Bertamiráns e O Milladoiro (concello de Ames) van ser un fervedoiro de actividades formativas TIC, máis polo miúdo as aulas de informática das Casas da Cultura de cada unha das localidades. Trátase dun programa de capacitación que terá, ademais, o engadido extra de poñer o foco en incrementar a empregabilidade das mulleres. As accións, catro obradoiros, virán da man da asociación Otro Tiempo, baixo o título xenérico Manexa as novas tecnoloxías e a comunicación para a túa autonomía.
Partindo das ferramentas que facilitan as novas tecnoloxías, os obradoiros buscan o impulso laboral das participantes mediante a posta en marcha de estratexias para atopar emprego ou de desenvolvemento dos seus propios emprendementos. Segundo informa o Concello de Ames, nos diferentes cursos traballarase con dinámicas que axuden ao “empoderamento persoal para facilitar a procura de emprego”.
O principal obxectivo do programa é contribuír ao impulso social e económico das mulleres en situación de vulnerabilidade social, “para que participen plenamente na vida social, económica e cultural”. Así, os obradoiros pretenden “fomentar a redución da brecha dixital, facilitar o acceso das mulleres ás novas tecnoloxías como ferramenta de inserción socio-laboral, promover o autoemprego e construír alianzas e redes solidarias para o intercambio de recursos socio-laborais”. O programa contempla a realización de catro obradoiros. O primeiro, que leva por título Coñécete, valora as túas competencias, servirá para que as mulleres participantes identifiquen as súas capacidades, os medios e o camiño para “seren donas das súas eleccións vitais”. Definiranse os obxectivos persoais e profesionais e aprenderase a elaborar un currículo por competencias.
O segundo dos obradoiros, Receitas dixitais para acadar os teus obxectivos, buscará vencer as resistencias tecnolóxicas e a usar diferentes ferramentas online para atopar traballo e/ou poñer en marcha un plan de autoemprego: TIC imprescindibles, webs, aplicacións móbiles e redes sociais, recursos de procura laboral, como elaborar un currículo creativo, plataformas para dar a coñecer un proxecto de autoemprego e estratexias para ampliar a rede de contactos.
O obradoiro Máis que palabras, aprópiate da comunicación servirá para adestrar ás participantes en habilidades de comunicación precisas para resolver conflitos, falar en público con seguridade, encarar unha entrevista laboral ou contar un proxecto de emprendemento.
Por último, no obradoiro Iniciativas inspiradoras, proxectos liderados por mulleres coñeceranse diferentes opcións para a formación e a autonomía económica, afondando nas posibilidades que ofrece a economía social e solidaria para a incorporación ao mercado laboral con proxectos que dan prioridade ás necesidades das persoas na posta en marcha de proxectos de emprendemento colectivo.
A aula CeMIT de Ponteareas vén de anunciar un completo programa de actividades para conmemorar (tecnoloxicamente) a chegada do outono e, tamén, a celebración o vindeiro 1 de outubro do Día das Persoas Maiores. Así, o espazo local de formación TIC anuncia que o vindeiro mes haberá cursos de iniciación á informática, de procura de información na Rede, de DNI electrónico e certificados dixitais, de emprego do correo electrónico, de folla de cálculo, de aplicacións de Google, de edición de audio e vídeo e da ferramenta Google Drive.
Ademais, o día 1 de outubro con motivo do Día Internacional das Persoas Maiores, proxectaranse dúas charlas, unha ás 10:30 horas baixo o título Materia pendente do século XXI: formación ao longo da vida e a outra, ás 17:00 horas, Trucos Google para buscar por Internet.
A Concellería de Innovación e Desenvolvemento Tecnolóxico, que dirixe Benito Márquez, informa que para inscribirse tan só hai que achegarse ata a aula CeMIT no Centro Social que ten emprazamento na rúa Oriente ou ben contactar no número de teléfono 673 794 883 ou a través do enderezo electrónico cemit.ponteareas@xunta.gal.
O Concello de Vigo vén de abrir o proceso para participarmos nos vindeiros cursos de alfabetización dixital promovidos, precisamente, polo Goberno local. Os obradoiros impartiranse nos meses de setembro e outubro, con formación en materias como informática, robótica, mecanografía, Internet ou ofimática básica.
As clases celebraranse na aula de formación TIC na Avenida de Beiramar. No mes de setembro será a quenda de materias como a iniciación á folla de cálculo, á informática e á robótica, así como a procura de emprego. En outubro, abordarase a formación en Internet e trámites administrativos, mecanografía e ofimática básica. As persoas interesadas poden informarse e/ou inscribirse no teléfono 010 ou no 986 810 260, cos requisitos de estar empadroado na cidade de Vigo. O Concello concederá preferencia a aquelas persoas que non participaran previamente no mesmo curso solicitado.
O Colexio Profesional de Enxeñaría Técnica en Informática (CPETIG) vén de abrir o prazo de inscrición para o Curso de Tratamento e análise de evidencias dixitais, que se vai celebrar os días 4 e 5 de outubro na Cidade da Cultura, na aula II. A actividade, organizada polo colexio en colaboración coa axencia autonómica AMTEGA, terá unha duración de doce horas e contará coa presenza activa de Víctor Salgado, Gonzalo Sotelo, Juan Luis Miguens e Miguel Abal.
A primeira sesión, o venres día 4 en horario de tarde, será impartida por Víctor Salgado, avogado-socio de Pintos&Salgado, que presentará un relatorio xurídico-práctico sobre informática pericial. O sábado día 5 a sesión matinal será impartida por Gonzalo Sotelo, policía xudicial especialista en eCrime, co relatorio Evidencias dixitais, valor probatorio. O contido formativo completarase coa sesión de tarde sobre Informe pericial: modelo normalizado do CPETIG, na que serán relatores Juan Luis Miguens e Miguel Abal, secretario e vicesecretario do Colexio.
As persoas asistentes a este curso poderán solicitar o acceso ao Corpo oficial de peritos do CPETIG, COP. Segundo informa o colexio galego, a oportunidade desta oferta formativa “entronca directamente co carácter determinante do axeitado estudo e análise das evidencias dixitais na informática pericial, consideradas como calquera rexistro xerado ou almacenado nun sistema dixital que poida ser utilizado como proba nun proceso legal”. En palabras do CPETIG, un bo manexo das evidencias é hoxe en día “un reto para os profesionais, peritos informáticos ou telemáticos”, na medida na que utilizar os medios e métodos idóneos resulta imprescindible para que non se malogre a finalidade procesal. O curso dará as claves para traballar de xeito eficaz coas evidencias dixitais, de xeito que sirvan como un instrumento de valor legal en procesos xudiciais ou en investigacións forenses, ofrecendo formación especializada dirixida á adquisición de competencias e coñecemento do catálogo de técnicas que poden ser combinadas para o estudo de casos concretos de evidencias dixitais.
A Unión de Consumidores de Galicia (UCGAL), en colaboración coa Secretaría Xeral de Igualdade, formará a mulleres en novas tecnoloxías a través da actividade Escola para o apoderamento de mulleres do rural: comercio e banca electrónica. A actividade consiste en obradoiros cunha duración de oito horas, repartidas en catro sesións de dúas horas cada unha. O número de prazas é limitado. As inscricións realizaranse chamando ao 981 56 64 11 (de luns a venres, de 10:00 a 15:00 horas) ou enviando un correo electrónico.
A Escola para o apoderamento de mulleres do rural: comercio e banca electrónica é unha aposta pola formación en novas tecnoloxías co fin de diminuír a fenda dixital, fomentar o apoderamento financeiro e a autonomía económica nun contexto no que o número de oficinas bancarias diminúe progresivamente e no que as transaccións de bens e servizos a través da rede están á orde do día. Entre os obxectivos destes obradoiros de formación está que as asistentes adquiran coñecementos e habilidades relacionadas coa Sociedade da Información (banca electrónica, comercio electrónico) e , así mesmo, coñezan os seus dereitos como persoas consumidoras e as ferramentas existentes que permiten o exercicio dos mesmos. UCGAL e a Secretaría Xeral de Igualdade colaboran por primeira vez nun proxecto que busca facilitar a participación das mulleres no entorno dixital e reforzar as súas competencias neste eido ao fin de facelas partícipes dos avances que proporciona a sociedade da información.
O primeiro destes obradoiros desenvolverase no Concello da Estrada nas seguintes datas: luns 30 de setembro, mércores 2 de outubro, luns 7 de outubro e mércores 9 de outubro; en horario de 10:30 a 12:30 horas na Aula CEMIT (Edificio de usos múltiples. Avenida Benito Vigo, nº 94 ).
O segundo destes obradoiros levarase a cabo no Concello de Ordes nas seguintes datas: martes 1, xoves 3, martes 15 e xoves 17 de outubro; en horario de 17:00 a 19:00 horas na Aula de Informática de Ordes (Casa da Cultura. Rúa de Galicia, nº 25).
Este xoves 26 de setembro imos poder obter unhas cantas claves de valor para impulsar a dixitalización dos nosos negocios, un fenómeno imprescindible para seguirmos sendo competitivos, rendibles e eficaces. Estamos a falar da Xornada A Dixitalización como Panca da Competitividade da PEME, que se celebra no salón de actos da Cámara de Comercio de Santiago (número 44 da rúa San Pedro de Mezonzo), ao abeiro do Programa TICCámaras. Na sesión, que comezará ás 9.30, daranse a coñecer as principais conclusións do Informe España Empresa Dixital e brindarase un punto de encontro para o intercambio de recursos e achados en materia de transformación: un proceso de cambio que todas as empresas, do sector que sexan, teñen que seguir de preto e asumir.
Amais, a cita acollerá unha mesa redonda sobre a mellora da competitividade e produtividade das pequenas e medianas empresas a través das TIC. As actividades, como dixemos, darán comezo ás 9.30 coa sesión de apertura institucional a cargo de Rosa Mary Cardeso Trillo, secretaria xeral en funcións da Cámara de Comercio de Santiago, quen dará paso, sobre as 9.45 horas, á presentación do Informe España Empresa Dixital, a cargo de Carlos López Blanco, presidente da Comisión de Dixitalización da Cámara de España.
Sobre as 10.00 horas será a quenda de Marta Menéndez Martínez, directora en Galicia de Teléfonica, que achegará o relatorio Senón é agora, cando? É hora de transformarse. De seguido, sobre as 10.15, está previsto que interveña José Manuel Martínez Sainz, subdirector de Desenvolvemento de Negocio de Transformación Dixital de Mapfre, que falará sobre os recentes procesos de innovación da aseguradora.
Ás 10.30 horas será a quenda da presentación do Programa TICCámaras, a cargo de Anselmo Díaz Romero, responsable do Departamento de Innovación da Cámara de Comercio de Santiago. Esta sesión incluirá a exposición de dous casos de éxito: Ausum Asesores e Abogados Asdos, a cargo de Diego Víboras Cabañero. Sobre as 10.45 celebrarase a mesa redonda Como ser máis eficiente traballando na nube, na que van intervir Carlos López Blanco, Marta Menéndez Martínez, Andrés Peral Plaza (director de Seguridade e Medioambiente en Sistemas de Información de Mapfre) e Diego Víboras Cabañero.
Rematarán os relatorios coa clausura institucional, a cargo de Rosa Mary Cardeso Trillo. Máis tarde está prevista unha sesión de networking.
A secretaria xeral da Igualdade, Susana López Abella, reivindicou unha maior presenza das mulleres nos ámbitos científicos e tecnolóxicos para enriquecer a actividade científica na súa intervención hoxe na mesa redonda Muller, Ciencia e Igualdade, organizada pola entidade Women in Nuclear (WiN).
López Abella instou a promover a eliminación dos desequilibrios na formación científica, tanto na investigación e na innovación como na xestión de I+D+i, así como situar a perspectiva de xénero nas actividades científicas. Por iso, aposta polas políticas de igualdade como vía para reducir as brechas de xénero en tódolos ámbitos, entre eles o científico-tecnolóxico.
Este é o reto do II Programa Galego de Muller e Ciencia, cuxo obxectivo é seguir avanzando na igualdade real no campo científico desde a concepción de que o valor das persoas, no que se refire á súa esixencia e ao seu esforzo debe ser o que determine a súa excelencia.
O VII Plan Estratéxico de Igualdade de Oportunidades de Mulleres e Homes 2017-2020 tamén busca consolidar o enfoque de xénero e das mulleres na actividade académica, científica, tecnolóxica e de innovación.
Nas medidas deste plan inclúese o proxecto NIN+NIN-, Iguais que favorece o encontro con mulleres singulares líderes nos seus sectores, como é o caso da ciencia, para que o alumnado de Educación Secundaria Obrigatoria (ESO) teña referentes femininos en ámbitos nos que non existe aínda paridade de xénero.
A secretaria xeral da Igualdade sinalou que dar a coñecer as aportacións das mulleres no ámbito científico e tecnolóxico para romper o teito de cristal contribuirá á redución da brecha no campo das ciencias e da tecnoloxía. Nesta liña, tamén ve preciso consolidar o enfoque de xénero e das mulleres na actividade académica, científica, tecnolóxica e de innovación. Galardóns como o Premio María Josefa Wonenburger Planells recoñecen a esas mulleres que se adiantaron ao seu tempo e abriron camiños a moitas outras.
A directora xeral de Avaliación e Reforma Administrativa, Natalia Prieto, participou esta mañá na xornada explicativa para persoal da Xunta sobre o Sistema Electrónico de Atención á Cidadanía (SIACI), á cal asistiron 100 traballadores da Presidencia, da Vicepresidencia e das Delegacións Territoriais. A mediados de outubro haberá outra xornada de formación na que se prevé a asistencia de 500 funcionarios do Goberno galego.
Segundo explicou Natalia Prieto, en base ao regulado na Lei 1/2015, do 1 de abril, de garantía da calidade dos servizos públicos e no Decreto 129/2016, do 15 de setembro, de atención á cidadanía no sector autonómico de Galicia, deseñase o Sistema Integrado de Atención á cidadanía, que recolle nun único punto a xestión relativa a todas aquelas queixas ou suxestións, así como as solicitudes de información xeral e particular e o acceso a información pública, que a cidadanía desexe presentar por distintos canles, xa sexa electrónico, presencial ou telefónico. O “Sistema Integrado de Atención á Cidadanía (SIACI)”, será a ferramenta cun sistema de xestión e tramitación electrónica integral de procedementos transversais de atención á cidadanía que permita a xestión e a medida da satisfacción respecto dos servizos prestados á cidadanía e da información facilitada, no ámbito da administración, contribuíndo á mellora continua dos mesmo. A implantación de solución tecnolóxica SIACI permitirá dispoñer dunha ferramenta transversal única para a Xunta de Galicia na que xestionar os procedementos específicos para a atención á cidadanía mediante a tramitación electrónica de principio a fin, optimizando as competencias e funcións do persoal empregado público, homoxeneizando a xestión da administración nos procedementos aos que dará cobertura, en canto a prazos e formas de actuación. Ademais de detectar e articular as posibles melloras, para aplicar as modificacións oportunas nos servizos e procedementos en relación á prestación de servizos á cidadanía.
Ser atendido a través dun sistema único e integral. Garantir a efectiva atención á cidadanía a través de un sistema integral. Sistema multicanle. Facilitar o acceso a través de distintos canles para presentar a solicitude de información e as queixas ou suxestións. Coñecer en que estado se encontra a súa solicitude en calquera momento. Facilitar información da situación (tramitación) do seu expediente. Seguimento da tramitación da queixas, suxestións, reclamacións ou peticións de información presentada por parte da cidadanía, desde un único punto a través da integración na Carpeta do Cidadán.
A directora da Axencia Galega de Innovación, Patricia Argerey Vilar, comentou ante un público de rapazas de entre 12 e 15 anos que ten “unha obsesión e unha ocupación moi importante: traballar para que as nenas de Galicia sexan mellores profesionais o día de mañá naquelas áreas de futuro da nosa economía e da economía global e dixital”. Patricia Argerey achegaba así unha das prioridades do seu departamento, a de espertar o interese e a motivación das nenas pola ciencia e a innovación, no marco do II Taller “Impulsando as futuras líderes en ciencia e tecnoloxía nuclear” organizado por Women in Nuclear España esta mañá en Vigo, coincidindo coa 45º Reunión Anual da Sociedade Nuclear Española.
Argerey, que comezou explicando a súa propia traxectoria profesional e experiencia persoal, centrouse en explicar á audiencia as actuacións que leva a cabo o seu departamento para fomentar as vocacións científico-tecnolóxicas entre a mocidade e, especialmente, entre as nenas e mozas. Neste ámbito, a directora de Gain puxo como exemplo das actividades encamiñadas a potenciar habilidades como a imaxinación, a creatividade e o espírito emprendedor como cualidades clave para o desenvolvemento dunha carreira profesional no eido científico-tecnolóxico, a feira Galiciencia, a maior feira científica para escolares que se celebra en Galicia, as Aulas Tecnópole, nas que os participantes desenvolven proxectos científico-tecnolóxicos ao longo do curso, ou os campamentos tecnolóxicos de verán -todas elas organizadas polo Parque Tecnolóxico de Ourense (Tecnópole) en San Cibrao das Viñas; ou o Día Internacional das Rapazas nas TIC e as xornadas de portas abertas para centros de ensino secundario que organiza o Centro de Supercomputación de Galicia (CESGA) e as Aulas Parga Pondal, en colaboración coa Fundación Eduardo Pondal en Ponteceso.
Por último, a directora de Gain adiantou dous novos programas que se inician durante este curso 2019-2020 para fomentar vocacións científicas: o programa D´tec, para fomentar o Deseño, a Ciencia e a Tecnoloxía entre a mocidade e que incluirá espectáculos e talleres no CIS Tecnoloxía e Deseño en Ferrol, e o programa de vocacións da Civil UAVs Initiative, a acción estratéxica da Xunta de Galicia para desenvolver o sector aeroespacial en Galicia, a través de talleres, charlas e visitas principalmente na cidade de Lugo e no Aeródromo de Rozas (Castro de Rei).
A Administración autonómica contará cun Plan de capacitación dixital do empregado público dirixido a todas as persoas que traballan nas administracións públicas galegas e que permitirá acadar o certificado galego de competencias dixitais. Así o adiantou esta mañá a directora da Amtega, Mar Pereira, na inauguración do Curso Superior de Administración Electrónica, na que tamén interviñeron a directora da Escola Galega de Administración Pública (EGAP), Sonia Rodríguez-Campos, e o presidente do Colexio de Enxeñaría en Informática de Galicia (CPEIG), Fernando Suárez.
A responsable da estratexia dixital autonómica sinalou que se está a traballar na concreción deste marco de competencias dixitais, recollido na Lei de Administración Dixital de Galicia (LEDIXGA), e que se prevé que estea regulado no 2020. Neste sentido, destacou a importancia da formación no proceso da transformación dixital e lembrou que este ano, grazas á colaboración entre a EGAP e a Amtega, a oferta formativa supera as 1.800 horas en diferentes cursos sobre Administración electrónica e seguridade.
A directora da Amtega subliñou que o acceso dos empregados públicos á formación é clave para que poidan desempeñar a súas funcións nun contexto dixital e intensificar o uso dos servizos dixitais.
O sistema de indicadores do Plan de Goberno e Administración Dixitais 2020 apunta a un incremento no uso dos servizos dixitais tanto dentro coma fóra da Administración. A nivel interno no primeiro semestre do ano os empregados públicos realizaron 4,7 millóns de consultas á Plataforma de interoperabilidade Pasaxe!, un 32% máis que en 2018; rexistráronse máis de 233.000 notificacións electrónicas, un 41% máis que no mesmo semestre de 2018 e asinaronse máis de 1,8 millóns de documentos electrónicamente, preto do dobre que o ano anterior. Por parte dos cidadáns mantense o incremento da xestións online coa Xunta fronte ás presenciais.
Por outra banda, a directora da EGAP sinalou a importancia da formación do empregado público para poder afrontar os retos tecnolóxicos e normativos que está a supoñer a administración dixital. Neste senso, destacou o proxecto Universo EGAP innova, unha nova iniciativa da Escola que ten como finalidade contribuír á implantación da administración electrónica a través dunha formación práctica, colaborativa e dinámica que implique ao alumnado. No marco deste proxecto, o pasado venres convocouse no DOG o primeiro dos E-martes, no que 50 persoas accederán a unha xornada práctica sobre o Rexistro Electrónico da Xunta de Galicia.
Un total de 80 empregados públicos participarán ata o 22 de outubro no curso inaugurado hoxe, e que lles permitirá afondar na concepción da Administración electrónica desde unha perspectiva técnico-xurídica, incidindo na importancia que ten a súa implantación nas distintas administracións da Comunidade. O curso ofrece 30 horas na modalidade semipresencial e 84 en teleformación.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...