A campaña 1 mes 1 profesión dixital, promovida pola Axencia de Modernización Tecnolóxica de Galicia (Amtega) en colaboración co Colexio Profesional de Enxeñaría en Informática de Galicia (CPEIG), nace co obxectivo de crear conciencia por parte da mocidade, universitarios/as, profesionais TIC e da cidadanía en xeral da necesidade de adquirir novas competencias e habilidades dixitais. Nesta ocasión aboradaráse o tema da Ciberseguridade.
Segundo as conclusións deste estudo de 2016, máis da metade dos pais colgan fotos dos seus fillos en redes sociais e perfís de Whatsapp e o 43% non falaron de forma extensa dos problemas e riscos de Internet con eles.
En rolda de prensa este martes, o director xeral de Educo, José Maria Faura, explicou que o estudo constata que "a metade de pais non son conscientes dos riscos de Internet", e que ademais moitos non saben comunicarse cos seus fillos.
Ademais, recalcou: "A violencia infantil en España é un problema real e máis frecuente do que pensamos, aínda que moitos casos non saen á luz".
Segundo datos ofrecidos na rolda de prensa, no mundo un de cada dous nenos sufriu algún tipo de violencia antes do oito anos e que na UE, un de cada cinco nenos foi vítima dalgún abuso, segundo un estudo de 2010.
A directora de Acción Social da ONG, Clarisa Giamello, destacou do estudo que o 32% dos pais atopa dificultades para manter unha comunicación diaria cos seus fillos, o 54% non falou con eles de acoso escolar e o 65% non abordou temas de educación sexual.
Ademais, o 63% dos pais considera que é a escola a que debe resolver os casos de acoso escolar --'bullying'-- e o 17% responde que é "cousa de nenos" e que non faría nada se non fora a máis.
Segundo ela, o estudo que realizaron ofrece dúas conclusións: "Os pais non son conscientes dos riscos e non hai suficiente comunicación na familia".
O responsable do Grupo de Delitos Tecnolóxicos da Policía Nacional en Castellón, Pere Cervantes, explicou que, segundo a súa experiencia, prodúcese "o paradoxo" de que nun mundo hiperconectado falta comunicación nas familias.
Indicou que o primeiro delito cometido en menores é o 'cyberbulling', o acoso en Internet, ademais do bullying, que adoitan ir relacionados, ademais doutros como o intercambio de fotos de contido sexual sen consentimento, o 'sexting'.
Para promover a protección infantil, Educo promoveu un kit de material pedagóxico e informativo destinado aos pais para axudarlles a previr a violencia cara aos seus fillos.
O kit --un destinado a pais de nenos entre seis e nove anos e outro para nenos de nove a 12-- recolle manuais, contos, guías de lectura e fichas para promover o diálogo sobre temas de violencia entre pais e fillos.
Ademais, Educo lanzou un anuncio televisivo para sensibilizar aos pais sobre os riscos de Internet no que unha nai descobre aos seus fillos menores cando están a piques de enviar fotos a un descoñecido por Internet.
Carlos Alonso, bailarín e vítima de 'bullying', explicou que sufriu acoso dos seis aos 12 anos e opinou que "o problema non son os nenos, son os pais", xa que ao seu entender moitas das condutas dos menores son por imitación.
Considerou que os consellos se deben dar aos pais dos nenos acosadores, xa que o menor non é consciente do que fai: "Deixemos de educar aos nosos fillos pola televisión e as redes sociais".
Un grupo de 20 mozos e mozas da comarca do Baixo Miño participan no programa “Emprender a través das novas tecnoloxías”, financiado pola liña Iniciativa Xove da Consellería de Política Social a través da Asociación Érguete Baixo Miño. Os e as participantes están en situación de desemprego ou ben veñen de iniciar unha etapa emprendedora e precisan de formación e asesoramente en marketing dixital, redes sociais, webs corporativas ou comercio electrónico.
A directora xeral de Xuventude, Participación e Voluntariado, Cecilia Vázquez, participou onte nunha das actividades deste programa e destacou que “Iniciativa Xove é un programa onde a Administración non lle di aos mozos e mozas o que teñen que facer, senón que lles pide propostas para despois apoialas, tratando de que a burocracia ceda o protagonismo á xuventude”.
A titular autonómica tamén explicou que “este programa Xove está concibido como un instrumento para que a mocidade poida demostrar a súa capacidade para organizar, emprender e impulsar actividades dirixidas á xuventude, ao tempo que se fomenta a súa participación, estimúlase o talento xuvenil e permite poñer en práctica as súas ideas”.
Ademais, Cecilia Vázquez tamén fixo referencia ao Estudo da Universidade de Santiago sobre “Os programas de Educación non formal e empregabilidade da Xuventude en Galicia”, que foi presentado este mesmo ano e que analizou cientificamente varios programas da Dirección Xeral de Xuventude, Participación e Voluntariado, entre eles Iniciativa Xove. Neste estudo, se indica que a satisfacción xeral coa formación adquirida no caso dos participantes en Iniciativa Xove foi do 82% e ante a pregunta de se recomendarían o programa, un 88% responden afirmativamente. En canto á utilidade dos coñecementos adquiridos para o emprego, responden positivamente un 76% dos participantes no programa.
Este ano un total de 122 entidades xuvenís e grupos informais de mozos e mozas se benefician do programa Iniciativa Xove. Das iniciativas financiadas, 68 corresponden a asociacións xuvenís e 54 a grupos informais de mozas e mozos. En liña coas recomendacións da Unión Europea, Galicia foi a primeira comunidade autónoma que financiou iniciativas de grupos informais, co fin de que a excesiva burocracia non sexa un impedimento para que leven a cabo as súas ideas.
A directora Xeral de Xuventude lembrou que Iniciativa Xove financia o cento por cen das iniciativas de interese cun orzamento máximo de 5.000 euros. Así mesmo, todas as entidades e grupos aos que se lle conceda a axuda e o soliciten, reciben un anticipo do 80% sobre o total da cantidade concedida.
Unha vez finalizadas as accións, os participantes poderán obter un certificado oficial de experiencias de educación non formal en materia de xuventude, como instrumento que permitirá confirmar a participación neste programa e sobre todo valorar as competencias adquiridas.
Hoxe A Coruña acollerá o seu primeiro encontro Coruña Dixital, un programa promovido pola Concellería de Culturas, Deporte e Coñecemento, coa finalidade de expandir na cidade as novas prácticas culturais e creativas xurdidas a través das novas tecnoloxías. Máis polo miúdo, a xuntanza deste día 13 tratará sobre as tendencias máis innovadoras do coñecemento e a creatividade dixital. A xornada, cuxa inscrición é de balde, será a primeira acción que inaugure esta iniciativa pioneira en Galicia "formada por axentes e colectivos que traballan arredor destas prácticas e que conta con apoio institucional", segundo indicou o edil José Manuel Sande.
"Con esta proposta, o Goberno local quere facilitar a conexión das persoas interesadas na cultura dixital e no uso creativo da tecnoloxía", explicou o concelleiro, engadindo que "así como impulsar o emprendemento sustentable e con capacidade transformadora entre a cidadanía que quere ser parte activa de contornas colaborativas e horizontais". Indo á xornada en cuestión, cómpre dicir que se desenvolverá dende as 10 até as 19.30 horas no Centro Ágora e, mediante charlas (de menos de 20 minutos cada unha), achegaranse as principais tendencias da innovación social a través de prácticas dixitais, proxectos tecnolóxicos sociocomunitarios, ou de contidos dixitais colectivos, espírito Maker e robótica educativa.
No encontro, que participarán profesionais do sector como Juan Freire, José Luis Vicente, Beka Iglesias, ou Fran Díaz, tamén se analizará a situación actual do panorama galego no eido das novas tecnoloxías e narrativas de Internet. Para iso, a xornada contará coa presencia de María Yáñez, Chus Prol, Fran Quiroga e Tucho Méndez, amais de Diego Parajó, que coordinará na sesión de tarde as mesas horizontais nas que se abrirá un espazo de traballo para desenvolver, entre todas e todos os asistentes, as posibilidades desta iniciativa, que terá continuidade nos vindeiros meses.Engadir que Coruña Dixital achegará ao longo do último trimestre do ano numerosa programación que complementará a oferta existente da cidade, entre as que se atopan o Hackathon, un evento que reunirá a profesionais do deseño, a programación e outros perfís no que se experimentará con datos e aplicacións, ou o Ateneo Atlántico de Prototipado, no que se levará a cabo un laboratorio intensivo aberto de tecnoloxías libres.
Para realizar a inscrición e obter máis información sobre a iniciativa e outras propostas para este outono da Concellería de Culturas, Deporte e Coñecemento en relación coa cultura dixital, pódese visitar a web de Coruña Dixital.
Onte deu comezo o Curso de Mercadotecnia Dixital nas instalacións da Fundación CEL de Lugo, unha actividade formativa co-financiada pola Rede Eusumo da Xunta e que vai fornecer contidos e recursos sobre os mellores xeitos de tirarlles partido ás novas ferramentas (comercialmente e comunicativamente) a unha vintena de alumnos (emprendedores e empresarios do ámbito da economía social). Segundo informa a Fundación, acadouse coa devandita cifra o “cheo total” no que a prazas dispoñibles se refire. A actividade que arrincou onte (a primeira de dous cursos previstos de mercadotecnia TIC) está dirixida a membros de cooperativas e sociedades laborais de recente creación, así como a emprendedores do ámbito social.
Trátase dun curso de iniciación e outro de nivel avanzado que esgotaron as súas prazas ao pouco tempo de lanzar o proceso de inscrición. A través deles búscase “facilitar a comprensión da importancia que supón acometer procesos de transformación dixital nunha organización e a adquisición de competencias tecnolóxicas básicas”. Igualmente, fomentarase “a aprendizaxe para o desenvolvemento dun plan de comunicación dixital propio, e indicarase como tirar proveito das principais ferramentas para a súa aplicación, como blogs e redes sociais”. Esta formación está a ser impartida por un experto profesional do sector: Raúl Ordóñez, consultor e formador TIC, especializado en mercadotecnia en liña e medios sociais). A achega de contidos levarase a cabo de maneira presencial e baixo un formato eminentemente práctico.
Segundo informa a Fundación CEL a propósito dos porqués destas accións formativas, “o coñecemento e implementación de estratexias de mercadotecnia dixital é hoxe fundamental nas empresas”. Cousas como a mercadotecnia dixital, en xeral, e a mercadotecnia de contidos, en particular, “convertéronse en ferramentas fundamentais que permiten que as pequenas e medianas empresas tamén poidan chegar aos seus clientes de forma rápida e de balde, ofrecéndolles información interesante para a súa toma de decisións”, engade a entidade de Lugo.
O acubillo dixital de lembranzas da provincia de Lugo, Memoria Dixital de Lugo, vai coller pulo con máis información e máis presenza na vida en liña dos internautas. Así nolo vén de certificar a Deputación de Lugo, que se comprometeu este venres 9 de setembro a impulsar con varias medidas (contidos, servizos, promoción, participación) o devandito banco audiovisual de recordos.
As medidas foron dadas a coñecer na Pontenova, polo presidente da Fundación TIC e da Deputación de Lugo, Darío Campos. Segundo fixo saber, “abrimos a toda a sociedade lucense este arquivo, pioneiro na nosa provincia, que tivo como xerme un programa destinado exclusivamente aos maiores de 55 anos”.
Campos engadiu que esta nova andaina arrinca con novos contidos e cunha páxina Memoria Dixital Lugo, explicou, inclúe vídeos, arquivos de son, fotografías antigas e diversos documentos dirixidos a achegar un máis amplo coñecemento “da nosa historia recente”, sobre todo “a da primeira metade do século XX”. E engadiu: “Será un legado para as vindeiras xeracións, tanto para os lucenses como para os investigadores e os amantes da historia en xeral”.
Na presentación proxectáronse varios exemplos destes “recordos” dixitalizados e inmortalizados. Ademais, o presidente provincial partillou cos veciños que asistiron ao acto a navegación pola devandita páxina, “moi doada de empregar”, a través de computadores táctiles. Segundo engadiu con vistas ao futuro, a intención é ampliar o banco con máis testemuños individuais que axuden “a conservar para as vindeiras xeracións o mellor tesouro dun pobo: a súa memoria colectiva”. O presidente da Fundación TIC animou a todos os lucenses, e tamén aos concellos, ás asociacións e aos centros de maiores da provincia a que “contribúan a crear este banco de recordos”. Para facelo, poderán achegarse á sede da Fundación TIC, na rúa Frei Plácido Rei Lemos, ou chamar ao teléfono 982 284 6 67. Tamén poderán enviar a súa propia gravación ou fotos e documentos escaneados ao correo maiores@fundaciontic.org.
A maiores desta iniciativa de recollida, os profesionais e estudantes da Fundación desprazaranse por toda a provincia para atender as solicitudes dos concellos e dos colectivos. Contarase para isto cunha equipa de titulados da Escola de Imaxe e Son, que non só organizarán os encontros e gravarán os testemuños senón que tamén terán ocasión de “ensinar aos participantes a gravarse a si mesmos co móbil e enviar o vídeo por correo electrónico ou a escanear unha foto”. Neste senso, o obxectivo da Deputación é establecer unha canle dixital de colaboración e intercambio de coñecemento entre diferentes xeracións. Todo o material obtido publicarase na web memoriadixitallugo.es, en palabras da entidade provincial “unha páxina especialmente deseñada para esta nova etapa”. Está artellada nos seguintes bloques: recordos, voces, imaxes e experiencias. Ademais, os testemuños distribúense en apartados relativos á nenez, mocidade, matrimonio, emigración, traballos e vida no rural, feiras e festas, Lugo máxico e outros recordos.
No traballo participou o investigador da Universidade de Santiago de Compostela (USC) Suso Benítez-Baleato e Nils B. Weidmann, da Universidade de Constanza (Alemaña), quen é ademais o principal asinante do artigo na revista científica.
A Universidade de Santiago destaca nun comunicado que o estudo está baseado na análise do tráfico global de internet mediante unha observación espacial da penetración en diferentes áreas do planeta e da denominada fractura dixital.
O método "permite observar a conectividade de calquera área do planeta aumentando a imaxe tanto como sexa necesario para calcular a penetración por países, provincias ou municipios, e observar a súa evolución por anos, meses ou semanas", indica a universidade (USC).
Os resultados mostran unha "forte e persistente" situación de "discriminación dixital" daqueles grupos politicamente excluídos, segundo Benítez-Baleato.
Os resultados contrastan coa crenza xeneralizada de que a expansión de internet está asociada a un incremento de dereitos e á mellora da calidade democrática, destaca a universidade.
Os grupos politicamente marxinados presentan significativamente menores taxas de penetración en comparación con aqueles no poder, "un efecto que non pode ser explicado unicamente por factores económicos ou xeográficos".
A hipótese da 'tecnoloxía da liberación' defende que internet fomenta a transparencia e a rendición de contas dos gobernos non democráticos en todo o mundo, de maneira que iso debería axudar aos movementos de oposición a organizarse para a acción colectiva a favor de "os grupos marxinalizados", en opinión dos autores.
Benítez-Baleato opina que "o desenvolvemento científico-técnico estivo historicamente condicionado por criterios políticos e relixiosos, e non existen razóns que convertan a informática nunha excepción".
Advirte de que as políticas de desenvolvemento que buscan promover a paz e a democratización a través de internet requiren ter en conta a "desigual prestación de servizos dixitais nos países" e a "capacidade dos gobernos para condicionar o acceso" ás redes dixitais.
"Só aliviando a desigualdade dixital, as canles modernas de comunicación facultarán ás persoas e sociedades para o fomento do desenvolvemento político e económico", indican os autores do artigo.
O Colexio Oficial e a Asociación de Enxeñeiros de Telecomunicación de Galicia (COETG-AETG) veñen de fallar os Premios Galicia das Telecomunicacións e da Sociedade da Información 2016, que serán entregados no transcurso da XXI Gala das Telecomunicacións. Esta gran xuntanza dos nosos profesionais das TIC celebrarase o vindeiro 30 de setembro, ás 20,00 horas, no Gran Hotel da Toxa.
O Premio Enxeñeiro Gerardo García Campos á mellor iniciativa empresarial no sector TIC foi para Monet Viticultura, pola “introdución das novas tecnoloxías da información en sectores onde aportan valor a procesos tradicionais, e pola súa aplicación a mercados amplos”. O xurado tivo tamén en conta “a orientación de esta empresa á exportación e a súa actividade en I+D+i e a creación de emprego tecnolóxico”.
O Premio Gradiant á mellor tese doutoral aplicada ao sector TIC recaeu en Beatriz Remeseiro López, por Avances na diagnose do síndrome de ollo seco: desenvolvemento de métodos automáticos para a avaliación de patróns na capa lípida da película lacrimal. O xurado salienta que a tese fornece “solucións para un problema de saúde pública, o síndrome do ollo seco, que afecta a unha grande parte da poboación maior de 65 anos”. Este traballo, sinalou Gradiant, “ten xa demostrado a súa aplicación, tanto no eido académico como na industria do sector da saúde, e ten un claro potencial de transferencia da tecnoloxía desenvolvida”.
O Premio Ineo ao produto ou servizo TIC máis innovador de 2016 foille concedido a EGATEL S.L. polo proxecto Smart LNB. Neste caso, recoñécese “o carácter innovador do uso eficiente das capacidades de transmisión de datos vía satélite”. Tamén se valorou “o amplo espectro das súas posíbeis aplicacións e a súa contribución á transformación dixital de diversos ámbitos como a saúde, o fogar dixital e o sector industrial”.
O Premio ao Mellor Proxecto TIC con Beneficios Sociais, outorgado en colaboración coa axencia AMTEGA, recaeu en EOSA, pola creación de INclue, sistema tecnolóxico innovador para a valoración técnica da exclusión social en base a criterios homoxéneos. O xurado tivo en conta “que a ferramenta presentada permite unha estimación precisa do grao de exclusión social dunha persoa”.
O Premio Acuntia á empresa galega que aposta polo desenvolvemento de infraestruturas intelixentes de telecomunicacións, concedéuselle ao Real Club Celta de Vigo, por “liderar o desenvolvemento de sistemas tecnolóxicos que complementan ós partidos de fútbol e que favorecen a implicación dos afeccionados”.
O Premio ao Mellor expediente académico do Máster en Enxeñaría de Telecomunicación da Universidade de Vigo foi para Daniel Rodríguez Domínguez. Por último, o Premio Enxeñeiro do Ano outorgado polo Colexio Oficial de Enxeñeiros de Telecomunicación de Galicia e a Asociación de Enxeñeiros de Telecomunicación de Galicia recaeu en César Mariñas Dávila, pola “súa traxectoria en postos de responsabilidade en diferentes empresas do sector TIC e no exercicio libre da profesión”. Igualmente, distínguese “a súa profesionalidade e independencia, e a súa contribución ao desenvolvemento das telecomunicacións en Galicia”.
O Concello de Lalín, en colaboración coa firma local Máis 3D, vai organizar un curso de balde sobre impresión 3D. A actividade formativa, dirixida sobre todo a mozas e mozos con idades comprendidas entre os dezaseis e os 35 anos, levarase a cabo en dous grupos establecidos en base ao nivel de coñecemento (básico ou avanzado) dos participantes. As clases desenvolveranse na Aula CeMIT de Lalín e o horario será de 16.00 a 20.00 horas. Manuel Martín, Soledad Jarmolchuck e Alberto Novo, de Máis 3D, serán os encargados de impartir os contidos. Complementarán o achegamento á impresión en 3D con equipamento in situ, por exemplo as impresoras Zortrax M200, Legio, XYZ Davinci ou XYZ Nobel.
Segundo fixeron saber na presentación, a finalidade é conseguir que os participantes sexan quen de tirar partido dunha impresora 3D, levar a cabo un deseño e, tamén, traballar con material xa impreso. Máis en detalle, búscase achegar “os coñecementos precisos para que os alumnos poidan realizar impresións 3D de nivel medio nas tecnoloxías FDM e SLA, amais de materializar diferentes pezas con elementos variados co fin de comprender as moitas aplicacións destas tecnoloxías”. Na presentación tamén participaron os concelleiros de Novas Tecnoloxías e Cultura, Tomás Vilarió e Lara Rodríguez, respectivamente. O curso, como dixemos, levarase a cabo en dúas quendas. A primeira será os días 12, 13, 14 e 15 de setembro, con horario de 16.00 a 20.00 horas. A segunda será os días 19, 20, 21 e 22 do mesmo mes e co mesmo horario.
A Xunta e a Federación Galega de Municipios e Provincias (Fegamp) colaborarán de novo en 2017 para garantir que a capacitación dixital chegue a todos os galegos a través das actividades que desenvolve a Rede de aulas CeMIT.
Así se recolle nun convenio, aprobado hoxe polo Consello do Goberno galego, e que asinarán proximamente a Axencia para a Modernización Tecnolóxica de Galicia (Amtega), a Vicepresidencia e Consellería de Vicepresidencia, Administracións Públicas e Xustiza e a Fegamp.
Con este acordo garántese e continuidade e mellora dun dos instrumentos fundamentais do Plan de inclusión dixital de Galicia 2020 para reducir non só a primeira fenda dixital, a do acceso ás TIC, senón tamén a segunda fenda dixital, a das habilidades dixitais, facilitar unha aprendizaxe permanente neste eido e contribuír á mellora da empregabilidade.
Investimento
O acordo establece que en 2017 a Amtega achegará aos concellos a través da Fegamp 782.774,70 euros para a realización de actividades en materia de inclusión dixital nas consideradas aulas de referencia da Rede. Este orzamento distribuirase atendendo a criterios de actividade das aulas, así como da poboación do concello.
O acordo inclúe a posibilidade de dispor dunha listaxe de aulas de reserva de xeito que, cando unha aula de referencia sexa baixa por vontade propia ou por incumprimento dos criterios establecidos, as aulas de reserva poderán pasar a ser aula de referencia sempre e cando cumpran os requirimentos de actividade.
Plan de inclusión dixital 2020
Os obxectivos previstos da Rede para 2017 son impartir 31.500 horas de formación dixital gratuíta e acadar os 65.000 usuarios rexistrados.
As aulas CeMIT son un dos instrumentos fundamentais do Plan de Inclusión Dixital de Galicia 2020, que a Amtega puxo en marcha este ano para facilitar non só a alfabetización dixital senón tamén unha capacitación máis avanzada no eido das TIC.
O plan é unha estratexia cimentada na cooperación, no consenso e na implicación de todos os axentes do ecosistema dixital, que conta co apoio de 700 aliados dixitais e que mobilizará máis de 7 millóns de euros de fondos públicos ata 2020 para abordar tres obxectivos.
O primeiro, continuar reducindo a fenda dixital e crear hábitos de uso das TIC entre aqueles que non as empregan. O plan busca incrementar en 8 puntos (do 67% no día de hoxe ao 75% en 2020) a porcentaxe da poboación galega que acceda a Internet habitualmente.
En segundo lugar, incrementar os coñecementos dixitais dos que xa empregan as TIC. O Plan reforzará os itinerarios formativos avanzados e o asesoramento á busca de emprego co apoio das TIC e, ademais, difundirá as oportunidades de emprego que ofrece o sector tecnolóxico.
O terceiro obxectivo é fomentar o uso das TIC como unha forma innovadora de resolución dos desafíos sociais, grazas a iniciativas de innovación social dixital.
204.000 horas de formación e preto de 58.000 usuarios en 5 anos
A rede CeMIT conta cun total de 98 aulas, presentes en 92 concellos. Desde a súa posta en marcha pola Amtega, hai cinco anos, a Rede leva impartidas máis de 204.000 horas de formación gratuíta, principalmente en alfabetización e capacitación dixital a preto de 58.000 usuarios rexistrados.
A rede ofrece tamén formación especializada por colectivos grazas á súa colaboración co Centro Demostrador TIC, o Centro de Novas Tecnoloxías de Galicia e a Escola Galega de Administración Pública, retransmitindo xornadas e actividades a través da súa rede de videoconferencias.
Ademais, desde 2014, CeMIT é a rede habilitada para acreditar á cidadanía a certificación galega de competencias dixitais en ofimática (Codix), da cal xa se examinaron máis de 1.900 persoas.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...