Para obter máis información podes facelo a través do: Observatorio estatal da discapacidade
O Observatorio Estatal da Discapacidade (OED) é un instrumento técnico que a Administración Xeral do Estado, a través do Ministerio de Sanidade, Servizos Sociais e Igualdade (Dirección Xeral de Políticas de Apoio á Discapacidade e Real Padroado sobre Discapacidade), e a Junta de Extremadura, a través do Servizo Estremeño de Promoción da Autonomía e Atención á Dependencia, SEPAD, poñen ao servizo das Administracións Públicas, a Universidade e o Terceiro Sector, para a recompilación, sistematización, actualización, xeración e difusión de información relacionada co ámbito da discapacidade.
O OED ten o seu amparo no artigo 73 do Real Decreto Lexislativo 1/2013, de 29 de novembro, polo que se aproba o Texto Refundido da Lei Xeral de dereitos das persoas con discapacidade e da súa inclusión social. Configúrase como instrumento de promoción e orientación das políticas públicas de conformidade coa Convención Internacional sobre os dereitos das persoas con discapacidade.
As institucións promotoras do OED son o Ministerio de Sanidade, Servizos Sociais e Igualdade, a través da Dirección Xeral de Políticas de Apoio á Discapacidade e o Real Padroado sobre Discapacidade, a Comunidade Autónoma de Estremadura a través do Servizo Estremeño de Promoción da Autonomía e Atención á Dependencia (SEPAD), o Comité Español de Representantes de Persoas con Discapacidade e a Universidade de Estremadura.
A tecnoloxía pode empregarse para superar barreiras, e dende Microsoft presentaron esta semana unha solución que agradecerán moitos xogadores de Xbox One e Windows 10 de todo o mundo, xa que facilitaralles poder gozar do lecer electrónico como fan outras persoas empregando un novo mando adaptable ás súas diversidades funcionais.
O Xbox Adaptive Controller é un mando deseñado a través dun punto de vista inclusivo, tendo en consideración a xogadores que non poden suxeitar un gamepad tradicional ou que non poden premer nalgúns dos seus botóns, para que poidan gozar dos videoxogos pese ás súas limitacións de mobilidade. Temos así un dispositivo con botóns programables de grande tamaño que pode conectarse a conmutadores, botóns, soportes e joysticks externos (á venda por separado) que fan que os xogos sexan máis accesibles. Estes accesorios adicionais chegan de distintos fabricantes e inclúen dende grandes botóns até pedais, pasando por joysticks que poden manexarse coa boca ou cunha perna, de xeito que cada persoa pode organizar o controlador de xogo que se adapte ás súas características físicas.
Este dispositivo tamén goza de certo elemento social, xa que paralelamente pode completarse cun mando de Xbox One operando a xeito de copiloto, convertendo o xogo nunha experiencia cooperativa. Ábrese así todo un mundo de posibilidades para as persoas con diversidade funcional, que non teñen por que dicir adeus a gozar con videoxogos grazas a solucións como esta.
O Xbox Adaptive Controller terá un prezo de 99,99 dólares (o prezo en euros aínda non se fixo público) e para que vaiamos facéndonos unha idea das súas posibilidades Microsoft publicou unha completa reportaxe sobre este grande avance na accesibilidade dos videoxogos.
O Colexio Oficial e a Asociación de Enxeñeiros de Telecomunicación de Galicia veñen de fallar os Premios Galicia das Telecomunicacións e da Sociedade da Información 2018, que serán entregados o vindeiro 1 de xuño no Hotel Pazo Los Escudos de Vigo no decurso da XXIII Noite Galega das Telecomunicacións. Esta convocatoria distingue, un ano máis, o emprendemento, a investigación e as boas prácticas xeradas no ámbito TIC galego por diferentes persoas e empresas.
En total, vanse entregar cinco premios. O primeiro deles distingue o Mellor Proxecto TIC con Beneficios Sociais, galardón que este ano recae no proxecto Litter Drone, monitorización do lixo mariño empregando drons e análises de imaxe dirixido por Fernando Martín, profesor na Escola de Enxeñaría de Telecomunicación da Universidade de Vigo. Os membros do xurado valoraron a calidade e o grado de innovación tecnolóxica deste proxecto mediante o emprego de sistemas abertos e a participación efectiva de axentes implicados no eido da sustentabilidade ambiental.
O Premio Gradiant á Mellor Tese de Doutoramento Aplicada ao Sector TIC recae en David Vázquez polo seu traballo Detection of image resampling and video encoding footprints for forensic applications. O xurado valorou como razón determinante desta distinción o reto tecnolóxico de alto nivel ao que dá resposta o traballo, que contribúe á análise forense de probas mediante o incremento da confianza nos contidos dixitais, as transferencias tecnolóxicas á empresas e a solicitude de patentes.
O Premio Acuntia á empresa galega que aposta polo desenvolvemento de infraestruturas intelixentes de telecomunicacións distingue o labor de Abanca. O xurado recoñece a utilización das TIC no proceso de transformación dixital da entidade financeira de cara a lograr unha banca máis áxil, próxima, transparente e innovadora; o que posibilitou a creación dunha infraestrutura flexible e segura que facilita a expansión nacional e internacional do seu negocio.
O Premio Enxeñeiro do Ano 2018 recae en Joaquín Lameiro pola súa exemplar traxectoria profesional e o seu fondo compromiso co desenvolvemento do sector das telecomunicacións no noso país. Enxeñeiro Superior de Telecomunicación pola ETSIT de Madrid, durante 38 anos desenvolveu a súa carreira profesional na industria das TIC e dos servizos de consultoría tecnolóxica. Traballou para Wang Laboratories e tamén para IBM, empresa na que ocupou diversos postos de responsabilidade. Así, entre 1999 e 2014 foi director rexional desta multinacional na zona noroeste de España, ocupándose da representación institucional da empresa e da relación con clientes e partners.
Finalmente, o Premio Socio de Honra distingue a Luciano Vidán, presidente do Colexio Oficial de Médicos da Coruña, polo pulo outorgado á entidade que dirixe en relación ao desenvolvemento de novas tecnoloxías que permiten mellorar e optimizar o traballo no eido sanitario. Neste sentido, recentemente o Colexio de Médicos da Coruña asinou un convenio co COETG para favorecer o uso das TIC na profesión médica co obxecto de que o seu emprego redunde «nunha mellor praxe e nunha mellor atención sanitaria aos cidadáns», segundo recolle o texto do acordo.
O Concello de Boqueixón vai organizar o vindeiro 31 de maio unha sesión informativa sobre un problema cada vez máis frecuente entre os nosos rapaces: o problema de non dar interrompido a tempo as súas comunicacións a través das novas tecnoloxías, unha eiva que redunda negativamente nas súas relacións persoais, nos seus estudos e mesmo no seu desenvolvemento.
A sesión, programada ao abeiro da iniciativa local Falamos de..., consiste nunha charla sobre Adicción ás novas tecnoloxías na adolescencia. A cita desenvolverase o próximo xoves 31 de maio na Casa do Concello ás 17.00 horas. Dirixida á veciñanza en xeral e ás familias de adolescentes en particular, esta actividade ten carácter gratuíto. As persoas interesadas en asistir deberán formalizar a súa inscrición antes do 23 de maio no Departamento de Educación e Cultura a través do teléfono 981 513 115 ou no e-mail cultura@boqueixon.com.
Segundo lembra o Concello, a iniciativa é posible grazas á colaboración da Consellería de Sanidade, a Axencia de Coñecemento en Saúde (ACIS) e da Escola Galega de Saúde para Cidadáns. Dende o Concello animan á veciñanza a inscribírense nesta sesión.
Será a vindeira semana, o xoves 24 de maio, cando a compostelá Cidade da Cultura acolla a XVI edición de GaliciaTIC, un punto de encontro relevante no eido das TIC galegas que leva a cabo a Asociación de Empresas de Tecnoloxía de Galicia (Ineo) e a empresa INETEC.
Baixo o título de Tecnoloxías, capacidades e infraestruturas que están a impulsar a transformación dixital, botará a andar este GaliciaTIC no edificio CINC do Gaiás coa finalidade de atraer non só aos profesionais deste ámbito, senón tamén aos dos demais sectores empresariais para amosarlles o que as ferramentas dixitais poden facer polas súas empresas.
O foro deste ano nace con varios propósitos: analizar as tendencias actuais na transformación dixital e as oportunidades de negocio asociadas a elas para as TIC galegas; amais de sensibilizar ao resto de sectores sobre as vantaxes que leva (aforro de custos, mellora de produtividade, redución de tempos...).
Haberá cinco tipos de actividades diferentes: relatorios, clases maxistrais e mesas de debate (onde expertos do eido dixital como Andrés Martínez, desenvolvedor de programas de Google, ofrecerán a súa visión sobre as ferramentas de meirande futuro, botando luz sobre as capacidades e as infraestruturas existentes para impulsar a transformación dixital), mesas temáticas (con sesións que abordarán temas como a transformación do posto de traballo, a información a gran escala -Big Data- para optimizar e personalizar a oferta turística, a dixitalización nos estaleiros 4.0 ou a mellora dos procesos de negocio con traballadores virtuais, entre outras cuestións), competicións de enxeñaría (da man do Colexio Oficial de Enxeñeiros de Telecomunicación de Galicia, convocando estudantes e profesionais e incluíndo un reto sobre o desenvolvemento, o proxecto e a planificación dunha Cidade Intelixente para unha poboación mediana de Galicia), demostracións (con showrooms e presentacións en vivo de produtos comercializados por tecnolóxicas galegas, por exemplo as solucións de Xesol Innovation, compañía mergullada no ámbito da Internet das Cousas e orientada ao desenvolvemento de solucións para coche conectado e autónomo, e que mostrará en GaliciaTIC un vehículo cun sistema de percepción dinámica que detecta e monitora a traxectoria dos peóns) e sesións de networking (con xeiras de traballo en rede entre os asistentes nas pausas do café, do xantar e das zonas comúns de lecer).
A asistencia a GaliciaTIC é de balde pero é necesario un convite que pode solicitarse aos organizadores e patrocinadores do evento. Na páxina web do evento pódense consultar os mesmos, así como a totalidade do programa e as empresas participantes.
'Hiperconectividade: enfoques novos, novos públicos' é o lema co que, no Día Internacional dos Museos que se celebra hoxe día 18 de maio, quérese lembrar a importancia da tecnoloxía e as novas formas de comunicación, como as redes sociais, para que os museos poidan facer chegar os seus contidos xa sexa de forma presencial ou non.
A tecnoloxía permite que os museos poidan chegar a novos públicos e é tamén un instrumento idóneo para que as persoas con discapacidade poidan gozar dunha experiencia cultural en condicións de igualdade xunto ao resto de visitantes.
Tendo en conta que eses avances tecnolóxicos deben traballar en favor da accesibilidade e non xerar novas barreiras.
Nova Norma de Calidade para Museos
Neste sentido, enriquecer a experiencia do visitante nos museos, incluíndo un compromiso coa accesibilidade, é o obxectivo da Norma de Calidade para a prestación do servizo de visitas en Museos e Coleccións Museísticas, promovida polo Instituto para a Calidade Turística Española (ICTE) e a Subdirección Xeral de Museos Estatais, coa colaboración dos representantes dos principais museos españois, e en cuxa redacción colaborou FIAPAS, achegando o seu coñecemento en materia de accesibilidade para as persoas xordas.
A Norma, que pronto verá a luz, entre outras recomendacións, indica que, para mellorar a accesibilidade universal, os museos deberían facilitar os materiais e produtos de apoio necesarios e ofrecelos tanto in situ como con antelación.
Así, no caso das persoas xordas que se comunican en lingua oral e usan prótese auditivas, é necesario que dispoñan de medios de apoio á audición, como o bucle magnético, e subtítulos tanto nos contidos audiovisuais ofrecidos nas súas instalacións, como naqueles que se difundan a través doutros medios como a súa web e as redes sociais.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...