DICO Summit 17 reunirá na Cidade da Cultura a profesionais e representantes de empresas de referencia como Technicolor e Nokia, para abordar as últimas novidades sobre os contidos dixitais e a súa repercusión en novos modelos de negocio
O encontro DICO Summit 2017 premiará a creatividade e a orixinalidade de propostas de novos produtos e servizos vinculados aos contidos dixitais co concurso de ideas “Na busca do talento dixital”. Está dirixido a mozos de entre 18 e 30 anos, na categoría de “mozo adulto”, e a rapaces de entre 14 e 18 anos na categoría de “mozo”.
Ata o día 23 de xaneiro ás 17.00 hs. calquera mozo nese rango de idade poderá presentar a súa proposta de ideas, aplicable aos contidos dixitais en calquera ámbito co requisito de que sexan orixinais e se diferencien doutros produtos ou servizos comerciais que poidan existir na actualidade e sexan de dominio público. A proposta pódese presentar de xeito individual ou en grupo, integrado por un máximo de 3 persoas. A documentación, que deberá incluír a descrición xeral de idea, a tecnoloxía necesaria, as principais vantaxes que supón, os posibles clientes ou consumidores, ademais dos datos de contacto, remitirase á dirección de correo electrónico info@dicosummit.gal.
Haberá dous premios por categoría, primeiro premio e mención especial, que consistirán en dispositivos electrónicos, libros, material promocional ou subscricións relacionadas co campo dos contidos dixitais. O nome dos premiados e a entrega de galardóns terá lugar o día 25 de xaneiro antes da clausura do DICO Summit 2017. As bases do concurso poden consultarse na web dicosummit.gal.
#dicosummitgal
O evento DIgitalCOntents (DICO) Summit 2017 reunirá, os días 24 e 25 de xaneiro na Cidade da Cultura, a profesionais e representantes de empresas de referencia como Technicolor e Nokia, entre outros, para abordar as últimas novidades sobre os contidos dixitais e a súa repercusión en novos modelos de negocio en diferentes ámbitos. O encontro, promovido pola Axencia de Modernización Tecnolóxica de Galicia (Amtega), en colaboración co Clúster Audiovisual Galego (CLAG) e o Clúster TIC Galicia, ten aberto o prazo de inscrición través do enlace http://dicosummit.eventbrite.com.
Ao longo de dúas xornadas, DICO Summit 2017 ofrecerá catro tipo de actividades complementarias. Por un lado, os paneis e intervencións de entidades e profesionais de referencia de ámbito estatal e europeo que ofrecerán a súa visión sobre os contidos e a transformación dixital; o novo concepto de televisión e plataformas audiovisuais, os videoxogos, as tecnoloxías de base ou os casos de éxito en determinados campos da economía dixital.
Showroom, Networking e Concurso de ideas
Ademais, contarase cun espazo de exhibición, un Showroom, no que os asistentes poderán coñecer de primeira man parte das tecnoloxías que marcarán o futuro dos contidos dixitais e as súas aplicacións prácticas. Haberá tamén tempo para que as empresas asistentes conversen entre elas cun espazo de Networking, habilitado especialmente para o coñecemento entre entre empresas e profesionais co obxectivo estreitar lazos e fomentar acordos e colaboracións dentro do mundo dixital. Por último, impulsarase o talento local a través do concurso de ideas relacionadas con novos proxectos no eido dos contidos dixitais.
A web da iniciativa, dicosummit.gal, irase actualizando coas novas sobre as entidades e profesionais que terán presenza no evento, que tamén se publicarán nas redes sociais das tres entidades organizadores. As entidades interesadas nesta iniciativa poden poñerse en contacto coa organización a través do enderezo electrónico info@dicosummit.gal.
A recompilación dos Faladoiros Dixitais 2016 xa pode consultarse na web www.profesionsdixitais.org, nun libro que recolle artigos dos relatores que participaron na segunda edición da campaña 1 mes, 1 profesión dixital. Deste xeito, o Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (Amtega), promotores da iniciativa, queren favorecer o acceso permanente aos contidos dos seis encontros desenvolvidos o pasado ano.
Prologada pola directora da Amtega, Mar Pereira, e o presidente do CPEIG, Fernando Suárez, a publicación inclúe textos arredor de temas tan actuais como o big data, o cloud computing, a creatividade dixital, a ciberseguridade, a Internet das cousas (IoT) e a robótica. Os autores son, ademais, recoñecidos expertos nestas materias.
O libro mantén o deseño e a estrutura da recompilación de artigos dos relatores da primeira edición de 1 mes, 1 profesión dixital, que segue a estar dispoñible no botón correspondente ás xornadas de 2015 da web profesionsdixitais.org, creada para informar dos obxectivos e contidos da campaña.
1 mes, 1 profesión dixital
A campaña de divulgación e difusión de novos perfís profesionais na era dixital 1 mes, 1 profesión dixital arrincou en 2015 co obxectivo xeral de crear conciencia da necesidade que teñen os cidadáns de mellorar o seu dominio da tecnoloxía da información e a comunicación cara ao emprego.
Tras un primeiro ciclo de seis xornadas, o interese da iniciativa levou á súa continuidade en 2016, con seis novos faladoiros dixitais que percorreron as cidades da Coruña, Santiago, Vigo, Ourense e Lugo entre os pasados abril e outubro.
O Servizo Galego de Saúde vén de poñer en marcha SIGUE (Sistema Intelixente de Xeolocalización de Usuarios en Edificios), un sistema pioneiro para a localización e guiado de pacientes no interior de varios dos seus centros. Deste xeito, a través dunha aplicación (app) móbil, os pacientes poderán orientarse dentro do Hospital Lucus Augusti e do Hospital Álvaro Cunqueiro do mesmo xeito que habitualmente se utiliza en exteriores mediante o sistema GPS.
A aplicación, xa dispoñible para a súa descarga gratuíta na App Store de Apple e en Google Play, permite ofrecer un servizo de localización no interior de edificios onde non existe cobertura suficiente dos sinais de satélite utilizado polo GPS. A súa precisión ten unha marxe de erro inferior a 1 metro.
A app permite tamén consultar as citas programadas no sistema público de saúde, tanto en hospitais como en centros de saúde, ofrecendo a posibilidade de iniciar a navegación ata o centro no que está programada a cita.
Ademais, ao sistema téñenselle incorporado funcionalidades como a asignación das quendas de consulta mediante a propia app, unha vez que o paciente estea no centro -xunto co guiado ata a sala de espera correspondente-, sen necesidade de empregar os quioscos habilitados para isto nin de acudir aos mostradores de cita.
Tamén inclúe a proposta de rutas no exterior ata o centro en que está programada a cita médica; a suxestión de rutas internas ata o punto público do hospital que se elixa; información sobre servizos non sanitarios do edificio (cafetería, prensa, etc.) e da súa contorna; e a comunicación dunha posición dentro do centro a outros usuarios da app que figuren como contactos.
Para o funcionamento desta aplicación móbil tense creado un sistema de cartografía de edificios para incorporar os mapas internos dos centros nos que funciona o sistema de guiado. Así mesmo, permitirá utilizar realidade aumentada -igual que nos xogos de última xeración- para orientarse, tanto en exteriores como en interiores.
O Hospital Lucus Augusti de Lugo, cunha superficie de 166.000 m2, dá servizo a unha área poboacional de máis de 300.000 persoas; mentres que o Álvaro Cunqueiro de Vigo, cunha superficie de 280.000 m2, dá servizo a unha área poboacional de máis de 600.000 persoas. Neste centro, a navegación interna tamén funciona dentro do aparcadoiro.
Nos próximos meses está previsto que o sistema se estenda ao Hospital Comarcal de Verín, a unha vintena de centros de saúde correspondentes á Estrutura Organizativa de Xestión Integrada de Ourense e ao edificio administrativo da Consellería de Sanidade e do Sergas, en Santiago.
A iniciativa “Rapaciñ@s: a tecnoloxía ben segura”, impulsada polo Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (Amtega) para achegar as tecnoloxías da información a nenas e nenos, estrea unha nova web: www.rapacinos.gal e www.rapacinas.gal.
O novo espazo web, accesible a xente sen coñecementos técnicos, inclúe os seguintes contidos: personaxes fundamentais na historia da informática, 10 razóns para estudar informática, saídas profesionais, onde realizar os estudos, consellos de navegación segura e o xogo “A quen te pareces?”.
A quen te pareces?
Dentro de todos os apartados, cómpre destacar "A quen te pareces?", un xogo que difunde casos de éxito cuxo coñecemento busca fomentar a incorporación das mozas ás novas profesións dixitais e contribuír á desaparición da fenda de xénero existente no acceso aos estudos tecnolóxicos.
Deste xeito, céntrase na divulgación da vida de mulleres e homes que xogaron un papel destacado no desenvolvemento da informática e as ciencias da computación. Persoas dotadas de talento, imaxinación, capacidade de emprendemento e creatividade que fixeron achegas decisivas na creación de software, na ideación de Internet, na popularización das redes sociais, na creación de novas aplicacións, na procura de ferramentas dixitais máis libres e accesibles...
Houbo e hai avances, pero segue a imporse a idea que sitúa aos homes como creadores das innovacións dixitais e informáticas e as mulleres como usuarias. Corrixir esa desigualdade é moi importante e desde este espazo web búscase contribuír a isto difundindo o labor de creadoras tecnolóxicas, enxeñeiras e mulleres de empresa como Ada Lovelace, Margaret Hamilton, Marissa Mayer, Anita Borg, Ana María Prieto, Mitchell Baker, Ángela Ruiz, Radia Perlman ou Carol Shaw.
En “A quen te pareces?” —de acordo cunha serie de preferencias, gustos e valores— cada usuaria poderá identificar con que personaxe do mundo da informática ten máis cousas en común.
Segunda edición
O programa “Rapaciñ@s: a tecnoloxía ben segura” no que se insire o novo espazo web percorreu xa durante dous anos toda Galicia con charlas informativas a cargo das colexiadas e colexiados do CPEIG e obradoiros infantís. Por unha banda, familias e tamén docentes atopan información e recursos de interese; por outra, nenas e nenos adquiren hábitos seguros para navegar na Rede e desenvolven a súa creatividade tecnolóxica a través de actividades pensadas para que se divirtan e aprendan. Alén destas charlas, organizáronse diferentes eventos na Cidade da Cultura con obradoiros tecnolóxicos para os cativos e conferencias de expertos en novas tecnoloxías dirixidas a pais e nais.
A difusión das últimas novidades sobre os contidos dixitais e a súa repercusión en novos modelos de negocio en diferentes ámbitos son dous dos obxectivos de DIgitalCOntents (DICO) Summit 2017, un evento promovido pola Axencia de Modernización Tecnolóxica de Galicia (Amtega) en colaboración co Clúster Audiovisual Galego (CLAG) e o Clúster TIC Galicia no marco do programa Viraxe TIC.
Os días 24 e 25 de xaneiro o Edificio CINC da Cidade da Cultura acollerá este encontro, que ofrecerá catro tipo de actividades complementarias. Por un lado, os paneis e intervencións de entidades e profesionais de referencia de ámbito estatal e europeo que ofrecerán a súa visión sobre os contidos e a transformación dixital; o novo concepto de televisión e plataformas audiovisuais, os videoxogos, as tecnoloxías de base ou os casos de éxito en determinados campos da economía dixital.
Showroom, Networking e Concurso de ideas
Ademais, contarase cun espazo de exhibición, un Showroom, no que os asistentes poderán coñecer de primeira man parte das tecnoloxías que marcarán o futuro dos contidos dixitais e as súas aplicacións prácticas. Haberá tamén tempo para que as empresas asistentes conversen entre elas cun espazo de Networking, habilitado especialmente para o coñecemento entre entre empresas e profesionais co obxectivo estreitar lazos e fomentar acordos e colaboracións dentro do mundo dixital. Por último, impulsarase o talento local a través dun concurso de ideas relacionadas con novos proxectos no eido dos contidos dixitais.
A web da iniciativa, dicosummit.gal, irase actualizando coas novas sobre as entidades e profesionais que terán presenza no evento, que tamén se publicarán nas redes sociais das tres entidades organizadores. A inscrición poderá formalizarse a través da web a principios de xaneiro.
As entidades interesadas nesta iniciativa poden poñerse en contacto coa organización a través do enderezo electrónico info@dicosummit.gal.
Voluntarios do Colexio Profesional de Enxeñaría en Informática de Galicia (CPEIG) difundiron, cun sobresaínte éxito de participación, a iniciativa “Hora do Código”. Durante as últimas semanas organizáronse actividades de programación informática coa colaboración e apoio da Escola Superior de Enxeñaría Informática (ESEI) da Universidade de Vigo, Campus de Ourense, e da Facultade de Informática (FIC) da Universidade da Coruña. Nos obradoiros participaron de balde rapaces e rapazas de entre 3 e 17 anos de idade.
O CPEIG fai un balance moi positivo das actividades desenvolvidas, do número de asistentes e da boa acollida por parte das cativas e cativos. En total, a organización estima que uns 622 nenos e nenas asistiron ás charlas e obradoiros nos centros de ensino e nas dúas facultades durante estas semanas de difusión da “Hora do Código”.
En canto aos centros escolares, os voluntarios do CPEIG visitaron os seguintes: CEIP Curros Enríquez de Celanova; CPR Sagrado Corazón de Celanova; CEIP Virxe da Pena da Sela do Irixo; IES San Mamede, Maceda; EIP de Vistahermosa, en Ourense, e CEP de Ventín, Milladoiro-Ames. Uns 400 rapaces asistiron a estas xornadas programadas polo CPEIG.
O obxectivo da iniciativa foi estender os coñecementos de ciencias da computación aos máis pequenos e pequenas para que coñecesen os conceptos e o mundo no que viven, unha realidade na que a tecnoloxía está cada día máis presente en todas as facianas, desde o ocio á educación.
Actividades na ESEI
Con ese mesmo obxectivo, a Escola Superior de Enxeñaría Informática de Ourense organizou o día 17 de decembro, en colaboración co CPEIG e en horario de mañá, distintos talleres que resultaron ser un éxito de organización e afluencia: unha hora de código para os máis pequenos, robótica para o alumnado de ESO e Bacharelato, impresión 3D para todas as idades e obradoiros de drons para alumnado de Bacharelato. Asistiron 142 nenas e nenos de entre 6 e 17 anos de idade, máis 60 acompañantes adultos.
No acto de benvida aos asistentes participaron Virxilio Rodríguez, vicerreitor do Campus de Ourense da Universidade de Vigo; Francisco Javier Rodríguez Martínez, director da ESEI e tesoureiro do CPEIG; e Juan Otero Pombo, vicepresidente do CPEIG.
A Hora do Código UDC
Tamén o pasado sábado, celebrouse na Facultade de Informática da Universidade da Coruña a segunda edición do evento "A Hora do Código UDC".
Uns 80 nenos e nenas de entre 8 e 14 anos deron os seus primeiros pasos na ciencia da computación nun ambiente distendido e lúdico, axudados por voluntarios de distintos centros da UDC e do CPEIG. Os adultos que os acompañaban tamén puideron coñecer de primeira man o divertida que pode ser a programación e algunhas ferramentas gratuítas para poder continuar a aprendizaxe durante o tempo libre dos novos estudantes.
Ao final da xornada cada un dos participantes recibiu un diploma acreditando o seu esforzo, ante a atenta mirada dun robot NAO.
Code.org
A “Hora do Código” está promovido desde o ano 2013 pola entidade sen ánimo de lucro estadounidense Code.org. Trátase dun evento internacional que consiste nunha introdución dunha hora de duración ás ciencias da computación, deseñada para mostrar que todo o mundo pode aprender a programar e así comprender os fundamentos básicos desta disciplina. A nivel internacional a iniciativa está apoiada polas grandes compañías tecnolóxicas, como Google, Amazon, Apple, Facebook e Microsoft, e por persoeiros como Bill Gates ou Mark Zuckerberg.
Code.org® é un organismo público sen fins de lucro dedicado a ampliar a participación en Informática. O seu obxectivo é que todos os estudantes teñan a oportunidade de aprender programación. Para obter máis información, visita: code.org.
A Confederación Española de Persoas con Discapacidade Física e Orgánica (COCEMFE) e a Fundación Vodafone España desenvolveron durante o ano 2016 o proxecto “Webquest: excelencia na procura intelixente de emprego”, no que participaron 902 persoas con discapacidade procedentes de 41 localidades diferentes.
Ambas as entidades puxeron en marcha esta iniciativa experimental co obxectivo de mellorar a empregabilidade e as competencias para o emprego das persoas con discapacidade usuarias dos Servizos de Integración Laboral de COCEMFE mediante a creación dunha ferramenta Webquest para a procura intelixente de emprego, utilizando as TIC e a aprendizaxe colaborativa.
“Con este proxecto tratamos de que as persoas usuarias dos nosos Servizos de Integración Laboral poidan definir o seu propio proxecto persoal, formativo e profesional; que traballen en profundidade como poden conseguilo e conten co noso apoio en todo o proceso”, afirma o presidente de COCEMFE, Anxo Queiruga.
Grazas a este proxecto, creáronse 11 Webquest, páxinas web con actividades estruturadas e guiadas, que proporcionaron ás 73 persoas usuarias que as utilizaron tarefas ben definidas, así como os recursos e as consignas que lles permiten realizalas con itinerarios personalizados dirixidos a optimizar a procura de emprego. Máis do 90% das persoas que utilizaron esta ferramenta considera que son máis autónomas á hora de buscar un emprego.
Ademais, esta iniciativa proporcionou formación no uso das TIC a 303 persoas, das cales o 66% foron mulleres con discapacidade, 280 realizaron avaliacións de competencias e habilidades para o emprego e 319 persoas foron atendidas co obxectivo de acceder a un posto de traballo. A través deste proxecto, COCEMFE contactou con 331 empresas, das cales se obtiveron 213 ofertas de emprego e 92 persoas con discapacidade foron contratadas.
A convocatoria dos Premios Uninnova ten como obxectivo fomentar e apoiar aos innovadores sociais, a nivel nacional, que xeran proxectos en materia de accesibilidade para mellorar as condicións de vida das persoas con discapacidade. Nesta convocatoria poden participar todas aquelas persoas pertencentes á comunidade universitaria, ademais de emprendedores con ideas novas.
Todos os proxectos presentados deben ter como obxectivo a mellora das condicións de vida das persoas con discapacidade. Pero ademais valoraranse aspectos como o grao de innovación da idea, a participación do ideador na plataforma, a viabilidade, sustentabilidade e alcance do proxecto.
En función das bases do concurso, poden participar nesta convocatoria todas as persoas pertencentes á comunidade universitaria, ademais de emprendedores con ideas novas.
Xunto á mellora da calidade de vida das persoas con discapacidade, o xurado dos galardóns valorará aspectos tales como o grao de innovación da idea, ou a viabilidade, sustentabilidade e alcance do proxecto, que entre outras temáticas haberá de abordar as relacionadas coa accesibilidade na mobilidade, os edificios e o seu equipamento, o mobiliario urbano ou o márketing e o deseño universal.
A II edición dos Premios Uninnova conta con tres categorías: Idea, Proxecto e Produto ou Servizo. Na primeira delas encasillarase aos traballos cunha idea sobre un produto, ben ou servizo en materia de accesibilidade para mellorar as condicións de vida das persoas con discapacidade.
Dentro do apartado Proxecto, englobaranse as propostas que ademais dunha idea inclúan un soporte en forma de proxecto e metodoloxía para levalas a cabo. E, finalmente, no denominado Produto ou Servizo terán cabida os traballos que describan unha idea, conten cun proxecto e metodoloxía para levala a cabo e cun plan de negocio “con xustificada viabilidade e sustentabilidade no tempo”.
Con respecto ao proceso de selección das candidaturas, realizarase en tres fases: Ideación, Validación de Ideas e Fallo do Xurado. Na de Ideación, os participantes, unha vez rexistrados, deberán promocionar a súa idea a través do Muro de Ideación, Durante a fase de Validación de Ideas levará a cabo unha preselección de tres propostas por categoría, que se analizarán na posterior, de Fallo do Xurado, onde se elixirá a unha das preseleccionadas para os apartados Idea e Proxecto. En canto á adxudicación do premio ao traballo gañador na categoría de Produto ou Servizo, farao o xurado dos Premios Discapnet, a partir dos preseleccionados.
Premios
Os traballos gañadores nas categorías Idea e Proxecto terán un certificado de recoñecemento por parte das entidades promotoras do concurso, a promoción e difusión do proxecto co soporte da Fundación ONCE e Uninnova e, no caso da proposta do apartado de Proxecto, a súa validación con usuarios finais.
A proposta gañadora na categoría de Produto ou Servizo será galardoada co Premio ao Proxecto de Emprendemento de Accesibilidade (TIC Categoría C dos Premios Discapnet da Fundación ONCE ás Tecnoloxías Accesibles), que contará cunha dotación económica de 5.000 euros, que deberá destinarse integramente ao desenvolvemento do proxecto de emprendemento co que participou en Uninnova.
Prazos
Os interesados en participar nestes premios, dentro da categoría de Ideas, teñen de prazo para inscribirse e promocionar a súa proposta ata o 31 de marzo de 2017, data a partir da que se revisarán as candidaturas como paso previo ao fallo do xurado, que deberá producirse antes do da IV Edición Premios Discapnet.
Toda a información atópase dispoñible na seguinte ligazón II Premios UNINOVA
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...