A tecnoloxía converteuse nun das principais canles de formación xa que facilita que as persoas interesadas poidan participar nos cursos dunha forma que sexa compatible co seu ritmo de vida.
Así o creron na Fundación Luzón - Unidos contra a ELA, que puxo en marcha a primeira plataforma formativa nesta materia en España, á que denominou EscuELA.
O obxectivo da EscuELA é, por unha banda, mellorar a atención que as persoas enfermas dela reciben dos seus coidadores familiares, o que redunda nunha menor necesidade de ingreso hospitalario e nunha mellora da súa calidade de vida.
Así mesmo, os propios coidadores conseguen unha maior seguridade á hora de aplicar os coidados, o que lles dá máis tranquilidade redundando tamén nunha mellora da súa calidade de vida.
Todo o material formativo foi desenvolvido por profesionais de distintos ámbitos, como a psicoloxía, o traballo social, a terapia ocupacional ou a medicina, coa participación de distintas entidades como a Fundación Miquel Valls, o Hospital Universitario de Bellvitge, o Hospital Clínico Universitario de Valencia, BJ Adaptacións ou Irisbond.
Sen dúbida unha iniciativa fantástica que permite mellorar a atención das persoas enfermas dela á vez que mellora a calidade de vida tanto dos enfermos como dos seus coidadores familiares.
O Foro Tecnolóxico de Emprego da Escola de Enxeñaría de Minas e Enerxía da Universidade de Vigo celebrará a súa XIX edición entre os días 13 e 15 de marzo, grazas ao traballo de 19 coordinadores e 50 estudantes que unen esforzos dende o pasado mes de outubro para levar adiante esta cita para o alumnado das escolas de enxeñaría do campus de Vigo e empresas.
Na pasada edición participaron 50 empresas e entregáronse preto de 2.000 currículos. O obxectivo deste ano é superar esas cifras e dende a organización móstranse satisfeitos co traballo realizado durante estes meses na procura desta meta. Ademais de conferencias e obradoiros, o foro contará de novo coa presenza de postos de diferentes empresas nos que as persoas asistentes poderán entregar os seus currículos, ofrecéndolle ao alumnado a oportunidade de establecer contacto directo cos seus futuros empregadores. Nestes momentos son arredor de 20 as firmas que xa confirmaron a súa participación, pero o prazo de inscrición non remata ata o día 2 de febreiro e a maioría acostuman a anotarse durante o mes de xaneiro. De entre todos os currículos que o alumnado entregou no foro do ano pasado, moitos deles conseguiron grazas a isto a súa primeira experiencia laboral.
Durante o último ano os peregrinos que pernoitaron nalgún dos albergues públicos do Xacobeo fixeron un maior uso da rede wifi gratuíta dispoñible nestes establecementos. Así o demostran os datos dos últimos 12 meses que reflicten un incremento dun 148,32% no uso deste servizo, cada vez máis empregado polos peregrinos para completar información útil para a súa viaxe ou compartir a súa experiencia durante o Camiño de Santiago.
Xunto á rede wifi –que pasou de máis de 150.000 usuarios en 2017 a máis de 380.000 o ano pasado–, tamén se rexistrou un moi bo comportamento doutras iniciativas enmarcadas no Plan Smart Camiño, desenvolvido conxuntamente pola Consellería de Cultura e Turismo e a Axencia para a Modernización Tecnolóxica de Galicia (Amtega) para responder ás necesidades do peregrino do século XXI.
Así, medrou o número de usuarios da web caminodesantiago.gal, que mantivo a súa curva de crecemento durante o ano e superou os 300.000, o que supón un incremento do 68,5%. Destaca especialmente o incremento de visitantes á páxina web procedentes de países como Italia, primeiro en consultas e que supón case o 20% do tráfico total. Séguenlle os usuarios de Portugal, Estados Unidos, Alemaña, Francia, Arxentina, Brasil ou México.
Estas iniciativas alíñanse coas medidas do Plan Director do Camiño de Santiago, a folla de ruta posta en marcha desde a Consellería de Cultura e Turismo que está a desenvolver numerosas melloras na Ruta Xacobea coa vista posta no Xacobeo 2021. Conta entre as súas liñas de acción co impulso ao desenvolvemento das TIC para facilitar a experiencia da peregrinación, como o uso da rede wifi ou a aplicación do Camiño, entre outras.
Medran as visitas da web turística
Xunto a estes datos, tamén a web informativa sobre a oferta turística (turismodegalicia.gal) rexistrou un notable incremento de visitantes durante o último ano. Pasouse de 1,8 millóns de usuarios a máis de 2 millóns, o que supón un aumento de case un 10%. Oito de cada dez usuarios da páxina web son españois, pero medran de xeito considerable varios países estranxeiros. É o caso de Portugal, en cabeza e que no último ano rexistrou unha suba de case o 40%. Séguenlle Italia, Estados Unidos, Francia, Alemaña, Reino Unido ou Arxentina.
A Escola Superior de Enxeñaría Informática do Campus de Ourense foi tomada o sábado 19 por rapazas e rapaces de idades comprendidas entre os 6 e os 18 anos, todas e todos co obxectivo compartido de converterse en programadoras e programadores, ou sexa, en usuarios pero tamén en construtores da sociedade dixital. Falamos da celebración galega do acontecemento internacional A Hora do Código, impulsado a nivel mundial pola organización Code.org e, a nivel galego, pola ESEI de Ourense e o Colexio Profesional de Enxeñaría en Informática de Galicia (CPEIG). A cita desenvolveuse entre as 9.00 e as 19.30 horas na sede da ESEI e acolleu a participación activa de 360 persoas e a celebración de tres ducias de sesións didácticas para nenas e nenos acompañados das súas familias.
En termos máis concretos, participaron (formándose como vindeiras construtoras e construtores da revolución dixital) un total de 263 rapazas e rapaces (113 nenas e 155 nenos) cunha media de idade de nove anos, acompañados polos seus proxenitores. O programa que se puxo á súa disposición foi salientable polo número, a calidade e a variedade das actividades: até 34 sesións que abrangueron desde o uso de drons e a programación até a impresión 3D ou a realidade virtual. As actividades desenvolvéronse durante a mañá e a tarde do sábado en diversos espazos do edificio Politécnico coa participación de voluntarias e voluntarios colexiados e por docentes especializados nas novas tecnoloxías no ámbito educativo.
A finalidade da xornada foi achegar dunha “forma lúdica e divertida” o mundo da programación ás xeracións máis novas. Ademais, buscábase estender os coñecementos de ciencias da computación aos máis pequenos e pequenas tendo en conta que a tecnoloxía está cada día máis presente en todas as facianas da vida, desde o lecer á educación, pasando polo xeito de comunicarse e de obter coñecemento e desenvolvérense.
Francisco Rodríguez, tesoureiro do Colexio Profesional de Enxeñaría en Informática de Galicia e director da Escola Superior de Enxeñaría Informática, salientou os días previos á celebración da Hora do Código que esta actividade está deseñada para que a mocidade entenda as bases e fundamentos da programación. “Aínda que os rapaces nun futuro non desenvolvan unha profesión como a enxeñaría informática, a nosa sociedade evoluciona cara unha totalidade de produtos que inclúen software dalgún tipo, e entender as bases da programación fará que comprendan mellor o funcionamento destes elementos e poidan obter todas as vantaxes que ese coñecemento proporciona”. Durante a celebración impartíronse diversos obradoiros, indicados para as distintas idades, sobre iniciación á programación, iniciación á programación con Scratch, iniciación á programación de dispositivos con Arduino, cinema e vídeo en 3D, impresión en 3D, drons, realidade virtual, Nenoos Tech ou iniciación ao desenvolvemento de videoxogos.
Como lembraremos, a Hora de Código é un evento internacional que ten como obxectivo o de ensinar programación e as bases da informática ás nenas e nenos partindo de titoriais básicos dunha hora de duración. A iniciativa busca estender os coñecementos de ciencias da computación aos máis pequenos e pequenas para que coñezan os conceptos e o mundo no que viven, “unha realidade na que a tecnoloxía está cada día máis presente en todas as facianas, desde o lecer á educación”, explica o CPEIG.
A Hora do Código está promovida internacionalmente, desde o ano 2013, pola entidade sen ánimo de lucro estadounidense Code.org. A nivel internacional a iniciativa está apoiada polas grandes compañías tecnolóxicas, como Google, Amazon, Apple, Facebook e Microsoft, e por persoeiros como Bill Gates ou Mark Zuckerberg. Code.org, para quen non o saiba, é un organismo público adicado a ampliar a participación en Informática. O seu obxectivo é que todos os estudantes teñan a oportunidade de aprender programación.
A Consellería de Medio Ambiente e Ordenación do Territorio e a Axencia para a Modernización Tecnolóxica de Galicia (Amtega) veñen de completar a dixitalización de cinco parques naturais galegos, o Parque Nacional das IIlas Atlánticas e catro aulas da natureza. En total, son os 10 espazos que xa están dotados con solucións tecnolóxicas innovadoras para facilitar aos visitantes o acceso á información sobre rutas, servizos, patrimonio, flora e fauna de cada parque ou aula dun xeito lúdico e atractivo.
Xa se completou a instalación e posta en funcionamento da cartalería e os contidos dixitais no Parque Nacional das Illas Atlánticas de Galicia, no Complexo Dunar de Corrubedo, o Invernadeiro, a Serra da Enciña da Lastra, a Baixa Limia-Serra do Xurés e Monte Aloia e as catro aulas da natureza que ofrecen información sobre os servizos, rutas, flora e fauna de cada parque e aula da natureza dun xeito más atractivo, lúdico e en soportes audiovisuais e interactivos. En breve as Fragas do Eume sumaranse a esta iniciativa de dixitalización.
Unha plataforma de contidos permite que cada parque xestione a súa información que se proxecta ben a través de videowalls, pantallas informativas ou mesas interactivas. A distribución deste equipamento realizouse en base a un estudo previo de necesidades e posibilidades de cada un dos espazos naturais contemplados no proxecto, que inclúe, tamén, solucións de realidade aumentada ou gafas de realidade virtual.
Portal e aplicación
Ademais, estes contidos serán accesibles desde outras canles como o portal Galicia Natural e Única e a aplicación dos parques. No marco deste proxecto, tanto a web como a app ofrecen xa novas versións. O novo portal ampliou os seus contidos incluíndo información de todos os parques, reservas da biosfera e catro espazos naturais de Galicia baixo a etiqueta “espazos imán”.
A aplicación dos parques naturais de Galicia, dispoñible en IOS e Android, posibilita o selado dixital do Pasaporte Natural ao activar a localización do dispositivo móbil cando se visitan os parques. Coa nova app de Galicia Natural e Única lévase a cada dispositivo móbil unha nova experiencia para gozar plenamente en primeira persoa a experiencia de visitar os espazos imán, identificados no Plan de promoción e posta en valor do patrimonio natural de Galicia, que son os parques galegos así como o monumento natural da Praia das Catedrais, as zonas de especial protección dos valores de Carnota-Monte Pindo, Canóns do Sil; as Reservas da Biosfera de Terras do Miño, Área de Allariz, Os Ancares lucenses e Montes de Navia, Cervantes e Becerreá, o Río Eo, Oscos e Terras de Burón; a Reserva Transfronteiriza Gerés-Xurés, as Mariñas Coruñesas e Terras do Mandeo, e a Serra do Courel.
Premiar a visita
A Xunta de Galicia defende que coñecer o patrimonio natural que atesouran os parques galegos son unha das mellores ferramentas para asegurar a súa conservación. Nese sentido, quere premiar os esforzos dos visitantes que se achegan aos parques galegos; polo que se darán tres premios ás tres primeiras persoas que completen o pasaporte dixital.
O galardón consistirá nunha experiencia natural a elixir entre as distintas actividades ecoturísticas e aloxamento nos parques naturais de Galicia, unha oferta extensa e variada que ofrece, aloxamentos de turismo rural, experiencias de restauración, visitas guiadas, rutas fotográficas ou ornitolóxicas, actividades que combinan o deporte e o turismo, a través do senderismo, ciclismo, equitación ou ben saídas en barco, kaiak, paddle surf ou paddleboard; ademais de visitas a covas, aldeas ou adegas. Para ampliar a información destas experiencias ecoturísticas pódese consultar a web: http://galicianaturaleunica.xunta.gal/es/experiencias-naturais.
Axenda Dixital 2020
A dixitalización dos parque naturais enmárcase nas actuacións da Axenda Dixital de Galicia 2020, a folla de ruta do Goberno galego para consolidar a dixitalización de servizos públicos, e sectores estratéxicos para Galicia. Ao igual que todos os procesos de dixitalización que desenvolve a Axencia Pública, esta iniciativa abordouse dun xeito integral e cun enfoque global, que permita evolucionala nun futuro.
Hoxe en día, grazas aos móbiles, todos levamos unha cámara permanentemente connosco que podemos aproveitar para inmortalizar e compartir todas as nosas vivencias. Neste curso aprenderás conceptos básicos de fotografía dixital e como aproveitar todas as funcións da túa cámara para tomar fotografías como un auténtico profesional.
Contidos:
Iníciate na fotografía dixital co teu teléfono móbil!
O Concello de Carballo quere que as novas tecnoloxías estean o máis preto posible das persoas maiores, favorecendo unha das principais vertentes do que se coñece como envellecemento activo. Con este obxectivo, en colaboración coa Asemblea Local da Cruz Vermella, o Goberno local vai pór en marcha unha serie de cursos de manexo de teléfonos móbiles en todas as parroquias nas que exista un mínimo de inscricións. O programa de obradoiros comezará o mes que vén.
Segundo informa o Concello, para tentar abranguer o máximo de territorio e ao meirande número de persoas potencialmente participantes, nos últimos días enviáronse cartas informativas ás asociacións das diferentes parroquias pedindo a súa colaboración, así coma a dos consellos parroquiais, na difusión da iniciativa. Tamén se colocarán carteis nos vindeiros días en todas as parroquias. A idea é familiarizar á xente maior do termo municipal coas novas ferramentas dixitais, moi indicadas para permitirlles unha mellor comunicación, un contacto máis directo coa xente da súa contorna (e doutras contornas), unha serie de ferramentas útiles para a vida diaria e, sobre todo, unha actividade cognitiva que favoreza o bo estado de saúde. Os cursos responden á alta demanda que experimentan outras actividades semellantes de envellecemento activo e a peticións concretas dos consellos parroquiais.
As persoas interesadas en participar nas actividades formativas de manexo dos teléfonos móbiles poden inscribirse ata o 25 deste mes cumprimentando a ficha que pode descargarse da web do Concello, e que tamén estará dispoñible e poderá entregarse na Casa do Concello e no Pazo da Cultura, así coma nos centros sociais das parroquias.
En función do número e o lugar de residencia dos veciños e veciñas inscritos elaborarase, en coordinación coa Cruz Vermella, o calendario dos cursos en cada parroquia. En cada grupo poderán participar entre 8 e 12 persoas e, segundo explica o Concello, en principio impartiranse 3 sesións de dúas horas de duración cada unha.
O Observatorio Nacional das Telecomunicacións e da Sociedade da Información (ONTSI), xestionado pola entidade pública Red.es, vén de publicar o seu máis recente informe sobre o estado de saúde da industria española dos contidos dixitais. No estudo salientan as cifras que moven ao optimismo, aínda que tamén resulta preocupante o feito de que as cifras deste sector suban a costa de facer que as doutras industrias decrezan (por exemplo o sector editorial tradicional). Como dato sobranceiro, atópase o seguinte: o volume de negocio do sector subiu un 16,3% e acadou 11.467 millóns de euros. Tamén medra o número de empresas, o emprego e o investimento, até chegar ás 9.785 compañías, 105.760 persoas e 655 millóns.
Por outra banda, o informe reflicte un importante avance do proceso de dixitalización dos sectores de videoxogos, vídeo e música a nivel mundial, con taxas de transformación cara aos novos métodos de xestión, comunicación, promoción e venda do 88%, 68% e 66%, respectivamente. Sen saírnos do positivo, o estudo mostra un parámetro con datos positivos que levaba anos sen telos (dende 2012): por primeira vez dende hai case oito anos, o investimento en negocio dixital do sector dos contidos creceu, logrando unha cifra de 655 millóns de euros, un 9,2% máis que en 2016.
Videoxogos
Nun plano mis detallado, a industria española dos videoxogos continuou coa súa evolución positiva e alcanzou os 713 millóns de euros, un 15,6% máis que en 2016. Do total de ingresos xerados pola venda de produtos distribuídos a través de medios ou canles dixitais, os xogos para dispositivos móbiles descargables representaron en 2017 o 76,5%.
Música
En canto á música, a súa facturación ascendeu até os 247 millóns de euros, un 50,3% máis que en 2016. A comercialización de música a través de medios dixitais superou con distancia á venda tradicional, chegando a representar case o 61% das vendas de música.
Cinema e vídeo
O 71,5% dos ingresos xerados polo sector do cinema e do vídeo correspondéronse ao negocio dixital (3.443 millóns de euros, un 17,6% máis que en 2016). O informe salienta que un pouco menos da metade da facturación das actividades dixitais do sector do cinema e do vídeo en España concéntrase nas actividades de produción cinematográfica e de vídeo (44,3%).
Audiovisual
Respecto ao sector audiovisual, o observatorio destaca que en España a facturación das actividades de programación e emisión de televisión en 2017 situouse en 3.970 millóns de euros, un 7,7% máis. A televisión terrestre representou o 46,2% dos ingresos (1.836 millóns de euros), crecendo por cuarto ano consecutivo. O volume de negocio da TV IP, con todo, crece a pasos axigantados a partir de 2014. En 2017, esta modalidade xa representou un 32,7% dos ingresos totais do sector da televisión, cunha cifra de 1.298 millóns de euros (un 25,6% máis que o ano anterior).
Publicacións
As actividades dixitais procedentes do sector das publicacións alcanzaron un volume de negocio de 1.260 millóns de euros, un 74,3% máis que en 2016. A edición de xornais pasou a concentrar a maior parte da facturación de negocio dixital do sector das publicacións (42,4%), por diante da edición de libros (33,6%).
O Clúster TIC pecha esta mesma semana o prazo de presentación de candidaturas para a segunda edición dos premios TIC Galicia, organizado en colaboración con Laconnetwork co obxectivo de mostrar o esforzo das organizacións, institucións e empresas galegas ligadas ao sector das novas tecnoloxías. Segundo explica a organización do certame, as empresas e emprendedores interesados poderán inscribirse até o domingo 20 (inclusive) na páxina web de Laconnetwork. Terán que acreditar o labor levado a cabo durante 2018 nos eidos do deseño, o desenvolvemento e a implantación de procesos ou servizos galegos focalizados na innovación e no uso das TIC.
As nove categorías son: Mellor Startup (adicada a aquelas empresas galegas con menos de dous anos de traxectoria); Mellor Desenvolvemento de Software Libre (que pon o foco naquelas compañías que desenvolveran a mellor solución de programación baixo esta licenza); Mellor Campaña de Marketing Dixital (que recoñece aquelas accións de mercadotecnia dixital que foran lideradas por empresas de medios dixitais galegas); Mellor Empresa Tractora (pensado para aquelas compañías que apostan e confían nas startupsgalegas contratando os seus produtos e servizos); Mellor Iniciativa TIC (que busca aquelas asociacións, institucións e organizacións que axudan na creación, lanzamento e asentamento de empresas e emprendedores); Mellor Innovación (I+D+i) (que distinguirá aqueles organismos, fundacións e asociacións que realizasen os mellores investimentos en innovación en 2018); por último Mellor Internacionalización (que premiará a aquelas empresas galegas que presenten o mellor plan de internacionalización en 2018).
Ao abeiro das nove modalidades devanditas tamén se inclúen dúas mencións de honra para mostrar o importante labor daquelas persoas e empresas que presenten unha especial implicación co sector TIC galego. Estas son o Premio Lacón Evanxelizador, que se outorgará ás persoas que se impliquen de maneira específica e constante na difusión do sector TIC autonómico e que organizaron con éxito algún dos encontros mensuais Laconnetwork; e o Premio Traxectoria, que recoñece ás persoas que, de maneira recorrente e constante, se impliquen nas TIC galegas. Como dixemos, todas as candidaturas recibidas até o 20 de xaneiro de 2019 serán avaliadas por un comité de especialistas do sector que terá voz e voto para seleccionar os finalistas. Unha vez pechada a fase de pre-selección, os finalistas elixidos das categorías Mellor Startup, Mellor Desenvolvemento de Software Libre, Mellor Campaña de Marketing Dixital, Mellor Innovación (I+D+i) e Mención especial – Premio Lacon Evanxelizador; serán feitos públicos e procederase a unha votación popular onlineque terá un peso do 50% sobre o resultado final, o outro 50% será a valoración do comité de especialistas. As categorías Mellor Iniciativa TIC, Mellor Empresa Tractora, Mellor Internacionalización e a Mención Especial – Premio Traxectoria outorgaranse directamente polo comité de especialistas.
A gala de entrega dos premios TIC Galicia terá lugar no evento anual Laconnetwork 2019.
O polo aeroespacial de Galicia, emprazado nas Rozas (Castro de Rei, Lugo), mostrou este mércores 16 de novembro os avances de dúas tecnoloxías innovadoras para a prevención dun dos grandes dramas do noso medio natural: os incendios. Na cita participaron empresas, investigadores e representantes públicos, entre os que se atopaban o conselleiro de Economía, Francisco Conde, e o conselleiro do Medio Rural, José González, que salientaron o alto nivel de resposta que achega o polo aeroespacial respecto das “necesidades reais da Administración”. Os conselleiros asistiron á demostración do helicóptero non tripulado Lúa e do sistema contra incendios Einforex, impulsados por Babcock. A esta visibilidade cada vez maior dos traballos que se están a realizar nas Rozas (unha visibilidade que espertou xa o interese doutras Comunidades Autónomas) cómpre engadir as probas de simulación do Targus de Indra iniciadas previamente.
Segundo se lembrou na visita dos conselleiros, o sistema Einforex FF (FireFighting) vén da man de Babcock e das empresas Soldatec, Itmati, Coremain, Cinfo, Veoline e Pildo; consistindo nun sistema experto de monitoraxe de frotas aéreas e terrestres que axuda na toma de decisións en operacións de extinción de incendios e fornece de plena operatividade mesmo nas condicións de traballo ou comunicativas máis adversas. A tecnoloxía, que xa foi probada nun operativo real de loita contra o lume en Corrubedo (Ribeira), pode ser manexada integralmente dende un helicóptero de coordinación da Xunta, facilitando en tempo real a súa posición e fornecendo de continuo imaxes e vídeos da operación. A previsión é integrala o antes posible aos dispositivos galegos da loita contra os incendios. Na cita nas Rozas probouse o helicóptero non tripulado Lua, xunto con varios compoñentes que, a xuízo dos conselleiros, “convérteno no único sistema con capacidade de capturar e procesar en tempo real información dixital de vídeos e imaxes tanto no espectro visible como infravermello”.
Durante a estadía no polo, Conde destacou “o avance do polo aeroespacial de Galicia posto en marcha en 2015” e que, desde entón, “leva mobilizado 50M€ dos 165 previstos coas actuación que están en marcha e programadas, mentres que o programa de I+D promove, até o de agora, 20 proxectos nos que traballan 262 persoas”. Conde fixo fincapé nas boas previsións para o ano entrante. Segundo sinalou, en 2019 o polo das Rozas volverá ter “un papel central”, xa que se destinan 18,1M€ para seguir avanzando e consolidando este proxecto, “a través de iniciativas como o parque industrial, a aceleradora aeronáutica ou o novo espazo formativo de Rozas”.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...