O Centro de Investigación TIC (CITIC) da Universidade da Coruña desenvolveu hoxe un obradoiro de robótica para nenas e nenos emigrantes.
O Centro de Investigación TIC (CITIC) da Universidade da Coruña desenvolveu hoxe un obradoiro de robótica para nenas e nenos emigrantes. E fíxoo a través da súa colaboración coa ONG coruñesa Equus Zebra. Segundo informa o centro, asistiron á actividade unha vintena rapaces con idades comprendidas entre os 8 e os 12 anos. O obradoiro levouse a cabo nas instalacións de Equus Zebra baixo o título Taller de programación visual gráfica con Scratch e Makey Makey e foi impartido polo subdirector do CITIC, Javier Pereira, e demais persoal do centro.
Grazas á iniciativa, os pequenos tiveron a oportunidade de dar conta dalgúns dos avances levados a cabo no ámbito da robótica, amais de ter ao seu alcance a posibilidade de probalos en primeira persoa a través de diferentes xogos.
Segundo informa o centro coruñés, a finalidade do obradoiro foi introducir á rapazada nas ferramentas dixitais, amais de favorecer a integración dos pequenos en risco de exclusión social (botando abaixo muros e salvando fendas) pola vía tecnolóxica. Ademais, o CITIC ten o obxetivo de “consolidarse como un axente clave na cidade de A Coruña” e reafirmar o seu compromiso con iniciativas sociais e culturais, “fomentando ademais a transferencia de coñecemento á sociedade”.
Equus Zebra é unha ONGD (Organización Non Gobernamental para o Desenvolvemento) adicada á integración socio-laboral de persoas en risco de exclusión, sen ánimo de lucro e aconfesional, fundada no ano 2000 en A Coruña.
A Deputación de Lugo fixo reconto hoxe dos postos de traballo xerados na provincia a través do programa Depuemprego, o plan de impulso laboral da entidade.
A Deputación de Lugo fixo reconto hoxe dos postos de traballo xerados na provincia a través do programa Depuemprego, o plan de impulso laboral da entidade. Segundo fixo saber a deputada de Promoción Económica e Social Sonsoles López Izquierdo, a cifra de traballos creados foi de 308, e o número de Concellos beneficiados resultou ser de 63. Unha parte das novas ocupacións tivo relación directa coas novas tecnoloxías, a xeración de contidos ou a dinamización vía dixital, por exemplo: informáticos, técnicos en informática, operadores de cámara ou técnicos en turismo, entre outros.
Segundo lembrou a deputada, o programa destinouse a administracións locais de municipios de menos de 20.000 habitantes e está dotado con 3,5 millóns de euros. Con este orzamento fináncianse os custos laborais de novos traballadores que reforcen os servizos públicos municipais. Uns servizos, por outra banda, que as pequenas entidades locais teñen que ofrecer á cidadanía.
López Izquierdo salientou que nos últimos tres anos investíronse dende o Executivo provincial, a través desta programación, 6,6 millóns de euros. Con eles, engadiu, “xeráronse 523 novos empregos”, unha cifra que engadida ás cifras presentadas hoxe guinda un investimento superior aos 10 millóns de euros e aos 831 postos de traballo dirixidos a fortalecer e ampliar as prestacións municipais no rural.
A rehabilitación de persoas con discapacidade auditiva é un momento importante e complicado, polo que calquera apoio que poida facilitar este proceso é fundamental e a tecnoloxía pode ser unha gran axuda.
Así o creu a asociación coruñesa Acopros (Asociación de Colaboración e Promoción dás Persoas Xordas), que se puxo ao choio para desenvolver unha aplicación que poida facilitar o proceso de rehabilitación das persoas con discapacidade auditiva e da súa contorna social.
O proxecto recibe o nome de Praudi e o obxectivo é crear unha aplicación informática actualizada e accesible, cun enfoque atractivo para motivar ás persoas con discapacidade auditiva no proceso de rehabilitación.
Ademais, está pensada especialmente para as persoas con discapacidade auditiva que viven en ámbitos rurais e que teñen dificultades para acudir ás sesións de rehabilitación, xa que poderán realizar os exercicios desde a súa casa.
A aplicación estará destinada tanto á persoas con discapacidade auditiva como aos seus familiares, así como aos profesionais sanitarios e educativos que traballen no proceso de rehabilitación.
Para o desenvolvemento desta app, Acopros contará cun equipo informático que se encargará do desenvolvemento da aplicación e cun logopeda especializado, que deseñaría os exercicios de cada fase da rehabilitación baseándose en imaxes e sons.
Tendo en conta que a rehabilitación auditiva é un proceso longo e difícil, a aplicación terá distintas etapas, co obxectivo de que sexa atractiva para os usuarios en todo momento.
Falamos noutras ocasións da importancia da educación lúdica, pero divertirse tamén é un factor moi importante noutros procesos, como o da rehabilitación.
Entidades públicas y privadas sin fines de lucro tendrán un mes de plazo para solicitar las subvenciones
A Xunta, a través da Axencia para a Modernización Tecnolóxica de Galicia (Amtega) e en colaboración coa Secretaría Xeral de Cultura, abre mañá o prazo de solicitudes da convocatoria de axudas para facilitar a dixitalización dos fondos patrimoniais a entidades públicas e organizacións privadas sen fins de lucro. Así se publica hoxe no DOG, tras a aprobación o pasado mes de xuño no Consello do Goberno galego desta medida enmarcada na iniciativa da Memoria Dixital de Galicia.
As axudas, que contan cun importe total de 800.000 euros, están destinadas á dixitalización de fondos documentais en soporte papel (publicacións seriadas, manuscritos, mapas, material gráfico como fotografías, gravados, carteis, debuxos, monografías e folletos, e partituras, partituras anotadas ou manuscritos de música). Cómpre destacar que os recursos dixitais que se xeren nos proxectos subvencionados se difundirán a través do portal Galiciana
O vindeiro venres, 20 de xullo, ás 11 da mañá celebrarase unha xornada informativa no Auditorio Neira Vilas, da Cidade da Cultura, na que os posibles beneficiarios terán a oportunidade de formular calquera dúbida en torno á convocatoria. A entrada é aberta e non precisa de inscrición previa.
Subvencións de ata 90.000 euros
A convocatoria subvenciona proxectos cun importe mínimo de 10.000 euros e máximo de 90.000 euros. As entidades beneficiarias recibirán un anticipo do 80% da subvención concedida este ano e o 20% restante en 2019, unha vez acreditado o remate dos traballos de dixitalización. O prazo de presentación de solicitudes será dun mes desde o día seguinte á súa publicación no DOG.
As axudas están dirixidas aos órganos estatutarios da Comunidade Autónoma, entidades locais, e entidades delas dependentes, universidades públicas e o Consello Galego de universidades, entidades privadas sen fins de lucro que dispoñan de activos do patrimonio cultural de Galicia, reais academias e as academias de Galicia, oficialmente establecidas e recoñecidas.
Memoria Dixital de Galicia
A Memoria Dixital de Galicia é unha estratexia impulsada desde o ámbito público, a través da Consellería de Cultura, Educación Ordenación Universitaria e a Axencia para a Modernización Tecnolóxica de Galicia (Amtega), en colaboración coa sociedade galega e con todos os axentes implicados na xestión do patrimonio cultural galego, baixo a denominación das institucións da memoria, entre os que están o Consello da Cultura Galega, a Real Academia Galega, o Instituto de Estudos Galegos Padre Sarmiento ou as universidades públicas galegas.
Con esta iniciativa Galicia aposta polo establecemento de sinerxías e modelos colaborativos entre as entidades públicas, privadas e calquera axente con responsabilidade no patrimonio cultural para acadar o maior nivel de catalogación, preservación e difusión, independentemente da súa ubicación ou propiedade.
Con este dispositivo, as familias estarán conectadas cos seus maiores en todo momento e recibirán avisos en caso de caída ou necesidade de axuda
O conselleiro de Economía, Emprego e Industria, Francisco Conde, destacou durante a apertura da segunda edición do coworking do Salnés, que esta iniciativa aspira a converter Arousa nun centro de emprendemento comarcal.
Tras o éxito da primeira edición deste espazo especializado no eido do turismo e da alimentación -dous sectores estratéxicos da zona- co impulso dunha vintena de proxectos, a segunda convocatoria ponse en marcha con 22 novas iniciativas na que volverán cobrar protagonismo o sector turístico e alimentario, con novos proxectos cada un, que se completan con iniciativas no eido da artesanía, os servizos e o téxtil.
Esta rede de coworkings, no que a Xunta colabora coa Escuela de Organización Industrial, pretende dinamizar as economías locais de Galicia, apoiando a creación de emprego de calidade, aproveitando os recursos e fortalezas de cada zona para crear novas oportunidades económicas, fixando poboación e fomentando novas alternativas para facer os concellos máis atractivos e competitivos.
Tal e como explicou o conselleiro, ata finais de ano os participantes terán a oportunidade de dar forma aos seus proxectos coa súa participación en obradoiros, sesións formativas grupais, mentoring e eventos que potencien o networking. O espazo ofrece as tecnoloxías e servizos que precisan para desenvolver os seus proxectos nos que contarán cun mentor, 40 horas de titorización por iniciativa e 60 horas de formación en competencias de emprendemento e xestión.
O espazo do Salnés forma parte dunha rede de coworkings posta en marcha en 2016 que, ao remate da terceira edición, terá permitido impulsar 440 proxectos promovidos por 540 emprendedores. En concreto, o espazo que visitou o conselleiro foi unha das novidades da segunda edición xunto co coworking do CIS Madeira (orientado ao sector forestal).
Na súa intervención, o conselleiro destacou o compromiso do Goberno galego co emprendemento a través de iniciativas como a rede de aceleradoras, programas como Galicia Emprende e Galicia Rural Emprende, os distintos servizos de asesoramento ou as medidas da Lei de implantación empresarial para facilitar a tramitación administrativa e o acceso ao solo ás empresas, así como para mellorar a fiscalidade en colaboración cos Concellos Emprendedores.
Ata o próximo 27 de xullo permanece aberta a primeira das dúas convocatorias que desenvolve durante este ano o Programa Galicia Emprende, co que a Consellería de Economía, Emprego e Industria impulsará 80 proxectos de autónomos e emprendedores con axudas por valor de 3 millóns de euros, e que mobilizarán investimentos que acadarán os 11 millóns de euros.
O seguinte prazo de solicitudes desta liña de apoio ao emprendemento, desenvolta polo Igape e cofinanciada polo Fondo Europeo de Desenvolvemento Económico, abrirase o 30 deste mes. Os emprendedores interesados disporán ata o 25 de outubro para acollerse a esta iniciativa, que ten como obxectivo de estimular o tecido empresarial galego e fomentar a xeración de emprego mediante a creación e consolidación de empresas novas.
Xunto con este programa, a Xunta vén desenvolvendo, tamén a través do Igape, o Galicia Rural Emprende, deseñado para promover a diversificación e creación de novas empresas non agrícolas sobre o territorio. Estas dúas liñas de axuda ao emprendemento suman este ano, como en 2017, un orzamento de 7,5 millóns de euros.
O pasado ano, a través de ambas iniciativas, o Goberno galego apoiou 162 proxectos empresariais de emprendedores que mobilizaron máis de 18 millóns de euros en novos investimentos e que levan asociados a creación e o mantemento de 385 postos de traballo. A estes apoios hai que engadir a activación dos Instrumentos Financeiros Innovadores (IFIs), que reforzan outros instrumentos como os préstamos participativos e o capital risco xestionado a través do Fondo Galicia Iniciativas Emprendedoras.
enPathia, que é como se chama este sistema, adáptase a calquera parte do corpo do usuario que poida mover aínda que sexa levemente e permite manexar calquera computador cun conector USB que utilice un sistema operativo Windows, Linux ou MacOS.
A solución consiste nun pequeno sensor que se fixa cunha cinta a calquera parte do corpo, e este adáptase a calquera tipo de movemento que poida facer o usuario.
enPathia permite realizar as mesmas accións que se poden facer cun rato, xa que detecta o movemento do sensor, e cando este se para sobre un elemento abre un menú no que o usuario elixe que tipo de clic quere facer sobre ese elemento: clic normal, dobre clic, clic dereito...
Este innovador sistema está patentado por Eneso e pola Universidade de Málaga e está dispoñible a través da páxina web da compañía malagueña.
A Rede de Videovixilancia Forestal da Xunta entrou en funcionamento a pasada semana coa activación de 20 das 88 cámaras que integran a plataforma. O sistema incorpora as melloras ofertadas pola empresa adxudicataria, a galega Itelsis, que incrementou o número de centros de 34 a 44, o que permitirá monitorar o 54% do territorio, fronte ao 48% inicial.
A Rede de Videovixilancia dos espazos forestais concibiuse como un instrumento de apoio ao labor de detección, prevención e seguimento deste tipo de incendios e foi anunciada polo presidente da Xunta no Parlamento como unha das 30 medidas na proposta de acordo forestal. Así o recordaron onte pola mañá a conselleira de Medio Rural, Ángeles Vázquez, e a directora da Axencia para a Modernización Tecnolóxica de Galicia, Mar Pereira, durante a visita que realizaron ao Centro de Coordinación Central da Dirección Xeral de Montes para comprobar o funcionamento da plataforma, que estará completamente operativa a mediados de agosto.
Cámaras de altas prestacións
A nova rede estase a despregar aproveitando as infraestruturas de Retegal. Estanse a instalar 2 cámaras de altas prestacións, dotadas de visión nocturna e con capacidade para operar baixo temperaturas extremas e resistentes a ventos furacanados en 44 centros de telecomunicacións do operador público.
As 88 cámaras que integran a Rede facilitarán cobertura visual de máis de 1,5 millóns de hectáreas, máis da metade do territorio galego, incluíndo terreos das 73 parroquias de Alta Actividade Incendiaria (PAAI) definidas así no Plan de Prevención e Defensa Contra os Incendios Forestais de Galicia (PLADIGA) da Consellería do Medio Rural.
Plataforma para unha xestión integral
A nova plataforma ofrece unha xestión centralizada das cámaras, facilitando a vixilancia remota dos montes desde o Centro de Coordinación Central as 24 horas do día e permitirá aos axentes e técnicos forestais o acceso en tempo real ás imaxes, incluso a través de dispositivos móbiles.
Ademais a plataforma integrarase coas aplicacións empregadas polo SPDCIF como o Xeocode, baseada nun sistema de información xeográfico, que posibilita a xestión de alarmas, incendios, medios e persoal on line a nivel de distrito, provincial e central.
En caso de detectarse un lume o sistema achegará información visual en directo sobre o avance e as condicións do incendio e permitirá xeoposicionar o punto que se está a visualizar en cada momento. Deste xeito, a rede ofrece un mecanismo de apoio á toma de decisións polas autoridades e persoal técnico competentes para mobilizar e xestionar medios e recursos para os labores de extinción.
Investimento e evolución da rede
No desenvolvemento da rede colaboran a Consellería do Medio Rural, a Axencia para a Modernización Tecnolóxica de Galicia (Amtega) e Retegal que articula a posta en marcha e mantemento desta Rede de Vixilancia dos espazos forestais ata 2022 cun investimento de 2.026.000 euros.
O conselleiro de Economía, Emprego e Industria, Francisco Conde, sinalou onte nunha xornada celebrada en Santiago de Compostela que a Xunta vai impulsar a posta en marcha de Hubs de Innovación Dixital como punto de encontro entre a empresa, a investigación e o financiamento. Despois do verán realizarase a primeira convocatoria, baixo concorrencia competitiva, para identificar os Hubs que todos os axentes do sistema innovador queren impulsar en Galicia.
A través da fórmula dos Hubs de Innovación Dixital, a Administración autonómica busca cohesionar a todos os axentes en torno a sectores estratéxicos, para incentivar a colaboración entre eles e que iso dea lugar a novos proxectos conxuntos, de carácter novidoso e con capacidade para posicionar a innovación galega en Europa.
O obxectivo é que centros de coñecemento e empresas poidan desenvolver unha estratexia de colaboración firme, buscar os socios axeitados, establecer canles de comunicación, aliñar procesos e responder de forma flexible ás demandas do mercado e da sociedade. Así, os Hubs permitirán un mellor rendemento de todas as capacidades do sistema de innovación galego, facilitando o acceso das empresas ás oportunidades existentes no sector tecnolóxico. Neste sentido, o conselleiro sinalou que a Xunta xa mantivo encontros con 65 axentes de todo o ecosistema de innovación galego para avanzar no desenvolvemento dos Hubs.
Conde, que participou nun encontro sobre estratexias de apoio á Industria 4.0, incidiu na importancia da innovación colaborativa, converxendo empresas, centros de coñecemento e Administración, para impulsar a I+D+i e potenciar o desenvolvemento da nova revolución industrial. Sinalou neste sentido que a cooperación entre todos os axentes é a mellor fórmula para activar todos os resortes que compoñen o ecosistema de innovación, e aliñalos coas necesidades do tecido produtivo.
O reto é que a industria se sume á dinámica do descubrimento, que move o traballo dos centros tecnolóxicos e de innovación. Ese é precisamente o obxectivo do Plan Galicia Innova 2020, cun investimento público-privado de 1775 millóns de euros, para propiciar esa conexión entre o ámbito científico-tecnolóxico e a empresa.
Esta nova folla de ruta permitirá seguir fomentando o esforzo compartido que ten permitido que Galicia estea incrementando o gasto en I+D per cápita, o persoal contratado e o número de investigadores por cada 1000 ocupados. Ademais, a comunidade estase consolidando como a sexta en solicitudes de patentes.
Estes datos deixan de manifesto que a innovación e a tecnoloxía se atopan nun punto de inflexión sen precedentes que desembocará nun aumento da produtividade e nun maior crecemento económico. Apuntou Conde que a Industria 4.0 obriga ás empresas a pensar en como os mundos en liña e fóra de liña traballan xuntos na práctica, subliñando que o primeiro obxectivo dos hubs será precisamente axudar as empresas a integrar ese mundo online a través de proxectos de innovación punteiros.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...