Este sistema traduce as intencións do usuario en comandos que permiten acender ou apagar a televisión, as luces ou activar un electrodoméstico, e navegar por Internet ou mandar un correo electrónico.
Para lograr descifrar os sinais cerebrais que emite o usuario e convertelas en comandos, é necesario pasar por catro etapas. Nunha primeira etapa fíltranse os sinais de electroencefalograma (EEG) para eliminar outros aspectos, como parpadeos ou movementos oculares ou muscualares, que se poden superpoñer aos sinais que son clave para este sistema de BCI.
A continuación, extráense unha serie de características específicas dos sinais EEG e aplícanse métodos de selección para escoller as máis significativas para entender as intencións do usuario.
Por último, os datos finais tradúcense nunha serie de características para a selección dun comando concreto.
O sistema está desenvolvido e patentado, e xa se probou con numerosas persoas, principalmente con esclerose múltiple, que foron capaces, por exemplo, de navegar por Internet, mandar un tweet ou enviar un correo electrónico utilizando unicamente o seu cerebro.
Estímase que en España 979.200 persoas padecen algún tipo de discapacidade visual, das cales 58.300 son cegas totais e 920.900 teñen baixa visión. Unha persoa sofre de baixa visión cando non ve coa suficiente calidade como para manexarse diariamente con independencia. Persoas con dislexia, retinopatía diabética ou glaucoma teñen serias dificultades á hora de ler libros, xornais, carteis na rúa ou o supermercado, textos no computador ou no móbil… e tampouco recoñecen ás persoas coñecidas.
A firma israelí OrCam Technologies Ltd. propúxose mellorar a vida de máis de 285 millóns de persoas en todo o mundo a través da súa tecnoloxía innovadora. O dispositivo de lectura e recoñecemento visual OrCam MyEye®, distribuído en España por Essilor, permite oír o que non se ve.
OrCam MyEye® é un dispositivo tecnolóxico que se axusta á patilla das lentes. Baseándose na aprendizaxe por intelixencia artificial dos algoritmos desenvolvidos pola empresa israelí OrCam, o dispositivo permite ás persoas con discapacidade para capturar información visual (cegueira total, enfermidade, discapacidade visual, dislexia, etc.) manter a súa autonomía e independencia.
O dispositivo converte a información visual en información de audio practicamente a tempo real, a través dun sistema integrado que se compón dunha unidade portátil e unha cámara, que se coloca nas lentes. A unidade pode ler texto, recoñecer caras e identificar produtos para as persoas que son cegas ou deficientes visuais.
OrCam MyEye® le calquera texto impreso ou dixital en calquera superficie, incluíndo xornais, libros, pantallas de computador, menús de restaurantes, as etiquetas dos produtos do supermercado e letreiros da rúa, transmitindo todo ao instante ao usuario a través dun mini altofalante incorporado. Actívase mediante un simple xesto intuitivo, sinalando co dedo ou pulsando un botón, e funciona de forma autónoma, sen necesidade de contar cunha conexión a Internet ou a un computador.
O Colexio Profesional de Enxeñaría en Informática de Galicia (CPEIG) vén de dar a coñecer o nome da profesional que este ano vai ser distinguida co seu Premio Ada Byron, un galardón co que a entidade profesional quere facer visible o traballo da muller no ámbito informático. Segundo informou o CPEIG, o premio irá dar este ano a mans de María José Talavera, directora xeral de VMware Iberia. O Premio Ada Byron, que homenaxea no seu nome á investigadora considerada como a primeira programadora (buscando reivindicar a súa figura e visualizar, por extensión, a longa listaxe de mulleres innovadoras e científicas eclipsadas polos homes ao longo da historia), será entregado no marco da Noite da Enxeñaría en Informática de Galicia, este venres 16 en Santiago.
María José Talavera é na actualidade a directora xeral de VMware Iberia. Desde as oficinas de VMware en Madrid, encárgase de reforzar o liderado da compañía no mercado da mobilidade e dos servizos na nube, así coma o desenvolvemento de negocio de VMware en España e Portugal. Licenciada en Informática pola Universidade Politécnica de Madrid, comezou a súa andaina profesional no sector TI en Lambda Internacional, unha multinacional americana de consultaría de TI. Posteriormente, María José Talavera incorporouse á división Data Management de IBM, primeiro na área de servizos e despois na área de Software. Máis tarde, converteuse na responsable de vendas de Software para o Sector Financeiro en IBM e despois na responsable de Vendas Globais para BBVA en IBM, onde se familiarizou coas negociacións en contornas internacionais. No ano 2010, María José uniuse a Compuware, onde ocupou o cargo de directora xeral para España primeiro, e, a continuación, tamén para Portugal, até que se incorporou a VMware en marzo de 2012. Ao longo de máis de 25 anos de experiencia laboral, a premiada co Ada Byron traballa con paixón por contribuír ao desenvolvemento competitivo das empresas a través da tecnoloxía e coa consideración da importancia do factor humano para conseguilo, “froito da crenza de que a diversidade nos equipos reflicte mellor a realidade da vida e contribúe de forma significativa á innovación”, segundo sinala a propia galardoada.
Quen foi Ada Byron
Ada Byron foi unha escritora e matemática británica (1815-1852) que describiu a máquina analítica de Charles Babbage e está considerada como a primeira programadora. Deduciu e preveu a capacidade dos ordenadores para ir máis alá dos simples cálculos numéricos. O CPEIG elixiu o nome desta brillante muller para nomear un dos premios que entrega anualmente.
A Consellería de Cultura, Educación e Ordenación Universitaria acaba de publicar na súa páxina web a convocatoria dun novo programa de innovación educativa para introducir a robótica en Primaria. Deste xeito, o departamento educativo da Xunta de Galicia dotará de kits de robótica a un máximo de 120 centros docentes públicos durante o curso 2017/18 co fin de que o alumnado poida iniciarse na experiencia de programación básica, robótica e construción.
En concreto, o material estará conformado por seis robots de uso educativo adecuados ás idades do alumnado; seis kits de construción, que permitirán a realización dun mínimo de cinco proxectos diferentes; así como un manual de uso e guía didáctica.
Tal e como figura na resolución, que se pode consultar no seguinte enlace http://www.edu.xunta.gal/portal/node/22426, cada centro, dentro da súa autonomía, pode integrar a robótica de diversas maneiras: mediante unha materia de libre configuración de centro, dentro das materias de forma transversal, a través de programas de innovación educativa da Consellería ou mediante obradoiros que se desenvolvan fóra do horario lectivo.
A iniciativa vai dirixida a alumnado que curse 4º, 5º ou 6º de Primaria durante o vindeiro curso, que ademais de adquirir nocións básicas sobre robótica e programación, tamén traballará as áreas denominadas STEM (Ciencias, Tecnoloxía, Enxeñaría e Matemáticas). O prazo de presentación de solicitudes e documentación finalizará o 29 de setembro de 2017.
Este programa enmárcase na futura Estratexia galega para a educación dixital 2020, que ten como prioridade incrementar as vocacións científicas e tecnolóxicas entre o estudantado galego, ao tempo de dotalos dos recursos e ferramentas necesarias para o uso seguro da tecnoloxía.
Neste contexto, cómpre lembrar que desde o curso 2015/16, e a proposta da Consellería, xa están en marcha as materias de libre configuración autonómica de Programación en 1º e 2º da ESO (132 centros ofertárona este curso, con 4.000 matriculados) e de Robótica en Bacharelato (ofertada por 92 centros e con case 600 alumnos matriculados).
De xeito parecido ao que conleva a introdución da Robótica en Primaria, a impartición destas materias en Secundaria leva aparellada a dotación de equipamento específico, como son os novos kits de robótica educativa, placas de comunicación e impresoras 3D, cos que a Consellería está fornecendo á maioría dos IES de Galicia, unhas ferramentas de apoio ao proceso de ensino-aprendizaxe para impartir coñecementos e traballar desde unha perspectiva integrada e interdisciplinar; non só desde o ámbito tecnolóxico, senón que abrangue materias como as matemáticas, física, química, ou as devanditas materias de libre configuración autonómica.
Así mesmo, por primeira vez no curso actual puxéronse en marcha os “Club de Ciencia”, unha iniciativa que ten como obxectivo promover o espírito científico e investigador para invitar ao alumnado a descubrir diversos campos da ciencia e as posibilidades de aplicación.
Ademais, a Consellería tamén dispón dun plan de formación específico en Robótica, Programación e Impresión 3D dirixido ao profesorado vinculado ás ensinanzas tecnolóxicas para, deste xeito, reforzar os seus coñecementos nesta materia.
A Fundación TIC da Deputación de Lugo e a Xerencia Integrada de Lugo, Cervo e Monforte do SERGAS veñen de unir forzas para impulsar hábitos saudables entre a poboación da provincia. E farano, segundo fixeron saber, a través da promoción na Internet e nas redes sociais de pezas audiovisuais informativas acerca das cousas que podemos facer para mellorar a nosa calidade de vida. Estas pezas serán elaboradas por alumnado e bolseiros da Fundación TIC baixo a supervisión de profesionais. Poderemos velas na web da Fundación, no seu Facebook e na súa canle de YouTube, entre outros espazos en liña.
A iniciativa conxunta foi dada a coñecer polo patrón da entidade dependente da Deputación de Lugo, Álvaro Santos, e o xerente da Xerencia Integrada, Ramón Ares. O convenio asinado abrangue tamén traballos informativos sobre o funcionamento dos servizos dos centros sanitarios así coma dos actos de conmemoración do Día Internacional de Enfermería. Santos sinalou que “con este acordo queremos difundir o importante labor social dos profesionais sanitarios na promoción de condutas e hábitos saudábeis entre os lucenses, fundamentais para previr enfermidades e ter unha boa calidade de vida”. Ademais, o patrón da TIC afirmou que “esta é unha oportunidade máis para que os alumnos e titulados en prácticas da nosa Escola de Imaxe e Son leven á práctica os seus coñecementos en realización e produción nun escenario real”. Segundo lembra o organismo provincial, con este acordo supéranse os 170 convenios de colaboración que a TIC ten asinados con organizacións sen ánimo de lucro da provincia.
Cruz Vermella en Galicia e a Asociación de Enxeñeiros de Telecomunicación de Galicia (AETG) asinaron un acordo de colaboración destinado a contribuír ao fomento da Sociedade da Información e o desenvolvemento do TIC en Galicia. Na formalización do acordo participaron a presidenta autonómica de Cruz Vermella en Galicia, Carmen Colmeiro, e o presidente da Asociación de Enxeñeiros de Telecomunicación de Galicia, Julio Sánchez. Con este marco de cooperación, as enxeñeiras e enxeñeiros da AETG-COETG impulsarán e fortalecerán un dos principais eidos de traballo da devandita organización humanitaria: pór a innovación ao servizo das persoas mediante a posta en marcha de proxectos e solucións específicas.
Como lembraremos, a Cruz Vermella vai ser galardoada este venres durante a celebración da Noite da Enxeñaría en Informática do CPEIG. O colectivo profesional quixo recoñecer a repercusión acadada polo servizo de teleasistencia avanzada da ONG.
Volvendo ao acordo asinado hoxe, o acto serviu para facer un repaso polas traballos despregados pola Cruz Vermella en materia tecnolóxica: o devandito servizo de teleasistencia, a xeolocalización, a videoatención ou a proximidade. A idea é tirar partida do pacto coa AETG para “continuar esta liña de traballo, mellorando os servizos xa existentes e ofrecendo outros novos”.
Carmen Colmeiro fixo saber que as ditas ferramentas TIC da organización van dirixidas sobre todo ás persoas maiores ou ás persoas con diversidades funcionais ou motrices ou cognitivas. Colmeiro tamén lembrou que a Cruz Vermella ten “moi presentes ás súas coidadoras e coidadores” xa que estes servizos “resúltanlles igualmente útiles á hora de velar polas persoas dependentes e mesmo hai aplicacións especiais pensadas para elas eles”.
A Asociación de Enxeñeiros de Telecomunicación de Galicia, pola súa banda, recordou que o seu obxectivo é contribuír ao desenvolvemento e progreso da “nosa Comunidade Autónoma” a través “da potenciación das telecomunicacións, fomentando o desenvolvemento e a incorporación das novas tecnoloxías da comunicación e a Sociedade da Información”.
Coa sinatura deste acordo, dixo, a AETG-COETG empresta “especial atención á área socio-sanitaria na cal o fomento das novas tecnoloxías incide directamente na calidade de vida das persoas”.
A Axencia para a Modernización Tecnolóxica de Galicia (Amtega) abre mañá xoves o prazo de inscrición para a obtención da certificación galega de competencias dixitais en ofimática (CODIX). Así se recolle na convocatoria publicada hoxe no Diario Oficial de Galicia (DOG) con 180 prazas para o curso de teleformación preparatorio que comezará o día 4 de setembro e rematará o 26 de novembro, previo ao exame presencial que terá lugar na última semana dese mes de novembro.
Para acceder a este curso os únicos requisitos necesarios son ser maior de 16 anos e estar dado de alta como usuario da rede CeMIT. A inscrición realizarase a través de internet na web da rede CeMIT (https://cemit.xunta.gal), durante os cinco días hábiles desde o día seguinte á publicación da convocatoria no DOG.
Unha vez finalizado o prazo de inscrición, publicarase a relación provisional das 180 persoas admitidas na páxina web da rede CeMIT así como un número adecuado de reservas. As persoas admitidas deberán aboar posteriormente unha taxa de 10,10 euros correspondente aos dereitos de exame, sendo excluídos aqueles aspirantes que non aboen a citada taxa.
O curso de preparación impártese na modalidade de teleformación con titorías de apoio, polo que soamente será necesario contar cun ordenador persoal e conexión a internet para seguir a formación dende calquera lugar e en calquera momento.
Plan Formativo Ofimático de Galicia
Durante as 12 semanas de duración deste curso, as persoas matriculadas formaranse nos contidos que compoñen o Plan Formativo Ofimático de Galicia, composto actualmente polas cinco unidades nas que se estrutura o módulo formativo MF0233_2 «Ofimática» (190 horas) do Repertorio Nacional de certificados de profesionalidade:
Todos estes contidos están abertos e poden ser consultados libremente na plataforma de teleformación da rede CeMIT (https://cemit.xunta.es/ema), baixo a modalidade de autoformación.
Preto de 1.500 prazas convocadas para este ano 2017
Esta é a segunda convocatoria de teleformación titorizada do Plan de Formación da rede CeMIT 2017. Ademais, convócanse en marzo e outubro outras dúas convocatorias de exames presenciais en marzo e outubro cun total de 1.000 prazas para aqueles cidadáns que xa posúan os coñecementos necesarios ou que opten por formarse pola súa conta.
Dende a habilitación da rede CeMIT para a formación e avaliación dos contidos formativos do CODIX en maio de 2014, foron máis de 4.500 as prazas convocadas nas súas diferentes modalidades (1.570 en cursos de teleformación titorizada e 3.104 en probas presenciais de acceso libre) e máis de 2.100 as persoas que obtiveron a certificación emitida por parte da Amtega despois de superar as probas presenciais realizadas nas aulas da rede CeMIT.
A estes datos hai que engadir as mais de 300 actividades e cursos en ofimática en software libre que veñen realizando as diferentes aulas de forma presencial durante o último ano como preparación orientada á presentación para estas probas libres, así como os 2.500 accesos aos contidos específicos do CODIX aloxados na plataforma de teleformación a través de internet (http://cemit.xunta.es/ema) e abertos para ser consultados en calquera momento.
A Rede CeMIT
A Rede CeMIT (Rede de Centros para a Modernización e a Inclusión Tecnolóxica), está integrada por 98 aulas, presentes en 92 concellos e 53 comarcas co obxectivo de promover o uso das novas tecnoloxías entre a poboación, con especial atención aos colectivos máis afectados pola fenda dixital, fomentar a formación dixital entre os profesionais galegos e mostrar á pemes e micropemes as vantaxes da sociedade da información.
Os premios Fundación Randstad recoñecen o traballo de empresas, institucións e medios de comunicación que facilitan a integración laboral de profesionais en risco de exclusión social. No acto de entrega destes galardóns participaron o secretario de Estado de Servizos Sociais e Igualdade, Mario Garcés; o conselleiro de Políticas Sociais e Familia da Comunidade de Madrid, Carlos Izquierdo, e o presidente executivo de Randstad e presidente da Fundación Randstad , Rodrigo Martín.
Segundo Martín, desde Randstad e Fundación Randstad trabállase "para lograr o emprego pleno e produtivo e para garantir un traballo decente para todos os homes e mulleres, incluídos os mozos e as persoas con discapacidade".
Pola súa banda, Garcés encomiou o esforzo desta Fundación durante os seus 13 anos de historia e destacou que "a única discapacidade que existe é a falta de actitude". Ademais, animou a empresas e axentes sociais a seguir traballando unidos, xa que "xuntos podemos chegar onde queiramos chegar".
Nesta XII edición, Alsa recibiu o galardón á categoría Empresas polo seu proxecto 'De que es Capaz?', unha iniciativa que impartiu 10.000 horas de formación beneficiando a 351 persoas con discapacidade desde o ano 2007.
Specialisterne foi a empresa elixida na categoría Pemes polo seu traballo de integración coas persoas con TEA ou Asperger. Dos 66 empregados que a compañía ten en España, o 75% das persoas teñen algún destes diagnósticos.
Na categoría Institucional, Fundación Randstad premiou o programa 'Xuntos Somos Capaces' de Fundación Mapfre, polo seu traballo formativo a profesionais con discapacidade intelectual. Este programa promove a empregabilidade e a formación integral deste colectivo. Desde 2010 conseguiuse que 2.410 persoas gozasen desta formación.
O portal Discapnet foi o premiado na categoría Comunicación por ser a plataforma de referencia no sector polo seu compromiso coa información para persoas con problemas de comprensión da linguaxe escrita. Fundación Randstad recoñeceu o esforzo de Discapnet ao publicar ao longo de 2016 máis de 41.000 noticias e xerado información seguindo unha metodoloxía específica para conseguir contidos óptimos para este colectivo. O encargado de recoller a distinción foi José Luis Martínez Donoso, director xeral da Fundación ONCE.
A Mención de Honra foi para o xornalista deportivo Javier Hernández Aguirán, por ser referente dun dos valores máis importantes de Fundación Randstad: capacidade de esforzo para transformar a discapacidade en capacidade de superación. Javier Hernández traballou como xornalista deportivo, como adestrador profesional de fútbol e é presidente da Asociación 'Dos Pés á cabeza'. Ademais, participou nos Xogos Paralímpicos de Londres 2012 e recentemente foi nomeado Doutor Honoris Causa polo Claustro Iberoamericano en Cidade de México.
O programa Depo en marcha, a iniciativa da Deputación de Pontevedra para favorecer o envellecemento activo, incluirá actividades tecnolóxico-dixitais para os nosos maiores. Así o vén de informar Carmela Silva, a presidenta da entidade provincial, lembrando (nun plano máis xenérico) que os obradoiros serán desenvolvidos nos concellos (39) pola UTE formada polas empresas Forox Innovación e Marexada, e que o programa abrangue un centenar de actividades con 8 temáticas diferentes pensadas para a terceira idade, unha das canles será unha temática TIC.
A presidenta salientou a importancia que teñen iniciativas como esta, destinadas a "favorecer o envellecemento activo e que queren contribuír á optimización das oportunidades de saúde, participación e seguridade da terceira idade", así como a establecer relacións sociais e favorecer a implicación en actividades que melloren o estado anímico das persoas maiores. Tamén informou de que xa solicitaron participar este ano no programa un total de 270 entidades de maiores, persoas xubiladas e pensionistas de toda a provincia. Delas, 216 cumprían todos os requisitos e polo tanto son as adxudicatarias dos 100 obradoiros que se van a realizar. O prezo da matrícula será de 6 euros por actividade.
Os 8 obradoiros que se impartirán nesta ocasión serán En Rede (Internet, correo electrónico e manexo do móbil, informática de iniciación e informática avanzada), Traballando coas Mans (arte con flores, cestería, elaboración de xabóns, iniciación ao encaixe de palillos, restauración de mobles e tapicería e traballos coas mans), Entre Fogóns(cociña galega, conservas artesanais, licores caseiros, panadería e repostería e tapiñas e petiscos),Aprendendo da Natureza (plantas medicinais; Móvete: pilates, ioga, ximnasia de mantemento e zumba), Activando Corpo e Mente (conservando a memoria, musicoterapia, risoterapia e control e manexo da ansiedade e o estrés), Enredando (xogos tradicionais e teatro), e Dálle Marcha (bailes de salón, pandeireta e canto popular).
As actividades terán lugar en 39 concellos da provincia: Agolada, Arbo, Barro, Baiona, Bueu, Caldas de Reis, Cangas, Cerdedo-Cotobade, Covelo, Cuntis, A Estrada, Forcarei, Fornelos de Montes, Gondomar, A Guarda, Lalín, Marín, Meaño, Moaña, Moraña, Mondariz, Mos, Nigrán, Pazos, Poio, Ponteareas, Pontevedra, Redondela, Ribadumia, O Rosal, Salceda de Caselas, Sanxenxo, Silleda, Soutomaior, Tui, Valga, Vigo, Vilagarcía de Arousa e Vilanova de Arousa.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...