A Universidade de Santiago vai festexar o Día Internacional da Muller e a Nena na Ciencia, este 11 de febreiro, cun “nutrido programa de actividades” que porán o foco na Rede e en mostrar a traxectoria de científicas e tecnólogas que se atopan en diversos intres da súa carreira. A mesa De nenas a investigadoras: o camiño da ciencia busca achegar as experiencias de investigadoras de diferente perfil e etapa profesional na USC, co obxectivo de promover vocacións STEM (Ciencias, Tecnoloxía, Enxeñaría e Matemáticas) entre as rapazas novas. Esta actividade terá lugar en liña a partir das 10.00 horas do próximo 11 de febreiro. As inscricións poden formalizarse online.
Investigadoras en fase predoutoral, posdoutoral, xefas de grupo e directivas dos catro centros singulares da USC contarán as claves, anécdotas e logros das súas traxectorias, a fin de espertar a chamada da ciencia en nenas e mozas que decidan orientar a súa formación cara a diferentes ámbitos da ciencia. Moderada pola responsábel de comunicación do Instituto Galego de Física de Altas Enerxías (IGFAE), Elena Mora, a mesa de debate contará coa participación de Paula López, directora adxunta do Centro Singular de Investigación en Tecnoloxías Intelixentes (CiTIUS); María Jiménez, investigadora principal do Centro Singular de Investigación en Química Biolóxica e Materiais Moleculares (CiQUS); Catarina Allegue Toscano, investigadora posdoutoral do Centro Singular de Investigación en Medicina Molecular e Enfermidades Crónicas (CiMUS); e María José Gómez, investigadora predoutoral do IGFAE. A dimensión de xénero dende unha óptica europea centrará a xornada que a Oficina de Igualdade de Xénero da USC impulsa este 11 de febreiro.
A sesión, que se desenvolverá en formato virtual a través de Teams, será inaugurada a partir das 17.10 horas pola vicerreitora de Igualdade, Cultura e Servizos, Mar Lorenzo Moledo. No acto inaugural tamén tomarán parte Susana López Abella, secretaria Xeral da Igualdade da Xunta de Galicia; e Ana Jesús López Díaz, presidenta da Asociación de Mulleres Investigadoras e Tecnólogas en Galicia (AMIT-Gal). Moderada pola profesora Alba Alonso Álvarez, a continuación desenvolverase a táboa redonda Dimensión de xénero en Horizonte Europa coa participación de Lina Gálvez Muñoz, eurodeputada-vicepresidenta da Comisión de Industria, Investigación e Enerxía; Elena Domínguez Cañas, vicepresidenta de Relacións Internacionais do CSIC; e Lorena Fernández Álvarez, directora de Identidade Dixital da Universidade de Deusto.
A Universidade de Vigo vai celebrar con actividades online o Día Internacional da Muller e a Nena na Ciencia, que se conmemora este día 11 de febreiro. Así, os tradicionais obradoiros de Elas Fan CienTec, nos que cento de rapazas se achegaban aos laboratorios do campus de Vigo, pasarán a celebrarse virtualmente, ao igual que as charlas divulgativas que se viñan organizando dentro da Iniciativa 11F en centros educativos de toda Galicia e as actividades do Centro de Investigación Mariña (CIM).
Por outra banda, a feira de Exxperimenta en Feminino non se poderá levar a cabo, pero as organizadoras optaron por ofrecer unha páxina web na “que estarán a disposición da sociedade contidos divulgativos sobre mulleres importantes da historia da man de investigadoras do Campus de Ourense”, indicaron. Todo o paquete previsto de actividades, que as docentes e investigadoras da UVigo organizan co gallo do 11-F, buscan dar visibilidade ao traballo das mulleres nestes eidos, amosar ás mozas de Secundaria exemplos de mulleres que desenvolven súa traxectoria profesional no eido da ciencia e a enxeñaría e espertar vocacións nestes campos, “especialmente masculinizados”.
Elas Fan CienTec é un programa de obradoiros científicos e tecnolóxicos para rapazas de secundaria que, nesta ocasión, contará con preto de 80 nenas de catro centros educativos da provincia de Pontevedra (IES Val Miñor, IES Rosais II, Colexio Plurilingüe Alborada e IES A Cañiza). Da man de docentes e investigadoras da Universidade de Vigo coñecerán as liñas de investigación e os laboratorios do Centro de Investigacións Biomédicas (Cinbio), a Escola de Enxeñaría de Telecomunicación, a Escola de Enxeñaría de Minas e Enerxía e a Escola de Enxeñería Industrial. De xeito paralelo, ao longo de todo o mes de febreiro, un total de 32 investigadoras e un investigador da Universidade de Vigo ofrecerán a 34 centros educativos de toda Galicia 70 charlas virtuais sobre o seu traballo e sobre o papel da muller na ciencia e na tecnoloxía. Estas enmárcanse na Iniciativa 11 de febreiro, que se organiza a nivel nacional con motivo desta efeméride. Todas estas actividades contan co apoio da Unidade de Cultura Científica e da Innovación da Universidade de Vigo na súa xestión.
Outro dos centros que se une á celebración do Día Internacional da Muller e a Nena na Ciencia é o Centro de Investigación Mariña (CIM), que organiza actividades en liña para alumnado de secundaria, tanto rapaces como rapazas, de diferentes centros educativos de toda Galicia. O programa desenvolverase o día 12 e contará, por unha banda, coa Asociación Faraxa, que reflexionará sobre a necesidade do 11-F e, por outra, coa directora da Área de Investigación da UVigo, Ana Bernabeu, que presentará os indicadores de igualdade na institución educativa e no CIM e explicará a súa experiencia persoal.
Tamén o día 11 de febreiro daranse a coñecer as e os gañadores do V Concurso de Creación Artística do Día Internacional da Muller e a Nena na Ciencia, convocado pola Facultade de Ciencias, a Escola de Enxeñaría Aeronáutica e do Espazo e a Escola Superior de Enxeñaría Informática do campus de Ourense. Nel convidábase ao alumnado de Primaria e ESO da provincia de Ourense a presentar traballos visuais ou literarios sobre as mulleres na ciencia e na enxeñaría ou nas tecnoloxías TIC. Nas anteriores edicións, estes premios entregáronse durante a celebración nestas datas da feira divulgativa Exxperimenta en Feminino, pero debido á pandemia este ano tivo que anularse a súa celebración, polo que a entrega dos galardóns do concurso queda aprazada ata que a situación sanitaria o permita.
O Concello de Brión convocou dous cursos de informática en liña, de Word e Excel, e seis obradoiros dixitais para os meses marzo e abril, unha cifra que representa o dobre dos talleres tecnolóxicos achegados na convocatoria previa.
O Goberno de Brión sinalou que en todos os casos as inscricións poderán realizarse ata unha semana antes do inicio do curso na aula CeMIT ben por teléfono, 981 50 99 08 (martes e xoves, de 10:00 a 13:00 horas) ben a través da conta de correo cemit.brion@outlook.com (achegando datos persoais e nome do curso ou do obradoiro).
Os dous cursos básicos de manexo dos programas Word e Excel terán unha duración de 40 horas e un prezo de 50 euros cada un. O Concello explicou que “por mor das restricións da COVID-19” este ano os cursos celebraranse en liña, durante os meses de marzo e abril, con titorías por vídeo-conferencia. Darase a posibilidade de obter un certificado do curso previa superación dun exame. No que atinxe aos obradoiros dixitais, a “boa resposta da veciñanza durante o ano 2020” fixo que o Concello de Brión optase por duplicar esta oferta formativa gratuíta. Trátase de pequenos obradoiros para aprender o manexo de tecnoloxías e programas moi concretos: certificado dixital, zoom, seguridade social, sede electrónica, SEPE e Chave365. A duración é de 2 horas por obradoiro, que contará con titorías por vídeo-conferencia os martes e xoves, previa solicitude da mesma por correo electrónico.
Este xoves, 11 de febreiro celebrarase unha xornada de divulgación para os colexios e institutos de Galicia, co fin de celebrar o Día Internacional da Muller e a Nena na Ciencia. O evento será ás 12.00 horas vía streaming e contará con máis de 3.000 alumnos e alumnas.
A acción está promovida polo Concello de Santiago, a través do CEXTEC e Talentia Summit e está destinada a alentar ós estudantes de entre 9 e 16 anos con información e referentes para seguir a súa formación no ámbito da ramas científica ou STEM (Ciencia, Tecnoloxía, Enxeñaría e Matemática, polas súas siglas en inglés). Cabe mencionar que este día tamén é importante para asumir o compromiso e poñer fin ao desequilibrio de xénero nestas disciplinas. De feito, o evento combinará as testemuñas e presentacións de mulleres científicas galegas relevantes no eido das STEM, con divertidos experimentos científicos. O prazo de inscrición para participar na iniciativa continúa aberto. A xornada será emitida de forma simultánea para todos os centros de ensinanza galegos que realicen o rexistro a través da web de Talentia.
O titular do Goberno galego, Alberto Núñez Feijóo, avanzou hoxe que a Xunta está a traballar na posta en marcha dun Plan de mellora da eficiencia e da calidade dos servizos públicos baseado na simplificación dos procedementos administrativos.
O obxectivo é "facilitar a implantación de iniciativas empresariais, axilizar os prazos e crear un entorno máis favorable para afrontar a reconstrución económica”, dixo, recordando que ese é o propósito que guía a futura Lei de simplificación administrativa e reactivación económica, que se está a tramitar no Parlamento, coa previsión de que se aprobe neste mes de febreiro.
Durante a clausura do acto de presentación da Estratexia Galicia Dixital 2030, Feijóo subliñou que esta iniciativa ten como finalidade implantar uns servizos públicos acordes ao século XXI, impulsar un marco xurídico adaptado á nova realidade; e aplicar as tecnoloxías disruptivas que terán un maior impacto na economía.
Nesa liña, subliñou que os 7 eixos da estratexia se desenvolverán a través de 20 programas, incluíndo iniciativas que faciliten: o desenvolvemento dun goberno e unha administración intelixente; unha sociedade dixital e inclusiva; o desenvolvemento das competencias tecnolóxicas entre a poboación e tamén no ámbito educativo; e un entorno dixital para saúde e benestar.
Apostarase, tamén, por un territorio intelixente, verde e resiliente, con plans de dixitalización no mar, no rural, así como a xestión intelixente do territorio con mecanismos áxiles de vixilancia e detección temperá de risco; a aposta por unha conectividade avanzada do territorio, que inclúa programas de infraestruturas dixitais e o fomento do transporte sostible; por unha cultura e un turismo na nova realidade, co impulso á Memoria dixital de Galicia e á conservación do noso patrimonio; e por unha economía dixital e sostible, no que se transformará o Servizo Público de Emprego e se fomentará a transición dixital para industria e empresas.
Así mesmo, como eixo transversal, impulsarase a promoción do talento e do emprendemento dixital e a proxección exterior do sector TIC. Non en van, este medrou na Comunidade máis dun 13% desde 2014, chegando a superar as 3.600 empresas, e conta con máis de 24.400 traballadores.
Para traballar en todas estas liñas, Feijóo aseverou que esta estratexia establece unha serie de metas a cumprir na fronteira do 2025, entre as que destacou que o 100% da poboación teña cobertura de Internet de máis de 100 Megabits por segundo (Mbps); que o 70% da poboación teña competencias dixitais básicas; incrementar en 25 puntos o número de persoas que compran a través de comercio dixital, pasando do 50% do 2019 ao 75%; e que a metade das empresas de máis de 10 empregados vendan por Internet.
“E estamos tamén a falar dunha estratexia que servirá para dar un pulo ás novas actividades ligadas ao dixital”, engadiu, referíndose a outros obxectivos como: que o 25% das empresas e o 50% das administracións empreguen tecnoloxías como a Intelixencia Artificial, Big Data, ou Ciberseguridade; ou a que o 20% das empresas conten con persoal especializado neses campos.
Ao longo da súa intervención, o presidente da Xunta aseverou que todo iso non sería posible sen unha cantidade de recursos á altura deste reto. Así, esta estratexia suporá o maior investimento dixital da historia de Galicia, cunha mobilización público-privada de máis de 4.000 millóns de euros ata 2027.
Serán 2.450 millóns entre fondos da Xunta e os instrumentos de financiación europeos -Next Generation e marco financeiro 2021-2027-, que xerarán un efecto panca para mobilizar máis de 1.600 millóns da iniciativa privada, calculando que “cada euro público terá un retorno de 1,42 euros e iso suporá un impacto na riqueza de Galicia de 3.500 millóns de euros”, aseverou Feijóo.
E ademais, hai que ter en conta outras implicacións importantes que conleva esta aposta como a redución do consumo de papel en máis de 4.100 toneladas; a diminución das toneladas de CO2 emitidas á atmosfera en máis de 94.000; ou un aforro de custos á cidadanía de máis de 27 millóns, grazas á redución de cargas administrativas.
Por último, e de cara a un uso seguro e adaptado á nosa sociedade, a Comunidade elaborará un Código Ético de referencia, para garantir unha dixitalización responsable.
O Día da internet Segura, 'Safer Internet Day' (SID, polas súas siglas en inglés) é un evento promovido pola rede INSAFE/INHOPE co apoio da Comisión Europea, que se celebra cada mes de febreiro co obxectivo de promover un uso seguro e positivo das tecnoloxías dixitais, especialmente entre os nenos e os novos. O SID celébrase o segundo día da segunda semana do segundo mes do ano e reúne a millóns de persoas de todo o mundo para impulsar cambios positivos e concienciar acerca da seguridade na internet, organizando distintos eventos e actividades.
Este día non só pretende a creación dunha Internet máis segura, senón unha Internet mellor, para convertela nun espazo no que todos fagamos uso da tecnoloxía de maneira responsable, respectuosa, crítica e creativa. O SID diríxese a nenos e novos, pais e titores, profesores, educadores e traballadores sociais, así como ás empresas e responsables políticos, animándoos a participar de forma activa na creación dunha Internet mellor.
A próxima edición celebrarase os días 9 e 10 de febreiro baixo o lema: "Unha Internet mellor comeza contigo: máis conectados, máis seguros".
O Colexio Profesional de Enxeñaría en Informática de Galicia (CPEIG), con motivo do Día da Internet Segura que se celebra mañá martes, ofrece unha serie de recomendacións para evitar o acceso dos menores de idade a contido inadecuado en internet e procurar un uso seguro da rede, dirixidas a pais, nais, titores ou entidades educativas, así como á industria de contidos dixitais.
Coa pandemia provocada pola covid-19, onde están limitadas as interaccións sociais, os nenos e adolescentes pasan máis tempo do habitual conectados á rede, e en moitas ocasións sen supervisión dun adulto. Por este motivo, o CPEIG explica as ferramentas existentes para tratar de evitar a exposición dos menores a este tipo de contidos.
Neste mundo hiperconectado, o presidente do CPEIG, Fernando Suárez, sinala que os menores teñen acceso a todo tipo de dispositivos intelixentes, cada vez a idades máis temperás. “Corren o risco de ver imaxes ou vídeos de contido sexual ou violento, con linguaxe impropia, e estar expostos a modas perigosas para a súa saúde e a todo tipo de informacións falsas” –indica–. Como consecuencia destas prácticas, os pequenos poden presentar danos psicolóxicos ou ter conductas perigosas.
Opcións para impedir o acceso dos menores a este tipo de contido:
Se se opta por usar un control parental, o Colexio profesional recomenda buscar información sobre o tratamento de datos destas aplicacións. Pero como estes mecanismos non son infalibles, o CPEIG aconsella a pais e nais informar aos menores sobre os riscos destas prácticas para a súa privacidade e seguridade, ademais de limitar o tempo de uso dos dispositivos. “Os controis parentais son unha axuda pero nunca deben substituír á educación dos pais e nais na casa” –lembra Fernando Suárez–.
Outra cuestión que deben ter en conta os proxenitores é o tema de subir imaxes dos fillos menores de idade á rede, unha práctica denominada shareting non exenta de riscos e que deber ser meditada previamente. Fernando Suárez destaca que é comprensible que os pais queiran compartir con outras persoas fotografías dos seus fillos por “ilusión, alegría ou mesmo orgullo”, pero incide en que debe facerse sempre de forma responsable protexendo a intimidade e seguridade dos pequenos. “Os pais e nais teñen a responsabilidade na educación tecnolóxica dos seus fillos, polo que é moi importante que eles mesmos sexan exemplo no uso de imaxes nas redes sociais” –argumenta–.
Tamén nestes meses de pandemia proliferou esta práctica de compartir nas redes sociais imaxes familiares dos menores, xa que as relacións sociais establecéronse a través das tecnoloxías polas restricións de confinamento e mobilidade.
Para facer un shareting responsable, Fernando Suárez explica que os pais e nais deben ter en conta que existen outras formas máis seguras para compartir imaxes elixindo a plataforma axeitada. Subliña que cando se comparte unha imaxe transfírese á rede máis información da que se aprecia a simple vista, xa que pode conter detalles para a xeolocalización.
A conselleira de Política Social, Fabiola García, destacou esta mañá a importancia que ten no actual contexto de pandemia aproveitar as vantaxes das novas tecnoloxías para que as persoas maiores teñan a oportunidade de seguir aprendendo, manterse activas e relacionarse. Así o sinalou na presentación da nova programación de obradoiros virtuais en liña para este colectivo que impulsan a Xunta de Galicia e a Fundación "la Caixa", na que tamén participou o subdirector xeral da entidade, Marc Simón.
Fabiola García explicou que esta iniciativa busca axudar aos maiores, que son os que están a pasar unha inquedanza maior, a manter o optimismo e a seguir amosándolles que a sociedade galega está ao seu carón. Neste caso, a programación está aberta a todas as persoas maiores de 60 anos, estivesen ou non a participar nas actividades presenciais que habitualmente se programan nos centros. Todos os obradoiros son, ademais, gratuítos.
A conselleira apuntou que un dos obxectivos desta proposta é axudar a que os nosos maiores manteñan o seu benestar físico e emocional nun momento tan complicado como o que estamos a vivir. Ante unha situación que se está a prolongar máis do que debería, sinalou a titular de Política Social, todos temos que adaptarnos e desenvolver novas iniciativas que nos permitan superar as limitacións que impón a pandemia e lograr que os maiores se sintan acompañados.
O programa inclúe actividades centradas no mantemento e mellora da saúde, o fomento do desenvolvemento persoal, a mellora das competencias dixitais e a promoción da lectura. O período de inscrición estará aberto do 15 ao 19 de febreiro, cunha solicitude máxima de tres itinerarios por trimestre e por persoa; e prevese que os obradoiros comecen a partir do vindeiro mes de marzo.
Os únicos requisitos para anotarse é contar cun dispositivo electrónico que teña conexión a internet e cámara incorporada, e unha dirección de correo electrónico. As inscricións realizaranse a través do número de teléfono 900 293 716, de luns a venres, de 10 a 18 horas.
A Asociación Compostela Monumental comezou o ano cun completo paquete de actividades formativas para impulsar o emprego e fortalecer o tecido comercial e económica do concello. O programa de cursos, moitos deles tecnolóxicos, levarase a cabo ao longo de todo este mes de febreiro. Son un total de 28 accións para autónomos e traballadores na modalidade de teleformación.
O obxectivo é ir “formando ás persoas autónomas e aos seus traballadores nun momento moi delicado por mor da COVID-19 e os distintos peches perimetrais que ordenaron as distintas administracións”. Os cursos, de distintas temáticas de interese para varios gremios e sectores comerciais e empresariais, levaranse a cabo na modalidade online para “evitar calquera tipo de risco de contaxio e ao mesmo tempo facilitar, tanto aos autónomos como aos seus traballadores unha fórmula que lles permita adquirir os coñecementos que consideren oportunos e dun modo compatible co seu quefacer cotián”.
Para poder apuntarse aos distintos cursos, deberá facerse a través da web de APE Galicia, onde se poderá seleccionar o que se estime oportuno.
Estes son os cursos de febreiro:
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...