A Fundación Telefónica e o Concello de Lugo formarán a 20 persoas en protección dixital. E farano a través do curso de ciberseguridade impulsado polas dúas entidades co obxectivo de fornecer aos asistentes de coñecementos e habilidades que lles permitan mellorar a súa empregabilidade a través “dunha das especializacións técnicas máis demandadas e con máis futuro no mercado laboral actual”, en palabras dos organizadores do obradoiro. Tras cinco meses de formación, do 28 de maio a finais de outubro de 2018, os vinte participantes poderán presentar os seus proxectos ante empresas tecnolóxicas do sector.
O itinerario formativo, que virará ao redor de temas como as técnicas de protección para infraestruturas, o emprego de contra-medidas, a aplicación de contornas seguras de programación ou o hacking ético, está dirixido aos lucenses de 18 anos ou máis e comezará o 28 de maio no Edificio de Novas Tecnoloxías, en horario de mañá (de 9:00 a 15:00 horas). Quen desexe inscribirse ou recadar máis datos sobre a actividade, pode facelo a través da web da Fundación Telefónica.
A Fundación Telefónica e o Concello de Lugo queren que este itinerario formativo “sirva de ponte entre os cidadáns lucenses a partir de 18 anos de idade, que terminasen os estudos da ESO, e as empresas autonómicas”. Neste sentido, o director de Relacións Institucionais e Coordinación Territorial de Fundación Telefónica, Joan Cruz, destacou que “era preciso desenvolver uns itinerarios formativos que fosen o nexo de unión entre a demanda real das empresas e o sistema educativo. En Fundación Telefónica ofrecemos ese apoio, para que os mozos lucenses poidan gozar da oportunidade de incorporarse verdadeiramente á sociedade”. Cruz tamén engadiu, facendo reconto, que dende a súa creación en 2016, un total de 1.031 participantes continúan formándose en Emprego Dixital da Fundación Telefónica, “dos cales 532 xa atoparon emprego. Trátase dun programa de formación en competencias dixitais “que supón unha gran oportunidade polas alianzas establecidas con empresas e organizacións que precisan incorporar ao seu persoal persoal formado en tecnoloxía e desenvolvemento web”.
DIC Galicia volverá congregar a empresas e profesionais dos distintos sectores que poden aproveitarse das posibilidades que ofrecen os drones e as súas aplicacións.
A transformación dixital que se está levando a cabo será o eixo central de GaliciaTIC 2018, onde se analizarán as tecnoloxías, capacidades e infraestruturas que están a impulsar este cambio.
A Escola de Enxeñaría Aeronáutica e do Espazo do Campus de Ourense acollerá entre o 21 e o 25 de maio unha nova edición (a segunda) do seu curso Introdución aos sistemas aéreos non tripulados. Con carácter presencial, con 25 horas de duración e un máximo de 20 participantes, o obradoiro será impartido de novo en horario de mañá nas instalacións da Escola por Higinio González Jorge, profesor contratado doutor da Área de Xeodesia e Teledetección da Universidade de Vigo e piloto certificado de drons dende o ano 2014.
Segundo explican desde a Escola de Enxeñaría Aeronáutica e do Espazo, o docente conta con experiencia tanto a nivel de desenvolvemento como operación con diversos sistemas aéreos non tripulados, tanto de ala fixa como rotatoria, así como no relativo a subsistemas de navegación e sensores de imaxe embarcados, tanto activos como pasivos. Pertence, engaden, ao comité Aenor-CTN28 de certificación de UAS. Os contidos do obradoiro artéllanse en dúas partes. Unha primeira terá un carácter principalmente teórico e constará de módulos de introdución e conceptos xerais; de enerxía, propulsión e control; de subsistemas de sistemas áreos non tripulados e de aplicacións dos mesmos. A segunda parte terá unha faciana máis práctica e nela levaranse a cabo módulos de especificacións técnicas de sistemas aéreos non tripulados e planificación de voo fotogramétrico e procesamento de datos. Ademais, as e os participantes achegaranse nesta parte aplicada ao uso de Arduino para drones e realizarán, por último, unha visita de estudos ao Centro de Investigación Aeroportada de Rozas.
A actividade formativa, na súa primeira edición, foi copada case exclusivamente por estudantes (unha vintena) da Escola de Enxeñaría Aeronáutica e do Espazo de Ourense. Porén, o obxectivo da organización é abrir a actividade a alumnado de diferentes graos de diferentes enxeñarías, desde a Forestal ou Enerxía ata Telecomunicación ou Informática. A actividade adiántase no calendario para que a súa celebración sexa coetánea á celebración do II Congreso Internacional de Dronesque organiza en Ourense do 24 ao 26 de maio o Colexio Oficial de Graduados Enxeñeiros Técnicos de Telecomunicacións e a Asociación Galega de Graduados e Enxeñeiros Técnicos de Telecomunicación. “A escola tamén participa nalgunha mesa deste congreso e quixemos que o alumnado do curso que vamos a impartir tamén puidera achegarse ao congreso se é do seu interese”, comenta o director da escola do Campus de Ourense, Arno Fornella.
Quen queira ampliar os seus coñecementos sobre a revolución industrial que estamos a piques de experimentar no seu apoxeo, a da Industria 4.0, dicirlle que o Clúster TIC Galicia vaille brindar a oportunidade de facelo. E de que maneira? Pois basicamente a través de dous cursos de capacitación en ciberseguridade e xestión empresarial e organización 4.0, destinados a traballadores de pequenas e medianas empresas galegas (PEME). Estes obradoiros, que teñen o apoio do IGAPE en materia de co-financiamento, desenvolveranse dende finais de maio (día 24) e abranguerán todo o mes de xuño. O primeiro é de ciberseguridade e o segundo sobre xestión empresarial no ámbito 4.0.
Respecto do primeiro, porá o foco nas metodoloxías máis avanzadas para protexer a información e a comunicación en liña, en palabras do Clúster TIC “unha temática prioritaria en calquera tipoloxía de empresa actual xa que os datos constitúen un dos principais activos das mesmas”. Segundo informa a plataforma empresarial galega, a través deste curso o alumnado poderá coñecer as ameazas e os posibles ataques que poden dirixirse cara os sistemas telemáticos dunha entidade, saberán xestionar a seguridade dos datos na rede ou coñecer os perigos que se agochan no uso de dispositivos móbiles ou en mobilidade”. O curso inclúe nove módulos teóricos e dous prácticos, e desenvólvese en Santiago os martes e os xoves en horario de tarde. O seguinte obradoiro é Capacitación en Xestión Empresarial e Organización 4.0. Como se indica no seu nome, diríxese a incorporar aos asistentes ás novas metodoloxías automatizadas, intelixentes e sustentables de producir, unhas metodoloxías que permiten ás empresas dispor dun grande volume de datos para a toma de decisións e dar forma a novos modelos de negocio. Mediante este curso, “os alumnos poderán ter os coñecementos chave para a xestión de proxectos empresariais dende a perspectiva da nova Industria 4.0”. Este obradoiro celébrase na Coruña, os xoves en xornada completa. Inclúe 3 bloques temáticos con 8 sesións de traballo, 6 teóricas (48h) e 4 prácticas (16h).
Google aproveitou a súa conferencia anual para presentar un dos seus grandes desenvolvementos no que leva anos traballando: Google Duplex, un sistema que leva un paso máis aló os asistentes xa que realiza automaticamente chamadas reais para cubrir as necesidades do usuario.
Basicamente, o sistema entende as peticións do usuario e realiza automaticamente as xestións. Por exemplo, na presentación o conselleiro delegado da compañía, Sundar Pichai, mostrou chamadas reais realizadas por este sistema pedindo cita nunha barbería ou reservando mesa nun restaurante.
O usuario só ten que pedir por voz ou texto ao teléfono que lle pida cita na barbería o mércores ás 12, e Google Duplex encargarase automaticamente de realizar a chamada e manter a conversación coa barbería para levar a cabo a reserva.
Seguramente o máis impactante do sistema é que a conversación que mantén o sistema non é cun sintetizador de voz convencional, senón que soa totalmente natural de maneira que, nos exemplos mostrados por Pichai, o interlocutor humano non soubo que estaba a falar cunha máquina.
En resumo, Google Duplex mantén conversacións reais por teléfono utilizando intelixencia artificial, aforrando tempo ao usuario.
Na presentación o responsable da compañía centrou o público obxectivo da súa nova tecnoloxía en empresas e usuarios que queren aforrar tempo. Con todo, un dos maiores impactos será en persoas con discapacidade que non poden ou teñen dificultades para manter unha conversación.
Sen dúbida eles serán os maiores beneficiados por este sistema xa que, grazas á súa tecnoloxía, poderán comunicarse e realizar accións que doutra maneira terían que pedir a outra persoa.
A Deputación de Lugo aprobou o venres os 154 novos postos de traballo para lucenses no paro en entidades da provincia grazas ao Ben Empregado 4, máis social. Trátase da última edición desta iniciativa dotada con 2,2 millóns de euros e acubillada ao abeiro da aposta da entidade provincial por “xerar emprego de calidade, defendendo a igualdade e os dereitos dos traballadores”. A respecto do devandito, o organismo provincial anunciou que vai publicar os perfís dos traballadores e os lucenses seleccionados no espazo web específico do programa.
Tamén fixo saber que a semana que vén publicaranse os 27 postos que ficaron desertos do Ben Empregado 4, aos que se poderá inscribir calquera lucense sen traballo. Coma en anteriores edicións, unha parte importante dos postos mobilizados son ocupacións relacionadas directamente coas novas tecnoloxías da información.
A deputada de Promoción Económica e Social Sonsoles López Izquierdo salientou que a cuarta edición do programa vén con axudas dun máximo de 22.000 euros, dirixidas a empresas e colectivos de toda a provincia, para a contratación durante 1 ano de novas/os traballadoras/es cos que, “ademais de facer fronte á taxa de paro, contribúese á actividade de autónomos, PEME e asociacións lucenses”. Tamén explicou que o organismo provincial asume ao 100% os custes laborais de 19 traballadores con capacidades diferentes ou en risco de exclusión laboral, ao 90% a contratación de 39 novos empregados en asociacións da provincia e o 50% de123 traballadores en xeral.
Dos 181 novos postos de traballo, 11 son en empresas e colectivos sen ánimo de lucro de Concellos da Mariña; 24 da Comarca da Terra Chá; 9 na de Sarria; 79 na de Lugo; 3 na da Ulloa; 10 na da Montaña; 18 en Lemos e Chantada. Inclúense, como dixemos, empregos relacionados directamente coas novas tecnoloxías. Por exemplo técnicos superiores en administración de sistemas informáticos, deseñadores gráficos ou técnicos informáticos.
O obxectivo da xornada `Habilidades dixitais para o emprego' é coñecer que novos perfís, coñecementos e habilidades están a buscar os departamentos de Recursos humanos das empresas, ademais de compartir exemplos de boas prácticas no campo da formación para o emprego.
Grupo Servizos Sociais Integrados (Grupo SSI) presentou recentemente 'Digisad', un proxecto que integra o uso de ferramentas dixitais no seguimento do Servizo de Atención Domiciliaria (SAD) a maiores e persoas dependentes.
Coa incorporación das novas tecnoloxías, lógrase un método de traballo máis eficiente e mellor atención para pacientes e familiares, sinalan desde o Grupo SSI.
En concreto, este proxecto nace tras unha avaliación realizada a principios de 2017 sobre os procedementos do departamento do SAD. O estudo concluíu que as principais áreas de mellora atopábanse na comunicación entre as auxiliares de atención domiciliaria e o equipo de coordinación, por unha banda, e na calidade da recollida da información das necesidades das persoas atendidas, por outro.
Neste contexto, a mediados de 2017, Grupo SSI realizou unha proba piloto para ver como se podía mellorar o servizo de atención a domicilio incorporando ferramentas dixitais. Para iso, entregouse a varias persoas do equipo un smartphone que incluía unha conta de correo electrónico coporativo e unha ferramenta de seguimento das persoas atendidas.
Na proba piloto logrouse unha melloría notable na calidade do servizo prestado ás persoas maiores e dependentes, no rendemento do tempo das auxiliares (fundamentalmente, pola redución dos tempos de desprazamentos) e na calidade da información dispoñible para as auxiliares e familiares.
Isto permitiu ver que estes avances redundaban nunha mellora da atención domiciliaria e que resolvían as deficiencias detectadas na avaliación do servizo que Grupo SSI de principios de 2017.
Vantaxes de 'Digisad'
En primeiro lugar, 'Digisad' proporciona información en tempo real ao equipo de Coordinación do SAD. Ademais, a información atópase centralizada e dispoñible para as institucións públicas coas que Grupo SSI traballa e para as familias que realizan consultas sobre o seu familiar. Por último, ten un impacto positivo directo sobre o traballo das auxiliares, xa que reciben a información sobre novos servizos, cambios de quenda ou novas necesidades de forma máis áxil e exacta.
Así pois, ante estes resultados, unha vez acabada a fase de proba Grupo SSI empezou a traballar inmediatamente para estender esta metodoloxía ao resto dos seus auxiliares, co obxectivo de convertelo no sistema de traballo básico do servizo de atención domiciliaria. A finais de 2017, 104 auxiliares de atención domiciliaria de Grupo SSI xa recibían comunicación diaria por correo electrónico e 86 delas xa estaban a utilizar un telefóno intelixente preparado para a súa operativa diaria. En decembro, un total de 419 persoas estaban a ser monitoradas e a información sobre a súa evolución estaba xa dispoñible e centralizada para a organización, as familias e as institucións.
En 2018 estes números foron aumentado. Actualmente, Grupo SSI segue no proceso de implantación de 'Digisad', que inclúe formación para as súas traballadoras e un período de adaptación ás novas ferramentas. O obxectivo é continuar ata cubrir todo o persoal.
En definitiva, o proxecto de Digisad, de Grupo SSI, supón un avance innovador e novo no proceso de dixitalización do servizo de atención domiciliaria, a implantación das TIC no ámbito sociosanitario e a obtención de información e coñecemento que favorece a mellora do servizo prestado aos maiores ou persoas con dependencia.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...