O Concello de Fene e o Instituto de Investigacións Científicas e Ecolóxicas (I.N.I.C.E.) colaboran na posta en marcha dunha serie de Obradoiros de Inicio ás Novas Tecnoloxías, gratuítos e dirixidos principalmente ás mulleres. Tras a apertura do prazo de inscrición, as persoas interesadas nestas accións formativas, para as que quedan prazas vacantes, están convocadas a unha reunión informativa na que se explicará o programa, contidos e datas previstas de inicio de cada unha das actividades. Esa reunión terá lugar o martes, 28 de agosto, ás 10 horas, no Centro Municipal de Servizos Sociais (Avenida do Mar, bloque 1, baixo, San Valentín).
Os obradoiros, que se impartirán na Aula de Informática do Concello (Avenida de Naturais, 44-entresollado), son os seguintes:
Estas actividades a favor da igualdade pretenden incidir na formación e mellor incorporación da muller á sociedade e que estea presente nos novos sectores de emprego.
Para mais información e inscricións pódese contactar con INICE no teléfono 646385736.
A XGN R Encounter é unha reunión multitudinaria de afeccionados e profesionais da informática que buscan intercambiar coñecementos e realizar durante varios días todo tipo de actividades relacionadas coa informática.
O Diario Oficial de Galicia (DOG) vén de publicar o anuncio polo que se invita aos axentes do Sistema Galego de Innovación a que expresen o seu interese en acceder a unha liña de axudas para a posta en marcha de Hubs de Innovación Dixital.
Trátase dun novo instrumento previsto no Plan Galicia Innova 2020, en coherencia coas orientacións da Comisión Europea no ámbito da dixitalización e especialización intelixente, que agrupan os distintos axentes do sistema de I+D+i baixo un modelo de colaboración público-privado aberto co obxectivo de aumentar a competitividade das empresas galegas a través das tecnoloxías dixitais e, por extensión, a competitividade da economía galega.
O obxectivo desta consulta é dispor de suficiente información para a definición da futura convocatoria de axudas dirixida á posta en marcha de Hubs de Innovación Dixital en Galicia, así como fomentar a colaboración entre os diversos axentes para a presentación de propostas coordinadas que conten co respaldo empresarial e o consenso necesario para garantir a súa eficacia e eficiencia.
As propostas ou manifestacións de interese, previas á convocatoria, deberán incluír, entre outros aspectos, unha descrición da visión e das actividades preparatorias para a posta en marcha do Hub de Innovación Dixital, así como demostrar a capacidade do consorcio para recibir o apoio da Xunta e un enfoque tecnolóxico que implique de forma prioritaria tecnoloxías cun alto potencial para a industria. O prazo de presentación remata o 17 de setembro.
A partir da recollida destas manifestacións de interese, a Xunta prevé lanzar unha convocatoria de axudas en concorrencia competitiva para apoiar a posta en marcha de Hubs de Innovación Dixital en Galicia. Posteriormente, contémplanse dúas fases máis no seu desenvolvemento: o inicio dos Hubs, en 2019, coa posta en marcha da gobernanza e operacións, que se irá complementando coa oferta de servizos e as primeiras prestacións; e a fase operacional, a partir de decembro de 2019.
A Universidade Popular de Ourense, impulsada polo Concello, vai fornecer á cidadanía de 78 iniciativas formativas ao longo do seguinte curso. Entre os puntos fortes da nova oferta educativa para o ano vindeiro, salienta sen dúbida o amplo abano temático da mesma. Haberá obradoiros de adestramento persoal, debuxo, creación de bixutería, fotografía, xestión económica para PEME (a cargo do Grupo Formativo Auria e Seoane), prevención de violencia de xénero (a cargo de COGAMI) ou, tamén, tecnoloxías para os maiores.
Polo que respecta a estas últimas, as ferramentas dixitais, achegaranse actividades para familiarizar aos maiores coas mesmas e conseguir que poidan tirarlles proveito no seu día a día, favorecendo tamén o envellecemento activo. Estas accións virán da man do grupo Pacios Ramón Informática e Información. Os obradoiros, dous deles online e os demais presenciais, serán de Word e Excel nivel profesional, factura electrónica e certificados dixitais e o novo regulamento de protección de datos (recursos, obrigas e dereitos que deben ter en conta as empresas, os autónomos e tamén os cidadáns en xeral). Amais do devandito, Alba Adá Lameiras tamén impartirá un obradoiro sobre xestión de perfís persoais nas redes sociais.
A Consellería de Economía, Emprego e Industria impulsa un total de 23 obradoiros de emprego específicos para menores de 30 anos nos que participarán un total de 352 alumnos de 57 concellos galegos. Os apoios que se veñen de conceder, que suman preto de 3,4 millóns de euros, permitirán desenvolver iniciativas centradas en especialidades de ámbitos como a informática e as tecnoloxías da información e a comunicación (TIC); o deseño gráfico; a hostelería e o turismo; a carpintería; o forestal; a xardinería; ou o sociosanitario; e diferentes materias relacionadas coa construción e a industria, entre outros. Estes programas combinan a formación coa realización dun traballo específico, cun contrato de aprendizaxe durante 9 meses.
Son beneficiarios da iniciativa que se vén de resolver, destinada a persoas inscritas no Sistema Nacional de Garantía Xuvenil, as administracións locais (con prioridade para os Concellos Emprendedores), as asociacións de entidades locais e as mancomunidades.
En concreto, na provincia da Coruña desenvolveranse un total de 10 obradoiros que contarán con 146 alumnos, impulsados de xeito individual polos concellos das Pontes, Boiro, Carballo, Ferrol, Betanzos e Rianxo; así como polas agrupacións formadas por: Fene, Ares, Cabanas, Neda e Mugardos; Santa Comba, A Baña, Negreira e Val do Dubra; Santiago de Compostela e Teo; e Rois, Dodro e Padrón.
No tocante á provincia de Lugo, a Consellería de Economía, Emprego e Industria apoia dous obradoiros, promovidos polos concellos de Ribadeo e Lugo e nos que participarán un total de 32 alumnos.
En Ourense serán 47 persoas desempregadas as que se beneficien das iniciativas impulsadas pola agrupación formada polos concellos de Ribadavia, Carballeda de Avia e Castrelo de Miño; a Mancomunidade Voluntaria de Concellos da Comarca de Ourense, e a Mancomunidade de Municipios da Comarca de Verín.
Na provincia de Pontevedra desenvolverán obradoiros de emprego específicos para menores de 30 anos os concellos de Vilagarcía de Arousa, Cambados, Vigo, O Porriño, Moaña, Redondela, e Mos, ademais da Mancomunidade da Área Intermunicipal de Vigo. Serán un total de 127 as persoas beneficiarias.
Estes programas compleméntanse cos novos obradoiros duais de emprego, cos que a Xunta prevé incrementar as oportunidades laborais de 2000 persoas desempregadas, cunha achega de preto de 30 millóns de euros. O obxectivo é poñer en marcha 100 obradoiros duais, que combinarán un contrato de formación e aprendizaxe durante 9 meses e, como principal novidade, a contratación en prácticas de, como mínimo, tres meses máis nunha empresa emprazada no ámbito territorial onde teña lugar o obradoiro, e sempre que o traballo estea vinculado coas materias que se impartan no programa.
Tanto os obradoiros duais como os espefícicos para menores de 30 anos combinan a formación co desenvolvemento dun traballo efectivo, xa que as persoas beneficiarias disporán dun contrato de traballo e percibirán un salario durante a súa participación nesta actividade. Ademais, os alumnos e alumnas recibirán, ao remate da formación, un certificado de profesionalidade con validez en todo o Estado.
Con estes programas búscase mellorar a empregabilidade dos seus participantes ofrecéndolles unha formación para o emprego teórico-práctica de calidade da man de especialistas; a realización de actuacións de mellora das dotacións públicas ou de uso público no ámbito local, así como a prestación de servizos de interese xeral e social; e o impulso da colaboración institucional entre a Xunta e as entidades locais.
O CPETIG, en colaboración coa Amtega, organiza un curso especializado sobre a figura do delegado de Protección de Datos, DPO, que terá lugar na Cidade da Cultura en dúas fins de semana consecutivas do vindeiro mes de setembro.
O curso, de 20 horas de duración, desenvolverase os días días 7, 8, 14 e 15 de setembro, en horario de tarde para as sesións dos venres e de mañá para as sesións dos sábados. Impartido por profesionais do Centro de Formación de AENOR, os contidos estarán centrados nos fundamentos e principios da nova regulamentación de Protección de Datos, nos dereitos das persoas interesadas, nas obrigas de responsables e encargados do tratamento de datos e nas medidas de seguridade, así como no estatuto da figura do Delegado de Protección de Datos, DPO, nas autoridades de control e no réxime sancionador.
Esta formación vai dirixida a responsables de seguridade e cumprimento normativo, auditores internos ou externos que deban avaliar a observancia da normativa, consultores, avogados e, en xeral, a profesionais interesados en prestar servizos neste ámbito.
Obxectivos
O curso vai ofrecer unha visión xeral da normativa europea de Protección de Datos, incidindo en aspectos prácticos para as entidades responsables do tratamento e aos seus prestadores de servizos. Entre outros obxectivos, o curso está deseñado para coñecer os principios básicos da nova normativa, cunha análise detallada das obrigas que afectan ás entidades públicas e privadas que tratan datos de carácter persoal; e afondar nas funcións do DPO, acadando o nivel de coñecemento preciso para poder levalas a cabo.
Inscrición
En breve abrirase o prazo de inscrición a esta actividade formativa.
Os nosos estudantes terán este ano máis opcións formativo-tecnolóxicas para especializárense. E algunhas delas estreitamente relacionadas cos contidos e ferramentas dixitais, máis polo miúdo cos videoxogos, os medios sociais ou a ciberseguridade. A oferta complétase cun achegamento directo ao cálculo avanzado, por parte da Universidade da Coruña e a de Santiago.
En total, neste curso que xa estamos preto de comezar, o ano académico 2018-2019, as universidades galegas van estrear un total de catorce másteres, dous deles oficializados o xoves no Diario Oficial de Galicia e algúns poñendo en xogo o impulso conxunto das tres universidades galegas, a USC, a UDC e a UVigo. Na oferta de formación inclúense contribucións formativas que, como dixemos, cóllennos de preto: Computación de Altas Prestacións (UDC-USC), Ciberseguridade (UVigo-UDC), Deseño, Desenvolvemento e Comercialización de Videoxogos (UDC) ou Comunicación en Medios Sociais e Creación de Contidos Dixitais (UVigo).
Entre os novos mestrados tamén se inclúen o de Investigación e Innovación en Didáctica para Educación Infantil e Primaria, e máis Biodiversidade Terrestre, Economía e Xeoinformática, que implican ás tres universidades. Outra das novidades é o de Xenómica e Xenética, da USC-UVigo, e máis o de Enerxías Renovables, da USC.
A páxina-comunidade Fálame de San Sandurniño vén de superar o seu artigo número 1.000. En palabras do Concello, impulsor da web colaborativa xunto coa aula CeMIT e (por suposto) as veciñas e veciños do termo municipal, o feito de terse acadado a dita cifra “dá boa conta da saúde dun proxecto nacido hai cinco anos, co gallo do Día das Letras Galegas e do Día de Internet”. O Goberno local tamén lembra, pescudando nas orixes da iniciativa, que esta tivo o seu xermolo na aula CeMIT local, botando a andar como “un caixón de saberes do territorio, actuais e pasados, recollidos con texto, fotos, audios e vídeos”. E todo, sublíñase, “cunha alta compoñente de participación social”.
Até o de agora, a web xuntou contribucións de 300 persoas, colleitou máis de 700.000 visitas, contabilizou 75.000 accesos únicos e, como proxecto social, tamén xuntou unha boa presada de premios relacionados coa dinamización cultural e a inclusión dixital.
Polo que se refire á historia número 1.000, é un artigo rubricado polo antigo crego de San Sadurniño e Santa Mariña, Ramón Díaz Raña, quen nos leva da man ao final do Franquismo e, máis en detalle, ás “tensas relacións que mantiña co alcalde daquel entón, Santiago Secada”, quen chegou a remitirlle ao Goberno Civil un informe para que as autoridades vixiasen de preto a actividade pública, política e relixiosa do párroco, acusado por Secada, entre outras cousas, de organizar conferencias “aparentemente de propagación del galleguismo” e de fomentar “una revolución revisionista” contraria aos principios do movemento.
Volvendo ao balance do Concello, o equipo de Goberno local tamén salienta as diferentes pólas que medraron da cerna orixinal, con proxectos paralelos como a canle audiovisual Teño unha horta en San Sadurniño ou o encontro audiovisual Chanfaina Lab, que o vindeiro mes de setembro emprenderá a súa quinta edición. O Concello tamén destaca a media ducia de premios obtidos ata o momento pola iniciativa, entre eles o Acting concedido dentro dun proxecto de ámbito europeo ou o Rodolfo Prada outorgado pola Deputación de Ourense ás mellores experiencias de xestión cultural, ademais dos alcanzados por Teño unha horta en distintos festivais.
A Plataforma É-Saúde, ferramenta dixital dirixida a pacientes e cidadáns que permite acceder a unha serie de servizos interactivos e contidos personalizados de saúde dende calquera dispositivo conectado a internet, vén de ser nominada finalista aos premios New Medical Economics 2018 na categoría de mellor proxecto en saúde dixital 2018.
É-Saúde conta, actualmente, cun total de 51.000 usuarios. Cada semana realízanse 400 novas altas a este servizo, ao que cada día acceden unha media de 2.500 persoas dadas de alta.
É-Saúde, en marcha dende setembro de 2016, posibilita a estas persoas consultar e xestionar as súas citas, revisar a súa folla de tratamentos, os informes de alta, informes de probas diagnósticas, entre outras prestacións directamente dende o seu móbil, ordenador ou tablet.
Dende o mes de setembro do pasado ano os usuarios poden descargarse os informes dos programas de Saúde Pública. En concreto, os informes de prevención e detección precoz de metabolopatías, xordera neonatal, cancro de mama e cancro de colon; ademais dos de calendario de vacinacións. Toda esta información xérase na data da consulta, e contén as probas realizadas ata ese momento.
Para facilitar a consulta, os usuarios poden acceder a estes informes a través da carpeta A miña historia clínica Sergas, e nas carpetas de A miña carpeta de saúde infantil e A miña carpeta de cribado do adulto.
É-Saúde permite acceder á axenda de citas en atención primaria ou especializada actualizada, posibilitando completala con citas e eventos persoais de maneira que o paciente, dende o propio móbil, poida consultar cando ten que recoller unha receita na farmacia, ir a unha consulta médica, realizar unha proba diagnóstica ou facer as actividades de promoción da saúde que tivera programado.
A Plataforma permite, ademais, o acceso a todos os cursos de formación da Escola Galega de Saúde para Cidadáns e dos cursos desenvolvidos polas asociacións de pacientes.
Así mesmo, a través dela pódense consultar servizos ou participar nas comunidades entre o seu persoal médico e de enfermería e outros pacientes, e nas asociacións de pacientes que lle permitan contactar con outros doentes cos que comparta dúbidas, recomendacións de hábitos de vida, etc.; todo iso coa garantía que ofrece o feito de que toda a información estea albergada no servidor do Servizo Galego de Saúde, coa conseguinte seguridade xurídica e tecnolóxica que iso supón.
Máis de 1.000 persoas teñen delegado o acceso a esta plataforma; este acceso está planificado de tal forma que permite que os pais, nais e titores, no caso dos menores de idade, ou os representantes legais ou persoas expresamente autorizadas polo paciente, no caso dos maiores, accedan no nome dos titulares aos servizos telemáticos personalizados que se ofrecen neste dispositivo.
Isto posibilita xestionar de modo máis directo e áxil os procesos de saúde a través dunha terceira persoa autorizada para o efecto. Entre outros servizos, permite ter acceso aos mesmos informes médicos e información sanitaria do titular do dereito, como os informes médicos de probas diagnósticas, as citas médicas ou os fármacos prescritos e pendentes de dispensación na oficina de farmacia. Ademais, Sanidade tamén engadiu aos servizos dispoñibles os informes de calendario de vacinación infantil.
Polo tanto, calquera pai, nai, titor legal ou coidador pode solicitar o permiso no seu centro de saúde, acompañando o seu DNI ou pasaporte, así como libro de familia, partida de nacemento ou documento que acredite a tutela ou a patria potestade para o caso de menores, ou sentencia xudicial de incapacitación ou tutela legal no caso de persoas incapacitadas. É tamén necesario que tanto o paciente como a terceira persoa autorizada e solicitante de dito acceso dispoñan da tarxeta sanitaria do Servizo Galego de Saúde.
A Fundación Vodafone e a Axencia para a Modernización Tecnolóxica de Galicia (Amtega) en colaboración coa Rede CeMIT continúan traballando para impulsar o uso dos smartphones e as tabletas entre as persoas maiores. Os ciclos “Aprende a usar o teu smartphone” e “Aprende a usar a túa tablet”, retomaranse en setembro e prolongaranse ata novembro nas localidades de Brión, Oroso, Pontedeume e Ribadeo.
De cara a darlle continuidade a esta programación, a Fundación Vodafone renovou parte do material cedido para a realización destas actividades con 7 novas tabletas. Pódense consultar as datas e formalizar a inscrición, de balde, na páxina web de CeMIT (https://cemit.xunta.gal/), e na aulas aulas CeMIT de xeito presencial ou contactar coa Oficina CeMIT enviado un correo a cemit@xunta.gal.
Máis de 300 participantes
O primeiro semestre do ano pechouse cuns datos moi positivos coa realización de 35 actividades e a participación de 16 aulas da Rede CeMIT e máis de 300 asistentes.
Cada un dos centros CeMIT que participaron nesta iniciativa dispuxeron de diversos terminais telefónicos e de tabletas, cedidos pola Fundación Vodafone, para facilitar a aquelas persoas que non dispoñan deles o seu manexo. Ademais, como material de apoio, as aulas dispuxeron tamén dunha serie de guías en papel moi sinxelas e vídeos con pílulas formativas breves e moi prácticas, que serven de soporte audiovisual á hora de formar dunha maneira fácil e á medida da persoa interesada.
A Rede CeMIT
A Rede CeMIT é unha iniciativa posta en marcha pola Amtega e conta coa colaboración de 92 concellos e 53 comarcas e está integrada por 98 aulas, co obxectivo común de transformar á cidadanía galega nunha sociedade plenamente integrada na sociedade dixital. A rede é un dos instrumentos principais do Plan de Inclusión Dixital de Galicia para ofrecer á cidadanía recursos de capacitación dixital en función do seu nivel de coñecemento.
Ademais do Plan de Formación, a Rede CeMIT desenvolve campañas de sensibilización e divulgación da importancia e beneficios das TIC entre a cidadanía, empresas e outros colectivos coa organización de charlas e conferencias.
Paralelamente, os centros da Rede contan cun servizo de “aula aberta”, que posibilita o acceso libre e de balde dos usuarios e usuarias para a utilización do equipamento co apoio e asesoramento dun axente especializado.
A Fundación Vodafone
A Fundación Vodafone España é unha institución sen ánimo de lucro que contribúe ao impulso da innovación e a utilización das TIC para mellorar a calidade de vida das persoas e, especialmente dos colectivos vulnerables. Participa en proxectos de innovación tecnolóxica nacionais e europeos, dirixidos a investigar novas aplicacións das comunicacións móbiles que faciliten a vida ás persoas dependentes, maiores e enfermos crónicos.
Desde 2016, Fundación Vodafone é aliada dixital do Plan de Inclusión Dixital de Galicia 2020 e contribúe na alfabetización e capacitación dixital dos galegos e galegas a través do impulso do uso de dispositivos móbiles coas iniciativas “Aprende a usar o teu smartphone” e “Aprende a usar a túa tablet”.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...