O vindeiro día 28 celebrarse na Fundación Barrié da Coruña a edición número 15 do evento solidario Coruña Bloggers no que entusiastas da Internet, as redes sociais e outras tecnoloxías próximas xúntanse para asistir a un par de relatorios e achegar un mínimo de 1 quilogramo de alimentos non perecedoiros para a Cociña Económica (o que podería considerase como o prezo para acudir a este evento de balde).
O primeiro relator da xornada será Antonio Cambronero, un dos referentes dos mundo dos blogs en fala hispana, tanto pola súa longa experiencia como pola súa vertente formativa e divulgadora, que estará presente a través de streaming para repasar as adaptacións técnicas necesarias para cumprir co regulamento xeral de protección de datos nun blog de WordPress.org nos formularios de contacto, formularios de comentarios e formularios de subscrición. Tamén repasará detalles técnicos para integrar MailChimp e WordPress.org como exemplo dun servizo de e-mail marketing afectado polo acordo de Privacy Shieldpara transferencias internacionais de datos entre a Unión Europea e EE.UU.
O segundo relator do encontro será Álvaro Fontenla, da empresa de hospedaxe web Raiola Networks, quen impartirá unha charla sobre servizos de aloxamento de páxinas web.
Tras a parte formal do evento, os asistentes acudirán a un local de hostalaría próximo, La Taberna de Rita, para a habitual sesión de networking.
Os interesados en acudir ao 15º Coruña Bloggers poden xa solicitar a súa invitación a través de Eventbrite.
A organización (Interplay Producións e o Concello de Carballo) da nova edición do Carballo Interplay de contidos dixitais e webseries quere que esta convocatoria 2018 pase á historia como a máis concorrida e a que máis actividades acubille. Sen ir máis lonxe, onte pechouse o prazo para a recepción de contribucións para competir na sección oficial, recibíndose finalmente 250 achegas procedes de todos os continentes. Porén, malia este peche do prazo oficial para o envío de candidaturas, aínda fica unha porta aberta.
Segundo informa a organización, as creadoras e creadores que quedasen coas ganas de participar, porque aínda non teñen unha serie producida pero que si vontade de creala, poden darlle forma ao seu proxecto e presentalo antes do 18 de marzo ao premio ao proxectos de webserie en galego (sen límite de temas e cunha dotación económica de 1.500 euros).
Amais destes datos, Interplay Producións e o Concello de Carballo tamén informaron hoxe de que esta edición do certame será, ante todo, unha celebración da figura da muller creadora. Nas súas palabras, o CIP 2018 (que se celebra os días 4, 5, 6 e 7 de abril), será unha homenaxe ás mulleres pioneiras da tecnoloxía e do audiovisual, reivindicando o traballo da actriz e inventora Hedy Lamarr (precursora da tecnoloxía móbil, GPS e Wi-Fi), da matemática e escritora británica Ada Lovelace, da primeira persoa que dirixiu unha película de ficción e pioneira dos efectos especiais Alice Guy, da matemática Joan Clarke, da inventora do e-book Ángela Ruiz Robles, da pioneira da música electrónica Delia Derbyshire, da científica computacional, matemática e enxeñeira de sistemas Margaret Hamilton, da precursora da Internet Radia Perlman, da enxeñeira e programadora Mary Allen Wilkes e da pioneira no deseño de interfaces de usuario, Susan Kare.
Esta semana, tendo como base o día 11 de febreiro, celebrouse a nivel internacional o Día das Mulleres e as Nenas na Ciencia, unha conmemoración sen fronteiras que, como indica o seu nome, diríxese a conmemorar o espírito científico das mulleres e as cativas e, tamén, a reparar unha inxustiza de séculos que, aínda hoxe, perpetúase a moitos niveis (a invisibilización das mulleres e as cativas creadoras). Os días pasados fixemos reconto das actividades preparadas pola USC e a UDC para conmemorar o acontecemento. A maiores, a Universidade de Vigo sumouse á celebración cunha manchea de accións divulgativas e reivindicativas que permitiron cousas como crear videoxogos ou facer achados científicos. Os actos discorreron coa seguinte proclama: “Hai unha lista moi larga de mulleres que dedicaron a súa vida á ciencia, todas mulleres incribles que axudaron e axudan ao desenvolvemento das ciencias, quizais algún día unha de nós tamén forme parte dese grupo”.
A dita proclama, extraída do segundo Concurso Escolar de Debuxo e Redacción do Día Internacional da Muller e a Nena na Ciencia organizado ao abeiro das actividades da UVigo para conmemorar esta xornada, veu da man da nena Noa Rodríguez, que foi quen se impuxo (cunha redacción de seu) no devandito certame. A Universidade por enteiro adheriuse ás súas palabras, tal e como se fixo saber o pasado venres na I Xornada de Divulgación en Ciencia, Tecnoloxía, Enxeñaría e Matemáticas. A xornada estivo organizada pola Facultade de Ciencias, a Escola Superior de Enxeñaría Informática e a Escola de Enxeñaría Aeronáutica e do Espazo, coa colaboración da Vicerreitoría do campus, co gallo da conmemoración do Día Internacional da Muller e da Nena na Ciencia.
Co lema Exxperimenta en feminino, a actividade reuniu no Edificio Politécnico a arredor de 300 escolares da provincia de Ourense co obxectivo de fomentar as vocacións científico-tecnolóxicas entre as futuras xeracións poñendo o foco en mostrar o labor das mulleres científicas e tecnólogas. Ao longo da mañá, os estudantes puideron participar nunha ducia de actividades “cun enfoque divulgativo, interactivo e ameno”. Estas accións, sinalan as organizadoras, permitiron á rapazada asistente poñerse na pel de científicas da vida (tiveron a oportunidade de albiscar microorganismos na auga) ou de desenvolvedores de ferramentas dixitais (puideron crear pequenos videoxogos).
No desenvolvemento das actividades participou persoal docente e investigador dos tres centros implicados nesta iniciativa, principalmente mulleres. A nivel docente, na xornada participaron as profesoras Alma Gómez, Julia Carballo e Nieves Lorenzo. Segundo fixeron saber, cómpre tomar medidas ante o descenso que se está a producir de mulleres nas titulacións ligadas ás TIC e á ciencia e á enxeñaría. Citando como exemplo o caso da Escola Superior de Enxeñaría Informática da que ela é subdirectora, Alma Gómez advertiu como “se hai 20 anos as mulleres representaban arredor do 30% do alumnado de novo ingreso da nosa escola na actualidade é un 10/12%. Estase perdendo o talento da metade da poboación”. Neste contexto de preocupación, Virxilio Rodríguez, vicerreitor do Campus de Ourense, salientou como a posta en marcha de Exxperimenta en feminino “é unha iniciativa fantástica e moi necesaria, que ten ademais o valor de xurdir do propio profesorado de varios centros”.
Co inicio de novo ano e logo da estrea das curtametraxes gravadas en setembro de 2017, comezou o arranque oficial do Chanfaina Lab 2018 en San Sadurniño, a nova edición do programa-certame de divulgación e traballo práctico (alentando a semente creativo da mocidade local) arredor dos novos xeitos de crear audiovisual e facer coñecemento. Segundo fixo saber o Goberno local, a quinta convocatoria do encontro manterá a súa filosofía e a súa estrutura, reservando unha fin de semana para a filmación das pezas das realizadoras e realizadores que participen e acompañando as xeiras de traballo de campo con charlas e obradoiros centrados no audiovisual. Ademais, tal e como comentou na estrea das curtas de 2017 a responsable de Cultura, Sabela Cinza, outro dos obxectivos é “manter a irmandade iniciada o ano pasado co cinema rural portugués”.
Agora, trala proxección celebrada o 3 de febreiro na Casa da Cultura, as obras do ano pasado están a dar o chimpo de maneira progresiva ás pantallas de ordenadores, tabletas e teléfonos desde a canle de YouTube de Fálame de San Sadurniño, onde as curtametraxes (unha a unha, semana a semana) van atopando sitio e visibilidade de seu perante a comunidade internauta.
A primeira das pezas estreadas na Rede é A casa, do realizador portugués Carlos Viana. Segundo nos lembra o Concello de San Sadurniño, a obra entra na vivenda da familia Cinza-Íñiguez “para describir a súa casa como espazo vital a través do tempo”. Os fíos temáticos da curta, deste xeito, son as lembranzas que acubilla o fogar, os testemuños locais do devir da historia e mesmo a cultura de San Sadurniño. Carlos Eduardo Viana é un cineasta nado en Esposende (Portugal) con ampla experiencia como documentalista, programador e dinamizador cinematográfico no Norte de Portugal. Asemade ten dirixido numerosos documentais en Angola, Cabo Verde e en Portugal.
A segunda estrea virtual da presente edición do Chanfaina Lab vén asinada por Pablo Martínez, o participante máis novo do encontro audiovisual e, segundo lembra a organización do certame, un dos seus membros máis activos. Pablo, veciño de San Sadurniño, sumouse por segundo ano consecutivo á experiencia como creador e como aprendiz do obradoiros impartidos pola xornalista transmedia María Yáñez e polo dúo Esferobite, Belén Montero e Juan Lesta. En 2016 presentara O meu traxecto ao cole e en 2017 achega Enamorándose de San Sadurniño, a curta acabada de estrear na Rede, protagonizada por el mesmo e por Iago Lourido, encargado tamén da montaxe das imaxes filmadas por Joám Cortizas. Na obra saliéntase a manchea de recunchos fermosos que rodean o centro urbano do municipio.
Bailas? Pois se non o fas aínda deberías animarte a facelo pola cantidade de beneficios que supón esta práctica para a saúde.
Bailar é unha maneira fácil e divertida de facer actividade física, unha actividade que practicada de forma moderada e seguindo unhas pautas recomendadas pode ser un exercicio moi adecuado para previr enfermidades tanto físicas como psíquicas.
Ademais, ir a bailar obríganos a arranxarnos, saír da casa e contactar con outras persoas coa mellora do estado de ánimo que iso leva.
Descobre neste curso aplicacións e recursos online para bailar e os beneficios que achega á túa saúde, unha das mellores e máis divertidas actividades físicas para coidarte.
Coñeces como funcionan os reloxos intelixentes?
Os reloxos intelixentes ou "smartwatches" permítenche ter todo o que necesitas para estar sempre conectado e de forma accesible no teu pulso.
Con estes dispositivos pódese coñecer, cada vez con máis precisión, os pasos que damos ao día, as calorías que se queiman, os quilómetros que se corren ou nadan, as horas que se dorme, e mesmo un rexistro aproximado das pulsacións cardíacas.
Descobre neste curso todas as funcionalidades dun reloxo intelixente para utilizar na túa vida diaria:
Márcaste obxectivos na túa actividade física diaria? Sabes cantas calorías queimas ao día e o número de pasos andados?
Hai poucas cousas xa que non podamos facer cun móbil e o deporte non ía ser unha delas. O teléfono móbil non só pode acompañarnos ao ximnasio, senón que, grazas ás numerosas aplicacións que ofrece, moitas delas gratuítas, podemos facer a nosa rutina de adestramento moito máis fácil e divertida, axudándonos a medir, rexistrar e almacenar a información da nosa actividade física diaria de forma sinxela.
Neste curso ensinarémosche algunhas das principais funcións de aplicacións interesantes para coñecer contidos como:
A iniciativa do libro dixital E-Dixgal conta cun novo provedor de contidos: aulaPlaneta. Deste xeito cúmprese cunha das medidas de mellora previstas pola Xunta para impulsar a educación dixital en Galicia. Así o expuxeron esta mañá o conselleiro de Cultura, Educación e Ordenación Universitaria, Román Rodríguez; a directora da Axencia para a Modernización Tecnolóxica de Galicia (Amtega), Mar Pereira, e o director xeral da área de Educación do Grupo Planeta, Pablo Lara.
A partir do mes de marzo, aulaPlaneta integrará na plataforma do libro dixital máis de 7.800 recursos curriculares para 5º e 6º de Primaria e máis de 12.500 recursos para 1º e 2º da ESO. Ademais das materias obrigatorias, ofrece máis de 400.000 recursos educativos de animacións, fotografías e gráficos de alta calidade, vídeos e fragmentos sonoros, estatísticas actualizadas, atlas mundial, cronoloxías, artigos de temas de actualidade, navegador visual, etc. Tamén ofrece máis de 500 horas de formación a profesores para a integración e desenvolvemento da competencia dixital docente.
A proposta curricular de aulaPlaneta enriquece os contidos con secuencias didácticas adaptables ás necesidades da aula, propostas para fomentar a indagación, a investigación e o traballo colaborativo, así como exercicios para pensar e consolidar o aprendido.
AulaPlaneta é o terceiro provedor de E-Dixgal, que se suma aos actuais, Netex e Edebé. Ademais, está en fase de licitación o centro de produción, que facilitará aos docentes novas ferramentas e mecanismos para que poidan incorporar á plataforma contidos educativos innovadores. E tamén está en proceso de licitación o contrato dun novo provedor de contidos en inglés.
Un proxecto que favorece a igualdade de oportunidades
O conselleiro de Cultura, Educación e Ordenación Universitaria, Román Rodríguez, sinalou que a incorporación de Planeta supón un novo impulso e o fortalecemento do E-Dixgal, que é un dos piares da Estratexia galega para a educación dixital, edudixital 2020. Segundo explicou, a través destas ferramentas estase garantindo unha docencia máis personalizada e adaptada ás circunstancias do alumnado e, por tanto, favorecendo a atención á diversidade.
Román Rodríguez fixo especial fincapé na formación do profesorado como un dos elementos clave para o éxito da educación dixital, no que a Consellería está a traballar de xeito intensivo. Non en balde, todos os centros E-Dixgal conta cun Plan de formación propio no ámbito das novas tecnoloxías, cunhas 2000 horas de formación específica para o profesorado. Ademais, ditos plans incorporan tamén unha Escola de Nais e Pais para que as propias familias reciban información ao respecto e dispoñan de canles axeitadas para o acceso aos contidos e a resolución de dúbidas, entre outros.
Máis aló dos bos resultados obtidos e constatados a nivel educativo, o conselleiro destacou a importancia deste proxecto na democratización do uso das TIC no ensino, o que favorece a igualdade de oportunidades.
Mar Pereira sinalou que é fundamental continuar avanzando no proceso de transformación dixital da aula “se queremos proporcionar unha experiencia educativa adaptada ás necesidades duns alumnos que se desenvolven nunha contorna tecnolóxica, e que se enfrontarán ás demandas dun mercado laboral que esixe un perfís cada vez máis dixitais e non só no sector tecnolóxico”.
Pola súa banda, Pablo Lara explicou que “para aulaPlaneta é un orgullo participar nun proxecto de envergadura, o compromiso e a valentía da iniciativa E-Dixgal. A Amtega e a Xunta de Galicia demostraron estar aliñados co Grupo Planeta na maneira de concibir a educación do século XXI, poñendo ao alumno no centro e evolucionando o rol do profesor.
As ferramentas dixitais achegan elementos chave na nova maneira de ensinar: capacidade de personalizar o proceso de ensino, de traballar de maneira colaborativa, de medir o impacto na aprendizaxe, de motivas aos alumnos e de empoderar aos profesores
Proxectos como E-Dixgal no que a iniciativa privada traballa da man da Administración pública son fundamentais para conseguir un impacto real cara á mellora educativa que todos desexamos.
Melloras en marcha
A pasada semana completouse a entrega de máis de 13.000 ultraportátiles para o alumnado, cos que se renovou o equipamento co que desenvolven a súa actividade diaria os 154 centros que empregan o libro dixital.
Con esta renovación búscase avanzar un paso máis cara a unha educación integramente dixital. Pásase do concepto de equipo na aula ao de «mochila dixital», que acompaña ao alumno en toda a súa actividade educativa, tanto dentro como fose do centro, e que lle proporciona o acceso a todos os recursos educativos dixitais, cun soporte técnico ante calquera dúbida ou incidente.
A día de hoxe un total de 154 centros escolares e 11.600 alumnos de entre 5º de Primaria e 2º de ESO están incorporados ao proxecto E-Dixgal en Galicia. Dentro da Estratexia galega para a educación dixital, edudixital 2020, o obxectivo marcado no horizonte dos próximos tres anos é que o libro dixital chegue a 300 centros e beneficie a máis de 20.000 alumnos.
Servizo Premium
En 2018 activarase o Servizo de Soporte Premium para as familias, alumnado e profesores dos 154 centros educativos implicados na iniciativa, que ofrecerá tres tipos de asistencia: remota (telefónica e online); in situ, con desprazamento ao lugar do incidente, e a través de puntos físicos de atención.
Os máis de 1.000 profesores, 12.000 alumnos e as súas familias dispoñerán dunha única vía de atención para todas as cuestións relacionadas co uso do libro dixital a través de varias canles (teléfono, correo electrónico, web, app no móbil...), as 24 horas do día os sete días da semana. Desde este punto atenderanse todas as dúbidas, consultas e incidentes que poidan ter os usuarios, e resolveranse de maneira remota, se é posible, ou activando os servizos presenciais para que estas aténdanse onde se atopen os usuarios se non fose posible facelo a distancia.
O novo Servizo Premium contempla, como novidade, que o soporte se preste no domicilio da familia ou o docente para aqueles incidentes que requiran unha atención presencial.
Mellora da conectividade
A mellora das infraestruturas de telecomunicación é outro dos aspectos clave na estratexia de innovación educativa. Neste momento, preto do 95 % dos centros públicos que empregan o libro dixital teñen conexións de, como mínimo, 100 Mbps. En total, máis de 1.074 centros públicos, un 86 % do total, dispoñen desta velocidade, que este ano chegará ao 100 % dos centros educativos públicos que imparten Primaria e Secundaria.
Plan de formación dixital
Outra das medidas é o desenvolvemento dun plan continuo de formación dixital a docentes. Entre setembro e novembro impartíronse máis de 20 cursos nos que 430 profesores recibiron formación sobre cuestións técnicas e metodolóxicas relativas á educación dixital.
O operador público Retegal vén de publicar a licitación para adquisición e instalación das cámaras que integrarán a Rede de Vixilancia dos espazos forestais. Está previsto que en maio estea operativa unha primeira fase do sistema, que permitirá monitorizar o 48% do territorio, incluíndo terreos das 73 parroquias de Alta Actividade Incendiaria (PAAI) definidas así no Plan de Prevención e Defensa Contra os Incendios Forestais de Galicia (PLADIGA) da Consellería do Medio Rural.
A nova rede despregarase aproveitando as infraestruturas de Retegal. Nesta primeira fase instalaranse cámaras en 34 centros de telecomunicacións do operador público, que facilitarán cobertura visual de 1,4 millóns de hectáreas, preto da metade do territorio galego
Os obxectivos principais da rede nesta primeira fase son a vixilancia remota e servir de apoio na extinción de incendios. En caso de detectarse un lume o sistema achegará información visual en directo sobre o avance e as condicións do incendio e permitirá xeoposicionar o punto que se está a visualizar en cada momento. Deste xeito, a rede ofrece un mecanismo de apoio á toma de decisións polas autoridades e persoal técnico competentes para mobilizar e xestionar medios e recursos para os labores de extinción.
A rede, anunciada polo presidente da Xunta no Parlamento como unha das 30 medidas na proposta de acordo forestal, xestionarase a través dunha plataforma tecnolóxica que facilitará a vixilancia remota dos montes desde un centro de control as 24 horas do día e permitirá aos axentes e técnicos forestais o acceso en tempo real ás imaxes, incluso a través de dispositivos móbiles.
Investimento e evolución da rede
A posta en marcha e o mantemento da conta cun investimento de 2.026.000 euros ata 2022.
Nunha segunda fase, e en base ás necesidades detectadas polos equipos forestais, definirase a ampliación da cobertura da rede. Ademais, a medida que a evolución tecnolóxica ofreza novas solucións, prevese abrir unha consulta pública ao mercado para analizar a posibilidade de incorporar tecnoloxías innovadoras que melloren a eficacia do dispositivo ou permitan avanzar na detección temperá de lumes.
A Axencia para a Modernización Tecnolóxica de Galicia (Amtega) en colaboración coa Consellería de Infraestruturas e Vivenda están a traballar no desenvolvemento do Plan de Modernización Tecnolóxica da Mobilidade en Galicia, e-Mobility para impulsar a dixitalización do sistema público de transporte que dá servizo a uns 20 millóns de viaxeiros anuais con máis de 1.000 autobuses, 1.321 liñas e 14.140 paradas.
Esta semana a directora da Amtega, Mar Pereira, o director xeral de Mobilidade, Ignacio Maestro e o director de IT, Información, Procesos e Operacións de Abanca, José Manuel Valiño, asinaron un convenio de colaboración para desenvolver unha solución que permita o pago desde o móbil aos usuarios do transporte metropolitano.
O acordo recolle o compromiso de Abanca de proporcionar á Xunta unha solución que permita integrar a tarxeta de transporte metropolitano nos teléfonos móbiles. O seguinte paso será a pilotaxe da solución nunha das empresas que presta servizos de transporte publico metropolitano e, posteriormente, a implantación progresiva no resto da flota que presta transporte metropolitano.
Esta solución incorporarase á aplicación que está a desenvolver a Xunta para que os usuarios poidan seguir en tempo real as rutas dos autobuses e recibir a notificación das recargas dispoñibles.
Plan eMobility
O Plan eMobility, elaborado pola Amtega en colaboración coa Consellería de Infraestruturas e Vivenda, ten como obxectivos xerais a dixitalización integral de todos os procesos de xestión e tramitación por parte dos operadores e o desenvolvemento de novos servizos para os usuarios.
Entre as liñas de traballo previstas buscarse conseguir a monitorización en tempo real das rutas de transporte público para deseñalas e planificalas dun xeito máis eficiente e adaptadas ás necesidades dos viaxeiros.
As actuacións do Plan posibilitarán tamén novos servizos para os usuarios como o transporte a demanda, rutas personalizadas ou o pago desde o móbil. Os viaxeiros disporán dun portal do transporte, un punto centralizado onde atopar toda a información das rutas dispoñibles e no que xestionar as súas solicitudes de servizo.
Ademais, dixitalizaranse todos os procesos de xestión e tramitación da oferta de transporte por parte dos operadores, que terán á súa disposición unha Oficina Virtual do Transporte.
O Plan foi aprobado en xaneiro polo Goberno galego, cun investimento previsto de máis de 6,6 millóns de euros ata o 2020. Esta iniciativa desenvolverase en coordinación co traballo que está a realizar a Consellería para a reorganización do transporte público de pasaxeiros e que culminará coa aprobación en 2019 do Plan de Transporte Público de Galicia.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...