MapTac3D é unha extensión desenvolvida especificamente para o editor de mapas de código aberto “Quantum GIS” (QGIS), froito da colaboración entre a Comisión Braille Española, a Universidade de Xaén e o Centro de Investigación, Deseño e Aplicación Tiflotécnica da ONCE (CIDAT).
O obxectivo desta aplicación é que profesionais, profesores, familiares e usuarios cegos poidan deseñar un mapa a man alzada, utilizando plantillas predefinidas ou fontes de bases de datos cartográficas de distribución libre ou privada, como a do Instituto Xeográfico Nacional, unha fonte excepcional de datos cartográficos de uso libre para España.
En esencia, a aplicación MacTap3D utiliza os datos proporcionados por QGIS transformándoos de forma adecuada, para que unha persoa cega poida percibir ao tacto o modelo de mapa. Este prodúcese mediante o enchemento dun conxunto de fichas orientadas ao tratamento de cada elemento do mapa para representar. Ademais, os distintos elementos cartográficos que constitúen o mapa cumpren os criterios recomendados pola Comisión Braille Española para a representación de puntos, liñas, polígonos e mallas de puntos, aos que se engaden etiquetas en Sistema Braille mediante a súa inserción na posición adecuada, tendo en conta a escala do mapa en uso.
O modelo producido pode servir de plantilla para máquinas termocopiadoras. Tamén é posible producir, mediante o transformador, un modelo negativo que pode actuar como molde para preparar múltiples copias positivas en materiais alternativos como escaiola, silicona, etc.
En definitiva, grazas a MapTac3D, as persoas cegas poden percibir a realidade do mundo cartográfico dunha forma moito máis accesible e, sobre todo, moito máis rápida.
Máis información sobre a aplicación MapTac3D e os documentos técnicos asociados.
Dentro da iniciativa #conecta2Xaccesibilidad presentouse o seguinte:
Tamén estiveron presentes os proxectos galardoados na última edición dos Premios Connecting for Good á Innovación en Telecomunicacións:
A directora da Axencia para a Modernización Tecnolóxica de Galicia (Amtega), Mar Pereira, e o presidente da Federación Galega de Municipios e Provincias (Fegamp) Alfredo García, presentaron esta mañá en Santiago a terceira convocatoria do Programa CeMIT-Innova.
Esta iniciativa, enmarcada no Plan de Inclusión Dixital de Galicia, impulsa proxectos colaborativos de base tecnolóxica a través da rede de aulas CeMIT para superar desafíos sociais da súa contorna local. Na presentación desta terceira edición de CeMIT-Innova participaron un centenar de persoas de concellos, empresas TIC e non TIC, entidades de acción social, asociacións culturais e aulas pertencentes a Rede CeMIT.
Mar Pereira destacou o papel da Rede CeMIT como unha das ferramentas esenciais do Plan de Inclusión Dixital de Galicia, en cuxo desenvolvemento a Amtega conta coa colaboración da Federación Galega de Municipios e Provincias (Fegamp) xunto con colexios profesionais, universidades, empresas, entidades do terceiro sector e voluntarios e voluntarias dixitais.
Pereira lembrou que a rede CeMIT leva impartidas desde 2011, ano no que se puxo en marcha, máis de 237.700 horas de formación en TIC en diferentes niveis. Actualmente, conta con máis de 64.600 usuarios rexistrados e este ano o obxectivo é superar os 65.000 usuarios, impartir máis de 35.000 horas de formación e organizar 2.500 actividades.
A directora da Amtega agradeceu o traballo e a implicación das 18 aulas que participaron nas dúas anteriores edicións de CeMIT-Innova e que desenvolveron propostas innovadoras para a mellora da empregabilidade e a inclusión social da cidadanía e dentro dela, de colectivos en risco de exclusión, o envellecemento activo, a promoción económica, a mellora do acceso a coñecementos tecnolóxicos e a participación cidadá.
Terceira convocatoria
As actuacións previstas para este ano, terán un prazo máximo de execución de 9 meses. Do 23 ao 31 de marzo abrirase a convocatoria de inscrición dos proxectos piloto, que se resolverá na primeira semana de abril. A partir do día 10 de abril as aulas CeMIT seleccionadas terán 7 meses para o deseño e execución dos proxectos piloto seleccionados.
A novidade deste ano é a convocatoria do I Concurso de Innovación Social Dixital: Premio Son Dixital que recoñecerá a orixinalidade e carácter innovador e creativo do proxecto de innovación social dixital presentado, así como o número e calidade de resultados tanxibles. O premiado coñeceranse a finais de ano nun acto de presentación de resultados das iniciativas desenvolvidas.
Balance
O Encontro de presentación da terceira convocatoria serviu para facer balance do realizado ata agora e unha mesa de experiencias expuxo a visión máis estratéxica e analítica do que estes proxectos están a supoñer, a través das iniciativas desenvolvidas nos concellos de Ourense, A Bola e Pontedeume.
A xornada completouse coa participación de Juan Freire, experto en Innovación cidadá e cultura dixital, co-fundador de varias empresas e actualmente, colaborador activo en varios proxectos empresariais, relacionados coa aprendizaxe o emprendemento, a tecnoloxía e o pensamento crítico e creativo.
A Rede CeMIT
A Rede CeMIT (Rede de Centros para a Modernización e a Inclusión Tecnolóxica), impulsada pola Amtega, está integrada por 98 aulas, presentes en 92 municipios e 53 comarcas. O seu obxectivo é promover o uso das novas tecnoloxías entre a poboación, con especial atención aos colectivos máis afectados pola fenda dixital, fomentar a formación dixital entre os profesionais galegos e mostrar, a pemes e micropemes as vantaxes da sociedade da información.
Cinco anos son xa os que vén celebrando HackForGood, a principal hackaton universitaria do noso país, que este ano versará en torno ao desenvolvemento de aplicacións e servizos que fagan uso masivo de datos e que teñan gran impacto social.
Esta nova edición de HackForGood, que se celebrará os próximos 9, 10 e 11 de marzo de forma simultánea en 22 universidades situadas en catorce cidades (Alacante, Barcelona, Cáceres, Cartaxena, Cidade Real, Las Palmas de Gran Canaria, León, Madrid, Murcia, Valencia, Salamanca, Sevilla, Valladolid e Vigo), presenta este ano importantes novidades, como a creación dunha sede virtual, desde a que se poden enviar propostas online desde calquera lugar e a posibilidade de que os integrantes dos equipos participantes poidan traballar desde distintas sedes.
En total, segundo se avanzou hoxe, entregaranse 15 Premios HackForGood Locais que reparten 2.000 euros entre os 3 mellores proxectos de cada sede (14 físicas e unha virtual), así como tres Premios HackForGood Globais, para os tres mellores proxectos entre todos os anteriores, dotados á súa vez con 5.000 euros o primeiro, 3.000 euros o segundo e 1.000 euros o terceiro.
Doutra banda, tamén se concederán Premios HackForGood de Continuidade que facilitan aos emprendedores seguir desenvolvendo o seu proxecto unha vez acabado o evento; ademais doutros galardóns temáticos (para as mellores aplicacións que resolvan retos relacionados coa educación, a discapacidade intelectual, o desenvolvemento de vocacións STEM entre as mulleres e a detección de noticias falsas así como para aqueles que baseen o seu desenvolvemento no uso de xogos serios, que teñan o mellor deseño ou que contribúan aos obxectivos de desenvolvemento sustentable) e premios de formación (para o estudo dun Máster en Enxeñería de Software) ou de Think Big e Telefónica Open Future, patrocinadores do evento.
A 5ª edición HackForGood poñerá o seu broche de ouro o próximo setembro, cando celebre o Primeiro HackForGood Big Day, ao que acudirán os proxectos gañadores en cada unha das 15 sedes. Neste acto premiaranse aos 3 proxectos que mellor evolucionasen nos últimos meses. Están dotados con 8.000 euros o primeiro premio, 3.000 euros o segundo e 1.000 euros o terceiro.
Telefónica, a Universidade Politécnica de Madrid, Fundación Hazloposible e a startup MashmeTV son os impulsores desta quinta edición de HackForGood, cuxa inscrición xa está aberta de forma gratuíta a través da web do evento.
Máis de medio cento de mozas e mozos lucenses comezan estes días os cursos da nova edición de LugoWork, o programa da Deputación para fomentar o emprego xuvenil na provincia, dotado con 2 millóns de euros. Para achegar o arrinque oficial das accións formativas, o presidente da Deputación de Lugo, Darío Campos Conde, e a alcaldesa de Lugo, Lara Méndez López, reuníronse no Centro de Empresas e Innovación (CEI-Nodus) cos 15 mozos desempregados que iniciaron precisamente hoxe o curso Auxiliar de vendas online e offline e atención ao público. Este non será o único obradoiro relacionado coas TIC de Lugowork: o programa inclúe tamén un curso intensivo sobre xestión informática e uso de Internet para PEME.
En total, serán 55 as mozas e mozos desempregadas/os que van comezar estes días os catro primeiros cursos do plan, recibindo 1.015 horas de ensino sobre profesións detectadas como nichos de emprego potenciais na provincia, nichos entre os que se atopan o de especialista en comercio electrónico e o de xestor TIC para pequenas e medianas empresas. Unha vez rematada a fase formativa, os participantes que rematen con éxito a dita etapa terán a posibilidade de seren contratados en empresas da provincia, seleccionadas nun proceso público, durante 6 meses.
O Executivo Provincial custeará con axudas de 5.000 euros por traballador os seus custos laborais.Entre as catro devanditas accións atópase como dixemos o Curso de auxiliar de vendas online e offline. A través deste obradoiro, forneceranse habilidades sociais e de comunicación, ofimática e técnicas administrativas básicas e coñecementos sobre ventas na Rede e fóra da Rede. Noutra das accións (Curso de auxiliar de xestión informática e Internet para PEME), os alumnos recibirán coñecemento para desenvolver un amplo abano de tarefas relacionadas coas TIC nunha PEME. Entre as actividades a desenvolver inclúense as de mantemento básico dunha rede informática, da imaxe corporativa en Internet, das relacións en redes sociais da empresa colaborando co resto de persoal ou a xestión de datos da mesma.
O ciclo de obradoiros crea R que a compañía de telecomunicacións R está a organizar para cativos de entre 7 e 15 anos para premiar a fidelidade dos seus clientes e que comezarán o vindeiro sábado en Burela, van perfilando as súas vindeiras actividades, e hoxe dan conta de que o sábado tamén desenvolverán un obradoiro de robótica en Ponteareas, onde aplicando o innovador método Líbolis buscan que os participantes poidan crear un prototipo tecnolóxico empregando placas e materiais reciclados para desenvolver e potenciar a súa creatividade, traballen en equipo e incrementen a seguridade en si mesmos.
A actividade repártese en sesións de 2 horas cada unha que botarán a andar ás 10:00, 12:00 e 16:30 horas, destinándose cada quenda a pequenos de 7-8 anos, 9-11 anos e 12-15 anos respectivamente, limitándose cada unha a 20 participantes, e sendo preciso inscribirse na tenda de R na vila. A mesma estrutura organizativa desenvolverase o 18 de marzo en Ribeira, onde terá lugar un novo obradoiro crea R, pero que desta volta muda a súa temática, e achegarase ao mundo do audiovisual, de xeito que os participantes poderán crear un anuncio para un produto concreto, para o que terán que elaborar un guión e gravar un anuncio, para o que teñen que desenvolver a súa capacidade comunicativa e a súa oratoria dentro dunha divertida experiencia.
As 25 aplicacións da Xunta de Galicia acumulan arredor de 483.000 descargas. A Administración autonómica vén de renovar a páxina de acceso aos seus servizos en mobilidade, accesible a través do portal corporativo http://www.xunta.gal/aplicacions-mobiles. As aplicacións están agrupadas en dez categorías e pódense realizar buscas por temas e sistemas operativos nos que estean dispoñibles.
Nos últimos catro anos a Xunta incrementou de 9 a 25 as aplicacións de diferentes servizos públicos para dar resposta á crecente demanda de servizos en mobilidade. O catálogo de aplicacións da Xunta abrangue dez categorías: Administración pública (DOG, Plataforma Contratos, escAPP e CDTIC): Consumo e comercio (Non piques-non peques, Mercados e Prazas de Galicia, IGC, Galicia Calidade); Cultura e ocio (Axenda Cultural, Museo Centro Gaiás); Emprego (Mobem), Ensino e formación (abalaMobil); Lingua (Tradutor Gaio); Meteoroloxía (MeteoGalicia, MeteoRoute, MeteoSix); Mocidade (Carné Xove) Natureza e Turismo (Turismo de Galicia; Camiño de Santiago; Bono Iacobus, Galicia Birding, Sendegal, Parques Naturais, Enoturismo, Botafumeiro R.V).
As aplicacións que rexistran un volume máis elevado de descargas son MeteoGalicia, para a predición meteorolóxica; abalarMobil, para o seguimento de pais e nais da actividade educativa dos seus fillos; Mobem para demandantes de emprego; MeteoSIX, que ofrece a predición meteorolóxica xeorreferenciada; e Sendegal, que permite coñecer rutas homologadas de sendeirismo en Galicia.
Identificadas nun espazo único
En maio de 2013 o Consello da Xunta acordou que a publicación das aplicacións creadas por calquera organismo da Administración xeral nas plataformas Android e IOS se realizase baixo a denominación única de “Xunta de Galicia”, facilitándolle á cidadanía a súa identificación e contribuíndo a aumentar a confianza de quen as usa, ao actuar a Administración autonómica como garante da fiabilidade e da súa actualización.
A raíz desta medida e para difundir cales son as aplicación móbiles dispoñibles creouse un novo espazo web no portal corporativo http://www.xunta.gal/aplicacions-mobiles., onde se poden consultar as aplicacións rexistradas, e que se vén de actualizar esta semana.
O Museo da Guitarra de Almería acolleu o lanzamento de TeloReciclo , unha iniciativa grazas á cal varias persoas con discapacidade intelectual recollerán por toda a cidade teléfonos móbiles en desuso, co fin de fomentar a reciclaxe destes dispositivos. O proxecto, promovido por Orange, xunto coa asociación de persoas con discapacidade intelectual A Toda Vela, a empresa ecosocial de mensaxería Koiki e a colaboración de Recyclia, pretende dar o fin máis social posible aos millóns de teléfonos e dispositivos móbiles que existen en España gardados nos caixóns das casas.
TeloReciclo nace en Almería coa previsión de ir estendéndose a outras cidades e ten varios obxectivos, entre eles, por unha banda, aumentar o número de teléfonos móbiles reciclados e concienciar sobre os beneficios que esta acción ten para o medio ambiente. En España hai máis de 50 millóns de dispositivos móbiles, dos que, segundo un informe de Sheffield Hall University, un 44% acaba, ao cabo dun tempo, gardado nun caixón. Estes dispositivos tan cotiáns son coñecidos como “minas urbanas”, pois integran elementos altamente contaminantes, como o litio das baterías ou o coltán e, por tanto, a súa reciclaxe convértese nunha necesidade urxente e unha prioridade para o medioambiente. Máis do 90% dos compoñentes dun móbil son reutilizables e, ademais, esta actividade de reciclaxe de móbiles crea emprego: estímase que por cada 12.000 móbiles recollidos, créase un posto de traballo para unha persoa desempregada.
Doutra banda, TeloReciclo ofrece un emprego de proximidade a persoas con discapacidade intelectual, como no caso das oito persoas de A Toda Vela, quen se encargará de recoller os móbiles na cidade, e posteriormente tamén noutras localidades da provincia. Estas persoas recibiron unha formación sobre a reciclaxe e o impacto da reciclaxe de móbiles no medioambiente, así como acerca da protección e salvagarda dos datos e información confidencial dos datos almacenados no terminal, o uso de dispositivo móbil como ferramenta de traballo, o proceso de recollida e o destino final dos móbiles reciclados e calquera outro tipo de información que o cidadán necesite saber á hora de entregar o seu dispositivo.
A recollida de móbiles pódese facer por varias vías: os traballadores farán visitas a domicilio para recoller terminais por toda a cidade, e tamén levarán a cabo campañas ou eventos específicos en diferentes puntos de Almería, comezando, por exemplo, estes días 2 e 3 de marzo na Feira Aula Empresa do Colexio La Salle Virxe do Mar. Ademais, calquera cidadán de Almería pode solicitar a recollida no seu domicilio a través da Web de TeloReciclo, e tamén se poden entregar en calquera tenda Orange.
Coa entrega dos vellos terminais aos traballadores de TeloReciclo, os cidadáns estarán a contribuír a un triplo beneficio: xerar postos de traballo na súa localidade, participar na inclusión de persoas con discapacidade intelectual no mundo laboral e colaborar a manter unha contorna máis sustentable grazas á reciclaxe.
En palabras de Rocío Miranda de Larra, directora de Responsabilidade Social e Sustentabilidade de Orange España, “con TeloReciclo propoñémonos un reto moi concreto en Almería: o de recoller 10.000 móbiles nun ano en toda a provincia, sumando os esforzos do equipo de promoción, as tendas de Orange e a nosa páxina web”.
Ver o vídeo promocional en YouTube de TeloReciclo, o fin máis social para o teu móbil.
Máis información na Web Oficial de TeloReciclo.
A semana pasada presentouse o programa de actividades de promoción cultural e creativa Ourense ICC Week, edición 2017, e, como puidemos comprobar, entre as súas accións figura un evento netamente TIC, a xuntanza Technium para mozas e mozos seareiras/os das novas tecnoloxías. Segundo lembrou na xuntanza a Deputación de Ourense, impulsora da ICC Week, a vertente tecnolóxico-dixital non se vai esgotar na lan party. Complementándoa, entre o 2 e o 7 de maio, celebraranse en diferentes puntos xornadas e debates sobre audiovisual, industria TIC, música, xestión cultural, deseño gráfico, publicidade, literatura, artesanía e arquitectura. Amais de todo isto, o programa estreou nova imaxe, baseada no campamento romano de Aquis Querquennis. A idea é converter Ourense na provincia creativa por excelencia.
As actividades foron dadas a coñecer polo presidente da Deputación de Ourense, Manuel Baltar, quen sinalou que este ano o deseño do programa “céntrase no rural e no noso patrimonio histórico-cultural, co campamento romano de Aquis Querquennis, en Bande, como protagonista do evento”. Baltar salientou a importancia este ano da cooperación co Campus de Ourense para o desenvolvemento da devandita xuntanza Technium, nas súas palabras “un gran encontro de lecer dixital que reunirá no polideportivo universitario a centos de mozos cos seus ordenadores para compartir información e xogos e celebrar torneos e concursos”. Segundo explicaron os impulsores da party (Juan Rivas e Manuel Araújo), esta celebrarase entre os días 4 e 7 de maio e abranguerá en aberto recantos para o descanso, o ocio e o recreo con diferentes actividades. A idea é xuntar uns 500 participantes.
A Axencia para a Modernización Tecnolóxica de Galicia (Amtega) en colaboración coa Fundación Vodafone, pon en marcha preto de 50 actividades formativas en diversas localidades con aula CeMIT destinadas a introducir principalmente ás persoas maiores de 45 anos no manexo dos teléfonos móbiles “intelixentes” e das tablets, así como nos seus diferentes usos e aplicacións.
Estas actividades, que arrancan o luns 6 de marzo, chegarán a 23 aulas da Rede que ofertan máis de 500 prazas libres e gratuítas distribuídas entre os meses de marzo a novembro. Cada un dos centros CeMIT que participan nesta iniciativa disporá de diversos terminais telefónicos e de tablets para facilitar a aquelas persoas que non dispoñan deles o seu manexo. Ademais, os participantes recibirán uns manuais en papel que recollerán dunha forma visual sinxela as operacións básicas (acender, chamar, gardar números, etc) así como exemplos de aplicacións básicas e de interese para diferentes colectivos.
As aulas implicadas disporán, tamén, dunha serie de vídeo pílulas formativas breves e moi prácticas, que servirán de material de apoio audiovisual á hora de formar dunha maneira fácil e á medida da persoa interesada.
As persoas interesadas na asistencia a estas iniciativas formativas poderán consultar as súas datas de realización e formalizar a súa inscrición na páxina web da rede CeMIT (https://cemit.xunta.gal), onde tamén poderán atopar os datos de contacto de cada unha das aulas para resolver as dúbidas que poidan xurdir.
As vantaxes que ofrece o uso destes terminais tecnolóxicos para as persoas maiores son innumerables en aspectos relacionados coa súa seguridade (xeolocalización, teleasistencia…), a posibilidade de gozar novas formas de lecer (lectura, música, libros, xogos, turismo, museos, monumentos, cultura, gastronomía, TV…), maior relación cos demais (redes sociais, intercambio de fotos e vídeos, mensaxería por Internet,…), un acceso máis rápido a información (noticias e prensa en liña…), aplicacións de servizos xerais (accesibilidade, administración electrónica, m-saúde), en calquera lugar e a calquera hora.
A Rede CeMIT
A Rede CeMIT (Rede de Centros para a Modernización e a Inclusión Tecnolóxica), está integrada por 98 aulas, presentes en 92 concellos e 53 comarcas co obxectivo de promover o uso das novas tecnoloxías entre a poboación, con especial atención aos colectivos máis afectados pola fenda dixital, fomentar a formación dixital entre os profesionais galegos e mostrar á pemes e micropemes as vantaxes da sociedade da información.
Dende a posta en marcha da rede CeMIT en 2011, planificáronse nas súas aulas máis de 237.000 horas de formación en alfabetización dixital, capacitación dixital e innovación social dixital, contando actualmente con máis de 64.000 usuarios e usuarias que participaron en actividades formativas.
Fundación Vodafone
A Fundación Vodafone España é unha institución sen ánimo de lucro que contribúe ao impulso da innovación e a utilización das TIC para mellorar a calidade de vida das persoas e, especialmente. dos colectivos vulnerables. Participa en proxectos de innovación tecnolóxica nacionais e europeos, dirixidos a investigar novas aplicacións das comunicacións móbiles que faciliten a vida a persoas dependentes, maiores e enfermos crónicos. Promove diversos programas de formación con diversas Universidades españolas dirixidos á investigación e a excelencia docente nas novas Tecnoloxías da Información e as Comunicacións. Outros obxectivos da Fundación son a difusión das telecomunicacións na sociedade a través de publicacións, cursos e seminarios. www.fundacionvodafone.es
Localidades onde se desenvolverán estas actividades
Desenvolveranse nas Aulas CeMIT de Abegondo, Barreiros, Boiro, Brión, Carballedo, Celanova, Cerceda, A Coruña, Cuntis, Fisterra, Foz, Marín, Oroso, Ortigueira, As Pontes, Pontevedra, San Sadurniño, Santa Comba, Sarreaus, Sarria, Valga, Verín e Xunqueira de Ambía.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...