A ONG Ecos do Sur recibiu o premio Obra Social la Caixa á innovación social polo seu método para combater o discurso do odio contra inmigrantes e minorías étnicas nos medios dixitais.
Estes premios recoñecen a capacidade de innovación e transformación social das organizacións que, adoptando novas metodoloxías, contribúen a unha mellora efectiva da vida das persoas ás cales se dirixen. Por este motivo, la Caixa quixo premiar á ONG coruñesa polo seu proxecto. Ecos do Sur aposta pola creación de redes de apoio, o seguimento e a análise do discurso na internet e o ciberactivismo como estratexia integral para acabar co racismo. Para conseguilo, dá protagonismo a mozos e migrantes para frear as mensaxes de odio e crear unha paisaxe dixital de respecto, convivencia e cohesión social.
Dez entidades foron as premiadas -recibíronse 327 candidaturas- por dar visibilidade aos problemas sociais a través da innovación. Cada unha delas, entre as que se atopa Ecos do Sur, recibiu 15.000 euros e o seu proxecto premiado será financiado.
A Fundación Altran para a Innovación doou e xestionou máis de 2.500 horas de voluntariado e consultoría en preto de 50 proxectos sociais, contando coa axuda de máis de 400 voluntarios de toda España. Segundo informou a entidade, estas son algunhas das cifras que se desprenden do balance da súa actividade desde a súa creación como entidade sen ánimo de lucro, a finais de 2016.
A finalidade da fundación, que coopera con máis de 15 entidades sen ánimo de lucro, é promover o desenvolvemento da innovación tecnolóxica, a ciencia, a mellora das condicións de vida e a educación a favor do interese xeral e dos sectores máis desfavorecidos da sociedade.
A súa actividade desenvólvese sobre dous eixos. Por unha banda, colaborando co Terceiro Sector para facelo máis competitivo e eficaz na súa axuda, e por outro, cooperando no desenvolvemento de proxectos estratéxicos co Terceiro Sector, a través de metodoloxías innovadoras e novas tecnoloxías, en favor dos nenos, estudantes, as persoas maiores e as persoas en risco de exclusión social ou discapacitados.
Para iso, a entidade actúa ao redor de tres programas: un voluntariado corporativo para promover o voluntariado social ofrecendo os medios e actividades necesarias redundando especialmente nos sectores máis desfavorecidos; unha integración Social co obxectivo de contribuír á mellora das condicións de vida dos nenos, as persoas maiores e as persoas en risco de exclusión social ou discapacitados, a través de proxectos innovadores e tecnolóxicos que melloren as súas condicións de vida; e a "innovando talento" para impulsar e divulgar a innovación, a ciencia e a tecnoloxía.
Así mesmo, a Fundación Altran coopera con Cruz Vermella Española levando a cabo proxectos socialmente innovadores para mellorar a calidade de vida das persoas maiores.
Microsoft vén de estrear na App Store unha aplicación de balde e con grandísima utilidade, que polo momento só está dispoñible en inglés, pero que demostra unha das aplicacións máis prácticas que podemos ver da intelixencia artificial: o recoñecemento de imaxes para axudar a persoas con eivas visuais.
A nova aplicación móbil chámase Seeing AI: Talking Camera for the Blind, ou sexa, que é unha cámara falante para invidentes, que empregando a cámara do smartphone como uns ollos artificiais pode narrar o que ten diante, de xeito que ao usuario cego ou con grandes problemas de visión pode indicarlle quen é a persoa que ten diante e as súas emocións, describir escenas (función aínda experimental), identificar cartos (funcionalidade que estará dispoñible en breve), recoñecemento de produtos (facilita o escaneo dos seus códigos de barras para facilitar a súa identificación) e tamén permite escanear documentos de texto (recoñecendo o texto) e ler en voz alta pequenos textos que aparezan fronte a cámara (como poden ser carteis indicativos).
Cómpre lembrar que esta tecnoloxía dista moito de ser perfecta, pero dado que está baseada en intelixencia artificial, canto maior sexa o seu uso, maior será a súa precisión, de xeito que no futuro poderá ser de grande axuda para moitas persoas, aínda que na actualidade xa podemos ter un atractivo avance do seu potencial a través da nova aplicación para iPhone de Microsoft.
Fundación Universia, co apoio de Banco Santander, e Fundación Konecta presentan a VI Edición do Programa Axudas a Proxectos Inclusivos.
Esta iniciativa promove a inclusión social e laboral das persoas con discapacidade dentro do territorio nacional, e serve como canle directa para coñecer as necesidades das organizacións do Terceiro Sector. Fundación Konecta participa por terceiro ano consecutivo nesta iniciativa consolidada da Fundación Universia.
Como novidade, neste ano a dotación económica ascende a 50.000 euros, un 67% superior á edición anterior, cuxa dotación era de 30.000 euros.
Esta inxección de capital é mostra dun aposta firme polo proxecto, en atención a todos os ámbitos de actuación da Fundación Universia para impulsar proxectos dirixidos á mellora da empregabilidade, a autonomía e o empoderamento das persoas con discapacidade.
As entidades participantes, organizacións sen ánimo de lucro e universidades españolas poden presentar proxectos que se encadren nalgunha das cinco categorías que se propoñen: Educación, Emprego, Investigación, Cultura e Deporte.
Isto supón dous cambios respecto ao pasado ano: 1. Apostar polo deporte como medio de inclusión laboral e de adquisición de competencias profesionais das persoas con discapacidade. 2. Desdobrar a categoría ‘Emprego e Formación' pasada, incluíndo nesta ocasión: Educación (proxectos formativos centrados no desenvolvemento profesional en relación co potencial e o talento das persoas con discapacidade como elemento de diferenciación), e emprego: proxectos orientados ao impulso do emprego ordinario a través da incorporación laboral e profesional e/ou relacionados co autoemprego e o emprendemento das persoas con discapacidade.
Ecosistema de apoio e rede inclusiva
Outra novidade nesta edición, a Fundación Universia desenvolverá un Ecosistema de Apoio con outras organizacións participantes do programa, que sirva para conectar necesidades-proxectos-oportunidades, e como ponte para xerar unha rede de contactos.
Dentro do Ecosistema de Apoio ofreceranse ademais sesións formativas ‘mentorizadas' por expertos ás entidades que participen nos proxectos inclusivos, para mellorar ou reforzar a innovación das súas iniciativas.
O programa admite solicitudes ata o 1 de setembro
As persoas interesadas nestas axudas poden presentar a súa solicitude ata o 1 de setembro de 2017 a través da ligazón onde poden consultar as bases. Os proxectos gañadores serán seleccionados por unha comisión evaluadora que terá en conta a súa repercusión e impacto, o carácter innovador, a viabilidade do proxecto, o plan de difusión e resultados, etc.
O fallo publicarase o 2 de outubro.
Case dous mil candidaturas nun lustro
Durante os cinco anos de vida do Programa de Axudas a Proxectos Inclusivos, recibíronse 1.730 candidaturas de toda España. En pasadas edicións premiouse a universidades, fundacións, asociacións, federacións, confederacións e cooperativas sen ánimo de lucro, con localizacións xeográficas dispersas dentro do territorio español: A Coruña, Asturias, Navarra, Burgos, Segovia, Madrid, Barcelona e Almería.
Deste contido de apoio, Ilunión, o grupo de empresas da ONCE, leva a cabo a audiodescrición e subtitulado das películas para que persoas con discapacidade visual ou auditiva poidan ir a calquera cinema para gozar das películas.
A última película na que traballou Ilunion é ‘Cita a cegas coa vida', o filme de Marc Rothemud que se estrea este venres.
Para poder utilizar estas axudas, os usuarios teñen que descargarse a aplicación WhatsCine e o tipo de contido que queren utilizar, xa sexa audiodescrición, lingua de signos ou subtitulado.
A continuación, a aplicación sincronizarase automaticamente coa película a través do son e xa estará listo.
A II edición do TEK-FEST será un Encontro de Tecnoloxía e Patrimonio que conectará a memoria da cidade cos tecnoloxías emerxentes a través de distintos obradoiros e actividades que se realizarán en lugares emblemáticos de Pontevedra, do 25 ao 30 de setembro. A concelleira de Promoción da Cidade, Anabel Gulías, xunto co concelleiro de Xuventude e Novas Tecnoloxías, Alberto Oubiña, e o delegado de Cultura da Deputación de Pontevedra, Xosé Leal , acompañados polo director creativo do TEK-FEST, Toño Cabanelas, e a directora de Esdemga, Lola Dopico, avanzou esta mañá as catro liñas de contido para esta edición do encontro e destacaron a integración dos «novos socios» que colaboran este ano no TEK-FEST.
A incorporación de Esdemga á organización do festival é unha das principais novidades deste ano nun TEK-FEST que quere mirar a distintos aspectos do patrimonio da cidade dende a perspectiva tecnolóxica e a artesanía dixital. E para iso proponse «crear sinerxías sumando novos axentes á organización deste encontro, como a Deputación de Pontevedra ou a Universidade de Vigo», subliñou Anabel Gulías. Pola súa parte, Xosé Leal destacou «a procura de novos públicos que buscan iniciativas como o TEK-FEST, coa misión de democratizar a tecnoloxía e facela accesible, ao tempo que se pon en valor un patrimonio moi vivo» como é o de Pontevedra. O concelleiro Alberto Oubiña manifestou a oportunidade que volve supoñer este evento para «situar a Pontevedra no mapa das tecnoloxías emerxentes a través do noso patrimonio, para demostrarlle ao mundo que somos potencia como país».
Lola Dopico insistiu na idea de poñer a colaborar distintas entidades en proxectos coma este e, no que respecta á Universidade, integrar actividades dirixidas ao estudantado pero tamén á comunidade investigadora. Nesta liña o grupo de investigación DX7 vén traballando dende hai un tempo nas conexións entre os procesos artesanais da moda e máis a tecnoloxía, un tema que estará presente no TEK-FEST deste ano a través do taller Calor+Memoria que impartirá Arantza Vilas de Pinaki Studios.
En canto ao concepto que preside este ano o festival, o seu director Toño Cabanelas, explicou que «se na súa primeira edición o lema do festival foi A cidade do futuro este ano o TEK-FEST quere realizar unha viaxe na outra dirección, do futuro ao pasado, que complete e enriqueza a experiencia do 2016, volvendo a mirada á memoria da cidade para seguir situando a Pontevedra na vangarda tecnolóxica».
A continuidade virá dada pola presenza da realidade virtual e aumentada, tecnoloxías que xa estiveron presentes na primeira edición do TEK-FEST, e que volverán protagonizar esta edición, nun momento de madurez no que «xa non se primará a tecnoloxía só, senón que os protagonistas serán os contidos. Queremos que a xente de Pontevedra poida acceder aos mellores contidos internacionais, tanto películas experimentais como contidos relacionados co patrimonio e a moda, e tamén imaxes en 360º producidas o ano pasado no propio TEK-FEST.». Será na Mostra VR que porá este ano en marcha o festival, outra das novidades desta edición.
O festival este ano terá así catro liñas fundamentais de actuación. En primeiro lugar, un obradoiro de VR + Patrimonio, impartido por Bermudas Land, ofrecerá aos participantes a posibilidade de reconstruír imaxes antigas da cidade pasándoas a un formato inmersivo en 360º. O segundo obradoiro, coordinado por Esdemga, leva por títuloCalor+Memoria e achegarase á memoria téxtil da cidade a través dos novos procesos de tratamento de superficies. Será impartido por Arantza Vilas, deseñadora e investigadora galega afincada en Londres, onde creou Pinaki Studios, e que destaca pola súa investigación en novas materias téxtiles. Tamén é coñecida por ter deseñado parte do vestiario da serie Game of Thrones.
Outro dos pratos fortes deste ano será a Homenaxe aos Tekis do século XX, coa que o TEK-FEST quere reivindicar o patrimonio dos inventores galegos. Os protagonistas desta homenaxe serán este ano os irmáns Portela Seijo, de Santiago de Compostela, que foron pioneiros na enxeñaría acústica e audiovisual patentando inventos como o magnetófono de cable de aceiro, que quixo comprar Philips en 1942, ou o Organ Sound , o mítico altofalante feito a base de cilindros e inspirado nos tubos do órgano da Catedral de Santiago. Precisamente o Organ Sound será obxecto durante o TEK-FEST dunha reconstrución a cargo do artesán dixital Miguel Espada, do estudio Espadaysantacruz, que xa o ano pasado participara no TEK-FEST coa instalación Light Kinetics inspirada na ponte do Burgo de Pontevedra.
A reconstrución do Organ Sound permitirá volver á vida a este singular aparello e reconvertelo nun instrumento de música electrónica, un modular synth, co que se fará unha acción sonora e audiovisual no TEK-FEST que servirá de homenaxe pública aos Portela Seijo, coa presenza dos seus herdeiros.
Por último, a mencionada Mostra VR traerá a Pontevedra unha selección internacional dos mellores contidos en realidade virtual, co foco posto nos contidos experimentais e naqueles relacionados coa moda e co patrimonio. Esta mostra está patrocinada por Samsung, que proporciona varios equipos e gafas de VR para que todos os pontevedreses que o desexen poidan acudir a ver en exclusiva estes filmes.
Todas as actividades do TEK-FEST deste ano serán gratuítas, incluídos os obradoiros de VR + Patrimonio e de Memoria téxtil de Pontevedra, que teñen prazas limitadas. Estes obradoiros están dirixidos a estudantes de Belas Artes, Moda e Comunicación Audiovisual, e tamén a profesionais dos ámbitos do deseño, a artesanía, a imaxe e a cultura dixital. Nas próximas semanas faranse públicas as convocatorias para que as persoas interesadas poidan inscribirse nos procesos de selección de participantes. A inscrición poderá facerse a partires da última semana de xullo a través da web do festival.
A directora da Axencia para a Modernización Tecnolóxica de Galicia (Amtega), Mar Pereira, destacou hoxe que a Axenda Dixital de Galicia 2020 investiu máis de 324 millóns de euros, 51 deles de capital privado, entre 2015 e 2016 para contribuír ao crecemento económico e á mellora social da Comunidade aplicando as vantaxes da tecnoloxía.
A responsable autonómica participou hoxe no I Encontro Red.es para a Cooperación Interterritorial en Servizos Públicos e Transformación Dixital, que se celebra na Universidade Internacional Menéndez Pelayo (UIMP) en Santander. Neste foro, Mar Pereira expuxo a experiencia de Galicia para impulsar a transformación dixital da economía na Comunidade.
Pereira destacou a posta en marcha en 2012 da Amtega como instrumento estratéxico e executivo para impulsar a modernización da administración pública e o desenvolvemento económico e social de Galicia. Desde a Axencia estase a desenvolver a segunda estratexia dixital do actual Goberno autonómico, a Axenda Dixital de Galicia 2020 (ADG2020) baixo un modelo de cooperación e participación continua de representantes do sector empresarial, do sector TIC, das institucións públicas e da sociedade civil.
Obxectivos
Neste proceso de transformación dixital, a responsable autonómica apuntou entre os retos o fomento do talento TIC e a adaptación da formación actual a un mercado que demanda perfiles cada vez máis especializados, tamén en Galicia.
Neste sentido sinalou a importancia do sector sector TIC galego no desenvolvemento da Axenda Dixital e destacou que en 2015 experimentou o maior incremento en número de empresas dos últimos cinco anos e que en 2016 superou, por primeira vez, os 16.000 empregados.
A dixitalización empresarial é outro dos eixos chave da transformación dixital, especialmente entre as pequenas e medianas empresas. Mar Pereira incidiu na importancia de facilitarlles este proceso con medidas específicas como os programas da Xunta formar a directivos de pemes e os de asesoramento especializado para a autónomos e pemes para aplicar solucións dixitais e de industria 4.0.
Tamén abordou a transformación dos servizos públicos, un proceso, no que recalcou, entran en xogo outros factores como as reformas normativas que se están a levar a cabo para conseguir a Administración que esperan os cidadáns do futuro. Neste ámbito, en Galicia incrementáronse os servizos online e puxéronse en marcha todas as pezas do expediente xudicial electrónico.
Respecto á conectividade, sinalou que xa Galicia ten en marcha un Plan para levar as redes ultrarrápidas a toda a Comunidade. As primeiras actuación en marcha están dirixidas a dotar a máis de 80 polígonos industriais de redes de ata 350Mpbs e unha liña de axudas para que empresas illadas do rural teñan acceso a internet de máis de 30 Mbps.
O produto 'Mouse4all' consiste nunha solución de accesibilidade que permite manexar dispositivos táctiles Android a persoas con discapacidade física sen necesidade de tocar a pantalla, de maneira que con só mover unha panca co mentón, por exemplo, as persoas con graves problemas de mobilidade poderán acceder a Internet, redes sociais, xogos e calquera aplicación.
Creado polos enxeñeiros españois José Ángel Jiménez Vadillo e Javier Montaner Gutiérrez, 'Mouse4all' permitirá ás persoas con discapacidade motora severa, consecuencia dunha parálise cerebral, lesión medular, tetraplexia, esclerose múltiple, esclerose lateral amiotrófica ou enfermidade neuromuscular interactuar, compartir sentimentos e ideas, estar ao tanto da actualidade, formarse, traballar ou divertirse.
Desta maneira, calquera persoa que conte cun mínimo de mobilidade que lle permita accionar un pulsador con algunha parte do seu corpo, poderá traducir esa pulsación a accións de movemento en pantalla: desprazar, pulsar, arrastrar. Se a persoa conta un pouco máis de mobilidade é preferible utilizar un rato adaptado de tipo bóla ('trackball') ou panca ('joystick').
Estes periféricos conéctanse á caixa 'Mouse4all' -que se pode adquirir en mouse4all.com a un prezo de 159 euros- que se conecta ao móbil ou tableta e a través da 'app', que pode descargarse gratuitamente a través de Google Play. Os seus creadores defenderon que "ao estar desenvolvidos de forma conxunta a caixa e a 'app', ofrece unha maior fiabilidade, versatilidade e facilidade de manexo para os usuarios".
Así mesmo, remarcaron que 'Mouse4all' "é unha solución que creamos á que se poden conectar ratos pulsadores e pancas que utilizan xa os usuarios na contorna PC" para que "persoas que non poden utilizar unha pantalla táctil por algún tipo de discapacidade teñan acceso a unha tableta ou teléfono para comunicarse co resto do mundo".
"Supúxome liberdade"
Durante máis dun ano, o produto perfeccionouse mediante probas realizadas por usuarios con discapacidade física e profesionais do sector, grazas ao traballo conxunto con entidades como os centros DATO e APAM, Confederación Aspace e o Centro Estatal de Autonomía Persoal e Axudas Técnicas (Ceapat Imserso).
Obtivo varios recoñecementos, como o 'Premio Vodafone de Innovación 2016' na categoría de accesibilidade TIC física. Actualmente participa en 'The European Social Innovation Competition 2017', onde foi seleccionado xunto a 29 proxectos máis de entre 800 candidaturas de toda Europa.
Rafa, usuario desta ferramenta, fixo fincapé en que "'Mouse4all' supúxome sentir a liberdade de expresar os meus pensamentos con total privacidade e poder participar nas redes sociais con total liberdade".
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...