O director da Axencia para a Modernización Tecnolóxica de Galicia, Julián Cerviño, sinalou hoxe que Galicia precisa talento especializado en ciberseguridade para continuar afrontando os retos da dixitalización. O responsable autonómico inaugurou esta mañá a xornada Ciberseguridade en Galicia: perspectiva e visión de futuro na Escola Superior de Enxeñaría Informática (ESEI) en Ourense, animando aos alumnos a explorar as oportunidades laborais que ofrece esta tecnoloxía.
O director da Axencia lembrou que en Galicia “o 30% das pemes e das grandes empresas están a demandar traballadores en ciberseguridade ou pensa facelo nun futuro”. Ademais, sinalou que en España prevese que “o mercado da ciberseguridade acade os 2.000 millóns de euros en 2024”, o que se traduce nunha alta demanda de profesionais do sector.
Cerviño incidiu en que a ciberseguridade é unha prioridade para os gobernos de todo o mundo e subliñou que “protexer a información na contorna dixital e frear a crecente ameaza da ciberdelincuencia non é unha opción, senón unha necesidade”. Por iso, destacou o esforzo da Comunidade para situarse á vangarda nesta tecnoloxía como unha das liñas de actuación da Estratexia Galicia Dixital 2030, que contempla a construción do Centro de Excelencia de Ciberseguridade de Galicia (CECIGA) en San Cibrao das Viñas.
Preto de 200 persoas participan hoxe, de xeito presencial e online, nesta xornada organizada polo Nodo CIBER.gal en colaboración co Colexio Profesional de Enxeñaría en Informática de Galicia (CPEIG) e a Escola Superior de Enxeñaría Informática (ESEI) da Universidade de Vigo, no campus de Ourense.
O obxectivo do encontro é achegar aos asistentes o forte atractivo deste sector para fomentar a creación de talento especializado, trasladarlle as oportunidades reais que supón especializarse neste eido e que poidan coñecer de primeira man o día a día dun profesional dedicado á materia. Nesta xornada colaboran entidades e persoas referentes neste ámbito como son o Instituto Nacional de Ciberseguridade (INCIBE) e Román Ramírez, coñecido experto en ciberseguridade e fundador da RootedCon, entre outros.
Ao longo do encontro abordarase a actualidade e o futuro da profesión do CISO, que é a figura responsable da xestión da seguridade e protección da información que manexa unha organización para mantela a salvagarda e previr ciberataques ou roubo de datos. Tamén se analizará a evolución e futuro do Nodo Galego de Ciberseguridade, e terán lugar obradoiros prácticos para espertar o interese pola ciberseguridade.
O CIBER.gal é un proxecto de colaboración que une ao sector público e privado para favorecer unha contorna dixital segura en Galicia e afrontar os retos aos que se deben enfrontar empresas, cidadanía e administracións públicas para protexer os seus activos no ciberespazo.
O conselleiro de Cultura, Educación, FP e Universidades, Román Rodríguez, participou esta mañá na presentación das primeiras ferramentas resultantes do Proxecto Nós, a iniciativa que traballa en incorporar o galego ás novas linguaxes dixitais. Trátase de tres aplicacións sen precedente en Galicia que permitirán a interacción en lingua galega entre as persoas usuarias e os dispositivos tecnolóxicos.
No acto, que tivo lugar no edificio Fontán da Cidade da Cultura, sede do Proxecto Nós, tamén participaron o reitor da USC, Antonio López; o director do Centro Singular de Investigación en Tecnoloxías Intelixentes (CiTIUS), Senén Barro; o director da Axencia para a Modernización Tecnolóxica de Galicia (Amtega), Julián Cerviño e a directora do Instituto da Lingua Galega (ILG), Elisa Fernández.
O titular de Cultura referiuse en concreto ao primeiro tradutor neuronal multilingüe feito en Galicia, ao recoñecedor de voz que entende o galego oral e o converte a texto e á aplicación de síntese de voz que, a partir dun texto, é quen de ler en lingua galega. Un exemplo das aplicacións desta última ferramenta xa se puido ver no anuncio institucional que a Xunta de Galicia lanzou polas Letras Galegas 2023, onde “presentamos a primeira locución da historia en lingua galega xerada por Intelixencia Artificial grazas ás capacidades desta iniciativa”, indicou Román Rodríguez.
Estes avances, do que o tradutor xa está dispoñible e os outros dous o estarán nun breve prazo de tempo para que calquera persoa, empresa ou proxecto os poida usar de xeito gratuíto, “permitirán non só reforzar a proxección exterior da nosa lingua, senón tamén a expansión económica do galego como vehículo de comunicación nos mercados globais”, engadiu o conselleiro.
Respecto aos próximos obxectivos, o representante autonómico sinalou que o Goberno galego e a Universidade de Santiago de Compostela “continuarán traballando na recompilación de voces que reflictan a gran variedade fonética e dialectal que existe por toda Galicia”, o que permitirá seguir mellorando os modelos de ferramentas actuais, ao tempo que se desenvolverán novos modelos multilingües en cooperación cos proxectos equivalentes a Nós para o resto de linguas do Estado. Ademais, “queremos fortalecer as aplicacións que se farán en eidos como o sanitario, o educativo, o asistencial...” concluíu o titular de Cultura.
Impulsado inicialmente pola Xunta e a Universidade de Santiago, o Proxecto Nós, que foi incluído no PERTE Nova Economía da Lingua, supón o maior investimento directo na promoción do galego de toda a historia de Galicia.
A este traballo a prol da inclusión da lingua galega no mundo dixital e das tecnoloxías súmanse outras accións impulsadas ou apoiadas polo Goberno galego como son a opción de configurar en galego tanto a aplicación musical Spotify como o novo modelo de calculadoras ClassWiz de Casio, así como os acordos con plataformas audiovisuais como Netflix ou Amazon Prime para incluír títulos dobrados ou subtitulados nas linguas cooficiais.
A Axencia para a Modernización Tecnolóxica de Galicia participou hoxe en Bruxelas no acto de sinatura do acordo de asociación que pon en marcha o consorcio Govtech4all para experimentar novas formas para proporcionar innovación ao sector público a través da colaboración público-privada.
O proxecto permitirá a elaboración de entre catro e seis proxectos piloto conxuntos nos que se aplique un amplo conxunto de metodoloxías de goberno intelixente. Neste contexto, e segundo explican os promotores da iniciativa, “as incubadoras, os laboratorios de innovación e os equipos dixitais de ‘Govtech’ deseñarán os desafíos a través dun enfoque de creación conxunta”. Ademais, o consorcio terá tamén como obxectivo o de crear conciencia sobre os gobernos intelixentes, dispoñer dun mapa de situación sobre o desenvolvemento das administracións dixitais e compartir as leccións aprendidas entre os socios e outros actores da UE”.
No Acordo Marco de Asociación participan axencias e empresas de 15 países europeos: España, Bélxica, Portugal, Polonia, Países Baixos, Suecia, Grecia, Letonia, Luxemburgo, Alemaña, Estonia, Dinamarca, Lituania, Francia e Italia. Por parte de España, os asinantes son o Ministerio de Asuntos Económicos e Transformación Dixital, o concello de Madrid, a Lantik (sociedade que participa en exclusiva pola Deputación Foral de Biscaia para a transformación dixital) e a Axencia para a Modernización Tecnolóxica de Galicia.
O acto desenvolvido hoxe en Bruxelas contou coa participación do comisario europeo de Orzamento e Administración, Johannes Hahn. Tamén participou como invitado o vice-primeiro ministro de Innovación de Ucraína, Mykhailo Fedorov, que acudiu á capital comunitaria para presentar o modelo ucraíno de goberno dixital e a importancia que ten a aplicación “O Estado no móbil” para manter unida á unha poboación que está a ser atacada.
Por parte da Xunta, participou na sinatura a directora da Oficina de Apoio Estratéxico e Planificación da Axencia para a Modernización Tecnolóxica de Galicia, María Bobillo, que estivo acompañada pola coordinadora técnica de Políticas Europeas da Fundación Galicia Europa, Vanessa Lobo.
No acto de hoxe tamén foron presentados os tres proxectos piloto escollidos para a primeira fase de Govtech4all sobre “Desafío das startup”, “Axuda á cidadanía europea para obter beneficios sociais dos Asistentes Persoais de Regulación (PRA), e “Seguridade da información en espazos de datos transfronteirizos”. Nesta última participa a Axencia para a Modernización Tecnolóxica de Galicia.
A Axencia para a Modernización Tecnolóxica tamén participou hoxe en Vigo na xornada sobre “O Marco Legal para a Contratación Pública de Intelixencia Artificial na Unión Europea”. Baixo o título “Contratación pública da Intelixencia Artificial: construíndo unha ponte entre a regulación europea e a necesidade rexional”, o director da Axencia autonómica, Julián Cerviño, avanzou os retos da Administración autonómica como usuario de Intelixencia Artificial, apuntando ao uso de compra pública innovadora e outras formas de colaboración para construír solucións a medida.
Neste ámbito avanzouse coa creación dun departamento de xestión de datos para establecer políticas e guías que garantan a calidade dos datos e o seu uso adecuado en futuras aplicacións de técnicas de IA. Ademais, está en vigor un Acordo Marco para a aplicación de tecnoloxías disruptivas no sector público autonómico.
O director da Axencia para a Modernización Tecnolóxica de Galicia destacou que Galicia aspira a converterse nunha rexión intelixente impulsando o desenvolvemento dunha intelixencia Artificial punteira, ética e segura que permita avanzar cara unha economía baseada no coñecemento.
Neste sentido, Cerviño destacou o papel da Estratexia Galega de Intelixencia Artificial aprobada en xuño de 2021 e a creación do nodo galicIA, que impulsou a candidatura galega para acoller a sede da Axencia Española de Supervisión de Intelixencia Artificial. Ademais, o director da Axencia autonómica lembrou que Galicia é a primeira comunidade española que está a analizar o impacto ético da aplicación de tecnoloxías no seu territorio para poder adaptar a lexislación galega a esta nova realidade.
A Fundación Vodafone España fixo entrega dos premios aos gañadores do ‘SuperReto DigiCraft’ en Galicia: O CEIP Do Foxo, na categoría de 6 a 8 anos; e o CPR Plurilingüe A Encarnación na categoría de 9 a 12 anos. O acto de entrega de premios tivo lugar no Edificio Fontán de Santiago de Compostela e contou coa participación da directora xeral de Ordenación e Innovación Educativa, Judith Fernández; o director da Axencia para a Modernización Tecnolóxica de Galicia, Julián Cerviño; e a directora xeral da Fundación Vodafone España, Gloria Pracer.
O SuperReto consiste nun concurso no que estudantes de Primaria, que forman parte do programa ‘DigiCraft no teu cole’, participan a través dun proxecto tecnolóxico onde demostran as competencias dixitais adquiridas durante o ano e poñen de relevo outras competencias transversais traballadas como a creatividade, o pensamento crítico e a colaboración.
Nesta edición do SuperReto presentáronse 28 proxectos de 20 centros educativos da rexión, que se traduciu nunha participación total de 650 alumnos e alumnas e máis de 20 docentes galegos. Deles, chegaron á final celebrada hoxe 150 alumnos e alumnas de 7 centros. Os finalistas expuxeron os seus proxectos ante un xurado técnico que elixiu aos gañadores: o CEIP Do Foxo da Estrada, na categoría de 6 a 8 anos; e o CPR Plurilingüe A Encarnación de Caldas de Reis na categoría de 9 a 12 anos, que recibiron como premio un kit tecnolóxico valorado en 300 €, un trofeo conmemorativo para o centro e material promocional para a aula.
Así, este ano o ‘SuperReto DigiCraft’ vinculouse ao tema “Misión Espacial”. Todos os proxectos entregados tiñan como fin descubrir no espazo formas de vida máis sustentables, un obxectivo relacionado co propósito de sustentabilidade de Vodafone. As aulas tiveron que resolver o reto de forma grupal, de maneira que a clase enteira tivo que crear unha máquina exploradora ou un medio de transporte interplanetario. Ademais, para cumprir cos requisitos, o proxecto debía ser interactivo e integrar o uso, de maneira protagonista, de polo menos un material tecnolóxico dos incluídos nos kits DigiCraft.
Os centros educativos galegos que participaron na final do ‘SuperReto DigiCraft’ son: CPR Plurilingüe A Encarnación, de Caldas de Reis (Pontevedra); CPI Plurilingüe Virxe da Cela, de Monfero (A Coruña); CPI Plurilingüe O Cruzamento, de Cerceda (A Coruña); CEIP Nicolás do Río, de Cedeira (A Coruña); CPR O Castro, de Vigo (Pontevedra); CEIP Ramón Falcón, de Castro de Rei (Lugo); e CEIP Do Foxo, da Estrada (Pontevedra).
Os dous centros gañadores participarán na SuperFinal Nacional o 14 de xuño, que se celebrará na sede de Vodafone en Madrid e á que acudirán o resto dos equipos gañadores das diferentes Comunidades Autónomas. De entre eles, escolleranse aos dous equipos gañadores a nivel nacional, un na categoría de 6-8 anos e outro na categoría de 9-12 anos.
Gloria Pracer, directora xeral da Fundación Vodafone España, subliñou: “A terceira edición do SuperReto DigiCraft en Galicia pon de manifesto os froitos da colaboración da Xunta e a Fundación e o firme apoio de ambas as institucións pola innovación educativa, apostando pola adquisición de competencias dixitais a través do xogo e a experimentación desde idades temperás”.
O director da Axencia para a Modernización Tecnolóxica de Galicia, Julián Cerviño, sinalou que “que fai máis de dez anos a Administración autonómica galega iniciou un proceso de transformación da educación para adaptala ás necesidades dun mundo dixital”. Cerviño subliñou que a iniciativa DigiCraft “complementa o esforzo de toda a comunidade educativa para consolidar a educación dixital que necesitamos”.
A directora xeral de Ordenación e Innovación Educativa subliñou a importancia de programas coma o DigiCraft para potenciar “as competencias dixitais” entre os máis novos, de quen destacou “o alto nivel de creatividade, como comprobamos hoxe neste evento”. Judith Fernández ratificou o compromiso da Xunta co desenvolvemento das competencias STEM e o fomento das vocacións científico-tecnolóxicas desde as aulas con iniciativas como os Polos Creativos.
O programa ‘DigiCraft no teu cole’ en Galicia leva xa tres anos en funcionamento, con presenza en 180 centros educativos da rexión, chegando este ano a 8.500 alumnos e alumnas e 400 docentes formados en competencias dixitais. A rexión foi pioneira en España na implantación deste programa no curso 2019-20 en 50 colexios, o que pon de manifesto o compromiso coa innovación educativa por parte da Xunta de Galicia e a súa sostida motivación en promover as competencias dixitais dos máis pequenos e pequenas.
DigiCraft é unha iniciativa da Fundación Vodafone España que, mediante a colaboración coas Consellerías e Departamentos de Educación das Comunidades Autónomas, preséntase nas aulas como ‘DigiCraft no teu cole’, un programa formativo que pretende dotar de competencias dixitais ao alumnado de Primaria e os seus docentes, espertando o interese polas tecnoloxías máis emerxentes, a través do xogo e a experimentación.
O Nodo CIBER.gal organiza, en colaboración co Colexio Profesional de Enxeñaría en Informática de Galicia (CPEIG) e a Escola Superior de Enxeñaría Informática (ESEI) da Universidade de Vigo, a xornada “Ciberseguridade en Galicia: perspectiva e visión de futuro”, o vindeiro martes 13 de xuño.
O CIBER.gal é un proxecto de colaboración que une ao sector público e privado para favorecer unha contorna dixital segura en Galicia e afrontar os retos aos que se deben enfrontar empresas, cidadanía e administracións públicas para protexer os seus activos no ciberespazo.
A xornada, que terá lugar na Escola Superior de Enxeñaría Informática de Ourense, ten como obxectivo achegar aos asistentes o forte atractivo deste sector para fomentar a creación de talento especializado, trasladarlle as oportunidades reais que supón especializarse neste eido e que poidan coñecer de primeira man o día a día dun profesional dedicado á materia. Nesta xornada colaborarán entidades e persoas referentes neste ámbito, como son o Instituto Nacional de Ciberseguridade (INCIBE) e Román Ramírez, coñecido experto en ciberseguridade e fundador da RootedCon, entre outros.
Totalmente de balde, as persoas interesadas poderán inscribirse en modalidade online ou presencial en todas as actividades do programa. Entre elas, destacan unha mesa redonda na que se abordará a actualidade e o futuro da profesión do CISO, que é a figura responsable da xestión da seguridade e protección da información que manexa unha organización para mantela a salvagarda e previr ciberataques ou roubo de datos, obradoiros prácticos para espertar o interese pola ciberseguridade e, tamén, a presentación da Estratexia Galega de Ciberseguridade 2030, a cargo da Axencia para a Modernización Tecnolóxica de Galicia. Todas elas serán celebradas en horario de mañá o martes 13 de xuño.
Nos vindeiros días, publicarase o detalle da xornada no novo espazo web do Nodo CIBER.gal, albergado en ciberseguridadegalicia.gal, e facilitaranse as indicacións para inscribirse á xornada.
O Nodo CIBER.gal tamén anuncia a data de celebración do xa terceiro encontro CIBER.gal, os días 8 e 9 de novembro, na Cidade da Cultura de Galicia, agardando un éxito similar ao de anteriores edicións nas que se superou a participación de máis de 4.000 escolares en concursos de ciberseguridade e xerou preto de 2.000 inscricións.
Ademais, recentemente aprobouse na VI Comisión de Seguimento do Nodo CIBER.gal a incorporación de sete novas entidades ao ecosistema de colaboración. Entre elas, atópanse Accenture, Ays Innova, Coren, Hijos de Rivera, Inditex, Microsoft Ibérica e SIA. Todas elas súmanse ao espazo de colaboración que agrupa a máis de 50 entidades públicas e privadas comprometidas coa sensibilización e capacitación en ciberseguridade de Galicia, a mellora do nivel de ciberseguridade na comunidade, e o fomento de talento especializado para salvar o desaxuste existente entre oferta e demanda laboral neste campo.
No seu marco, tamén se constituíu e puxo en marcha o grupo de traballo da cidadanía, que deseñará e executará iniciativas destinadas ás ANPAs de Galicia, clubes deportivos, menores e persoas maiores, entre outros. O fin de todas elas é común, facerlles ver a importancia de ser precavidos no emprego da rede e dotalos de boas prácticas e ferramentas para combater a ciberdelincuencia na nosa comunidade.
A Comisión de Seguimento do nodo de intelixencia artificial de Galicia (nodo galicIA) reuniuse esta semana en Santiago de Compostela e acordou un modelo operativo baseado en capítulos sectoriais e capítulos transversais.
Entre os obxectivos deste modelo atópase o de coordinar esforzos para optimizar os recursos dispoñibles e lograr un maior alcance das accións desenvolvidas sobre intelixencia artificial na nosa comunidade. Ademais, centralizarán o coñecemento, fomentarán a colaboración público – privada e facilitarán a planificación.
Cada un dos capítulos disporá da súa propia comisión de seguimento. En concreto, nesta reunión foi aprobada a creación dos capítulos sectoriais de sanidade e competitividade e innovación. Tamén foi acordada a creación dun capítulo transversal sobre ética e normativa que será coordinado pola Axencia para a Modernización Tecnolóxica de Galicia.
Os responsables do nodo acordaron tamén a creación dun comité de expertos que asesorará á Xunta para un desenvolvemento ético e fiable desta tecnoloxía.
O nodo galicIA está formado pola Vicepresidencia Primeira e Consellería de Economía, Industria e Innovación; a Consellería de Facenda e Administración Pública; a Consellería de Cultura, Educación, Formación Profesional e Universidades; a Consellería de Sanidade e a Axencia para a Modernización Tecnolóxica de Galicia; así como pola Comunidade de Traballo Galicia Norte de Portugal; a Universidade de Santiago de Compostela, a Universidade da Coruña e a Universidade de Vigo.
Este órgano, que se encarga de velar polo cumprimento da Estratexia Galega de Intelixencia Artificial (EGIA), foi o encargado de preparar a candidatura de Galicia para acoller a sede da Axencia Estatal de Supervisión de Intelixencia Artificial (AESIA).
O Comité de expertos asesores de IA estará formado por profesionais de prestixio internacional recoñecido nos ámbitos da economía, a filosofía e evolución humana, a socioloxía, a tecnoloxía aplicada e o dereito.
A súa función será a de asesorar, informar e formular recomendacións á Xunta de Galicia a través da incorporación do coñecemento, as boas prácticas identificadas e unha visión integral cara a deseñar accións en materia de IA. En concreto e, entre outras, a elaboración de recomendacións para proporcionar asesoramento sobre a aplicación ética no desenvolvemento e emprego da IA con respaldo da normativa europea; o asesoramento para o impulso de accións formativas e de concienciación; o asesoramento para o deseño dunha folla de ruta para a potenciación das competencias STEM vencelladas á IA; ou o asesoramento en materia de avaliación do impacto da IA nos sectores produtivos, a Administración pública e a sociedade.
O Comité de Expertos formará parte, xunto cos integrantes do nodo, do capítulo transversal sobre ética e normativa. Entre os obxectivos deste capítulo atópase o de velar pola preservación da privacidade dos datos, a explicabilidade do funcionamento dos sistemas de IA e a neutralización de prexuízos. Este grupo encargarase da supervisión de guías e manuais de boas prácticas por sectores; o marco ético para o desenvolvemento da IA nas Administracións públicas de Galicia e os códigos de conducta e guías de adopción da IA.
O sector tecnolóxico galego creou 1.063 postos de traballo en 2022, un 5,1 % máis que o ano anterior, acadando os 21.803 empregados. Ademais, a Comunidade supera a cifra das 3.000 empresas tecnolóxicas, o 4,5 % do total estatal, e ocupa novamente a quinta posición no conxunto do Estado por numero de empresas TIC. O peso do sector na economía galega reflíctese no seu Valor Engadido Bruto con máis de 1.740 millóns de euros, que supón o 2,97 % do PIB total de Galicia.
Son parte das cifras que analiza o estudo “Empresas TIC sobre a Sociedade da Información en Galicia. Edición 2022”, elaborado polo Observatorio da Sociedade da Información en Galicia (Osimga), adscrito á Axencia para a Modernización Tecnolóxica de Galicia, en base aos últimos datos rexistrados do sector e a unha enquisa onde se recollen os indicadores asociados a este sector.
O estudo sinala que catro de cada dez empresas TIC levaron a cabo actividades I+D+i durante o período 2019-2021, o que supón un 32,8 % máis que no período 2018-2020. Destas empresas o 76,3 % obtivo resultados comercializables.
No ano 2022, o 34,8 % das empresas tecnolóxicas galegas impartiu formación en tecnoloxías da información e comunicación ao seu persoal. A Ciberseguridade (40,3 %) e os Contornos de programación (38,6 %) son as dúas áreas de maior interese formativas nas empresas do sector.
A tecnoloxía disruptiva con máis presenza nas empresas TIC galegas é a Internet das Cousas (IoT) cunha porcentaxe do 36,5 %. O 31,9 % das empresas TIC galegas analizan Big Data, cun crecemento do 41,8 % respecto ao ano anterior.
O 29,9 % das empresas TIC galegas utiliza ou incorpora aos seus produtos ou servizos Business Intelligence e o 32,2 % emprega Chatbots. Respecto á IA, o 28,1 % das empresas TIC galegas utilizan Intelixencia Artificial o que supón un crecemento do 30,1 % no último ano.
A tecnoloxía de acceso a Internet máis contratada polas TIC galegas é a fibra óptica, co 72,6 % de cota de mercado. A velocidade de conexión continúa a mellorar e o 83,4 %, dispón dunha velocidade de conexión igual ou superior a 100 Mbps, cun crecemento do 2,2 % no último ano.
O 74,9 % das empresas TIC fixeron compras de bens ou servizos na rede en 2022, cun peso do 59,6 % sobre o total das compras das empresas que utilizan esa canle. O 26,9 % vende a través da rede, e o seu peso acada o 56,1 % do importe facturado por estas empresas. O 62,2 % das tecnolóxicas galegas emprega servizos de Cloud Computing, o que supón un crecemento do 6% respecto ao 2021.
Respecto á presenza en internet, no 2022 un 87,5 % das empresas TIC galegas conta con páxina web e o uso de redes sociais acadou o 48 %, cun crecemento do 12,4 % nos últimos dous anos.
Crece a porcentaxe de empresas do sector tecnolóxico que envían ou reciben facturas electrónicas. No 2022, o 67,8 % das empresas TIC galegas envían facturas electrónicas e o 38,9 % recíbenas, o que supón un 25,8 % e 13,7 % máis que o ano anterior.
O 24,8 % das empresas galegas dedicadas ás TIC sufriu un incidente de seguridade durante o ano 2022. Os intentos de estafa e os ataques de virus foron os incidentes máis frecuentes entre as empresas que tiveron problemas coa ciberseguridade. O primeiro (intentos de estafa) creceu un 14 % no último ano.
Os resultados detallados do estudo están dispoñibles na web www.osimga.gal.
A Rede CeMIT, liderada pola Axencia para a Modernización Tecnolóxica de Galicia, participa nos actos conmemorativos do Día de Internet, que se celebra o 17 de maio, baixo o lema “Cidadanía dixital dereitos e oportunidades”, organizados pola Asociación Somos Digital.
CeMIT desenvolverá unha sesión online para responsables de centros de competencias dixitais, en colaboración co GaiásTech, sobre a “Inclusión dixital: a tecnoloxía como ferramenta de accesibilidade para a cidadanía”, que terá lugar mañá, 9 de maio, en horario de 10:00 a 12:00 horas.
Durante esta xornada, dirixida pola mestra en pedagoxía terapéutica e psicopedagoga Sara García, trataranse temas como o Deseño Universal para a Aprendizaxe (DUA), piar fundamental para o cambio cara á inclusión na formación.
A través desta sesión, a Rede CeMIT da continuidade á súa labor de impulso e mellora das competencias dixitais da cidadanía, así como a súa autonomía á hora de empregar a tecnoloxía, poñendo en valor o traballo realizado polo persoal dinamizador das súas aulas.
A programación formativa compleméntase con outras dúas propostas impulsadas desde a Asociación Somos Digital. A primeira delas será o Escape Room “Cidadanía Dixital e Dereitos Dixitais na aula”, ao que se poderá acceder desde os centros de competencias dixitais de toda España entre o 16 e o 30 de maio. Trátase dunha actividade interactiva que permitirá realizar unha viaxe polo “Mundo Dixital”, realizando preguntas sobre que é a Cidadanía Dixital e cales son os dereitos dixitais que garanten o acceso, o uso responsable e a seguridade no uso diario da tecnoloxía.
O ciclo de webinars terá lugar entre o 4 e o 19 de maio e agrúpase en 4 temáticas: cidadanía dixital inclusiva, cidadanía dixital segura, cidadanía dixital e e-Administración e cidadanía dixital e dereitos, que responden á actividade de promoción e acompañamento aos distintos grupos de poboación que veñen realizando os centros de competencias dixitais.
O 17 de maio é a data designada pola ONU para a conmemoración a nivel mundial do proxecto de dinamización social que se constrúe ao redor das novas tecnoloxías. O Día Mundial da Sociedade da Información celébrase anualmente e serve para dar a coñecer mellor a importancia que ten este recurso mundial e, en especial, as posibilidades que poden ofrecer as TIC á sociedade e á economía e as diferentes formas de reducir a fenda dixital.
A porcentaxe de matriculados en carreiras STEM no Sistema Universitario Galego incrementouse un 3,6% en dous anos e preto do 80% dos titulados neste área seguen a traballar en Galicia cinco anos despois de rematar os seus estudos. Así se desprende dos datos do estudo “Talento dixital: estudo da traxectoria profesional dos perfís STEM de Galicia. Edición 2023”, elaborado polo Observatorio da Sociedade da Información en Galicia (Osimga), da Axencia para a Modernización Tecnolóxica de Galicia, que analiza a evolución destes perfís profesionais durante o período 2019-2023.
Os datos sinalan que Galicia está a incrementar a súa capacidade para xerar vocacións tecnolóxicas e tamén para reter talento. En dous anos o número de persoas matriculadas en carreiras STEM pasou de 12.996 matriculacións a 13.469. Ademais, preto do 80% das persoas tituladas en carreiras STEM está a traballar en Galicia aos cinco anos de finalizar os seus estudos. A porcentaxe de titulados neste área que optan por traballar fóra de Galicia nos cinco primeiros anos da súa traxectoria laboral pasou do 24,7% no 2019 ao 20,3% no 2021. Ademais, os egresados en STEM presentan un alto grao de satisfacción cos estudos universitarios e máis do 90% volvería a cursar a mesma titulación.
A fenda dixital de xénero segue presente nos estudos STEM e é especialmente acusada na FP, na que as mulleres só representan o 12,4% do alumnado. No bacharelato o 47,5% do alumnado de “Ciencias e tecnoloxía” son mulleres pero na universidade esta porcentaxe queda no 34% a pesares de que en ambas etapas formativas as mulleres son, globalmente, máis do 55% do alumnado.
Por titulacións, as mulleres son minoría nas carreiras de enxeñerías e tecnolóxicas (informática, industrial e telecomunicacións). Son maioría nas Ciencias Naturais e en Matemáticas partían dunha situación igualitaria pero van perdendo peso no alumnado a medida que neste grao é máis difundida a súa relación coas tecnoloxías da información.
Respecto ao nivel de inserción laboral, o estudo sinala que o 87% das persoas tituladas na área STEM en Galicia está traballando aos cinco anos de titularse, cun crecemento do 4,1% respecto a dous anos antes. Resulta salientable que a inserción laboral das mulleres acada o 87,3% e supera lixeiramente á dos homes 86,6%.
Por outra banda, o tempo para acadar un posto de traballo entre os universitarios STEM en traballos relacionados reduciuse en máis de mes e medio.
O estudo reflicte tamén a aceleración da dixitalización no tecido produtivo e o aumento da demanda de tecnólogos e científicos en todos os sectores. Con todo, o sector TIC é a principal fonte de emprego para as persoas tituladas STEM (23,8%) seguido pola industria non TIC (16%) e as empresas non TIC de enxeñaría e servizos a empresas (13%). En cuarto lugar o sector público (Administración xeral, educación e sanitaria) emprega ao 12,6% de egresados.
As principais tarefas relacionadas coas tecnolóxicas máis disruptivas que están a desenvolver titulados STEM son Mobilidade, Tecnoloxías Cloud, Big Data, Ciberseguridade, Intelixencia Artificial, Tecnoloxías verdes, Internet das Cousas e Biotecnoloxía.
A estes roles súmanse as ocupacións máis “tradicionais” de titulados STEM como estratexia e xestión do Negocio no sector TIC, programación, desenvolvemento web e administración de sistemas, mantemento e xestión de redes, webs e sistemas informáticos e docencia en materias STEM.
As ocupacións emerxentes ou relacionadas con tecnoloxías disruptivas que máis aparecen na descrición dos empregos dos STEM son nos campos de Análise e ciencia de datos, Biotecnoloxía e Medio ambiente.
O 81,1% das empresas TIC que ofertan emprego para titulados STEM, indican que cubrir estes postos é difícil ou moi difícil.
En canto aos perfís concretos do persoal que demanda o sector TIC, máis do 48% das empresas TIC de Galicia busca perfís relacionados coa programación, desenvolvemento de aplicacións e desarrolladores de software en xeral; máis do 20% busca profesionais relacionados coas Tecnoloxías Cloud, a Xestión do dato e a Ciberseguridade; e máis dun 18% das empresas tecnolóxicas están demandando na actualidade perfís con coñecementos en Intelixencia Artificial.
Os resultados detallados do informe están dispoñibles na web www.osimga.gal.
O conselleiro de Facenda e Administración Pública, Miguel Corgos, referiuse hoxe a Galicia como un escenario de oportunidades para profesionais e empresas tecnolóxicas durante a clausura do congreso Ecosystems, que reuniu na Coruña a expertos mundiais neste ámbito.
Corgos apelou á visión estratéxica e ao traballo conxunto e coordinado entre a Administración, o coñecemento –representado polas universidades e centros de investigación–, a sociedade e os sectores privados para converter Galicia nun territorio especializado en tecnoloxía e con capacidade para crear, reter e atraer talento dixital. A especialización tecnolóxica constitúe o eixo transversal da Estratexia Galicia Dixital 2030.
Nesta liña, referiuse aos nodos como exemplo dese traballo conxunto. E citou o nodo CIBER.gal, un espazo de intercambio e diálogo no que coinciden máis de 50 entidades, entre elas, a Xunta, como promotora da iniciativa, as catro deputacións provinciais e os concellos; ou o nodo galicIA de Intelixencia Artificial, cunha importante implicación do sistema universitario público de Galicia.
Así mesmo, salientou a importancia do traballo conxunto e coordinado no proceso de selección convocado polo Estado que vai permitir que Galicia acolla a primeira axencia nacional europea de supervisión da intelixencia artificial; unha colaboración, aseverou, construtiva e xenerosa por parte de todos que permitiu a elaboración dun proxecto de país.
O conselleiro de Facenda e Administración Pública aproveitou a súa intervención na clausura do Congreso de innovación tecnolóxica Ecosystems 2030 Summit, para agradecer aos participantes a súa asistencia e a súa contribución para consolidar Galicia como lugar de concentración do coñecemento europeo sobre Intelixencia Artificial.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...