Huawei, líder tecnolóxico mundial, presentou en Madrid da man da Confederación Estatal de Persoas Xordas (CNSE) o seu proxecto StorySign, unha aplicación que ten como obxectivo axudar aos nenos xordos a aprender a ler para que poidan gozar xunto cos seus pais da maxia dos contos.
O acto de presentación, celebrado na Casa do lector en Madrid, contou coa participación da comunicadora e actriz Pilar Rubio, embaixadora principal do proxecto StorySign en España.
O director de márketing de Huawei, Ramiro Larragan, destacou o papel que xogou o emprego de intelixencia artificial no desenvolvemento da aplicación StorySign e mostrouse confiado de que "ao crear conciencia sobre os problemas da alfabetización dos nenos xordos, conseguiremos animar a máis xente a colaborar con este proxecto que estamos a impulsar en España a través da CNSE."
A vicepresidenta da CNSE, María Jesús Serna, sinalou que "a lingua de signos ten un impacto favorable no hábito lector. Dota ás persoas xordas de máis habilidades de expresión e favorece a aprendizaxe da lingua escrita. A nosa finalidade é conseguir máis e mellores lectores xordos, e para iso, é preciso un esforzo como o que fixo Huawei ao incluír a lingua de signos como unha lingua máis nos círculos lectores".
Pola súa banda, Pilar Rubio interveu no evento explicando o seu compromiso con esta causa, que contribuíu a visibilizar a través das súas redes sociais, onde anima aos seus seguidores para subir un vídeo felicitando o Nadal en lingua de signos.
A presenza da lingua de signos na lectura xoga un papel clave non só no seu acceso ao texto escrito, senón na súa motivación cara aos libros.
Así mesmo, permite liquidar posibles dificultades de lectoescritura e contribúe a que contos e relatos poidan transmitirse de xeración en xeración ao compartilos en familia. Un amplo sector do colectivo de persoas xordas mostra dificultades en materia de comprensión lectora.
Segundo o psicólogo e psicolingüista Marc Marschark, fundador da publicación Journal of Deaf Studies and Deaf Education, só un 10% das persoas xordas adultas conseguen ser bos lectores. Unha cuestión que se debe, en gran medida, a que os procesos que se activan nas persoas xordas durante a lectura difiren dos dos lectores oíntes. Por iso, a lingua de signos xoga un papel fundamental neste proceso.
Huawei traballou no desenvolvemento da aplicación StorySign coa Unión Europea de Xordos e as súas respectivas organizacións locais en Europa Occidental; coa editorial Penguin Random House, e con Aardman, especialistas en animación.
No caso de España, Huawei está a colaborar coa CNSE no apoio e difusión deste proxecto, que ten como obxectivo favorecer un acceso sen barreiras á lectura para os nenos xordos, e conseguir doazóns para futuros proxectos relacionados con este ámbito.
Coa axuda do divertido avatar Star e utilizando o poder da intelixencia artificial de Huawei, StorySign traduce as palabras dos contos compatibles con esta aplicación á lingua de signos, ofrecendo aos nenos unha experiencia de lectura perfecta.
Os usuarios unicamente deben colocar o seu teléfono sobre as palabras do conto e o avatar Star traducirá as palabras impresas á lingua de signos, axudando a pais e nenos a aprender a ler xuntos ao seu propio ritmo.
A app StorySign está dispoñible para todos os dispositivos Android e pódese descargar gratuitamente desde Huawei AppGallery e desde Google Play Store en 10 linguas de signos diferentes.
A App inclúe un clásico da literatura infantil por cada idioma.
En España actualmente está dispoñible o título "Onde está Anuncio"", de Eric Hill. Con este proxecto,
Huawei espera que no futuro haxa máis contos dispoñibles traducidos á lingua de signos.
Para máis información sobre StorySign e sobre como colaborar con esta iniciativa, visita a páxina we de storysign.com.
Ata finais de decembro poderanse realizar doazóns a través desta páxina web, que se destinarán ao apoio de proxectos de alfabetización de nenos xordos en toda Europa, entre os que se atopan o desenvolvemento de máis contos para StorySign.
O Goberno central, a través do Observatorio Nacional das Telecomunicacións e da Sociedade da Información (Ministerio de Economía e Empresa), vén de lanzar a nova edición do Informe anual do sector TIC e dos contidos (PDF). O estudo salienta polos datos positivos que guinda, tanto a nivel estatal como a nivel de comunidades. Para comezar, mostra un medre do 2,3% para o sector TIC, durante o ano 2017, o que confirma “o intre de dinamismo e espallamento” no que están mergulladas as empresas dixitais. E máis tendo en conta que esta circunstancia do crecemento é a cuarta vez consecutiva que se repite.
Polo que se refire a Galicia, tamén hai datos. Por exemplo, que estamos no quinto posto a nivel estatal en materia de número de firmas TIC. En termos máis concretos, achegamos o 5% do total de empresas do sector, só por detrás de Madrid e Catalunya (que aportan xuntas o 54%) e Andalucía e Comunidade Valenciana (ambas o 9%). Volvendo á información estatal, hai parámetros de gran interese, como por exemplo o da creación de emprego. Neste punto, o estudo sinala que os postos de traballo xerados ascenderon o ano pasado un 5,3%, até situarse en 496.761 persoas, o que supón un incremento por quinto ano consecutivo do número de persoas empregadas. Aumenta tamén o número de empresas, que sumaron 34.004, cun crecemento do 2,5%. Polo que se refire ao investimento realizado no ano 2017, incrementouse nun 1,9%, acadando os 18.267 millóns de euros. En resumo, o sector TIC e dos contidos achega á economía española 44.497 millóns de euros, é dicir, o 4,2% do Produto Interior Bruto (PIB) do Estado.
Os cidadáns xa poden reservar cita previa online nas oficinas principais de rexistro. A Axencia para a Modernización Tecnolóxica de Galicia (Amtega) e a Vicepresidencia e Consellería de Presidencia, Administración e Xustiza veñen de poñer en marcha o servizo de cita previa a través de internet nos rexistros de Santiago, A Coruña, Lugo, Ourense, Pontevedra e Vigo.
A través do enlace https://www.xunta.gal/cita-previa os usuarios poden reservar de xeito sinxelo o data e a hora na que poden realizar as súas xestións. So é preciso seleccionar a oficina, o trámite, indicar o número de follas que se van dixitalizar e cubrir os datos persoais que se solicitan.
Cómpre lembrar que estes rexistros concentran máis do 50% da entrada de documentación na Xunta de Galicia e están equipados para dixitalizar os documentos que os cidadáns entregan en papel, iniciando así o expediente dixital dese procedemento, que se enviará en formato electrónico ao departamento responsable da súa xestión, reducindo tempos de espera e evitando perdas ou extravíos. Ese expediente dixital, almacénase no Arquivo Electrónico Único, onde estará accesible online dun xeito seguro e controlado polos empregados públicos como polo propio interesado.
Con este servizo búscase evitar esperas innecesarias a aquelas persoas que optan pola tramitación presencial. Cómpre lembrar o incremento da tramitación online que no primeiro semestre deste ano situouse por riba da presencial.
Funcionario habilitado e reformulación das Oficinas de Rexistro
Aínda que o uso dos servizos dixitais está cada vez máis estendido, as xestións online non poden supoñer unha barreira para ningún cidadán na súa relación coa administración. Por iso entre as obrigas que establecen as Leis 39 e 40 está a transformación das actuais oficinas de Rexistro nunha Rede de Oficinas de Atención á Cidadanía, nas que se prestará asistencia aos cidadáns nas xestións online coa Administración, tanto na presentación de escritos, solicitudes e documentación como na tramitación da identificación dixital.
En liña co anterior está a figura do funcionario habilitado, que posibilitará que unha persoa autorizada ou un funcionario poidan realizar trámites telemáticos en nome doutra persoa. Con tal fin, a norma establece a creación do Rexistro electrónico xeral de apoderamentos.
A Administración do futuro máis inmediato busca ter unha visión integral do cidadán, que estea no centro de todo o proceso e que non sexa un actor máis. Conseguilo dará resposta á demanda da sociedade de ter ao seu alcance unha administración máis transparente, proactiva e con máis e mellores servizos.
O Centro Demostrador TIC da Axencia para a Modernización Tecnolóxica de Galicia (Amtega) amplía a súa listaxe de ferramentas informáticas no CDTIC Virtual coa inclusión de FacturaScripts.
Esta nova solución do CDTIC Virtual (https://www.mancomun.gal/solucion-tic/facturascripts/) está deseñada para axudar aos usuarios na planificación de recursos empresariais e na administración da relación cos clientes.
Entre as funcionalidades máis destacadas desta aplicación atópanse a capacidade de engadir, segundo estamos a crear unha factura ou un albará, clientes á nosa lista, produtos ao noso catálogo e mesmo xerar asentos contables; a realización de cálculos automáticos de prezos e custos de venda; ou a capacidade de xerar orzamentos que posteriormente se poden converter en pedidos, albarás e/ou facturas. Trátase dunha ferramenta completamente accesible dende calquera dispositivo que teña un navegador web que conta tamén cun amplo catálogo de plugins e unha activa comunidade de colaboradores.
O CDTIC Virtual (https://cdtic.xunta.gal/cdtic-virtual), posto en marcha polo Centro Demostrador TIC, constitúe un servizo no que empresas, organizacións e persoas usuarias poden probar e avaliar distintas aplicacións en software libre a través dun servizo na nube nun contorno privado, sen necesidade de dispoñer de recursos informáticos propios ou de persoal con coñecementos avanzados de sistemas.
Na actualidade, as solucións dispoñibles no CDTIC Virtual son Zabbix, unha ferramenta de software libre para seguimento de equipos e redes; Nextcloud, un servizo para compartir arquivos na nube; Odoo, un ERP para a xestión integral dunha empresa; CiviCRM, un software de xestión de relacións con clientes (CRM) orientado ao seu uso por parte de organizacións que traballan no eido social; PrestaShop, unha plataforma web de comercio electrónico (e-commerce); Alfresco, un software de xestión documental profesional; e Tenda en liña con WordPress, unha ferramenta ideal para comercios cun catálogo pequeno, unha opción moito máis eficaz e funcional que outras alternativas no mercado para este tipo de negocios.
As persoas interesadas en solicitar a avaliación dunha das aplicacións dispoñibles non teñen máis que rexistrarse como empresas e profesionais na web do CDTIC e posteriormente solicitar a aplicación ou as aplicacións que sexan do seu interese. Ata o momento xa o fixeron máis de 100 empresas usuarias do CDTIC Virtual.
A empresa galega SDweb, con sede en Santiago e especializada en desenvolvemento web e formación-comunicación dixital, vén de obter un importante recoñecemento pola súa plataforma eHabilis, innovador sistema para a aprendizaxe a distancia (e-learning) e a xestión de datos na nube. A distinción veu da man da Fundación Transforma España, da que forman parte a Asociación Para el Progreso de la Dirección (APD), La Caixa, Banco Santander, Grupo Cofares, Telefónica ou Adecco, entre outras organizacións. A fundación sitiou a eHabilis entre as dez mellores iniciativas tecnolóxicas especializadas na xestión do talento e do coñecemento. A orixe deste logro está na participación de eHabilis no certame Talent Summit, impulsado por Transforma España.
Este recoñecemento é especialmente significativo se temos en conta que chega nun importante intre de medre e espallamento para a empresa compostelá, que vén de inaugurar na capital galega unha factoría de software de máis de douscentos metros cadrados para afianzar o seu proxecto de crecemento e expansión a novos mercados dende Santiago.
Con case dez anos no mercado, a compañía tecnolóxica galega SDweb Solucións Dixitais está especializada en tecnoloxías TIC para impulsar a capacitación e o adestramento. Os seus ámbitos principais de actividade son, polo tanto, a innovación, a especialización, o re-investimento de beneficios e máis a orientación a produtos tecnolóxicos.
Segundo nos conta Antonio Carro, director xeral da empresa compostelá, eHabilis é unha plataforma de xestión do coñecemento corporativo na nube cun amplo espectro de aplicación. O seu principal obxectivo é “transformar o modelo tradicional de xestión do coñecemento nas organizacións, esencialmente dominado pola simple execución de plans anuais de formación, en moitas ocasións sen dispor dunha información clara e obxectiva das necesidades reais dunha organización”. A base de eHabilis, unha das súas principais razóns de ser, é mudar o devandito enfoque “cara a un modelo que permite a estas organizacións sacar o máximo partido ao coñecemento do seu equipo humano, antepondo o descubrimento e difusión do coñecemento interno á procura de coñecemento no exterior; e implementando unha estratexia lúdica de aprendizaxe grazas ao concepto de gamificaciónque incorpora en todos os seus niveis”, explica Antonio Carro.
Para Brais Martínez, responsable de Produto de eHabilis e responsable de Desenvolvemento de Negocio en SDweb, a participación no Talent Summit 2018 supuxo “un respaldo moi importante ao duro traballo realizado até a data polo equipo humano que desenvolve a plataforma eHabilis, dado que crear e difundir no mercado un produto tecnolóxico que sexa recoñecido como vangardista é realmente difícil”.
Pola súa banda Ricardo Della-casa, responsable da sede da empresa en Barcelona, pon o foco na “elevada competencia que existe na carreira por desenvolver solucións cada vez mellores e máis eficientes, onde é moi difícil manterse nas primeiras posicións de forma continuada”.
En opinión de Juan Casanova, responsable de Tecnoloxía da plataforma, “chegamos ata aquí grazas a que contamos con persoas moi cualificadas e implicadas no proxecto, que ademais están apoiadas por unha visión e investimento constante da compañía en innovar e desenvolver nova tecnoloxía”.
Varias entidades, encabezadas por HP, participarán este venres nun "streaming" solidario de 24 horas no que coñecidos "gamers" e "youtubers" participarán en distintas competicións co obxectivo de recadar fondos para transformar o á de oncoloxía pediátrica do Hospital da Paz en Madrid nunha nave espacial.
Esta acción forma parte do proxecto "A Paz en órbita", desenvolvido por Juegaterapia e que trata de facilitar as estancias hospitalarias dos máis pequenos convertendo os hospitais en mundos de cor e fantasía.
Con este obxectivo, L3TCraft organizou, coa axuda de HP, Movistar+, Twitch e ESAT-Valencia, este "streaming" solidario no que coñecidos "youtubers" como Chincheto, Tonacho, Alexelcapo, Sarinha ou Ethieen xogarán durante 24 horas a diferentes xogos.
Este evento terá lugar na casa dos Movistar Riders, no Matadoiro de Madrid, e ademais do "streaming" haberá distintos retos e música da man de Tonacho.
Os participantes poderán compartir consellos e recomendacións, e convidarán aos que estean a seguir o evento para unirse á causa facendo chegar as súas propias doazóns. Entre todos os que participantes sortearanse uns medallóns exclusivos creados para esta ocasión, e outros premios achegados polos organizadores.
Ademais, o chef Paco Roncero, cociñeiro con dúas estrelas Michelín e tres soles Repsol abrirá as cociñas para preparar un menú que lles dea forzas para as 24 horas do "streaming".
Todo cun mesmo obxectivo, axudar aos nenos para soportar as súas estancias no á de oncoloxía pediátrica do Hospital da Paz.
Juan González, investigador do Centro Tecnolóxico Gradiant (onde dirixe a área de Seguridade e Privacidade), resultou gañador a semana pasada dunha das batallas de hackers máis referenciais a nivel estatal e europeo. Estamos a falar do desafío-certame Hacker Battle, celebrado ao abeiro das XII Xornadas do Centro Criptolóxico Nacional STIC CCN-CERT-CNI. Organizado polo Equipo de Resposta ante Emerxencias Informáticas do CCN, o CERT, este evento de carácter anual estivo centrado en seguridade informática e durante os días 12 e 13 de decembro reuniu en Madrid a máis de 2.700 profesionais e expertos en ciberseguridade.
A cita foi no cinema Kinépolis de Madrid. O investigador de Gradiant (baixo o sobrenome B0rneira) enfrontouse nun duelo en directo a Bruno Chenoll (Camos) onde ambos tiñan que ir superando diferentes retos de protección tecnolóxico-dixital nun tempo determinado. Despois dos 25 minutos estipulados que marcaba a proba (máis unha prórroga concedida polo público de 10 minutos adicionais), ningún dos dous adversarios conseguiu finalizar todas as probas. Malia todo, o investigador de Gradiant foi quen chegou máis lonxe, polo que se proclamou vencedor.
Para chegar a esta fase final, os participantes tiveron que demostrar a súa capacitación e adestramento nas Atenea Xornadas, plataforma de retos de seguridade creada en exclusiva para o evento. Nela, os participantes enfrontáronse desde o 30 de novembro até o 3 de decembro a 20 probas de distinta dificultade e temática, como o cifrado de información, e esteganografía forense, a análise de tráfico ou o reversing. Foi Javier Candau, xefe do Departamento de Ciberseguridade da CNN-CERT, o encargado de facer a entrega do premio Atenea ao investigador galego, agradecendo a participación dos máis de 5.000 participantes de Atenea 2018.
O proxecto ‘Desenvolvemento das estratexia transmedia de Fariña’, proposto por catro alumnas do grao de Comunicación Audiovisual, é un dos catro seleccionados dentro do programa startups R DiCo Challenge, a través do cal o operador galego de telecomunicacións se relaciona coa comunidade do audiovisual e doutras sectores para impulsar a innovación e as iniciativas emprendedoras.
O proxecto de Beatriz Castro, Alicia Ouro, Begoña Pérez e Nuria Salgado foi tamén un dos mellor valorados polas empresas ao consideralo entre os que terían unha maior viabilidade no mercado, segundo unha enquisa realizada con esta finalidade. A súa selección dentro do programa startups R daralle acceso agora a unha aceleradora de proxectos que contará con financiamento da Axencia para a Modernización Tecnolóxica (Amtega). Neste senso, Beatriz Castro, Alicia Ouro, Begoña Pérez e Nuria Salgado mostráronse “moi esperanzadas con esta oportunidade e ansiosas por comezar esta nova etapa”.
A valoración do proxecto realizado polas alumnas da USC, baixo a titorización dos profesores Enrique Castelló e Carlos Toural, deuse a coñecer no transcurso da segunda edición do Pitching TFG (Traballos Fin de Grao) organizado polo Clúster Audiovisual Galego en colaboración coas tres universidades galegas a través das súas respectivas facultades de Comunicación. Durante esta xornada presentáronse un total de 16 proxectos, un total de seis da USC, diante de empresas dos sectores audiovisual e TIC.
A xornada de Pitching TFG busca poñer en valor o novo talento audiovisual e conectalo co tecido empresarial galego. Ao igual que na anterior edición, os responsables dos proxectos tiveron a oportunidade de testar os seus traballos co sector e puideron coñecer as valoracións dos produtores.
O Centro de Investigación TIC, CITIC, ao abeiro do seu obxectivo de achegar a ciencia á mocidade e espertar o talento que as rapazas e rapaces levan dentro, organizou o pasado mércores unha charla divulgativa. Nela participaron máis dun centenar de estudantes de primeiro e segundo de Bacharelato do IES Universidade Laboral da Coruña. Na cita, entre outras cousas, mostráronselles as investigacións e os proxectos máis salientables nos que está a traballar a comunidade científica do CITIC.
Na primeira parte da charla, Salvador Naya, vicerreitor de Política Científica, Investigación e Transferencia da UDC presentou as novas titulacións da Universidade da Coruña, como o Grao en Ciencia e Enxeñaría de Datos, para continuar cunha exposición de proxectos de I+D que se desenvolven no ámbito dos modelos e métodos estatísticos e matemáticos, unha das áreas de investigación do CITIC da UDC.
Na segunda metade da charla, Jesús Díaz, da área de transferencia do CITIC e profesor de matemáticas do IES Universidade Laboral, continuou a exposición falando das diferentes áreas tecnolóxicas do CITIC que conforman as liñas de investigación do centro. Expuxo diferentes proxectos do centro desde un punto de vista divulgativo trasladándolles aos alumnos conceptos como que é a visión artificial, a Intelixencia Artificial ou a análise de información masiva (Big Data).
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...