As iniciativas da Deputación de Coruña contra a violencia de xénero van ter continuidade e van ir alén do acadado con Suprime o Control, do que xa temos falado salientando a súa vontade de actuar contra un uso discriminatorio e vexatorio das novas tecnoloxías. Así o deu a coñecer onte a responsable de Igualdade da entidade provincial, Ánxela Franco, engadindo que o novo programa (que abrangue a Suprime o Control, entre outras accións) terá desenvolvemento en vinte concellos da provincia, todos eles de menos de 20.000 habitantes.
Como lembraremos, Suprime o Control é un programa da Deputación para incentivar nos ambientes escolares o rexeitamento contra a violencia de xénero, amais da sensibilización e a formación sobre esta lacra social. A iniciativa, posta en marcha polo dito departamento, ten unha clara vertente TIC. Alén do seu propio nome, que é un xogo de palabras coa funcionalidade que no Windows nos permite pechar un programa, o programa ten na súa páxina web, suprimeocontrol.com, o seu principal alicerce.
Dende este espazo en liña achégase, de feito, toda a información sobre o proxecto, todo tipo de recursos educativos de utilidade e máis o calendario de actividades. O obxectivo é ofrecerlle ao alumnado de terceiro e cuarto da ESO, ás súas familias e ao profesorado, ferramentas coas que traballar “pola construción de identidades igualitarias”, facendo unha especial crítica ás violencias machistas na adolescencia e á súa reprodución por medio das redes sociais ou os produtos audiovisuais, etc. A anterior edición de Suprime o Control levouse a cabo nunha ducia de concellos: Trazo, Touro, Malpica, Cerceda, Ponteceso, Boimorto, Dodro, Tordoia, Arzúa, O Pino e Mesía. O programa, sinalou Ánxela Franco, terá continuidade nos cursos 2017-2018 e 2018-2019.
No mundo das distribucións Linux hai para todos os gustos e cores, pero cando usamos algo porque o necesitamos en lugar de porque simplemente o queremos, algunhas funcións fanse máis que vitais. A maioría dos sistemas operativos inclúen unha boa cantidade de funcións de accesibilidade para as persoas cegas ou con incapacidade visual, noutros hai que encargarse de instalalas a man.
Vinux é unha distro Linux deseñada especialmente para a xente con este tipo de necesidades, está baseada en Ubuntu e hai apenas uns días lanzaron a súa máis recente versión estable: Vinux 5.1 baseada en Ubuntu Trusty 14.04.5 LTS.
Vinux non é unha distribución nova, leva bastantes anos ofrecendo unha solución completa e lista para os seus usuarios. Foi desenvolvida orixinalmente no 2008 na Royal National College for the Blind, unha universidade para persoas cegas ou con discapacidade visual situada na cidade de Hereford no Reino Unido.
O seu obxectivo é moi simple, o de facilitar o uso dun computador a aqueles que teñen grandes deficiencias na súa agudeza visual ou que son completamente cegos. Para iso inclúe por defecto o lector e lupa para o texto Orca que dá a benvida en canto arrincas a imaxe de Vinux no computador e que permite navegar a través da contorna gráfica usando o teclado.
Vinux ten un segundo lector de pantalla e tamén soporta Braille, e inclúe un conxunto de aplicacións accesibles. Desde a versión 5.0 as imaxes de Vinux veñen con Unity Gnome-Shell ou Mate como contornas de escritorio. A distro está dispoñible nun único ISO compatible con arquitecturas i386 e AMD64.
Todas as ferramentas de Vinux poden ser perfectamente instaladas en Ubuntu e derivadas grazas ao repositorio público que ofrecen. Na súa wiki ofrecen tutoriais con instrucións paso a paso para realizar unha gran variedade de tarefas, e tamén recomendan outras distribucións deseñadas para cegos ou persoas con discapacidade visual.
O emprego con apoio, que ofrece acompañamento de persoas con síndrome de Down ou discapacidade intelectual durante o seu proceso de integración socio-laboral, favoreceu que 127 persoas do colectivo de Down Galicia contasen o ano pasado con polo menos un contrato de traballo en empresas ordinarias. Foron 50 de Vigo, 16 de Pontevedra, 15 de Santiago e da Coruña, 12 de Ferrol e de Ourense, e 7 de Lugo.
«Este dato supón que case o 70 % das persoas usuarias do programa de Down Galicia tiveron unha oportunidade no ámbito laboral o pasado ano», destaca esta entidade.
Tamén a Confederación Galega de Persoas con Discapacidade (Cogami) e a Fundación Vodafone España conseguiron a inserción laboral de 96 das 150 persoas que participaron nunha iniciativa para favorecer o emprego a través das TIC (tecnoloxías da información e a comunicación). As actividades realizáronse nas sete maiores cidades de Galicia, e de onde procedían a maioría dos participantes era da Coruña (25) e Vigo (24). O 64 % de inserción alcanzada supera ao 48 % que se pretendía alcanzar, afirma Cogami.
Ante a crenza popular de que as persoas nacidas a partires da década dos 90 criáronse rodeadas de tecnoloxía como os ordenadores e os dispositivos móbiles dominan o uso das TIC non son poucos os que chegan a definilos como nativos dixitais para trazar unha fenda xeracional que consideran insuperable, por entender de que os coñecementos sobre a tecnoloxía dos máis novos nunca poden verse superados polos dos seus proxenitores e educadores, que chegan a entender que os rapaces nacen aprendidos, e non precisan que ninguén os forme axeitadamente en materias tecnolóxicas, o que claramente é unha falacia, e como tal Susana Lluna e Javier Pedreira Wicho decidiron xuntar a varios expertos e divulgadores para escribir un libro colaborativo co obxectivo desbotar o concepto de nativo dixital e así instar a acompañar aos máis novos na súa formación en tecnoloxías da información e a comunicación.
Os autores do libro, que hoxe mesmo chegou ás librarías españolas, sosteñen que as novas xeracións carecen de coñecementos, habilidades ou intereses especiais que os doten de certa superioridade no ámbito tecnolóxico, e na meirande parte dos casos podemos sorprendernos polo seu grao de descoñecemento máis aló de Instagram, Snapchat, YouTube ou o software para descargar contidos audiovisuais, non sendo raro atopar a moitos zoupóns coas TIC, xa que careceron da debida formación, de xeito que en vez de nativos dixitais, o máis correcto sería chamalos orfos dixitais.
Para abordar esta temática os colaboradores da obra (que publícase baixo licenza Creative Commons e doará os seus beneficios por dereitos de autor ao proxecto Mak3rs de Ayuda en Acción) achegan perspectivas moi diferentes, repartidas en dous grandes enfoques: o libro comeza explicando algúns conceptos básicos sobre o mundo que nos tocou vivir, e remata dando voz aos supostos nativos dixitais e a quen se encarga da súa formación nun sistema educativo que non sempre está preparado para tal desafío.
Os diferentes capítulos permiten que coñezamos máis afondo o que normalmente chamamos novas tecnoloxías (pese a non ser tan novas), desmontar a mentira da adicción á Internet, sexamos conscientes da importancia de estar presentes nas redes sociais ou incluso ter unha visión clara dos dereitos e deberes dos mozos na era dixital.
Este interesante e moi recomendable texto conta cunha grande participación galega, e así está coordinado polo mencionado Wicho, prologado por Enrique Dans e cun interesante capítulo sobre accesibilidade de Fátima García Doval, e precisamente a forte presenza galega nas páxinas de Los nativos digitales no existen levará a que o libro se presente en dúas ocasións diferentes na nosa terra: o 10 de febreiro no Airas Nunes de Santiago de Compostela e o 24 de febreiro no museo da Domus (A Coruña).
A directora da Axencia para a Modernización Tecnolóxica de Galicia (Amtega), Mar Pereira; o presidente do Clúster Audiovisual de Galicia (CLAG), Jorge Algora, e o presidente do Clúster TIC, Antonio Rodríguez del Corral, lembraron que o DICO Summit é a primeira das actuacións do Programa Viraxe TIC, subscrito polas tres entidades o pasado mes de xullo para impulsar o sector dos contidos dixitais na Comunidade.
Mar Pereira sinalou que o seguinte fito do Viraxe TIC é a elaboración dun estudo para identificar as principais oportunidades de negocio neste ámbito e analizar as perspectivas do sector ante as novas tendencias e os casos de referencia. Nunha segunda fase o Programa contempla a posta en marcha dunha liña de axudas dotada con 3.7 millóns de euros para incentivar o desenvolvemento de proxectos innovadores no ámbito dos contidos dixitais.
A máxima responsable da política tecnolóxica da Xunta lembrou que o hipersector TIC galego, que concentra máis de 3.200 empresas, dá emprego a preto de 20.000 persoas e achega o 2,3% do PIB, representa un sector de alto potencial, co que Galicia ten posibilidade de posicionarse no sector dos contidos dixitais.
O presidente do CLAG, destacou que o contido en vídeo é o contido dixital que máis tráfico xera en España e o que máis crecerá ata 2020 só superado polo xogo online. Jorge Algora sinalou tamén que as novas plataformas dixitais achegan novas formas de distribución e, pola tanto, novas formas de amortizar as producións. Engadiu que agora toca explotar todas as novas posibilidades de negocio.
O presidente de Clúster TIC indicou que para a aproveitar as posibilidades que ofrece o sector dos contidos dixitais é preciso “pasar do técnico ao creativo, que son dous mundos que teñen que entenderse neste contexto”. Sinalou tamén que o papel dos tecnólogos neste ámbito é dar soporte aos contadores de historias. Ademais, incidiu na importancia de apoiar o empendemento individual e de elaborar produtos pensando nun espectador global.
30 profesionais de referencia, showroom, networking e concurso de ideas
Ao longo de dúas xornadas, DICO Summit 2017 ofrecerá catro tipo de actividades complementarias. Por un lado, os paneis e intervencións de 30 entidades e profesionais de referencia de ámbito estatal e europeo que ofrecerán a súa visión sobre os contidos e a transformación dixital; o novo concepto de televisión e plataformas audiovisuais, os videoxogos, as tecnoloxías de base ou os casos de éxito en determinados campos da economía dixital.
A primeira das xornadas, que será inaugurada polo director do Igape, Juan Manuel Cividanes. centrase nos axentes implicados na creación, distribución e comercialización de contidos dixitais. O segundo día o foro abordará o impacto que os contidos dixitais están a ter noutros sectores produtivos. O conselleiro de Cultura, Educación e Ordenación Universitaria, Román Rodríguez, será o encargado de clausurar o evento.
Ademais, contarase cun espazo de exhibición, un Showroom, no que os asistentes poderán coñecer de primeira man parte das tecnoloxías que marcarán o futuro dos contidos dixitais e as súas aplicacións prácticas. Haberá tamén tempo para que as empresas asistentes conversen entre elas cun espazo de Networking, habilitado especialmente para o coñecemento entre entre empresas e profesionais co obxectivo estreitar lazos e fomentar acordos e colaboracións dentro do mundo dixital. Por último, impulsarase o talento local a través do concurso de ideas relacionadas con novos proxectos no eido dos contidos dixitais.
A Fundación Orange e CTIC presentaron EmoPLAY, unha solución dixital que axuda ás persoas con autismo a recoñecer expresións faciais e favorece a compresión das emocións. EmoPLAY é un programa de descarga gratuíta xa dispoñible para contorna Windows e proximamente estarao tamén para dispositivos con sistema operativo Android e iOS.
O proxecto, impulsado por a Fundación Orange, está desenvolvido por o CTIC Centro Tecnolóxico en colaboración, como Comité Científico, do Grupo de Investigación sobre Discapacidade (GID) da Universidade de Oviedo e a Doutora en Psicoloxía Pilar C. Zardaín.
Mediante unha webcam ou cámara integrada, EmoPLAY permite adestrar o recoñecemento de varias emocións a través das expresións faciais. Tras unha elección previa da emoción para traballar, e unha explicación tanto da expresión facial asociada como dunha situación onde aplicala, o usuario debe realizar os xestos que a determinan, por exemplo, sorrir para expresar alegría, e EmoPLAY analizará automaticamente a súa imaxe indicando se a expresión é adecuada ou non.
O programa permite traballar con distintas emocións como alegría, tristeza ou enfado, con configuracións personalizadas para, por exemplo, axustar a sensibilidade do algoritmo de recoñecemento (maior ou menor dificultade), asociar unha imaxe de contexto que axude a traballar a emoción ou modificar o reforzo dado ao usuario ou o tempo que se dispón para conseguir expresar a emoción, de 10 segundos a un minuto.
O traballo das emocións en moitas persoas con autismo é necesario, debido á súa dificultade na interpretación dos diferentes aspectos emocionais que interveñen na comunicación. Deste xeito, estas persoas presentan dificultades para poñerse no lugar dos demais e poder anticipar condutas, dada a dificultade para recoñecer as emocións a través das expresións faciais. EmoPLAY pretende contribuír, por tanto, a que poidan interpretar a correspondencia entre determinados xestos e a emoción asociada.
Durante o desenvolvemento do proxecto levouse a cabo un test-avaliación realizado por un total de 75 nenos e nenas con autismo, cuxa participación foi posible grazas á colaboración de asociacións e centros educativos tanto asturianos como nacionais e, mesmo, internacionais no caso dunha universidade arxentina. A validación realizada por estes nenos obtivo resultados amplamente satisfactorios, resaltando a súa facilidade de uso e o seu interese por seguir utilizándoa no futuro.
Por outra banda, os responsables das asociacións corroboraron o bo funcionamento do módulo de recoñecemento de emocións, cuxa eficacia fora xa comprobada previamente por máis de 185 nenos e nenas sen ningún trastorno do desenvolvemento diagnosticado.
O Goberno de Estados Unidos publicou a modificación da súa normativa acerca dos requisitos de accesibilidade nas Tecnoloxías da Información e as Comunicacións (TIC) recollida en dúas leis federais, co fin de actualizar o seu contido para satisfacer as necesidades de acceso ás persoas con algún tipo de discapacidade, ante os constantes cambios que se producen no sector das tecnoloxías.
O ‘Access Board' de Estados Unidos publica na súa web a actualización da normativa de Accesibilidade das TIC.
Os requisitos actualizados especifican as tecnoloxías ás que se refire e proporcionan requisitos técnicos e de rendemento para o hardware, o software e a documentación e os servizos de soporte. O acceso está dirixido a persoas con todo tipo de discapacidade, incluíndo aqueles relacionados con visión, audición, percepción de cor, fala, cognición, destreza manual e alcance.
Tal e como recolle o Portal da Administración Electrónica de España, a norma, que se publicará a finais deste mes no Rexistro Federal, reestrutura as disposicións para que se clasifiquen por funcionalidade en lugar de por tipo de produto debido ás capacidades cada vez máis multifuncionais dos produtos TIC. Tamén se realizan revisións para mellorar a usabilidade das TIC, incluída a interoperabilidade coas tecnoloxías de asistencia, e para aclarar os tipos de TIC cubertos, como os documentos electrónicos.
Esta actualización permite a harmonización dos requisitos de Estados Unidos coa normativa doutros países, entre elas, as da Comisión Europea, (a EN 301 509) e as Pautas de Accesibilidade para a Contido Web (WCAG) do World Wide Web Consortium (W3C), pautas recoñecidas internacionalmente, aínda que non de obrigado cumprimento.
A modificación reorganiza de maneira conxunta os requisitos de accesibilidade TIC recollidos na Sección 508 da Lei estadounidense de Rehabilitación e os recollidos na Sección 255 da Lei de Comunicacións.
A regra entrará en vigor nun ano, pero as normas da Sección 508, que se incorporan ás regulacións de adquisicións do goberno federal, aplícanse xa ás TIC adquiridas, desenvolvidas, mantidas ou utilizadas por Axencias Federais. As directrices da Lei de Comunicacións cobren teléfonos fixos e móbiles, buscapersoas, computadoras con módems, equipos de conmutación e outros equipos de telecomunicacións.
Este proxecto europeo está financiado no marco do programa Horizonte 2020 e coordinado pola empresa Medtronic. Esta iniciativa que durará catro anos, conta con 50 socios, implicando a uns 7.200 usuarios e máis de 43.000 dispositivos da internet of Things (IoT).
O seu obxectivo é mellorar o empoderamiento dos maiores e aumentar a súa autonomía mediante a prolongación e soporte á vida independente nas súas contornas, ao mesmo tempo que responder ás necesidades de coidadores, provedores de servizos e institucións a través do desenvolvemento de 9 pilotos innovadores en 7 países europeos baseadas en tecnoloxías Internet of Things (IoT). Así, desenvolverase o primeiro ecosistema europeo aberto reutilizando aplicacións existentes que permitan desenvolver servizos para o envellecemento activo e saudable.
A Fundación Vodafone participa no piloto que se levará a cabo en Galicia, xunto con TELEVES, Cruz Vermella Española e o SERGAS (Servizo Galego de Saúde), cuxo obxectivo é validar os servizos universais de atención sociosanitaria para persoas maiores, reducindo a exclusión social e o cambio de estruturas e actitudes sociais. O papel da Fundación Vodafone dentro do piloto no que participan 700 usuarios, será garantir que a solución sexa accesible e cumpra cos Principios de Deseño para Todos e Accesibilidade Universal.
A actividade do proxecto pode seguirse nas seguintes ligazóns:
Twitter: @ACTIVAGEproject, #ACTIVAGEproject
Facebook: https://www.facebook.com/activageproject
Web: activageproject.eu
As nosas universidades queren ser acubillos e palestras itinerantes de novos creadores de contidos auviosuais en galego (algo que entronca, directamente, co congreso que comeza hoxe en Santiago, DICO Summit 2017, onde se tentará premiar, impulsar e visualizar os traballos da nosa mocidade en materia de audiovisual, mundos dixitais e realidade virtual). Como lembraremos, a iniciativa dos campus galegos, o programa formativo Youtubeir@s, concurso de vídeos na Rede, comezou en decembro impulsada polos servizos de normalización lingüística das tres universidades galegas e dos concellos da Coruña, Ames, Baña, Carballo, Mazaricos, Ourense, Pontevedra, Ribadeo. Agora, volve ser novidade polo inminente comezo das actividades en Ourense. O venres, sen ir máis lonxe, presentáronse na cidade das Burgas coa finalidade de “facilitar e fomentar a participación”.
No acto participaron José María Faílde, director da Área de Planificación do campus de Ourense; Paulo Cabral, director da Área de Normalización Lingüística da Universidade de Vigo; Belén Iglesias, concelleira de Cultura, e Mónica Fernández, responsable do servizo de normalización lingüística municipal. Durante a presentación lembraron que “Youtubeir@s naceu co obxectivo de incrementar o uso do galego nos contidos audiovisuais dunha das redes máis empregadas no mundo”. Entre as liñas de actuación que contempla o proxecto, dixeron, abránguese a celebración de obradoiros formativos impartidos pola produtora Illa Bufarda que teñen como obxectivo facer accesible o uso das redes sociais e da linguaxe audiovisual para a transmisión de saberes e opinións, neste caso concreto en galego.
Na cidade de Ourense, os obradoiros, de carácter práctico, serán os días 7 e 14 de febreiro no salón de graos do Edificio de Ferro do campus e os días 10 e 17 de febreiro no Centro de Innovación Social Dixital La Molinera. Poden inscribirse de balde persoas maiores de 14 anos, establecéndose un máximo de 20 persoas en cada obradoiro. Na primeira sesión formativa de cada quenda, dunha hora de duración, afondarase nos consellos básicos para sacarlle o maior partido á cámara dos dispositivos móbiles e na mellor forma de transmitir os coñecementos. Na segunda sesión formativa, de dúas horas de duración, editarase o material e os participantes aprenderán a publicalo en YouTube. Youtubeir@s, concurso de vídeos na Rede, comezou o xoves 1 de decembro e o prazo de presentación de vídeos prolongarase ata o 28 de abril. Poderán presentarase persoas maiores de 14 anos que deberán formalizar a súa inscrición en liña. Os vídeos deberán ter unha duración aproximada de cinco minutos, estar licenciados en creative commons, producidos en galego e estar dispoñíbles na rede social YouTube.
O concurso atinxe dúas categorías en función dos contidos das pezas. Por unha banda, pódese concursar en Vídeo-facermos, con titorías nas que se amosen saberes e procesos de elaboración audiovisual. A outra alternativa é Vídeo-opinarmos, modalidade de vídeos nos que, de xeito argumentado, achégase unha opinión ou valoración arredor dun tema de interese, por exemplo, sobre un libro, unha película, unha serie, temas de actualidade, moda ou tendencias.
En cada unha destas categorías outorgarase un galardón dotado de 1.000 euros e catro mencións honoríficas de 500 euros segundo os criterios dun xurado que estará composto por profesionais da comunicación audiovisual. Na súa valoración, o xurado terá en conta o enxeño e a creatividade, valorando a orixinalidade da peza a nivel visual, sonora e do propio contido; a calidade técnica da peza tanto a nivel visual como sonoro; a eficiencia comunicativa do vídeo na transmisión do contido tanto a nivel oral como visual e a calidade lingüística, valorando o uso coidado e correcto da lingua en todas as súas variantes dialectais.
Para as/os maiores de idade da provincia de Lugo que queiran pórse ao día en materia de nova comunicación e novos xeitos de procurar e achegar coñecemento, dicirlles que a Deputación vai facer seu o lema de “non mudar o que funciona ben” e recunca un ano máis coas súas actividades formativas de envellecemento saudábel a través das novas tecnoloxías (as TIC). Falamos dos cursos de balde para maiores do programa InLugo. Segundo vén de informar a entidade que preside Darío Campos, ábrese ano (primeiro trimestre) con 32 destas actividades. En total, achéganse 555 prazas, a cubrir mediante inscrición en fundaciontic.org e máis deputacionlugo.gal. Os obradoiros foron dados a coñecer polo presidente destas dúas entidades (Deputación de Lugo e Fundación TIC), Darío Campos, e pola alcaldesa Lara Méndez.
Campos avanzou que a previsión deste ano é a de ampliar o número de accións, “atendendo así a alta demanda por parte dos usuarios”. Este éxito, dixo, fica reflectido no feito de que en 2016 as peticións de prazas triplicasen o número de vacantes dispoñíbeis nos cursos con inscrición. Campos Conde salientou tamén “o labor social que está a desenvolver a Fundación TIC da Deputación, a través do InLugo”, que o ano pasado tivo uns 1.500 usuarios, sumando todas actividades, “coma o NutreTIC ou Memoria Dixital”. Por estas e outras razóns, sinalou, “o Goberno provincial seguirá apostando por achegar as novas tecnoloxías aos maiores da nosa provincia como unha ferramenta moi útil para mellorar a súa calidade de vida”. No primeiro trimestre de 2017 impartiranse 32 cursos e obradoiros na sede do InLugo. Para 23 deles, que suman un total de 330 prazas, requírese inscrición. O prazo para apuntarse ábrese este luns, precisamente. Os interesados xa poden inscribirse a través de www.fundaciontic.org e www.deputacionlugo.gal ou chamando ao teléfono 982 225 186. Os outros 9 obradoiros serán de asistencia libre, cun máximo de 225 prazas en total, 25 por actividade. Son actividades encamiñadas sobre todo a usuarios que xa asistiron a algún curso. Neste senso, o presidente da Fundación TIC dixo que o obxectivo é, “por unha banda, que repasen o aprendido e, por outra, dar cabida nos cursos con inscrición a novos usuarios que nunca participaron nas actividades do InLugo”.
Entre as novidades deste primeiro trimestre tamén se inclúe a celebración dunha actividade TIC específica de divulgación para todas aquelas que queiran “actualizar” os seus coñecementos tecnolóxico-dixitais. Trátase da Semana Tecnolóxica, que se desenvolverá do 27 ao 30 de marzo en horario de mañá e tarde. Campos anunciou que “un dos obxectivos desta Semana é axudar aos usuarios do InLugo que precisen repasar contidos, pero tamén se realizarán actividades máis avanzadas e específicas, como buscar e descargar aplicacións relacionadas coa saúde, antivirus para ordenador ou móbil ou buscas avanzadas en Internet”. Poderán apuntarse un total de 50 persoas, 25 en cada quenda. Campos, a maiores, fixo reconto do xerado ao abeiro de InLugo en 2016. O saldo, sinalou, é claramente positivo, posto en que se conseguiu dar servizo a 1.500 usuarios nas diferentes actividades organizadas. Nun plano máis concreto, na sede de InLugo na cidade da Muralla impartíronse 69 cursos e obradoiros con 896 prazas para as que houbo 2.486 solicitudes, “case o triplo das prazas convocadas”, recordou o presidente, que engadiu a todas estas cifras a alta porcentaxe de participación nos obradoiros que se levaron a cabo por toda a provincia, tocando temas como a nutrición saudábel, o emprego do móbil e a divulgación e recollida de testemuños para a web de Memoria Dixital Lugo.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...