Onte presentáronse na Casa das Campás de Pontevedra os obradoiros dunha iniciativa da que falamos os días pasados, salientando o seu importante obxectivo de fortalecer o galego nas redes sociais e entre as novas xeracións e destacando, tamén, o feito de ser unha proposta impulsada por múltiples entidades (as nosas tres universidades e unha manchea de concellos). Trátase dos cursos de Youtubeir@s, o concurso de vídeos galegos e en galego, destinado a facer que a Rede sexa un pouco como a nosa casa e unha xanela para que os demais nos vexan. Segundo fixeron saber onte o Concello de Pontevedra e a Universidade de Vigo, dúas das entidades co-impulsoras, trátase de facer fincapé na xuventude, a futura depositaria do galego.

Na presentación da media ducia de obradoiros, que comezan esta semana, participaron Alberto Oubiña Piai, concelleiro de Normalización Lingüística en Pontevedra e Manuel Morquecho, director da área de Extensión Cultural do Campus de Pontevedra. Segundo recalcaron, o reto consiste en “encher a Rede de vídeos en galego”. E non dun xeito calquera, senón de maneira “dinámica e entretida”. Oubiña e Morquecho tamén lembraron que ao abeiro do dito concurso existen dúas categorías, Vídeo-facermos e Vídeo-opinarmos, dotados con premios de 1000 euros, así como catro mencións honoríficas de 500 euros. Toda esta información, recordaron, está na páxina web da iniciativa, youtubeiras.gal.

Polo que atinxe aos obradoiros, achegan vinte prazas e artéllanse en dúas sesións. Na primeira sesión formativa, dunha hora de duración, abordaranse os consellos básicos para sacarlle o maior partido á cámara dos dispositivos móbiles e consellos para transmitir as mensaxes no vídeo (guión). Na segunda sesión formativa, de dúas horas de duración, editarase o material e aprenderase a subilo a YouTube. “Entre ambas as dúas sesións”, dixeron, “hai unha semana durante a que o alumnado poderá traballar nos seus vídeos, con asistencia en liña para calquera dúbida que poda xurdir ata antes da segunda sesión formativa”. En Pontevedra haberá seis obradoiros formativos organizados pola área de Normalización Lingüística da Universidade de Vigo e pola Concellaría de Normalización Lingüística do Concello de Pontevedra. O primeiro, o 8 e o 15 de febreiro, será na Facultade de Ciencias da Comunicación. O segundo, o 8 e o 15 de marzo, será na Casa das Campás. O terceiro desenvólvese os días 13 e 20 de marzo, no Centro Social do Gorgullón (colabora a Asociación de Veciños Eduardo Pombal). O cuarto, o xoves 30 de marzo e o 6 de abril, é na Casa da Cultura de Lérez (colabora a Asociación San Bieito de Lérez). Os obradoiros quinto e sexto serán actividades dirixidas ao alumnado dos IES de Pontevedra: o 15 e 22 de febreiro para o IES Sánchez Cantón e os días 16 e 23 de febreiro para o IES Torrente Ballester. As accións formativas estarán impartidas pola produtora audiovisual Illa Bufarda. Con elas, díxose na presentación de onte, “búscase achegar o proceso creativo a calquera persoa que poida estar interesada e facer accesíbel o uso das redes socias e da linguaxe audiovisual para a transmisión de saberes e opinións”.

Como deben ser os vídeos

Os vídeos deben ter unha duración máxima de 5 minutos, estar licenciados en creative commons (licencia aberta, feita para produtos que se queren compartir e co requisito de acreditar de autoría), producidos en galego e estar habilitados na rede social YouTube. Os e as participantes poderán concorrer a dúas categorías: Vídeo-facermos (para videotitoriais que amosen como facer cousas) e Vídeo-opinarmos (para vídeos nos que se achegue unha opinión ou valoración sobre calquera tema.

Cada unha destas categorías vai ser premiada cunha contía de mil euros e tamén se asignarán catro mencións honoríficas de cincocentos euros segundo os criterios de valoración que terá en conta o xurado, composto por profesionais da comunicación audiovisual.

Youtubeir@s”, fixeron saber os organizadores do certame a respecto dos seus obxectivos, “ten a vontade de incrementar o uso do galego nos contidos audiovisuais dunha das redes sociais máis empregadas no mundo, a segunda con meirande nivel de uso despois de Facebook, e tamén quere incitar e facilitar que todas as persoas compartan as súas habilidades e criterios con vídeos autoproducidos”. Youtubeir@s é unha iniciativa dos servizos de normalización lingüística dos concellos da Baña, A Coruña, Ames, Carballo, Mazaricos, Ourense, Pontevedra, Ribadeo, Santiago de Compostela, Teo e O Grove; e tamén das Universidades da Coruña, Santiago de Compostela e Vigo.

O pasado mes de xuño o espazo de coworking Sende en Lobeira (Ourense) acolleu o primeiro Hackathon For Refugees organizado por Impact Hub Vigo e Espazo Arroelo para achegar ideas de impacto que dean resposta ás necesidades dos refuxiados e das organizacións que os axudan. Os proxectos nos que traballaron na primeira edición estaban Game for Change (unha plataforma tipo chat para conectar refuxiados con voluntarios, establecendo vencellos a través de xogos colaborativos), GPS Barcos (un sistema de xeolocalización baseado en dispositivos móbiles para monitorizar o seguimento de barcos) e Apoyo a Red Alert (un protocolo de coordinación de voluntarios).

En vista do éxito da primeira edición os seus organizadores preparan unha segunda, polo que convocan para os días 4 e 5 de marzo na sede do Impact Hub Vigo (na rúa Policarpo Sanz 21, 2ª), onde preténdese construír un ambiente de debate e intercambio de ideas no que crear sinerxías que permitan desenvolver solucións prácticas a problemas reais. A inscrición ao Hackthon for refugees está aberta a través de Ticketea e pretende congregar a programadores informáticos, activistas, xornalistas, creativos, avogados, estudantes, voluntarios e profesionais de ONG no desenvolvemento de solucións a favor dos refuxiados.

Quen desexe máis información sobre este encontro de participación altruísta pode visitar a súa páxina web oficial, na que detallan a iniciativa que ten marcado como obxectivo xuntar a 50 desenvolvedores para levar a bo porto 8 proxectos.

Depo en marcha está novamente “en marcha”. Así o confirmou onte a presidenta da Deputación de Pontevedra, Carmela Silva, quen explicou en que consiste este programa (unha serie de actividades para os maiores da provincia e para favorecer neste colectivo o envellecemento saudable) e máis os detalles da nova edición do mesmo (fornecendo un mínimo de 100 obradoiros, incluíndo entre as súas oito temáticas unha específica vencellada ás novas tecnoloxías da información: En rede). A titular da Deputación tamén fixo saber que a convocatoria 2017 deDepo en Marcha, a segunda da súa andaina, vén cun orzamento de 120.000 euros. Amais das TIC, os participantes nas actividades terán oportunidade de ampliar os seus coñecementos de gastronomía, artesanía, actividade física ou medio ambiente.

Carmela Silva manifestou na presentación da segunda edición do programa que “vivimos nunha sociedade cada vez máis envellecida, que precisa de servizos, plans e programas adaptados ás súas necesidades”. A fío disto, Silva engadiu que Depo en marcha ten “por finalidade favorecer o envellecemento activo das persoas da provincia a través de obradoiros cos que se quere contribuír a optimizar as oportunidades de saúde, participación e seguridade da terceira idade, así como establecer relacións sociais, favorecer a participación en actividades que melloren o seu estado anímico, potenciar movementos de participación e cooperación social, promover espazos de encontro e intercambio de experiencias e favorecer a independencia das persoas maiores para evitar o seu illamento e situacións de soidade”.

A través da área En rede, un dos oito bloques temáticos do programa, os participantes coñecerán o funcionamento de Internet, así como do correo electrónico, do teléfono móbil e da informática, tanto a nivel iniciación coma avanzado.
Os máis de 100 obradoiros que oferta a Deputación de Pontevedra van dirixidos a entidades de persoas maiores, xubiladas e pensionistas da provincia. As entidades interesadas en beneficiarse das accións previstas deberán presentar a solicitude de participación nun prazo de 20 días a partir do día seguinte ao da publicación do extracto da convocatoria no BOPPO.

O vindeiro día 24 celebrarase o 180º aniversario do nacemento de Rosalía de Castro, e a Asociación PuntoGal quixo aproveitar o momento para, en colaboración coa Fundación Rosalía, iniciar unha promoción que durará todo o mes, dende a que é posible rexistrar novos dominios .gal por prezos de entre 4,15 e 5 euros + IVE a través dos rexistradores adheridos á promoción (Dinahosting, Entorno Digital, Host Europe, Don Dominio, Nominalia, Arsys, CDMon, OVH.com e Openprovider) tal e como detallan na páxina web da Asociación PuntoGal.

A iniciativa foi presentada en Padrón na sede da Fundación Rosalía de Castro nun acto no que estiveron presentes a directora xeral de PuntoGal, Edita de Lorenzo, o presidente da Fundación Rosalía, Anxo Angueira, o presidente de PuntoGal, Manuel González e Valentín García, secretario xeral de Política Lingüística. Anxo Angueira sinalou que «A Fundación está orgullosa desta colaboración porque Rosalía é un emblema de Galicia e polo tanto tamén unha boa embaixadora do .gal». Pola súa banda, Manuel González celebrou a colaboración entre as entidades e dixo que «PuntoGal leva no seu ADN traballar en prol da cultura e da lingua polo que seguiremos a traballar en accións como a que hoxe presentamos con estas e outras institucións da nosa comunidade».
O secretario xeral de Política Lingüística, Valentín García, animou a toda a cidadanía «a sumarse ao dominio .gal para contribuír a ampliar e reforzar a marca identitaria de Galicia no universo da internet e amosarlle ao mundo que as galegas e os galegos temos un compromiso sólido coa lingua e a cultura propias do noso país e coa súa proxección».

Un prezo para axudar a dar visibilidade a Galicia na Rede

Se ben a día de hoxe aínda non é posible igualar o prezo do .gal ó dos dominios máis populares, a Asociación fai este esforzo para que todas aquelas persoas que queiran visibilizarse na Rede, vinculándose á comunidade galega, poidan facelo a un prezo moi asequible para todos. «PuntoGal acaba de superar os 3.500 dominios rexistrados, unha cifra relevante e ilusionante», sinalou Edita de Lorenzo. De todas maneiras, «aínda queda camiño por facer. Temos que aumentar o número de dominios para afrontar unha reducción permanente e significativa no prezo». A Asociación amósase igualmente satisfeita de que as porcentaxes de renovación dos dominios sexan moi altas.
Acompañando á rebaixa no rexistro de dominios .gal iniciarase unha campaña nas redes sociais na que presentarase a Rosalía cuns versos adaptados para a ocasión.

A Universidade de Vigo informou esta semana do desenvolvemento dun proxecto europeo no que participa e que tería a finalidade de pór en marcha o que sería, nas súas palabras, “o primeiro depósito europeo de materiais educativos audiovisuais”. O proxecto Up to University, Up2U (Bridging the gap between schools and universitys trough informal education) comezou a súa andaina en 2015 e está financiado no marco do programa H2020 da Unión Europea con cinco millóns de euros. Os seus socios son 18 entidades dunha ducia de países, sendo a UVigo a única representante de España xunto coa firma local Teltek. Ao longo dos vindeiros tres anos o consorcio participante traballará na creación “dun ecosistema de docencia virtual audiovisual”. Será un recurso de apoio no ensino que todos coñecemos, o tradicional. Agárdase que teña unha incidencia moi positiva facilitando aos alumnos o chimpo de secundaria ás universidades.

Detrás deste proxecto, impulsándoo e impulsando tamén a concorrencia viguesa, atópase o ex-reitor Domingo Docampo, comisionado para o Campus Dixital do Mar, quen informa a posta en marcha do devandito “ecosistema de docencia virtual” iría encamiñado aos escolares de idades comprendidas entre os 11 e os 19 anos. Polo que respecta á empresa viguesa Teltek, está especializada en achegar solucións e tecnoloxías abertas de vídeo, videoconferencias, streaming e formación a distancia. A súa colaboración coa Universidade materializouse coa prestación do Campus Multimedia da institución docente galega.

Volvendo ao proxecto Up2U, apóiase na base xerada polo portal eduOER (Open Educational Resource of GEANT), un acubillo con diferentes pezas audiovisuais catalogadas a disposición dos usuarios e usuarias. O impulso de Up2U dará como resultado a conversión do devandito portal “nunha contorna de aprendizaxe”, onde consultar vídeos, pero tamén contidos máis elaborados como coleccións temáticas ou unidades didácticas completas, pensadas especificamente para o alumnado de secundaria. “Fixemos un portal adaptado para que aos docentes, e tamén aos propios rapaces, lles sexan doados de localizar e visualizar, tanto dende os ordenadores como dende tabletas e móbiles, o material que precise entre máis de 40.000 obxectos educativos en diferentes idiomas, agora daremos un paso máis na estruturación de todo ese material”, explica Vicente Goyanes, responsable de Teltek.

A idea, sinalan Docampo e Goyanos, é “conseguir suavizar o chimpo dos estudantes do instituto á universidade, pois tanto en España como no resto de países de Europa hai cada vez máis problemas para que os alumnos e alumnas que acceden á universidade se poñan ao nivel necesario para poder aproveitar ao máximo o plan docente dun grao”. E engaden: “Pretendemos que ese salto, que xa se constatou que existe, sexa máis doado coa creación dun ecosistema de docencia virtual audiovisual no que traballen xuntos profesores da universidade e de educación secundaria na creación de contidos moi visuais, empregando plataformas de docencia en liña”, explica Goyanes.

Socios centrados nos datos e no software aberto
Dos 18 socios que participan no consorcio, cinco son redes nacionais, que representan ao conxunto dos seus respectivos países (Italia, Portugal, Grecia, Israel, Hungría...); oito son universidades, entre elas a Open University, institución de referencia a nivel mundial no uso das novas tecnoloxías na educación e docencia virtual; está o CERN, Organización Europea para a Investigación Nuclear; e dúas empresas, unha firma alemá de sofware libre, OwnCloud, e Teltek.