A Cámara de Comercio da Coruña abriu o prazo de solicitudes para participar nos 125 cursos de formación que deseñou para complementar a formación de mozos, por unha banda, e de persoas maiores de 45 anos, pola outra, ao longo do primeiro semestre de 2021. Boa parte dos ditos cursos son iniciativas para facer avanzar á cidadanía en empregabilidade e capacitación tecnolóxica.
En primeiro lugar, a entidade programou 112 cursos, subvencionados ao cen por cen, que se impartirán nas modalidades online e presencial e que están dirixidos a mozos inscritos no Sistema de Garantía Xuvenil e no Programa Integrado de Cualificación e Emprego (PICE) da Cámara.
As persoas interesadas poden cursar nesta modalidade online cursos sobre inglés, emerxencias sanitarias, xestión de residuos industriais, mercadotecnia dixital, formación de formadores, desenvolvemento de aplicacións 3D, AutoCAD 3D, linguaxe XML, mecanizado ou negociación de contratación internacional, entre unha extensa oferta.
A programación presencial inclúe, pola súa banda, cursos de dixitalización de negocios, deseño 3D, vixiante de seguridade, persoal de tenda e ecommerce, fotografía, repostaría, xeadaría e panadaría ou Excel para pequenas e medianas empresas e operacións financeiras, entre outros.
Todas as actividades previstas inclúen formación orientada á procura de emprego, como participar en procesos de selección, mellorar as habilidades persoais e sociais e a utilización de Internet. Algúns deles, como o de Auxiliar de Reposición e Venda en Gran Superficie contan con prácticas en empresas con posibilidade de incorporación á mesma ao seu termo. Pola súa banda, o novo programa Emprego 45+ que a Cámara ofrece con carácter gratuíto a persoas de entre 45 e 60 anos en situación de desemprego, inclúe formación e asesoramento para mellorar as súas posibilidades de volver incorporarse ao mercado laboral. O obxectivo é “colaborar na mellora da empregabilidade deste colectivo e, en esencia, ofrecerlles un servizo de acompañamento activo que lles axude a identificar novas oportunidades laborais”. Tras coñecer de primeira man o perfil dos participantes, especialmente no relativo ao nivel de competencias dixitais, os profesionais da Cámara deseñarán o itinerario a seguir e as accións máis axeitadas para cada perfil. “A mellora das competencias dixitais será o paso seguinte no percorrido do programa, mediante accións formativas adaptadas ás necesidades de cada participante”, explicaron fontes da Cámara, engadindo que os contidos dos 13 cursos programados abranguerán desde o uso de ferramentas dixitais para a elaboración e envío de currículos, até o dominio dos habituais paquetes ofimáticos, pasando polo manexo e monitoraxe das redes sociais, traballos na nube de Google Drive, community management, ferramentas de deseño, ou elaboración e xestión de webs.
A aula CeMIT do Concello de Boiro mantén a súa actividade formativa durante o mes de marzo cunha nova oferta de cursos tecnolóxico-dixitais en modalidade online e poñendo o foco en iniciar á cidadanía nalgunhas das principais utilidades das novas ferramentas (para informarse, para comunicarse, para traballar para aumentar a súa empregabilidade). As inscricións e toda a información poden facerse a través do enderezo electrónico axentetic@boiro.org, o teléfono 981 84 26 35 ou 629 769 139.
As actividades formativas que se van impartir son as seguintes: Iniciación á informática, correo electrónico e Internet, que se vai impartir entre os días 1 e 4 de marzo, LibreOffice e Writer, que se desenvolve entre o 8 e o 11 de marzo, LibreOffice Calc, que se celebra do 15 ao 18 de marzo, LibreOffice Base, do 22 ao 25 de marzo, e LibreOffice Impress, do 29 ao 31 de marzo.
Toda a formación, co fin de garantir ao máximo a seguridade das e dos participantes, vaise impartir online.
A Xunta contará cunha rede de telecomunicacións sen precedentes que permitirá dar resposta a todas as esixencias dunha administración integramente dixital. Telefónica vén de gañar o primeiro lote do contrato da súa rede corporativa de telecomunicacións, que inclúe todas as liñas de comunicacións dos centros, o acceso a internet e a telefonía fixa por importe de 33 M€, con máis de 5,1 M€ de rebaixa sobre o importe de licitación. Desta forma, nas próximas semanas tamén se decidirá a adxudicación do segundo lote correspondente á telefonía móbil.
Isto supón un fito histórico na mellora de conectividade da rede corporativa da Xunta de Galicia, xa que o 100% dos centros disporán de fibra óptica con velocidades simétricas, de forma que contarán coas mellores tecnoloxías de conectividade existentes ata a data, tanto en canto á velocidade, como en fiabilidade e rendemento. Isto implicará que o operador faga unha enorme inversión en Galicia, achegando a tecnoloxía FTTH (fibra ata o fogar) a moitas poboacións onde era inviable contratar este tipo de servizos.
Ademais, 2.542 centros (94 % do total) contarán con, polo menos, 1 Gbps simétrico, o que incluirá a totalidade dos centros escolares, o que supoñerá un incremento de velocidade sen precedentes, especialmente na velocidade de subida, necesaria para a impartir clases en liña ou realizar videoconferencias. Tamén se inclúe un plan de mellora anual da velocidade de conexión para que o paso do tempo non poida supoñer unha limitación fronte ás melloras das tecnoloxías do futuro, podendo chegar a duplicar cada ano o ancho de banda das conexións FTTH ata 10 Gbps no 2024.
Estas melloras tamén permitirán potenciar as canles dixitais de cara aos cidadáns.Tamén cómpre destacar a mellora das liñas de respaldo, que son as que entran en funcionamento no caso de que se produza un corte na liña principal, que pasarán a dispoñer de 2.677 liñas de respaldo con velocidades de 350 Mbps ou superior, baseadas en tecnoloxías de fibra óptica e 5G, o que colateralmente supoñerá unha mellora de cobertura inalámbrica 5G en Galicia.
Para todos os casos nos que a liña de respaldo estea baseada en 5G, o operador poñerá á disposición da Xunta de Galicia unha terceira liña adicional para o tráfico de voz, de forma que, mesmo nas circunstancias máis adversas, estea garantido o servizo de telefonía IP (Protocolo de telefonía por Internet) dos centros. Esta mellora ofertada supón 1.333 liñas adicionais ao que solicita no concurso.
En telefonía fixa renovaranse todas as centrais de telefonía da rede corporativa cunha capacidade de 120 chamadas por segundo, e que implicará unha renovación moi importante dos terminais telefónicos, pasando a contar co 100% das liñas con tecnoloxía IP. Isto será un salto cualitativo moi importante que permite unha maior flexibilidade e eficiencia. Todo o sistema de telefonía será completamente redundante activo-activo, o que significa que garante que non haxa corte de servizo en ningún momento.
Neste ámbito, contémplanse as ferramentas para o emprego dos teléfonos corporativos da Xunta de Galicia desde calquera localización.
O acceso a internet corporativa tamén se ve incrementado de forma moi importante, contando desde o inicio do contrato con equipamento que permitirá chegar ata os 100 Gbps no caso de que sexa necesario.
Tamén cómpre destacar as prestacións do sistema de videoconferencias ofertado (para 58.500 usuarios), que permite organizar reunións de forma segura de ata 1.000 participantes e organizar seminarios web de ata 3.000 participantes, para todos os usuarios dos ámbitos educativo, corporativo e xustiza. Ademais, é compatible cos sistemas operativos de PC, tablets, smartphones, e tamén coa posibilidade de usar con equipos de videoconferencia de sala.
Inclúese a dotación dunha plataforma de streaming avanzado que posibilita a retransmisión de vídeos en directo, que é necesaria para accións de comunicación en liña.
Adicionalmente, a Xunta terá a posibilidade de contratar conectividade móbil a unha tarifa especial de 500 Gbps ao mes por tan só 12,71 €/mes, co obxecto de poder facilitar a conexión a alumnos de familias en situación de vulnerabilidade.
A Tecnópole (Parque Tecnolóxico de Galicia) vén de confirmar que Galiciencia, evento referencial en España e Europa en materia científica e tecnolóxica, celebrará a súa 16 edición o vindeiro mes de maio (os días 26, 27 e 28). Será novamente en liña e, desta volta, a temática a tratar versará sobre A innovación Pos-COVID a través da revolución do talento.
O obxectivo será unha vez máis achegar a ciencia á sociedade, en particular aos estudantes de Primaria, Secundaria, FP e Bacharelato, contribuíndo a espertar neles as vocacións científicas. Galiciencia conta co apoio da Xunta de Galicia, a través da Axencia Galega de Innovación (GAIN); e da Fundación Española para la Ciencia y la Tecnología (FECYT).
No marco do Día Internacional da Muller e a Nena na Ciencia (este xoves 11 de febreiro), o vicepresidente segundo e conselleiro de Economía, Empresa e Innovación da Xunta de Galicia, Francisco Conde, presentou a nova edición de Galiciencia, que, por segundo ano consecutivo, será online debido “ás restricións provocadas pola actual situación sanitaria”. Esta circunstancia, sinalou, “permite ampliala a todo o ámbito estatal, podendo chegar así a máis rapaces e rapazas interesados na ciencia, a innovación e a tecnoloxía”.
Durante a presentación, o conselleiro sinalou que “Galiciencia é talento, enxeño e creatividade”. E fixo fincapé na “ilusión que todos os anos amosan os rapaces e rapaces que participan na principal feria científica de Galicia”. Unha das principais novidades da Galiciencia 2021 é que haberá un premio especial para o mellor proxecto liderado por unha rapaza. O obxectivo desta iniciativa é contribuír á igualdade de xénero na contorna da I+D+i desde a etapa educativa, promovendo a participación e o liderado femininos nos proxectos científicos e tecnolóxicos. En canto á participación feminina nas diferentes edicións de Galiciencia, no relativo á elaboración e presentación de proxectos, os datos amosan unha tendencia á alza. Nos últimos tres anos obsérvase que a participación feminina supera á masculina, chegando a acadar o 60%.
A 81ª sesión plenaria da asemblea da Unesco, celebrada o 22 de decembro de 2015, aprobou a celebración deste día co obxectivo de promover a participación plena e en condicións de igualdade das mulleres e as nenas na educación, a capacitación, o emprego e os procesos de adopción de decisións na ciencia. Neste sentido, aposta por eliminar “toda forma de discriminación contra a muller, mesmo nas esferas da educación e o emprego (…) e promover o establecemento de políticas e plans de estudo no campo da ciencia, incluídos programas escolares, para alentar unha maior participación das mulleres e as nenas, promover as perspectivas de carreira de mulleres na ciencia e recoñecer os logros das mulleres neste ámbito”.
O Pleno da Unidade Muller e Ciencia, con motivo do Día Internacional das Mulleres e as Nenas na Ciencia, realiza a seguinte declaración froito da unión e coordinación das diversas consellerías e personalidades expertas do mundo científico e tecnolóxico que están presentes, de cara á dar a coñecer á sociedade:
Polo que é necesario seguir traballando para dinamizar e transformar o sistema de ciencia e tecnoloxía galego, a través da integración da perspectiva de xénero como estratexia de avance nun modelo de sociedade máis xusta e acorde coas necesidades da poboación.
É prioritario incrementar a presenza das mulleres nos ámbitos científico e tecnolóxico, pois unha maior presenza de mulleres na investigación contribuiría a enriquecer a actividade científica coa achega de novos temas e perspectivas.
Celebramos hoxe o Día Internacional das Mulleres e a Nena na Ciencia co compromiso de promover a participación plena e en condicións de igualdade das mulleres e as nenas na educación, o emprego e os procesos de adopción de decisións na ciencia, así como promover as perspectivas de carreira das mulleres na ciencia e recoñecer e visibilizar os logros das mulleres nesta disciplina.
A directora da Axencia Galega de Innovación (Gain), Patricia Argerey, participou esta mañá en Ponteceso na presentación do proxecto do equipo do IES Eduardo Pondal no certame CanSat, organizado pola Axencia Espacial Europea (ESA) e coordinado en Galicia pola Vicepresidencia segunda e Consellería de Economía, Empresa e Innovación, a través de Gain, e pola Consellería de Cultura, Educación e Universidade.
O concurso está dirixido a estudantes de entre 14 e 19 anos que deben realizar un mini satélite do tamaño dunha lata de refresco para levar a cabo dúas misións. O equipo Pontesat, formado por 4 alumnos e 2 alumnas do IES Eduardo Pondal de Ponteceso e titorizados por un alumno que participou na edición de 2020 do certame na que quedaron segundos, é un dos once equipos de nove centros educativos de toda Galicia que participan na fase autonómica do concurso. Está previsto que os lanzamentos para a selección do equipo gañador sexan entre o 6 e o 8 abril de 2021 no aeródromo de Rozas e o equipo gañador participará na competición nacional prevista para os días 23-25 de abril de 2021.
A Axencia Galega de Innovación participa no certame dentro do programa de fomento das vocacións no ámbito aeroespacial Voando alto, sumando vocacións, no marco do Polo Aeroespacial de Galicia. O obxectivo deste programa é formar e atraer talento cara un sector con gran potencial de futuro, como o dos drons, polo que Galicia vén apostando dende 2015.
Patricia Argerey aproveitou a visita ao centro de ensino, coincidindo coa conmemoración do Día Internacional da Muller e da Nena na Ciencia, para anunciar novas actividades que o seu departamento pon en marcha co obxectivo de espertar as vocacións
científico-tecnolóxicas entre o alumnado.
No marco do programa D´tec de fomento das vocacións científico-tecnolóxicas no ámbito do deseño, das tecnoloxías de Realidade Virtual e Aumentada, Materiais e Industria 4.0, lánzanse hoxe dúas novas actividades para desenvolver nas aulas dos centros educativos:
o proxecto escolar Creación de Mundos en Realidade Aumentada e Realidade Virtual, dirixido a estudantes dos últimos cursos de Educación Primaria (5º-6º), no que o alumnado se mergullará no funcionamento destas tecnoloxías e aprenderán a desenvolver os seus propios contidos de Realidade Virtual e Aumentada (Máis información e inscrición: https://www.cistecnoloxiaedeseno.gal/proxecto-escolar-creacion-de-mundos-ar-e-vr/) e o proxecto escolar Redeseñando o mundo, dirixido a estudantes de Educación Secundaria
(1º-4º), que levará ao alumnado a través de todo o proceso creativo implicado no deseño dun produto mentres aprenden o manexo de ferramentas dixitais (https://www.cistecnoloxiaedeseno.gal/proxecto-escolar-redisenando-o-mundo/). O prazo de inscrición destas dúas actividades estará aberto ata o 24 de febreiro de 2021.
Pola súa banda, no marco do programa Voando alto, sumando vocacións, no que xa se teñen realizado varias actividades como talleres, charlas ou a Aula Móbil Newton, este curso 2020/2021 está previsto retomar actividades como novos talleres e visitas ao Centro de Investigación Aeroportada de Rozas para amosar aos mozos e mozas as diversas opcións que lles ofrece o sector aeroespacial e dos vehículos non tripulados e lanzar o concurso artístico Civil UAVs Initiative IMAXINADRON.
Gain colabora tamén co programa EdutecEmprende da Consellería de Cultura, Educación e Universidade, que ten como obxectivo sensibilizar ao alumnado de diferentes niveis educativos no espírito emprendedor a través do coñecemento da realidade empresarial e tecnolóxica da súa contorna, así como promover a súa achega a áreas STEM. Nesta convocatoria, o alumnado de 4 centros educativos terán a oportunidade de coñecer de primeira man os proxectos e as liñas de traballo actuais do CIS Tecnoloxía e Deseño en Ferrol.
Asimesmo, a través do Parque Tecnolóxico de Galicia (Tecnópole), a Xunta vén desenvolvendo diversos proxectos vencellados ao fomento das vocacións científicas entre a infancia e a mocidade como a feira Galiciencia; STEAM Kids Tecnópole; as Aulas Tecnópole; e o campamento tecnolóxico de verán T2 W. Tamén en colaboración coa Fundación Eduardo Pondal, veñen celebrándose en Ponteceso as Aulas Isidro Parga Pondal. Precisamente, a directora de Gain aproveitou a presenza do presidente desta Fundación no acto de hoxe para destacar o importante papel que xogan este tipo de iniciativas para introducir á mocidade na investigación e espertar o seu interese pola ciencia e a tecnoloxía. Mostra delo é a motivación e iniciativa do equipo de estudantes que presentaron hoxe o seu proxecto e a propia existencia dun espazo maker no centro.
A directora de Gain lembrou que un dos obxectivos prioritarios do programa de fomento das vocacións científico-tecnolóxicas é acadar unha participación equitativa e plena da muller e da nena na ciencia. Neste senso, subliñou a importancia de celebrar efeméredes como a de hoxe para visibilizar o papel de mulleres científicas que funcionen como referentes para as xeracións máis novas e contribúan a romper os estereotipos de xénero. E puxo como exemplo á matemática e física da NASA, Katherine Johnson, que participou nalgunhas das misións espaciais máis importantes, como a a primeira misión tripulada á Lúa e animou ás mozas a seguir os seus pasos
A Universidade da Coruña formará parte un ano máis do Día Internacional da Muller e a Nena na Ciencia, que se celebra este xoves 11 de febreiro. Moitas das científicas están participando nas iniciativas promovidas pola entidade coruñesa así como doutras institucións, todas co mesmo obxectivo: lembrar e fortalecer o papel das mulleres nas comunidades de ciencia e tecnoloxía.
Segundo informou a UDC, a situación sanitaria actual obrigou a que moitas das actividades teñan que desenvolverse na Rede. Así, dende a Unidade de Divulgación Científica da UDC preparan dúas pezas audiovisuais dirixidas a escolares de Primaria e Secundaria. Nos vídeos, as investigadoras coruñesas falan da súa traxectoria científica, a través da iniciativa Atrévete a pescudar con elas!, que ten como obxectivo achegar as estudantes e que envíen preguntas ás científicas ata o 19 de marzo. Os vídeos poderán verse a través da canle de Youtube da Universidade. Ademais, desde o Campus Innova presentaron unha iniciativa a través das redes sociais que presentaban a algunhas das súas científicas.
Por outra banda, o Instituto Universitario de Estudos Marítimos uniuse á conmemoración, e o vindeiro venres 12 de febreiro ás 17:00 horas celebrará o debate aberto A Ciencia navega pola igualdade. A través deste faladoiro mostrarán a importancia da muller para o desenvolvemento da economía azul. Así, seis mulleres, da talla da pioneira en investigación na Antártida Carmen Piñeiro, provenientes do sector da náutica, a ciencia e o deporte, intercambiarán opinións sobre a actualidade do sector e a situación da muller neste campo. O encontro poderá seguirse a través dunha ligazón específica en Zoom.
Por último, cabe destacar a participación de numerosas científicas da UDC nas iniciativas que están a dar a coñecer a ciencia da man de mulleres. É o caso do ciclo da ciencia é feminino Recoñéceas, no que unha decena de investigadoras protagonizan diversos obradoiros dirixidos a centros educativos de toda Galicia ou a iniciativa da Asociación Española de Investigación sobre el Cáncer, Coñéceas, que a través de 100 conexións en liña en toda España, visualizou ás mulleres “tras bata” dando a coñecer a máis de 6.500 mozos, 1.111 galegos, ás investigadores no eido da oncoloxía molecular.
A Xunta lanza unha convocatoria de axudas a operadores de telecomunicacións para facilitar a cobertura móbil en 290 núcleos illados do rural de 65 concellos por un importe de 4 millóns de euros para o período 2021-2023. Esta medida enmárcase no Plan autonómico para mellorar as comunicacións móbiles no rural, impulsado pola Amtega, e que acada un investimento global de 10 M€.
Os operadores interesados poderán presentar varios proxectos nos núcleos que elixan, que serán beneficiarios das axudas por orde de valoración ata esgotar a dotación orzamentaria prevista, e as entidades locais deberán achegar terreos para a execución das torres precisas por parte de Retegal, nas que se instalará o equipamento de comunicacións móbiles.
As redes obxecto de subvención deberán permitir a realización de chamadas de voz con calidade a través de terminais de usuario estándar (teléfonos móbiles), debendo garantir esta cobertura durante un período mínimo de 10 anos.
A convocatoria está financiada a un 75% polo Fondo Europeo Agrícola de Desenvolvemento Rural (FEADER) e contempla subvencións de ata o 90% de cada proxecto. A publicación desta convocatoria permite dar un paso máis no Plan de mellora de cobertura móbil que puxo en marcha o pasado ano a Amtega, en colaboración coa Fegamp.
Galicia propuxo esta solución á Comisión Europea, que é o organismo que ten que aprobar a convocatoria pública de axudas, coa que está a manter contacto e intercambiando información para poder dar resposta á demanda.
A pesar de que Galicia conta cunha cobertura móbil do 98%, á que contribuíron en boa medida os investimentos públicos para incentivar a extensión do 4G na Comunidade, aínda existen zonas rurais illadas e espazos naturais nas que non é posible realizar chamadas de voz a través do móbil.
A Xunta puxo en marcha esta iniciativa tras solicitar ao Estado a inclusión da cobertura móbil dentro do servizo universal de telecomunicacións para que, ademais do actual dereito de conexión fixa a internet de 1Mbps e de teléfono fixo, os cidadáns poidan ter dereito á cobertura de móbil, en condicións previamente estipuladas.
Como alternativa inmediata, a Xunta, tras reunirse coa Comisión Europea para garantir a adecuación desta actuación a normativa europea, puxo en marcha este iniciativa, semellante á outras que se están a levar a cabo en Italia e que tamén están a analizar en Alemaña.
A Federación Galega de Asociacións Universitarias Seniors (FEGAUS), no marco das súas actividades como aliado do Plan de Inclusión Dixital de Galicia da Axencia para a Modernización Tecnolóxica de Galicia (Amtega), organiza un programa formativo que conta con máis de 20 seminarios online duns 60 minutos de duración que tratan diversos contidos de temáticas cotiás apoiándose na axuda que supón o uso das novas tecnoloxías.
O obxectivo principal deste proxecto é xerar actividades e recursos formativo-informativos de valor para empoderar ás persoas maiores a través do uso das novas tecnoloxías na súa vida cotiá favorecendo así un envellecemento máis activo e a mellora na calidade de vida.
Establécese así un proceso de colaboración coa Rede CeMIT, de forma que, as actividades se retransmitirán por videoconferencia a través das aulas repartidas por todo o territorio galego amplificando así o alcance das accións e mellorando a capilaridade destas cara ás contornas rurais e usuarios/as cuxo perfil tecnolóxico está en fases iniciais. Deste xeito tamén se dará a posibilidade de seguir esta formación de xeito online desde os fogares sen necesidade de desprazamentos por parte dos usuarios/as da Rede pero contando co apoio e asesoramento dos responsables das aulas CeMIT no proceso de alta e conexión aos seminarios online.
Os contidos formativos, aínda que están destinados ás persoas maiores, dado o interese das temáticas tratadas, están abertos ao público en xeral e preséntanse mediante emisións en directo a través de Internet con conexións grupais desde as aulas CeMIT que participen na iniciativa para a asistencia de xeito presencial dos usuarios/as interesados/as e que contarán ademais co apoio do dinamizador/a do centro.
As sesións terán un carácter interactivo e dinámico podendo realizar consultas ao poñente en caso de dúbida ou realizando calquera outra intervención que se considere de interese.
Os ciclos que se impartirán versarán sobre as seguintes temáticas:
Estas actividades son gratuítas e emitiranse durante os meses de febreiro a maio en horario de mañá de 10:30 a 11:30. Aínda que se irán ampliando con novas programacións ao longo de todo o ano.
Para a formalización das inscricións para participar de xeito presencial é recomendable poñerse en contacto cos responsables das aulas CeMIT participantes en cada un dos seminarios ou a través de internet na web https://cemit.xunta.gal, sendo o único requisito esixible ser ou darse de alta como usuario da Rede ou no caso de seguir os cursos desde a casa, inscribirse desde a web de Fegaus en Canal Sénior, https://fegaus.canalsenior.es/, a plataforma de aprendizaxe coa que colabora nestas actividades, e onde calquera persoa poderá rexistrarse gratuitamente.
Adicionalmente, Fegaus, no marco da súa colaboración como aliado dixital, pon á disposición dos responsables das aulas CeMIT e da cidadanía en xeral unha Videoteca onde poder visualizar os seminarios xa retransmitidos e os realizados en colaboración coa Xunta de Galicia para poder complementar a formación a través da realización independente e autónoma dos cursos de maior interese para a cidadanía.
FEGAUS é un dos máis de 900 aliados dixitais do Plan de inclusión dixital de Galicia, impulsado pola Amtega, ao que se poden adherir como tales aquelas empresas e entidades interesadas en participar no desenvolvemento da sociedade dixital en Galicia no marco da súa responsabilidade social empresarial, mediante a achega de recursos financeiros, humanos ou, como neste caso, de coñecemento.
O Plan de inclusión dixital é a estratexia autonómica para facilitar a calquera persoa, independentemente do nivel dixital no que se atope, avanzar, madurar e acceder a maiores niveis de coñecemento e uso das TIC.
FEGAUS agrupa a 7 asociacións de alumnos e ex-alumnos dos Programas de Maiores dos 7 campus universitarios pertencentes ás tres universidades de Galicia: Santiago, A Coruña e Vigo, contando con arredor de 2.000 alumnos sénior.
A Rede CeMIT é unha iniciativa posta en marcha pola Amtega e conta coa colaboración de 92 concellos, está integrada por 98 aulas e está presente en 53 comarcas, co obxectivo común de transformar á cidadanía galega nunha sociedade plenamente integrada na sociedade dixital. A rede é un dos instrumentos principais do Plan de inclusión dixital de Galicia para ofrecer a cidadanía recursos de capacitación dixital en función do seu nivel de coñecemento.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...