San Sadurniño volve estar, nesta recta final do verán, no centro da actividade da dinamización socio-rural galega a través das novas tecnoloxías. O motivo? A celebración do encontro audiovisual creativo e participativo Chanfaina Lab, que arrinca (a quinta edición) este venres, 31 de agosto, logo de catro anos desenvolvéndose como foro creativo de obras de ficción, documentais e creación experimental. Na cita 2018-2019 participarán 32 realizadoras e realizadores.
Segundo informa o Concello, entre as persoas participantes atoparemos “figuras destacadas ou cunha longa traxectoria fílmica”, compartindo escenarios con valores emerxentes e persoas sen experiencia previa “pero coa mesma arela de contar e experimentar coa imaxe”. Unha vez máis, os requirimentos serán a liberdade creativa total, a brevidade (os contidos non deberán ir alén dos 5 minutos) e o carácter local das pezas (o protagonista será novamente San Sadurniño e as súas xentes e historias).
Amais da vertente creativa, o Chanfaina Lab volve brindar obradoiros abertos ao público e proxeccións (venres e sábado). Por exemplo (de balde e na Casa da Cultura) a do filme Dhogs, de Andrés Goteira, comentado polo propio director, que participará no encontro (esta finde) con outras dúas ducias de seareiras e seareiros do novo cinema e dos contidos dixitais: Aser Álvarez, Margarita Ledo, Abel Vega, as youtubeiras de Teño unha horta en San Sadurniño (Carmen Bouza, Carmen Couce, Cruz Piñón, Consuelo Picos e Lucía Pita), Adrián Canoura, Ángela Arnosa, Javier Seoane, Kevin Lorenzo, Bieito Beceiro, Catalina Rodríguez, Cibrán Tenreiro, Helena Girón, Fran Bermúdez, Iago Lourido, Irene Beceiro, Lucía Estevez, Mar Catarina, o triunvirato The Sun Girls (Mónica Cibreiro, Graciela Galdo e Olga López), Natalia Fernández, Pablo Martínez, Rubén Domínguez, Samuel M. Delgado, Sebastián Rodríguez, Simone Saibene e, planeando sobre todos eles, o fotógrafo Gabriel Tizón, quen segundo informa a organización das xornadas, “volverá roubar intres de todas as filmacións do sábado e do domingo”.
Todas as xeiras de divulgación e intercambio de propostas terán o seu arrinque na aula CeMIT de San Sadurniño, o venres ás 18.00 horas, onde se achegará unha introdución sobre o concello e as súas historias, de xeito que as creadoras e creadores poidan ir facéndose unha composición do lugar que será o escenario das súas curtas. Este labor correrá a cargo do profesor Manolo González, un dos ideólogos do Chanfaina, quen explicará como se vai desenvolver o encontro, ademais de facer de guía nunha rápida visita polo centro urbano de San Sadurniño e o paseo do Xubia.
Previamente, a actividade do Chanfaina comezará pola mañá cun obradoiro titulado Introdución ao son, a gravación e a interpretación do espazo sonoro local. Impartirao o experto Carlos Suárez na aula CeMIT entre as 10 e as 14.00h. e das 16 ás 18.00h. Este obradoiro iniciarase cunha charla e exercicios de escoita activa, que introducirán ás persoas participantes no mundo do son e da audición. Despois, mostrarase o uso de gravadoras e micrófonos para realizar rexistros sonoros de campo nos arredores da aula. Como remate farase unha posta en común dos sons gravados seguida dun coloquio sobre a conexión do material recollido coa identidade sonora local.
Despois do obradoiro e da recepción de participantes, a Casa da Cultura acollerá a partir das 20.30h. a Eira de Cineastas, que é unha proxección aberta ao público e gratuíta dunha escolma de pezas de todos os creadores e creadoras.
Cada vez son máis os sistemas de identificación que utilizan os teléfonos móbiles para mellorar a seguridade das aplicacións e facilitar o seu uso, algo que axuda a moitas persoas con discapacidade.
A última tecnoloxía que se está incorporando aos smartphones é o recoñecemento do iris, un sistema que reforza a seguridade e que permite identificar os usuarios cos ollos.
Esta opción é moi interesante, por exemplo, para persoas cunha discapacidade física que teñan dificultades para utilizar un detector de pegadas ou introducir códigos.
Un dos primeiros teléfonos en utilizar esta tecnoloxía son os Samsung Galaxy S9, que se uniron ao BBVA para incorporala á aplicación da entidade bancaria.
Desta forma, os usuarios que teñan o smartphone de Samsung e sexan clientes do banco, poderán acceder á aplicación utilizando o iris dos seus ollos, dunha maneira máis segura e, en moitos casos, máis cómoda.
Quizais xa coñecías freeCodeCamp ou quizais non, en calquera caso xa contaramos antes que se trata dunha excelente plataforma na que podes aprender a programar gratis e ademais gañar experiencia escribindo código para organizacións sen fins de lucro.
Sempre ofreceron tres tipos de certificados para os que debes investir unha boa cantidade de horas (1200 aproximadamente), pero se os obtés estarías sumamente preto de obter un bo posto de traballo como desenvolvedror, pois é a historia de máis de 8.000 estudantes da plataforma. E agora, ampliaron o currículo con 1400 leccións e seis novas certificacións.
E por suposto, todo continúa sendo totalmente gratuíto. Ás xa existentes certificacións en desenvolvemento front end, back end e visualización de datos engadíronse seis máis:
Para obter calquera das certificacións deberás completar cinco proxectos. Tamén se inclúen unha ampla cantidade de retos de código que son opcionais, pero serven xusto para prepararte para os cinco proxectos.
Outra novidade que incluíron na plataforma son as probas. Tamén engadiron unha nova sección con retos para prepararse para entrevistas de traballo, e ademais agora teñen un buscador intelixente que che deixa atopar máis facilmente o que buscas de entre as máis de 8.000 leccións dispoñibles no sitio.
Se queres ver o currículo completo de freeCodeCamp, podes visitar esta ligazón. É en definitiva unha das mellores plataformas dispoñibles para aprender a programar ao teu propio ritmo e totalmente gratis.
Lego segue ampliando o seu catálogo de sistemas de xogo e aprendizaxe baseadas nas súas clásicas pezas e co obxectivo de que a programación e habilidades STEM sexan algo habitual a idades moi temperás.
Lego Coding Express é a súa última proposta e está baseada na aprendizaxe da programación a partir de só 2 anos usando as súas pezas da serie para os máis pequenos, Duplo.
Na nosa guía de xoguetes, xogos e recursos gratuítos para aprender programación sen PCs nin robots xa temos un invitado inesperado. Coding Express, a pesar de introducir aos máis pequenos da casa en conceptos básicos da programación tales como bucles ou programas, non require para o seu uso de computadores nin robots sofisticados. O novo xoguete STEM, que se pode usar só coa serie de pezas Duplo, require tan só dun elemento que actúa a modo de cámara.
Esa cámara, incluída no kit básico, é capaz de identificar as cores das pezas que Lego asociou a determinadas accións, como deterse, acender luces, cambiar de dirección ou emitir sons. A colocación das devanditas pezas nas vías do tren constitúe pois unha primeira aproximación dos menores para crear os seus propios programas segundo o que queiran que o tren faga.
A idade recomendada de uso é a partir de 2 anos, e como é habitual nos sets deste tipo de Lego, van asociados a aplicacións para tablet coas que seguir unha serie de leccións e plans de estudo para sacarlle o maior proveito educativo.
O novo xoguete educativo de Lego ten previsto que estea dispoñible a partir do próximo mes de outubro en EEUU e China, cun prezo de 190 dólares, incluíndo a "peza-cerebro" con cámara, os elementos de cores para programar e pezas para construír libremente. Para o resto de mercados haberá que esperar a 2019.
O Clúster Audiovisual de Galicia vai formar aos profesionais do sector en metodoloxías e ferramentas que lles permitan modernizar os seus procesos e facelos máis eficientes, rendibles e de calidade. Estamos a falar do curso Dixitalización en contornas broadcast e de produción que se celebra o vindeiro mes de outubro en Teo (A Coruña) co obxectivo de achegar aos participantes ás novas tecnoloxías que se poñen en marcha nos procesos de dixitalización da contorna broadcast, ou sexa, na difusión masiva de contidos audiovisuais a través das redes informáticas.
Esta acción formativa, de 30 horas de duración, celebrarase os luns 8, 15, 22 e 29 de outubro na sede da produtora CTV, en Teo, en horario de mañá e tarde. O curso será impartido por Ricardo Cuenca e Jose Barambio, enxeñeiros ambos da empresa Crosspoint. Co apoio do IGAPE, o Cluster Audiovisual oferta un total de 18 prazas, que serán cubertas por orde de inscrición. Os participantes neste curso poderán beneficiarse dos descontos do crédito á formación continua da Fundación FUNDAE.
Amais dos devanditos obxectivos, o curso busca achegar aos participantes ás principais novidades tecnolóxicas do sector, a fin de que “teñan claro cales son as aplicacións que veñen utilizando nos últimos anos e cales están a se introducir actualmente no mercado no proceso de dixitalización”. Tamén se busca fornecer coñecementos máis específicos sobre este tipo de tecnoloxías, novos estándares e formatos a fin de “que o traballador consiga unha formación máis profunda sobre a utilización e desenvolvemento destas ferramentas incluídas na dixitalización”.
A vindeira edición de Pont-Up Store, a quinta, xa quece motores e xa é unha fonte inesgotable de novidades. Este martes, sen ir máis lonxe, a organización lémbranos que xa está aberto o prazo de inscrición dos obradoiros inéditos que Google impartirá na feira innovadora e emprendendora de Pontevedra, que se celebra (coa praza de España como epicentro) entre o 20 e 22 de setembro, ofrecendo máis de 40 actividades en diferentes recantos da cidade, boa parte das cales terán o nexo común de ser actividades para alentar e facilitar o noso camiño cara ao emprendemento. Un dos puntos fortes do programa é, precisamente, o paquete de obradoiros impartido polo xigante Google, convidada especial do evento.
Alén diso, o punto central volverá ser a carpa situada na praza de España o venres 21 e sábado 22 de setembro, onde será posible coñecer as mellores iniciativas de emprendemento do país e participar nas actividades de dinamización que se desenvolverán no espazo central. Este ano, a organización seleccionou 45 emprendementos entre un total de 144 candidaturas procedentes de toda Galicia, o que supón un 10% máis que na anterior edición. Amais, duplicouse o número de empendementos do ámbito tecnolóxico e incrementouse de maneira notable “a calidade das iniciativas, o seu potencial de desenvolvemento, o seu carácter social e mailo enfoque sustentable de moitas delas”, engade o equipo impulsor da feira de innovación, explicando tamén que as TIC volven ser en boa medida protagonistas da mesma, por temáticas abordadas, seguidas polas ideas innovadoras procedentes dos sectores da saúde e o benestar, o turismo, o téxtil, a gastronomía, a cosmética e a xestión cultural. Destas 45 empresas, 37 contarán cun standde balde para mostrar os seus produtos, ideas e servizos, e 6 terán tamén a oportunidade de participar no programa de actividades demostrativas, desenvolvendo propostas como un obradoiro de preparación de alimentos con impresión 3D, unha xincana canina en alianza con Cans Terapia, un obradoiro de robótica para aprender a montar un Stick Arcade baseado en Raspberry PI, torneos de videoxogos, unha demostración de técnicas de pigmentación prehistórica, un showcooking de receitas saudables ou a presentación da nova cooperativa Músicas ao Vivo.
A maiores de todo isto, nas instalacións da Facultade de Belas Artes, o Fab Lab Laboratorio Creativo achegará (a partir do xoves 20), un total de 7 obradoiros dirixidos a diferentes públicos, que terán a oportunidade de vivir a experiencia da fabricación dixital e introducirse tamén no eido da robótica. Tamén se vai estrear o Espazo Gaming, para achegar o emprendemento da man dos videoxogos, a través de torneos e varios talleres prácticos que se desenvolverán na Escola de Restauración.
Actividades de Google
No marco da Pont-Up Store, a multinacional Google impartirá por primeira vez no ámbito estatal o Workshop I am Remarkable, unha iniciativa para empoderar mulleres e convidalas a que celebren os seus logros no ámbito profesional. Esta actividade abéirase aos obxectivos de visualización do papel da muller na empresa, marcados para este ano pola organización. Unha facilitadora dirixirá esta actividade que ten como público obxectivo a mulleres que queiran emprender ou que estean na procura de emprego. Celebrarase na aula do segundo andar da Casa das Campás (Rúa Don Filiberto 9-11) o xoves 20 en horario de 11:00 a 12:30 (inscrición: https://goo.gl/forms/ml2gT65qncmU8bSz) e o venres 21 en horario de 12:30 a 14:00 (inscrición: https://goo.gl/forms/3kt5DJSjt2Gcm1ng2). Os dous obradoiros teñen un aforo máximo de 15 mulleres.
Ademais, a compañía impartirá tamén “unha charla inspiracional” baixo o título Tips para a túa marca persoal + Mentorías Exprés impartida pola experta Loreto Gómez que enfocará a sesión a mostrar as claves da xestión da marca persoal e orientar na creación dunha estratexia para conseguir os nosos obxectivos profesionais. Ao remate da sesión informativa poderemos consultar dúbidas con ela en sesións individuais. Terá lugar o xoves de 17:00 a 18:45, tamén na Casa das Campás. O público obxectivo son homes e mulleres que queiran emprender ou redirixir a súa carreira, pero está aberto a calquera persoa. O aforo é de 50 persoas. A inscrición en https://goo.gl/forms/PEzeTLUBNkAbtQOu2.
Puntazo Exprés 2018
A Pont-Up Store, organizada polo Campus CREA (Universidade de Vigo, Campus de Pontevedra) xunto co Concello, tamén dará acubillo á iniciativa Puntazo Exprés, na que participarán 10 emprendementos explicando en cinco minutos cadansúas propostas a cinco destacadas executivas de empresas e entidades galegas: África González, directora do Centro de Investigacións Biomédicas (CINBIO) da UVigo, presidenta da Sociedade Española de Inmunoloxía e promotora da empresa NanoInmunoTech (NIT) con sedes en Vigo, Zaragoza e Madrid; Nuria Varela-Portas, xerente e fundadora da empresa de agroalimentación ecolóxica, Pazo de Vilane; María Caldeiro, xerente de FUNDAMAR; Lucía Gregorio, adxunta á dirección de REDEGAL, empresa punteira en comercio electrónico e aplicacións para iOS, Android e Windows Phone; e Teresa Fernández-Valdés, executiva de Bambú Producciones, considerada unha das mulleres máis influentes da televisión.
Este ano, como novidade, as presentacións de Puntazo Exprés serán abertas ao público e haberá tempo para a réplica. Todos os proxectos escollidos nesta edición son novos emprendementos con menos de tres anos e medio dende a creación da empresa. Entre os escollidos hai empresas como Exga3D, que deseña alimentos personalizados usando a impresión 3D e revalorizando o descarte de alimentos, destacando (tamén no negocio relacionado cos animais) Yaracan, que facilita terapias con animais; AliaDogs, unha plataforma en liña colaborativa de servizos caninos; ou Bichoh! que fabrica complementos artesáns para cans. O sector dos videoxogos concentra catro propostas: Gaming Troop, unha asociación de xogadores con local propio; The Cloud Gaming, que xurde para impulsar e profesionalizar os deportes en liña en España; SPA-CC, que traballa xerando contornas virtuais e Alobre 3D, experta en xerar modelos 3D orientados á impresión. Dentro do ámbito tecnolóxico destacan tamén Xtonebox, que desenvolve equipos de audio de alta calidade baseándose na antiga tecnoloxía a válvulas; e Taller 7 Maker, onde fabrican prototipos con tecnoloxía 3D.
O Colexio Profesional de Enxeñaría en Informática de Galicia (CPEIG) e máis a Axencia para a Modernización Tecnolóxica de Galicia (AMTEGA) seguen estes días achegando a tecnoloxía argalleira, a que se estuda e se fai coas nosas propias mans, ás nenas e nenos de toda a nosa xeografía. Estamos a falar do programa Tech Kids, que se desenvolve nos concellos até setembro (dende xullo) e que xiran arredor de robótica, creación de personaxes para videoxogos ou pilotaxe de drons. Esta semana, sen ir máis lonxe, as actividades construtivas e ilustrativas sobre vehículos aéreos non tripulados chegan a Ribeira (este mércores) e Santa Comba (o xoves 30). Ademais, este 29 tamén se celebra no Barco unha xornada sobre robótica, que chegará a Coruña o día 31.
Como lembraremos, o obxectivo do programa Tech Kids é “fomentar o talento dixital das nenas e nenos de toda Galicia” ao tempo que “se mellora a conciencia entre a xente nova de que a aplicación de computación e codificación para os problemas sociais reais pode axudar a cambiar o mundo”. Ao abeiro do programa, como dixemos, estanse a organizar sesións de iniciación na pilotaxe de drons coma as que se desenvolven esta semana en Ribeira e Santa Combra. Estas xornadas están destinadas a rapaces e rapazas de entre 8 e 16 anos, que coñecerán as súas partes, como se montan e como son capaces de voar. Tamén farán unha práctica empregando dous tipos de aeronaves: un overcraft (para entender os controis e movementos) e un dron co que percorrerán un circuíto e mesmo competirán entre eles.
As iniciacións aos vehículos aéreos non tripulados proseguirán a semana que vén en Cuntis (día 1), San Sadurniño (día 8), Cerceda (día 10), Valga (día 11) e Celanova (día 12) . O día 10 de setembro, a robótica recala en Abegondo, o 12 en Pontedeume e o 13 en Pontevedra. Tamén haberá cita cos drons en Ribadeo o 13 de setembro.
A alianza comercial que Samsung e Xbox manteñen en Estados Unidos chegará a Europa en breve para unir a distribución e o márketing das videoconsolas de Microsoft e as televisións de Samsung.
Esta é unha gran noticia xa que as consolas Xbox e os últimos modelos de televisores de Samsung prestaron especial atención á accesibilidade, de maneira que a súa combinación é unha opción moi interesante para as persoas con discapacidade e as persoas maiores que queiran gozar dos videoxogos.
No caso da Xbox xa falamos de distintas opcións que incorpora como a do copiloto, que permite manexar con dous mandos o que normalmente se fai cun, facilitando así que unha persoa cunha discapacidade física poida gozar desta tecnoloxía coa axuda doutro usuario.
No caso dos televisores de Samsung, son múltiples as posibilidades de accesibilidade que foron incorporando, como manexar os dispositivos coa voz.
Por esta razón, a combinación de ambas as compañías ofrecerá unha das mellores opcións para as persoas con discapacidade e maiores ás que lles gusten os videoxogos.
Para moitas persoas maiores, e tamén para persoas con discapacidade, o uso da nova tecnoloxía pode chegar a ser moi complicado, polo que necesitan unha axuda que saiba explicar paso a paso como utilizar os diferentes dispositivos, como os teléfonos móbiles intelixentes.
En moitos casos, estes usuarios atópanse máis cómodos utilizando teléfonos de teclas, pero o problema é que cada vez é máis difícil atopar este tipo de terminais e, ademais, en moitos casos teñen limitadas as funcionalidades dun smartphone.
Por esta razón, o ideal é que aprendan a utilizar os teléfonos táctiles, xa que está claro que é o camiño polo que avanza a tecnoloxía, non só nos smartphones senón en todo tipo de dispositivos.
Para axudar nesta aprendizaxe, a Fundación Vodafone presentou hai uns anos unha guía dirixida especialmente a persoas maiores, e tamén a persoas con discapacidade, na que explica paso a paso como utilizar as principais funcións dos smartphones, desde como acendelos ata como navegar por Internet.
Ademais, a guía, que está dispoñible nesta ligazón, incorpora un catálogo de aplicacións que poden ser útiles para estes usuarios que inclúe un código QR para a súa descarga.
Xunto a esta guía, a Fundación Vodafone elaborou en colaboración coa CNSE un curso a base de vídeos para que persoas maiores aprendesen a utilizar os smartphones. De maneira que a combinación das dúas opcións pode ser unha gran axuda.
O único problema desta guía é que se centra en terminais Android e nun modelo de hai uns anos, polo que sería ideal que a fundación puidese actualizalo a novos modelos. Con todo, ata que chegue esa actualización, a guía segue sendo moi útil para iniciarse no uso dun smartphone.
A delegada territorial da Xunta en Ourense, Marisol Díaz Mouteira, desprazouse o venres ata o centro sociocomunitario de Maceda co obxectivo de coñecer de primeira man as instalacións e actividades que alí se desenvolven. Durante os meses de verán este centro acolleu varios cursos dirixidos non só aos maiores da comarca senón tamén á poboación infantil, contribuíndo ao intercambio interxeracional.
Durante a visita, Díaz Mouteira, que estivo acompañada pola xefa territorial da Consellería de Política Social, María José Fernández Laso, destacou que a administración autonómica considera prioritaria a integración das persoas maiores e que por esta razón a Xunta de Galicia aposta por centros coma o que visitou, espazos nos que as persoas maiores poden convivir e socializar entre eles, ao mesmo tempo que se manteñen activos a través das diferentes actividades que levan a cabo nas instalacións. E, ao fío, a delegada territorial lembrou que o pasado mes de xuño, a Consellería de Política Social habilitaba un crédito adicional de 75.000 euros para reforzar a oferta formativa e de ocio dos 11 centros sociocomunitarios emprazados na provincia ourensá. Unha achega que para o caso concreto do centro de Maceda permitiu que durante os meses de verán se levaran a cabo cursos de novas tecnoloxías, de manualidades, de relaxación e benestar, e mesmo de tramitación administrativa co emprego do certificado dixital.
Na actualidade e ata setembro, se está a desenvolver a actividade que leva por nome “A diversión non ten idade” co obxectivo de mellorar a calidade de vida dos usuarios participantes favorecendo un envellecemento activo e inclusivo na sociedade, a través de actividade física, exercicios de psicomotricidade, xogos tradicionais e saídas ao aire libre.
Os centros sociocomunitarios son centros de carácter polivalente, abertos a toda a pobación, dotados de recursos humanos, materiais e financeiros, nos que se fomenta o desenvolvemento de actividades de formación e animación sociocultural dirixidas a propiciar a interrelación entre os distintos sectores de toda a poboación, cunha especial dedicación ás acción relacionadas coa prevención da dependencia e coa autonomía persoal.
A provincia de Ourense conta con 11 centros sociocomunitarios: Ourense centro, Pontepelamios (Ourense), Ribadavia, Maceda, Xinzo da Limia, Viana do Bolo, O Barco de Valdeorras, Petín, Celanova, Carballiño e Verín.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...