Este evento ten como obxectivo crear un espazo no que distintos equipos integrados por analistas, universitarios, emprendedores e todo tipo de persoas con inquietudes nos ámbitos de Intelixencia artificial, Big Data e Analytics, poidan unirse co fin de expor unha solución tecnolóxica que dea resposta a un reto que se lles formulará.
O Centro de Excelencia en Intelixencia de Negocio (CEIN) de DXC Technology, en colaboración coa axencia autonómica AMTEGA e a empresa madeireira FINSA, convoca a quinta edición do desafío Hackathon Big Data & Analytics. Será os días 16 e 17 de abril de 2021 na Cidade da Cultura de Galicia, en Santiago de Compostela. A cita, que se celebra dende 2017, forma parte das iniciativas do Plan Digitalent da dita axencia galega, dirixido a promover vocacións tecnolóxicas.
Segundo confirmaron as entidades organizadoras facendo balance dos éxitos previos, o número total de participantes das catro edicións anteriores supera o centenar, incluíndo analistas, investigadores, universitarios, emprendedores e persoas con inquietudes tecnolóxicas relacionadas co análise de datos, a estatística, o aprendizaxe automático, o Big Data e a Intelixencia Artificial.
Nesta edición o desafío a resolver e o conxunto de datos que o acompañan serán proporcionados pola empresa galega FINSA, dentro das súas iniciativas no marco de Industria 4.0. FINSA, empresa de referencia no sector da transformación da madeira en Europa, é impulsora na busca e desenvolvemento de solucións analíticas para optimizar os seus procesos industriais. As anteriores edicións dos hackathons organizados polo CEIN estiveron vencellados a ámbitos tan dispares como o estudo da mobilidade dentro de centros comerciais, a análise das redes sociais dos xogadores do equipo de baloncesto CAB Obradoiro, o estudo de datos medioambientais para mellorar a calidade de vida da cidadanía ou o desenvolvemento de ferramentas de apoio á toma de decisións para afeccionados e profesionais do mar e dos deportes acuáticos.
O obxectivo desta edición é “atopar e premiar o desenvolvemento de modelos de predición vencellados á industria no ámbito de operacións”. A participación está limitada a 30 participantes. A inscrición pódese facer a través da Rede na web do evento, ben de xeito individual ou en grupos de ata cinco persoas.
As entidades organizadoras lembran que tradicionalmente o hackathon levábase a cabo en dúas xornadas: o venres as 17.00 horas facíase unha presentación, por parte do director do CEIN, e tras ela arrincaba una sesión de traballo ata as 20.00 horas que continuaba o sábado a partir das 9.00. Amais, tras un xantar conxunto de todos os participantes, a partir das 18.00, cada equipo presentaba a súas solucións e o xurado avaliaba e seleccionaba aos gañadores.
Desta volta, en función da situación provocada pola COVID, as actividades serán adaptadas ao estado no que se atope a Comunidade nese momento e serán anunciadas na web do evento. Os premios divídense en dúas categorías: mellor solución global e mellor proposta de valor. Os gañadores serán elixidos por un xurado multidisciplinar formado por profesionais do CEIN e de FINSA.
O día 22 de abril de 2021 celébrase o Día Internacional das rapazas nas TIC.
Este ano farémolo exclusivamente mediante multiconferencia web, debido á situación derivada da pandemia por COVID-19. Teremos a oportunidade de coñecer a varias galegas que nos contarán polo miúdo o que a tecnoloxía pode aportar en diversos campos para mellorar a vida de todos.
Non sabedes o que é o día das Rapazas nas TIC? É unha celebración a nivel internacional, orientada a motivar ás novas xeracións de mozas para que consideren o ámbito das TIC para o seu desenvolvemento académico, investigador e profesional.
A nosa terra está en pé de loita contra as fendas dixitais de xénero. Profesionais, asociacións, entidades e mesmo empresas levan anos xuntando forzas para incrementar o número de mulleres que empregan, desenvolven e impulsan novas tecnoloxías da información e froito desta loita é a conmemoración do Día Internacional das Rapazas nas TIC, que en Galicia foi dende os seus inicios unha xornada máis que relevante e nada indica que este ano, coa adversidade da pandemia, vaia perder en intensidade e adhesións. Máis ben o contrario. Así nolo confirma o Colexio Profesional de Enxeñaría en Informática de Galicia (CPEIG), que nos presentou este 22 de marzo os detalles da vindeira celebración, o 22 de abril. Será un cita conxunta do CPEIG, a Secretaria Xeral de Igualdade e, por suposto, o Centro de Supercomputación de Galicia (CESGA).
O Día Internacional das Rapazas nas TIC (International Girls in ICT Day) celebrarase o vindeiro 22 de abril na Plataforma Webinar do Cesga, e será retransmitido en directo a través de Internet de 11 a 12 horas para escolares de toda Galicia.
Este ano, debido á situación marcada pola pandemia, a actividade organizarase exclusivamente mediante multiconferencia web, na que participarán tanto as protagonistas invitadas como todos os centros interesados de primaria e secundaria. “Será unha gran oportunidade para coñecer a tecnólogas galegas que contarán, en primeira persoa, o que a tecnoloxía pode aportar en diversos eidos científicos e laborais para mellorar a vida da cidadanía”, explican dende o CPEIG, engadindo que grazas a esta xornada “o alumnado terá a oportunidade de preguntar e consultar calquera dúbida sobre o seu traballo”.
Participarán catro mulleres excepcionais que traballan e investigan en ámbitos relacionadas coas novas tecnoloxías, desde perspectivas moi distintas:
O Día Internacional das Rapazas nas TIC é unha efeméride de ámbito internacional para motivar ás novas xeracións de mozos e mozos a considerar as Tecnoloxías da Información e a Comunicación para o desenvolvemento académico, investigador e profesional. O evento conta coa colaboración da Consellería de Cultura, Educación e Universidade, Axencia para a Modernización Tecnolóxica de Galicia (AMTEGA), Asociación de Mulleres Investigadoras e Tecnólogas de Galicia (AMIT-GAL), Asociación.GAL, Facultade de Ciencias da Educación, Woman Emprende e Oficina de Igualdade da Universidade de Santiago, Facultade de Informática da Universidade da Coruña (UDC), Escola de Enxeñaría de Telecomunicacións da Universidade de Vigo (UVigo) e grupos de mulleres tecnólogas en Galicia como GalsTech e Hello Sisters! Para participar neste coloquio en directo, os centros interesados deberán inscribirse mediante un formulario dispoñible na web www.ictgogirls.eu.
A información do evento e das actividades está actualizada nesta mesma páxina ou no Facebook e Twitter @ICTGoGirls. Desde 2012, o CESGA coordina o Proxecto Europeo ICT-Go-Girls!, Promoting Entrepreneurship among secondary School Girls through ICT (Promoción do emprendemento das rapazas de secundaria a través das TIC), que deseñou e testou unha metodoloxía innovadora para loitar contra a escaseza de vocacións tecnolóxicas entre as rapazas europeas. Esta acción foi completada coa iniciativa galega Rapazas Emprendedoras Nas TIC na que colabora o Colexio Profesional de Enxeñería informática (CPEIG) no marco do Plan Proxecta da Consellería de Educación, baixo a coordinación da Secretaría Xeral de Igualdade, dirixida ás rapazas de primeiros anos de secundaria.
Nun momento no que a vacinación contra a Covid-19 é fundamental, a desinformación e os bulos que corren polas redes sociais supoñen unha verdadeira ameaza para a saúde. Por esta razón, Google decidiu apoiar un proxecto de Servimedia e Maldita.es que ofrece información contrastada nesta materia e que utilizará a tecnoloxía accesible para chegar a todas as persoas, tamén aquelas con discapacidade.
O proxecto #VACÚNAte (vacínate) centrarase na verificación da información que circula por Internet relacionada coa campaña de vacinación contra a Covid-19 e no desenvolvemento dun programa de difusión de información para tratar de que todas as persoas teñan acceso a información veraz nesta materia.
O proxecto está especialmente dirixido a persoas nunha situación especial de risco, como as persoas con discapacidade, polo que boa parte do contido que se desenvolva dirixirase a estes colectivos.
Ademais do proceso de verificación da información, o proxecto prevé a creación de oito programas de televisión que contarán coa participación de expertos científicos ou sanitarios que explicarán distintos aspectos relacionados coa pandemia. Tamén se crearán máis de 80 contidos específicos dirixidos ás persoas con discapacidade.
En todo este proxecto a tecnoloxía será fundamental para difundir a información e para garantir que esta sexa accesible para todas as persoas.
Este proxecto é un dos once a nivel global que foron seleccionados por Google dentro do seu programa Digital News Innovation.
A Área de Igualdade do Concello de Vilagarcía organiza os vindeiros unha actividade para fomentar o empoderamento feminino pola vía tecnolóxica. Trátase do obradoiro Cara á independencia dixital. Perdéndolle o medo á tecnoloxía, unha acción formativa dirixida a 10 mulleres en situación de vulnerabilidade que se impartirá de forma gratuíta en abril no Centro Municipal de Formación de Matosinhos. A actividade conta con financiamento do Pacto de Estado Contra a Violencia de Xénero.
A área que dirixe Tania García organiza esta actividade ao detectar “un número importante de casos de mulleres que, por descoñecemento, tempo de dedicación ou inseguridade, tenden a delegar nas súas parellas ou fillos a realización de trámites online de todo tipo”, sinala a edil, engadindo que este caso dáse tanto á hora de relacionárense coas administracións como ao facer actividades cotiás como unha compra electrónica. O obxectivo deste curso é proporcionarlles a información práctica básica para “que saiban desenvolverse coa tecnoloxía en aspectos que están á orde do día”. O obradoiro consta de 8 sesións de 2 horas de duración cada unha, que se impartirán no centro de Matosinhos os días 6, 8, 12,13, 15, 19, 20 y 22 de abril en horario de 10 a 12 horas. Tras unha breve introdución aos conceptos básicos, explicaráselles aspectos como o certificado dixital e outros sistemas de acceso ás sedes electrónicas e, de forma práctica, amosaráselles como facer trámites ante a Seguridade Social, o Ministerio de Xustiza, o Concello ou a Axencia Tributaria. Tamén se abordarán temas como o uso seguro das redes sociais e incluso se introducirán temas de corte transversais.
A edil explicou que ademais de atoparse en situación de vulnerabilidade, tamén son requisitos para participar no obradoiro teren coñecemento do uso do correo electrónico e dispor dun teléfono intelixente ou smartphone co que traballar.
As interesadas deben cubrir o formulario que poden descargar do taboleiro de anuncios do portal municipal, da sede electrónica ou obter directamente na Área de Igualdade do Concello. Unha vez cuberto deben presentalo no rexistro xeral, na propia concellería ou a través da sede electrónica.
O Concello de Oleiros informou de que o luns 22 de marzo abre o prazo de inscrición para un curso de informática básica de 40 horas dirixido a persoas maiores de 60 anos empadroadas no termo municipal. A oferta deste obradoiro está enmarcada dentro do programa de Alfabetización Dixital organizado desde a Concellería de Servizos Sociais e Igualdade.
Aprenderase a manexar un ordenador mediante o coñecemento dos seus compoñentes, utilidades, manexo do Office, familiarización con Windows... As inscricións serán a través da web municipal, na sede electrónica, no apartado cidadáns e empresas, en trámites en liña, a partir das 9:00 horas do luns 22 de marzo e rematará ás 20:00 horas do 5 de abril. As prazas adxudicaranse por orde de inscrición. Para calquera aclaración, as persoas interesadas poden poñerse en contacto con Servizos Sociais e Igualdade.
Investigadores da Universidade de Las Palmas de Gran Canaria desenvolveron un prototipo capaz de interpretar a lingua de signos e traducila a voz sintetizada, co obxectivo de mellorar a comunicación de persoas con discapacidade signantes a través da tecnoloxía.
O proxecto desenvolveuse en colaboración coa asociación de persoas xordas ASOR e contou co impulso de Indra e da Fundación Universia.
Un sensor volumétrico e a utilización da intelixencia artificial permiten detectar e interpretar a lingua de signos, que posteriormente é sintetizada a voz para facilitar a comunicación entre persoas signantes e non signantes.
O obxectivo do proxecto é contribuír á autonomía das persoas xordas e facilitar a súa inclusión social e laboral.
Este prototipo incorpora un sensor volumétrico capaz de trasladar os xestos propios da linguaxe de signos a series temporais de datos mediante a identificación do movemento das mans e o uso da intelixencia artificial.
Á súa vez, o prototipo incorpora un módulo de procesado de sinal multidimensional, obtida polo sensor volumétrico e o uso de intelixencia artificial para poder interpretar automaticamente o sinal captado. Durante o proceso de transformación, xéranse diferentes parámetros de sinais e utilízanse sistemas de clasificación automáticos supervisados, é dicir, ensínase ao sistema o significado dos movementos e posteriormente a sintetizar os xestos a voz.
Un punto moi importante é a capacidade de aprendizaxe do sistema, o que lle permite interpretar calquera linguaxe de signos e traducilo a calquera idioma falado.
A Xunta de Galicia ven de poñer en marcha unha versión actualizada do Celga 1 en liña, que permite por primeira vez a autoformación en lingua galega a través dunha ferramenta vencellada a el. Esta nova versión, accesible desde o Portal da Lingua Galega, en aberto a partir de mañá, foi presentada hoxe polos secretarios xerais de Política Lingüística e da Emigración, Valentín García e Antonio Rodríguez Miranda, e pola directora da Amtega, Mar Pereira.
“O novo recurso supón un gran avance para achegar e facerlle accesible a aprendizaxe do galego á cidadanía, independentemente do lugar onde resida ou do tempo que cada persoa poida dedicarlle”, destacou o secretario xeral de Política Lingüística, Valentín García. Neste mesmo senso, subliñou que con esta nova versión actualizada do Celga 1 en liña, que tamén renova a ata agora existente desde 2010, “completamos a serie de cursos anovadores e modernos que configuran o ensino e a aprendizaxe do Celga, para alén de potenciar a presenza da nosa lingua no ámbito das tecnoloxías”.
Pola súa banda, a directora da Amtega, Mar Pereira, destacou o potencial que ofrecen as tecnoloxías para o impulso e o coñecemento da cultura e a lingua galega. Mar Pereira lembrou que a sociedade dixital e inclusiva e a cultura son dous dos sete eixes estratéxicos da Estratexia Galicia Dixital 2030.
Pola súa banda, o secretario xeral da Emigración, Antonio Rodríguez Miranda, destacou a importancia desta medida para os galegos do exterior, que poden así acceder a uns cursos regrados que lles permitan manter e mellorar a nosa lingua fóra das nosas fronteiras, “mantendo así un vínculo esencial coa súa terra e coas súas orixes”. O feito de que agora contemos cunha ferramenta así, facilitará aínda máis esta aprendizaxe, coa que optar a un título oficial que lles permita competir en igualdade de condicións, desde o punto de vista lingüístico, co resto de galegos e galegas, “algo especialmente importante no caso dos emigrantes que desexen retornar a Galicia, e tamén para os nosos bolseiros Bemes, que veñen cada ano a Galicia facer un mestrado nunha das nosas universidades”.
A nova ferramenta de autoformación en liña súmase á actualización do curso titorizado que os 150 alumnos e alumnas do Celga 1 en liña empregan xa desde esta semana, no marco da formación preparatoria de 70 horas que seguen ata o 6 de maio destinada aos exames oficiais. A principal diferenza é que presenta unha versión que estará aberta desde mañá, de forma permanente, no Portal da Lingua Galega, garantindo un acceso ilimitado á aprendizaxe do galego desde calquera lugar e a calquera hora. Na nova opción, non hai límite de prazas nin datas específicas de acceso e tampouco é precisa matriculación, polo que o acceso será tan sinxelo como cubrir un rexistro previo. É un recurso inesgotable e accesible a través da rede para todas aquelas persoas que estean interesadas en comezar a aprender a lingua galega ou en preparar a proba oficial.
Para alén dos cursos titorizados do Celga 1 que convoca a Xunta, este novo curso de autoformación pode seguirse sen necesidade dun titor, xa que as persoas usuarias van avanzando na aprendizaxe grazas aos exercicios de autorresolución e aos exemplos de resposta. Así, a través dunha interface de navegación sinxela, eficiente e intuitiva, o alumnado accede a cada unha das 12 unidades do curso divididas en catro bloques: comprender, explorar e reflectir, practicar e comunicar e viaxar.
Como última novidade, as unidades 1 e 2 están adaptadas á lectura fácil para facilitarlles a aquelas persoas que teñen dificultades lectoras e/ou de comprensión o acceso á aprendizaxe da lingua. Ademais, ao final de cada unidade o alumnado contará cun vídeo interactivo para repasar os contidos tratados nela.
Tamén hoxe, a Xunta de Galicia publica no Diario Oficial de Galicia (DOG) a resolución pola que se convocan as probas para obter este ano os certificados de lingua galega nos niveis Celga 1, 2, 3 e 4. O prazo de solicitude e aboamento de taxas oficiais comeza mañá, 18 de marzo, e permanece aberto ata o vindeiro 12 de abril. As persoas interesadas deberán cubrir o formulario de solicitude da sede electrónica da Xunta e indicar nel a proba ou probas ás que solicitan presentarse, así como a localidade, e dirixilo á Secretaría Xeral de Política Lingüística, preferiblemente por vía electrónica.
As probas realizaranse entre os meses de maio e xuño de forma presencial, se a evolución da crise sanitaria ocasionada pola covid-19 o permite, en Santiago de Compostela, para os niveis Celga 1, 2, 3 e 4 e en Ponferrada, para os niveis Celga 2, 3 e 4. As datas concretas será publicadas xunto coas sedes, horarios e listaxe definitiva de persoas admitidas tanto no DOG como no Portal da Lingua Galega.
Celga é o sistema de certificación de lingua galega adaptado ao MECRL e está configurado mediante cinco niveis de coñecemento do idioma, que recollen as habilidades que reflicten a competencia comunicativa nas distintas destrezas. Estes certificados permiten acreditar o coñecemento que unha persoa ten do galego aos efectos de xustificar méritos ou requisitos laborais e académicos, e obtéñense mediante un exame (agás o nivel 5) convocado pola Consellería de Cultura, Educación e Universidade, aínda que tamén é posible obter a validación Celga dos estudos previos de galego.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...