• Enmárcanse no programa «O valor da experiencia» da área de Envellecemento Activo de Afundación

• O curso MOOC arrincou o 7 de decembro na UNED Aberta e é gratuíto

A canle formativa de cursos online da Fundación ONCE, posto en marcha en colaboración co Real Padroado sobre Discapacidade, ofrece a partir do 7 de decembro, un novo Curso MOOC (Massive Online Open Courses) sobre a accesibilidade dos teléfonos móbiles para persoas con visión reducida.

O curso, gratuíto e de dúas semanas de duración, pretende dotar aos alumnos de coñecementos, competencias e habilidades sobre a accesibilidade dos teléfonos móbiles para que poidan comprender as principais dificultades que teñen os usuarios con discapacidade, neste caso visual, á hora de utilizalos, e, desde esta perspectiva, dotalos de ferramentas para entender a importancia de que a tecnoloxía sexa inclusiva. E é que, segundo explican os organizadores deste curso, a oferta de teléfonos móbiles existente no mercado é moi diversa. Estes dispositivos ofrecen unha variada gama de prestacións e servizos que, aínda que poden ser moi beneficiosos, non sempre son accesibles para persoas con discapacidade. Así, aspectos como o tamaño reducido da interface, as teclas e os elementos poden afectar a usuarios con dificultades visuais ou de manipulación. Pola súa banda, é posible que as persoas con perda auditiva teñan problemas para utilizar os servizos sonoros como as chamadas telefónicas ou o contido audiovisual, e aquelas con dificultades de comprensión poden non comprender o contido ou non aprender con facilidade a utilizar estes dispositivos. Para lograr que os alumnos entendan esta problemática, o curso conta con seis módulos formativos que inclúen vídeos, textos, test de autoevaluación, exercicios prácticos e ata un foro de atención docente. Ofrece temas como os titulados ‘Sociedade da información, para todos?', ‘Accesibilidade e usabilidade TIC', ou ‘Funcións de accesibilidade dispoñibles para usuarios con visión limitada', entre outros.

Esta formación está dirixida a persoas con discapacidade e as súas familias e asociacións; fabricantes de terminais de comunicacións móbiles e de operadores de comunicacións móbiles, especialmente a quen se dedica á comercialización e ao márketing; empresas e organizacións que contan con persoas con discapacidade entre os seus membros e, en xeral, a todos os que desexan contribuír e fomentar a inclusión nas TIC.

O equipo docente deste novo curso está formado por Natalí González, doutora en Comunicación pola Universidade Complutense de Madrid; David Zanoletty, enxeñeiro informático pola Universidade de Sevilla que tamén cursou o Máster en Enxeñería do Coñecemento pola Universidade Politécnica de Madrid, e Alejandro Rodríguez, doutor enxeñeiro de Telecomunicación pola Universidade Politécnica de Madrid.

O curso comezou o xoves 7 de decembro de 2017 e contará con atención tutorial ata o día 21 do mesmo mes. Permanecerá aberto ata o 8 de abril de 2018.

A canle formativa de cursos online da Fundación ONCE estreouse o pasado ano e o seu obxectivo é abordar en primeira persoa o concepto de accesibilidade universal e a necesidade de incluír criterios de deseño para todos nos distintos proxectos. A súa posta en marcha enmárcase no convenio que manteñen a Fundación ONCE e o Real Padroado sobre Discapacidade e conta co apoio da Universidade Nacional de Educación a Distancia (UNED). Accesible a través de UNED Aberta, a canle incorpora recursos educativos abertos, gratuítos, de calidade e accesibles para todos. O estudante obtén, ademais, o recoñecemento ou acreditación polos méritos conseguidos.

Máis información na seguinte ligazón: Curso en liña "Móbiles accesibles para todos UNED e Fundación ONCE".

• Está dispoñible no espazo eServizos da web e ofrece asistencia en liña, manuais de uso e avisos sobre a sede electrónica, Chave365, notifica.gal e a sala de sinaturas
• O portal da Administración recibe máis de 6 millóns visitas ao ano, máis dun 18% xa proceden de redes sociais e un 43% realízanse desde dispositivos móbiles
• Increméntase o uso dos servizos en mobilidade con 28 apps dispoñibles, que acumulan máis de 650.000 descargas

O portal da Xunta vén de activar o soporte técnico eServizos para axudar aos cidadáns nas súas xestións online a través da sede electrónica e no uso de Chave 365, notifica.gal e a sala de sinaturas. Está dispoñible a través do espazo eServizos de xunta.gal (https://www.xunta.gal/eservizos) e ofrece asistencia en liña, guiando a usuario en función das súas dúbidas; manuais de axudas e respostas a preguntas frecuentes, así como avisos en caso de interrupción destes catro servizos da Administración electrónica.

Cómpre lembrar que a sede electrónica da Xunta facilita a cidadáns e empresas ata 1.400 xestións online coa Administración. O Servizo Chave 365 simplifica o acceso á sede electrónica a través dunhas claves no móbil do usuario, evitando así o uso de certificados dixitais. O sistema de notificacións electrónicas da Xunta envía ao móbil ou ao correo electrónico do usuario o aviso de que ten unha notificación da Administración e a sala de sinaturas permite asinar documentos online.

Con este nova canle de axuda online búscase facilitar o uso destes servizos dixitais, cuxa porta de entrada é xunta.gal. O portal autonómico ten unha media anual de 6 millóns de visitas, das que máis do 18% proceden xa de redes sociais e máis dun 43% se realizan a través de dispositivos móbiles.

Presencia da Administración na Rede

Actualmente, o catálogo de portais e redes sociais da Xunta suma a día de hoxe 250 sitios web e 287 canles en redes sociais, que contan con máis de 1,3 millóns de seguidores.

O reforzo da presenza da Administración autonómica en Internet forma parte da estratexia da transformación dixital que vén desenvolvendo a Xunta a través do Plan de Administración e Goberno Dixital, impulsado pola Axencia para a Modernización Tecnoloxica de Galicia (Amtega). Esta liña de actuación plasmouse na reorganización, simplificación e renovación da rede e portais baixo uns criterios de homoxeneidade e no impulso da presenza en redes sociais.

Apps e reutilización da información do sector público

Para dar  resposta ao incremento de servizos en mobilidade  impulsouse a publicación de aplicacións para dispositivos móbiles. Actualmente, son 28 as apps da Xunta, acumulan más de 650.000 descargas e abranguen servizos  para demandantes de emprego (Mobem), para o ámbito educativo (abalarMóbil), para a mocidade (Carné Xove), relacionadas coa meteoroloxía (Meteogalicia, MeteoRoute), coa pesca (Non piques-Non peques), co turismo (Enoturismo, Sendegal, Turismo de Galicia, Bono Iacobus), e coas TIC na empresa (aplicación do Centro Demostrador TIC, CDTIC).

Fomentar a reutilización de información do sector público por parte de terceiros é outra das liñas de actuación do Plan de Goberno Dixital. O portal Abert@s ofrece 350 conxuntos de datos en formatos abertos que no que levamos de ano rexistrou máis de máis de 39.000 descargas.

• Para coñecer as claves do éxito da innovación social nas áreas rurais, SIMRA está a construír unha base de datos que recolle máis de 40 experiencias reais de innovación social en zonas rurais, para analizalas e comprender os mecanismos do éxito da innovación social

SIMRA é un proxecto de investigación cooperativa, financiado polo programa H2020 da Unión Europea, que está a realizar os seus primeiros avances na identificación de exemplos de boas prácticas e das claves do éxito da innovación social nas zonas rurais marxinais de Europa e do Mediterráneo. O proxecto naceu co obxectivo de estudar e explicar os criterios que fan exitosa unha boa idea ou un proxecto en zonas que a miúdo se atopan infrapobladas, illadas ou de difícil acceso.

SIMRA busca solucións innovadoras para minimizar a problemática do medio rural a través da reconfiguración de prácticas sociais e implementando accións da sociedade civil probadas e exitosas. O proxecto, que involucra a 26 organizacións de Europa e a área Mediterránea –incluíndo países non europeos como Tunes e Líbano–, comezou en abril de 2016 e está previsto que finalice en marzo de 2020.

Para coñecer as claves do éxito da innovación social nas áreas rurais, SIMRA está a construír unha base de datos que recolle máis de 40 experiencias reais de innovación social en zonas rurais, para analizalas e comprender os mecanismos do éxito da innovación social. Algúns destes exemplos, xa foron seleccionados para analizarse en profundidade como casos de estudo, incluíndose iniciativas procedentes dos campos agrario, forestal, mariño, enerxético e de desenvolvemento rural, por exemplo:

• “Unha cesta desde o mar", de Grecia, que reparte peixe fresco e sustentable directamente á mesa dos consumidores gregos á vez que garante prezos xustos aos pescadores locais.
• Unha granxa biodinámica austriaca, que prové comida cultivada de forma sustentable para 30 consumidores.
• Unha comunidade de bombeiros voluntarios da comarca catalá do Bagès, que conseguiu reducir as incidencias dos incendios locais e convertido a madeira de árbores caídas nunha fonte viable de enerxía limpa para escolas e outros edificios.
• “Adopta unha terraza nos Alpes italianos”, onde ao redor de 100 terrazas abandonadas están a ser agora cultivadas de novo grazas a doazóns que axudan a restaurar pendentes montañosas degradadas, mellorando a seguridade fronte a riscos de erosión e dando valor engadido á economía local e ao medio ambiente.

Outros exemplos inclúen unha cooperativa de agricultura social que ofrece coidados diarios a nenos e/ou anciáns en granxas; un proxecto en Europa do Leste promovendo a agricultura ecolóxica para persoas en risco de exclusión social e que vai acompañado dun programa educacional; proxectos liderados por comunidades locais e de cultivo tradicional de alimentos; aeroxeradores xestionados por comunidades e proxectos de xeración de enerxía financiadas mediante micromecenazgo; ou proxectos de almacenamento intelixente de enerxía para comunidades rurais con subministracións intermitentes.

O proxecto SIMRA está a seguir os seguintes criterios á hora de analizar e avaliar as iniciativas: existencia dunha reconfiguración de prácticas sociais en resposta a retos sociais; compromiso activo da sociedade civil ou de organizacións comunitarias; que a novidade ou reconfiguración leve a cabo en zonas, e/ou con grupos sociais, que non participaran anteriormente e que hai unha mellora do benestar social a través de obxectivos ambientais, económicos ou sociais.

No proxecto non só participan activamente as organizacións sociais, senón que tamén hai unha plataforma de consulta para garantir que os actores implicados e as organizacións locais poden participar e beneficiarse dos resultados de SIMRA para responder as necesidades das comunidades locais.

Os resultados de SIMRA compartiranse ao longo de todo o proxecto e dirixiranse a decisores, políticos, organizacións de desenvolvemento local, comunidades e persoas individuais traballando na comunidade e no medio rural por toda Europa e o Mediterráneo. No contexto actual, no que o principal problema do mundo rural é o declive e o envellecemento da poboación, así como o aumento das presións nos sectores agrario e ambiental; a innovación social pode contribuír a revitalizar as comunidades rurais locais e axudarlles a xestionar os seus valiosos recursos naturais.

O Instituto Agronómico Mediterráneo de Zaragoza (IAMZ-CIHEAM) é co-lider do grupo de traballo de Comunicación, “difusión e accións innovadoras”, no que participa difundindo os resultados do proxecto a través dos medios sociais e dixitais, e organizando obradoiros e cursos nos que se darán a coñecer os resultados do proxecto aos actores interesados.