricos - Ciencia Cidadá - Biología-Biofabricación - Extreme making - Instalacións de gran formato - Refuxios, cúpulas, domos, inflablesInstrumentos musicais DIY - Máquinas imposibles - Repara-reutiliza-recicla-mellora. Upcicling & Tech - Tecnoloxía social. Proxectos que marcan a diferenza E actualmente a Maker Faire Galicia, que desenvolverase entre os días 1 e 2 de outubro no Palacio de Congresos e Exposicións de Galicia en Santiago de Compostela, está aínda aberta á recepción de propostas argalleiras para enriquecer este importante evento.
Outórgalle 4 estrelas Reference Sites, distinción concedida como modelo de excelencia
A Comisión Europea concedeu a Euskadi a máxima cualificación posible, catro estrelas, como Reference Site polo seu labor exemplar na abordaxe integral do envellecemento activo e saudable baseado na innovación. Esta cualificación prodúcese tras a reacreditación dos Reference Sites do programa europeo European Innovation Partnership on Active and Healthy Ageing que acometeu a Comisión Europea para avaliar e apoiar o avance do programa.
A Comisión Europea sinala que os Reference Sites como Euskadi "demostraron a existencia de estratexias integrais para avanzar en innovación baseada nun modelo de "Cuádrupla Hélice" que inclúe axentes da industria, sociedade civil, academia e autoridades gobernamentais a niveis rexionais e locais". E engade que o status de Reference Sites concédese a quen "demostraron excelencia no desenvolvemento, adopción e escalado de prácticas innovadoras, en liña cos obxectivos estratéxicos da European Innovation Partnership on Active and Healthy Ageing (EIP on AHA) e en particular coa European Scaling Up Strategy for Innovation in Active and Healthy Ageing".
O European Innovation Partnership on Active and Healthy Ageing, EIP-AHA, é unha iniciativa piloto cuxo propósito é aumentar para 2020 a esperanza de vida saudable en dous anos, ademais de mellorar a competitividade europea. Na súa primeira edición en 2013, recoñeceu a Euskadi como Reference Site ou Área de Referencia con tres estrelas, a máxima puntuación outorgada nesa edición. As Áreas de Referencia son rexións ou cidades que destacaban entón polas súas boas prácticas á hora de afrontar o envellecemento activo e saudable desde a innovación.
Agora, en 2016, Euskadi obtivo a máxima puntuación posible -catro estrelas-, o que supón un dobre recoñecemento. Segundo o Conselleiro de Saúde, Jon Darpón este novo recoñecemento a Euskadi "por unha banda, representa a mellora no recoñecemento como 'modelo de excelencia', considerado referente para outras organizacións e administracións e por outra banda, constata a diferenciación con outras Reference Sites pola demostración do compromiso na abordaxe integral do envellecemento activo e saudable, a inclusión de novas actividades e, en xeral, os avances logrados".
Á fronte do País Vasco como Reference Site, no que participan numerosas organizacións -incluíndo como núcleo a Osakidetza, e a Kronikgune, o Centro de Investigación en Cronicidade, como coordinador da proposta vasca- atópanse os Departamentos de Saúde e de Emprego e Políticas Sociais, e precisamente a coordinación sociosanitaria foi unha dos elementos principais na obtención deste premio, en cuxa obtención colaboraron tamén o Departamento de Acción Social de Bizkaia e a Universidade de Deusto.
Segundo sinalaron o Conselleiro Angel Toña, "obter a máxima puntuación posible como Reference Site é o recoñecemento do traballo que ao longo destes últimos anos levou a situarnos na vangarda europea de excelencia, e unha confirmación das políticas que sitúan á persoa no centro de todas as nosas actuacións".
Euskadi é un dos só oito Reference Sites que conseguiron as catro estrelas, nunha convocatoria na que se recoñeceu a 74 candidaturas. O premio entregarase en Bruxelas a principios de Decembro, nunha cerimonia oficial dentro do foro European Summit on Innovation for Active and Healthy Ageing.
O pasado mes de abril o Concello de Pontevedra abría unha canle para conectar dous mundos mediante un proxecto ben interesante: Memoria en rede, unha idea que unificaba a tecnoloxía e a memoria. Dito doutro xeito, servíase das novas novas tecnoloxías para ir á procura da memoria perdida, entendendo por isto último: historias, lendas, vivencias, en definitiva, vidas… Memoria en rede botaba a andar na parroquia de Mourente e agora volta cun “proxecto redeseñado e adaptado” segundo anunciaba o concelleiro de Novas Tecnoloxías, Alberto Oubiña. Nesta segunda quenda aMemoria en rede, que comezará en setembro, chegará á parroquia de Lérez.
Así, desta volta a Memoria en rede terá unha dupla versión: Cerdeiras e Carballos. AsCerdeiras, para aqueles con menos coñecementos (ou ningúns) dispostos a aprender e a tentar participar no proxecto. E osCarballos, para persoas con algúns coñecementos informáticos que farán un pequeno repaso ao comezo do curso para ir ao miolo do proxecto: recuperar a memoria.
Con esta Memoria en rede perséguese, amais de achegar as persoas á informática, que todas as historias contadas polos participantes fiquen á disposición do público xeral nun blog no que se poderán ler e engadir comentarios de experiencias partilladas ou impresións persoais.Memoria en rede comezará os días 19 de setembro en Lérez e o 20 de setembro en Mourente.
Para aquelas persoas interesadas, os horarios serán os seguintes: luns e mércores, en Lérez; e martes e xoves en Mourente. De 16:15 a 18:15 horas, curso básico (Cerdeiras) e de 18:30 a 20:30 horas, o curso intermedio (Carballos). A distribución horaria das Cerdeiras será de 40 horas aprendendo e 10 horas de práctica. E nos Carballos, xustamente á inversa: 10 horas repasando e 40 horas recuperando (con voz gravada, textos, imaxes escaneadas, vídeos…).
Para inscribirse é preciso chamar en horario de mañá ao teléfono do Concello 986 80 43 00 e premer a extensión 7107. Aí, indicarase o nome e apelidos e o teléfono de contacto. Ou ben, acudindo pola alcaldía do Concello. Hai 15 prazas por curso.
A vivienda, de máis de 100 metros cadrados, pretende mostrar que a accesibilidade e a estética non están enfrontadas
Unha casa intelixente, accesible e sustentable percorrerá España durante os próximos meses para demostrar a técnicos profesionais, e á sociedade en xeral, que a accesibilidade é positiva para todos e que, ademais, non está enfrontada co bo gusto.
A vivenda, de máis de 100 metros cadrados, é unha iniciativa da Fundación ONCE posta en marcha no marco dun convenio subscrito co Real Padroado sobre Discapacidade, que pretende mostrar aos seus visitantes as posibilidades de construción e dotación de mobiliario nunha casa intelixente, accesible e sustentable, á vez que ofrecer solucións técnicas e tecnolóxicas a problemas de accesibilidade.
A este respecto, José Luís Martínez Donoso, director xeral da Fundación ONCE, explicou que o obxectivo da iniciativa é demostrar a técnicos e cidadáns en xeral que a eliminación de barreiras e o deseño para todos son dúas realidades posibles ás que debe tender a sociedade para contribuír á consecución da plena cidadanía de todas as persoas.
Partindo desta base, a estancia está pensada para que a visiten profesionais do sector da edificación, escolas de deseño industrial, empresas relacionadas coa construción, o urbanismo, a accesibilidade e a domótica, administracións públicas, asociacións de persoas con discapacidade e sociedade en xeral.
Dotada de salón, cociña/comedor, dormitorio, baño e hall de entrada, a casa concibiuse baixo os criterios de confort, adaptación ás necesidades dos seus habitantes, facilidade de uso, seguridade, sustentabilidade e, por suposto, o da estética.
Está previsto que a vivenda, aloxada nun tráiler, inicie o seu percorrido a finais do próximo mes de setembro e que visite as distintas comunidades autónomas para demostrar á sociedade que a accesibilidade e o bo gusto son conceptos que poden ir da man.
Segundo datos do observatorio Odismet, cofinanciado por o FSE
En España hai rexistrados 78.900 mozos con discapacidade, con idades comprendidas entre os 16 e os 24 anos, dos cales un 11,1% non ten formación, fronte aos mozos sen discapacidade, entre os cales a falta de formación é case inexistente, segundo datos de Odismet, o Observatorio sobre Discapacidade e Mercado de Traballo en España da Fundación ONCE. En canto á formación superior, só o 2% dos mozos con discapacidade cursou nela.
As razóns que explicarían esta realidade hai que buscalas, por unha banda, no tipo de discapacidade xa que, do total de mozos, o 64,9% (51.200), presentan discapacidade psíquica ou enfermidade mental, que polas súas características dificultan o desenvolvemento de formacións de elevado nivel. Doutra banda, aínda son frecuentes os obstáculos derivados da falta de accesibilidade en centros, transportes, materiais, etc., que limitan o acceso e continuidade do proceso formativo.
Eses menores niveis formativos lastran a incorporación dos mozos con discapacidade ao mercado laboral. Os datos indican que, do total de contratos realizados en 2014 a mozos, exclusivamente o 0,43% foron destinados ao colectivo. Así mesmo, do total de contratos realizados en 2014 a persoas con discapacidade, só o 5,83% foron subscritos con mozos.
A este contexto, hai que engadir a precariedade das súas condicións laborais xa que, en termos salariais, os mozos con discapacidade reciben menores contías que o resto de persoas con discapacidade, cunha diferenza de máis de 10.000 euros brutos ao ano. Do mesmo xeito, os seus salarios tamén son inferiores aos do resto de mozos da poboación xeral.
En canto á xornada parcial, esta aplícase ao 51,90% dos mozos con discapacidade, dato moi superior ao doutros segmentos e grupos.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...