A Fundación TIC da Deputación de Lugo está a impartir esta semana no concello da Pastoriza un dos cursos cos que achega, ao longo deste terceiro trimestre de 2018, as novas tecnoloxías da información e as súas principais vantaxes comunicativas e informativas aos maiores do rural. O deputado de Turismo, Eduardo Vidal Baamonde, e o alcalde de Pastoriza, Primitivo Iglesias mantiveron este mércores un encontro cos 20 participantes na actividade. A través desta acción formativa, a veciñanza do devandito concello introdúcese de cheo no manexo básico de móbil e inícianse nas utilidades de Internet, de maneira gratuíta.

A actividade insírese como dixemos no programa formativo da Fundación TIC para este terceiro trimestre de 2018. O programa vén con 1.165 prazas e un total de 87 cursos e obradoiros a impartir na sede do InLugo na cidade da Muralla e máis nas vilas e aldeas do rural, incluído o concello da Pastoriza. 

Os obradoiros foron dados a coñecer recentemente polo presidente da Deputación, Darío Campos Conde, acompañado pola alcaldesa de Lugo, Lara Méndez López, e o patrón da TIC e deputado de Relacións Institucionais, Álvaro Santos Ramos, dixo que “desde o Goberno da Deputación apostamos un trimestre máis polo fomento do uso das novas tecnoloxías entre os lucenses de máis de 55 anos porque cremos firmemente na súa utilidade como unha ferramenta que axuda a mellorar a calidade de vida das persoas maiores”. 

O presidente da TIC fixo saber na presentación que “este trimestre haberá varias novidades”, todas co nexo común de atender as demandas dos usuarios e actualizar coñecementos xa que, “no caso da novas tecnoloxías, os contidos cambian con moita rapidez”, sinalou. Entre estas novidades figuran a posta en marcha dun segundo nivel de Internet para buscas máis avanzadas e obradoiros de pedidos por Internet, cambio de contrasinais e copias de arquivos. Asemade, incluirase por vez primeira un curso de retoque e composición de fotografía por computador, que se suma ao que xa hai no móbil. Por outra banda, e respondendo ás solicitudes das usuarias e usuarios, incrementarase o número de talleres de memoria, entre os que haberá unha actividade a desenvolver coa consola Xbox, e, ao abeiro da programación habitual, terán especial presenza os cursos de móbil e de aplicacións como Facebook, Instagram ou Whatsapp, que segundo lembrou o presidente contan con gran número de seareiros.

Esta fin de semana que vimos de deixar atrás, o día 22, a feira de emprendemento Pont-Up Store chegou ao seu punto álxido, na praza de España de Pontevedra, coa entrega de galardóns que o comité organizador adica cada ano ás máis salientables iniciativas galegas de mercado nas diferentes modalidades do encontro. A iniciativa Yaracán conseguiu o premio ao mellor emprendemento coa súa proposta para facilitar terapias asistidas para mellora a comunicación de persoas con diferentes diversidades funcionais. 

Yaracán, que durante a feira estableceu un acordo con Bichoh!, outra das propostas participantes (adicada ao deseño de complementos artesáns para cans), conseguiu tamén o premio na categoría de turismo, lecer e benestar. Ao acto de entrega de recoñecementos asistiron Anabel Gulías, concelleira de Promocíón Económica de Pontevedra; Jorge Soto, vicerreitor do Campus CREA de Pontevedra pertencente á Universidade de Vigo; María del Carmen Fernández Penas, directora territorial de ABANCA en Pontevedra; e Pedro Figueroa, director do Pont-Up Store. Na categoría de alimentación e restauración, a firma distinguida foi a viguesa Exga3D, unha aposta gastronómica ligada a procesos tecnolóxicos que emprega a impresión 3D para deseñar e personalizar alimentos con grandes posibilidades no eido da saúde. Por exemplo, elaborando pílulas médicas con feituras e sabores de froitas ou doces; ou peixe con formas máis divertidas e gorentosas destinadas a nenas e nenos. Na Pont Up Store os responsables de Exga3D iniciaron unha alianza coa pontevedresa Natural Snack Lab, outra das participantes desta edición, que elabora snacksde froita deshidratada feitos a base de puré de froita deshidratada natural 100% sen conservantes, colorantes nin azucres engadidos.

Na modalidade de formación, educación, arte e cultura, o premio foi dar a Espacio Matrioska, un proxecto de dinamización, produción e axitación cultural, que levan a cabo un grupo de mozas e mozos instalados no concello ourensán de Os Brancos. Na categoría de comunicación, deseño gráfico e evento, as vencedoras foron as Mulleres Atlánticas, unha comunidade de emprendedoras nacida das reivindicacións feministas do 8 de marzo que promove as sinerxías e a xeración de negocio entre mulleres galegas e portuguesas. Na vertente de enxeñarías, consultorías e outros servizos, o galardón foi dar á firma viguesa Xtonebox, que presentou unha proposta de negocio que recupera a antiga tecnoloxía de válvulas para fabricar de xeito artesanal equipos de audio de gran calidade. No ámbito da moda, os complementos e a decoración, as gañadoras foron as impulsoras de Las Flores de Greta, empresa da área metropolitana de Vigo que presenta coleccións téxtiles elaboradas coa técnica do Ecoprint, coa que conseguen trasladar os pigmentos naturais de follas e flores a tecidos de orixe orgánica. 

Na categoría de novas Tecnoloxías da Información e a Comunicación (TIC), o xurado concedeu un premio duplo a dúas empresas pola “súa implicación” nas actividades do Espazo Gaming que se estreaba nesta edición. As gañadoras son SPA-CC, que traballa no deseño de contornas visuais para videoxogos; e a asociación Gaming Troop, que agrupa a centos de seareiros do lecer dixital entre os que promove a colaboración, a competividade no bo sentido e o desenvolvemento de habilidades individuais e en grupo, pero sobre todo “a filosofía de pasalo ben”.

Este xoves 27 toca falar das cousas que podemos facer para que os nosos proxectos tecnolóxicos cheguen a bo porto, amais de ter entre mans un bo proxecto de saída (cousa que en ocasións non abonda para garantir o éxito: cómpre empregar metodoloxías para sacar o mellor da iniciativa e do equipo humano co que contamos). Estamos a falar do congreso #SilverBullet18, segunda edición, que organiza o Colexio Profesional de Enxeñaría Técnica en Informática de Galicia, na Cidade da Cultura (auditorio do edificio CINC). A inauguración está programada para as 9.30 horas. Participan na sesión de apertura o presidente do CPETIG, Marcos Mata, e o director de Área de Infraestruturas e Telecomunicacións da AMTEGA, Adrián Lence.

Trala inauguración, dará comezo a sesión na que intervirán como relatores Laurent Kummer (co-autor da metodoloxía oficial de xestión de proxectos das institucións europeas, publicada en 2016 como OpenPM²), Rafa García (fundador de Valor 2.0 e experto en produtividade persoal e contornas colaborativas), Santiago Cabaleiro (responsable de Valor Persoas do Grupo Visual MS, empresa viguesa premiada como Best Workplace 2017), Santiago Vázquez (director do Instituto de Liderado do Tecnolóxico de Monterrey, México) e Berta Candendo (responsable de Content Factory en Netex Learning, que moderará a mesa de debate). 

Organizado en colaboración coa AMTEGA, o foro está concibido “como un foro de debate dirixido a empresas e profesionais ligados á xestión e á dirección de proxectos tecnolóxico-dixitais, expertos, investigadores e docentes implicados na formación de futuros profesionais nesta área”. Ademais, outro dos seus grandes obxectivos é derrubar barreiras entre a oferta e a demanda do sector da xestión de proxectos, achegando “un espazo de encontro para propiciar un intercambio de información e opinión entre as persoas asistentes”. En base a isto, búscase fomentar a adquisición de habilidades de comunicación, xestión de recursos humanos e liderado, amais de contribuír a amosar as tendencias metodolóxicas no eido da xestión de proxectos software.

A razón do nome
Respecto do nome do congreso, #SilverBullet, lembrar que está inspirado nun “coñecido antipatrón” da xestión de proxectos, ou sexa, un concepto que serve de “anti-referente” para darmos da maneira máis doada posible co camiño de desenvolvemento empresarial polo que nunca, baixo ningún concepto, debéramos introducirnos: o camiño de algo que xa foi probado e que deu sinais claros de non ser de utilidade ou requirido ou demandado. Silver Bullet sería polo tanto “a bala de prata”, un concepto acuñado polo enxeñeiro de software Frederick P. Brooks en 1987 en alusión á inexistencia de metodoloxías, ferramentas ou solucións milagreiras que permitan que un proxecto que xa se converteu nun monstro polos adiamentos, os custos, a calidade, etc, volva ser un proxecto ben xestionado, “algo que unicamente se podería facer cunha bala de prata”.

• A Cidade da Cultura acolleu onte a presentación das iniciativas desenvoltas na aceleradora, na que colaboran o Igape e a Escola de Organización Industrial
• Entre as actividades escollidas para os 17 proxectos desta terceira edición resaltan as enfocadas a servizos tecnolóxicos ou formativos apoiados nas TIC, de desenvolvemento persoal ou do sector da moda
• Os participantes contaron con asesoramento especializado e titoría personalizada no espazo habilitado na Cidade da Cultura, onde se aceleraron máis de corenta novos proxectos ao abeiro das dúas edicións anteriores
• Os novos empresarios poden dispor dos servizos e liñas de axuda que a Consellería de Economía, Emprego e Industria ten activados a través do Igape para apoiar o emprendemento

A Cidade da Cultura acolleu onte a presentación dos proxectos impulsados na terceira edición do coworking impulsado polo Igape e a Escola de Organización Industrial, na que se achegou formación e asesoramento para o desenvolvemento dun total de 17 proxectos.

A directora-xerente da Fundación Cidade da Cultura, Ana Isabel Vázquez Reboredo, felicitou os emprendedores por ter completado esta primeira parte do camiño e convidounos a seguir contando co apoio do Centro de Emprendemento do Gaiás para consolidar os seus proxectos. “O Centro está ao servizo das persoas emprendedoras. Ofrecémoslles un espazo de traballo, acompañámolas coa sabedoría de expertos e levamos a cabo ao longo de todo o ano máis dun cento de actividades para formar, mellorar e dar visibilidade ás súas iniciativas”, subliñou.

Os novos empresarios poderán seguir contando cos servizos e os instrumentos de apoio que ofrece a Consellería de Economía, Emprego e Industria para facilitar a posta en marcha e a consolidación temperá das novas empresas. Deste xeito, poderán continuar accedendo ao asesoramento especializado ou titoría que precisen, así como a préstamos directos como os activados no novo programa de instrumentos financeiros innovadores (IFIs) para financiar os seus investimentos.

Os emprendedores que desenvolveron os 17 proxectos empresariais neste espazo coworking, no que recibiron asesoramento á medida sobre a posta en marcha das súas iniciativas, optaron por ámbitos de actividade tan diversos como son servizos culturais e formativos apoiados nas TIC, de desenvolvemento persoal e de produtos do sector da moda, así como dos relacionados coa valorización de recursos do territorio.

Esta aceleradora, na que nas dúas edicións anteriores se apoiaron 44 iniciativas emprendedoras, forma parte da rede de espazos creada pola Conselleira de Economía, Emprego e Industria, a través do Igape e en colaboración coa Escola de Organización Industrial (EOI). Cofinanciada polo Fondo Social Europeo (FSE), a rede ten como obxectivo favorecer o desenvolvemento de proxectos empresariais e a creación de emprego sobre o territorio, contribuíndo á posta en marcha e consolidación de novas empresas no territorio.

Nos próximos días finalizarán tamén as accións de formación e asesoramento nos espazos coworking de Celanova-Terras da Limia, Ribeira Sacra, Costa da Morte, Mariña lucense e Ferrolterra, nos que, en conxunto, se apoiaron 130 novos proxectos de emprendemento.