O programa de adestramento tecnolóxico para PEME, profesionais e autónomos da Deputación de Pontevedra, o programa SmartPEME, volve este mes de setembro e faino con forza. Máis en detalle, con 42 novas accións a impartir ao longo da provincia, nas sedes de Cambados (Centro Exposalnés), nos viveiros de empresas de Barro, Lalín e A Estrada e nas oficinas de Vigo, Ponteareas, Pontevedra e O Porriño.
O programa de adestramento tecnolóxico para PEME, profesionais e autónomos da Deputación de Pontevedra, o programa SmartPEME, volve este mes de setembro e faino con forza. Máis en detalle, con 42 novas accións a impartir ao longo da provincia, nas sedes de Cambados (Centro Exposalnés), nos viveiros de empresas de Barro, Lalín e A Estrada e nas oficinas de Vigo, Ponteareas, Pontevedra e O Porriño. As inscricións nas devanditas 42 novas accións pódense facer no número de teléfono 886 20 20 20, o correo electrónico info.smartpeme@depo.es ou a páxina web www.smartpeme.depo.es.
A oficina de SmartPEME na cidade de Pontevedra, situada no edificio administrativo da Deputación, acolle durante o mes de setembro un total de sete accións formativas para a adaptación das empresas e proxectos emprendedores da provincia ao novo escenario dixital. As quendas comezan este martes 4 de setembro, Xestión da túa empresa: Facturación e ferramentas integradas, ás 19:00 horas. Nesta mesma semana, o xoves 6 á mesma hora, será a quenda de Plan de marketing online para empresas turísticas. O curso, Woocommerce: A solución que buscabas para vender por internet, impartirase o martes 11 de setembro ás 18:00 horas. A seguinte semana haberá dúas accións, a primeira o martes 18 ás 19:00 horas baixo o nome Como utilizar Instagram para promover a túa empresa e, a seguinte, Escolle o hosting máis adecuado para as túas necesidades o xoves 20 de setembro á mesma hora. O martes 25, tamén ás 19:00 horas, será a quenda de Linkedin: a túa rede de networking. Por último, o xoves 27 de setembro, impartirase Fotografía básica I: Técnica e cámara, ás 19:00 horas.
O viveiro de empresas do Polígono Lalín 2000 acollerá, durante o mes de setembro sete novos obradoiros ao abeiro da rede TIC impulsada pola Deputación de Pontevedra. A primeira cita do mes en Lalín ten lugar este martes, 4 de setembro, ás 19:00 horas (todas as actividades serán a esta mesma hora) co curso Crea un plan de marketing para a campaña de Nadal. Tras este primeiro obradoiro, o xoves 6 de setembro, impartirase Deseña sinxelamente imaxes abraiantes e profesionais. O martes, 11 de setembro, terá lugar Crea unha páxina profesional con WordPress. O xoves desa mesma semana, celebrarase o curso Facebook para promover o teu negocio turístico. Seguindo cos cursos do mes de setembro, o martes 18 terá lugar Mellora a túa presencia online promovendo o teu blog. O xoves 20 de setembro celebrarase o curso Consideracións á hora de crear o teu modelo de negocio e, por último, o mércores 26 de setembro, esta vez no viveiro de empresas de A Estrada, impartirase o obradoiro Google Analytics: Interpretación dos datos e toma de decisións.
Pola súa banda, o Centro ExpoSalnés de Cambados acollerá durante todo o mes de setembro sete novos obradoiros. As quendas comezan este martes 4 de setembro ás 19:00 horas, Consideracións á hora de crear o teu modelo de negocio. O xoves 6, á mesma hora, Como utilizar Instagram para promover a túa empresa. O martes 11 de setembro, ás 18:00 horas, levarase a cabo Mellora a túa páxina web e emprazala en buscadores. O martes 18, ás 19:00 horas, será a quenda de Fotografía básica I: Técnica e cámara. O xoves desa mesma semana, á mesma hora, chega Mellora a túa presenza online promocionando o teu blog. A quenda do obradoiro Facebook para promover o teu negocio turístico chega o martes 25 de setembro, tamén ás 19:00 horas. Por último, Crea un plan de marketing para a campaña de Nadal chegará o xoves 27, á hora habitual, as 19:00 horas.
Polo que atinxe ás oficinas do programa SmartPEME da Deputación de Pontevedra en Vigo, Ponteareas e O Porriño acollerán durante o mes de setembro un total de 21 accións formativas (sete en cada unha delas) para a adaptación das empresas e proxectos emprendedores da provincia de Pontevedra ao novo escenario dixital no que desenvolver as súas actividades e aproveitar as ferramentas existentes co obxectivo de aumentar a súa competitividade. Na oficina de Vigo os cursos comezan este martes, 4 de setembro, ás 19:00 horas con Linkedin: a túa rede de networking. A seguinte acción será Deseña sinxelamente imaxes abraiantes e profesionais, o xoves 6 á mesma hora. O curso Crea unha páxina profesional con WordPress chegará a Vigo o martes 11 ás 18:00 horas. O seguinte martes 18 de setembro, ás 19:00 horas, impartirase Plan de marketing online para empresas turísticas. O xoves 20 de setembro será a quenda de Consideracións á hora de crear o teu modelo de negocio, ás 19 h. O seguinte martes, 25 de setembro, á mesma hora celebrarase a acción Crea un plan de marketing para a túa campaña de Nadal. Para rematar, o xoves 27 á mesma hora, terá lugar o curso Xestión da túa empresa: Facturación e ferramentas integradas.
A oficina de Ponteareas acollerá os seguintes obradoiros: Xestión da túa empresa: Facturación e ferramentas integradas, este martes 4 ás 19:00 horas. A seguinte será Mellora a túa presenza online promocionando o teu blog, o xoves 6 á mesma hora. A ela seguiralle Linkedin: a túa rede de networking, este curso será impartido na sede da Asociación de Empresarios de Mos (AEMOS), o mércores 12 ás 19:00 horas. O martes 18, ás 18:00 horas, impartirase o curso Woocommerce: A solución que buscabas para vender por internet. A formación Estratexias de marketing para a túa empresa chegará o xoves 20 de setembro ás 19:00 horas. O martes da seguinte semana, 25 de setembro, ás 19:00 horas terá lugar o curso Fotografía básica I: Técnica e cámara. Xa por último, o xoves 27, ás 19:00 horas, Crea un plan de marketing para a campaña de Nadal será a acción que impartirá o persoal do programa.
Finalmente, a oficina do Porriño acollerá os seguintes obradoiros: martes 4 de setembro, ás 19:00 horas, co curso Estratexias de marketing para a túa empresa turística. A actividade Mellora a túa páxina web e posicionala en buscadores chegará o martes, 11 de setembro. A acción A importancia da presenza online para as empresas terá lugar o xoves 13 de setembro, ás 19:00 horas na sede da ACUBAM en Tomiño. O martes 18, á mesma hora, será a quenda de Crea un plan de marketing para a campaña de Nadal. O xoves desa mesma semana, tamén ás 19:00 horas, impartirase o curso Fotografía básica I: Técnica e cámara. A acción Xestión da túa empresa: Facturación e ferramentas integradas será o martes 25 de setembro, tamén ás 19:horas. E, por último, o xoves 27 de setembro á mesma hora terá lugar Vende os teus produtos en Facebook e Instagram.
Novidades deste ano ao abeiro de SmartPEME
A Deputación de Pontevedra lembra que o proxecto SmartPEME comezou en 2018 afrontando unha nova etapa na súa andaina, un novo treito no que o programa verá aumentados os servizos a fornecer, abrindo tres novas grandes liñas como son o Centro Provincial de Economía Dixital (CPED), que estará situado no viveiro de empresas de Barro, SmartPEME Impulsa e TurisTIC, que se irán facendo dispoñíbeis para as persoas autónomas e empresas a partir dos vindeiros meses.
A través do Centro Provincial de Economía Dixital vaise mostrar ás empresas as ferramentas, aplicacións e solucións innovadoras máis relevantes que a economía dixital ofrece. Para iso, o CPED apoiarase nas instalacións do FabLab que a Deputación de Pontevedra ten instalado no viveiro de Barro.
Doutra banda, SmartPEME Impulsa abrirá novas vías de asesoramento en materia de innovación, competitividade e internacionalización, “unindo deste xeito os obxectivos das empresas coas máis novas tecnoloxías, procesos e servizos”, explica a Deputación, engadindo que TurisTIC, como indica o seu nome, presentarase como “un punto de apoio tecnolóxico para o o sector turístico”. Trátase dun servizo enmarcado no Plan Estratéxico de Turismo Rías Baixas e que pretende potenciar o sector a través de axudas ás empresas para adaptarse á contorna dixital.
Datos sobre o Proxecto SmartPEME
SmartPEME é un novo modelo de servizo orientado á mellora competitiva das PEME e á procura dunha melloría nas vendas e na eficacia e eficiencia das tarefas, que abre novos eidos de actuación e acada novos grupos de interese coma os emprendedores, as asociacións empresariais e os axentes de dinamización en concellos.
O devandito obxectivo, nas oficinas do Porriño, Cambados, Pontevedra, Lalín, Ponteareas, Vigo, A Estrada e (agora tamén) Barro, abrangue seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.
O director do IGAPE, Juan Cividanes, visitou esta mañá ás instalacións de Imjoying Leisure International Group en Mos, onde salientou a aposta desta empresa polo desenvolvemento de iniciativas innovadoras no ámbito rural, mediante a posta en marcha dunha plataforma web e unha aplicación móbil que facilita a oferta festiva e cultural de todas as localidades españolas.
Cividanes resaltou a relevancia das iniciativas emprendedoras asentadas en poboacións rurais que favorecen a creación de emprego no territorio mediante a posta en marcha de iniciativas non vencelladas á produción agrícola. Así, o proxecto da empresa pontevedresa busca consolidar 9 postos de traballo cubrindo a demanda de información de usuarios de actividades de ocio mediante o acceso á información dos eventos programados por entidades públicas e privadas de toda España.
Lembrou tamén o compromiso da Xunta co impulso económico e social ao mundo rural mediante a posta en marcha do Galicia Rural Emprende, cuxa última convocatoria está en fase de resolución e do que foi beneficiaria a empresa pontevedresa na edición anterior, e que está deseñado para fomentar o desenvolvemento equilibrado do territorio galego a través de pequenas e medianas empresas que non se dedican a actividades agrícolas, formadas por novos emprendedores ou autónomos.
Co mesmo obxectivo, pero sen focalizar a súa incidencia no ámbito rural, desenvólvese o Galicia Emprende. A través das edicións dos programas Galicia Emprende e Galicia Rural Emprende do pasado ano, a Xunta concedeu axudas por importe de 6,8 millóns de euros a 162 proxectos empresariais de emprendedores, que mobilizaron máis de 18 millóns de euros en novos investimentos e que levan asociados a creación e o mantemento de 385 postos de traballo.
Esta fin de semana pasada foi de moita actividade creativa no concello de San Sadurniño, co engadido extra de ser unha actividade sen cancelas, plenamente colaborativa. O motivo? A celebración da quinta edición do encontro de cineastas Chanfaina Lab. As xeiras destes días empregáronse basicamente a “captar a esencia da paisaxe, da xente e das súas historias”. Porén, as primeiras actividades tamén se centraron en mostrar os múltiples camiños creativos que nos ofrecen as novas ferramentas e canles tecnolóxicas, camiños para extraer o talento que todas e todos levamos dentro.
Entre os participantes destas sesións formativas figurou o músico e investigador sonoro ourensán Carlos Suárez, que comezou destacando a importancia do sentido do oído á hora de afrontar o deseño dos nosos contidos, un sentido que é “capaz de percibir espazos e ambientes en tres dimensións a pesar de dispoñermos só de dúas orellas, algo que a ciencia aínda non foi capaz de explicar”. Segundo lembrou, reivindicar o poder comunicativo, revelador e evocador dos sons foi un dos grandes obxectivos do proxecto Escoitar.org, nado en 2006 co cometido de elaborar de xeito colaborativo un mapa sonoro de Galicia. Aquela iniciativa (na que Carlos Suárez participou activamente) acabou morrendo dez anos despois por falla de apoios, aínda que sentou un precedente para propostas colectivas semellantes no resto do Estado e que se replica en outros proxectos por todo o mundo, como Aporee.org.
Segundo fixo saber o relator, as paisaxes sonoras están en todos os recantos das cidades e do rural, aínda que nos espazos urbanos son máis complicados de percibir por mor do ruído ambiental, mentres que no rural son moito máis doadas de “sentir e rexistrar con todos os seus matices”. Ademais, sinalou, igual que o paso do tempo “muda a percepción visual dos lugares, tamén o fai coa súa percepción sonora, por iso hai sons que hoxe podemos escoitar nun determinado lugar e que, se cadra, dentro duns anos sexa imposíbel saber deles”. Esta vontade de preservar é a que ten alentado proxectos como Escoitar.org e todas as plataformas de sons dixitalizados que viñeron despois.
No curso acelerado de Carlos Suárez inscribíronse 15 persoas, na súa maioría participantes á súa vez na parte de creación visual do Chanfaina Lab.
O Colexio Profesional de Enxeñaría Técnica en Informática de Galicia (CPETIG), en colaboración coa Axencia para a Modernización Tecnolóxica de Galicia (Amtega), organiza en setembro un curso especializado sobre a nova figura do Delegado de Protección de Datos, DPO.
O Colexio Profesional de Enxeñaría Técnica en Informática de Galicia (CPETIG), en colaboración coa Axencia para a Modernización Tecnolóxica de Galicia (Amtega), organiza en setembro un curso especializado sobre a nova figura do Delegado de Protección de Datos, DPO. O curso, de 20 horas de duración, terá lugar na Cidade da Cultura en dúas fins de semana consecutivas, os días 7, 8, 14 e 15 de setembro.
Impartido por profesionais do Centro de Formación de AENOR, os contidos do curso estarán centrados nos fundamentos e principios da nova regulamentación de Protección de Datos, nos dereitos das persoas interesadas, nas obrigas de responsables e encargados do tratamento de datos e nas medidas de seguridade, así como no estatuto da figura do DPO, nas autoridades de control e no réxime sancionador.
O curso vai ofrecer unha visión xeral da normativa europea de Protección de Datos, incidindo en aspectos prácticos para as entidades responsables do tratamento e aos seus prestadores de servizos. Entre outros obxectivos, o curso está deseñado para coñecer os principios básicos da nova normativa, cunha análise detallada das obrigas que afectan ás entidades públicas e privadas que tratan datos de carácter persoal; e afondar nas funcións do DPO, acadando o nivel de coñecemento preciso para poder levalas a cabo.
Esta formación vai dirixida a responsables de seguridade e cumprimento normativo, auditores internos ou externos que deban avaliar a observancia da normativa, consultores, avogados e, en xeral, a profesionais interesados en prestar servizos neste ámbito.
Oportunidade do curso
A formación impartida no curso está aliñada co esquema de certificación da Axencia Española de Protección de Datos e concibida para que calquera persoa que desexe certificarse como DPO poida facelo, aínda que non teña experiencia.
A organización deste curso responde á crecente demanda do novo perfil profesional do DPO, cuxa figura e funcións veñen determinadas no RGPD. Entre outras, ten a responsabilidade de informar e asesorar á empresa e aos empregados sobre as súas obrigas no tratamento dos datos, supervisar o seu cumprimento e actuar de interlocutor entre a empresa e as persoas propietarias dos datos, ao obxecto de que estas poidan exercer os seus dereitos.
De forma obrigatoria, deben incorporar a figura de DPO no seu organigrama as organizacións públicas, as empresas que realizan tratamento masivo de datos ou a gran escala, as que traten datos de especial protección, como poden ser datos xenéticos, relativos á saude, biométricos, etc. e as empresas que recollan características psicolóxicas e de comportamento das persoas.
O prezo do curso de DPO é de 600€, cunha bonificación do 50% para as persoas colexiadas e precolexiadas.
O Centro Demostrador TIC (CDTIC) da Amtega, vén publicar as gravacións últimas sesións de #DemosXWeb, nas que se expuxeron temas de actualidade como a nova Normativa Xeral de Protección de Datos (RXPD), as subvencións para mellorar o ERP na empresa e o uso profesional da aplicación de mensaxería Whatsapp.
• Na sección “En diferido” da páxina web do Centro Demostrador TIC pódense ver os vídeos das sesións retransmitidas e de algunhas presenciais.
• As últimas incorporacións a “En diferido” son as sesións #DemosXWeb con temáticas de actualidade como o RXPD, subvencións para mellorar o ERP ou uso profesional de Whatsapp
• A canle de Livestream do CDTIC suma xa 67 sesións gravadas dispoñibles de balde para todo o público
O Centro Demostrador TIC (CDTIC) da Axencia para a Modernización Tecnolóxica de Galicia (Amtega), vén publicar as gravacións últimas sesións de #DemosXWeb, nas que se expuxeron temas de actualidade como a nova Normativa Xeral de Protección de Datos (RXPD), as subvencións para mellorar o ERP na empresa e o uso profesional da aplicación de mensaxería Whatsapp. As sesións foron seguidas en directo por decenas de espectadores que ao final das mesmas puideron trasladar as súas dúbidas aos relatores nunha quenda de preguntas.
Para aquelas persoas interesadas que non poden conectarse en directo, o CDTIC ofrece na sección “En diferido” da súa páxina web (https://cdtic.xunta.gal/en-diferido), as gravacións de todas as actividades transmitidas por streaming para que podan ser reproducidas en calquera momento e desde calquera dispositivo (móbil, ordenador ou tableta), o que permite acceder ás actividades do CDTIC de forma máis flexible e adaptada as necesidades das empresas.
#DemosXWeb, acceso a solucións dixitais sen desprazamentos
Esta iniciativa consiste en sesións demostrativas dunha hora, que se retransmiten exclusivamente por streaming, onde provedores TIC galegos expoñen as características e beneficios no emprego de produtos ou servizos dixitais para optimizar os procesos internos das empresas, incrementar as vendas, mellorar a relación cos clientes, maximizar a produtividade ou mellorar a presenza da empresa en Internet ou nas redes sociais.
DemosXWeb, convértese ademais nun escaparate para aquelas empresas e profesionais do sector TIC galego que poden amosar as súas solucións a potenciais clientes ou usuarios das mesmas sen límite de prazas, como adoita ser habitual en actividades presenciais.
Actualmente na canle de Livestream do CDTIC atópanse xa 67 eventos que en total chegan ás 16.363 reproducións. Proximamente, a canle da Amtega en Youtube (https://www.youtube.com/user/imitxunta) recollerá estes recursos audiovisuais.
Próximos #DemosXWeb
As sesións de #DemosXWeb continuarán o vindeiro 20 de setembro baixo o título “Aproveita as vantaxes de Joomla para desenvolver as túas webs” (https://cdtic.xunta.gal/demosxweb-joomla), que será transmitida en horario de 09:30 a 10:15h. O segundo “#DemosXweb previsto, “Innovación aplicada á xestión enerxética: Solución CO2st-TEM” (https://cdtic.xunta.gal/co2st), celébrase o 28 de setembro no mesmo horario.
Para poder seguir as sesións por streaming, compre inscribirse na páxina web do CDTIC ou a través da súa aplicación dispoñible para plataformas Android e iOS.
Centro Demostrador TIC
O CDTIC, impulsado pola Axencia para a Modernización Tecnolóxica de Galicia, é unha iniciativa que promove a transformación dixital das pemes de Galicia como factor clave para mellorar a súa eficiencia e competitividade. Así, a través de distintos servizos e actividades, o CDTIC amósalles ás empresas a importancia de impulsar o talento dixital dentro destas, para desenvolver unha nova organización do traballo e unha cultura dixital na que o persoal e a clientela se sintan cómodos ante a incorporación das tecnoloxías.
O avance da tecnoloxía nos últimos anos foi tan rápido que moitas persoas maiores víronse case na obriga de levar a cabo un verdadeiro proceso de aprendizaxe para comunicarse cos seus seres queridos.
Con todo, este proceso, que en moitos casos é complicado debido á escasa adaptación dos dispositivos tecnolóxicos ás necesidades das persoas maiores, vai dando os seus froitos e xa logrou que preto da metade das persoas maiores dos principais países europeos sexan usuarios de WhatsApp.
Como ocorre con persoas que teñen unha discapacidade, moitas persoas maiores necesitan certas axudas para utilizar un smartphone ou unha tableta, xa sexa para facilitar ver o texto nas pantallas ou para simplificar o seu uso.
Aínda queda moito por avanzar neste campo, pero una das poucas empresas especializadas en desenvolver móbiles para estas persoas, Doro, presentou un estudo no que mostra o crecente interese das persoas maiores pola tecnoloxía.
En concreto, o informe afirma que en Alemaña, Francia, Italia, Reino Unido e Suecia, que son os países que participaron no estudo, máis de dous terzos das persoas maiores están interesadas na tecnoloxía, pero que, máis aló dos teléfonos móbiles e computadores, son moi poucos os que foron incorporando axudas para mellorar a súa calidade de vida.
Así, a práctica totalidade dos enquisados (o 94%) asegura que quere vivir na súa casa o maior tempo posible, con todo só un de cada dez inviste en tecnoloxía que lle podería axudar a lograr ese obxectivo.
Por esta razón é fundamental avanzar na adaptación da tecnoloxía ás necesidades de cada persoa e na divulgación das opcións que as persoas maiores, e tamén as persoas con discapacidade, teñen para poder mellorar a súa calidade de vida.
A asociación galega de software libre Galpon vainos brindar unha oportunidade para formarnos en mapas libres, traballar neles e tirarlles o máximo rendemento no noso quefacer diario (de feito, a actividade está dirixida a impulsar os nosos recursos en materia de desenvolvemento web). O obradoiro, que se organiza en colaboración coa axencia AMTEGA (ao abeiro do convenio que a axencia ten coas nosas entidades e asociacións de free software), artellarase en dúas edicións, co fin de abranguer a máxima cantidade de destinatarias e destinatarios.
O obxectivo concreto de Galpon é difundir ferramentas web libres como Leaflet e OpenLayers e achegarnos conceptos e metodoloxías de utilidade para integrarmos un mapa libre nunha páxina web partindo de cero. A actividade será impartida por Micho García e Francisco Puga. Cada un dos obradoiros terá un aforo máximo de 20 persoas. A primeira edición celebrarase o sábado 22 de setembro e a segunda será o 13 de outubro, ambas no local de A Industriosa en Vigo de 10:00 a 18:30, o acceso será de balde e con inscrición, que se pode realizar dende a páxina específica habilitada por Galpon.
Este 1 de setembro celébrase un dos grandes acontecementos en materia de software libre do eido hispano falante: o Maratón Linuxero. Trátase dunha iniciativa posta en marcha por seareiros de programas libres, por unha banda, e á emisión de podcast, pola outra. Da conxunción entre ambas tecnoloxías xurdiu o maratón, que ten moito de radio colectiva e ininterrompida sobre tecnoloxías sen cancelas. A edición deste sábado será unha edición especial, xa que se conmemora o ano de vida da iniciativa e faise, entre outras cousas, cunha emisión sen cortes de 14 horas de duración.
A convocatoria conmemorativa do 1 de setembro comezará ás 13:00 horas do horario peninsular, xuntando unha chea de representantes e seareiros do mundo do software libre para dar conta dos máis diversos asuntos, como por exemplo os titoriais e a divulgación arredor das vantaxes e utilidades deste tipo de programas ou as distribucións e proxectos de software libre máis innovadoras e de meirande proxección. Segundo lembra Mancomún, a listaxe completa cos horarios en UTC está na páxina web do evento, aínda que o acontecemento se retransmite en directo, tamén se poderá escoitar en diferido.
Respecto da edición do ano pasado, os responsables da quedada salientan os bos números acadados: 10 horas de emisión en “rigoroso directo”, sorteos patrocinados por empresas de primeira liña, ducias de podcasters participando, catro emisoras de radio online achegando comunicación de maneira simultánea, unha aplicación de Android creada para a ocasión, máis de 200 ouvintes en directo de media e case 5.000 reproducións en diferido.
Seguimos a dar conta de actividades tecnolóxicas para mulleres e dende as mulleres. Se os días pasados falamos da vertente feminina da acción divulgativa do Concello de Fene e máis da feira Pont-Up Store de Pontevedra, hoxe lembramos que a Reserva da Biosfera Mariñas Coruñesas e Terras do Mandeo vai organizar este mes de setembro, en colaboración co Concello de Culleredo, un obradoiro para potenciar “o emprego e as competencias das mulleres no mundo das ferramentas dixitais”.
A actividade, que se acompaña do epígrafe Mulleres, Emprendemento e Novas Tecnoloxías da Información, impartirase a partir do día 3 do vindeiro mes no centro Amparo Prego Rubial (antiga escola unitaria) de Celas, en Culleredo.
O obxectivo da actividade é tirar abaixo muros e atrancos de empregabilidade entre as mulleres e o mercado laboral, e todo baixo a fórmula da formación en smartphones, tabletas e computadoras.
O obradoiro artellarase en tres grupos. Ao remataren a actividade, as participantes recibirán un diploma acreditativo. As interesadas poden chamar, para formalizar a inscrición ou solicitar datos a maiores, ao 981.669.541. Asemade, tamén poden facelo enviando un correo ao seguinte enderezo: info@marinasbetanzos.gal.
O Concello de Narón vén de informar de que xa está aberto o prazo de inscrición para participar en oito cursos CeMIT e máis un obradoiro xuvenil da axencia AMTEGA, a desenvolver en Xuvia. Esta información foi achegada pola concelleira de Novas Tecnoloxías, Natalia Hermida, quen lembrou que con cargo a financiamento íntegramente municipal destínanse neste último cuadrimestre do ano uns 7.000 euros ao Programa Municipal de Formación en Novas Tecnoloxías, que abrangue unha actividade de 2.100 horas ao ano.
Respecto dos oito devanditos cursos, son os seguintes: Busca de emprego en Internet; Internet e correo electrónico; Tratamento de textos; Follas de cálculo; Bases de datos; Presentacións gráficas; Iniciación á contabilidade e facturación e Presentacións dixitais eficaces. Hermida recordou que poderán asistir un máximo de doce persoas por curso.
O curso de Busca de emprego en Internet (48 horas) impartirase do 17 de setembro ao 2 de outubro; o de Internet e correo electrónico (30 horas) será do 3 ao 15 de outubro; o de Tratamento de textos (50 horas) do 16 de outubro ao 2 de novembro: o de Follas de cálculo (50 horas) do 5 ao 21 de novembro; o de Bases de datos (40 horas) do 22 de novembro ao 7 de decembro, e o de Presentacións gráficas(30 horas) do 10 ao 19 de decembro. Os citados cursos desenvolveranse en horario de mañá, entre as 9.30 e as 13.30, se ben pola tarde, de 16.00 a 20.00 serán os de Iniciación á contabilidade e facturación(200 horas) do 17 de setembro ao 28 de novembro, e Presentacións dixitais eficaces (48 horas), do 29 de novembro ao 17 de decembro.
Segundo informou a edil, as persoas que desexen anotarse nas ditas actividades deberán darse de alta na web CeMIT para acceder logo ao espazo propio da aula de Narón, onde poderán ver tódalas iniciativas formativas que se desenvolverán no centro localizado en Xuvia e reservar praza.
Hermida tamén recordou que a partir do vindeiro luns, 3 de setembro, reabrirase a Aula CeMIT de Xuvia –de 11.30 a 13.30 horas- co que “tamén se poderá solicitar nas instalacións axuda para realizar os trámites oportunos para solicitar os citados cursos”.
A través deste mesmo sistema, apuntou a edil de Novas Tecnoloxías, poderase solicitar a participación no obradoiro xuvenil Crea o teu personaxe de videoxogo ou película, impulsado a través de AMTEGA. A convocatoria, que se dirixe a rapazas e rapaces de 14 a 18 anos, celebrarase o 14 de setembro en horario de tarde, de 15.00 a 21.00 e a participación está limitada a un máximo de quince persoas.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...