O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (AMTEGA) queren sacar proveito á confluencia entre as vacacións de verán e a divulgación tecnolóxica para a rapazada. Con este motivo, organizan estes meses de verán (de xullo a setembro) un completo programa (TechKids) de xornadas de robótica, pilotaxe de drons, creación de apps e videoxogos e animación 3D. Esta semana o programa métese en faena.
Estes luns e martes temos unha xornada sobre robótica nas aulas CeMIT da Fonsagrada (luns 22) en Xunqueira de Ambía (martes 23). Logo será a quenda do obradoiro sobre pilotaxe de drons (nas aulas CeMIT do Carballedo, o mércores 24, e de Ames, o venres 26).Os mozos e mozas interesados en participar nestas xornadas deben inscribirse na Aula CeMIT da súa localidade.
Entre as cousas concretas que vai achegar o programa para a rapazada, atópase o obradoiro Robótica para tod@, que mestura algoritmos e linguaxes co funcionamento de distintos robots. “A actividade iniciará ás nenas e nenos de 9 a 16 anos na programación dun xeito entretido”, segundo informan o CPEIG e a AMTEGA, explicando que na actividade empregarase un Mbot, un robot comercial que dispón das ferramentas precisas para mergullar ás nenas e nenos nos segredos e nas potencialidades da robótica, dunha maneira lúdica, “xa que presenta os resultados dun xeito diferente”.
A actividade consistirá en superar mini-retos, cada un dos cales, unha vez resoltos, instruirá ao alumno nun algoritmo distinto de programación. Os participantes iniciaranse na programación por bloques, aprendendo o ciclo de vida do software, os condicionais, as variables e os algoritmos. “Coñecerán tamén as partes do robot e a función que desenvolven, condutividade e circuítos eléctricos cando constrúan o control remoto do MBot, ademais de debuxar, recortar e pegar o control do robot”, engaden as entidades organizadoras. Nestas xornadas de difusión tecnolóxica sobre robótica tamén se inclúe a actividade MBot Segueliñas, onde se fará que o robot siga a liña dun circuíto, co alumnado competindo para ver que cousas fan ir máis rápido a máquina. Deste xeito, “aprenderán o ciclo de vida do software e os condicionais”, sinalan o CPEIG e máis a AMTEGA. Amais, xogarase cun MBot radiocontrol, construíndo un mando a distancia para controlalo coma se fose un coche de radiocontrol. Aprenderán eventos, electricidade e comunicación sen fíos e, finalmente, achegaráselles a actividade MBot Labirinto, construíndo un pequeno labirinto para ser percorrido polo MBot e axudalo a atopar a saída.
O segundo dos obradoiros será sobre drons, no cal os rapaces aprenderán conceptos básicos de teoremas de Pitágoras e trigonometría, ademais de adquirir habilidades cognitivas visuais. Os nenos e nenas de 9 a 16 anos aprenderán a integrar a programación co mundo dos drons. A actividade constará de dous retos. No primeiro deles, os rapaces e rapazas iniciaranse no mundo dos vehículos aéreos non tripulados, creando un circuíto onde adestrarán as súas habilidades na pilotaxe destas aeronaves. Comezarán coñecendo que é un dron, por que voa, que partes ten, e despois pilotaranos. Unha vez iniciados nisto, probarán unhas gafas FPV para “sentir a velocidade vendo o que ve un coche teledirixido con cámara incluída”, explican as entidades organizadoras, engadindo que “para as máis habilidosas e habilidosos que cheguen a dominar o dron e mailo coche, probarán a pilotaxe FPV nun vehículo aéreo remoto”. Na segunda parte da actividade, programarán un aparello voador e por medio dunha programación por bloques, converterano nunha aeronave non tripulada e autónoma. Por medio de Scratch, empregando un dron especial chamado Tello executarán un programa feito polo CPEIG.
A Xunta e o Concello de Santiago abrirán unha consulta ao mercado, despois de verán, para que os operadores presenten proxectos de despregamento de fibra óptica no casco histórico de Compostela, en base ao Catálogo de Solucións Técnicas aprobado recentemente polo Goberno galego.
Así o anunciaron esta mañá o conselleiro de Cultura e Turismo, Román Rodríguez; o alcalde de Santiago de Compostela, Xosé Sánchez Bugallo, e a directora da Axencia para a Modernización Tecnolóxica de Galicia, Mar Pereira, na inauguración da xornada A conectividade nos cascos históricos, que se celebra no Museo das Peregrinacións.
Segundo se avanzou no encontro, os proxectos que presenten os operadores deberán detallar o modelo despregamento e de financiamento, indicando, se fose preciso, o investimento público que requiriría a actuación.
Os operadores formularán os posibles plans de despregamento baseándose nas alternativas que ofrece o Catálogo de solucións para actuacións de tendido da rede de fibra óptica en contornas urbanas de especial protección e conxuntos históricos de Galicia, elaborado pola Amtega, o operador público Retegal e a Dirección Xeral do Patrimonio Cultural. O documento foi presentado durante a xornada e é o punto de partida para darlle resposta á falta dun procedemento estandarizado para levar a fibra óptica aos cascos históricos.
Para a elaboración desta guía partiuse do caso concreto de Santiago de Compostela e en colaboración co Concello, co Consorcio de Santiago e cun equipo multidisciplinar (integrado por arquitectos, enxeñeiros de telecomunicación e técnicos proxectistas especializados en despregamentos de fibra óptica), elaboráronse unha serie de propostas viables e extrapolables a outros conxuntos históricos. Entre as solucións que ofrece a guía están o trazado por cornixa, o soterramento ou o despregamento da fibra óptica a través das redes de saneamento.
O catálogo, que se publica hoxe, vai acompañado de medidas xurídico-administrativas para axilizar a aprobación dos proxectos dos operadores nestas zonas. Neste sentido, a Xunta está a traballar no desenvolvemento normativo de Lei de rehabilitación, rexeneración e renovación urbanas de Galicia para garantir a simplificación administrativa dos trámites necesarios para aprobar os proxectos de despregamento.
Ademais, a Xunta solicitará ao Estado a clasificación dos cascos históricos como “zonas brancas” para que poidan concorrer ás axudas estatais de despregamento de fibra, xa que só as zonas con esta tipificación, é dicir, sen cobertura, poden ser susceptibles de optar a subvencións públicas.
O conselleiro de Cultura sinalou que na actualidade o acceso a internet é algo imprescindible tanto para un uso profesional como para relacionarse coa sociedade e que no caso das cidades a facilidade para dispoñer dun bo servizo de telecomunicacións “é determinante para asentar poboación, xerar riquezas, crear negocios ou fomentar o comercio”.
Nesta liña, destacou que aínda que a principal prioridade da Xunta de Galicia debe ser preservar “o noso legado patrimonial”, débese seguir colaborando entre administracións na procura de solucións que nos permitan garantir que os cascos históricos “estean vivos e teñan futuro”.
Pola súa banda, o alcalde de Santiago, Xosé Sánchez Bugallo, afirmou que unha cidade histórica para ser competitiva e para evitar que se deshabite ten que ser capaz de ofrecer aos seus residentes “unha calidade de vida e servizos semellantes aos que ofrece ao resto do municipio”, entre eles a conectividade. Pero, sinalou o rexedor, “atopámonos con multitude de dificultades”. A principal, “os custes das intervencións que afectan ás infraestruturas do casco histórico”.
Por iso, Sánchez Bugallo aposta por “buscar fórmulas que permitan acometer os investimentos necesarios, acordos entre as administracións públicas e os veciños da zona monumental para buscar solucións economicamente viables e tecnicamente posibles. E desde logo é necesario incorporar as últimas tecnoloxías.”, subliñou.
A directora da Amtega destacou que coa publicación do catálogo e a apertura da consulta aos operadores, Galicia está a abordar unha problemática presente en toda a Unión Europea para a que ata agora non se ofrecera ningunha solución. Tamén, avanzou que se traballará nun catálogo de solucións técnicas compatibles coa protección do patrimonio e o medio ambiente para a tecnoloxía 5G nos conxuntos históricos.
Ademais da presentación do catálogo, na xornada afondouse na dificultades e posibles solucións para o despregamento das infraestruturas de telecomunicación nos cascos históricos contando coa visión de todos os axentes implicados.
Baixo o título O estado actual dos servizos de telecomunicacións nos cascos históricos, desenvolvéronse dúas mesas de debate, a primeira ofrecerá a Visión de Patrimonio e posibles solucións coa intervención de representantes da organización non gobernamental, asociada a Unesco, ICOMOS, do Consorcio de Santiago, do Grupo de Cidades Patrimonio da Humanidade, do Colexio Oficial de Arquitectos de Galicia e da Consellería de Cultura e Turismo.
A segunda mesa centrouse na Visión dos operadores e do estado actual coa participación do director-xerente do operador público Retegal e representantes de Movistar, Vodafone, Orange e R. Finalmente, pechouse o encontro expoñendo as principais conclusións da xornada.
Google presentou o seu proxecto Parrotron, unha rede neural de extremo a extremo que transforma patróns de fala atípicos nunha linguaxe sintetizada e fluída, e que esta dirixido a persoas con discapacidades da fala, segundo informa a compañía no seu blogue corporativo.
O proxecto Parrotron está centrado na fala, e logra este proceso sen a necesidade de producir texto e omitindo o paso de recoñecemento de sinais da linguaxe (como o movemento dos beizos). O obxectivo é que esta tecnoloxía se poida empregar entre humanos e con motores de recoñecemento de linguaxe automática (ASR, polas súas siglas en inglés).
Esta ferramenta é parte do proxecto Euphonia, que, segundo Google, demostrou "que os modelos de recoñecemento de voz poden mellorarse significativamente para transcribir mellor unha variedade de fala atípica e disártrica". Google, así, partiu dos asistentes virtuais e servizos de recoñecemento de voz, ferramentas que estas persoas non poden usar debido ás súas dificultades.
Como explica Google nun comunicado publicado no seu blogue de Intelixencia artificial, Parrotron foi adestrado en dúas fases utilizando dúas recompilacións paralelas de pares de voz de entrada/saída.
Para iso, os investigadores construíron un modelo de conversión de voz a voz para a fala fluída estándar. Posteriormente personalizaron o modelo, adaptándoo aos patróns de voz atípicos da persoa con dificultades. Recorreron a datos paralelos derivados automaticamente cun sistema de síntese de voz a texto (TTS). Un sistema text-to-speech (TTS) converte a linguaxe de texto normal en fala; outros sistemas recrean a representación simbólica lingüística como transcricións fonéticas en fala. Unha das persoas máis famosas que usaron estes sistemas foi o ciéntífico Stephen Hawking.
Google desenvolveu varias probas do sistema Parrotron, entre elas, unha cun investigador e matemático de Google, Dimitri Kanevsky, de orixe rusa e profundamente xordo de pais con audición normal, e con Aubrie Lee, unha defensora da inclusión de discapacitados que ten unha distrofia muscular.
No caso de Dimitri, graváronse 15 horas de discurso, que se utilizaron para adaptar o modelo base aos matices específicos do seu discurso. O sistema Parrotron axudoulle a ser comprendido tanto polos investigadores como polo sistema ASR de Google por igual. O funcionamento do motor ASR de Google na saída de Parrotron reduciu significativamente a taxa de erro de palabra do 89% ao 32%.
Aubrie, pola súa banda, achegou 1,5 horas de gravacións de voz que foi clave para exemplificar o éxito esta tecnoloxía de voz.
A Consellería de Educación, Universidade e Formación Profesional publica no portal educativo a convocatoria para incorporar os Espazos Maker a outros 10 centros educativos públicos. Ademais, darase continuidade aos 10 centros que participaron neste programa educativo durante o curso 2018/19.
O programa Espazos Maker pretende a creación nos centros educativos, de lugares que fomenten a creatividade e a formación de alumnado nun contexto de aprender facendo, isto é, baseándose na aprendizaxe activa e manipulativa, a través do deseño, a solución de problemas e a aprendizaxe entre iguais.
Estes espazos funcionarán como centros de actividades nos que mediante distintas dinámicas como obradoiros tanto alumnado como profesorado, e no seu caso as familias, poden desenvolver proxectos mediante a experimentación, o prototipado e a construción. Poden ser desde pequenas prácticas de investigación a proxectos baseados na abordaxe de problemas reais, e mesmo cun enfoque Fab Lab de fabricación e innovación a pequena escala.
Os 10 centros que se incorporen ao programa recibirán unha dotación de material necesario para organizar o espazo Maker no centro, que estará formada por un equipo de procesado audiovisual (composto por estación de procesado, pantalla grande de calidade e 2 tabletas), e equipamento audiovisual (cámara dixital de foto e vídeo con obxectivos intercambiables e trípode, trípode de alta estabilidade, gravador de audio, cascos auriculares, sistema de gravación completo, equipo multifunción color tamaño A3 e escáner 3D).
A dotación material incluirá tamén mobiliario metálico (carro para desprazar pequena equipación e banco de traballo ou superficie fixa de traballo para maquinaria) e un kit de pequena maquinaria e ferramenta formada por trade eléctrico e accesorio para uso en columna, trade de batería, mini trade de bricolaxe con set de consumibles e accesorio para uso en columna, lixadora delta e set completo de lixas de diferente grao e para materiais distintos, caladora con set completo de follas de corte, sistemas de aspiración de seco e húmido semiprofesional, cortadora-fresadora CNC, conxunto de ferramenta manual, soldador de estaño, conxunto de coitelos de precisión pistola de pegamento termofusible con consumibles, pistola de aire quente con consumibles, pistola de aire quente regulable e máquina de coser.
Cada centro educativo ao que vai destinado esta convocatoria, dentro da súa autonomía, poderá integrar este programa educativo de acordo coa dispoñibilidade de espazos e a organización escolar que mellor se axuste ao desenvolvemento do mesmo.
O programa, enmarcado na Estratexia galega para a educación dixital (Edudixital 2020), vai dirixido ao alumnado que curse educación secundaria obrigatoria ou bacharelato, polo tanto poderán presentar solicitude os centros públicos que impartan estas ensinanzas. A solicitude e a documentación débese presentar en calquera dos lugares e rexistros establecidos no artigo 16.4 da Lei 39/2015, do 1 de outubro, do procedemento administrativo común das administracións públicas. Ademais, tanto o anexo como a documentación remitiranse ao correo electrónico espazostem@edu.xunta.gal. O prazo de presentación de solicitudes e documentación finalizará o 30 de setembro de 2019.
O vindeiro luns 22 de xullo a partir das 10.30 o Museo das Peregrinacións de Santiago de Compostela acollerá a Xornada “A conectividade nos cascos históricos”, na que se presentará o primeiro catálogo de solucións para facilitar a extensión de fibra nestas zonas.
O encontro será inaugurado polo conselleiro de Cultura e Turismo, Román Rodríguez, o alcalde de Santiago de Compostela, Xosé Sánchez Bugallo, e a directora da Axencia para a Modernización Tecnolóxica de Galicia (Amtega), Mar Pereira.
O documento, elaborado pola Axencia para a Modernización Tecnolóxica de Galicia (Amtega), o operador público Retegal e a Dirección Xeral de Patrimonio é o punto de partida para darlle resposta á falta dun procedemento estandarizado para o despregamento de fibra óptica en cascos históricos. É unha problemática que existe en toda a Unión Europa e é cada vez máis limitante para a dinamización tanto comercial como de habitabilidade destas zonas
Para a elaboración desta Guía partiuse do caso concreto de Santiago de Compostela e en colaboración co Concello, co Consorcio de Santiago e cun equipo multidisciplinar, integrado por arquitectos, enxeñeiros de telecomunicación e técnicos proxectistas especializados en despregamentos de fibra óptica, elaboráronse unha serie de propostas viables e extrapolables a outros conxuntos históricos. Entres as solucións que ofrece a guía están o trazado por cornixa, o soterramento ou o despregamento da fibra óptica a través das redes de saneamento.
Ademais da presentación do catálogo, na xornada afondarase na dificultades e posibles solucións para o despregamento das infraestruturas de telecomunicación nos cascos históricos contando coa visión de todos os axentes implicados.
Baixo o título “O estado actual dos servizos de telecomunicacións nos cascos históricos”, desenvolveranse dúas mesas de debate, a primeira ofrecerá a “Visión de Patrimonio e posibles solucións coa intervención de representantes da organización non gobernamental, asociada a Unesco, ICOMOS, do Consorcio de Santiago, do Grupo de Cidades Patrimonio da Humanidade, do Colexio Oficial de Arquitectos de Galicia e da Dirección Xeral de Patrimonio”.
A segunda mesa centrarase na “Visión dos operadores e do estado actual” coa participación do director-xerente do operador público Retegal e representantes de Movistar, Vodafone, Orange e R. Finalmente, pecharase o encontro expoñendo as principais conclusións da Xornada.
A xornada está dirixida aos profesionais, tanto do ámbito dos despregamentos, como operadores, fabricantes de equipos, instaladores, como a empresarios e profesionais dos concellos das áreas de Urbanismo e Patrimonio. Os interesados en participar deben inscribirse a través da conta de correo electrónico cascoshistoricos@retegal.gal.
Málaga acolle esta fin de semana a feira Gamepolis 2019 na que a accesibilidade terá un papel importante grazas á Fundación ONCE, que quere mostrar como as persoas con discapacidade tamén poden gozar da tecnoloxía baixo o lema "Se eu podo, ti podes".
A accesibilidade na tecnoloxía tamén está a avanzar no sector dos videoxogos con dispositivos como o Xbox Adaptive Controller de Microsoft, un mando totalmente configurable para cubrir as necesidades de cada xogador e, cuxas posibilidades, a Fundación ONCE mostrará nesta feira.
Esta fin de semana Málaga convértese na capital dos videoxogos en España e é fundamental que a accesibilidade estea representada na feira, grazas á Fundación ONCE que quere impulsar a tecnoloxía deseñada para todas as persoas.
Esta é a sétima edición de Gamepolis, unha feira na que as principais compañías do sector de videoxogos se reunen para mostrar as últimas novidades.
Este mes de xullo remataron en Carballo os cursos de manexo do teléfono móbil impartidos pola Cruz Vermella e organizados polo Concello. Nas actividades, que remataron na parroquia de Ardaña (coa presenza do concelleiro de Cultura e Deporte, Marcos Trigo), participaron 280 persoas. Amais de en Ardaña, houbo actividades formativas en Vilela, Sofán, Sísamo, Rus, Lema, Entrecruces, Noicela, Cances, Artes e Carballo. Os 280 participantes repartíronse nunha vintena de grupos.
Na xornada de peche, o Concello agradeceu a colaboración da Asemblea Local da Cruz Vermella, que se encargou de preparar os manuais que se entregaron a todos/as os/as participantes, de formar ás monitoras e de impartir os obradoiros. Tamén se enxalzou a elevada implicación dos consellos parroquiais e do movemento asociativo das diferentes localidades do termo municipal para achegar a información á veciñanza, recoller as follas de inscrición e ter a punto os locais sociais. Os talleres de manexo do teléfono móbil constaron de tres sesións de dúas horas de duración cada unha, que se impartiron todos os martes e os xoves (agás festivos) dende o 7 de febreiro ata este mes de xullo. Ao abeiro destes obradoiros, o Concello quixo permitir aos maiores familiarizarse coas novas tecnoloxías de uso cotiá e cada vez máis estendido entre persoas de todas as idades.
Aínda estamos a tempo para participar nas actividades formativas (dez cursos) programadas ao abeiro do Proxecto Millenials 2019 da Deputación de Pontevedra, un plan dirixido á mocidade da provincia para mellorar a súa empregabilidade con, basicamente, un amplo abano de contidos TIC (cada contido, un xeito de reforzárense perante o mercado laboral).
O programa, impulsado tamén pola Escola de Organización Industrial, desenvolverase até decembro en Pontevedra, Ponteareas, Vigo e Vilagarcía. Está dirixido a mozas e mozos de entre 16 e 30 anos. Abordaranse, de cheo, cuestións como o comercio electrónico, como visualizar empresas en buscadores, como dar forma a un videoxogo ou como dominar a impresión 3D. En Pontevedra desenvolveranse tres cursos: Creación e xestión de tendas en liña, que será no Edificio Administrativo da Deputación do 23 de xullo ao 22 de outubro, e de 316 horas; Márketing dixital: estratexias SEO, SEM, redes sociais e análises de tráfico web, no Centro Príncipe Felipe, do 23 de xullo ao 8 de outubro, de 266 horas e Xestión de fidelización de establecementos turísticos, que tamén terá lugar no Príncipe Felipe do 23 de xullo ao 10 de setembro, con 166 horas.
Por outra banda, Vigo acollerá cinco accións formativas, que serán na sede da Deputación na cidade. Trátase de Deseño e prototipado rápido mediante impresión 3D e mecanizado, de 316 horas e que se desenvolverá do 16 de setembro ao 16 de decembro; Creación de contidos dixitais (videoxogos, imaxe e vídeo), da mesma duración, entre o 23 de xullo e o 17 de outubro; Creación de aplicacións móbiles (aplicacións para Android e iOS), tamén de 316 horas e que se desenvolve entre o 23 de xullo e o 22 de outubro; Organización e Xestión de Produción: Lean Manufacturing 4.0, de 312 horas entre o 16 de setembro e o 16 de decembro e, por último, Xestión de empresas turísticas. Deseño e desenvolvemento de produtos, con 166 horas repartidas entre o 16 de setembro e o 31 de outubro.
En Vilagarcía (Matosiños) celebrarase o curso Deseño e prototipado rápido mediante impresión 3D e mecanizado, cun total de 316 horas, entre o 16 de setembro e o 19 de decembro, mentres que o CDL de Ponteareas acollerá a acción formativa Programación web con software libre. Web development bootcamp do 23 de xullo ao 23 de outubro, cun total de 316 horas.
As inscricións poden facerse a través da web da EOI e as persoas interesadas poden obter maior información a través do enderezo electrónico coooperacion@depo.es ou no teléfono 986 804 100 (extensións 40652 e 40267).
Esta mañá celebrouse na Cidade da Cultura, en Santiago de Compostela, o Demo Day, a xornada que pecha a primeira edición do programa de startups R DiCo Challenge. O xefe do Departamento de Innovación Tecnolóxica da Amtega, Eladio Otero, e máis o responsable de servizos de Transformación Dixital de R e do Grupo Euskaltel, Alberto Díaz Freire, abriron a “demo”, na que os 4 proxectos desenvolvidos expuxeron, ante representantes do sector TIC e audiovisual, os logros e avances obtidos tras o seu paso pola aceleradora.
Eladio Otero, xefe do Departamento de Innovación Tecnolóxica da Amtega lembrou que "startupsR Dico Challenge se enmarca no Plan Dico Mindset para promover o sector dos contidos dixitais en Galicia; unha estratexia impulsada dende a Administración Autonómica en colaboración co Clúster TIC e do Audiovisual de Galicia para configurar un sector de contidos dixitais galego máis potente, maduro e competitivo, que neste momento aglutina arredor de 900 empresas con preto de 5.400 empregados”.
Pola súa banda, Alberto Díaz Freire salientou que “xunto aos retos de referencia dos 4 proxectos desenvolvidos con éxito durante estes meses, consideramos igualmente acadado o reto primeiro de R: levar adiante esta primeira edición do programa startupsR DiCo Challenge, un plan con vocación de futuro para atopar talento emprendedor en Galicia e fornecer dun novo empurre os contidos dixitais na nosa comunidade”.
Ao remate das presentacións, o responsable de Audiovisuais de R e do Grupo Euskaltel, Javier Rodríguez, puxo o acento na “importancia da relación entre os equipos dos proxectos e os mentores, factor que ten sido o verdadeiro motor do traballo ao longo dos catro meses da fase de aceleración, co foco sempre posto en solucións viables e aplicables ao sector dos contidos profesionais e pensando, en suma, nos usuarios finais”.
Durante algo máis dun hora, da man de mentores e voceiros dos equipos dos proxectos, o auditorio coñeceu o detalle das ideas desenvolvidos no programa startups R DiCo Challenge: xogos para a mente, teatro en realidade virtual, trámites áxiles e intelixencia televisiva.
Na contorna das aplicacións para Android TV, Norman Suárez, de Cuicui Studios defendeu o proxecto Brain Games, unha proposta de xogos e dinámicas deseñadas por pedagogos e validados cientificamente, para público infantil e adulto, que potencian a parte lúdica e nos permiten xogar, co mando da tele, a enredos para aumentar a nosa axilidade mental”.
Na área dos contidos formativos e divulgativos innovadores, Jorge Algora, de Adivina Producciones, explicou o proxecto Teatro Go. Trátase dun servizo de retransmisión en diferido de contidos culturais, especificamente teatrais, integrado na plataforma de contidos de R e baseado en tecnoloxías de realidade virtual en 180ª.
Míkel Díaz, do centro tecnolóxico Gradiant, falou polo miúdo do proxecto ALiCE (www.alicebiometrics.com), un sistema de recoñecemento facial pensado para os clientes de R e doutras compañías.
Finalmente, no eido do Big Data aplicado ao consumo televisivo, Mario Pérez –‘Galopiño’- de Datanimbo Consulting, mostrou os avances da súa proposta Visualización Big Data, que consiste na posta en marcha dun sistema de machine learning orientado a profundar no coñecemento das comunidades de programas de televisión.
Un total de 42 propostas (startups e emprendedores, pequenas e medianas empresas e algún centro tecnolóxico e universitario) responderon aos 5 retos tecnolóxicos lanzados o pasado decembro nos inicios da primeira edición de startups R DiCo Challenge, que se pecha arestora tras 6 meses de traballo intenso.
En febreiro, o comité avaliador (dous representantes de R, dous da Amtega e máis un da CRTVG, patrocinadora dun dos retos) escolleron 20 propostas que pasaron á fase de preaceleración. Durante varias semanas, os emprendedores escollidos mantiveron contacto directo cos seus mentores en obradoiros para preparar o seu modelo de negocio e a defensa da súa idea nunha xornada Pitch Day da que saíron os 4 proxectos definitivos que pasaron á fase de aceleración.
Daquela comezaron os procesos de mentorización, titorización, formación e seguimento durante 4 meses nos que os proxectos contaron tamén coa axuda económica da Amtega para afrontar os gastos cotiáns durante o desenvolvemento do traballo. Utilizaron, así mesmo, o espazo startups R no Centro de Emprendemento da Cidade da Cultura e traballaron man a man con operador galego, podendo acceder á súa infraestrutura e modelo de negocio e ás súas instalacións, ademais de camiñar a carón de R durante este tempo, gañando en visibilidade. Paralelamente, quen traballaron no reto patrocinado pola CRTVG contaron cun mentor da entidade e cos seus medios e infraestruturas.
Tras a xornada Demo Day celebrada esta mañá na Cidade da Cultura, onde os proxectos gañadores recolleron un premio en recoñecemento ao seu traballo ao longo destes seis meses, ábrese agora un período de saída progresiva da aceleradora de todos eles.
O programa startups R DiCo Challenge enmárcase no Plan de acción para o impulso aos contidos dixitais en Galicia (DICo Mindset), que ten entre os seus obxectivos establecer colaboracións entre empresas para abordar retos tecnolóxicos e definir novos contidos audiovisuais que poidan rendibilizarse noutros mercados, ademais de lograr a visibilidade necesaria para o sector.
A app gratuíta NeuroFit tivo, en tan só un ano, preto de 4.000 descargas de persoas afectadas por esta enfermidade neurolóxica, coidadores e familiares.
A Fundación Curemos o Parkinson e a biofarmacéutica UCB acaban de lanzar a versión 2.0 de NeuroFit, desta app gratuíta especialmente deseñada para persoas afectadas pola enfermidade de Parkinson .
A nova edición inclúe novos exercicios de rehabilitación enfocados a diferentes áreas que ven afectadas, principalmente, por esta enfermidade neurodexenerativa como as costas, o fala e a respiración.
A app, deseñada pola neuróloga especialista en trastornos do movemento do Hospital de Galdakao, a doutora Nerea Foncea, conta coa supervisión dun traumatólogo. Nesta edición 2.0, conta co aval e a recomendación da Sociedade Española de Neuroloxía (SEN) e tamén está dispoñible en inglés.
"Os pacientes con enfermidade de Parkinson necesitan tratamento farmacolóxico, pero tamén moito movemento en moitos ámbitos nos que está implicada a musculatura lisa e estriada", asegura a doutora Foncea.
En canto ás principais novidades, NeuroFit 2.0 inclúe novos consellos e recomendacións didácticas e visuais, con numerosas imaxes en movemento que facilitan a formación do paciente facendo que sexa fácil, sinxela e accesible, desde o punto de vista da usabilidade.
En canto ao contido, os novos exercicios orientados a:
"Os pacientes con Parkinson teñen unha voz hipofónica, cústalles articular, non se lles entende e con NeuroFit, ademais de exercicios, ofrecémoslles trucos para que poidan manter unha conversación, de forma adecuada, sen forzar o seu organismo tendo en conta as súas limitacións", explica a doutora Foncea.
NeuroFit 2.0 tamén conta cuns sinxelos exercicios enfocados a mellorar a calidade de vida das persoas afectadas por esta patoloxía neurolóxica. Tamén inclúe consellos sobre actividade física, hábitos posturais, mobilidade, equilibrio ou exercicios de relaxación, faciais e de mans que permiten aos pacientes con Parkinson exercitar os seus músculos para combater síntomas da enfermidade como a rixidez, a lentitude de movementos e o tremor.
Outra gran novidade que inclúe NeuroFit 2.0 son os consellos para adaptar as diferentes habitacións da casa ás necesidades específicas dos pacientes con enfermidade de Parkinson, especialmente o salón, o dormitorio e o cuarto de baño. Eliminar as alfombras, poñer pasamáns, adaptar a ducha, etcétera son algúns das recomendacións.
Desde a Fundación Atlético de Madrid realizaron este vídeo para axudar á difusión da app.
Aquí está unha das ligazóns para descargala en Google Play.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...