O reto de Samsung ‘The Challenge: #TecnologíaConPropósito' ampliou o prazo para que os desenvolvedores poidan seguir enviando as súas propostas ata o 16 de xuño, que serán premiadas con ata 100.000 euros destinados a desenvolver a idea máis creativa e innovadora que utilice a tecnoloxía para mellorar a vida das persoas.
Búscanse, entre outras, ideas para resolver a través da tecnoloxía problemas actuais como como o envellecemento da poboación, o control de enfermidades crónicas, a utilización da xeolocalización para axudar en situacións de risco na natureza, a mellora da seguridade no fogar, o coidado de mascotas, o fomento da reciclaxe ou a redución do consumo enerxético. Un xurado formado por Samsung valorará a orixinalidade, innovación, atractivo e viabilidade dos proxectos presentados.
A idea do proxecto ten que estar desenvolvida ou atoparse en fase de xestación avanzada, e deberá poder utilizarse de forma universal e gratuíta. Ademais, debe ser unha app ou desenvolvemento tecnolóxico que implique a Samsung dalgunha forma e debe utilizar, preferiblemente, o ecosistema Samsung e os seus dispositivos (Smart TV, wearables, móbiles, tabletas, etc.) ou a converxencia entre todos eles. Os desenvolvedores interesados deben darse de alta en Samsung Dev Spain e encher o formulario de inscrición.
Imatia vén de darnos máis detalles sobre o proxecto Senior TV, unha iniciativa europea para dar forma a unha plataforma tecnolóxica para maiores de 60 anos, incluíndo todo tipo de recursos destinados a afianzar hábitos saudables (cognitivos, comunicativos e mesmo físicos) no día a día das persoas de idade, amais da súa plena inclusión en todo tipo de servizos sociais, de atención ou cidadáns. Segundo conta a empresa galega, incluíronse na fase piloto da plataforma tres servizos informais (Novas, Eventos, Tempo) e dous xogos cognitivos. Estes recursos foron probados por 300 persoas maiores de 60 anos de tres diferentes países: Chipre, Eslovenia e Romanía (100 persoas por cada país).
Segundo engade Imatia, a día de hoxe estanse a desenvolver novos servizos informais que serán incorporados á plataforma de face ao segundo piloto, cuxa realización comeza o vindeiro mes de agosto. Estes novos servizos están orientados á promoción da actividade física e a vida saudable, ademais de dirixirse á mellora da autonomía e da interacción dos anciáns coa súa contorna, botando man de ferramentas como a Wikipedia ou axendas dixitais, entre outras. Esta segunda versión da plataforma, explicou o equipo de Imatia, disporá igualmente de servizos formais para o control de parámetros médicos (tensión, peso, glicosa en sangue, etc.) e incorporaranse melloras da facilidade de uso atendendo directamente ás opinións dos usuarios recollidas nas fases previas, peticións que teñen que ver cunha meirande claridade nas cores, con fontes de letra máis grandes ou co uso de cursores para navegar no canto dun punteiro.
Como lembraremos, o proxecto Senior TV, no que Imatia participa xunto a outras empresas e organismos europeos, ten como obxectivo “desenvolver unha plataforma adaptada e de acceso doado instalada en televisores, smartphones e tabletas”. Esta plataforma permitirá que as persoas maiores poidan acceder desde as súas propias casas a un conxunto de servizos sociais e de saúde, “o que facilitará o seu propio coidado, mellorará o seu acceso aos servizos de coidado formal e informal e aumentará a súa inserción familiar e comunitaria”, explican fontes da empresa galega.
Segundo engade a firma, trátase do primeiro proxecto no que participa a través dunha convocatoria europea. O seu desenvolvemento, coordinado polo Instituto de Neurociencia e Tecnoloxía de Chipre (CNTI), proseguirá até novembro de 2018. Están mergulladas no mesmo empresas de até cinco países, amais de Imatia: Gluk Advice (Holanda), Compexin SA CPX (Romanía), Dom upokojencev Nova Gorica DUNG (Eslovenia), Development Centre of Information and Communication Technologies Savinja RC-IKTS (Eslovenia), Ana Aslan International Foundation (Romanía) e Strovolos Municial Multi-Functional Foundation SMMFF (Chipre).
O Concello de Vilagarcía está a informar dunha nova edición da súa iniciativa Tecnoverán, unha proposta que, como se indica no seu nome, vai dirixida a facer confluír dous mundos, o das novas tecnoloxías da información e o lecer estival, para tirar proveito do mellor de cada un deles. Tecnoverán 2017 vén novamente da man da Concellería de Xuventude e trátase, nas súas palabras, “dunha proposta formativa na que os 20 mozos e mozas participantes poderán adquirir coñecementos sobre as novas tecnoloxías” e, máis polo miúdo, sobre cousas como realidade virtual, programación, aplicacións móbiles e modelado en 3D.
O obradoiro desenvolverase do 10 ao 14 de xullo en horario de mañá na aula CeMIT do Centro de Formación de Matosinhos. A participación é de balde e a preinscrición xa se pode realizar a través dunha ligazón específica habilitada pola Concellería e a aula CeMIT.
O obxectivo concreto de Tecnoverán é “seguir incidindo na formación da mocidade, tanto a efectos profesionais e laborais, como no que atinxe á súa necesidade de estar ao tanto das innovacións que están a disposición de todo o mundo e que son esenciais para numerosas facetas da nosa vida cotiá”. O colectivo O Núcleo será o encargado de impartir o obradoiro, igual que na anterior edición do mesmo, en 2016, e seguindo a folla de ruta marcada daquela: unha metodoloxía lúdica que busca tirar partido das técnicas de videoxogo para facilitar a aprendizaxe (gamificación). O fío condutor que se vai a seguir este ano será o da película Metrópolis.
O único requisito para poder participar no Tecnoverán é ter entre 14 e 18 anos e estar empadroado en Vilagarcía, explica o Concello, engadindo que “non é preciso contar con coñecementos previos sobre os temas a abordar”. O prazo de inscricións remata o 30 de xuño. Os aspirantes que cumpran os requisitos serán avisados para que formalicen a inscrición definitiva.
A iniciativa Code.org aproveita en numerosas ocasións as franquías cinematográficas para facer máis atractivas as súas actividades aos nenos, a quen busca introducilos no mundo da programación informática mediante xogos nos que ter que solucionar quebracabezas mediante a colocación de pezas que realmente son elementos lóxicos que axudan a entender os rudimentos da programación dun xeito divertido, e así, ao igual que no seu día fixeron uso dos personaxes de Star Wars para introducir á programación, agora fan o mesmo con Wonder Woman.
Este proxecto promovido por Google conseguiu chegar a un acordo coa Warner para poder coller a figura de Wonder Woman, que estes días está a estrear filme en pantalla grande (que xa pode verse en EE.UU., Reino Unido e Portugal), para protagonizar unha serie de retos de programación que premiarán cun anaco de vídeo da película cando se superan. A estrea cinematográfica de Wonder Woman está a considerarse como un caso de reivindicación da figura feminina dende moitos ángulos, pois estamos ante unha das poucas superheroínas que conseguiu chegar aos cines cunha produción de seu, presenta a unha muller como un personaxe forte que non ten que recorrer a unha figura masculina na busca de protección e incluso conseguiu superar a pasada fin de semana converténdose na estrea cinematográfica dirixida por unha muller coa maior recadación da historia. Todos estes elementos danlle un valor especial, e aí que este proxecto interactivo para a aprendizaxe de programación informática considere que o uso de Wonder Woman é ideal para atraer ás nenas a dar os seus primeiros pasos coa programación.
Na súa última actualización das opcións de accesibilidade, a compañía estadounidense incorporou a opción de copiloto en Xbox One, o que permite que unha persoa con discapacidade poida xogar á consola coa axuda doutro usuario.
Así, por exemplo, unha persoa con mobilidade reducida e que só poida presionar un botón, poderá xogar aos videoxogos utilizando este modo contando coa axuda dun amigo ou familiar que será quen se encargue do resto de botóns.
Tamén é posible que unha persoa con discapacidade utilice os dous mandos, por exemplo un co queixo para mover unha panca e outro cun pé ou unha man.
Para activar esta opción, basta con ir ás opcións de configuración e no apartado de accesibilidade seleccionar os axustes do mando e aí pódese activar a función ‘Copilot'.
Ademais, Microsoft previu algúns xogos que están especialmente deseñados para utilizarse coa función de copiloto, como son The Bug Butcher, Snake Pass ou Sky Force Anniversary.
Este revolucionario sistema de avisos funciona cunha serie de micrófonos incorporados a enchufes que se distribúen por todo o fogar e un dispositivo central, que tamén incorpora un micrófono, e que é o que procesa a información sobre o ruído captado e a traduce aos smartphones ou a calquera dispositivo intelixente, como unha televisión, un reloxo ou unha pulseira.
Este sistema recoñece os sons que o usuario configure, como pode ser o timbre de casa, a alarma de incendios ou o pranto dun bebé, e asígnalle un aviso personalizado.
Estes avisos poden ser unha serie de vibracións e uns escintileos de distintas cores, de maneira que o usuario con discapacidade auditiva pode recoñecer os sons que hai no seu fogar.
A Asociación Xeopesca quere avanzar na difusión e no coñecemento do patrimonio natural e cultural da nosa terra, e quere facelo apostando pola liberdade de movementos e de comunicación que poñen en xogo as licenzas abertas. “Temos un patrimonio do que estamos orgullosos e do que podemos gabarnos na Rede”, sinalan, engadindo as vantaxes de fomentar a difusión de fotografías con licenzas libres e sen ningún tipo de cancelo. Con estes alicerces, Xeopesca puxo en marcha a primeira edición do seu Concurso de Fotografía Libre, un certame creativo, integrador e colaborativo. Nesta primeira convocatoria o fío temático será a nosa cultura mariñeira e todos os elementos que a conforman, dende apeiros de pesca até aparellos navais, arquitectura, festas, gastronomía ou espazos singulares. O gañador do premio será recompensado con 200 euros e o xurado poderá adxudicar un premio accésit de 100 euros.
O xurado estará conformado por dous profesionais da fotografía e polo presidente e secretario da Asociación Xeopesca. O prazo para enviarmos imaxes comeza hoxe e remata o 1 de setembro, e deberán ser remitidas á conta fotografia@xeopesca.gal, tanto con formato JPG como en PNG. Ademais, deberán ter unha resolución mínima de 2560 x 1920 píxeles. As licenzas deberán ser Commons Creative Recoñecemento – Compartir Igual ou GNU Free Documentation License. Para máis información cómpre visitar o apartado específico sobre o certame na web de Xeopesca.
Esta actividade forma parte das actividades que a asociación Xeopesca realiza no marco do convenio de colaboración asinado coa Axencia para a Modernización Tecnolóxica de Galicia (AMTEGA), e incluídas no Plan de Acción de Software Libre 2017 da Xunta de Galicia.
A Deputación de Lugo vén de anunciar a posta en marcha de novas achegas ao abeiro do seu programa LugoWork. Máis polo miúdo, trátase de 3 novos cursos destinados a incrementar a formación e as posibilidades de inserción laboral de 45 mozas e mozos. A inclusión destas tres novas actividades forma parte do plan de emprego xuvenil e participativo posto en marcha pola entidade provincial, cun orzamento de dous millóns de euros captados da Unión Europea a través da EOI. Un dos tres novos cursos diríxese a capacitar aos participantes en materia de vendas en liña e atención ao público. Os outros dous céntranse en mantemento de aeronaves e máis en emprendemento.
Segundo indica a Deputación, quen concorra nestas tres accións formativas terá a posibilidade de ser contratado en empresas da provincia durante medio ano. Con este fin, o Goberno provincial abrirá unha convocatoria pública, dirixida ás empresas lucenses, ofrecéndolles axudas de 4.200 euros para a contratación dos mozos que “conclúan con éxito esta formación”. Despois da consulta ás propias empresas, engade a Deputación, “os traballadores sairán cun perfil formativo que tenta cubrir as necesidades demandadas polos empresarios da provincia”. Os interesados en participar nestes 3 cursos, deberán estar inscritos no Rexistro de Garantía Xuvenil. Poden facer a súa solicitude ata o 15 de xuño, incluído, en www.deputacionlugo.gal ou en www.eoi.es.
A primeira nova achega é o Curso de auxiliar de vendas online e offline e atención ao público. Nesta acción formativa, que conta con 15 prazas, os alumnos recibirán contidos dirixidos a habilidades sociais e de comunicación, ofimática e técnicas administrativas básicas e coñecementos sobre ventas dixitais e ventas tradicionais.
Outro dos cursos que se achega é sobre mantemento de aeronaves. Nel, familiarizarase aos participantes no mantemento de vehículos aéreos, mediante formación teórico-práctica impartida por profesionais do Aeroclub de Rozas. Participarán un total de 15 alumnos. Por último, achégase tamén un Curso de Emprendemento, dirixido a 15 persoas que teñan unha idea de negocio e queiran montar unha empresa. Nun plano máis detallado, informa a Deputación, “os participantes terán un titor asignado que os asesorará en aspectos como os modelos de negocio ou as estratexias de vendas, entre outras cuestións”. Esta liña do LugoWork inclúe formación e axudas de 3.000 euros para que os participantes poñan en marcha os seus propios establecementos, favorecendo o emprendemento. Informar tamén de que na actualidade, a maiores de todo o devandito, xa están en marcha 6 accións formativas, nas que participan outros 91 mozos.
A ONG Ecos do Sur da Coruña foi premiada por lograr unha transformación social mediante métodos innovadores.
A ministra de Sanidade, Servizos Sociais e Igualdade, Dolors Montserrat, e o director xeral da Fundación Bancaria "la Caixa", Jaume Giró, entregaron os Premios "la Caixa" á Innovación social.
Estes están dirixidos a entidades sociais que na súa actuación aplican métodos innovadores e logran transformar de forma efectiva as vidas de persoas en situación de vulnerabilidade social.
Na gala recoñeceuse Ciberespec, o proxecto da ONG Ecos do Sur de A Coruña galardoado polo seu método innovador na creación de redes de apoio, seguimento e análise do discurso na internet e o ciberactivismo como estratexia integral para combater o discurso do odio contra as persoas inmigrantes e as minorías étnicas nos medios dixitais.
As 10 entidades gañadoras da terceira edición dos Premios "la Caixa" á Innovación social son de Barcelona, Madrid, Zaragoza, Málaga, Almería, Granada, A Coruña e Biscaia.
O xurado da IV edición dos Premios Discapnet ás Tecnoloxías Accesibles da Fundación ONCE, presidido por Miguel Carballeda, presidente da ONCE e a súa Fundación, seleccionou a 14 finalistas do total das 67 candidaturas presentadas entre as tres categorías desta convocatoria, cuxos premios se entregarán nun acto público que terá lugar o próximo 26 de xuño en Madrid.
Os devanditos premios recoñecen as mellores iniciativas e accións no campo das Tecnoloxías da Información e a Comunicación (TIC) aplicadas á mellora da calidade de vida das persoas con discapacidade, así como ás empresas, entidades ou organizacións que desenvolvesen un labor continuado no campo da accesibilidade TIC.
Categoría A
Na categoría A, que distingue ao mellor produto ou servizo baseado en tecnoloxías da información e a comunicación para a mellora da calidade de vida das persoas con discapacidade que xa estean dispoñibles ou para os que se conte cun plan de implantación a curto prazo, o xurado dos premios, reunido este mércores en Madrid, seleccionou a seis programas finalistas: ‘DownTown, Aventura no Metro', desenvolvido polo CEIEC, da Universidade Francisco de Vitoria; ‘Startit' (accesibilidade á comunicación sen necesidade de equipamento), de APTENT Solucións; ‘Dicionario fácil', obra de Plena Inclusión Madrid; ‘Audífonos conectados', de GN Hearing Care; ‘EVA Facial Mouse', da Fundación Vodafone España, e ‘PervasiveSub', de Telefónica.
O programa ‘DownTown, Aventura no Metro', desenvolvido polo CEIEC, da Universidade Francisco de Vitoria, en colaboración con Down Madrid, está orientado a facilitar a integración das persoas con discapacidade intelectual no transporte urbano e nel recreouse a rede completa de Metro de Madrid.
Pola súa banda, ‘Startit (accesibilidade á comunicación sen necesidade de equipamento)', de APTENT Solucións, é unha aplicación que permite gozar de eventos en directo, xa que dispón de subtitulado, audiodescrición ou outros contidos adaptados como audioexplicacións fáciles que aparecen directamente no terminal móbil do usuario.
O ‘Dicionario fácil' de Plena Inclusión Madrid é un texto online que recolle definicións de termos en lectura fácil, complementadas con imaxes que axudan á súa comprensión.
En canto aos ‘Audífonos conectados', desenvolvidos por GN Hearing Care, constitúen un dispositivo portátil RESound Multi Mic para facilitar a accesibilidade nas reunións e cursos a persoas con audición parcial, posto que trasladan o sinal sonoro directamente ao produto de apoio do usuario.
Con respecto a ‘EVA Facial Mouse', da Fundación Vodafone España, é unha aplicación gratuíta que permite acceder ás funcións de terminais Android en modalidade mans-libres mediante movementos da cabeza, empregando a cámara frontal.
Finalmente, ‘PervasiveSub' é un sistema de Telefónica deseñado para ofrecer ás persoas xordocegas os subtítulos da TDT mediante unha aplicación móbil (GoAll) para que logo os poidan ler coa liña braille.
Categoría B
Dentro do apartado B, que recoñece á persoa, empresa, entidade ou organización que máis destacase pola súa traxectoria continuada en materia de mellora da accesibilidade TIC, os traballos finalistas son cinco e pertencen ás seguintes entidades: Samsung Electronics Iberia, Aprendices Visuais, TECSOS, Caixa de Enxeñeiros e á Asociación para a Reeducación Auditiva do Neno Xordo de Burgos.
Samsung Electronics Iberia chegou á final dos Premios Discapnet na súa categoría pola integración da accesibilidade nos seus dispositivos, facilitando a Amóvil o acceso aos seus terminais para a súa avaliación; pola inclusión de tecnoloxía na Casa Accesible da Fundación ONCE; o desenvolvemento de cursos sobre accesibilidade aos terminais móbiles en máis de 35 direccións da ONCE, e polos descontos en tecnoloxía accesible para persoas con discapacidade.
Aprendices Visuais conseguiuno polo desenvolvemento de máis de 20 contos e aplicacións interactivas con pictogramas, actividades formativas orientadas a aprender sobre o autismo e un documental para dar visibilidade a este perfil de usuario.
En canto a TECSOS, Fundación Tecnoloxías Sociais, é finalista pola súa traxectoria no desenvolvemento de servizos de teleasistencia inclusivos, que empezaron coa discapacidade auditiva e que estenderon logo a outros perfís de usuario.
A Caixa de Enxeñeiros, pola súa banda, pola creación da Banca dixital accesible, que ten en conta a accesibilidade na web e nas aplicacións móbiles, así como no cartón para a firma segura.
E por último, a Asociación para a Reeducación Auditiva para o Neno Xordo de Burgos (ARANSBUR) chegou á final destes galardóns pola súa traxectoria de 40 anos centrada en achegar a voz ás persoas con discapacidade auditiva, pola creación de emprego para persoas con discapacidade e por ofrecer subtitulado a máis dun millón de usuarios con este tipo de discapacidade desde o CEE Mira o que che digo, entre outras accións.
Categoría C
Finalmente, á categoría C, que recoñece ao proxecto de emprendemento que destaque por potenciar a accesibilidade TIC, chegaron tres finalistas: ‘App&Town Compagnon', de Mass Factory; ‘Blind Explorer', de Geko Navsat, e ‘Werium Enlaza', obra de Werium.
‘App&Town Compagnon', de Mass Factory, é un sistema de transporte asistido extremo-a-extremo, para persoas con discapacidade, maiores, menores e outros colectivos, que permite realizar desprazamentos en transporte público a través dunha aplicación móbil e unha continua monitoraxe dos usuarios desde calquera lugar e dispositivo.
Pola súa banda, ‘Blind Explorer' é unha solución de navegación persoal desenvolvida por Geko Navsat para guiar a persoas con discapacidade visual. O uso de auriculares de transmisión ósea e un dispositivo de posicionamento de alta precisión completan a aplicación móbil para achegar unha solución precisa e confortable.
E por último, ‘Werium Enlaza', obra de Werium, é un sensor baseado en tecnoloxía inercial que permite a captura do movemento para a interacción co computador e que pretende apoiar os procesos de rehabilitación a través de videoxogos terapéuticos.
En canto á dotación dos premios, consistirá na entrega dunha obra orixinal dun prestixioso artista con discapacidade a cada persoa ou entidade galardoadas dentro das categorías A e B, e nun cheque de 5.000 euros para o premiado no apartado C, que deberá destinar integramente ao desenvolvemento do proxecto de emprendemento polo que se lle recoñeceu.
Máis información na web dos: Premios Discapnet IV Edición
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...