• A Rede Europea de Servizos Sociais considera esta iniciativa, que se desenvolve no cárcere de Teixeiro, un exemplo de coordinación entre administracións para mellorar os resultados das intervencións coas persoas en situación ou risco de exclusión
• Desde a súa implantación hai dez anos, ao redor dun millar de reclusos acolléronse a este programa que impulsan a Consellería de Política Social e o Ministerio do Interior

A Xunta de Galicia vén de recibir o recoñecemento da Rede Europea de Servizos Sociais (European Social Network-ESN) polo ‘Proxecto Mandela’, promovido pola Consellería de Política Social e que está dirixido a facilitar a integración social e laboral das persoas que están a piques de cumprir o seu período de reclusión. Así, esta rede internacional vén de destacar esta iniciativa, que se desenvolve no cárcere de Teixeiro, como unha ‘boa práctica’ en materia de políticas activas de inclusión.

Ademais, a Rede Europea de Servizos Sociais valorou especialmente o éxito desta proposta como un exemplo de actuación conxunta entre administracións, e coa participación tamén da sociedade civil. De feito, xunto coa Dirección Xeral de Inclusión Social e o Consorcio Galego de Servizos de Igualdade e Benestar, están implicados o Ministerio do Interior e a Fundación La Caixa. Ao respecto, hay que salientar que esta última entidade enriqueceu o proxecto cunha acción de voluntariado de persoas maiores do Centro Sociocomunitario de Vilalba, que apoia ás persoas reclusas que están máis próximas a saír da cadea na aprendizaxe e adquisición de competencias no campo da informática, internet e o uso de aplicacións.

O ‘Proxecto Mandela’ fai que Galicia sexa pioneira e un referente para o resto de comunidades autónomas á hora de traballar para facilitar o tránsito cara á liberdade da poboación reclusa. Desde a súa posta en marcha no ano 2008, ao redor dun millar de reclusos acolléronse a este programa que dirixe un equipo de inclusión social da Xunta composto por tres profesionais, con dedicación completa e exclusiva. Este persoal ocúpase de deseñar os itinerarios de inserción e da organización dos obradoiros que se desenvolven, os cales están encamiñados á adquisición e mantemento de competencias persoais dos reclusos participantes, así como á aprendizaxe de habilidades e destrezas básicas dirixidas ao emprego.

Así mesmo, cada interno ten o seu programa individualizado de tratamento e o seu itinerario de inserción sociolaboral. Todos os participantes no programa están en idade laboral e, pola súa traxectoria e duración da condena, poden optar a un terceiro grao nun prazo medio de tempo. Unha vez que os internos acadan a liberdade realízase un seguimento do seu proceso de inserción social e laboral, en coordinación cos servizos sociais municipais.

Seminario en Viena

Coincidindo co recoñecemento como boa práctica europea, o ‘Proxecto Mandela’ será un dos exemplos de intervención social que se analizará nun seminario sobre activación inclusiva que terá lugar na cidade de Viena os vindeiros días 5 e 6 de novembro. Este simposio, que conta co apoio da Presidencia austríaca da Unión Europea, estudará como os servizos sociais están axudando a encontrar e reter empregos ás persoas en situación ou con maior risco de exclusión.

Neste sentido, este encontro busca contrastar a evidencia de que a integración dos diferentes servizos públicos que lles brindan apoio ás persoas máis vulnerables ten que ser unha prioridade para mellorar os resultados das intervencións que se realicen coas mesmas.

A Rede Europea de Servizos Sociais é unha plataforma de máis de 125 entidades membros en 33 países que comprende asociacións; departamentos da área de benestar de gobernos rexionais, condados e municipios; axencias reguladoras e de financiamento; universidades e outras organizacións de investigación e desenvolvemento. Esta Rede conta co apoio do Programa da Unión Europea para o Emprego e a Innovación Social 2014-2020.

A sexta edición do Festival de Contidos Dixitais Carballo Interplay vén de abrir o prazo de inscrición de contribucións: series en liña xa consolidadas ou proxectos de series dixitais. A nova entrega do certame, que como lembraremos desenvolverase os días 3, 4, 5 e 6 de abril de 2019, repartirá máis de 5.000 euros en premios. As creadoras e creadores poden enviar as súas achegas desde hoxe mesmo e até o 18 de febreiro a través da web www.carballointerplay.com, de maneira cen por cen de balde.

Segundo informa a organización, as webseries participantes deberán ser producidas entre os anos 2017 e 2019 e ter un mínimo de 3 capítulos emitidos no momento da súa inscrición. Amais, poden ser de calquera duración, temática, xénero, de imaxe real ou de animación, estatais ou internacionais.

Entre as series recibidas, un xurado composto por profesionais do sector audiovisual e da cultura premiará a mellor webserie, a mellor webserie internacional e a mellor webserie en versión orixinal en galego con 800 euros e trofeo, para cada categoría. As eleccións do xurado novo e do público obterán 400 euros e trofeo, cada unha. Tamén haberá un premio ao mellor guión e un premio á mellor dirección, dotados con 200 euros e trofeo. Finalmente, entregaranse trofeos á mellor actriz e ao mellor actor.

Ademas, o Carballo Interplay ofrecerá (por terceiro ano consecutivo) un premio de 1.500 euros para o mellor proxecto de webserie en galego. O galardón resolverase cun pitching en directo durante o festival e a dotación económica deberá destinarse á produción dos primeiros capítulos da webserie premiada, que se proxectarán na sétima edición do festival.

A organización do CIP (o Concello de Carballo e as cineastas Sonia Méndez e Sandra Lesta a través de Interplay Produccións) lembra que o CIP é a día de hoxe un referente en contidos dixitais, recibindo cada ano, na súa sección oficial, máis de 140 webseries de todo o mundo.

Alfonso Sánchez Izquierdo, director xeral da Corporación de Radio e Televisión de Galicia, presentou ante a Comisión de Control da CRTVG do Parlamento galego a estratexia dos medios públicos para os vindeiros anos. Esa estratexia vén marcada por sete grandes retos que condicionarán o sector audiovisual europeo e por un plan de dinamización do sector en Galicia. Ademais, remarcou o rotundo compromiso da CRTVG coa dixitalización e a innovación como vías de desenvolvemento e sustentabilidade ante os cambios normativos e os modelos de consumo e de contidos que impoñen xa as novas plataformas de comunicación global que imperan no mercado, os coñecidos como GAFAN (Google, Amazon, Facebook, Apple e Netflix).

Nunha comparecencia a petición propia, Sánchez Izquierdo sinalou que unha vez acometida a dixitalización dos seus sistemas de produción, a CRTVG afronta unha etapa marcada polos novos retos tecnolóxicos, económicos e de consumo, e pola entrada en vigor antes do remate deste ano da revisión da Directiva europea de Servizos de Medios Audiovisuais de 2010, que obrigará a mudar a lexislación española e galega ao respecto. Sánchez Izquierdo sostivo que «a radiotelevisión pública segue sendo necesaria na sociedade de Internet e é preciso seguir mantendo canles para o debate e a riqueza da pluralidade e diversidade cultural, lingüística, social e democrática das sociedades europeas», pero alertou dos retos da sociedade de Internet, «que esixen máis e mellores servizos nun momento en que os recursos económicos son inferiores, entre outras razóns porque a publicidade está migrando para as redes e plataformas de Internet, nas que resulta indispensable posicionarse». Por esa razón, as radiotelevisións públicas europeas precisan «consolidar modelos e marcos de financiamento sostibles, estables e plurianuais para poder enfrontarse aos novos retos de planificación da transformación tecnolóxica e á innovación que requiren as novas formas de consumo audiovisual». 

Respecto do sector audiovisual galego, o director xeral salientou que a produción de ficción promovida pola CRTVG desde hai 20 anos «creou escola e axudou a impulsar a imaxe de marca de Galicia, destacando que “no 2008 o 58% da programación que se emitía na TVG estaba feita en Galicia e no 2017 o 97% do que se emitiu na TVG está feito en Galicia», o que expresa o peso real da aposta da CRTVG na última década.

Investimento no talento galego con 100 proxectos para as canles dixitais

Neste senso, Sánchez Izquierdo anunciou que a CRTVG investirá na produción de novos formatos cun plan de 100 proxectos de contidos audiovisuais para as novas canles de radio e televisión para difundir a través de Internet, dirixido a creadores novos, sen restar capacidade de produción e emisión nas canles tradicionais. Os obxectivos do plan son promover o talento creativo en Galicia; incrementar a produción de contidos para esas novas canles en Internet; e acadar que eses novos creadores se formen para dar o salto fóra de Galicia. Izquierdo puntualizou que «o plan desenvolverase ao mesmo tempo que se renovan os contidos tradicionais da radio e a televisión que se difunden para Galicia e para as comunidades de galegos que viven noutras partes de Europa e América, vencellados de forma destacable coa nosa terra a través da CRTVG». 

Sinalou que, unha vez acometida a dixitalización dos seus sistemas de produción, a CRTVG afronta unha etapa marcada polos novos retos tecnolóxicos, económicos e de consumo, e pola entrada en vigor antes do remate deste ano da revisión da Directiva europea de Servizos de Medios Audiovisuais de 2010, que obrigará a mudar a lexislación española e galega ao respecto. Neste eido, xorden proxectos coma este, «se hai anos a renovación da televisión de Galicia xirou arredor da creación propia de series de ficción na nosa lingua e a partir do noso singular imaxinario, agora o reto é -sen abandonar as liñas e as tendencias dos programas consolidados- crear contidos para as redes e plataformas dixitais, para a chamada televisión na nube, para achegarse a novos públicos locais e globais que non consumen radio e televisión convencional porque xa teñen outros costumes e formas de acceso á comunicación».

Sete grandes retos para os vindeiros anos

O plan de actuación aprobado para os próximos dous anos traza os retos para manter un sector audiovisual propio, independente e internacionalizado en Galicia, xa que como sinalou o director xeral «o que non podemos asumir nunca é a desaparición dos medios de comunicación públicos porque deben seguir sendo os garantes máximos da atención a todos os estratos dunha sociedade coma a nosa e porque son os únicos que poden salvagardar a presenza da cultura, da lingua, da información de proximidade».

1. O primeiro reto son os novos patróns de consumo da cidadanía, que accede aos contidos das novas plataformas desde calquera dispositivo, desde calquera lugar e desde calquera momento. Isto obrigará aos poderes públicos a xestionar do xeito máis eficiente posible a participación de modelos públicos de comunicación en plataformas xa existentes ou de iniciativas diferentes ás públicas. 
2. O segundo reto son as novas competencias profesionais que marcan as novas titulacións universitarias e de formación profesional, e ás que as empresas audiovisuais teñen que adaptarse, xa que «eses profesionais que agora se forman esixen o noso compromiso para crear empresas modernas e innovadoras». Por iso, puntualizou «é a nosa responsabilidade como directivos, promover os cambios empresariais necesarios para que os traballadores poidan facer o seu traballo nun contexto dixital, dinámico e adaptado ás necesidades da audiencia, como por exemplo a produción informativa e de entretemento con ferramentas de uso cotián como o teléfono móbil e de utilizar a mellor tecnoloxía para chegar antes e contar mellor as historias que un galego e unha galega deban coñecer para estaren ben informados». 
3. O terceiro reto é a sustentabilidade económica. Nunha situación de redución de financiamento público, e nun contexto no que a publicidade está a posicionarse máis nas plataformas dixitais, Sánchez Izquierdo sinalou que o sector empresarial debe estar presente no novo modelo de medio público, e a importancia da comercialización dos produtos audiovisuais en todas as novas canles, «máis alá do televisor no fogar e da radio no coche». 
4. O cuarto reto, sinalou, é o goberno dos medios públicos, con distintos modelos segundo os países: “cómpre analizar polo miúdo as avantaxes doutros modelos de elección de responsables directivos coma a elección por parlamentos coma este, ou por comisións formadas baixo o paraugas de estruturas públicas consolidadas, como pode ser o caso da BBC. O que si queda claro é que acertar no modelo de goberno e control é unha garantía dun modelo de servizo público robusto, ao igual que se fai noutros tipos de estruturas fundamentais para un estado democrático, como a educación ou a sanidade”. 
5. O quinto reto son os contidos, desde a perspectiva da xestión dos dereitos de actividades, «que están sucumbindo a unha sorte de modelo de negocio fundamentado na estipulación desproporcionada dun valor económico que cada vez está máis lonxe da realidade. Aproxímase un escenario cheo de incertezas que fan pensar nun futuro próximo nunha elitización das retransmisións en directo, unha das principais fortalezas da televisión en aberto». Ante esta situación, «a CRTVG debe asumir retos concretos, como participar en coproducións de ficción internacionais e loitar pola capacidade de emisión dos deportes de base, feminino e alternativos. Por iso, chegamos a acordos de interese xeral con organismos públicos, pero tamén con clubs deportivos galegos que priorizan o interese xeral aos acordos comerciais globais». 
6. O sexto reto é o transporte do sinal, xa que «a década dos anos 20 do século XXI vai nacer coa aparición dun novo xeito de transportar o sinal desde os emisores ata os receptores. Son tempos do 5G, da Internet das Cousas e da hiperconectividade. Nese reto debe estar a CRTVG tanto con decisións técnicas puramente, como a implantación das emisións de HD ou de Full HD, como con decisións estratéxicas como a creación e participación de plataformas de distribución por todos os soportes posibles. Debemos garantir o dereito de calquera familia, sexa do centro de Vigo ou do centro dos Ancares, para gozar na mellor das condicións dos contidos da radio e da televisión de Galicia». 
7. Por último, o sétimo reto fai referencia ao novo marco normativo, xa que «nos moveremos nun escenario con novas regras, como é o novo marco normativo chegado da nova directiva europea e as novas regulacións laborais, que buscan mellorar a competitividade e a calidade do traballo, que debe ser tamén un alicerce que a nosa Corporación debe aproveitar nesta nova fase de crecemento».

Formación para a cidadanía dixital para 2019

Sánchez Izquierdo lembrou a responsabilidade social corporativa (RSC) da CRTVG cos seus principios fundacionais, coa promoción e difusión da lingua, coa participación social, a transparencia e a rendición de contas, e tamén co reto da formación, alfabetización e educación para cidadanía dixital, como insta a Comisión Europea.

Neste eido, anunciou que se poñerá en marcha o próximo ano un proxecto de formación para a cidadanía dixital para explicar aos públicos novos a significación da responsabilidade do acceso, uso e consumo da comunicación na sociedade de Internet. Os medios públicos galegos xa se anticiparon ás recomendacións europeas, desenvolvendo no 2018 o seu territorio de Comunicación arredor da dixitalización de Galicia e dedicando, o pasado mes de febreiro, a súa primeira campaña de RSC, A Internet Segura, aos cativos e pais, para conciencialos do novo escenario dixital.

O Campus de Pontevedra vén de levar a cabo a súa nova campaña (a oitava) de recollida de refugallos eléctricos e electrónicos, a Semana de Recollida de RAEE. Segundo informou a Uvigo, a iniciativa saldouse cunha ducia ordenadores de sobremesa e portátiles, dez teléfonos móbiles, 13 impresoras, dous televisores e unha manchea de compoñentes informáticos. En total reuníronse 152 aparellos, entre electrodomésticos e compoñentes informáticos, nos puntos de recepción emprazados do 22 ao 26 de outubro nas diferentes facultades e escolas, na Escola Infantil, no Pavillón Universitario e na Casa das Campás. 

Inserida no plan de acción do proxecto Green Campus, a iniciativa que a Vicerreitoría promove coa colaboración da Oficina de Medio Ambiente (OMA) da Universidade ten como fin sensibilizar á comunidade universitaria sobre o problema que representa unha incorrecta xestión do dito material informático e electrónico, amais de promover un correcto tratamento dos mesmos e das baterías que os alentan. Destes máis de 150 aparellos e dispositivos recollidos, 63 foron depositados no punto instalado na entrada da Facultade de Ciencias Sociais e da Comunicación, o centro que rexistrou unha maior actividade nesta oitava Semana de Recollida de RAEE. No plan de acción do proxecto Green Campus para este curso figura a celebración de dúas edicións máis desta iniciativa, que en 2019 volverá desenvolverase en febreiro e seguramente en maio.