A Federación Nacional ASPAYM (Asociación de persoas con lesión medular e outras discapacidades físicas) e a Fundación Vodafone España están a levar a cabo o plan de formación denominado "Me @dministro 2.0: a e-Administración para a inserción laboral".
Igual que sucedeu en "Me @dministro", creouse unha rede de formadores, chamados "Delegados Me @dministro 2.0", que expandirán os coñecementos adquiridos na formación online que comeza hoxe, luns 17 de decembro, e que será impartida por unha persoa con discapacidade, denominada como "Delegado Experto".
Para esta edición, contamos coa participación de sete entidades ASPAYM (Castela e León, Córdoba, Comunidade Valenciana, Cuenca, Granada, Principado de Asturias e Toledo), nas que se formará a un total de 11 "Delegados Me @dministro 2.0".
Esta formación online realizarase a través dunha plataforma web creada para o proxecto (http://formacion.meadministro.aspaym.org/), terá unha duración aproximada de 13 horas con contidos teóricos e prácticos mediante o apoio de guías e material multimedia, e outorgarase un certificado de aproveitamento para os "Delegados Me @dministro 2.0" expedido pola Fundación Vodafone España.
Durante este período de aprendizaxe, que terminará a finais do mes de xaneiro, traballarase sobre dous grandes bloques temáticos, identidade dixital e sistemas de identificación electrónica e servizos electrónicos e produtos de apoio, co obxectivo de capacitar aos "Delegados Me @dministro 2.0" cos coñecementos suficientes para que eles, posteriormente, poidan ensinar aos "usuarios finais" mediante a realización de cursos presenciais.
Este proxecto encádrase no convenio marco asinado entre a Plataforma Representativa Estatal de Discapacitados Físicos (PREDIF) e a Fundación Vodafone España, para a realización de actividades conxuntas en materia de accesibilidade e inserción socio-laboral, que teñan como obxectivo mellorar as condicións de vida das persoas con discapacidade física e orgánica.
Representantes de empresas, centros tecnolóxicos e universidades responsables de sete propostas presentadas para a proposta de Coren dentro da última convocatoria da aceleradora Galicia Open Future terán oportunidade de coñecer en profundidade durante tres días a cooperativa galega e as particularidades do reto que expón.
As empresas e entidades que participan son Agropecuaria Girona; o centro tecnolóxico Gradiant e a empresa Merasys, de Vigo; a alianza entre Torusware e a startup Biostatech, de Santiago e A Coruña; o proxecto emprendedor Smart Pig, de Santiago de Compostela; a Universidade de Lleida; e a startup Ymaging, de Barcelona. Hoxe estiveron acompañadas polo director do Igape, Juan Cividanes, e representantes da Axencia Galega de Innovación (Gain).
Despois de Pescanova e Finsa, Coren é a terceira gran empresa galega que, dentro de Galicia Open Future, lanza un reto dirixido a emprendedores, startups, pemes e organismos de investigación de todo o mundo. A solución que busca a compañía do sector agroalimentario enmárcase na dixitalización e optimización dos seus procesos na área porcina. En concreto, Coren pretende desenvolver a captura de datos e identificación do porco, así como facer máis eficiente o seu proceso de pesado.
O obxectivo desta convocatoria é buscar solucións innovadoras que melloren a identificación e pesado do porco, mediante un método que permita rexistrar datos de interese sobre cada animal. A consecución destes obxectivos permitirá a Coren obter información de valor para os seus procesos de traballo, logrando mellorar accións como a marcaxe dos animais e a estimación sobre cando alcanzará o peso óptimo.
Galicia Open Future, impulsada pola Xunta en colaboración con Telefónica, forma parte de StartIN Galicia, a rede galega de aceleradoras a través da cal a Administración autonómica apoiou nos últimos cinco anos preto de 900 proxectos de emprendemento, que contribúen ao desenvolvemento dunha industria innovadora e competitiva.
O concelleiro de Culturas, Deporte e Coñecemento da Coruña, José Manuel Sande, deu a coñecer esta mañá as novidades do programa Coruña Dixital, que comeza unha terceira edición de actividades co obxectivo de «activar novas comunidades e conectar o tecido de entidades e colectivos da cidade que traballan en torno a novas prácticas culturais, creativas e sociais que se producen pola influencia do desenvolvemento e difusión das novas tecnoloxías».
Esta rede contará nos primeiros meses «cun espazo propio con programación regular e outras actividades no Centro Ágora» que funcionará de referencia para continuar coa divulgación e o apoio á comunidade dixital local. «Alí compartirá sinerxías cunha iniciativa apoiada polo Goberno local como é a oficina de cooperación audiovisual, unha aposta do Concello coa Academia Galega do Audiovisual, proxectos arredor das novas tecnoloxías e a reflexión audiovisual que converxen no Centro Ágora», avanzou Sande, que incidiu tamén en que este espazo favorecerá a conexión entre as persoas interesadas na cultura dixital, no uso creativo da tecnoloxía e no emprendemento de proxectos innovadores. Co inicio desta terceira edición de Coruña Dixital coincide tamén a activación da programación do Laboratorio Audiovisual de Innovación e Creación (LAIC) para este ano, que comeza mañá co encontro Que hai en Internet? no que participan o tuitero coruñés El Hematocrítico e o responsable de proxectos audiovisuais de Zemos98, Felipe G. Gil.
Tal e como indicou o responsable municipal, que compareceu acompañado do coordinador da iniciativa, Sergio Lago, e do xerente da empresa adxudicataria, Diego Parajó, Coruña Dixital é unha proposta que permite vincular moitas das iniciativas que, nese eido, se desenvolven na cidade e que «cadraba moi ben con outras formulacións realizadas dende outras áreas do Goberno local como o Co-Lab e que permitía activar novas comunidades e conectar o tecido de entidades e colectivos da cidade con axentes, procesos e experiencias inspiradoras». Neste sentido, Lago indicou que a maneira de colaborar e participar, que ata o momento se realizaba a través de encontros e talleres, vai cambiar este ano, ao dispoñer dun espazo permanente de traballo, o que permite abordar cuestións nas que profundar durante varios meses e en diferentes grupos como son as novas narrativas dixitais na rede, o videomapping, gamificación e a aplicación da realidade aumentada en moitos aspectos culturais.
«Nos primeiros dous anos estivemos traballando en liñas como o movemento de software libre, no que mesmo se creou un novo grupo, CoruñaHacks, novas aplicacións de uso social ou no movemento maker, no que a asociación BricoLabs conseguiu un espazo permanente na Domus», lembrou. O relanzamento dos grupos de traballo e as novidades na programación daranse a coñecer a través da páxina web da iniciativa.
O Ministerio de Ciencia, Innovación e Universidades lanzou o novo Programa Cervera, para financiar con 600 millóns de euros a innovación de pequenas e medianas empresas e centros tecnolóxicos.
Segundo anunciou o seu titular, Pedro Duque, na sede ministerial, estes recursos distribuiranse en 500 millóns en créditos a pemes e midcaps, 80 millóns para un fondo de garantía que faciliten os créditos ás empresas e 20 millóns en subvencións para unha convocatoria para centros tecnolóxicos.
Duque presentou o programa -acompañado da directora xeral de I+D+I, Teresa Riesgo, e do director xeral do Centro para o Desenvolvemento Tecnolóxico Industrial (CDTI), Javier Ponce- ante máis de 200 asistentes procedentes do ámbito empresarial, académico e investigador.
No transcurso do acto, o ministro anunciou que a convocatoria para os centros tecnolóxicos publicarase durante o primeiro trimestre de 2019 e sinalou que o obxectivo do novo programa é fortalecer a actividade dos mellores centros tecnolóxicos e fomentar a innovación empresarial en España. Mellorar o uso do financiamento orzado para incentivar a transferencia de coñecemento á sociedade foi unha das prioridades do Ministerio.
Financiamento público
Mediante este programa financiaranse con 500 millóns de euros en créditos proxectos de I+D realizados por pemes e midcaps -en colaboración con centros tecnolóxicos- cun tramo non reembolsable do 33% da axuda e unha cobertura financeira de ata o 85% do orzamento elexible. Para iso, está prevista un financiamento público de 250 millóns de euros en 2019 e 250 millóns para 2020.
Nunha segunda fase, o CDTI será a entidade que xestione a convocatoria de axudas a centros tecnolóxicos, que sairá no primeiro trimestre de 2019, impulsando a súa integración no sistema de I+D+I.
Mediante esta convocatoria, outorgarase por primeira vez financiamento basal para os centros tecnolóxicos, cunha dotación de 20 millóns de euros de subvencións para potenciar as capacidades dos centros tecnolóxicos nas denominadas tecnoloxías prioritarias Cervera: materiais avanzados, eco-innovación, transición enerxética, fabricación intelixente, tecnoloxías para a saúde, cadea alimentaria segura e saudable, deep learning, intelixencia artificial, redes móbiles avanzadas, transporte intelixente e protección da información.
Na súa intervención, Duque puxo en valor o decisivo papel que representará o Programa Cervera como impulsor do desenvolvemento tecnolóxico destas áreas consideradas estratéxicas para España.
Ademais, o ministro destacou a alta capacidade innovadora das pequenas e medianas empresas españolas para afrontar proxectos que impliquen retos complexos, como evidencia que as pemes españolas sexan líderes á hora de recibir financiamento do programa europeo de investigación e innovación, Horizonte2020.
Axentes dinamizadores
Sobre os centros tecnolóxicos, Duque cualificounos como os principais axentes dinamizadores da ciencia e a innovación, sendo o medio polo que as empresas acceden a investigación de calidade e permítelles obter servizos tecnolóxicos e de innovación que incrementan a competitividade e a súa internacionalización.
Por primeira vez, o Ministerio de Ciencia, Innovación e Universidades e o CDTI deseñaron un programa innovador a través dos denominados fondos de provisións técnicas que permitirá ás empresas acceder ao financiamento sen apenas presentar garantías, grazas a un fondo de provisión de 80 millóns de euros. Por conseguinte, realizouse un esforzo conxunto para proporcionar ás empresas as mellores condicións posibles de financiamento.
Campaña de Fabricación de XOGUETES con Impresoras 3D con CRUZ VERMELLA Ourense.
Do 17 ao 28 de Decembro
(Visita "A Fábrica" de xoguetes de 10:00h a 13:00h)
O presidente do Colexio Profesional de Enxeñaría en Informática de Galicia (CPEIG), Fernando Suárez, vai participar no curso monográfico Protección de datos e ciberseguridade, que vén da man da Escola Galega de Administración Pública. E farao o mércores 19, nun relatorio, achegando novos conceptos e recursos de valor sobre datos persoais e protección en liña. O curso desenvolverase os días 18 e 19 de decembro na sede da EGAP en Compostela. Fernando Suárez, ademais, será o encargado da dirección académica da actividade formativa.
O obradoiro ten como obxecto principal afondar na normativa relacionada coa protección de datos de carácter persoal e a ciberseguridade desde un punto de vista teórico-práctico, “sinalando as novidades existentes e dando conta dos puntos máis esenciais e característicos da súa aplicación na Administración Pública e, en particular, no ámbito do sistema universitario”. En última instancia, búscase botar luz sobre o funcionamento e aplicación da normativa, dando resposta aos posibles conflitos e dúbidas que poidan xurdir do seu seguimento.
Este xoves, coincidindo coa festividade de Santa Lucía, a ONCE celebra os seus 80 anos de historia nos que se converteu nun referente a nivel mundial para as persoas con discapacidade.
Un período no que a organización axudou a mellorar a calidade de vida de millóns de persoas con discapacidade, que se viron acompañadas por esta institución que aos poucos logrou impulsar a integración de todas estas persoas na sociedade.
Neste proceso de integración e inclusión das persoas con discapacidade, en especial das persoas con discapacidade visual, a tecnoloxía xogou, e cada vez faino con maior intensidade, un papel fundamental.
O presidente da ONCE, Miguel Carballeda, afirmaba este mesmo xoves en RNE que para todo o mundo, pero en especial para as persoas con discapacidade, a tecnoloxía "cambiounos a vida totalmente".
"Se para todos é importante (a tecnoloxía), imaxinádevos para as persoas con discapacidade", aseverou Carballeda, quen subliñou a importancia de que a accesibilidade universal pase a ser unha parte fundamental do proceso de creación e construción de calquera produto ou servizo.
"Creo que é importante que todos, de saída, cando cremos algo, cando construamos algo, o fagamos pensando en todas as persoas", sinalou o presidente da ONCE en RNE, xa que asegura que iso é "máis xusto, máis solidario e axúdanos a vivir mellor a todos".
Para celebrar este 80 aniversario, a ONCE aproveitou as redes sociais, onde foi "trending topic", coa publicación duns vídeos nos que repasa a traxectoria da organización desde a súa creación en 1938.
Ademais, utilizou o seu produto máis característico, os cupóns, para festexar estes aniversarios coa edición de 5,5 millóns de cupóns que mostran o labor social da institución.
A Deputación de Lugo está a blindar a súa política tecnolóxico-social en relación cos maiores da provincia, unha liña de traballo até o de agora despregada pola Fundación TIC. Así o fixo saber o presidente da entidade provincial, Darío Campos Conde, durante o transcurso da Festa do Nadal celebrada na cidade de Lugo, onde tamén concorreu a alcaldesa Lara Méndez. En termos máis concretos, o titular da Deputación referendou e ratificou o compromiso cos maiores do Goberno que dirixe, un compromiso que se materializará en programas para o uso das novas tecnoloxías a través do novo Servizo de Audiovisuais.
Esta iniciativa porase en marcha co ano novo, substituíndo o labor da Fundación TIC, en proceso de disolución. “Potenciaremos de maneira sensible esta actividade para achegala aos 67 concellos da provincia”, dixo. Campos Conde fixo este anuncio durante a Festa de Nadal, coa que rematou a encomenda da Deputación á Fundación TIC para xestionar esta actividade. Campos e Méndez compartiron a xornada cos usuarios do InLugo, na que puideron levar a cabo diferentes accións colectivas de lecer, como xogar aos bolos coa X-Box, cantar panxoliñas coa axuda de YouTube ou fotografase en diversas localizacións grazas ao croma. Ademais, levaron un recordatorio especial: unha imaxe de grupo na que pousaron todos os participantes na xornada xunto co presidente e a alcaldesa. Darío Campos engadiu que “a integración da Fundación TIC na Deputación implica un proceso administrativo complexo que vai supoñer unha parada nesta actividade, aínda que agardamos retomala durante o primeiro trimestre de 2019, incluso incrementándoa. Tomamos esta decisión porque cremos firmemente na utilidade das novas tecnoloxías como ferramenta que axuda a mellorar a calidade de vida de todos os veciños da provincia, e moi especialmente dos máis maiores. En pleno século XXI son tan importantes as comunicacións por estrada como a comunicación a través das novas tecnoloxías”.
20.000 solicitudes desde 2013
Desde a súa creación en 2013, os cursos e obradoiros para maiores rexistraron arredor de 20.000 solicitudes, “unha demanda que foi medrando de maneira considerable de ano en ano”. Segundo fixo saber Campos, isto reflíctese en datos como o feito de que no último trimestre de 2018 houbese máis solicitudes ca en todo 2015. “Nas enquisas de satisfacción que se fixeron desde a primeira tempada, a práctica totalidade dos usuarios amosou o seu desexo de repetir os cursos”, sinalou. Para dar resposta a esta demanda completouse a programación con talleres de reforzo. O titular da Deputación tamén lembrou que dende 2016 duplicouse o número das actividades formativas máis solicitadas, que son as relativas ao uso básico do móbil e tableta ou de iniciación á Internet, así como os obradoiros de memoria e de estimulación cognitiva e funcional.
Seis anos cos maiores da provincia
O InLugo xurdiu en 2013 ao abeiro do programa InnovaTe, co-financiado nun 80% con fondos europeos e nun 20 % cos da Deputación. Unha vez rematado en marzo de 2015, a institución provincial asumiu o Plan con fondos propios a través dunha encomenda pola que a actividade pasou a ser xestionada pola Fundación TIC ata este 15 de decembro. Coa disolución da Fundación o 31 de decembro de 2018, a Deputación asumirá directamente esta actividade a través do novo Servizo de Audiovisuais.
O noso Clúster TIC vén de convocar a segunda edición dos Premios TIC Galicia, dirixidos a salientar e visualizar o traballo ben feito do noso empresariado, das nosas institucións e das nosas asociacións en materia de desenvolvemento e espallamento de novas tecnoloxías da información. Haberá nove categorías e o prazo para presentar candidaturas ás mesmas ficará aberto até o 20 de xaneiro. Trala organización do certame, achegando a súa colaboración, atópase tamén Laconnetwork.
As nove categorías son: Mellor Startup (adicada a aquelas empresas galegas con menos de dous anos de traxectoria); Mellor Desenvolvemento de Software Libre (que pon o foco naquelas compañías que desenvolveran a mellor solución de programación baixo esta licenza); Mellor Campaña de Marketing Dixital (que recoñece aquelas accións de mercadotecnia dixital que foran lideradas por empresas de medios dixitais galegas); Mellor Empresa Tractora (pensado para aquelas compañías que apostan e confían nas startupsgalegas contratando os seus produtos e servizos); Mellor Iniciativa TIC (que busca aquelas asociacións, institucións e organizacións que axudan na creación, lanzamento e asentamento de empresas e emprendedores); Mellor Innovación (I+D+i) (que distinguirá aqueles organismos, fundacións e asociacións que realizasen os mellores investimentos en innovación en 2018); por último Mellor Internacionalización (que premiará a aquelas empresas galegas que presenten o mellor plan de internacionalización en 2018).
Ao abeiro das nove modalidades devanditas tamén se inclúen dúas mencións de honra para mostrar o importante labor daquelas persoas e empresas que presenten unha especial implicación co sector TIC galego. Estas son o Premio Lacón Evanxelizador, que se outorgará ás persoas que se impliquen de maneira específica e constante na difusión do sector TIC autonómico e que organizaron con éxito algún dos encontros mensuais Laconnetwork; e o Premio Traxectoria, que recoñece ás persoas que, de maneira recorrente e constante, se impliquen nas TIC galegas. As persoas interesadas en inscribirse deben facelo na páxina web de Laconnetwork até o 20 de xaneiro de 2019. Este será o único método válido para presentar unha proposta aos premios TIC Galicia 2018.
Todas as candidaturas recibidas até o 20 de xaneiro de 2019 serán avaliadas por un comité de especialistas do sector que terá voz e voto para seleccionar os finalistas. Unha vez pechada a fase de pre-selección, os finalistas elixidos das categorías Mellor Startup, Mellor Desenvolvemento de Software Libre, Mellor Campaña de Marketing Dixital, Mellor Innovación (I+D+i) e Mención especial – Premio Lacon Evanxelizador; serán feitos públicos e procederase a unha votación popular online que terá un peso do 50% sobre o resultado final, o outro 50% será a valoración do comité de especialistas. As categorías Mellor Iniciativa TIC, Mellor Empresa Tractora, Mellor Internacionalización e a Mención Especial – Premio Traxectoria outorgaranse directamente polo comité de especialistas.
A gala de entrega dos premios TIC Galicia terá lugar no evento anual Laconnetwork 2019.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...