A Axencia para a Modernización Tecnolóxica de Galicia (Amtega) pon en marcha o ciclo formativo “A Intelixencia Artificial no día a día”, para achegar esta tecnoloxía e as súas vantaxes á cidadanía, centrándose especialmente nas persoas maiores de 55 anos.
As sesións teñen unha duración de 90 minutos e desenvolveranse entre os meses de outubro a novembro de xeito presencial nas aulas da Rede CeMIT de A Coruña, Celanova, Guitiriz, Moaña, Ortigueira, Santiago e Vigo.
O obxectivo desta formación é achegar a un público sen coñecementos específicos na materia as nocións e características básicas da Intelixencia artificial (IA), o seu impacto no día a día das persoas e visibilizar as súas vantaxes a través de casos de uso, dun xeito sinxelo e accesible.
As sesións estrutúranse en catro bloques temáticos, comezando por unha introdución ao concepto de Intelixencia Artificial, a través da presentación de exemplos prácticos e a posta en valor das vantaxes do seu uso. Ademais, farase un repaso polas aplicacións máis cotiás que empregan esta tecnoloxía e a súa contribución á sociedade. Finalmente, farase unha aproximación ás posibles aplicacións futuras, principios éticos e revisión dos avances na súa regulación.
Este itinerario formativo enmárcase nas actuacións da Estratexia Galega de Intelixencia Artificial 2030 (EGIA2030), que establece nas súas liñas estratéxicas que a cidadanía sexa a principal beneficiaria da IA, para o que é preciso que conte coa formación e capacitación necesaria para entendela e usala con medidas que abrangan desde a adquisición de competencias básicas, ata a formación para persoal altamente cualificado.
As persoas interesadas en asistir a estas formacións poderán inscribirse comunicándose directamente co centro da Rede CeMIT do seu interese, ou a través da web. Xúntase o calendario de actividades e as ligazóns de inscrición en cada centro.
O director da Axencia para a Modernización Tecnolóxica de Galicia, Julián Cerviño, destacou hoxe en Vigo, que o traballo desenvolvido pola Xunta no marco da Estratexia Galicia Dixital 2030 (EGD2030) está no camiño de acadar o obxectivo de especializar á nosa Comunidade no desenvolvemento dunha intelixencia artificial confiable e humanista na vangarda europea.
Cerviño participou, está mañá, na mesa redonda “Desafíos e oportunidades na transformación dixital de Galicia”, que formou parte dos actos de celebración do 50º Aniversario da implantación da tecnolóxica Seresco na nosa Comunidade. No debate, tamén participaron a vicepresidenta do Circulo de Empresarios de Galicia, María Borrás; o director xeral de Gradiant, Centro Tecnolóxico de Telecomunicacións de Galicia, Luis Pérez Freire; e o catedrático da Universidade de Vigo e director de atlanTTic, Martín Llamas. A mesa foi moderada pola xornalista Gladys Vázquez.
O director da Axencia, dependente da Consellería de Facenda e Administración Pública, destacou o obxectivo transversal da EGD2030 de avanzar cara á especialización tecnolóxica de Galicia a través da creación, atracción e retención de talento dixital e o traballo conxunto co sistema universitario, os centros de investigación e o sector TIC. Cerviño enmarcou neste obxectivo a próxima instalación na Coruña da Axencia Estatal de Supervisión da Intelixencia Artificial (AESIA).
Lembrou que a presentación de Galicia ao proceso de selección da AESIA foi promovido dende un primeiro momento dende a Xunta, que máis tarde recibiu o mandato unánime do Parlamento de elaborar unha candidatura e seleccionar unha localización.
Na mesma liña de especialización en IA, Cerviño anunciou ás persoas asistentes ao acto que a Xunta traballa nun anteproxecto de lei de Intelixencia Artificial que está en proceso de consulta.
O director da Axencia destacou que perseguir o obxectivo de especialización é posible grazas ao grao de madurez dixital alcanzado por Galicia coa aplicación de dúas axendas dixitais entre 2009 e 2020, que ten continuidade coa EDG2030. Resaltou que no último Índice de Competitividade Rexional da Comisión Europea, Galicia está bastante por enriba da media comunitaria en preparación tecnolóxica, cunha puntuación de 123,8 (na que 100 é a media das rexións da UE).
A Xunta abre hoxe a consulta pública previa da futura Lei de planificación, organización e impulso da intelixencia artificial (IA) en Galicia para recoller as suxestións e achegas que a cidadanía e entidades públicas e privadas poderán realizar ata o vindeiro 15 de outubro a través do Portal de Transparencia da Administración autonómica.
A futura lei galega de IA buscar crear unha regulación única, sistemática e coherente, que permita un uso eficaz, eficiente, ético e seguro da intelixencia artificial na Administración Xeral e do sector público autonómico (SPAG), aliñada co marco europeo, que establecerá a Lei de Intelixencia Artificial.
A norma galega busca introducir unha serie de medidas para establecer un marco legal uniforme para o deseño, adquisición, implementación e uso de sistemas de IA na Administración xeral e do SPAG e fixa os principios éticos reitores do deseño, adquisición e implantación dos sistemas de IA en Galicia.
Ademais, a futura lei busca recoñecer á cidadanía, con carácter vinculante, unha serie de dereitos, en relación cos sistemas de IA empregados polo Administración pública autonómica galega; fomentar a colaboración público-privada e potenciar as oportunidades existentes a nivel autonómico, estatal e internacional no eido a IA, especialmente coa futura Axencia Estatal de Supervisión de Intelixencia Artificial (AESIA), así como aumentar a capacidade para atraer e reter talento e persoal cualificado a Galicia.
O texto do anteproxecto de lei foi presentado esta semana á Comisión de Seguimento do nodo galicIA, que se encarga de velar polo cumprimento da Estratexia Galega de Intelixencia Artificial (EGIA), e foi o encargado de preparar a candidatura de Galicia para acoller a sede da AESIA.
O nodo galicIA está formado pola Consellería de Economía Industria e Innovación; a Consellería de Facenda e Administración Pública; a Consellería de Cultura, Educación, Formación Profesional e Universidades; a Consellería de Sanidade e a Axencia para a Modernización Tecnolóxica de Galicia; así como pola Comunidade de Traballo Galicia Norte de Portugal; a Universidade de Santiago de Compostela, a Universidade da Coruña e a Universidade de Vigo.
A apertura da consulta pública da futura Lei de planificación, organización e impulso da intelixencia artificial en Galicia é un paso máis no marco da ruta establecida Estratexia Galicia Dixital 2030 para incorporar as tecnoloxías disruptivas na Comunidade.
No caso da IA, Galicia foi unha das tres primeiras Comunidades autónomas españolas en aprobar unha estratexia propia de intelixencia artificial (a EGIA), ademais foi designada como sede da primeira axencia estatal de supervisión da intelixencia artificial que se crea en Europa. Nesta designación foron esenciais a madurez dixital da rexión, a concentración de coñecemento en torno á Intelixencia Artificial a través de centros singulares de investigación; os dous ‘hubs’ de innovación; e o peso dun sector tecnolóxico con máis de 3.000 empresas e 21.800 empregados.
Esta mañá deu inicio o Curso superior de Administración electrónica, unha actividade deseñada para reforzar a formación en competencias dixitais do persoal empregado público galego.
Este curso, convocado pola Escola Galega de Administración Pública e en colaboración coa Axencia para a Modernización Tecnolóxica de Galicia e o Colexio Profesional de Enxeñaría en Informática de Galicia, formará a 70 persoas sobre o desenvolvemento normativo que regula a administración dixital e as súas ferramentas.
O obxectivo é mellorar as competencias dos empregados públicos nesta materia, para que poidan asumir con facilidade novos procedementos de traballo e conseguir unha Administración máis eficiente, transparente e accesible.
Así o expresou a directora da Escola, Sonia Rodríguez-Campos, durante a inauguración da actividade, na que tamén incidiu no elevado peso que ten a formación en competencias dixitais dentro dos plans formativos da Escola, a cal conta cunha ampla programación nesta área, tanto para o persoal das administracións como para a cidadanía. Neste senso, destacou os e-martes, xornadas de formación práctica presencial dun día de duración sobre as transformacións tecnolóxicas, organizativas e lexislativas derivadas da administración electrónica que se convocan de xeito frecuente.
Durante as sete semanas de docencia, o curso superior iniciado hoxe afondará en materias específicas como o réxime xurídico da administración dixital, o funcionamento da sede e o rexistro electrónicos, a seguridade da información, a cooperación interadministrativa, a automatización dos procesos ou a identidade dixital, entre outros. Todos estes contidos contribuirán a mellorar o servizo ofrecido polo persoal empregado público á cidadanía.
O Centro GaiásTech da Cidade da Cultura acolleu onte e antonte as xornadas finais do ciclo de Obradoiros de verán “Girl STEAM” no que participación preto de 30 rapaces e rapazas. A esta cifra súmanse os máis de 260 rapaces e rapazas de entre 8 e 15 anos que participaron entre os meses de xullo, agosto e setembro nos obradoiros de carácter práctico e presencial nas aulas CeMIT de 14 concellos de toda Galicia.
O programa, enmarcado no convenio de colaboración entre a Axencia para a Modernización Tecnolóxica de Galicia e o Colexio Profesional de Enxeñaría Técnica en Informática (CPETIG), comezou en xullo na aula CeMIT de San Sadurniño e continuou nas aulas de Betanzos, Ribeira, Ortigueira, A Estrada, Celanova, Cuntis, Guitiriz, Valga, Barreiros, Ribadeo, Vigo, Santa Comba e Oroso.
Os contidos dos obradoiros deseñáronse atendendo a dúas franxas de idade. Nos obradoiros de experimentación tecnolóxica, o alumnado de 8 a 11 anos elaborou pezas audiovisuais en formato ‘stop motion’ a partir dun circuíto de luces led creado por eles mesmos. Por outra banda, as actividades destinadas aos rapaces e rapazas de 12 a 15 anos, centráronse na creación de tecidos intelixentes, mediante a programación de sensores con arduino para construír un proxecto sobre unha prenda téxtil que reaccionaba a cambios de distancia, luz, inclinación etc.
Con estes obradoiros búscase impulsar actividades de mentorado desde idades temperás dirixidas ás rapazas para espertar o seu interese nos estudos STEAM (siglas en inglés de Ciencia, Tecnoloxía, Enxeñería, Artes e Matemáticas) e apostar por profesións do ámbito tecnolóxico.
No desenvolvemento dos obradoiros trasladáronse mensaxes relativos á igualdade, ao sentido crítico ante a tecnoloxía e ao uso creativo da mesma, á colaboración, ao traballo en equipo e á importancia das artes como ferramenta de desenvolvemento.
O Concello de Valga deu continuidade á súa formación tecnolóxica para a rapazada neste remate de agosto, logo das sesións de hai uns días das que falamos. Fíxoo na Aula CeMIT, onde se impartiu un novo obradoiro sobre últimas tecnoloxías dirixido á mocidade local: unha actividade de divulgación dirixida a potenciar o desenvolvemento das competencias tecnolóxicas asociadas ás ciencias, introducindo a creatividade e empregando materiais innovadores relacionados coa arte que resulten atractivos para os participantes.
No novo obradoiro déronse cita un grupo de mozos de entre 12 e 15 anos aos que a docente Paula Tubío explicou como funcionan os circuítos eléctricos para que, despois, eles mesmos puxeran en práctica o aprendido con figuras en papel. Ademais, divididos en grupos, tamén gravaron as súas propias curtametraxes en formato stop motion. Empregando papel, luces LED e outros materiais, crearon as súas propias personaxes coas que foron xerando movemento.
Este obradoiro forma parte dun programa de actividades impulsado pola Axencia para a Modernización Tecnolóxica de Galicia (AMTEGA) en colaboración co Colexio Profesional de Enxeñaría Técnica en Informática (CPETIG). O seu obxectivo é “espertar vocacións tecnocienfíticas entre a mocidade e reforzar as súas capacidades en ámbitos coma a ciencia, a enxeñaría ou as matemáticas a través de obradoiros nos que aprender e experimentar”.
A Cruz Vermella e a Axencia para a Modernización Tecnolóxica de Galicia (AMTEGA) únense en Mos para integrar a persoas maiores na contorna dixital. Farano a través da xira Enredando Tour, que chegará á localidade pontevedresa o vindeiro xoves 31 de agosto con obradoiros lúdicos de capacitación para romper a fenda dixital. O propósito, en palabras do Concello, é “enredar” a persoas maiores no universo das novas tecnoloxías dunha maneira lúdica, ofrecéndolles a degustación dun “menú tecnolóxico” á súa medida.
A xira, que está a percorrer un total de 20 localidades galegas este verán, busca “reducir a fenda dixital entre a poboación e loitar contra os procesos de exclusión social por motivos económicos, de xénero, de idade, nivel educativo ou zona de residencia, entre outros”. A iniciativa recalará en Mos o vindeiro xoves 31 de agosto en horario de 10.30 a 12.30 horas. Esta actividade está organizada por Cruz Vermella no marco do convenio de colaboración coa AMTEGA para a execución do programa formativo itinerante en competencias dixitais.
Nesta ocasión, está especialmente dirixida a persoas maiores de 55 anos (aínda que aberta a calquera persoa que queira participar), ás que se apoia para que aprendan conceptos básicos do uso das tecnoloxías, así como para derrubar os temores e inseguridades que poidan ter respecto diso. Talleres de capacitación dixital e menús formativos. Mediante unha furgoneta superequipada ofrécense contidos formativos vinculados ás novas tecnoloxías. Nela transpórtanse os smartphones, portátiles, tabletas, altofalantes intelixentes… e todo tipo de accesorios para facilitar ese achegamento á realidade da tecnoloxía máis doméstica e presente en multitude de áreas da nosa vida cotiá. En cada unha das localidades onde recale o circuíto organízanse varios obradoiros relacionados cos menús existentes. Cada persoa participante pode “pedir” formarse nun ou varios contidos de cada menú.
O concelleiro de Facenda e Novas Tecnoloxías de Narón, Román Romero, anunciou este luns 21 de agosto a apertura do prazo de inscrición para dous cursos tecnolóxicos que se impartirán na Aula CeMIT de Xuvia. O edil informou que se trata das accións formativas Internet e informática básica e Xestión de Recursos Humanos (RRHH). As persoas interesadas en anotarse poden inscribirse a través das ligazóns específicas de cada curso. As sesións impartiranse, en ambos casos, do 11 de setembro ao 24 de outubro.
O curso de Internet e informática básica terá unha duración de 120 horas e impartirase en quenda de mañá, de 9.30 a 13.30 horas. Entre os temas abordar inclúense os fundamentos da informática, que é un computador, hardware e software, elementos dun computador, introdución ao sistema operativo, uso do procesador de texto e introdución a Internet, á Web 2.0 e á Administración Electrónica.
En canto ao curso de Xestión de RRHH, terá tamén unha duración de 120 horas, que se impartirán neste caso en quenda de tarde, dende as 16.00 ata as 20.00 horas. As alumnas e alumnos terán a oportunidade de abordar temas como definición do posto de traballo, definición de perfís laborais, competencias e formación, normativa laboral, seguridade social e cotizacións, liquidación do recibo de salarios, liquidación de cotizacións e aplicacións informáticas de xestión de RRHH.
A Axencia para a Modernización Tecnolóxica de Galicia abre a convocatoria de axudas para a realización de proxectos que teñan por obxectivo a realización de actividades de difusión e fomento do uso do software e hardware libre en Galicia, segundo publica hoxe o Diario Oficial de Galicia (DOG). Esta convocatoria de carácter bienal comprende as anualidades 2023 e 2024 e está dotada con 60.000 euros.
Poderán acollerse a estas subvencións as asociacións galegas de persoas usuarias de software libre, coñecidas como AGUSL, que estean formadas por persoas físicas, correctamente rexistradas no rexistro de asociacións de Galicia, e que teñan recollido nos seus estatutos, como un dos seus obxectivos principais, a difusión ou fomento do software e hardware libre.
O prazo de presentación, segundo se recolle nas bases, é de 1 mes dende hoxe, día de publicación no DOG. A solicitude terá que facerse a través da sede electrónica da Xunta de Galicia, ou a través do procedemento AP400E e achegando a documentación correspondente, segundo especifican as bases da convocatoria. As asociacións interesadas poden contactar coa oficina de software libre da Axencia para a Modernización Tecnolóxica de Galicia para calquera aclaración que precisen ou axuda no proceso.
Terán a consideración de actuacións subvencionables os proxectos ou actividades destinadas ao fomento do uso do software e hardware libre na Comunidade Autónoma de Galicia, en concreto as que encaixen nos seguintes puntos:
Esta convocatoria de subvencións enmárcase dentro das actuacións que a Axencia desenvolve anualmente no Plan de acción en materia de Software Libre, que define a senda das políticas e das actuacións a desenvolver para o incremento do uso do Software Libre en Galicia, nos ámbitos empresarial, da administración pública e da cidadanía, sempre dentro do marco da Estratexia Galicia Dixital 2030.
Dende que no ano 2010 a Xunta de Galicia puxera en marcha, por primeira vez en Galicia, un plan específico orientado ao fomento do Software libre, na Comunidade téñense conseguido grandes avances na súa adopción e uso nos diversos ámbitos da nosa sociedade.
Os eixos principais de actuación para o fomento de solucións tecnolóxicas baseadas en software libre teñen como obxectivos o fortalecemento do sector empresarial galego, o achegamento de software libre ao conxunto da sociedade e o fomento da reutilización do software na administración pública.
A Concellería de Novas Tecnoloxías do Concello de Redondela que xestiona Antonio Cabaleiro desenvolverá durante os meses de setembro, outubro e novembro, a través das Aulas CeMIT de Redondela e Chapela, cursos totalmente gratuítos dirixidos ao público en xeral. Estas actividades formativas abranguerán diferentes ámbitos da informática como creación de blogs, edición de fotografías, creación de álbums e presentacións, e trámites coa administración online.
Para estes cursos ofértanse en diferentes horarios máis de 130 prazas para diferentes cursos e horarios na aula de Redondela, cun total de 16 postos e na de Chapela con 12 postos. En ámbolos dous casos as prazas serán asignadas por estrita orde de inscrición, sendo o prazo de inscrición do 16 de agosto ao 5 de setembro.
Aula CeMIT Redondela os luns e mércores
Aula Aberta: obradoiros para adultos
Aula CeMIT Chapela os martes e xoves
Aula Aberta: obradoiros para adultos
Segundo engadiu o Concello, as instancias para participar nos cursos, con matrícula aberta dende o mércores 16 de agosto ata o 5 de setembro, pódense recoller na páxina web de Redondela, no Centro de Formación A Marisma (ao carón da Piscina Municipal) e no Multiusos da Xunqueira en Redondela. En Chapela pódense solicitar nas Dependencias dos Servizos Sociais.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...