O alcalde de Narón, José Manuel Blanco, e a edil de Formación, Novas Tecnoloxías e Mocidade, Natalia Hermida, entregaron o pasado venres, no consistorio, os diplomas correspondentes a media ducia de accións formativas das devanditas áreas. Estas convocatorias, impulsadas desde o Concello, dirixíronse a achegar coñecementos e habilidades a un total de noventa persoas. O alcalde e a edil naronesa felicitaron ás persoas que recibiron os seus diplomas por rematar con éxito cadansúas accións formativas. No que atinxe á área de Novas Tecnoloxías, concedéronse os diplomas ás persoas que remataron os cursos de Marketing dixital: promoción comercial a través das redes Sociais,Trámites en liña e administración electrónica e A utilidade das TIC.
Cada un dos devanditos obradoiros TIC achegou coñecementos a un total de doce persoas, impartíndose na Aula CeMIT de Xuvia, entre os meses de abril e xuño deste ano. Así mesmo, entregáronse na área de Formación os diplomas de dúas convocatorias dunha acción formativa sobre Certificacións UNE Carretilleiro + PEMP (para doce persoas en cada quenda), ambas desenvolvidas en maio e xuño, e de Preparación Competencias Clave Nivel 2 (unha edición para quince alumnas e alumnos), que se desenvolveu entre abril e maio.
Por último, procedeuse a dar os diplomas dunha acción formativa da área de Mocidade, sobre Xestión de vendas e atención ao público, con quince prazas e impartido entre maio e xuño deste ano.
Natalia Hermida salientou a importancia de ofrecer desde o Concello formación en todos os ámbitos, “facendo especial incidencia naqueles sectores que poden ter maiores posibilidades de inserción laboral” e indicou tamén que se convocan ao longo do ano obradoiros dirixidos a persoas de diferentes idades e, na maior parte dos casos, “dándolle prioridade á participación nos mesmos de persoas desempregadas”.
A Deputación de Pontevedra vén de pór en funcionamento os cursos formativos do programa Conectadas 2017, promovido polo seu Servizo de Igualdade co obxectivo de mellorar a formación básica das mulleres e loitar contra aquelas cousas que lastran a súa empregabilidade, a súa plena inserción, seu desenvolvemento persoal e o seu manexo integral das ferramentas tecnolóxico-dixitais. Os concellos da Lama e Vigo serán os primeiros en acoller accións formativas ao abeiro da nova edición de Conectadas. En concreto, as persoas que asistan a estes primeiros cursos recibirán formación relacionada coa cultura musical tradicional e o deporte e a saúde.
O programa arranca na Lama cun obradoiro de Pilates que terá lugar desde este martes 19 de xullo no local da Casa do Pobo da Xesta, da man da Asociación de Veciños de San Bartolomé da Xesta. O segundo dos obradoiros que se inician esta semana terá lugar o venres na Asociación Cultural Traspés de Vigo e versará sobre Percusión e Canto Tradicional.
Segundo lembra a Deputación, Conectadas 2017 ten por finalidade "mellorar a formación básica das mulleres para favorecer as súas relacións interpersoais e o intercambio de experiencias ademais de contribuír á mellora da súa empregabilidade e ao mantemento no mercado de traballo e reducir a súa brecha dixital mediante a formación nas novas tecnoloxías". A través deste programa preténdese tamén "potenciar a participación e a promoción das mulleres e tamén así favorecer a súa posición na sociedade". O programa está destinado ás asociacións, federacións e fundacións sen ánimo de lucro que teñan como obxectivo e ámbito de actuación a promoción das mulleres, que apoien o seu desenvolvemento e empoderamento e maila igualdade de oportunidades. Cada unha das asociacións poderá desenvolver unha acción formativa, de 35 horas de duración, distribuídas entre oito bloques temáticos: Muller emprende(emprendemento), Muller e cultura (adicado ás artes visuais), Actualízate (alfabetización dixital), Coas túas mans (traballos manuais), Porque ti o fas (xardinería e ornamentación floral), Súmate ao cambio (cociña, costura, coidados e dependencia, corresponsabilidade, reciclaxe, bricolaxe…), Ponte en forma (deportes) e Coidados persoai".
A Deputación de Pontevedra, que inviste nesta edición do programa 324.000 euros, agarda que esta nova convocatoria "supere a alta participación do ano pasado", cando foron máis de 5.000 as persoas que se sumaron a estas accións formativas.
O vindeiro curso a nosa comunidade escolar e docente vai estar máis preto das tecnoloxías e da ciencia. Polo menos, durante sete días que non serán, no senso estrito, exactamente iguais cás restantes semanas do ano académico: terán un punto máis de innovación. Estamos a falar da Semana STEM unha iniciativa que vén de ser impulsada pola Consellería de Educación e Cultura e cuxa estrea, este curso, ten que ver cun interese cada vez maior polo ensino tecnolóxico: tanto na forma, como no fondo como nos recursos mesmos aplicados na aprendizaxe.
En palabras da Consellería, a Semana STEM diríxese a fomentar o espírito científico e tecnolóxico do alumnado galego. E para quen a estas alturas non saiba de que se lle fala cando se lle fala de “STEM”, sinalar que son as siglas que en inglés aluden directamente ás catro patas dunha mesma cadeira: Ciencia, Tecnoloxía, Enxeñería e Matemáticas.
A Semana STEM chega á súa primeira edición con 300 prazas destinadas a alumnado de quinto e sexto curso de educación primaria, así como de 1º e 2º curso de ESO de centros docentes públicos. Incluíra estadías dunha semana en réxime de internado e realizaranse en seis quendas durante os meses de outubro, novembro e decembro. A Consellería destinará 210.540 euros a sufragar os gastos das actividades. O prazo para a presentación de solicitudes comezou xa e rematará o 15 de setembro de 2017.
A iniciativa insírese na vindeira Estratexia galega de educación dixital 2020, que se presentará en breve. Un dos principais obxectivos deste plan pasa por fomentar as vocacións STEM. Isto, segundo informa a Consellería, “xa se está a impulsar a través das materias de libre configuración autonómica como Robótica, Programación e Identidade Dixital, esta última de nova implantación o curso que vén”. O departamento da Xunta tamén explica que a a Semana STEM axudará a reforzar estes ámbitos de coñecemento no eido educativo, “necesarios para dar resposta aos desafíos profesionais do futuro”.
Nas súas palabras, as estadías proporcionarán “ao alumnado galego un escenario propicio para desenvolver capacidades, coñecementos e técnicas, a través dun convite aos achados, que aumenten o seu interese por saber, cada vez máis, sobre diversos eidos da ciencia e as súas posibilidades de aplicación na tecnoloxía”. As actividades serán académicas pero tamén lúdico-recreativas, servindo “de reforzo ao programa ordinario do currículo do alumnado nas aulas”. Os contidos dos cursos inclúen un programa de actividades académicas, de obradoiros, de tempo de lecer e deportivas. A finalidade do programa é “promover a convivencia entre o alumnado, o traballo en equipo, a aprendizaxe cun enfoque Maker, a creatividade e a motivación para mellorar a competencias STEM”.
A Consellería de Sanidade vén de facer reconto das persoas que arestora son usuarias da plataforma dixital É-Saúde, dirixida a poñer ao alcance da cidadanía as vantaxes da Administración Electrónica en materia sanitaria (achegando servizos interactivos e contidos personalizados de saúde dende os seus dispositivos conectado a Internet). Segundo explica a Consellería, a dita “comunidade” está formada xa por máis de 26.000 persoas. Ademais, conéctanse cada día entre 2.500 e 3.500 usuarios.
A plataforma, nun ámbito máis concreto, fornece á cidadanía de cousas como consultar e xestionar as súas citas, revisar a súa folla de tratamentos ou recibir os informes de TAO, de alta, de probas diagnósticas ou do calendario de vacinacións infantís. Tamén permite acceder á axenda de citas en atención primaria ou especializada actualizada, posibilitando completala con citas e eventos persoais. A plataforma, ademais, brinda acceso a todos os cursos de formación da Escola Galega de Saúde para Cidadáns e dos cursos desenvolvidos polas asociacións de pacientes. Asemade, permite que as familias (nais, pais, titores), no caso dos menores de idade, accedan no nome dos titulares aos servizos telemáticos personalizados que se ofrecen neste dispositivo (trátase do acceso delegado, que xa foi solicitado por 477 pacientes, e que fai realidade a xestión directa e áxil dos procesos de saúde dun persoa a través dun terceiro autorizado para o efecto).
Tokapp, empresa galega desenvolvedora da plataforma docente do mesmo nome, segue a engadirlle ramificacións á súa aplicación no camiño de mellorar o funcionamento dos centros educativos pero, tamén, de facelos mellores lugares para aprender e para vivir.
Nesta liña insírese a iniciativa RompeBullying, unha proposta anti-acoso de Tokapp que converte as mensaxes ofensivas en textos agradables entre vítima e acosador. Trátase dunha aplicación de balde que se lanza a combater o dito problema social alí onde adoita xurdir e acrecentarse: nas redes sociais. O seu funcionamento? Transformar a violencia en adhesivos de amizade.
Para Tokapp, cumpría aproveitar as novas tecnoloxías, e agora máis ca nunca, para loitar contra a lacra do ciberbullying, unha práctica que a día de hoxe abrangue xa un de cada catro casos de acoso escolar, causando secuelas psicolóxicas no 92% das vítimas (consonte un estudo da Fundación ANAR en colaboración con Mutua Madrileña). Segundo lembra a empresa galega, o medio máis empregado para o acoso virtual é precisamente as mensaxes de texto. “Neste punto, a única e última defensa que lle resta á vítima é o bloqueo do contacto”, explican dende Tokapp, engadindo que, malia todo e malia seren bloqueados, “os contidos fican e a persoa acosada convive con eles, algo que lle xera tensión e ansiedade”.
Para reverter o devandito e converter en positivo o negativo xurdiu precisamente RompeBullying, unha aplicación de colantes (adhesivos) para substituír e converter as mensaxes desagradables e ferintes en conversas amables que utilizan o novo sistema de stickers de Apple.
O sistema, unha vez que a persoa acosada recibe unha mensaxe que non é do seu agrado, comeza a funcionar en canto esa persoa abre a ferramenta RompeBullying?, selecciona un adhesivo e arrástrao sobre a mensaxe cubríndoo totalmente. A mensaxe orixinal, desta maneira, fica oculta tanto para a vítima como para o seu acosador. “Con isto, o adhesivo xera unha nova conversación diferente e afastada da violencia”, sinalan dende Tokapp, que logo da súa longa experiencia traballando no eido educativo e dixital puido constatar a alta frecuencia coa que se dan este tipo de prácticas vexatorias por mensaxería. “Aproveitando esta experiencia e o uso de Tokapp nas comunidades escolares”, sinalan, “investigamos como poderiamos achegar o noso gran de area para axudar a emendar o problema”.
A aplicación, dispoñible para iOS, está xa na Apple Store. É totalmente de balde para pais e alumnos, e ten unha media de uso de 50 usuarios ao día. TokApp informou de que está a traballar para que en datas vindeiras estea dispoñíbel para Android. Tamén pendurou en YouTube un vídeo ilustrativo sobre a ferramenta.
A realidade virtual é un ámbito que chama a atención tanto de consumidores como desenvolvedores, e para que estes últimos poidan afondar algo máis na materia o vindeiro 29 de xullo o local de Recuncho Maker acollerá o primeiro Meetup Virtual Reality Santiago, un encontro de verán que terá importantes limitacións de aforo (só poderán asistir 15 persoas) de xeito que os interesados deberán inscribirse o antes posible.
Este meetup estará composto por charlas áxiles e lixeiras para permitir que os asistentes poidan conversar de xeito distendido e probar as tecnoloxías de realidade virtual valéndose dalgúns cascos e cartóns.
Abrirá o encontro o seu organizador, Diego F. Goberna, ás 11:00 horas, cunha presentación e un repaso do estado actual da realidade virtual (dispositivos, plataformas, aplicacións...); seguirao Salvador de la Fuente de Mozilla, quen introducirá ao framework A-Frame; e completarán a xornada cunha charla distendida e probas en vivo.
O Centro Ramón Piñeiro para a Investigación en Humanidades (CRPIH) presentou hoxe a versión definitiva do sintetizador de voz CoToVía. Segundo fixo saber o director científico do centro, Manuel González, trátase da versión definitiva dun sistema que fai posible a conversión automática texto-voz para a lingua galega. Ou sexa, que é quen de transformar en cadea oral as palabras escritas. CoToVía, engadiu González, será fundamental para automatizar as comunicacións da información e as relacións sociais. Estivo acompañado no acto de presentación polo secretario xeral de Política Lingüística, Valentín García, quen explicou que o CRPIH foi “pioneiro en desenvolver proxectos de tecnoloxía lingüística en galego coma o CoToVía”.
CoToVía é un proxecto interdisciplinar do CRPIH no que traballou un equipo integrado por enxeñeiros superiores de Telecomunicacións da Universidade de Vigo (baixo dirección de Eduardo Rodríguez Banga) e de lingüistas da Universidade de Santiago de Compostela (baixo a dirección de Manuel González González). O seu obxectivo foi “construír un sistema de conversión automática texto-voz para a lingua galega”. Segundo lembraron no acto, ao longo dos últimos anos foron presentándose distintas versións até chegar “a esta definitiva”, a dada a coñecer hoxe, “construída con unidades pregravadas extraídas da lingua natural”.
Que é un sintetizador de voz?
González e García explicaron que os sintetizadores de voz serven para garantir a accesibilidade web a persoas con discapacidades visuais, pero son tamén fundamentais en todas as linguas no mundo da automatización das comunicacións, da información e das relacións sociais: en postos de información automatizados (servizos de banca, reservas de billetes, lectura de mensaxes por vía telefónica...), no ensino de idiomas, no ensino de lectura a nenos con dislexia, nas alarmas orais, na verificación de texto etc.
A versión definitiva de CoToVía púxose ao libre dispor de toda a comunidade como Creative Commons, cunha licenza GPL 3.0+, de maneira que pode ser utilizada libremente por calquera empresa ou usuario, coa única condición do recoñecemento de que os seus autores son o CRPIH e a Universidade de Vigo. O enderezo para a descarga é ftp.net-snmp.org.
Axuda en Acción impulsou un plan de innovación tecnolóxica no seu sistema de xestión, co obxectivo de mellorar os resultados dos máis de 120 proxectos solidarios nos que traballa actualmente en todo o mundo, segundo informou a ONG.
Grazas a este plan, a organización poderá determinar en tempo real o estado da actividade que leva a cabo e controlar a súa planificación e grao de desenvolvemento.
Entre outras iniciativas, Axuda en Acción apoiouse no uso de ferramentas de análise Big Data, como a solución SAP S/4HANA, que dota ao sistema de escalabilidade tanto funcional como xeográfica e ofrece soporte de forma "áxil" e "rápida" aos volumes de procesamento de información.
Este sistema de xestión, no que colaborou a consultora Stratesys para a súa implantación, garante un maior seguimento e control dos fondos destinados a cada unha das áreas de actividade.
Así mesmo, asegura a trazabilidade das subvencións recibidas tanto de entidades públicas como privadas, e permite unha visión completa ou desagregada dos distintos proxectos realizados segundo a tipoloxía dos traballos.
O plan de innovación tecnolóxica, ademais de en España, ten alcance en Ecuador, O Salvador, Nicaragua, Paraguai, Colombia, Bolivia, Honduras, Perú ou México, países onde a organización está presente a través dos seus proxectos de cooperación.
Mediante a creación de próteses mecánicas en impresión 3D, para axudar a nenos que non contan con algún dos seus brazos, Enable Tec, un proxecto incubado no Instituto Tecnolóxico e de Estudos Superiores de Monterrey (ITESM) Campus Guadalaxara, busca facer a vida máis fácil a infantes que por algún motivo físico ou conxénito, non creceron con ambas as extremidades superiores.
Desde hai dous anos, Enable Tec uniuse a Enable the Future, unha comunidade internacional que dotou de próteses de man a máis de 25 mil persoas ao longo do mundo, para poñer o seu gran de area nesta causa. O propósito é crear próteses mediante impresoras en terceira dimensión, o cal xera un baixo custo, e doalas de maneira gratuíta aos seus beneficiarios.
Santiago de Colsa Aillud, especialista en Enxeñería Biomédica do Tec de Monterrey Campus Guadalaxara, e líder deste proxecto, confirmou que xa apoiaron a tres persoas (entre elas un neno de 4 anos de idade), e esperan apoiar a entre oito e catorce infantes máis para finais de ano.
Enable Tec busca consolidarse como un proxecto de innovación social que achega a ciencia e a tecnoloxía médica á xente. “Permite axudar á xente e impactar na vida da persoa directamente”, comentou De Colsa.
No proxecto participan seis estudantes do ITESM Guadalaxara, principalmente das carreiras de Enxeñería Biomédica, aínda que tamén de Mecatrónica e Deseño Industrial. Enable Tec logrou apoios por 120 mil pesos en 2015, nunha Semana do Emprendedor dentro da institución educativa, os cales se destinaron na compra de dúas impresoras 3D e material para fabricar as próteses.
O proxecto sostense sen recursos adicionais ata a data. “Estas próteses regalámolas ás persoas que apoiamos, se elas poden achegar algo para o custo do material e que nós podamos seguir traballando, sempre se lles agradece pero nunca se lles esixe”, explicou De Colsa.
Innovación para a sociedade
A nova tecnoloxía da impresión 3D, con grandes posibilidades de aplicación no campo da saúde, permite que calquera cunha impresora deste tipo poida realizar estas próteses. Só se necesita plástico peletizado (material destes dispositivos), un modelo da prótese por computadora que se poida modificar ao tamaño da persoa, e materiais que se poden conseguir en calquera supermercado ou ferraxería, como velcro, fío de cana ou parafusos.
“Tómanse as medidas da man completa, da amputación ou malformación conxénita, e con iso escálase computacionalmente a prótese (é dicir, faise máis grande ou máis pequena), selecciónanse as cores, imprímese e ensámblase e colócase”, explicou Santiago de Colsa Aillud, líder de Enable Tec.
As próteses teñen un movemento de pinza, que permiten aos nenos accións como “agarrar un vaso, soster o manubrio da bicicleta ou mover un rato de computadora”, asegurou o enxeñeiro do Tec de Monterrey. Ademais, engadiu que as próteses teñen formas e cores atractivas para que os nenos as poidan lucir.
A pesar das súas nobres intencións, Enable Tec aínda non logrou ampliar o seu apoio con organismos especializados en temas de saúde e atención a persoas con discapacidade, aínda que xa tiveron contacto con algúns como o Desenvolvemento Integral da Familia (DIF) ou o Centro de Rehabilitación Infantil Teletón (CRIT).
Tecnoloxía a baixo custo
Aínda que estes aparellos son gratuítos para os nenos, o custo estimado destas próteses é de 500 pesos, inferior ao dous mil ou dous mil 500 pesos que pode custar unha ortopedia similar máis avanzada tecnoloxicamente ou para adultos.
Pódese contactar con esta iniciativa a través da súa páxina de Facebook: https://www.facebook.com/enabletecnologias/?ref=br_rs
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...