A Xunta e Telefónica porán en marcha en 2018 “Galicia Open Future: edición retos Industria 4.0”, un programa de apoio ao emprendemento no que os participantes deberán propoñer solucións a seis retos no ámbito da Industria 4.0, formulados por empresas tractoras. O Consello do Goberno galego autorizou hoxe a sinatura do convenio entre a Administración autonómica e o operador, que contará cun investimento total de preto dun millón de euros ata 2019, dos cales a Xunta achegará 570.000 euros e Telefónica 425.000 euros.
“Galicia Open Future: edición retos Industria 4.0” lanzará diferentes convocatorias para cada un dos retos con base nas propostas definidas polas empresas, que serán seleccionadas previamente por Telefónica e a Xunta, a través da Axencia para a Modernización Tecnolóxica de Galicia (Amtega) e a Consellería de Economía Emprego e Industria, a través da Axencia Galega de Innovación (GAIN) e o Instituto Galego de Promoción Económica (IGAPE) e XesGalicia.
Admitiranse ata dez ideas por reto, cuxos promotores terán a oportunidade de coñecer en profundidade a problemática e as necesidades formuladas polas empresas durante tres xornadas de traballo intensivas. Os gastos de desprazamento derivados destas xornadas serán sufragados polo Igape. Tras este período, os emprendedores e startups presentarán os seus proxectos definitivos, dos cales se seleccionarán catro finalistas.
Aceleración, axudas e premios
As catro iniciativas seleccionadas contarán co apoio financeiro de GAIN -10.000 euros cada unha- e terán acceso a un programa personalizado de aceleración con sesións de mentoring e coaching especializado, acceso a un espazo de crowdworking na Cidade da Cultura e á plataforma en liña de Galicia Open Future. O mellor proxecto do programa de aceleración recibirá unha axuda de 10.000 euros da Amtega.
O proxecto gañador de cada reto recibirá un premio de 20.000 euros a través de GAIN, para implantar un piloto da súa solución coa empresa que propuxo o reto. Ademais, poderá acceder a un préstamo reembolsable de XesGalicia de ata 100.000 euros polo investimento realizado na posta en marcha do piloto. Os outros tres proxectos finalistas, sempre que estean constituídos como empresa, poderán optar a un préstamo reembolsable por un máximo de 50.000 euros.
Galicia Open Future
A iniciativa Galicia Open Future naceu dentro do compromiso de Telefónica como asinante do Pacto dixital de Galicia, subscrito polo operador xunto con outras 12 empresas tecnolóxicas coa Xunta para impulsar o desenvolvemento tecnolóxico da Comunidade. Tras tres edicións, nas cales participaron 150 iniciativas emprendedoras, Galicia Open Future inicia unha nova etapa para impulsar o emprendemento no ámbito da Industria 4.0.
Con esta nova edición do GOF consolídase o polo tecnolóxico da Cidade da Cultura, onde está a sede da Amtega e outras das iniciativas do Pacto dixital, o Centro de Innovación social Dixital Vodafone Conecting for Good Galicia e o Centro de Excelencia en Intelixencia de Negocio de DXC.
O director do Igape, Juan Cividanes, salientou en Celanova o completo catálogo de servizos e axudas que a Xunta pon a disposición das novas empresas, no peche do coworking Celanova-Terras da Limia, o demoday onde os 20 emprendedores participantes nesta segunda edición presentaron os seus proxectos empresariais despois de completar o proceso de formación e asesoramento.
Durante a súa intervención, Cividanes salientou que os novos empresarios poderán seguir contando cos servizos e os instrumentos de apoio que ofrece a Consellería de Economía, Emprego e Industria para facilitar a posta en marcha e a consolidación temperá das novas empresas. Deste xeito, lembroulles que, a través do Igape, poderán seguir accedendo ao asesoramento especializado ou titoría que precisen, así como a préstamos directos como os activados no novo programa de instrumentos financeiros innovadores (IFIs) para financiar os seus investimentos.
Os emprendedores que desenvolveron os 19 proxectos empresariais neste espazo coworking, que impulsa a Xunta, en colaboración coa Escola de Organización Industrial (EOI), optaron por ámbitos de actividade tan diversos como son servizos tecnolóxicos apoiados nas TIC, o sector da moda ou produtos relacionados coa valorización de recursos do territorio como o turismo ou os produtos agroalimentarios.
O director do Igape amosouse convencido de que os proxectos empresariais servirán para dinamizar economicamente as comarcas do sur de Ourense, con novas empresas relacionadas co turismo sostible e as actividades de ocio que poñen en valor a natureza e o patrimonio da provincia.
Cividanes, ademais, avanzou que a comezos do próximo ano se prevé organizar un foro de investimento no que participen os mellores proxectos de todos os espazos coworking para facilitarlles o acceso a potenciais investidores, a través da Rede Galega de Business Angels ou de XesGalicia. Destacou tamén que se prevén activar de novo, en datas próximas, as axudas a través de programas como Galicia Emprende e Galicia Rural Emprende.
O obxectivo fundamental das iniciativas de coworking, que contan con cofinanciamento do Fondo Social Europeo (FSE), é acelerar o desenvolvemento de proxectos empresariais e a creación de emprego sobre o territorio, incrementando as probabilidades de éxito das ideas impulsadas polos emprendedores, e facilitando a súa posta en marcha e a súa consolidación temperá.
INDRA foi galardoada na primeira edición dos Premios Innovación e Tecnoloxía do diario 'La Razón', na categoría de 'Innovación ao proxecto social', por e-Glance, unha innovadora aplicación de realidade aumentada que contribúe a mellorar a percepción e orientación espacial das persoas con deficiencia visual e, polo tanto, facilita a súa adaptación ao lugar de traballo e a súa integración laboral.
Mediante vibracións, sons 3D ou indicacións de voz no smartphone, e-Glance ofrece ás persoas invidentes información relevante en tempo real sobre a súa contorna, facilitándolles tarefas como planificar unha ruta no medio de múltiples obstáculos móbiles ou obter información sobre a localización e identificación de persoas e obxectos a distancia.
O premio pon en valor o traballo e o esforzo do equipo deste proxecto, que se está desenvolvendo no marco da Cátedra Indra-Fundación Adecco de Investigación en Tecnoloxías Accesibles da Universidade Politécnica de Madrid (UPM), e destaca o seu valor para a sociedade. Ademais, supón un recoñecemento ao compromiso de Indra coas persoas con discapacidade e á súa aposta polo desenvolvemento de Tecnoloxías Accesibles.
Indra puxo en marcha a súa iniciativa de Tecnoloxías Accesibles hai máis de 15 anos como parte da súa Responsabilidade Social Corporativa (RSC), para impulsar o desenvolvemento de solucións e servizos innovadores que contribúan a mellorar a calidade de vida, o acceso á educación e a integración social e laboral deste colectivo vulnerable.
A compañía desenvolveu máis de 50 proxectos e creou cátedras de investigación neste ámbito en universidades de España e Latinoamérica, en colaboración con distintas fundacións e asociacións, cun modelo innovador que aúna os esforzos de universidade, empresa e terceiro sector .
A directora de Comunicación Interna e Responsabilidade Social Corporativa de Indra, Arancha Jiménez, e o profesor da ETSI de Telecomunicación da Universidade Politécnica de Madrid e director da Cátedra Indra-Fundación Adecco da UPM, José Javier Serrano, foron os encargados de recoller o galardón.
Bastón virtual con "visión" periférica
A ferramenta e-Glance axuda aos invidentes para explorar activamente a contorna, dirixindo a atención a zonas concretas fora do seu alcance coma se se tratase dun bastón virtual. Ademais, ofrece información equivalente ao que se denomina visión periférica, grazas ás alertas en tempo real sobre os acontecementos que ocorren na contorna, máis aló do foco principal de atención.
Grazas á virtualización de espazos e situacións, a aplicación fai posible coñecer virtualmente un espazo antes de visitalo fisicamente. Ademais, esta tecnoloxía pódese usar para fomentar habilidades necesarias na vida diaria das persoas invidentes en menor tempo e sen risco, formalas para a súa incorporación a un posto de traballo ou, mesmo, sensibilizar a persoas non invidentes.
Por iso, e-Glance facilitará ás persoas invidentes acceder aos seus postos de traballo e desenvolverse mellor neles de forma autónoma, un aspecto positivo tanto para o usuario como para a súa empresa. Así mesmo, reducirase notablemente a tensión que pode producir a falta de visión, por unha atención constante aos detalles, e aumentará a autoconfianza destas persoas.
A aplicación poderá ser utilizada noutras contornas, como hoteis, centros comerciais, estacións de tren, etc. Ademais, pola súa capacidade para integrar información de contexto ou ambiental, e-Glance podería adaptarse para axudar a persoas con outro tipo de discapacidade, como a auditiva ou cognitiva.
Probas en escenarios reais
A aplicación e a plataforma para xerar espazos virtuais baseados en localizacións reais xa foron probados e validados coa colaboración de persoas con discapacidade visual, grazas ao apoio e a participación no proxecto da Delegación de Madrid e a dirección xeral de Autonomía Persoal, Atención ao Maior, Mocidade, Lecer e Deporte da Organización Nacional de Cegos de España (ONCE) e da Fundación ONCE.
O Centro de Tecnoloxía Biomédica da UPM xa está a levar a cabo a segunda fase do proxecto de I+D+i que desenvolve e-Glance, na que se está validando a tecnoloxía desenvolvida en espazos reais controlados.
En concreto, realizáronse as primeiras probas con usuarios invidentes no Hotel Ilunion de Alcalá Norte e no Living Lab da Universidade Politécnica de Madrid, tras construír os seus respectivos escenarios virtuais.
Nesta segunda fase tamén está previsto levar a cabo novos pilotos para probar a utilización da ferramenta no ámbito laboral e crear un dispositivo físico compatible co bastón para invidentes, de forma que se poidan enviar e recibir as instrucións do teléfono móbil con lixeiros movementos da man.
Arredor de oitenta emprendedores participaron esta semana, en Lugo e Vigo, na celebración dos Startup Day da aceleradora de proxectos innovadores ViaGalicia, unha iniciativa impulsada polo Consorcio da Zona Franca e a Axencia Galega de Innovación e que conta con dúas sedes de seu, unha en Vigo e outra na cidade da Muralla (na sede da Fundación CEL), dende onde se ofrecen variados recursos tecnolóxicos, loxísticos e humanos para o aceleramento de todo tipo de proxectos novos. Na cita de Lugo, na que participaron Teresa Pedrosa (delegada do Consorcio) e Patricia Argerey (directora de GAIN), déronse a coñecer hoxe os trinta proxectos seleccionados para a sede local, que puideron demostrar as súas habilidades e competencias ante o equipo avaliador (con vistas a obteren un pase para a fase de Academia). Trátase da quinta convocatoria de ViaGalicia, para a que se presentaron 200 proxectos. O pasado martes celebrouse esta mesma sesión cos proxectos seleccionados para a sede de Vigo.
A selección das iniciativas empresariais que pasarán á fase de Academia (até un máximo de 40 proxectos, 20 iniciativas por cada sede, Lugo e Vigo) daranse a coñecer a semana vindeira. Neste seguinte chanzo formativo de ViaGalicia, os emprendedores coñecerán as ferramentas necesarias para definir o seu modelo de negocio e mellorar as súas propostas de valor. Cun orzamento de 2,65 millóns de euros para a súa quinta convocatoria, ViaGalicia apoia con este programa de aceleración a proxectos de negocio a través de formación, asesoramento, traballo en colaboración (co-working) e financiamento. Poderán obter ata 125.000 euros en axudas directas e de capital risco.
A Fundación CNSE e a Fundación Vodafone España colaboran nun proxecto de alfabetización dixital no uso de teléfonos intelixentes dirixido ás persoas maiores xordas usuarias da lingua de signos. A formación consiste na impartición de 34 talleres nas 17 federacións territoriais da CNSE.
A aparición destes dispositivos xerou unha nova contorna no que as persoas maiores poden vivir con maior autonomía persoal e independencia, e poden ver mellorada a súa calidade de vida.
Este proxecto enmárcase dentro dun Convenio de Colaboración que foi subscrito por ambas as entidades e asinado polos seus respectivos responsables: Santiago Moreno, por parte da Fundación Vodafone España, e Concepción Mª Díaz, en representación da Fundación CNSE.
A iniciativa inclúe a formación a máis de 300 persoas maiores xordas no uso de teléfonos intelixentes e o acceso a Internet desde os mesmos, mostrándolles como utilizalos, que aplicacións poden usar segundo os seus gustos e preferencias para o contacto con familiares e amigos, para xestionar recordatorios, para moverse en transporte público ou vivir máis activamente. Todo iso utilizando vídeo-pílulas formativas que incorporan lingua de signos, tanto para dispositivos con sistema Android como para os que utilizan o sistema operativo iOS, o que contribuirá a que as persoas maiores xordas poidan asimilar as súas funcionalidades e así, beneficiarse de servizos que favorezan a súa autonomía persoal
Os 34 talleres impartiranse ata marzo de 2018. As persoas interesadas en asistir deberán contactar coas respectivas federacións territoriais da CNSE.
O proxecto denomínase e-Glance e funciona cun smartphone, a través do cal o usuario vai recibindo información sobre o contexto físico que o rodea para facilitarlle a súa mobilidade.
Esta idea, pensada nun inicio para axudar ao usuario na súa contorna de traballo, foi recoñecida co premio Innovación e Tecnoloxía outorgado polo diario ‘La Razón' na súa categoría de Proxecto Social.
Por unha banda, o programa funciona informando ao usuario dos obstáculos que se pode atopar na dirección na que sinale co teléfono móbil.
Ademais, ofrece avisos en tempo real sobre a periferia da persoa cega, é dicir, que non só informa sobre o punto ao que sinale o usuario, senón tamén do que o rodea.
Sen dúbida un fantástico proxecto do que vos iremos informando a medida que vaia avanzando.
A Axencia para a Modernización Tecnolóxica de Galicia (Amtega) pon en marcha o Plan de Promoción do Talento Dixital de Galicia, DigiTalent 2020, para reducir a fenda entre a dispoñibilidade de traballadores con competencias dixitais e a crecente demanda destes perfís no mercado laboral.
Para avanzar neste obxectivo o Plan DigiTalent contempla, como punto de partida, máis de 20 actuacións en torno a tres eixos de actuación: impulsar as vocacións STEM, promover a adaptación aos novos perfís dixitais e a formación de E-líders para a transformación dixital. Cun orzamento público-privado de 5 millóns de euros ata o 2020, DigiTalent formúlase como unha iniciativa aberta ás achegas dos axentes do ecosistema dixital, entre os que están as 12 empresas que en 2013 se adheriron ao Pacto Dixital da Xunta para impulsar o crecemento tecnolóxico da Comunidade
Actualmente en Galicia só o 9,3% dos matriculados no sistema universitario cursa carreiras do ámbito STEM (estudos científicos, tecnolóxicos, en Enxeñarías ou Matemáticas). Unhas cifras que contrastan coa alta empregabilidade dos profesionais do ámbito dixital. Só na Comunidade o sector tecnolóxico mantivo una taxa de emprego estable en torno ao 1,6%, batendo o seu récord de emprego en 2016 con máis de 16.000 traballadores.
Responsables das empresas tecnolóxicas adheridas ao Pacto Dixital, Indra, Everis, Iecisa, Satec, Televés, R, Altia, Coremain, Telefónica, Vodafone, DXC e o Clúster TIC de Galicia participaron esta mañá nunha xuntanza de traballo coa directora da Axencia para a Modernización Tecnolóxica de Galicia, Mar Pereira, para articular a súa participación no Plan DigiTalent.
Programa de bolsas e tecnólogos por un día
Como punto de partida, a Xunta propuxo a estas a súa participación en dúas das iniciativas previstas en DigiTalent: o Programa de bolsas Áncora e a Iniciativa Tecnólogos por un día.
Áncora é un programa de prácticas non laborais en grandes empresas do sector TIC, tanto en centros de traballo de Galicia como do estranxeiro, con compromiso de contratación das persoas que superen con éxito o período de prácticas, que será de entre 6 e 9 meses. Está dirixido a estudantes universitarios, de FP ou recentemente titulados que estean cursando formación da rama tecnolóxica.
Tecnólogos por una día é unha iniciativa dirixida a rapazas e rapaces de entre 12 e 17 anos, que terán a oportunidade de experimentar en primeira persoa a xornada laboral dun profesional do sector, participando nas distintas actividades que teña na axenda de traballo (reunións, visitas a clientes tecnolóxicos, comida de traballo, etc.). O obxectivo é mostrarlles as dinámicas que dominan este tipo de profesións e resolver as súas dúbidas vocacionais.
Primeiro eixo: impulso das vocacións STEM
Aínda que un 50% dos alumnos galegos matriculados en bacharelato cursan a rama de ciencia e tecnoloxía, a maioría non chega a matricularse nunha carreira STEM. Por iso, o primeiro eixo do Plan busca fomentar o atractivo vocacional das profesións científico-tecnoloxías entre a poboación máis nova, especialmente entre as mozas, con exposicións e accións lúdico-formativas e actividades de mentorado. Crearanse espazos con equipamento de última xeración para achegar aos máis novos as novas tendencias tecnolóxicas, axendas de actividades con talleres e competicións de robótica, enxeñaría, programación, etc.
Nesta mesma liña fomentarase o atractivo das profesións STEM desde as primeiras etapas escolares con actuacións como Tecnólogo por un día ou campamentos de verán con obradoiros TIC. E tamén o talento precoz con programas para a xestión de talento STEM de alto rendemento para alumnos con aptitudes tecnolóxicas avanzadas.
Segundo eixo: fomento de novos perfís dixitais
Calcúlase que Europa contará con 500.000 postos vacantes para profesionais TIC no 2020 e que nos vindeiros anos o 90% das profesións requirirán de novas competencias dixitais. A transformación dixital está a crear novas profesións que afectan a todos os sectores: novos perfís tecnolóxicos e a transformación de profesións tradicionais que requiren de novas habilidades dixitais.
Para afrontar estes cambios DigiTalent contempla actuacións para ofrecer capacitación continua aos profesionais con accións formativas e de asesoramento como o programa Áncora, sesións divulgativas de novos perfís dixitais, ou o Observatorio Tecnolóxico DXC.
Facilitar a adaptación de profesionais non TIC con programas de reciclaxe profesional e garantir capacitación dixital básica de todos os profesionais
Terceiro eixo: E-líders para a transformación dixital
Europa precisará ata o 2020 uns 250.000 perfís profesionais directivos con capacidade de liderar a transformación dixital da súa empresa. Por iso o Plan conta con medidas para facilitar a estes perfís directivos formación e sensiblización e iniciativas para impulsar o emprendemento e a xeración de ideas innovadoras.
Pacto Dixital de Galicia
En 2013, un total de 11 empresas tecnolóxicas, de ámbito internacional, rexional e o Clúster TIC de Galicia asinaban coa Xunta un acordo no que, ambas partes, asumían un decálogo de compromisos para atraer investimento a Galicia, favorecer a internacionalización das pemes galegas e colaborar para conseguir o crecemento do sector. Desde entón fraguáronse diferentes iniciativas como os centros de emprendemento dixital de Telefónica Galicia Open Future; o centro para a innovación social dixital, Vodafone Conecting for Good Galicia ou o Centro de Excelencia en Intelixencia de Negocio de DXC. Todos eles situados na Cidade da Cultura, conformando xunto coa sede da Amtega, o polo tecnolóxico do Gaiás.
Xa desvelamos o misterio que encerraba a nosa app de intelixencia emocional SIRIA, lanzada fai dez días. Detrás da voz do asistente virtual escondíanse declaracións de homes e mulleres reais en situación de exclusión social, e a quen as persoas que probaron a app puideron abrazar persoalmente despois de coñecer as súas historias.
Trátase, por tanto, dunha campaña que creamos co obxectivo de recuperar a atención da nosa sociedade cara a un problema que non deixa de crecer, a pesar de que xa non teña espazo nas noticias. Segundo datos de Nacións Unidas, 767 millóns de persoas viven baixo o limiar da pobreza. Esta cifra viuse incrementada con crises humanas como a de Siria, que provocou que máis de 6 millóns de persoas tivesen que abandonar o seu fogar.
“Tivemos que inventarnos unha app con intelixencia artificial para que volvamos conectar cun problema moi real, para que non esquezamos que non hai nada que conmova máis que unha historia verdadeira”, explica Neves Turienzo, vicepresidenta da nosa organización. “As historias que conta a nosa aplicación móbil son as vidas de persoas de carne e óso que tiveron que fuxir dos seus países ou que un bo día atopáronse sen fogar, sen dereitos ou sen cobertura sanitaria e que necesitan a nosa axuda para saír adiante”, engade.
Historias dunha verdade que emociona
Persoas como Baker, un mozo sirio de 24 anos que desertou do exército e tivo que escapar do seu país, deixando alí á súa familia. Chegou a Grecia nunha balsa. Agora vive en Barcelona, mentres continúa os seus estudos. Ou como Magdalena, de 61 anos, que chegou a España desde Romanía cun suposto contrato de traballo, pero foi vítima dun engano e atopouse sen diñeiro e sen ningún sitio onde ir. Hoxe vive nunha residencia de Sevilla. Ou Pastora, española de 50 anos que sufriu malos tratos, ten problemas de saúde e un fillo drogodependente. Agora acode ao Centro de Redución de Danos de Médicos do Mundo en Vigo. Ou tamén Jaime, que ata os 35 anos traballou na hostalería, pero por mor dunha depresión perdeuno todo e viuse abocado a vivir na rúa.
“Quixemos levar a cabo este experimento social para ver como reaccionaban as persoas que se prestaron a probar a nosa app ao descubrir que alén da pantalla había mulleres e homes de verdade, que viven situacións críticas, e os atopasen cara a cara. O resultado confirma que a realidade sempre supera á ficción. Estas persoas necesitan que a sociedade non as esqueza”, subliña Neves Turienzo.
A campaña completa, coas historias reais, recóllese na web www.oyesiriamedicosdelmundo.org.
A directora xeral de Xuventude, Participación e Voluntariado da Xunta de Galicia, Cecilia Vázquez, participou no Espazo Xove de Curtis nun encontro sectorial con mozos e mozas e distintos actores do territorio no marco do proxecto ‘Catalizador de oportunidades de emprego e emprendemento xove transfronteirizo’ (acrónimo Lidera), aprobado ao abeiro do programa europeo Interreg V A España Portugal 2014-2020 (Poctep).
O programa de actividades do encontro divídese en tres bloques: o relatorio ‘Os logros do marketing máis alá das ventas. Marketing social: o compromiso co entorno’ da man das persoas responsables de marketing das entidades Cafento e Down Compostela; unha mesa de experiencias no sector do turismo que leva por título ‘Aproveitamento do recurso Camiño de Santiago’ e na que participan un representante do albergue de Muxía, representantes da Asociación Muxía Turismo Rural, e Antón Pombo, autor da guía Anaya dos albergues do Camiño de Santiago; e finalmente un taller de comunicación sobre comercialización no sector turístico a cargo da empresa de comunicación ‘A Catro Mans’.
A titular do departamento autonómico sinalou que “este tipo de iniciativas impulsan a relación e integración da xuventude na realidade económica do territorio, reforzando o coñecemento do marco local da vida dos mozos e mozas; reforzan o achegamento da mocidade á realidade do tecido empresarial galego; promoven o coñecemento e valorización dos recursos e potencialidades que ofrece o territorio; e ofrecen unha ferramenta para que os mozos e mozas adquiran coñecementos que axuden ao seu desenvolvemento persoal e profesional”.
No marco do proxecto Lidera ao longo dos meses de novembro e decembro estanse a desenvolver encontros sectoriais nos doce Espazos Xove dependentes da Dirección Xeral de Xuventude, Participación e Voluntariado. Así mañá o Espazo Xove de Carballo acollererá o encontro ‘Xestión, Emprego, Ruralidade e Xuventude. O minifundio en positivo’, e o vindeiro luns o Espazo Xove de Viveiro será o escenario da sesión ‘Emprendemento activo: a importancia das emocións’.
Cecilia Vázquez manifestou que “o obxectivo destes encontros sectoriais é establecer unha dinámica de diálogo e coñecemento mutuo entre a xuventude e os axentes económicos do territorio, unha ferramenta para impulsar a aparición de oportunidades de colaboración e mentoring”.
Esta iniciativa formativa, dentro do proxecto Lidera, forma parte da actividade “Crece” que ten como obxectivo provocar un coñecemento, proceso e contexto de traballo en rede, no que se involucren os distintos actores e reactivos do territorio a través da xeración de espazos de desenvolvemento local no ámbito de influencia do proxecto.
A titular de Xuventude rematou a súa intervención lembrando que no marco do proxecto Lidera o vindeiro sábado 16 de decembro descorrerá na cidade de Ferrol o Encontro Mostra transfronteriza da xuventude emprendedora (Emotraxe), un espazo de encontro e de aprendizaxe para que a xuventude poda compartir experiencias e emocións á vez que amosar publicamente as súas vivencias de participación, compromiso social e de emprendemento.
O programa de actividades de Emotraxe contará con dous relatorios e tres mesas redondas. Os relatorios, baixo os títulos ‘Onde está o límite’ e Emocións a través da mirada’ correrán a cargo de Josef Ajram e Sissí, respectivamente; e as mesas redondas descorrerán ao longo da xornada baixo os títulos ‘Mocidade en movemento, o valor de tomar a iniciativa’, ‘Competencias clave para superar o reto da inserción laboral e emprendemento’ e ‘Implicados ao 100%: iniciativas xuvenís con impacto social’. Así mesmo, o encontro contará cun espazo expositivo para que as entidades galegas e portuguesas podan mostrar os seus proxectos e actividades.
O proxecto Lidera foi aprobado ao abeiro do programa Interreg V A España Portugal 2014-2020 (Poctep) e ten como obxectivo promover o desenvolvemento económico transfronteirizo a través das capacidades laborais e de emprendemento dos mozos e mozas do territorio. Conta cun orzamento de 1.428.692, 93 euros e unha duración de catro anos (2016-2019).
Son socios do proxecto: a Dirección Xeral de Xuventude, Participación e Voluntariado; a Fundación Galicia Europa; a Cámara Oficial de Comercio, Industria, Servicios e Navegación de Santiago de Compostela; a Asociación Comercial de Emprendedores de Galicia (Ascega): o Instituto Português do Desporto e da Juventude (IPDJ); a Federación Nacional de Asociaciones Juveniles Portuguesas (FNAJ) e a Comunidade Intermunicipal do Ave.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...