Fan falta máis mulleres no ámbito das novas tecnoloxías da información, polo ben da profesión, polo ben dos estudos TI, polo ben das empresas do sector (que atoparán, literalmente, unha oferta laboral precaria e reducida) e polo ben do propio desenvolvemento tecnolóxico da nosa terra. As nosas entidades profesionais relacionadas co ámbito dixital non queren ficar de brazos cruzados ante esta situación, e máis tendo en conta que, lonxe de manterse a presenza de mozas nas carreiras vencelladas ao dixital, non para de diminuír. Un exemplo salientable desta loita é o labor do Colexio Profesional de Enxeñaría en Informática Técnica de Galicia (CPETIG). A entidade que preside Marcos Mata vén de presentar un informe no que se sinala, entre outras cousas, que a matriculación feminina no Grao de Informática caeu un 50% nas universidades galegas nos últimos anos.
“Esta tendencia á baixa”, sinala o colexio, “contrasta co escenario de crecente presenza das mulleres nas restantes carreiras dos nosos campus”. Ou sexa, en todos os ámbitos formativos superiores medra a presenza feminina agás no eido TIC, “con moi leves oscilacións entre as tres universidades”. Destaca un algo, malia todo, a Universidade de Vigo, por tradición a institución académica galega con máis mulleres matriculadas no Grao de Informática. Porén, sinala o CPETIG, “a UVigo acusa na mesma proporción có resto a minguante presenza feminina”. Estas taxas, se nada o impide, irán a peor nos anos vindeiros, sendo tamén as de hoxe en día moito peores cás de comezos da década pasada, cando se lograron taxas que roldan o 30% en presenza de mulleres nas aulas de informática, caendo até o 15% no curso académico 2015-2016 (sendo a matrícula feminina no conxunto dos grados da Universidade de Vigo do 51%). Polo que se refire á Universidade de Santiago, o CPETIG lembra que “tamén experimentou unha significativa reducción de alumnas en Informática, pasando do 25% a comezos da década pasada ao 12% do pasado curso, unha proporción especialmente escasa tendo en conta que é unha universidade altamente feminizada cun 62% de alumnas”. No caso da Universidade da Coruña, que chegou a ter unha taxa do 23% en cuestión de alumnas en Informática (a comezos da pesada década), anda hoxe arredor do 11% (sendo a matriculación feminina no total de plans de estudos de grao do 49%).
Segundo explica o colexio acerca dos motivos desta preocupante escaseza de mozas na formación TI, “esta tendencia é común á maioría dos países e, en parte, pode deberse ao modelo estereotipado e pouco real da informática que divulgan series e programas de televisión que terxiversan a verdadeira dimensión profesional”. Ademais, engade o CPETIG, inflúe negativamente o feito de que as mozas infravaloren as súas capacidades de seu en tecnoloxía e matemáticas, malia ter obtido de maneira melloras notas nestas materias cós mozos, de maneira xeneralizada. A respecto do devandito, a entidade profesional galega sinala que a elección profesional debe realizarse “en liberdade, por vocación, e sobre ideas precisas das distintas alternativas académicas, superando determinados clixés que pesan sobre a informática”. Na súa opinión, é neste punto onde teñen que operar os colexios profesionais, xunto coas universidades e as empresas. Todas elas, sinala o CPETIG, deben contribuír a transmitir a verdadeira dimensión da profesión, superando a opinión simplista e estendida de que se trata de profesionais que “arranxan” computadores. Porén, malia todos os datos negativos, o colexio valora positivamente o de feito de que a taxa de presenza de mulleres no seu propio seo manteña a día de hoxe unha tendencia positiva, pasando do 19% en 2008 ao 21% actual.
O proxecto Pontedeume en 1.000 historias, impulsado polo Concello eumés a través da aula CeMIT, e o resto de actividades mereceron o recoñecemento da Axencia para a Modernización Tecnolóxica de Galicia como aula de referencia, polo que recibirá unha subvención de 15.000 euros.
A edila de Cultura, Yolanda Vázquez, presentou esta iniciativa na Cidade da Cultura de Santiago, dentro do terceiro encontro do programa CeMIT-Innova. «Consiste en dar clases de inglés, usando como fío condutor a historia local da vila e os seus edificios históricos máis emblemáticos, usando os recursos da aula, como os dicionarios en liña ou vídeos en versión orixinal, achegando ás participantes [todas mulleres] ás novas tecnoloxías», explica.
Maricarmen Sainz é unha das alumnas que acompañaron á edila, que imparte estas sesións. «Empezamos en novembro do ano pasado, sempre dixera que a miña materia pendente era aprender inglés e agora o Concello deume a oportunidade», agradece. Ela e as súas compañeiras queren adquirir nocións básicas para entenderse cos peregrinos que recalan na vila e poder indicarlles onde comer ou que ver, «cousas prácticas, útiles para a vida cotiá». Co móbil manéxase sen problema e sempre que oe unha palabra descoñecida en inglés na televisión apresúrase en buscar o significado.. «Axúdanos a reter a memoria -destaca- e estamos encantadas coa mestra, que se involucrou moito».
Empregados, mediadores, médicos, clientes, provedores e público xeral poden votar ata o 31 de maio os proxectos sociais que a compañía apoiará a través da XII Convocatoria de Axudas a Proxectos de Saúde. Na edición de 2016 máis de 35.688 persoas participaron na votación.
DKV Seguros puxo en marcha un ano máis a campaña “Ti decides. Dinos que proxecto che gustaría converter en realidade. O demais, déixao nas nosas mans”. A Convocatoria de Axudas apoia accións dirixidas a persoas desfavorecidas e que contribúan a mellorar a súa calidade de vida e a súa saúde, especialmente no ámbito da prevención e promoción da saúde ou o apoio a persoas con discapacidade. Tamén fomenta a comunicación e sensibilización sobre a importancia de factores ambientais na saúde das persoas e implica aos grupos de interese da compañía na súa política de responsabilidade empresarial.
Nesta ocasión, son 63 os proxectos finalistas, e os máis votados poderán conseguir un máximo de doce mil euros, ata chegar aos 100 mil euros, para financiar as súas causas en calquera das cinco categorías establecidas nesta nova edición.
Estas 5 categorías de proxectos agrúpanse en función da forma de elección das entidades gañadoras:
Categorías de voto aberto
Na selección dos gañadores desta categoría poderá participar calquera persoa que teña interese en facelo. Para cada unha destas categorías elixirase un único gañador. Tipos de proxectos:
Categorías de voto pechado
Na selección dos gañadores desta categoría unicamente poderán participar persoas incluídas entre os grupos de interese de DKV Seguros (clientes, mediadores, empregados, provedores e médicos). Para cada unha destas categorías elixiranse dous proxectos gañadores. Tipos de proxectos:
Se queres comezar a túa votación, xa podes facelo facendo clic na seguinte ligazón: http://tudecides.dkvseguros.com/
Grupo DKV é parte de ERGO, un dos maiores grupos aseguradores en Alemaña e Europa. ERGO, presente en máis de 30 países, concentra a súa actividade en Europa e Asia, ofrecendo un completo espectro de seguros, provisión e servizos. Preto de 43.000 persoas traballan para o grupo, entre empregados e axentes comerciais. ERGO pertence a Munich Re, un dos líderes mundiais en seguros e reaseguros.
En España, Grupo DKV está implantado en todo o territorio nacional cunha ampla rede de oficinas e consultorios, onde traballan case 2.000 empregados que dan servizo a preto de 2 millóns de clientes.
Estes días celébrase no Campus de Vigo a edición galega de HackforGood (a terceira), o maratón de desenvolvedores e hackers unidos, nun mesmo emprazamento e nas condicións máis axeitadas de colaboración, para atoparen solucións, servizos e aplicacións que contribúan a un mundo mellor e máis igualitario (hacking en clave positiva e solidaria). No evento estanse a reunir máis de 80 estudantes. Durante tres xornadas traballan na “creación de apps que fagan uso masivo de datos e teñan un grande impacto social”, sinala a Universidade de Vigo, engadindo que a finalidade “é responder a retos globais previamente rexistrados dende calquera parte de España”. A iniciativa, que arrancou onte xoves, está promovida por Telefónica, xunto coa ETSI de Telecomunicación da Politécnica de Madrid, a Fundación HazloPosible e a firma innovadora MashmeTV, co apoio da Rede de Cátedras Telefónica, entre elas, a da Universidade de Vigo.
Este venres levouse a cabo o acto institucional de inauguración no edificio Miralles coa participación do reitor da Universidade de Vigo, Salustiano Mato e da directora de Telefónica en Galicia, Marta Menéndez. Esta última explicou que no evento “participan 1.200 alumnos de 22 universidades reunidos en 14 sedes en toda España”, e animou aos asistentes a seguir sendo hackers “bos, audaces e solidarios” e a “traballar con entusiasmo nestes tres días e sacar o máximo partido a este tipo de iniciativas, que teñen moitísima repercusión social e moita aceptación”.
Pola súa banda, o reitor da Universidade, Salustiano Mato, agradeceu o “apoio e confianza” de Telefónica para o “talento que xurde da nosa Universidade a través da cátedra Telefónica” e destacou igualmente a importante implicación do alumnado.
Os 16 grupos de traballo que participan ata mañá sábado no HackforGood en Vigo compiten tanto polos premios locais (2.000 euros entre os tres mellores de cada sede) como globais (8.000 euros entre os tres mellores), os de continuidade e os temáticos, que no caso de Vigo serán Premio á Innovación, á Innovación Enerxética e ao Desenvolvemento Sostible. Para chegar a ser un dos gañadores, o equipos deberán propoñer solucións innovadoras a retos sociais e deben ser quen de presentar en sociedade este sábado nun vídeo de dous minutos. De xeito complementario ás horas de traballo participarán en obradoiros e relatorios, entre eles o de Chema Alonso, chief data officer de Telefónica, que participou a través de videoconferencia. Ademais, para axudar aos estudantes a desenvolver as súas ideas, contan coa axuda dun equipo de docentes da Universidade de diversas disciplinas, dende enxeñaría, a mercadotecnia, comunicación ou informática.
Os premios coñeceranse este sábado ás 17.00 horas.
Onte botaba a andar na Escola de Enxeñaría de Minas e Enerxía a XVII edición do Foro Tecnolóxico do Emprego, un encontro entre empresas e alumnado das tres escolas de Enxeñaría do campus de Vigo (Industrial, Minas e Enerxía, e Telecomunicación) que se estenderá do 8 ao 10 de marzo. Emporiso, ao longo dos tres días que durará esta cita, os participantes aproveitarán para entregar currículos, asistir a conferencias e obradoiros, intercambiar opinións sobre oportunidades profesionais e establecer contactos de cara a introducirse no mercado laboral.
A inauguración do foro estivo presidida polo reitor da Universidade, Salustiano Mato, pola directora da Escola de Enxeñaría de Minas e Enerxía, Natalia Caparrini; polo director da Escola de Enxeñaría de Telecomunicación, Íñigo Cuiñas, e polo subdirector da Escola de Enxeñería Industrial, Juan Pardo, amais dun grupo de preto de cen alumnas e alumnos capitaneados por Olalla Sánchez, estudante da EE de Telecomunicación. En canto ás empresas participantes, son 26 as que se amosan interesadas en acoller aos estudantes recén saídos das devanditas Enxeñarías, entre elas salientan: Microsoft, R, Repsol, BorgWarner, Aluminios Cortizo, Balidea, Imatia, Deloitte, Schindler, Zemsanis, DQbito Ing. Biomédica..., así como os colexios oficias, as principais asociacións sectoriais e centros tecnolóxicos como Gradiant.
Cómpre engadir que o programa de conferencias deste Foro Tecnolóxico do Emprego comezaba xa o martes 7 de marzo, coa intervención de diferentes profesionais no salón de actos da Escola de Enxeñaría Industrial, un programa de charlas que se estenderá (en diferentes espazos das tres escolas) até mañá (venres 10 marzo) ao mediodía, cando está previsto o peche do encontro. A temática destas charlas vai dende a ciberseguridade até os nichos de emprego para as diferentes ramas de enxeñaría ou o Big Data, entre outros.
O Grupo de Programadores e Usuarios de Linux, afincado na Facultade de Informática da UDC, prepara un novo e importante paso no que se refire ao seu labor de difusión arredor da tecnoloxía e a cultura libres, traballo que se complementa cos seus esforzos para converter a nosa terra nunha factoría de desenvolvedores e makers en clave de código aberto. Estamos a falar da nova edición dos seus GPUL Labs, que están a piques de arrincar logo do “gran impacto que tiveron estes obradoiros o ano pasado”, en palabras do Grupo.
Os GPUL Labs 2017, de feito, serán unha continuidade da edición anterior pero facendo aínda meirande fincapé na necesidade de facermos fronte común arredor da tecnoloxía para todas e todos. A idea, unha vez máis, será xuntar membros e desenvolvedores da comunidade galega de argalleiras/os tecnolóxicas/os (e tamén estatal e internacional) para amplificar coñecemento e realizar proxectos reais de programas feitos na súa integridade con software libre, “contribuíndo á comunidade e adquirindo experiencia ao mesmo tempo”. Segundo nos contan dende o Grupo, o programa de obradoiros de 2016 foi un rotundo éxito durante os tres meses que durou. Nun plano máis concreto, abrollaron del un total de 11 charlas sobre algunhas das máis modernas tecnoloxías libres (impartidas por relatorios das máis punteiras empresas e asociacións da contorna galega) así como dous hackathons, dos que xurdiron máis de 10 proxectos diferentes. “A repercusión dos GPUL Labs”, engade o Grupo, “estendeuse por todo o territorio autonómico, contando con máis de 450 asistentes, 3 patrocinadores internacionais e 8 empresas colaboradoras”.
Respecto da edición 2017 dos GPUL Labs, consistirá novamente nunha serie de talleres, charlas e hackathons temáticos, todos co nexo común de estaren vencellados ás máis punteiras tecnoloxías libres e impartidas por relatores de recoñecido prestixio. Arduino, Git, React.js, Tensorflow ou Android son algunhas das temáticas que se tocarán fondamente nos Labs, que segundo lembra o GPUL están totalmente abertos a propostas de novas temáticas. Estas pódense realizar a través dun repositorio específico xa habilitado.
A organización tamén informa que as actividades serán todas rexistradas en vídeo e logo penduradas na Rede para que “ninguén fique sen asistir ás mesmas”. Outra das novidades deste ano é que as sesións previstas non se realizarán unicamente na Facultade de Informática da Coruña senón tamén en diversos espazos de traballo das cidades de A Coruña e Santiago, co obxectivo de chegar a un público máis amplo. Para máis información sobre o evento cómpre visitar a páxina web dos GPUL Labs.
Para rematar, o Grupo de Programadores e Usuarios de Linux lembra que o obxectivo final desta iniciativa non é outro que “crear un enorme e activa comunidade de software libre en Galicia”, “e non imos parar até conseguilo”, explican.
O programa Memoria en Rede que promove a Concellería de Novas Tecnoloxías de Pontevedra, coa vontade de recuperar a historia da cidade e a súa contorna a través das testemuñas dos maiores (ao tempo que de traballa na súa alfabetización dixital), achegou esta semana dúas novidades ao abeiro da súa terceira edición. Máis polo miúdo, trátase de dous obradoiros TIC destinados a asentar na iniciativa os máis firmes alicerces e garantir os máis óptimos resultados en divulgación tecnolóxica e repercusión de Memoria en Rede. Os obradoiros, que foron dados a coñecer polo concelleiro Alberto Oubiña, extráense da bagaxe xerada nas primeiras experiencias desenvolvidas nas parroquias de Mourense e Lérez.
Estes son os cursos a desenvolver:
Sobre Memoria en Rede
Segundo lembra o Concello, o programa naceu coa idea de conectar dous mundos que, en principio, “non teñen nada que ver”. Por unha banda o futuro e o presente no que estamos, coas novas tecnoloxías como eixo central e fío condutor e, por outra, “a recuperación do que poderíamos chamar memoria”. Memoria en sentido amplo: historias, lendas, vivencias, vidas… Emporiso, recorda o Concello, para chegar ao fin desta proposta é preciso “contar coa axuda dos nosos maiores” e ter en conta que non son nativos dixitais, que teñen estas tecnoloxías como algo alleo e en moitas ocasións, que lles xera rexeitamento e aversión.
"BraiBook" busca unha ampliación de capital de 75.000 a 100.000 euros, a través dunha campaña de investimento na plataforma de 'crowdfunding' a Bolsa Social..
Transformar textos dixitais en calquera idioma e formato ao código Braille, este é o servizo que ofrece "BraiBook", o e-reader deseñado para que persoas con discapacidade visual poidan ler e aprender este sistema de lectura e escritura grazas unha tecnoloxía disruptiva que permite a conversión dunha maneira sinxela e accesible en calquera momento e lugar.
A peculiaridade de "BraiBook" é o seu reducido tamaño, pois dispón de espazo para un só carácter en Braille. Para utilizalo, o usuario coloca o dedo encima dese espazo, onde cun sistema mecánico, vai subindo e baixando cada punto Braille, reproducindo sucesivamente as letras de cada palabra e permitindo a lectura de calquera contido en formato dixital: desde un documento descargado, ao horario do autobús ou os seus emails, mediante conexión Bluetooth co teléfono móbil. Este innovador dispositivo é idea do novo enxeñeiro catalán Carlos Madolell, tras reflexionar sobre os problemas cotiáns de lectura aos que se enfrontan as persoas con discapacidade visual, o que lle levou a crear "BraiBook" para "fomentar a inclusión deste colectivo na educación, a cultura e o entretemento",
Só un 15% de persoas con discapacidade visual (15.000 en España) coñece e utiliza o sistema Braille. Ademais, a oferta de libros dispoñible neste alfabeto é escasa, cara e de difícil acceso e transporte, factores que limitan o acceso ao código Braille e, por tanto, reducen o desenvolvemento persoal e profesional das persoas con discapacidade visual..
O dispositivo poderá adquirirse a un prezo que non superará os 300 euros, un 90% máis barato que outros lectores de Braille O obxectivo de "BraiBook" é duplicar a cifra de usuarios de Braille e aumentar, tamén, a escolarización de nenos con discapacidade visual, sobre todo en países en vías de desenvolvemento.
Para introducir este e-reader en Braille no mercado, "BraiBook" busca unha ampliación de capital de 75.000 a 100.000 euros a través da plataforma de equity crowdfunding a Bolsa Social.
A campaña, que acaba de abrirse, xa conseguiu un total de 9.000 euros. Os investidores de "BraiBook" poderán deducirse ata un 20% do investimento da cota íntegra estatal do IRPF, cun máximo de 10.000 euros; 16.000 en caso dos residentes na Cataluña. Unha vez no mercado, o dispositivo poderá adquirirse a un prezo que non superará os 300 euros, un 90% máis barato que outros lectores de Braille, a través da propia web de "BraiBook" ou mediante unha canle de distribución externa, grazas a un preacordo coa ONCE e asociacións similares a nivel internacional.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...