O pasado venres, 10 de febreiro, a sede da Deputación da Coruña celebraba as II Xornadas de Adiccións sen Substancia, convocadas pola Asociación AGALURE coas que colabora a área de Servizos Sociais da Deputación da Coruña. Este encontro centrouse na difusión e prevención como ferramentas para a eliminación das adicións sen substancia ou comportamentais. Pola súa banda, a responsábel da Área de Servizos Sociais da Deputación da Coruña, Ánxela Franco, agradeceu na súa intervención inicial o traballo desenvolvido por AGALURE á hora de facer visíbel unhas "adiccións que todo o mundo coñece mais ás que, en moitas ocasións, non se lles dá a relevancia que merecen, en especial en tempos como os que vivimos que se está a dar un notábel incremento co uso das redes sociais e Internet", o que repercute, tamén, no medre dos malos hábitos.

E indo ás xornadas, dicir que se levou a cabo unha charla coloquio Adiccións sen substancia. Ludopatía, compras compulsivas, rede sociais, móbiles; co psicólogo clínico de AGALURE, José Manuel Recouso Ramos; outro relatorio foi Xogo Responsábel, de Máximo Enrique Gutiérrez, presidente de FEJAR, amais da intervención de Gerardo Rodríguez Velo, secretario da Asociación que falou do seu labor como instrumento de prevención.

Francisco Gil, de Agalure, sinalaba que: "Pensamos que co tratamento non abonda e decidimos que tiñamos que adicarnos tamén á difusión das adiccións sen substancia, enfermidades que non son recoñecidas pola sociedade", engadiu ao tempo que fixo fincapé na necesidade de traballar cos centros de ensino e agradeceu á área de Servizos Sociais da Deputación a colaboración á hora de traballar polo seu coñecemento social. Alertou tamén de que as novas xeracións van "a moitísima máis velocidade" no uso das novas tecnoloxías, o que está a reverter nun incremento das dependencias.

A asociación AGALURE botaba a andar hai máis de vinte anos na Coruña, nacía con vontade de facer fronte á ludopatía, pero coa chegada das novas tecnoloxías, as redes sociais e o uso do teléfono móbil, ampliaron o seu labor de axuda a estas outra áreas.

A Asociación Galega de Graduados e Enxeñeiros Técnicos de Telecomunicación (AGGETT), entidade profesional de recente creación, vai organizar os días vindeiros un interesante e ambicioso encontro sobre as posibilidades dos vehículos aéreos non tripulados, coñecidos como UAV ou drons. O congreso DIC Galicia''17 celebrarase na cidade de Ourense os días 31 de marzo, 1 e 2 de abril. A idea de AGGETT é a de “ofrecer mesas redondas nas que se falará da lexislación neste ámbito dos vehículos aéreos, do futuro do sector e das súas aplicacións por parte das firmas e entidades da nosa terra”. Ademais, o evento centrará parte do seu programa en casos concretos de uso e integración tecnolóxica dos drons. A maiores, haberá unha competición e máis un obradoiro de tecnoloxías aéreas a disposición do público en xeral.

O congreso, que xa ten programa provisional para informarnos dos principais contidos a tratar e, tamén, dos persoeiros que formarán parte das actividades, inaugurarase o venres 31 cunha sesión de apertura oficial na que intervirán Salustiano Mato, reitor da Universidade de Vigo, José Javier Medina, decano-presidente do COGITT, José Manuel Martínez Pérez, presidente da AGGETT e delegado destas entidade en Galicia. A continuación arrincarán diferentes mesas de presentacións a cargo de relatores expertos, entre os que se contan representantes de AESA, a Asociación Española de Drons (AEDRON), o Colexio de Enxeñeiros Xeomáticos da Comunidade de Madrid, a Garda Civil en Galicia, a Escola de Enxeñaría de Telecomunicación da Universidade de Vigo, a Escola de Enxeñaría de Aeronáutica e do Espazo da UVigo. Tamén se darán a coñecer presentacións de aplicacións profesionais a cargo de empresas como EGATEL, Prosegur (DroneService) ou Marine Instruments. O evento, que se vai desenvolver en ExpoOurense, contará co patrocinio do Colexio Oficial de Enxeñeiros Técnicos de Telecomunicación, o COITT. Colaboran Caldaria e ExpoOurense.

O CiTIUS (Centro Singular de Investigación en Tecnoloxías da Información) vai organizar os días vindeiros unha sesión monográfica de probas e experimentación sobre as diferentes tecnoloxías avanzadas das que podemos dispor para xestionar e manexar un vehículo aéreo non tripulado e, tamén, para procesar a información que o vehículo nos forneza. A xornada de demostración tecnolóxica UAVlab desenvolverase na sede do CiTIUS o vindeiro 24 de febreiro, con horario de 10.00 a 14.00 horas.

A xornada, que segue o ronsel das recentes edicións da iniciativa Inside The Lab, será un encontro de portas abertas para os profesionais da nosa contorna empresarial científico-tecnolóxica. Entre as tecnoloxías exhibidas ó longo do UAVlab, os visitantes poderán asistir a demostracións de solucións deseñadas para a pilotaxe autónoma de vehículos aéreos non tripulados mediante visión artificial, a reconstrución 3D da contorna a partires de imaxes, ou a identificación de superficies a partir de imaxes hiperespectrais (LiDAR), entre outras. Segundo informa o CiTIUS, tódalas solucións amosadas nesta xornada “teñen o seu fundamento en resultados de investigación punteiros ó máis alto nivel, situándose nalgúns casos coma os mellores do mundo”. Para participar nesta xornada, teremos que cubrir o formulario publicado na web do evento. A inscrición fica aberta até o 22 de febreiro.

O Concello de Fene está a organizar actividades para favorecer durante o ano en curso o que se coñece como envellecemento activo a través das novas tecnoloxías da información. Trátase do programa de accións Tardes Activas, un variado feixe de propostas que inclúe entre os seus bloques temáticos a introdución e o manexo das novas ferramentas, co fin de contribuír a mellorar a calidade de vida das persoas maiores e, tamén, a ampliar a súa formación e os seus xeitos de empregar o tempo de lecer. Tardes Activas, que é un programa itinerante, vén da man da Concellaría de Benestar Social e Igualdade de Fene. Prolongarase dende este mes de febreiro até decembro.

As Tardes Activas están estruturadas en catro obradoiros distintos. A veciñanza poderá participar neles de maneira indistinta, “mesmo aínda que non pertenzan á parroquia onde se impartan cando se trate de actividades itinerantes”. Un dos obradoiros trata sobre activación da memoria (“recomendable para persoas que teñen esquecementos cotiáns”, outro tratará sobre lembranzas (“traballando diferentes funcións cognitivas a través de recordar vivencias”) e outro xirará arredor dos recursos para manter a raia a aparición de demencias. A última actividade para a veciñanza da terceira idade é un obradoiro para aprender a empregar os teléfonos móbiles intelixentes, cos que, segundo sinala o Concello, “ademais de falar tamén se pode navegar por Internet, acceder ás redes sociais e mesmo dispor de aplicacións moi útiles a partir de certas idades”. O Concello, que lembra que neste caso é necesario que cada persoa leve o seu propio teléfono, sinala que este obradoiro desenvolverase nas mañás dos venres entre as 11 e as 13.00h. a partir do 24 de febreiro. O curso impartirase na aula de formación municipal situada na avenida Naturais de Fene nº 44, entresollado.

Hai dez meses botaba a andar o Centro do Coñecemento de La Molinera de Ourense, "un elemento dinamizador e promotor da creatividade, tanto desde o punto de vista persoal como profesional" e unha "xanela aberta á innovación, creatividade e incorporación das novas tecnoloxías", segundo palabras do alcalde de Ourense, Jesús Vázquez. Proba disto é que neste mes de febreiro La Molinera achegará obradoiros de robótica para nenas e nenos, formación en comunicación dixital para mozas e orientación para as persoas interesadas en montar unha empresa dixital.

Máis polo miúdo, as actividades programadas en La Molinera consistirán nun Networking Startup, que converterá á cidade en punto de encontro entre a mocidade, administracións, empresas e universidade; e a xornada Novas canles de empregabilidade, na que se abranguerán temas como a marca persoal e a vídeo presentación persoal.

Asemade, este espazo adicado ás novas tecnoloxías que é La Molinera quere abrir novos vieiros de traballo para a mocidade, e nesta liña insírese o programa Xoves inspiradores. Así, ao abeiro deste ciclo, os días 9 e 23 de febreiro haberá un obradoiro de argumentación e debate; mentres que o 16 de febreiro realizarase outro obradoiro de redes sociais.

En canto aos máis novos, están previstos os obradoiros: Team makers kids, adicado á robótica, programación e proxectos dixitais; e o obradoiro educacional Arquimakers-kids.

Alén disto, La Molinera abre o prazo para os cursos da aula CeMIT (que neste mes de febreiro estará centrada nos obradoiros de Deseño e Impresión 3D) e para a creación dunha tenda a través de Internet. Aproveitando a presentación dos cursos que se celebrarán en febreiro, este martes o alcalde de Ourense facía fincapé na participación de La Molinera na Semana Europea do Emprendemento, unha actividade que se realiza en máis de 40 países (do 6 ao 10 de febreiro), sendo Ourense e Pontevedra "as únicas cidades galegas" que participan neste foro.