O número de empresas do sector TIC de Galicia acadou a cifra de 2.437, fronte ás 2.331 do ano anterior, o que representa un crecemento do 4,5% e mantén a Galicia como a quinta Comunidade Autónoma con maior número de empresas tecnolóxicas. O sector TIC galego deu emprego a 16.098 traballadores en 2016, o que supón un incremento do 2,6% no último ano.
Son datos que publica hoxe o Observatorio da Sociedade da Información e a Modernización de Galicia (OSIMGA), adscrito á Axencia para a Modernización Tecnolóxica de Galicia (Amtega), dentro do “Diagnóstico ás Empresas TIC sobre a Sociedade da Información en Galicia. Edición 2017”.
Emprendemento e volume de negocio
O crecemento no volume de empresas TIC prodúcese, especialmente, nas empresas máis pequenas, o que pon de manifesto a tendencia ao emprendemento neste sector. Así, o 83,6% das empresas TIC galegas ten un máximo de dous empregados, 89 empresas máis que o ano anterior neste segmento empresarial.
O volume de negocio das empresas TIC galegas acadou os 2.522 millóns de euros no ano 2016, cun aumento do 2,8% con respecto ao ano 2015, e a cifra máis alta rexistrada desde 2011. En relación ao peso do sector na economía galega, o estudo do OSIMGA indica que o valor engadido bruto (VEB) do sector TIC galego en 2014 superou os 1.015 millóns de euros, o 1,8% do PIB total de Galicia.
Por outra banda, a porcentaxe de empresas do sector TIC galego que realizaron actividades de I+D+i durante os últimos 3 anos incrementouse en 4,1 puntos respecto ao dato do ano anterior, pasando dun 25,9% a un 31%. Entre as empresas TIC que realizaron actividades I+D+i, un 72,2% obtivo resultados comercializables. Cabe salientar que que o 18,4% das empresas TIC galegas colaboraron con outras empresas para realizar actividades de innovación.
Demanda de profesionais TIC
O estudo pon de manifesto as dificultades que as empresas TIC galegas experimentan á hora de contratar profesionais TIC cos coñecementos e experiencia de interese para a súa organización. Máis da metade das empresas TIC (51%) sinala que é difícil ou moi difícil contratar persoal con formación específica en TIC, especialmente pola carencia de candidatos coa formación precisa.
As empresas TIC galegas contan cunha maioría de profesionais TIC con formación universitaria ou especializada a través de ciclos formativos TIC. O 33,7% do persoal das empresas TIC teñen titulación de grao superior ou media; o 27,4% dos empregados posúe ciclos formativos relacionados coas TIC (un 22,4% superiores e un 5% medios). A presenza de mulleres no sector descende lixeiramente respecto ao total de traballadores e pasa do 33,1% a 32,9%.
Cara unha Internet ultrarrápida e á madurez tecnolóxica
Novamente increméntase a velocidade de conexión a Internet que teñen contratadas as empresas TIC galegas, de xeito que máis da metade (51%) posúe xa velocidades superiores a 100 Mbps fronte ao 38,3% no ano 2016.
Segue a evolución positiva do indicador do envío de facturación electrónica, que chega ata o 38,5% e rexistrando un incremento de 2,1 puntos porcentuais respecto ao ano anterior. Ademais, rexístrase un crecemento de 4,1 puntos na dispoñibilidade de ferramentas ERP (29,8%), que permiten compartir información de compras e vendas da empresa, e un aumento de 4,7 puntos nas ferramentas CRM (29,3%) de xestión de información de clientes.
Increméntase a porcentaxe de empresas TIC galegas que empregan servizos da Administración dixital, acadando o 70,5%, 2,6 puntos máis que no ano anterior.
Cloud Compunting, redes sociais e software para aplicacións móbiles
Séguese a reafirmar o uso de servizos de tecnoloxías Cloud, acadando o 43,9% e aumentando respecto ao ano 2016 en 1,7 puntos. O crecemento total no período 2013-2017 foi de 10,9 puntos porcentuais. O software entendido como Servizo (SaaS), tales como Google Apps Bussiness, Office 365, SalesForce.com, Dropbox, etc. é o que máis empregan as empresas TIC galegas.
Outra tendencia que se extrae do estudo do OSIMGA é o desenvolvemento de software para plataformas móbiles: Un 28,9% das empresas TIC ofreceron desenvolvementos específicos de software para plataformas móbiles. Entre estas empresas TIC aumenta a cifra de negocio xerada por estes desenvolvementos, acadando o 22,8% do volume de negocio total destas empresas, 3,7 puntos máis que no ano anterior.
A presenza en redes sociais segue a incrementarse nas empresas TIC galegas, situándose no 40,1%, cun incremento de 9,5 puntos porcentuais no período 2013-2017.
Perspectivas de futuro
En canto ás perspectivas de futuro, o 47% das empresas TIC galegas consideran que a situación da súa empresa é de consolidación e un 18,3% de expansión. En relación á situación do sector TIC para os vindeiros tres anos, máis da metade das empresas TIC galegas (52%) percíbea como estable e un 31,1% como expansiva. Ademais, o 23,4% das empresas TIC galegas teñen previsto contratar novo persoal relacionado co ámbito tecnolóxico nos vindeiros anos.
No que se refire ao comercio electrónico, o 78,3% das empresas TIC galegas realizaron compras de bens ou servizos a través do comercio electrónico, incrementándose en 4 puntos porcentuais respecto ao ano anterior. Unha de cada catro empresas galegas dedicadas ás TIC (24,6%) vendeu bens ou servizos a través de Internet durante o 2016. Continúa a incrementarse o peso das vendas electrónicas nas empresas TIC que venderon a través do comercio electrónico, pasando dun 43,9% a un 47,7%.
Dez novos concellos da provincia de Lugo implantarán a Historia Social Única Electrónica (HSUE), a plataforma da Xunta que integra nun mesmo sistema todos os datos relativos á historia social do individuo e facilita a coordinación de todos os axentes que participan na prestación dos servizos sociais.
A Axencia para a Modernización Tecnolóxica de Galicia (Amtega) e a Consellería de Política Social colaboran para facilitar a difusión desta plataforma entre as entidades locais, así como a planificación conxunta e a coordinación das actuacións para axilizar a súa implantación.
O delegado territorial da Xunta en Lugo, José Manuel Balseiro, inaugurou hoxe unha nova xornada de formación na que participaron o persoal dos servizos sociais de dez concellos adheridos á iniciativa, en concreto, os de Abadín, Bóveda, A Fonsagrada, Mondoñedo, Monforte de Lemos, A Pastoriza, Pedrafita do Cebreiro, Ribeira de Piquín, Xermade e Xove.
Na provincia de Lugo a HSUE, que permite aos traballadores sociais acceder ao expediente social dos usuarios en formato electrónico, xa se implantou como experiencia piloto nos concellos de Sober e Viveiro, aos que agora se suman estes dez novos municipios.
Balseiro explicou que os cidadáns percibirán as vantaxes do novo sistema na simplificación das tramitacións, e nunha atención máis personalizada, xa que o profesional terá acceso de xeito inmediato a información máis relevante do seu historial, tanto de servizos como de prestacións ou recursos asignados.
Ademais, facilitará unha atención máis proactiva, grazas a un sistema de alertas e subscricións que avisa ao profesional de calquera cambio no historial da persoa para que poida actuar de maneira inmediata.
O delegado territorial lembrou que a extensión da Historia Social Única Electrónica (HSUE) supón un fito no eido dos servizos sociais similar á posta en marcha da Historia Clínica no eido sanitario ao integrar nun mesmo sistema todos os datos relativos a historia social do individuo, incluíndo a situación persoal, social e familiar; as súas demandas, prestacións, servizos e recursos, así como as valoracións, intervencións, seguimento e avaliación por parte do sistema de servizos sociais, ademais de información referente a profesionais e a institucións e organizacións que interveñen nas mesmas.
A este avance sumouse a incorporación da sinatura electrónica a través de HSUE. Isto permite xerar e asinar dixitalmente os informes sociais normalizados e arquivalos na Historia Social Única Electrónica do individuo, o que permite o envío de xeito telemático deste informe ás unidades tramitadoras.
De xeito paralelo, e grazas as posibilidades que ofrece a HSUE, estase a facilitar o acceso do persoal médico dos equipos de valoración de discapacidade e dependencia ao Historia Clínico Electrónica de persoas que soliciten este recoñecemento; medida que permitirá mellorar a tramitación das referidas valoracións.
O Plan Trabe para a Modernización Tecnolóxica dos Servizos Sociais, dotado cun orzamento de 19,7 millóns de euros en cinco anos, é un instrumento de apoio á planificación estratéxica deste área clave para a Comunidade, que xestiona a atención e as prestacións dun terzo da poboación.
Coa integración das TIC na xestión dos servizos sociais, a Administración autonómica busca mellorar a súa eficiencia para garantir á sustentabilidade do sistema e incrementar a súa capacidade para dar cobertura a unha demanda que está en aumento. Ademais, a modernización da xestión permitirá reducir tarefas administrativos e prazos de tramitación.
As actuacións do Plan Trabe incluidas dentro da operación "Plataforma tecnolóxica do catálogo galego de servizos sociais - Implantación da Historia Social Única Electrónica" atópanse cofinanciadas pola Unión Europea no marco do Programa Operativo FEDER Galicia 2014-2020.
Desde Fundación MAPFRE lanzan a 1ª edición dos Premios Fundación MAPFRE á Innovación Social impulsados polo Instituto de Empresa (IE). Esta iniciativa xorde coa intención de apoiar solucións innovadoras con gran potencial de impacto social. Perseguen traballar coas comunidades de innovadores sociais das rexións xeográficas de Brasil, LATAM (excepto Brasil) e Europa, para identificar aqueles proxectos con maior capacidade de transformación social e a quen lle poidan ofrecer un impulso diferenciador.
Cos Premios Fundación MAPFRE á Innovación Social queren facer posible o crecemento de iniciativas que resolvan e melloren aspectos concretos do mundo no que vivimos:
Os candidatos poden enviar os proxectos previa acreditación dun interlocutor por proxecto. O prazo de recepción de proxectos comezará proximamente.
A Hora do Código UDC 2017 é un evento gratuíto organizado o día 16 de decembro pola Universidade da Coruña no marco do evento A Hora do Código que se celebra do 4 ao 10 de decembro en máis de 180 países para achegar a programación de computadoras dunha forma natural, simple, intuitiva e divertida.
Está organizada por Code.org, unha organización pública sen fins de lucro dedicada a promover as Ciencias da Computación en escolas e institutos, cunha especial atención en incrementar o número de mulleres e estudantes de colectivos minoritarios que aprenden a programar.
O Colexio Profesional en Enxeñería Informática de Galicia e a Escola Superior de Enxeñaría Informática (ESEI) da Universidade de Vigo están a apoiar a iniciativa global Hora do Código (HourofCode) da Code.org.
O proxecto “Hour of Code”, “Hora do Código”, da entidade estadounidense Code.org ten coma obxectivo o de ensinarlles programación e as bases da Informática ás nenas e nenos partindo de titoriais básicos dunha hora de duración.
Chega a recta final de ano e, como de costume, é o intre de lembrar aos demais e anos mesmos a importancia de ter coñecementos, aínda que básicos, de programación. Por que? Pois por moitos motivos, comezando por un feito do que falamos recentemente: os estudantes formados en cuestións informáticas seguen a ser os máis demandados do mercado laboral, e nada indica que esta situación vaia mudar a medio e curto prazo. Pór de relevo as vantaxes de contarmos con formación para programar, aínda que básica, é un dos grandes obxectivos da Hora do Código, posta en marcha pola entidade internacional Code.org, organismo público sen fins de lucro adicado a ampliar a participación en Informática. Con respecto á nosa terra, a Hora do Código ten un dos seus grandes valedores no Colexio Profesional de Enxeñaría en Informática de Galicia (CPEIG), que vén de anunciar, precisamente, a súa participación nas actividades preparadas para o día 16 nos nosos campus.
A edición galega da Hora do Código terá dous eixes de acción fundamentais, como vén sendo costume: por unha banda o Campus de Ourense (Escola Superior de Enxeñaría Informática, ESEI) da Universidade de Vigo e, pola outra, o Campus da Corruña (Facultade de Informática, FIC) da UDC. A cita (dupla) será este sábado día 16. Por suposto, haberá obradoiros cen por cen de balde, dirixidos a rapaces e rapazas de entre 6 e 18 anos de idade. Quen queira máis información sobre as actividades previstas ou formalizar a inscrición nas mesmas, ten unha páxina web específica á súa disposición, www.horadocodigo.gal.
Segundo nos conta o CPEIG, as accións programadas nos centros universitarios desenvolveranse coa participación de voluntarios desta entidade profesional. Persoas colexiadas impartirán tamén, a título individual, charlas en centros educativos en Galicia ao longo da presente semana.
Como lembraremos, a Hora de Código é un evento internacional que ten como obxectivo o de ensinar programación e as bases da Informática ás nenas e nenos partindo de titoriais básicos dunha hora de duración. A iniciativa busca estender os coñecementos de ciencias da computación aos máis pequenos e pequenas para que coñezan os conceptos e o mundo no que viven, “unha realidade na que a tecnoloxía está cada día máis presente en todas as facianas, desde o lecer á educación”, explica o CPEIG.
A cita na ESEI de Ourense
A Escola Superior de Enxeñaría Informática (ESEI) de Ourense organizará unha xornada o sábado día 16 en horario de mañá con máis de 300 prazas dirixidas a rapaces de 6 a 18 anos de idade. A escola universitaria ofrecerá estes obradoiros: Iniciación á programación, Iniciación á programación con Scratch, Iniciación á programación de dispositivos con Arduino, Rapazas nas TIC, iniciación á programación de dispositivos, Coñece a impresión en 3D, Coñece os Drons, Outra Vida do Hardware e Crea o teu mundo- Realidade Virtual.
Actividades na FIC
Pola súa banda, a Facultade de Informática da Universidade da Coruña tamén prevé obradoiros de programación para o vindeiro sábado a partir do mediodía, dirixidos a nenas e nenos de entre 8 e 14 anos de idade. Os talleres terán unha hora de duración, cun total de 120 prazas. Os requisitos para participar son a inscrición previa e que vaian acompañados por un adulto, ademais de levar unha tableta ou ordenador. No caso de non dispoñer deses dispositivos, a FIC emprestaralle un a quen o precise. As nenas e nenos asistentes recibirán un diploma acreditativo da súa participación na Hora do Código.
Code.org
A Hora do Código está promovida desde o ano 2013 pola entidade sen ánimo de lucro estadounidense Code.org. Trátase dun evento internacional que consiste nunha introdución dunha hora de duración ás ciencias da computación, deseñada para mostrar que todo o mundo pode aprender a programar e así comprender os fundamentos básicos desta disciplina. A nivel internacional a iniciativa está apoiada polas grandes compañías tecnolóxicas, como Google, Amazon, Apple, Facebook e Microsoft, e por persoeiros como Bill Gates ou Mark Zuckerberg.
Code.org® é un organismo público a dicado a ampliar a participación en Informática. O seu obxectivo é que todos os estudantes teñan a oportunidade de aprender programación.
Samsung Electronics Co., Ltd. deu a coñecer o lanzamento da aplicación SeeColors, compatible co televisor QLED TV, a cal funciona como unha ferramenta que axuda as persoas con daltonismo a diagnosticar as súas deficiencias visuais individuais para axustar a configuración de imaxe na pantalla co fin de que poidan gozar dunha experiencia visual plena e con cores exactas.
De acordo cunha enquisa representativa levada a cabo en Europa e América do Norte, ao redor de 300 millóns de persoas viven con daltonismo; aproximadamente 8 % dos homes e preto do 1% das mulleres ven o mundo doutra maneira*, aínda que a maioría non están conscientes diso nin do impacto que ten na súa calidade de vida.
A través da aplicación SeeColors, os usuarios poden identificar o tipo específico e o nivel do seu daltonismo a fin de recalibrar a pantalla de QLED TV baseándose nos resultados do seu diagnóstico persoal. Para ofrecer un método fácil e preciso que determine de que maneira mira cada persoa as cores, Samsung Electronics colaborou coa Profesora Klára Wenzel, directora do Departamento de Mecatrónica, Óptica e Enxeñería Mecánica e Informática da Universidade de Tecnoloxía e Economía de Budapest, para incorporar Colorlite Test (Proba de Visión Cromática) ou C-Test (Proba C), aos televisores e os dispositivos móbiles.
A Proba C, desenvolvida pola Profesora Wenzel, é unha ferramenta de diagnóstico dixital que mostra os niveis de daltonismo usando filtros de cores e un meticuloso modelado matemático. A aplicación SeeColors é unha solución sinxela que lles brinda aos usuarios a oportunidade de ver o mundo a todo cor.
SeeColors pódese descargar desde a App Store da TV, en Google Play ou en Galaxy App Store para os teléfonos intelixentes Samsung Galaxy S6, S6 edge, S6 edge+, S7, S7 edge e S8. Unha vez que os usuarios conectan o seu teléfono intelixente Galaxy ao seu QLED TV, esta axustará automaticamente a configuración de cores baseada no diagnóstico personalizado.
A aplicación SeeColors foi creada en colaboración con Colorlite, unha empresa húngara que aplica tecnoloxía certificada e con fundamento en 20 anos de investigación científica sobre análise e comportamento de lentes intraoculares, para axudar a que as persoas fagan fronte ao daltonismo e melloren a súa calidade de vida. A App SeeColors é a primeira en utilizar Colorlite® nos televisores e teléfonos intelixentes.
A Escola Superior de Enxeñaría Informática do Campus de Ourense e Expourense veñen de pór en marcha unha nova convocatoria do seu certame conxunto dirixido a recoñecer a excelencia e o bo facer dos estudantes de ambas beiras da raia galego-portuguesa. Estamos a falar do Concurso de Proxectos Tecnolóxicos, edición 17, que ten por obxectivo “premiar os mellores traballos fin de estudos en informática e telecomunicación da Eurorrexión Galicia-Norte de Portugal”. A iniciativa, unha ponte firme entre os campus e as empresas (levando potencial tecnolóxico dunha beira a outra), busca tamén “estimular a capacidade innovadora do alumnado para desenvolver proxectos cunha visión empresarial”. Nesta edición entregarase un total de 1.400 euros en galardóns.
Segundo informa a Universidade de Vigo (Campus de Ourense), o certame vén con dúas modalidades. A Modalidade A é para títulos en Enxeñaría en Informática, Enxeñaría de Telecomunicación e traballos de fin de mestrado de mestrados oficiais relacionados co eido das TIC. A Modalidade B é para títulos de Grao en Enxeñaría Informática, Grao en Enxeñaría de Tecnoloxías de Telecomunicación, Enxeñaría Técnica en Informática e Enxeñaría Técnica de Telecomunicación.
En cada categoría concederase un primeiro e un segundo premio, entregándose un total de 1.000 euros. Ademais, haberá un Premio Especial Deputación de Ourense-Provincia Intelixente dotado con 400 euros no que poderá participar alumnado das dúas modalidades. Por último, haberá un Premio do Público, consistente nunha estancia termal/turismo rural ou nun e-reader para o proxecto que consiga máis seguidores para a súa páxina informativa en Facebook.
Un xurado designado para a ocasión concederá os premios tendo en conta a calidade do proxecto (orixinalidade, dificultade e aplicabilidade social), se existe desenvolvemento de software libre e a súa aplicabilidade no eido da administración pública na súa relación cos cidadáns. O xurado reunirase o 13 de decembro de 2017 na Escola Superior de Enxeñaría Informática do Campus de Ourense nunha sesión na que os seleccionados nunha primeira valoración terán a oportunidade de expor os seus traballos. Tras esa exposición, coñeceranse os traballos gañadores desta edición e realizarase a entrega de premios e diplomas.
Este vindeiro sábado celebrarase a conferencia informática DevFestGalicia, organizada polos Google Developer Groups de Galicia (CDG Ourense, CDG Santiago e CDG Vigo) na Facultade das Ciencias Sociais e Comunicación no Campus de Pontevedra. A xornada, que conta coa colaboración da Universidade de Vigo, o Concello de Pontevedra e a propia empresa Google, está patrocinada por Optare Solutions e o Centro Tecnolóxico Gradiant. A previsión é a de xuntar máis de dez expertos en tecnoloxía, co fin de compartir coñecementos arredor de cuestións tan candentes como a Intelixencia Artificial, o posicionamento en buscadores, a marca persoal, o desenvolvemento web, a linguaxe Scala, a nube de Google, ou o desenvolvemento móbil.
A cita xa conta con conta con máis de 150 persoas inscritas e con capacidade para 300 asistentes. A entrada será de balde e o público, segundo informan os grupos organizadores, gozará de conferencias, obradoiros, xantar e espazos para traballo en rede. A xuntanza, amais dos devanditos temas, acollerá charlas sobre a importancia da diversidade no sector tecnolóxico, e as últimas tendencias en desenvolvemento para tecnoloxías web e móbil. “O obxectivo deste evento é reunir aos integrantes da comunidade galega para proxectar o talento local a nivel nacional”, sinalan os organizadores do evento. Entre os relatores cómpre salientar figuras referenciais no ámbito tecnolóxico galego, estatal e mundial, como Carlos Azaustre, developer relations en Google; Paola García, directora executiva e co-fundadora de Chefly; Antón M. Rodríguez, director técnico en Optare Solutions; ou Ana Cidre, desenvolvedora independente e fundadora de GalsTech, grupo de mulleres galegas en tecnoloxía.
Ademais, as conferencias contan coa participación de Google Developer Experts, expertos recoñecidos por Google polo seu labor no desenvolvemento e difusión da tecnoloxía, como Abdón Rodríguez, desenvolvedor vigués de IBM Research. O evento, ademais, ten un marcado compromiso a prol da visibilidade do papel da muller no ámbito da programación e o desenvolvemento informático, tal e como se mostra ao contar coa presenza de importantes expertas en tecnoloxías como Paola García, Ana Cidre ou Noelia Luaces, entre outras. O obxectivo é “romper cos mitos que perpetúan o feito de que menos dun 15% de mozas se matriculen en Informática na nosa comunidade”, afirman os organizadores do DevFest Galicia.
A Deputación de Pontevedra deu a coñecer estes días o seu programa de actividades formativas TIC para o mes de decembro, un total de 18 de obradoiros. Estas sesións, como vén sendo costume, desenvólvense ao abeiro da rede SmartPEME, constituída polas sedes operativas de Pontevedra, Vigo, Porriño, Ponteareas, Cambados e Lalín. Dende estes centros operativos, as/os profesionais da Deputación (en colaboración cos Concellos e as asociacións) despregan un importante labor de capacitación dixital ao servizo de autónomos, PEME e traballadores. Nove dos devanditos obradoiros do mes de decembro levaranse a cabo nas áreas de Vigo, Pontevedra, Cambados e Lalín.
As quendas para decembro na oficina de Vigo comezaron este pasado luns co curso Bota as túas propias fotografías para o comercio electrónico. Dez días despois celebrarase a segunda quenda, o xoves 14 de decembro, co curso Google Analytics: Interpretación dos datos e toma de decisións. Por último, o martes 19 de decembro, as persoas interesadas poderán asistir ao obradoiro de Ferramentas TIC básicas e sinxelas para a xestión do teu negocio. A oficina SmartPEME de Vigo, na Sede da Deputación da cidade, atópase na rúa Oporto, núm. 3. Os tres obradoiros comezarán ás 19 horas.
Polo que atinxe á oficina de Ponteareas, acollerá o mércores 13 de decembro o obradoiro Coñece as claves para a dixitalización documental. O martes 19 de decembro, organizarase o curso Como utilizarInstagram para promover a túa empresa. E para rematar o ano, o xoves 21, desenvolverase o obradoiro Como facturar electrónicamente para as empresas e administracións públicas. A oficina SmartPEME de Ponteareas, no Centro de Desenvolvemento Local, atópase en Lomba do Cruceiro, núm. 5. Todos os cursos tamén comezarán ás 19 horas.
Polo que respecta á oficina do Porriño, dará acubillo (novamente en horario de 19 horas) aos seguintes obradoiros: o martes 12 de decembro, Imos chamar á porta da túa clientela: Posicionamento SEO; Google Analytics: Interpretación dos datos e toma de decisións o luns 18 de decembro e para rematar o mércores 20, o obradoiro Crea o teu propio logotipo con Canva. A oficina SmartPEME do Porriño, no Multicentro do Concello, atópase na rúa Ribeira, s/n.
Tres cursos para Pontevedra
As quendas na sede da Deputación de Pontevedra comezaron este luns ás 19 horas co curso Como facer unha exitosa campaña de publicidade no Google. A segunda cita terá lugar o mércores 13 de decembro, tamén ás 19 horas, cando impartirase o curso Woocommerce II–A solución que procurabas para vender por Internet. Por último, o luns 18 de decembro, a mesma hora, Pontevedra acollerá o curso Edición de fotografía para plataformas e-commerce. A oficina SmartPEME de Pontevedra, no Edificio Administrativo da Deputación, atópase na Gran Vía de Montero Ríos, s/n.
Tres obradoiros en Lalín
Os obradoiros programados no Viveiro de Empresas do Polígono Lalín 2000 no mes de decembro, todos eles en horario de 19 horas, terán como primeiro evento Como utilizar Instagram para promover a túa empresa, previsto para o luns 11 de decembro. O xoves 14 organizarase o obradoiro Crea o teu propio logotipo con Canva. Por último, o martes 19 de decembro terá lugar o curso Elixe a túa plataforma de comercio electrónico. A oficina SmartPEME de Lalín, no Viveiro de Empresas situado no Polígono Lalín 2000, atópase na parcela E deste espazo.
Outras tantas sesións en Cambados
A actividade de decembro do Centro ExpoSalnés de Cambados ao abeiro de SmartPEME arrancou xa este luns 4 de decembro co obradoiro Ferramentas de google para a promoción de negocios locais e seguirá o mércores 13 de decembro co curso Guía de boas prácticas para redes sociais. Por último, o mércores 20 de decembro, celebrarase o curso Sácalle partido á túa conta de Gmail. A oficina SmartPEME de Cambados, no Centro ExpoSalnés, atópase no paseo da Calzada, s/n. Todas as actividades deste mes comezarán ás 19 horas.
O Proxecto SmartPEME
SmartPEME é un novo modelo de servizo orientado á mellora competitiva das PEME e á procura dunha melloría nas vendas e na eficacia e eficiencia das tarefas, que abre novos eidos de actuación e acada novos grupos de interese coma os emprendedores, as asociacións empresariais e os axentes de dinamización en concellos.
O devandito obxectivo, nas oficinas do Porriño, Cambados, Pontevedra, Lalín, Ponteareas e Vigo abrangue seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...