A Xunta destinará en 2022 uns orzamentos de máis de 209 millóns de euros para a transformación dixital a través da Axencia para a Modernización Tecnolóxica de Galicia, o que implica un incremento de un 8 por cento con respecto a 2021 e dun 80 por cento con respecto a 2020.
A directora da Axencia para a Modernización Tecnolóxica de Galicia, Mar Pereira, compareceu está mañá ante a Comisión de Economía, Facenda e Orzamentos para explicar o destino dunha contas que, dixo, permitirán avanzar na transformación dixital de Galicia “nun momento que será clave na recuperación económica e na consecución dun desenvolvemento sustentable, tanto a nivel económico como social e medio ambiental”.
Neste sentido, destacou os capítulos de investimento, que suman 165,7 millóns de euros e que “permitirán continuar co impulso emprendido no ano 2021 cara á transformación dixital a través dos plans e programas que desenvolve a Axencia cos diferentes departamentos da Xunta.
Mar Pereira destacou que, ademais de contar co financiamento, “é tanto ou máis importante ter claro onde queremos ir e como o queremos facer”. Neste sentido, destacou tres liñas estratéxicas principais, destinadas a “posicionar a Galicia na década dixital que impulsa Europa”. Citou, neste sentido, a Estratexia Galicia Dixital 2030, a Estratexia Galega de Intelixencia Artificial e o novo Marco Galego de Competencias Dixitais
A directora da Axencia referiuse a cinco eixos principais de actuación: Unha administración do século XXI; uns servizos públicos dixitais, un territorio intelixente, sostible e conectado; o reforzo das infraestruturas e a conectividade, e as competencias e talento dixital.
As actuacións para o modernización da administración, incluídas facenda pública e a Xustiza, suman investimentos de preto de 39 millóns de euros.
Estas partidas permitirán afrontar a robotización para a automatización dos procesos administrativos, así como avanzar no novo modelo de posto de traballo para o persoal empregado público nun contexto de teletraballo e mobilidade.
En canto á transformación dixital da facenda pública, a Xunta mellorará e facilitará a relación co contribuínte cunha atención personalizada, proactiva e multicanle e implantará técnicas de intelixencia artificial e analítica avanzada na loita contra o fraude.
O orzamento para a dixitalización da Xustiza ascende a 7 millóns de euros, que permitirán avanzar na consecución do expediente dixital íntegro, así como nos medios e servizos de acompañamento á cidadanía e ás vítimas.
A transformación dos principais servizos públicos suma investimentos de máis de 50 millóns de euros.
No ámbito da educación, estes investimentos permitirán acadar en 2022 o obxectivo de que todo o alumnado entre primeiro de Primaria e segundo de Bacharelato dispoña de aulas dixitais, así como ampliar o uso do libro dixital e mellorar la conectividade dos centros.
O impulso da dixitalización dos servizos sociais permitirán poñer en marcha as primeiras medidas do novo Modelo Dixital de Atención Sociosanitaria no ámbito residencial, que inclúe a universalización no acceso por parte dos profesionais ao sistema de historia clínica electrónica.
Por outra banda, destinaranse 4,8 millóns de euros a iniciativas relacionadas co turismo e a Cultura, como a posta en marcha do modelo de Galiciana Semántica, o incremento dos contidos dixitalizados ou a ampliación do sistema de xestión do catálogo de patrimonio.
No ámbito do turismo, continuarase coa posta en macha do sistema de información baseado en big data, nas iniciativas de sensorización en recursos turísticos e no desenvolvemento de medios dixitais para as oficinas de turismo.
A Axencia para a Modernización Tecnolóxica de Galicia xestionará preto de 12 millóns de euros ao Medio Rural e ao Mar para continuar co desenvolvemento de poxas electrónicas e trazabilidade a través de tecnoloxía blockchain para mercados como o da madeira ou os produtos do mar. Entre outras actuacións, tamén se porá en marcha un novo sistema de xestión para as explotacións agrarias.
Destinaranse, así mesmo, máis de 2 millóns de euros ao Plan e-mobility, con actuacións como a oficina virtual do transporte ou o uso da tecnoloxía big data para analizar os patróns da mobilidade.
Os orzamentos de 2022 permitirán a posta en marcha do proxecto Territorio Intelixente, cunha dotación de preto de 8 millóns de euros. A Xunta disporá dunha plataforma con base cartográfica que permitirá unha xestión do territorio avanzada e con datos a tempo real.
Por outra banda, desenvolverase a plataforma dixital urbanística de Galicia para modernizar o proceso de tramitación dos instrumentos de planeamento entre todos os axentes implicados.
A Xunta de Galicia incidirá tamén en 2022 no fortalecemento das infraestruturas dixitais para garantir a dispoñibilidade dos servizos públicos. Entre as actuacións destaca a posta en marcha do novo Data Center de alta seguridade.
Tamén se reforzará a ciberseguridade co inicio da obra do Centro de Ciberseguridade de Galicia e a posta en marcha de novos servizos para as administracións, as empresas e a cidadanía.
Os orzamentos permitirán tamén financiar actuacións que complementan a competencia estatal de despregamento de redes. entre as que se atopan unha iniciativa para mellorar a cobertura móbil en zonas illadas da Comunidade e unha actuación para dotar de servizos de banda larga ultrarrápida e empresas que se atopan en zonas pouco comunicadas do rural, cunha dotación de 3,4 millóns de euros.
As partidas do marco de recuperación e resiliencia que son transferidas a Galicia polo Estado permitirán dedicar 2,8 millóns de euros á mellora da conectividade con banda larga en polígonos industriais e centros públicos, así como o apoio mediante bonos dixitais para a contratación de servizos de banda larga dirixidos a colectivos vulnerables.
As partidas dos fondos europeos dedicadas á mellora da cobertura, tanto de fibra como de 5G, serán xestionadas de xeito centralizado por parte do Ministerio de Asuntos Económicos e Transformación Dixital a través do Plan para a Conectividade e as Infraestruturas Dixitais e a Estratexia de Impulso ao Desenvolvemento das Tecnoloxías 5G.
A Axencia para a Modernización Tecnolóxica de Galicia destinará 4,7 millóns de euros á posta en marcha do Marco Galego de Competencias Dixitais, que entrará en vigor o 1 de xaneiro de 2022. Estableceranse os mecanismo de formación e acreditación, nos que participarán entidades colaboradoras, e acometerase un plan de reforma e ampliación da rede de aulas CeMIT, como instrumento esencial para lograr o obxectivo de que en 2025 o 70 por cento da poboación teña competencias dixitais básicas.
Coa recepción destes equipos, entregados pola consultora multinacional de negocio NTT DATA —antes everis—, as dúas asociacións poderán reforzar as súas liñas de traballo para achegar a tecnoloxía a toda a cidadanía, especialmente aos colectivos con máis dificultades. Trátase dun dos obxectivos básicos do Programa de Voluntariado Dixital VOLDIX, unha das moitas liñas de acción que impulsa a Axencia para a Modernización Tecnolóxica de Galicia, Amtega, para lograr a capacitación dixital de toda a poboación.
Grazas a esta desta doazón, a Asociación de Veciños Álvaro Cunqueiro, do barrio Vista Alegre de Santiago, recibiu 20 ordenadores portátiles. Con eles poderá renovar o equipamento da súa sala de alfabetización dixital e prestalos a rapaces e rapazas que non contan con equipos para seguir as súas clases online; prevén tamén poñer un novo equipo na súa biblioteca para facer uso libre da rede wifi e mesmo colaborar cunha ONG de cooperación internacional que apoia a nenos e nenas que precisan reforzo escolar.
Pola súa banda, a Asociación de Veciños Sampaio de Lampai, da localidade coruñesa de Teo, empregará os 7 equipos doados para realizar formación ás persoas maiores sobre os diversos servizos dixitais que mellorarán a súa calidade de vida (solicitude de cita médica, banca online...) e impulsará o uso da ferramenta educativa Abalar por parte dos nenos e nenas e das súas familias.
O programa VOLDIX enlaza e interrelaciona o esforzo e as necesidades dos máis de 950 aliados cos que conta na actualidade. Entre estes aliados figuran entidades colaboradoras como a Asociación de Veciños Álvaro Cunqueiro e mecenas dixitais —entre os que se inclúe a consultora everis, que desde o pasado 21 de outubro cambiou a súa marca por NTT DATA, adoptando o nome da súa empresa matriz—. Nesta ocasión, esta empresa contaba con 27 ordenadores portátiles como resultado do seu proceso periódico de renovación de equipamento. Trátase de dispositivos cuxas características xa non responden ás necesidades da compañía, pero que seguen en perfecto estado e funcionamento.
A empresa NTT DATA colabora con este programa desde o seu inicio, no ano 2012. No seu papel de aliado dixital vén realizando actividades formativas orientadas á busca de emprego, novos perfís profesionais, administración electrónica, e-Saúde, charlas con expertos e obradoiros sobre superintelixencia tecnolóxica, creación de videoxogos, apps, drons, seguridade nas redes, robots, realidade virtual e deseño en 3D ou talleres de Scratch. No seo desta colaboración, tamén o pasado ano doou 9 equipos á asociación Álvaro Cunqueiro. Son algunhas das moitas formas de colaboración impulsadas polo Programa VOLDIX, todo un ecosistema dixital formado por persoas voluntarias, organizacións e entidades públicas e privadas que traballan para consolidar a capacitación dixital entre toda a cidadanía.
O Edificio Fontán da Cidade da Cultura acollerá os vindeiros días 10 e 11 de novembro o primeiro encontro galego de Ciberseguridade Ciber.gal dirixido a empresas, cidadanía e administracións públicas. No marco deste evento, o día 10 de Novembro, terá lugar en modalidade presencial dende as 15h ata as 19h, o concurso “Capture The Flag” que formulará unha serie de retos que porán a proba os coñecementos e habilidades dos participantes na área de seguridade de sistemas e aplicacións.
Este concurso, organizado de maneira conxunta pola Cátedra R en Ciberseguridade e o Centro Tecnolóxico Gradiant no marco do evento Ciber.gal, ten como requisitos para a súa inscrición ser maior de idade, acudir cun ordenador portátil propio e descubrir “o segredo” para poder participar, que consiste na resolución dun sinxelo reto de seguridade. Na actividade participarán un número máximo de 30 persoas, que serán seleccionadas por orde de inscrición. É preciso inscribirse previamente para poder participar neste formulario.
Cada proba deste concurso ten asignada unha puntuación en función á súa dificultade. Existirá a posibilidade, en caso de necesitarse, de solicitar pistas que descontarán puntos ao total da proba en cuestión. Unha vez finalizado o tempo da actividade, determinaranse os gañadores en función da súa posición na clasificación. O primeiro e o segundo clasificado serán agasallados con premios de 700 e 300€ respectivamente, sendo entregados os mesmos na última xornada do encontro, o día 11 de Novembro no auditorio principal do Edificio Fontán. Ademais, ao finalizar o concurso, tamén terá lugar o sorteo entre todos os participantes dun Huawei Watch GT2 Pro. Pódense consultar as bases legais do concurso aquí.
O concurso “Capture The Flag” nace coa intención de que todos aqueles que queiran, poidan por a proba as súas habilidades e a súa destreza á hora de resolver problemas relacionados con temáticas como a criptografía, o análise forense, o networking e o reversing.
Nesta mesma liña, neste caso organizado pola Cátedra R de ciberseguridade, celebrarase un obradoiro para a detección, identificación e análise de ameazas en redes e aplicacións o día 10 de novembro entre as 10h e as 14h, que consistirá nun breve repaso conceptual á análise de malware e ás técnicas de detección e eliminación de ameazas. Estas técnicas exemplificaranse con casos de estudo prácticos.
A actividade vai dirixida a estudantes de FP (módulo superior), estudantes de cursos de especialización, e estudantes de grados e másteres universitarios en estudos afíns ás tecnoloxías da información e as comunicacións. Será en modalidade presencial, e tamén require dunha inscrición previa e asistir con un portátil persoal. Celebrarase en tres sedes distintas á vez, no Edificio Fontán en Santiago de Compostela, na Universidade da Coruña e na Universidade de Vigo. Para cada unha delas, o aforo máximo deste taller é de 20 persoas, e tamén serán asignadas as prazas por orde de inscrición.
O encontro galego de ciberseguridade CIBER.gal é unha das iniciativas promovidas e organizadas no marco do nodo galego de ciberseguridade, que foi constituído en xullo de 2020, impulsado pola Xunta de Galicia en colaboración do Instituto Nacional de Ciberseguridade (INCIBE), o Centro Criptolóxico Nacional (CCN), as catro deputacións provinciais de Galicia, a Federación Galega de Municipios e Provincias e a Axencia para a Modernización Tecnolóxica de Galicia (Amtega). Dende a súa creación fóronse adherindo a este espazo de cooperación público-privado máis de 30 entidades de diversos sectores, así como as tres universidades galegas.
A ciberseguridade é unha das tecnoloxías máis relevantes no momento actual e a Estratexia Galicia Dixital 2030 considera prioritario o seu impulso na Comunidade. Nesa liña póñense en marcha iniciativas como o encontro galego de ciberseguridade, que ten como obxectivo principal concienciar á cidadanía, ao tecido empresarial e ás Administracións Públicas sobre a importancia de garantir a seguridade da información na contorna dixital e promover o coñecemento e unha cultura da ciberseguridade en Galicia.
Na seguinte ligazón pode obterse información mais detallada do programa: https://gaiastech.xunta.gal/gl/actividades/evento-cibergal.
A aula CeMIT de Ribeira, espazo local de divulgación, formación e dinamización TIC (Tecnoloxías da Información e a Comunicación), acolleu na mañá deste 29 de outubro a clausura e entrega de diplomas dos cursos de novas tecnoloxías ofrecidos nesta instalación situada no barrio de Cubeliños.
En concreto, impartiuse formación sobre edición de textos (Write), sede electrónica e certificados dixitais e sobre folla de cálculo (Write). A entrega de diplomas correu a cargo da concelleira de Innovación Tecnolóxica, Juana Brión.
O uso do Software Libre mantén a súa tendencia de crecemento, que foi dun 3,9 % nos últimos catro anos e hoxe xa son 9 de cada 10 os que optan por estes produtos. En concreto, o 90,6% destas empresas empregan este tipo de software nos seus equipos informáticos. Segundo o ámbito xeográfico, o uso de solucións con licenza libre acada o seu valor máximo entre as empresas TIC situadas na provincia de Lugo (95%)
As aplicacións libres con maior implantación nas empresas TIC galegas seguen a ser: o navegador de Internet, as aplicacións ofimáticas e o xestor de correo. Non obstante, cabe salientar que o uso do Software Libre supera ao privativo no caso das aplicacións de “Xestión de contidos web” e nas “Aplicacións para a formación“.
Estes datos están extraídos do estudo sobre uso de Software Libre nas empresas TIC de Galicia no ano 2020, publicado hoxe polo Observatorio da Sociedade da Información e a Modernización de Galicia (OSIMGA), adscrito á Axencia para a Modernización Tecnolóxica de Galicia (Amtega).
Os programas con licenza libre que máis distribúen as empresas TIC galegas que ofertaron produtos ou servizos de software son: Servidor web (33,1%), Xestión de contidos de portais e páxinas web (33%), Software de escritorio (31,7%) e Servidor de correo (30,7%)
Cabe salientar que a oferta de software libre supera ao privativo nos seguintes casos: Xestión de contidos de portais e páxinas web, e-commerce, Aplicacións de Traballo colaborativo, e-learning, Sistemas de desenvolvemento e Sistemas de información xeográfica.
Así mesmo, un 46,8% das empresas TIC que vende produtos no campo do Big Data, oferta solucións libres desta tecnoloxía disruptiva.
Respecto ao crecemento da oferta de cada un dos diferentes produtos relacionados co Software Libre, salientar especialmente o crecemento na oferta en Planificación de Recursos Empresariais, e-learning, e-Commerce e Xestión da relación cos clientes.
As principais razóns polas que as empresas TIC galegas non empregan Software Libre son a percepción da “Incompatibilidade cos sistemas ou interlocutores actuais” e a “Complexidade ou risco de cambio”, aínda que esta última percepción decreceu respecto a edicións anteriores do estudo.
Case a metade das empresas TIC galegas que non son provedoras de Software Libre, (49,1%), manifesta que non o fai porque non está na liña de negocio da empresa , se ben, cabe salientar que esta barreira descende un 10,4% respecto ao ano anterior.
Respecto ás fortalezas, os principais aspectos do Software Libre que valoran os clientes son o custo (79,6%), a independencia do provedor (52,5%) e a calidade e prestacións técnicas (35,4%).
Desde a Amtega, estase a fomentar o Software Libre no ámbito empresarial a través das seguintes accións:
Poden consultarse os datos deste informe na seguinte ligazón: www.osimga.gal.
O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (AMTEGA) organizan este 28 de outubro un novo espazo de networking e debate ao abeiro do ciclo tres14.pm. O obradoiro deste xoves versará sobre A proba electrónica na Xustiza, e estará impartido pola maxistrada do Xulgado de Primeira Instancia e Instrución número 2 de Tui, Ana Isabel Cabido. Celebrarase por streaming ás 15:00 horas.
Ana Isabel Cabido é licenciada en Dereito pola Universidade de Santiago (USC) coa cualificación de Premio Extraordinario Fin de Carreira. Accedeu á carreira xudicial por oposición no ano 2011, sendo o seu primeiro destino o Xulgado de Instrución número 2 de Vigo. Posteriormente exerceu as súas funcións no Xulgado especializado en Produtos Bancarios, Preferentes e Subordinadas, creado en Vigo no ano 2014 para atender as numerosas demandas relativas a estes produtos. Por concurso de xuíces accedeu no ano 2015 ao Xulgado de Primeira Instancia e Instrución número 2 de Tui, onde ascendeu categoría de maxistrada en novembro de 2020 e no que permanece na actualidade.
O venres 29, tamén por streaming ás 15 horas, celebrarase a xornada Os novos fondos europeos e a súa aplicación na estratexia de transformación dixital da Sanidade Galega que impartirá o director de Solucións Asistenciais do Sergas, Benigno Rosón.
O Edificio Fontán da Cidade da Cultura acollerá os vindeiros días 10 e 11 de novembro o primeiro encontro galego de Ciberseguridade Ciber.gal dirixido a empresas, cidadanía e administracións públicas. Durante dúas xornadas e a través de diferentes actividades e relatorios de expertos de referencia nacional e internacional, abordarase a importancia da Ciberseguridade en Galicia así como as medidas necesarias para avanzar neste ámbito.
O encontro divídese en tres bloques. O primeiro deles engloba actividades destinadas ao tecido empresarial, que se desenvolverá ao longo da mañá do día 10 de novembro. Neste espazo celebraranse paneis e charlas nas que se falará sobre as axudas para impulsar a ciberseguridade na empresa, sobre os riscos aos que se enfronta o tecido empresarial, cales son as súas consecuencias e as obrigas legais que lle afectan en materia de ciberseguridade. Expoñeranse proxectos de ciberseguridade como a iniciativa Cybersecurity in a box, promovida polo Colexio Profesional de Enxeñaría Informática de Galicia e o ISMS Forum.
Para o colectivo da cidadanía -que será desenvolvido ao longo da tarde do 10 de novembro- contarase co concurso Ciberseguridade no cole! destinado aos menores organizado por Telefónica, e un Capture The Flag, organizado pola Cátedra R en ciberseguridade e Gradiant. Tamén albergará intervencións da man de Gianluca D´Antonio, Presidente de ISMS Forum, e contará con actividades que falarán sobre a necesidade actual de talento en ciberseguridade e obradoiros que axudarán aos participantes a detectar e identificar ameazas.
No segundo día, destinado principalmente á administración pública, cabe destacar a participación do Centro Criptolóxico Nacional; a intervención do divulgador Marc Vidal, e a celebración dun panel de debate que agrupa aos máximos responsables de organismos e entidades autonómicas con competencias en materia de ciberseguridade: a Axencia de Ciberseguridade de Cataluña, a Axencia Dixital de Andalucía, a Generalitat Valencia e a Amtega.
Neste encontro colaboran, ademais das xa mencionadas Teléfonica, Cátedra R e Gradiant, entidades como APDTIC, Cloud.gal, ABANCA e Deloitte, entre moitas outras.
Lembrar que a inscrición é precisa para asistir a todas as actividades, tanto no formato presencial coma no online. No seguinte enlace pódese proceder coa inscrición completamente gratuíta: https://inscricioncibergal.gaiastech.xunta.gal/gl/index.html
O encontro galego de ciberseguridade CIBER.gal é unha das iniciativas promovidas e organizadas no marco do nodo galego de ciberseguridade, que foi constituído en xullo de 2020, impulsado pola Xunta de Galicia en colaboración do Instituto Nacional de Ciberseguridade (INCIBE), o Centro Criptolóxico Nacional (CCN), as catro deputacións provinciais de Galicia, a Federación Galega de Municipios e Provincias e a Axencia para a Modernización Tecnolóxica de Galicia (Amtega). Dende a súa creación fóronse adherindo a este espazo de cooperación público-privado máis de 30 entidades de diversos sectores, así como as tres universidades galegas.
A ciberseguridade é unha das tecnoloxías máis relevantes no momento actual e a Estratexia Galicia Dixital 2030 considera prioritario o seu impulso na Comunidade. No ano 2020, incrementáronse en España respecto ao ano anterior un 32% os delitos producidos a través de internet. A nosa comunidade non é allea a esta situación; Galicia está na sétima posición do ranking estatal en canto a ciberdelitos denunciados, no 2020 se rexistrou un aumento do 135% nos procedementos abertos pola Fiscalía por estafas cometidas a través de internet e das tecnoloxías da comunicación.
Estas cifras poñen de manifesto a necesidade de por en marcha iniciativas coma o encontro galego de ciberseguridade, que ten como obxectivo principal concienciar á cidadanía, ao tecido empresarial e ás Administracións Públicas sobre a importancia de garantir a seguridade da información na contorna dixital e deste xeito tentar facer fronte ao incremento dos delitos cometidos a través de internet.
Na seguinte ligazón pode obterse información mais detallada do programa: https://gaiastech.xunta.gal/gl/actividades/evento-cibergal
O centro GaiásTech da Cidade da Cultura de Galicia acolleu esta mañá a presentación do documental Marxe de erro, no que se amosa o perfil profesional de cinco mulleres tecnólogas. A iniciativa, enmárcase na colaboración entre o Colexio Profesional de Enxeñaría Técnica en Informática (CPETIG) e a Axencia para a Modernización Tecnolóxica de Galicia (Amtega) a través do Plan DigiTalent para promover as vocacións tecnolóxicas femininas.
Na presentación participaron a directora da Amtega, Mar Pereira; a secretaria xeral de Igualdade, Susana López Abella; e o presidente do CPETIG, Marcos Mata. Ao encontro estaban convidados, tamén, alumnos de bacharelato STEMbach de centros educativos de toda Galicia.
Os últimos datos do Observatorio para a Sociedade da Información de Galicia (Osimga) sinalan que só o 30,4% dos traballadores do sector TIC galego son mulleres. Ademais, só o 14,7% desenvolve tarefas especificamente TIC, fronte ao 49,3% dos homes e a porcentaxe de empresas TIC galegas que conta con mulleres en postos de dirección sitúase no 14,3%.
A directora da Amtega sinalou que é evidente que queda camiño por percorrer para reducir a fenda de xénero no sector tecnolóxico, ávido de novos especialistas e con moitas posibilidades profesionais. Lembrou que a Estratexia Galicia Dixital 2030 contempla a promoción do talento dixital como un eixo transversal que, por suposto, ten entre os seus obxectivos a redución da fenda de xénero nas carreiras STEM e como consecuencia no sector tecnolóxico.
Ademais Pereira apuntou algunhas cifras relativas ao emprego dos titulados en carreiras STEM en Galicia como que oito de cada dez egresados volvería a cursar a mesma titulación; que o 83,6% está incorporado ao mercado laboral nos dous primeiros anos tras rematar os seus estudos e que o 74,8% das persoas tituladas STEM desenvolven a súa traxectoria profesional en Galicia.
A directora da Amtega destacou que en Galicia “queremos promover e reter talento para afrontar os desafíos da transición dixital. O talento non ten xénero e non podemos permitir que ningunha vocación quede polo camiño”
Iniciativas como a de hoxe visibilizan e difunden referentes e por iso Mar Pereira quixo agradecer especialmente a colaboración de Berta Candendo, Susana Ladra; Susana Gómez, Verónica Bolón e Silvia Piñeiro, as profesionais que participaron no documental Marxe de erro.
Berta Candendo Santos é lider da área de contidos dixitais en Netex Learning, compañía especializada en axudar a empresas e institucións educativas a afrontar o reto das estratexias de aprendizaxe na nova era dixital.
Susana Ladra González compaxina a súa labor como profesora da Facultade de informática na Universidade da Coruña ca investigación en proxectos de bioinformática relacionados ca COVID-19 e con proxectos de microbioloxía relacionados co cancro.
Susana Gómez Carnero foi durante 10 anos mestra do Departamento de Informática na Escola Superior de Enxeñería Informática de Ourense (UVigo). Creadora de Origami Soluciones, axencia centrada no desenvolvemento de software a medida e no marketing dixital. Directora executiva de BNI, a maior rede de networking do mundo.
Verónica Bolón Canedo é profesora na Facultade de informática na Universidade da Coruña. Leva 12 anos investigando no campo da Intelixencia artificial, Traballa para achegar a tecnoloxía ás necesidades sociais e mellorar o benestar das persoas.
Silvia Piñeiro Fernández traballa no mundo do Business Inteligence e do Big Data, construíndo software para automatizar tarefas e ferramentas de modo que os datos sexan máis sinxelos de entender nas empresas, e máis doados de introducir nos sistemas, por parte dos usuarios. Actualmente está realizando un Máster en Deseño e Desenvolvemento de Videoxogos.
O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (Amtega), coa colaboración das tres universidasdes galegas, celebran esta semana obradoiros tecnolóxicos do programa Mática, destinado a promover a vocación tecnolóxica entre as rapazas e a crear unha comunidade de rapazas de entre 12 a 18 anos en Galicia que permita desenvolver as súas competencias no eido das TIC. Mática forma parte das iniciativas previstas no marco do programa Tech Kids, froito do convenio de colaboración asinado polo CPEIG e a Amtega para a posta en marcha de actividades de formación, capacitación e promoción no ámbito das tecnoloxías en Galicia.
O mércores 27, xoves 28 e venres 29 celebraranse tres obradoiros en formato híbrido, a través da plataforma Zoom ou de forma presencial na Facultade de Informática (FIC) da Universidade da Coruña (UDC), na Aula 2.7, de 18:00 a 20:00 horas. As inscricións poderán realizarse en https://obradoiros-matica.eventbrite.es e de forma individual para cada taller. O mércores celebrarase o obradoiro “As posibilidades da informática: desde TikTok ata o ADN" que impartirá a enxeñeira informática, Máster en Ciencia de Datos, e actualmente estudante de doutoramento Delfina Ramos Vidal. O xoves a xornada será sobre "Construíndo aplicacións móbiles con AppInventor", que impartirá Paloma Piot Pérez-Abadín, enxeñeira de Software en viesure innovation center. E finalmente o venres finalizará a actividade con taller "Introducción á Visión Artificial", impartido pola enxeñeira informática, doutora en Computación e docente na FIC, Lucía Ramos García.
Por outra parte, onte luns finalizáronse as visitas a centros escolares dentro do programa Ciberseguranza Kids do CPEIG e a Amtega. O obxecto da actividade, destinada a estudantes de entre sete e doce anos, foi explicarlles que é a ciberseguridade a través dun contacontos dinámico e participativo. Uns 800 estudantes de todos os puntos da comunidade participaron nas 16 sesións celebradas en colexios das catro provincias.
O contacontos “Ciberserguridade con Sofía” mestura narración e ilustración. É unha historia na que se conta dun xeito lúdico ao alumnado os perigos da rede e da ciberseguridade. Este conto xa está dispoñible en versión dixital na web do CPEIG.
Tecnólog@ por un día é unha actividade na que estudantes de 12 a 17 anos poderán achegarse ás profesións dixitais e ter a oportunidade de experimentar, en primeira persoa, unha xornada laboral con profesionais das empresas do sector TIC en Galicia.
Solicitudes de inscrición ata o 3 de novembro.
Desenvolvemento da actividade do 10 de novembro ao 10 de decembro.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...